သတင်းနှင့် လှုပ်ရှားမှုများ

  ပဲခူးတိုင်းဒေသကြီး၊ ညောင်လေးပင်ခရိုင်၊ ဒိုက်ဦးမြို့၊ အောင်စိုးမိုးကျေးရွာ၊ ရဲထွန်းဆန်စက်၊ ဆီစက်လုပ်ငန်းရှင် ဦးရဲမြင့်၏လုပ်ငန်းခွင်၌ ဇူလိုင်လ (၂၂) ရက်နေ့၊ နေ့လယ် (၂း၀၀) နာရီအချိန်တွင် စပါးခွံစွန့်ပစ်ပစ္စည်းသုံး လျှပ်စစ်ဓာတ်အားထုတ်လုပ်ရေးစက်ရုံ (Gasifire Power Plant) ထုတ်လုပ်ပုံအဆင့်ဆင့်နှင့်ပတ်သက်၍ ရှင်းလင်းပြောကြားခြင်းအခမ်းအနားကျင်းပပြုလုပ်ခဲ့ကြောင်းသိရှိရပါသည်။

     အဆိုပါအခမ်းအနားတွင်၊ ဒိုက်ဦးမြို့ ရဲထွန်းဆန်စက်၊ ဆီစက်လုပ်ငန်းရှင် ဦးရဲမြင့်က စပါးခွံလျှပ်စစ်ဓာတ်အားထုတ်လုပ်ရေးစက်ရုံ (Gasifire Power Plant) ထုတ်လုပ်ပုံအဆင့်ဆင့်တို့နှင့်ပတ်သက်၍ ရှင်းလင်းပြောကြားခဲ့ပြီးနောက် ဆန်စက်၊ ဆီစက်၊ စပါးအခြောက်ခံစက်လုပ်ငန်းများအား စပါးခွံစွန့်ပစ်ပစ္စည်သုံး လျှပ်စစ်ဓာတ်အားထုတ်လုပ်ရေးစက်ရုံ၏ ဆောင်ရွက်နေမှုအခြေအနေများ၊ ဆီစက်၊ ဆန်စက်၊ စပါးအခြောက်ခံစက်လည်ပတ်နေမှုအခြေအနေ၊ စပါးခွံလျှပ်စစ်ဓာတ်အားထုတ်လုပ်ရေးစက်ရုံ (Gasifire Power Plant) ထုတ်လုပ်၍ ကျေးလက်ဒေသများအထိ လျှပ်စစ်မီးဖြင့် ဆန်စက်ငယ်များ၊ အိမ်တွင်းစက်မှုလုပ်ငန်းများတွင် သုံးစွဲနိုင်ရေးဆောင်ရွက်ပါက ပြည်ပပို့ကုန်အဖြစ် ဈေးကွက်ချဲ့ထွင်နိုင်ကြောင်း၊ လျှပ်စစ်မီးမရရှိသေးသည့်ကျေးရွာများအား  လျှပ်စစ်မီးရရှိသုံးစွဲနိုင်‌ကြောင်းတို့ကို ရှင်းလင်းပြောကြားပြီး အခမ်းအနားသို့တက်ရောက်လာကြသူများအား ဦးရဲမြင့်က (Gasifire Power Plant) ထုတ်လုပ်ပုံအဆင့်ဆင့်နှင့်ပတ်သက်၍ လက်တွေ့ ရှင်းလင်းပြသခဲ့ကြောင်းသိရှိရပါသည်။

      အခမ်းအနားသို့ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးကျော်ဆန်းဦးနှင့်အဖွဲ့ဝင်များ၊ စားသုံးသူရေးရာဦးစီးဌာန၊ မြို့နယ်တာဝန်ခံ ဦးမျိုးမြင့်နှင့် ဖိတ်ကြားထားသောဆန်စက်လုပ်ငန်းရှင်များတက်ရောက်ခဲ့ကြကြောင်းသိရှိရပါသည်။

DOCA(ပဲခူး)

    စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ နတ်တလင်းခရိုင်၊ ပေါင်းတည်မြို့နယ်တာဝန်ခံရုံးမှ ဝန်ထမ်းများသည် စားသုံးသူပြည်သူများအနေဖြင့်  ကုန်စည်နှင့်ဝန်ဆောင်မှုများဝယ်ယူသုံးစွဲရာတွင် ဘေးအန္တရာယ်ကင်းရှင်းစွာအသုံးပြုနိုင်စေရန်အတွက် မိတ်ဖက်ဌာနများဖြစ်ကြသည့် မြို့နယ်စည်ပင်သာယာရေးအဖွဲ့၊ ကျန်းမာရေးဦးစီးဌာနတို့နှင့်ပူးပေါင်း၍ ပေါင်းတည်မြို့ပေါ်ရှိ စားသောက်ကုန် ကုန်စုံဆိုင်နှင့်စတိုးဆိုင်များသို့ (၂၅-၇-၂၀၂၃) ရက်နေ့၌ ကွင်းဆင်းစစ်ဆေးခြင်းများဆောင်ရွက်ခဲ့ပါသည်။

     ထိုသို့ ကွင်းဆင်းစစ်ဆေးဆောင်ရွက်ရာတွင် ဈေးကွက်အတွင်းရောင်းချလျက်ရှိသော အသင့်သောက်အချိုရည်များနှင့် စားသုံးဆီများတွင် စားသုံးသူကာကွယ်ရေးဥပဒေ အခန်း (၁၈) ပါ ကုန်အညွှန်းအမှတ်အသားပြည့်စုံစွာဖော်ပြထားမှရှိ/မရှိကိုစစ်ဆေးခဲ့ပြီးနောက် ဆိုင်ရှင်များအား တရားမဝင်ပြည်ပမှတင်သွင်းသောကုန်ပစ္စည်းများကို ရောင်းချခြင်းမပြုရန်နှင့် ကုန်အညွှန်းအမှတ်အသားစစ်ဆေးပြီးမှသာရောင်းချကြရန် ဆွေးနွေးခဲ့ကြောင်းသိရှိရပါသည်။

DOCA(ပဲခူး)

    ဧရာဝတီတိုင်းဒေသကြီး စားသုံးသူရေးရာဦးစီးဌာန၊ တိုင်းဦးစီးမှူးရုံးတွင် ၂၀၂၃ခုနှစ်၊ ဇူလိုင်လ(၂၈) ရက်နေ့၊ နံနက်ပိုင်းတွင်  ဝန်ထမ်းထုဆန္ဒဖော်ထုတ်ပွဲ(ဒါဘာ)အစည်းအဝေးပြုလုပ်ရာ တိုင်းဦးစီးမှူးဦးစိုးအောင်က အဖွင့်အမှာစကားပြောကြား၍ ဌာနခွဲအလိုက်လုပ်ငန်းဆောင်ရွက်မှုနှင့် ပတ်သက်၍ လိုအပ်သည်များကို ပြောကြားခဲ့ပြီး ဒုတိုင်းဦးစီးမှူး ဦးစိုးဦးမှလည်း ဌာနခွဲအလိုက် လုပ်ငန်းဆောင်ရွက်ရာတွင် အားသာချက်၊အားနည်းချက်များ စည်းကမ်းပိုင်းဆိုင်ရာ ကိစ္စရပ်များ၊ ရုံးတွင်းရုံးပြင် သန့်ရှင်းရေးကိစ္စရပ်များ ၊ ဝန်ထမ်းကျင့်ဝတ်များ၊ သင်တန်းသားကိစ္စရပ်များ သက်ဆိုင်ရာဌာခွဲအလိုက် ဆောင်ရွက်ရသည့် လုပ်ငန်းများစနစ်တကျ လုပ်ထုံးလုပ်နည်းများနှင့်အညီ ဆောင်ရွက်ရန် ဆွေးနွေး ပြောကြားခဲ့ပါသည်။

      ဆက်လက်၍ သက်ဆိုင်ရာဌာနခွဲများမှလည်း ဌာနတစ်ခုချင်းအလိုက် ဇူလိုင်လအတွင်း ဆောင်ရွက်ခဲ့သော လုပ်ငန်းများ၊ ဆောင်ရွက်ပြီးစီးမှု ၊ ဆောင်ရွက်ရန်ကျန်ရှိသော လုပ်ငန်းများနှင့် ဆောင်ရွက်နေသောလုပ်ငန်း များကို ရှင်းလင်းတင်ပြခဲ့ပြီး တိုင်းဒေသကြီးဦးစီးမှူးမှ နိဂုံးချုပ် အမှာစကားပြောကြားခဲ့ကြောင်း သိရသည်။

DOCA(ဧရာဝတီ)

   ဧရာဝတီတိုင်းဒေသကြီး စားသုံးသူရေးရာဦးစီးဌာန၊ တိုင်းဦးစီးမှူးရုံးတွင် ဝန်ထမ်းများ အထက်အောက် အပြန်အလှန်လေးစားမှုရရှိစေရေး လုပ်ငန်းခွင်အတွင်း ပျော်ရွှင်စွာ လုပ်ကိုင်နိုင်ရန်နှင့် ဝန်ထမ်းအချင်းချင်းချစ်ခင်ရင်းနှီးစွာ ရုံးလုပ်ငန်းဆောင်ရွက်ရာတွင် မိသားစုစိတ်ဓာတ်ဖြင့် တစ်ဦးနှင့်တစ်ဦး ကူညီဖေးမစွာဆောင်ရွက်နိုင်ရန် ရည်ရွယ်၍ တိုင်းဒေသကြီးဦးစီးမှူးဦးစိုးအောင် ၊ ဒုတိုင်းဦးစီးမှူး ဦးစိုးဦးနှင့် ဝန်ထမ်းများသည် ၂၀၂၃ခုနှစ်၊ဇူလိုင်လ (၂၈) ရက်နေ့၊ နေ့လယ်စာကို တိုင်းဦးစီးမှူးရုံးတွင် ဝန်ထမ်းမိတ်ဆုံစားပွဲ ပြုလုပ်ခဲ့ပါသည်။

      ဝန်ထမ်းမိတ်ဆုံစားပွဲတွင် တိုင်းဦးစီးမှူး ဦးစိုးအောင်က သီးစုံပဲဟင်း ၊ ငါးခြောက်ကြော်ဖြင့် ကျွေးမွေးခဲ့ပြီး ဝန်ထမ်းများမှလည်း မိမိတို့အိမ်မှ ချက်ပြုတ်လာသော ကြက်သား ၊ ဝက်သား၊ ပဲဟင်း၊ ငါးဟင်း ၊ ငါးပိကြော် ၊ ချဉ်ရည်ဟင်း ၊ ဂေါ်ဖီကြော်နှင့်  ငါးပိထောင်း စသည့် ဟင်းလျာများကို အပြန်အလှန် လဲလှယ်၍ တစ်ပျော်တစ်ပါး လက်ရည်တစ်ပြင်တည်း ပျော်ရွှင်စွာ စားသောက်ခဲ့ပါသည်။

DOCA(ဧရာဝတီ)

        ဧရာဝတီတိုင်းဒေသကြီးအစိုးရအဖွဲ့ တိုင်းဒေသကြီးဝန်ကြီးချုပ်၏ လမ်းညွှန်မှုနှင့်အညီ ဒေသတွင်းထုတ်ကုန်ပစ္စည်းများ သုတေသနနှင့် ဈေးကွက်သုတေသနကော်မတီဖွဲ့စည်းနိုင်ရန် အတွက် ဆက်စပ်နေသောဌာနများ ၊ အသင်းအဖွဲ့များ ၊ ပညာရပ်ကျွမ်းကျင်သူများဖြင့် ကော်မတီတစ်ရပ်ဖွဲ့စည်းရန် တိုင်းဒေသကြီးကုန်သည်များနှင့် စက်မှုလက်မှုလုပ်ငန်းရှင်များ အသင်းချုပ်မှ တင်ပြလာမှုနှင့်ပတ်သက်၍ တိုင်းဒေသကြီးအစိုးရအဖွဲ့မှ ခရိုင်ကုန်သည်စက်မှုအသင်းကို ဖွဲ့စည်းတာဝန်ပေးအပ်ခဲ့ပါသည်။

       အဆိုပါအဖွဲ့၏ ကော်မတီအစည်းအဝေးအား ၂၀၂၃ခုနှစ်၊ ဇူလိုင်လ (၂၆) ရက်နေ့၊ နံနက် (၁၀:၀၀) နာရီ ၊ ပုသိမ်မြို့ ၊ River View Restaurant တွင် ကျင်းပပြုလုပ်ရာ တိုင်းဒေသကြီးကုန်သည်များနှင့် စက်မှုလက်မှုလုပ်ငန်းရှင်များအသင်း ဥက္ကဋ္ဌ ဦးဝင်းမြင့်လှိုင် ၊ အတွင်းရေးမှူး ၊ ဦးမောင်မောင်ဦးနှင့် အဖွဲ့ဝင်များ ၊ တိုင်းအဆင့်ဌာနဆိုင်ရာများဖြစ်သော စားသုံးသူရေးရာဦးစီးဌာန၊ စိုက်ပျိုးရေးဦးစီးဌာန၊ စက်မှုကြီးကြပ်ရေးနှင့်စစ်ဆေးရေးဦးစီးဌာန ၊ မွေးမြူရေးနှင့်ကုသရေးဦးစီးဌာန ၊ ပုသိမ်တက္ကသိုလ် ဒုတိယပါမောက္ခချုပ်နှင့် ပါမောက္ခများ ၊ နည်းပညာတက္ကသိုလ်နှင့် အစိုးရနည်းပညာ အထက်တန်းကျောင်းမှ ကျောင်းအုပ်ဆရာကြီးတို့ တက်ရောက်ခဲ့ပါသည်။

       အစည်းအဝေးတွင် တက္ကသိုလ်မှ ဆရာ/ဆရာမများမှ သုတေသနဆိုင်ရာ ကိစ္စရပ်များ ၊ ဌာနဆိုင်ရာများမှ ဆောင်ရွက်ပေးရမည့် ကိစ္စရပ်များနှင့် ကုန်သည်စက်မှုအသင်းမှ ဆောင်ရွက်ရမည့် ကိစ္စရပ်များကို အပိုင်းလိုက် ဆွေးနွေးတင်ပြမှုများအပေါ် ဧရာဝတီတိုင်းဒေသကြီးအစိုးရအဖွဲ့၊ တိုင်းဒေသကြီးဝန်ကြီးချုပ်ထံသို့ ပြန်လည်တင်ပြဆောင်ရွက်သွားမည်ဖြစ်ကြောင်း သိရပါသည်။

DOCA(ဧရာဝတီ)