Main menu

သတင်းနှင့် လှုပ်ရှားမှုများ

Powered by Drupal

မကွေးမြို့ပေါ်ရှိ စားသောက်ကုန်ထုတ်လုပ်ဖြန့်ချိရေး လုပ်ငန်းရှင်များအား တွေ့ဆုံဆွေးနွေး အသိပညာပေး

      နယ်စပ်မှ တရားမဝင် ဝင်ရောက်လာသော အသားချောင်း(ဟော့ဒေါ့)များ စားသုံးမိ၍ ဘေးဥပါဒ်အန္တရာယ်ဖြစ်ပွားနေကြောင်း တွေ့ရှိရသည့်အတွက် ၂၀၂၂ခုနှစ်၊ ဖေဖေါ်ဝါရီလ (၁၀)ရက်နေ့ နေ့လည် (၁၃:၀၀) နာရီအချိန်တွင် မိတ်ဖက်ဌာနဖြစ်သော အစားအသောက်နှင့် ဆေးဝါးကွပ်ကဲရေးဦးစီးဌာန (FDA)၏ ဦးဆောင်မှုဖြင့် မကွေးတိုင်းဒေသကြီး စားသုံးသူရေးရာဦးစီးဌာန၊ အထွေထွေအုပ်ချုပ်ရေးဦးစီးဌာန၊ စည်ပင်သာယာရေးအဖွဲ့၊ မြန်မာနိုင်ငံရဲတပ်ဖွဲ့မှ တာဝန်ရှိသူများ ပူးပေါင်းလျှက် မကွေးမြို့အတွင်းရှိ ပင်လယ်စာအကင်မျိုးစုံ ဖြန့်ဖြူးရောင်းချနေသည့် (ပင်ရင်း)ဆိုင်များသို့ သွားရောက်ကွင်းဆင်းစစ်ဆေးခြင်းများ ဆောင်ရွက်ခဲ့ကြပါသည်။

       ထိုသို့ ကွင်းဆင်းစစ်ဆေးခဲ့ရာတွင် မကွေးမြို့ ပြည်တော်သာလမ်း၊ မဲထီးလမ်း၊ နတ်မောက်လမ်း၊ အ.ထ.က(၁)လမ်း၊ အဝေရာလမ်း၊ အောင်မေတ္တာရပ်တို့ရှိ ပင်လယ်စာအကင်မျိုးစုံ (ပင်ရင်း)ဖြန့်ဖြူးရောင်းချ သည့် ဆိုင်(၆)ဆိုင်သို့ သွားရောက်၍ အစားအသောက်နှင့် ဆေးဝါးကွပ်ကဲရေးဦးစီးဌာန (FDA) တာဝန်ရှိသူမှ ထိုင်း-မြန်မာနယ်စပ်မှတစ်ဆင့် မြန်မာပြည်အတွင်း တရားမဝင် ဝင်ရောက်လာသော ထိုင်းနိုင်ငံထုတ် အသားချောင်းများစားသုံးမိ၍ ဘေးဥပါဒ်ဖြစ်ပွားမှုများရှိသဖြင့် ရောင်းချခြင်းမပြုကြရန်နှင့် ရောင်းဝယ်ဖောက်ကားသူများကိုလည်း ထိရောက်စွာ အရေးယူသွားမည်ဖြစ်ကြောင်း အသိပေးဆွေးနွေးခြင်းများ ဆောင်ရွက်ခဲ့ပါသည်။

      ဆက်လက်၍ စားသုံးသူရေးရာဦးစီးဌာနမှ ဒုတိယတိုင်းဒေသကြီးဦးစီးမှူး ဒေါ်အေးအေးမိုးမှ စားသုံးသူကာကွယ်ရေးဥပဒေ ၂၀၁၉၊ အခန်း(၁၈)ပါ ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက် (၂/၂၀၁၉)နှင့်အညီ ပြည့်စုံစွာထည့်သွင်းဖော်ပြလာစေရေး နှင့် ပင်လယ်စာအကင်များသည် အစားအသောက်အုပ်စု အရန်သင့်အစားအစာ အမျိုးအစားတွင်ပါဝင်ပြီး မြန်မာဘာသာဖြင့်ဖော်ပြရမည့် ကုန်ပစ္စည်းအမျိုး အမည်၊ အရေအတွက် (သို့မဟုတ်) အသားတင်ပမာဏ၊ သုံးစွဲပုံနည်းလမ်း၊ ထားသိုသိမ်းဆည်းပုံအညွှန်း၊ ဓါတ်မတည့်ကြောင်းဖော်ပြချက်တို့ကို မဖြစ်မနေထည့်သွင်း ဖော်ပြရမည်ဖြစ်ပြီး ထုတ်လုပ်ရက်စွဲနှင့် သက်တမ်းကုန်ရက်စွဲများကိုလည်း ထည့်သွင်းဖော်ပြရမည် ဖြစ်ကြောင်း၊ မိမိကုန်စည်နှင့်ပတ်သက်၍လည်း ဘေးအန္တရာယ်ကင်းရှင်းမှုကို အာမခံမှုပေးရမည်ဖြစ်ကြောင်း၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များ၊ တားမြစ်ချက်များ၊ ပြစ်ဒဏ်များ၊ ကုန်စည်ကြောင့် စားသုံးသူအနေဖြင့် ထိခိုက်နစ်နာမှုရှိပါက တာဝန်ယူဖြေရှင်းပေးရမည်ဖြစ်ပြီး အာမခံမှုနှင့်အညီ ဆောင်ရွက်ပေးမှုမရှိပါက စားသုံးသူမှ တိုင်ကြားနိုင်သည့် အခွင့်အရေးရှိပြီး ဌာနနှင့် စားသုံးသူကာကွယ်ရေးကော်မတီတို့၏ စီမံခန့်ခွဲရေးနည်းလမ်းအရ အရေးယူနိုင်သည့် အချက်များအားအသေးစိတ် ရှင်းလင်းဆွေးနွေးခဲ့ပြီး စားသုံးသူအသိပညာပေးလက်ကမ်းစာစောင်များအား ဖြန့်ဝေပေးခဲ့ကြကြောင်း သတင်းရရှိပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

မကွေးမြို့၊ ခရိုင်အားကစားကွင်း၌ (၇၅)နှစ်မြောက်စိန်ရတုပြည်ထောင်စုနေ့ အထိမ်းအမှတ်အခမ်းအနားတွင် စားသုံးသူကာကွယ်ရေး အသိပညာပေးပြခန်းပြသ

       မကွေးတိုင်းဒေသကြီး၊ မကွေးမြို့တွင် (၇၅)နှစ်မြောက် စိန်ရတုပြည်ထောင်စုနေ့အထိမ်းအမှတ်  ဝန်ကြီးဌာနများ၏ ပြခန်းများဖွင့်ပွဲကို ၂၀၂၂ ခုနှစ်၊ ဖေဖော်ဝါရီလ (၉)ရက်နေ့ နံနက် (၀၉ :၀၀)နာရီအချိန်တွင် မကွေးမြို့၊ ခရိုင်အားကစားကွင်းတွင် ကျင်းပခဲ့ရာ မကွေးတိုင်းဒေသကြီး အစိုးရအဖွဲ့ စီးပွားရေးရာဝန်ကြီး ဦးအောင်ချိန်၊ မကွေးတိုင်းဒေသကြီးအတွင်းရေးမှူး ဦးဝင်းရှိန်၊ မကွေးတက္ကသိုလ်ပါမောက္ခချုပ် ဒေါက်တာခင်မောင်ဦး၊ မကွေးတိုင်းဒေသကြီး စည်ပင်သာယာရေးအဖွဲ့ ညွှန်ကြားရေးမှူး ဦးထင်အောင်၊ မကွေးခရိုင် အထွေထွေအုပ်ချုပ်ရေးဦးစီးဌာန၊ ခရိုင်အုပ်ချုပ်ရေးမှူး ဦးမောင်ထူးတို့မှ ဖဲကြိုးဖြတ်ဖွင့်လှစ်ပေးခဲ့ပြီး ဌာနဆိုင်ရာမှ အရာထမ်းများ၊ အမှုထမ်းများ တက်ရောက်ခဲ့ကြပါသည်။

     အဆိုပါပြခန်းတွင် မကွေးတိုင်းဒေသကြီး စားသုံးသူရေးရာဦးစီးဌာနမှ စားသုံးသူကာကွယ်ရေးဆိုင်ရာ အသိပညာပေးပြခန်းတစ်ခန်း ပါဝင်ပြသခဲ့ပြီး မကွေးတိုင်းဒေသကြီးအတွင်းရှိ တိုင်းရင်းသားများ၏ ရိုးရာယဉ်ကျေးမှုများ၊ ဓလေ့ထုံးထမ်းများ၊ ဝန်ကြီးဌာနအသီးသီးမှ မိမိတို့ဌာနအလိုက် လုပ်ငန်းဆောင်ရွက်ချက်များကို ပြခန်းပေါင်း(၇၀)ကျော်ဖြင့်  ခင်းကျင်း ပြသခဲ့ပါသည်။

       စားသုံးသူရေးရာဦးစီးဌာန၏ ပြခန်းတွင် လာရောက်ကြည့်ရှု့သူ/ အများပြည်သူများ ကြည့်ရှု့လေ့လာနိုင်ရန်အတွက် ဗီနိုင်းကားချပ်(၄)ခုချိတ်ဆွဲပြသထားပြီး ဌာနတာဝန်ကျ ဝန်ထမ်းများမှ ဌာန၏ မျှော်မှန်းချက် (Vission) နှင့် ရည်မှန်းချက် (Mission)တာဝန်များ၊ စားသုံးသူအခွင့်အရေး(၈)ချက်၊ စားသုံးသူများ လိုက်နာရမည့်တာဝန်များ၊ စီးပွားရေးလုပ်ငန်းရှင်၏ တာဝန်များ၊ စားသုံးသူထိခိုက်နစ်နာမှုများအတွက် တိုင်ကြားနိုင်သည့် ဖုန်းနံပါတ်များ ၊ Mobile Application နှင့် Website လိပ်စာများ၊ စားသုံးသူရေးရာဦးစီးဌာနမှ ဆောင်ရွက်လျှက်ရှိသော စားသုံးသူကာကွယ်ရေးဆိုင်ရာလုပ်ငန်းစဉ်များကို လာရောက်ကြည့်ရှု့လေ့လာသူ ပြည်သူများအား အသေးစိတ်ရှင်းလင်းခဲ့ကြပြီး ဌာန၏ လက်ကမ်း စာစောင်များကို ဝေငှခဲ့ခြင်းများ ဆောင်ရွက်ခဲ့ကြပါသည်။

        ပြခန်းကို ၂၀၂၂ ခုနှစ်၊ ဖေဖော်ဝါရီလ (၉)ရက်မှ (၁၂)ရက်နေ့ထိ ခင်းကျင်းပြသသွားမည်ဖြစ်ပြီး အဆိုပါပြခန်းဖွင့်လှစ်ပြသရခြင်းမှာ ပြည်သူများ စိတ်ဝင်စားပြီး ဗဟုသုတရရှိစေစေရန် ရည်ရွယ်ခြင်း ဖြစ်ကြောင်းလည်း သိရှိရပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

 

 

“မလှိုင်မြို့နယ် အ.ထ.က ပန်းအိုင်ကျောင်းတွင် စားသုံးသူအကာကွယ်ပေး အသိပညာပေးဟောပြောခြင်း’’

       မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံးမှ ဦးသန်းစိုး (ဦးစီးအရာရှိ)၊ မလှိုင်မြို့နယ် တာဝန်ခံ ဦးရဲမြင့်ဆန်းတို့သည် ၂၀၂၂ခုနှစ် ဖေဖော်ဝါရီလ (၃)ရက်နေ့၊ မွန်းလွဲ(၁၃:၀၀)အချိန်တွင် မလှိုင်မြို့နယ် ပန်းအိုင်ကျေးရွာ အ.ထ.က ကျောင်းတွင် စားသုံးသူအကာအကွယ်ပေးရေးဆိုင်ရာ  အသိပညာပေးဟောပြောပွဲ ကျင်းပပြုလုပ်ခဲ့ပါသည်။

          ဟောပြောပွဲတွင် ဦးသန်းစိုး (ဦးစီးအရာရှိ) မှ စားသုံးသူရေးရာဦးစီးဌာနအနေဖြင့်  အသိပညာပေးဟောပြောပွဲများ ၊ ဈေးကွက်စောင့်ကြည့်စစ်ဆေးခြင်းများ၊ တိုင်ကြားမှု လက်ခံဖြေရှင်းခြင်းလုပ်ငန်းများ ဆောင်ရွက်လျက်ရှိရာ ‌ကျောင်းသား/ကျောင်းသူများအနေဖြင့် မိမိအခွင့်အ‌ရေးများမဆုံရှုံး မနစ်နာစေရန်အတွက်လာရောက် အသိပညာပေးဟောပြောခြင်းဖြစ်ကြောင်း၊ မိမိတို့ သိရှိပြီ ဆိုပါက ထပ်ဆင့်မိဘဆွေမျိုးများသို့ ထပ်ဆင့်အသိပညာပေး ရှင်းလင်းပေးစေလိုကြောင်းပြောကြားပြီး၊ စားသုံးသူကာကွယ်ရေးဥပဒေကို မြန်မာနိုင်ငံတွင် ၂၀၁၄ခုနှစ်၊ မတ်လ(၁၄)ရက်နေ့တွင် စတင်ပြဌာန်းခဲ့ပြီး ၊ စားသုံးသူကာကွယ်ရေး ဥပဒေသစ်ကို ၂၀၁၉ခုနှစ် ၊ မတ်လ (၁၅)ရက်နေ့တွင် အခန်း(၂၅)ခန်း၊ ပုဒ်မ(၈၄)ခု ပါဝင်သော ဥပဒေအသစ်ကို ပြင်ဆင်အတည်ပြု ပြဌာန်းခဲ့ကြောင်း၊ ဥပဒေပါ စားသုံးသူနှင့် လုပ်ငန်းရှင်တို့၏ အဓိပ္ပါယ်ဖွင့်ဆိုချက်များကို ရှင်းလင်းပြောကြားပြီး မိမိတို့ရရှိသည့် အခွင့်အ‌ရေးများကို ဥပမာများ ဖြင့်လည်းကောင်း၊ လိုက်နာရမည့် တာဝန်များနှင့်ပတ်သက်၍လည်းကောင်း အကျယ်တဝင့်ဆွေးနွေး ပြောကြားခဲ့ပါသည်။ ထိုအပြင်အခန်း (၁၈)၊ ပုဒ်မ(၄၁)ပါ ကုန်အညွှန်း အမှတ်အသားပြဌာန်းချက်နှင့် ပတ်သက်၍ မြန်မာဘာသာဖြင့်ပြည့်စုံစွာဖော်ပြထားသည့် ကုန်ပစ္စည်းများကိုသာ ရွေးချယ်ဝယ်ယူ အသုံးပြုသင့်ကြောင်းနှင့် ကုန်အညွှန်းအမှတ် အသားနှင့်ပတ်သက်၍ သိသင့်သိထိုက် သည့် ဗဟုသုတများကို ပြောကြားခဲ့ပြီး စားသုံးသူ အခွင့်အရေး နစ်နာဆုံးရှုံးမှုများရှိပါက DOCA Myanmar Applicationeနှင့် www .doca .gov .mmတွင် ဝင်ရောက်တိုင်ကြား နိုင်ကြောင်း ဆွေးနွေးခဲ့ပါသည်။  ဟောပြောပွဲတွင် ဆရာ/ဆရာမ(၅)ဦး၊ ကျောင်းသား/ကျောင်းသူ(၁၇၅)ဦး စုစုပေါင်း (၁၈၀)ဦး တက်ရောက်ခဲ့ပြီး၊ လက် ကမ်းစာစောင်များလည်း ဖြန့်ဝေ၍ ဟောပြောပွဲ နံနက် (၂:၃၀) နာရီတွင် ရုပ်သိမ်းခဲ့ပါသည်။

DOCA(မန္တလေး)

မကွေးမြို့ပေါ်ရှိ ပေါင်မုန့်/ကိတ်မုန့် လုပ်ငန်းရှင်နှင့် တွေ့ဆုံဆွေးနွေး အသိပညာပေး

              မကွေးတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၏ လမ်းညွှန်မှုဖြင့် စားသုံးသူကာကွယ်ရေးဥပဒေ ၂၀၁၉၊ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်(၂/၂၀၁၉)နှင့် အညီ ပြည့်စုံစွာထည့်သွင်း ဖော်ပြလာစေရေးအတွက် စားသုံးသူရေးရာဦးစီးဌာနမှ အရာထမ်း/အမှုထမ်း များသည် စားသုံးသူကာကွယ်ရေးဆိုင်ရာ အသိပညာပေးလုပ်ငန်းများ ၊ စားသုံးသူကာကွယ်ရေး ဥပဒေပါပြဌာန်းချက်များအား သိရှိလိုက်နာဆောင်ရွက်နိုင်စေရန် စီးပွားရေးလုပ်ငန်းရှင်များနှင့် တွေ့ဆုံဆွေးနွေး အသိပညာပေးခြင်း ၊ ဈေးကွက်စောင့်ကြည့်စစ်ဆေးခြင်း ၊ ပြည်တွင်းကုန်သွယ်မှု ကဏ္ဍာဖွံ့ဖြိုးတိုးတက်လာစေရေးအတွက် စိုက်ပျိုးမွေးမြူသူတောင်သူများနှင့် တွေ့ဆုံဆွေးနွေးခြင်း ၊သတင်းအချက်အလက်များ ဖြန့်ဝေပေးခြင်း လုပ်ငန်းများ ဆောင်ရွက်လျက်ရှိပါသည်။

             စားသုံးသူရေးရာဦးစီးဌာနမှ အရာထမ်း/အမှုထမ်းများသည် ၂၀၂၂ ခုနှစ် ၊ ဖေဖော်ဝါရီလ (၁၀)ရက်နေ့၊ နေ့လည် (၁၅:၀၀)နာရီအချိန်တွင် မကွေးမြို့၊ အမှတ်(၁)၊ တောင်တွင်းလမ်းမကြီး၊ နွားကူးဘူတာရုံလမ်းထောင့်ရှိ “ Paradise Barker ”  ကိတ်မုန့်နှင့်ပေါင်မုန့် ထုတ်လုပ်သည့် လုပ်ငန်းရှင်သို့ သွားရောက်တွေ့ဆုံခဲ့ရာ လက်ထောက်ညွှန်ကြားရေးမှူး ဒေါ်အေးအေးမိုးမှ ကုန်စည်အုပ်စု (က) အစားအသောက်များမှ  အသင့်စားမုန့်အမျိုးအစားတွင် မြန်မာဘာသာဖြင့် ဖော်ပြရမည့် ကုန်ပစ္စည်းအမျိုးအမည်၊ အရေအတွက် (သို့မဟုတ်) အသားတင်ပမာဏ၊ ထားသိုသိမ်းဆည်းပုံအညွှန်း၊ ဓါတ်မတည့်ကြောင်းဖော်ပြချက်တို့ကို မဖြစ်မနေ ထည့်သွင်းဖော်ပြရ မည်ဖြစ်ပြီး ထုတ်လုပ်ရက်စွဲနှင့် သက်တမ်းကုန်ရက်စွဲများကိုလည်း ထည့်သွင်းဖော်ပြရမည် ဖြစ်သည့်အပြင် မိမိထုတ်လုပ်သည့် ကုန်စည်နှင့်ပတ်သက်၍ ဘေးအန္တရာယ်ကင်းရှင်းမှုကို အာမခံမှု ပေးရမည်ဖြစ်ကြောင်း၊ အသေးစိတ်ရှင်းလင်းဆွေးနွေးခဲ့ပြီး ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ အခက်အခဲတစ်စုံတစ်ရာရှိပါက မိမိတို့ဌာနသို့လာရောက် အကူအညီ တောင်းခံနိုင်ပါကြောင်း၊ ကုန်အညွှန်းအမှတ်အသားဖော်ပြမှုပြည့်စုံပါက ဒေသတွင်းသာမက မြန်မာတပြည်လုံးသို့ ဖြန့်ဖြူးရောင်းချနိုင်မည်ဖြစ်ကြောင်း၊ အသေးစားစက်မှုလုပ်ငန်းဦးစီးဌာနသို့ မှတ်ပုံတင်လျှောက်ထားရန်နှင့်စည်ပင်သာယာမှ ထုတ်လုပ်ရောင်းချခွင့်လုပ်ငန်း လိုင်စင်ပြုလုပ်သွားရန် လိုအပ်ကြောင်း  ရှင်းလင်းဆွေးနွေးခဲ့ပါသည်။

           ဆက်လက်၍ ဦးစီးမှူးဒေါ်အေးအေးခိုင်မှ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များ၊ တားမြစ်ချက်များ၊ ပြစ်ဒဏ်များ၊ ကုန်စည်ကြောင့် စားသုံးသူအနေဖြင့် ထိခိုက်နစ်နာမှုရှိပါက တာဝန်ယူဖြေရှင်းပေးရမည်ဖြစ်ပြီး အာမခံမှုနှင့်အညီ ဆောင်ရွက်ပေးမှု မရှိပါက စားသုံးသူမှတိုင်ကြားနိုင်သည့် အခွင့်အရေးရှိပြီးဌာနနှင့် စားသုံးသူကာကွယ်ရေး ကော်မတီတို့၏ စီမံခန့်ခွဲရေးနည်းလမ်းအရ အရေးယူနိုင်သည့်အချက်များအား အသေးစိတ် ရှင်းလင်းဆွေးနွေးခဲ့ပြီး လက်ကမ်းစာစောင်များအား ဝေငှခဲ့ကြောင်း သိရှိရပါသည်။

           ဤကဲ့သို့ဒေသတွင်း တစ်ပိုင်တစ်နိုင်ထုတ်လုပ်ရောင်းချသည့် လုပ်ငန်းများသို့ သွားရောက် အသိပညာပေးဆွေးနွေးခြင်းအားဖြင့် စားသုံးသူပြည်သူများအနေဖြင့် ဘေးကင်းလုံခြုံမှုရှိ၍ အာမခံမှုပေးနိုင်သည့် ကုန်စည်များကို ရွေးချယ်ဝယ်ယူနိုင်မည့် အခွင့်အလမ်းများ ပိုမိုရရှိလာမည်ဖြစ်သည့်အပြင် လုပ်ငန်းရှင်များအနေဖြင့်လည်း မြန်မာနိုင်ငံတစ်ဝန်းသို့ တင်ပို့ရောင်းချလာနိုင်ခြင်းဖြင့် ဒေသတွင်းအလုပ်အကိုင်အခွင့်အလမ်းများ ပိုမိုဖန်တီပေးနိုင်မည်ဖြစ်ပါကြောင်း ရေးသားတင်ပြလိုက်ရပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

 

“သာစည်မြို့နယ် စားသုံးသူကာကွယ်ရေးဆိုင်ရာ အသိပညာပေး (Talk Show) ကျင်းပပြုလုပ်”

          စားသုံးသူ‌ရေးရာဦးစီးဌာန၊ မိတ္ထီလာခရိုင်ဦးစီးမှူးရုံးမှ မြို့နယ်တာဝန်ခံသည် သာစည်မြို့နယ်၊ မြို့နယ်ပြန်ကြားရေးနှင့် ပြည့်သူ့ဆက်ဆံရေးဦးစီးဌာနနှင့်ပူးပေါင်း၍ လူထုအခြေပြုဗဟိုဌာနခန်းမ (Community Center) ၌ (၂.၂.၂၀၂၂) ရက်နေ့တွင် (၁၀:၀၀)နာရီမှ(၁၁:၀၀)နာရီထိ စားသုံးသူကာကွယ်ရေးဆိုင်ရာ အသိပညာပေးဆွေးနွေးပွဲ Talk Showအစီအစဉ်ကို ကျင်းပပြုလုပ်ခဲ့ပါသည်။ 

          ဆွေးနွေးပွဲတွင် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန ဦးစီးမှူး ဒေါ်သင်းသင်းမှ Talk Show အစီအစဉ်ကျင်းပပြုလုပ်ရသည့် ရည်ရွယ်ချက်ကိုရှင်းလင်းပြီး၊ စားသုံးသူ‌ရေးရာဦးစီးဌာန မြို့နယ်တာဝန်ခံ ဦးသက်ချိုဦး(ဒု-ကြီးကြပ်ရေးမှူး)မှ စားသုံးသူရေးရာဦးစီးဌာန၏ မျှော်မှန်းချက်ဖြစ်သည့် “စားသုံးသူများ လုံခြုံစိတ်ချရမှုရှိစေရေး”နှင့် ရည်မှန်းချက်တာဝန် (၄) ရပ်၊ ရည်ရွယ်ချက် (၅)ရပ်၊ ကုန်စည်(သို့)ဝန်ဆောင်မှုများနှင့် စပ်လျဉ်း၍စားသုံးသူများ၏ အခွင့်အရေးနှင့် အကျိုးစီးပွားတို့ကို ကာကွယ်ပေးခြင်းနှင့် စားသုံးသူနှင့် လုပ်ငန်းရှင်တို့အကြား မျှတမှုရှိအောင် ဆောင်ရွက်နေသည့် လုပ်ငန်းစဉ်များ၊ စားသုံးသူတို့၏ အခွင့်အ‌‌ရေး (၈)ချက်နှင့်လိုက် နာဆောင်ရွက်မည့်တာဝန် (၄) ရပ်၊ စီးပွားရေးလုပ်ငန်းရှင်များ လိုက်နာရမည့်တာဝန် (၁၁)ချက်၊ စားသုံးသူဘေး အန္တရာယ်ကင်းရှင်းရန်အတွက် အခြားဌာနများနှင့် ပူးပေါင်း၍ စျေးအတွင်းအစားအသောက်၊ ဆေးဝါး၊ အလှကုန် လူသုံးကုန်စသည်တို့ကို ကုန်အညွှန်းအမှတ်သား ပြည့်စုံမှုရှိ/မရှိ စစ်ဆးမှုများပြုလုပ်လျက်ရှိကြောင်းနှင့် ကုန်ပစ္စည်းများကို ဝယ်ယူရာတွင် ကုန်အညွှန်းအမှတ်အသားများအား သေချာကြည့်ရှု့ဝယ်ယူကြရန် အသိပေးရှင်းလင်း ပြောကြားခဲ့ပါသည်။

          စားသုံးသူပြည်သူများအနေဖြင့် နစ်နာဆုံးရှုံးမှု တစ်စုံတရာရှိပါက စားသုံးသူရေးရာဦးစီးဌာန၊ စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ(CICC)ရုံးခန်း၊ စားသုံးသူရေးရာဦးစီးဌာန၊ ‌ပေါက်ချောင်းရပ်၊ မိတ္ထီလာမြို့ 064 2223102 ၊ 064.2223093 သို့ လည်းကောင်း၊ လူကိုယ်တိုင်လာရောက်၍သော်လည်းကောင်း၊ DOCA Myanmar Applicationeနှင့် www .doca .gov .mm တွင်လည်းကောင်း တိုင်ကြားမှုပြုလုပ်နိုင်ကြောင်း အသိပေးပြောကြား ဆောင်ရွက်ခဲ့ပါသည်။

DOCA(မန္တလေး)

“စျေးကွက်စောင့်ကြည့်စစ်ဆေးခြင်း’’

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မလှိုင်မြို့နယ် တာဝန်ခံ ဦးရဲမြင့်ဆန်းသည် (၂.၂.၂၀၂၂) ရက်နေ့ နံနက် (၉:၃၀) နာရီအချိန်တွင် မြို့နယ်အထွေထွေ အုပ်ချုပ်ရေးဦးစီးဌာန၊ မြို့နယ်စည်ပင်၊ မြို့နယ်မီးသတ်ဦးစီးဌာနတို့နှင့်ပူးပေါင်း၍ မလှိုင်မြို့ပေါ်ရှိ ကုန်စုံဆိုင်ကြီးများသို့ သွားရောက်၍ စားသုံးသူများ ကုန်စည်များအားဘေးအန္တရာယ်ကင်းရှင်းစွာ အသုံးပြုခွင့်ရရှိနိုင်စေရန် ကုန်အညွှန်းမှတ်သားပြည့်စုံသော ကုန်စည်များကိုသာ ‌ရောင်းချစေရန်အတွက် ဈေးကွက်းစောင့်ကြည့်စစ်မှုများပြုလုပ်ခဲ့ရာ စာသုံးဆီများ ရောင်းချခြင်းနှင့်ပတ်သက်၍ ကုန်အညွှန်းအမှတ်သားဖော်ပြရာတွင် ဟင်းသီးဟင်းရွက်ဆီ(Vegetable Oil, Cooking Oil)နှင့် စပ်လျဉ်း၍ ညွှန်ကြားချက်အမှတ်(၁/၂၀၂၁)ပါ စီးပွားရေးလုပ်ငန်းရှင်များ လိုက်နာရမည့် အချက်အလက်များအား အသိပညာပေးရှင်းလင်းဆွေးနွေးခဲ့ပါသည်။

          ဆက်လက်၍ ကုန်စည်များပေါ်တွင် ကုန်အညွှန်းအမှတ်အသားနှင့်ပတ်သက်၍ အသိပညာပေးလက်ကမ်းစာစောင်များဖြန့်ဝေခဲ့ကြောင်း သတင်းရရှိပါသည်။

DOCA(မန္တလေး)

မိတ္ထီလာမြို့အတွင်းရှိ လုပ်ငန်းရှင်များအား ကုန်စည်များတွင်ကုန်အညွှန်းအမှတ်အသားပြည့်စုံ မှန်ကန်စေရေး တွေ့ဆုံဆွေးနွေးခြင်း

          စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူးရုံးတွင် ၂၀၂၂ခုနှစ် ၊ ဖေဖော်ဝါရီလ ၂ ရက်နေ့၌  မိတ္ထီလာမြို့၊ စက်မှုဇုန်ရပ်ကွက်၌ ထုတ်လုပ်တင်သွင်းရောင်းချနေသော လွင်မိသားစု ဆီစက်ပိုင်ရှင်တစ်ဦးသည် မိတ္ထီလာခရိုင်ဦးစီးမှူး ဦးဇော်မင်းနှင့်တွေ့ဆုံ၍ ၎င်း၏  အမှတ်တံဆိပ်တွင် ထည့်သွင်းဖော်ပြသွားမည့် ကုန်အညွှန်းအမှတ်အသားများသည် စားသုံးသူကာကွယ်ရေး ဥပဒေပြဌာန်းချက်များနှင့် ကိုက်ညီမှု ရှိ/မရှိနှင့် လိုအပ်ချက်များ ပြင်ဆင်ပြုပြင်နိုင်ရန် တိုင်ပင်ဆွေးနွေးမှု ပြုခဲ့ပါသည်။

         အဆိုပါလုပ်ငန်းအနေဖြင့် မြေပဲဆီသန့်၊ နေကြာဆီသန့်၊ နှမ်းဆီသန့်တို့အား (၁၀)ပိဿာပုံး၊ (၅)ပိဿာပုံး၊ (၃)ပိဿာပုံး၊ (၂)ပိဿာပုံး ၊ (၁)ပိဿာပုံး၊ (၅၀)ကျပ်သားဘူး၊(၂၅)ကျပ်သားဘူးများဖြင့် ထုတ်လုပ်လျက်ရှိကြောင်းနှင့် စားသုံးသူ ကာကွယ် ပေးရေးဥပဒေနှင့်အညီ ကုန်အညွှန်းအမှတ်အသား ပြည့်စုံစွာတပ်ဆင်ရန်အတွက် မိတ္ထီလာခရိုင်ဦးစီးမှူးရုံးတွင် လာရောက်လျှောက်ထားခဲ့ရာ မိတ္ထီလာခရိုင် ဦးစီးမှူးရုံးမှ ကုန်စည်အုပ်စုအလိုက် မြန်မာဘာသာဖြင့် ကုန်အညွှန်းအမှတ်အသားဖော်ပြရမည့် အသေးစိတ် စိစစ်ချက်၊ ကုန်စည်အုပ်စု(က) အစားအသောက်များ အပိုဒ်ခွဲငယ်(၈)ပါ ဖော်ပြရမည့်အချက်များနှင့် တိုက်ဆိုင်စိစစ်ပေးခဲ့ကြောင်း သိရှိရပါသည်။

DOCA(မန္တလေး)

စတိုးဆိုင်နှင့်ကုန်စုံဆိုင်များသို့ ဈေးကွက်စောင့်ကြည့်စစ်‌ဆေးခြင်း

          မန္တလေးတိုင်းဒေသကြီး၊ မိတ္ထီလာခရိုင်၊ ခရိုင်ဦးစီးမှူးရုံးမှ ဒု-ခရိုင်မှူးဦးဆောင်၍ စစ်ဆေးရေးအရာရှိ ဦးစန်းအောင်နှင့်အဖွဲ့၊ ဈေးကွက်စောင့်ကြည့်စစ်ဆေးရေးအဖွဲ့ဝင်များနှင့် ကျေးရွာအုပ်ချုပ်ရေးမှူးအဖွဲ့တို့သည် မိတ္ထီလာမြို့၊ ပေါက်ချောင်းရပ်ကွက်ရှိ စတိုးဆိုင်နှင့် ကုန်စုံဆိုင်များသို့ (၁.၂.၂၀၂၂)ရက်နေ့ (၁၀း၀၀)အချိန်တွင် ကုန်ပစ္စည်းများထုတ်ကုန်လုံခြုံစိတ်ချရမှုရှိစေရန်၊ ကုန်ပစ္စည်းများတွင် ကုန်ညွှန်းအမှတ်အသားပြည့်စုံစွာ ပါရှိစေရန်ရည်ရွယ်၍ ဈေးကွက်စောင့်ကြည့်စစ်ဆေးမှုများ ပြုလုပ်ခဲ့ပါသည်။

          ရေချိုကျေးရွာအတွင်း ဈေးကွက်စောင့်ကြည့်စစ်ဆေးခြင်းပြုလုပ်ရာတွင် စတိုးဆိုင်နှင့် ကုန်စုံဆိုင် များတွင် ရောင်းချနေသော ကုန်ပစ္စည်းများ ကုန်အညွှန်းအမှတ်အသားထည့်သွင်း ဖော်ပြထားခြင်း ရှိ/မရှိနှင့် အချို့သော အသင့်စားမုန့်များသည် ကုန်ညွှန်းအမှတ်သားများ ထည့်သွင်းဖော်ပြထားသော်လည်း စားသုံးသူ ကာကွယ်ရေးဥပဒေပါ ကုန်အညွှန်းအမှတ်အသား ဖော်ပြရမည့်အချက်များအရ လိုအပ်မှုရှိနေကြောင်း စစ်ဆေး တွေ့ရှိရသဖြင့် စားသုံးသူကာကွယ်ရေး၏ အမြင့်ဆုံးပြစ်ဒဏ်ဖြစ်သည့် ဥပဒေပုဒ်မ (၇၃)အရ (၂)နှစ်ထက်မပိုသောထောင်ဒဏ် ဖြစ်စေ၊ ကျပ်သိန်း (၂၀၀) ထက်မပိုသောငွေဒဏ်ဖြစ်စေ၊ ဒဏ်(၂) ရပ်လုံးဖြစ်စေ အရေးယူမှုများ ပြုလုပ်နိုင်ကြောင်း ဆွေးနွေးပြောကြားခဲ့ပြီး  စားသုံးသူကာကွယ်ရေးဥပဒေနှင့် အညီကုန်ပစ္စည်းများ ရောင်းချနိုင်ရေးတို့ကို အလေးထားထည့်သွင်းဆွေးနွေးဆောင်ရွက်ခဲ့ကြောင်းသိရှိရပါသည်။

DOCA(မန္တလေး)

ပခုက္ကူစက်မှုဇုန်မှ ဆီစက်များအား ကွင်းဆင်းမေးမြန်း

            စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်ချက်ဖြင့် ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင်နှင့်ဝန်ထမ်းများသည် (၇.၂.၂၀၂၂)ရက်နေ့၊ နံနက်(၁၁:၃၀)နာရီအချိန်တွင် ပခုက္ကူစက်မှုဇုန်ရှိ အကြီးစား၊ အလတ်စား ဆီစက်လုပ်ငန်းများ၏ လအလိုက်ကြိတ်ခွဲထုတ်လုပ်နိုင်မှုနှင့် ယခင်နှစ်ယခုနှစ် ကြိတ်ခွဲထုတ်လုပ်နိုင်မှုများကို မေးမြန်းရန်ကွင်းဆင်းဆောင်ရွက်ခဲ့ပါသည်။

          စက်မှုဇုန်ရှိ အကြီးစားဆီစက်လုပ်ငန်းများဖြစ်သော (SSS)ဆီစက်၊ ဂရိတ်ဆီစက်နှင့် ရွှေပြည်သာဆီစက် လုပ်ငန်းများမှ ယခင်နှစ်ထက်ယခုနှစ် နိုဝင်ဘာ၊ ဒီဇင်ဘာ၊ ဇန်နဝါရီလများမှစ၍ ပိုမို ထုတ်လုပ်လာနိုင်ခဲ့ကြောင်း၊ စားအုန်းဆီဈေးမြင့်မားလာသည်နှင့်အမျှ စက်ပဲဆီသုံးစွဲမှု ပိုမိုများပြားလာကြောင်း၊ ယခင်နှစ်များက တစ်နေ့လျှင်ဆီစက်များ နေ့ဝက်သာလည်ပတ်ခဲ့ပြီး  ယခုနှစ်များတွင် အလုပ်သမားများအား အဆိုင်း(၂)ဆိုင်းခွဲ၍ လည်ပတ်နေရကြောင်း ဆီလုပ်ငန်းရှင်များထံမှ သိရှိရပါသည်။ ယခင်နှစ်များမှ တစ်နေ့လျှင် ဆီပီပါ (၈)လုံးသာ ထုတ်ခဲ့ပြီး ယခုလများတွင် တစ်နေ့လျှင် ဆီပီပါ (၁၄)လုံးမှ အများဆုံး(၁၅)လုံးထိ ပိုမိုထုတ်လုပ်လျက်ရှိပါကြောင်း၊ လုပ်သားများ၏ လုပ်အားခမှာလည်း နေ့ဆိုင်းလုပ်သားခ တစ်ဦးလျှင် (၈၀၀၀)ကျပ်၊ ညဆိုင်းလုပ်အားခ တစ်ဦးလျှင်(၁၀၀၀၀)ကျပ်ဖြင့် လည်ပတ်လျက်ရှိပါကြောင်း ဆီကုန်သည်များထံမှ သိရှိရပါသည်။

          အကြီးစားစက်ပဲဆီ၏ ဈေးကွက်မှာလည်း ပခုက္ကူမြို့သာမက အခြားမြို့နယ်များသို့လည်း တင်ပို့ရောင်းချခြင်းများလည်းရှိပါကြောင်း၊ စက်ပဲဆီဈေးနှုန်းအနေဖြင့် ယခင်နှစ်များက မြေပဲဆံ တစ်ပိဿာလျှင် (၂၆၅၀)ကျပ် ဖြစ်၍ စက်ပဲဆီ တစ်ပိဿာလျှင် (၅၅၀၀)ကျပ် ဈေးဖြစ်ပြီး၊ ယခုနှစ်တွင် မြေပဲဆံတစ်ပိဿာလျှင်(၃၀၀၀)ကျပ်ဖြစ်ပြီး စက်ပဲဆီ တစ်ပိဿာလျှင် (၅၈၀၀/၅၉၀၀) ကျပ် ဈေးဖြင့် ရောင်းချနေကြောင်း ဆီလုပ်ငန်းရှင်များထံမှ သိရှိရပါသည်။

          ဆီကြိတ်ရာတွင် မြေပဲဆံကို အောင်လံ၊ ကျောက်ပန်းတောင်းနှင့် မြင်းခြံနယ်များမှ တစ်ပိဿာလျှင် (၃၀၀၀)ကျပ်ဖြင့် ဝယ်ယူရကြောင်း၊ စက်ပဲဆီကြိတ်ရာမှ ထွက်ရှိလာသော မြေပဲ ဖတ်များကိုလည်း တစ်ပိဿာလျှင် (၁၅၀၀)ကျပ်ဖြင့် ရောင်းချရကြောင်း၊ ဆီကုန်သည်များထံမှ သိရှိရပြီး မြေပဲဆီသာမက နှမ်းဆီများလည်း မကြာခဏကြိတ်ခွဲရကြောင်း၊ နှမ်းဆီကြိတ်ရာတွင် နှမ်းနီ၊ နှမ်းညိုနှင့် စပ်ကြားနှမ်းများကို အသုံးပြုပြီး နှမ်းတစ်တင်းလျှင် ဆီ(၆)ပိဿာထွက်ရှိပါကြောင်း၊ ဆီကြိတ်ရာမှ ထွက်ရှိလာသော နှမ်းဖတ်များကိုလည်း ကျောက်ဆည်နယ်ရှိ အစာစပ်စက်ရုံများသို့ တစ်ပိဿာလျှင် (၁၂၀၀)ကျပ်ဖြင့်ပြန်လည်ရောင်းချရပါကြောင်း၊ နှမ်းဆီတစ်ပိဿာလျှင် (၅၅၀၀) ကျပ်ဖြင့် ရောင်းချကြောင်း သိရှိရပါ သည်။

          နိုင်ငံတော်မှ ပြည်သူများ စားအုန်းဆီသုံးစွဲမှုလျော့ချရန် စားအုန်းဆီအစား မြေပဲဆီ၊ နှမ်းဆီများ ပြောင်းလဲသုံးစွဲလာရေးအတွက် ပြည်ပမှ စားအုန်းဆီတင်သွင်းမှု လျော့ချလာမှုအပေါ် ပြည်တွင်းဆီစက်များ အရှိန်အဟုန်နှင့် ကြိတ်ခွဲထုတ်လုပ်လာနိုင်ကြောင်း၊ မိမိဒေသရှိ လုပ်သားများအား အလုပ်အကိုင်အခွင့်အလမ်းများ ဖန်တီးပေးနိုင်ကြောင်း၊ လုပ်ငန်းရှင်များအနေဖြင့်လည်း အချိန်ပြည့် ကြိတ်ခွဲထုတ်လုပ်မှုမှ ထွက်ရှိသော စားသုံးဆီအားလည်း ရောင်းချနေရကြောင်း၊ မြေပဲဆံ တစ်ပိဿာ(၂၉၀၀-၃၀၀၀-၃၁၀၀)ကျပ်ဈေးဖြင့် ဝယ်ယူရောင်းချနေရခြင်းကြောင့် စိုက်ပျိုးတောင်သူ များလည်း အဆင်ပြေကြောင်း၊ စားသုံးသူပြည်သူများမှလည်း စားအုန်းဆီဈေးနှင့် စက်မြေပဲဆီ ဈေးနှုန်းကွာဟမှုသိပ်မရှိခြင်းကြောင့် စက်မြေပဲဆီကိုသာ ပိုမိုစားသုံးလာကြောင်း၊ လျှပ်စစ်မီးအား အချိန်မှန်ရရှိပါက ကြိတ်ခွဲထုတ်လုပ်မှု/ရောင်းချနိုင်မှုမှာ ယခုထက် ပိုမိုမြင့်တက်လာနိုင်ကြောင်းနှင့် မီးမရရှိပါက အင်ဂျင်ဖြင့်လည်ပတ်ရမည်ဆိုလျှင် စက်သုံးဆီဈေးနှုန်းမြင့်တက်မှုကြောင့် စက်မြေပဲဆီ ဈေးတက်လာနိုင်ဖွယ်ရှိကြောင်း လုပ်ငန်းရှင်များ၏ ပြောကြားချက်အရ သိရှိရပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

 

“စားသုံးသူကာကွယ်ပေးရေး အသိပညာပေးဟောပြော ဆွေးနွေးပွဲကျင်းပပြုလုပ်”

          စားသုံးသူရေးရာဦးစီးဌာန ၊ မိတ္ထီလာခရိုင်ဦးစီးမှူးရုံးမှ ဦးသန်းစိုး (ဦးစီးအရာရှိ) ဦးဆောင် သော ဝန်ထမ်းများသည် ၂၀၂၂ခုနှစ် ဇန်နဝါရီလ (၂၈)ရက်နေ့ ၊နံနက်(၀၉:၃၀)အချိန်တွင် မလှိုင်မြို့၊ မြို့သစ် အခြေခံပညာ အထက်တန်းကျောင်းတွင် စားသုံးသူအကာအကွယ်ပေးရေးဆိုင်ရာ  အသိပညာပေးဟောပြောပွဲ ကျင်းပပြုလုပ်ခဲ့ပါသည်။ ဦးသန်းဦးက အဖွင့်အမှာစကားပြောကြားရာတွင် စားသုံးသူရေးရာဦးစီးဌာနသည် ယခင်နှစ်များက  အသိပညာပေးဟောပြောပွဲများ ၊ ဈေးကွက်စောင့်ကြည့်စစ်ဆေးခြင်းများ ပြုလုပ်ခဲ့သော်လည်း Covid-၁၉ ရောဂါကူးစက်မှု အခြေအနေများကြောင့် CICC Meiktila Facebook Pageတွင် Onlineမှ လည်းကောင်း၊ ပြန်ကြားရေးနှင့်ပြည့်သူဆက်သွယ်ရေးဦးစီးဌာနနှင့် ပူးပေါင်း၍ Talk Show အစီအစဉ်များ ဖြင့်လည်းကောင်း စားသုံးသူအသိပညာပေးရေးလုပ်ငန်းများ ဆောင်ရွက်ပေးခဲ့ပါကြောင်း၊ စားသုံးသူများအနေဖြင့် မိမိတို့အခွင့်အရေးများဆုံးရှုံးနစ်နာမှုများ ဖြစ်ပေါ်လာပါက တိုင်ကြားနိုင်ပါ‌ကြောင်း၊ တိုင်ကြားမှုများကိုလည်း စားသုံးသူကာကွယ်ရေး ဥပဒေနှင့်အညီ ဖြေရှင်းဆောင်ရွက်ပေးလျက်ရှိကြောင်း ဆွေးနွေးပြောကြားခဲ့ပါသည်။ 

       ဆက်လက်၍ စားသုံးသူရေးရာဦးစီးဌာန၊ မလှိုင်မြို့နယ်တာဝန်ခံဦးရဲမြင့်ဆန်းမှ  စားသုံးသူ ကာကွယ်ရေးဥပဒေကို စားသုံးသူကာကွယ်ရေး ဥပဒေကို ၂၀၁၉ခုနှစ် ၊ မတ်လ (၁၅)ရက်နေ့တွင် အခန်း(၂၅)ခန်း၊ ပုဒ်မ(၈၄)ခုဖြင့် ပြင်ဆင်အတည်ပြုပြဌာန်းခဲ့ကြောင်း၊ စားသုံးသူများအနေဖြင့် မိမိအခွင့်အရေးများ သိရှိမှသာ ကုန်စည်(သို့)ဝန်ဆောင်မှုများအပေါ် ဆုံးရှုံးနစ်နာမှုများ ဖြစ်ပေါ်‌လာပါက အရေးဆိုတိုင်ကြားနိုင်မည်ဖြစ်ကြောင်း၊ စားသုံးသူအခွင့်အရေးများကို တိုင်ကြားမှု ဥပမာများဖြင့် စားသုံးသူများသိရှိနားလည်စေရန် စားသုံးသူကာကွယ်ရေးဥပဒေပါ စားသုံးသူအခွင့်အရေး၊ လိုက်နာရမည့်တာဝန်များနှင့်ပတ်သက်၍ အကျယ်တဝင့် ဆွေးနွေးပြောကြားခဲ့ပါသည်။ ၎င်းအပြင်အခန်း(၁၈)၊ ပုဒ်မ(၄၁)ပါ ကုန်အညွှန်းအမှတ်အသားပြဌာန်းချက်နှင့် ပတ်သက်၍ မြန်မာဘာသာဖြင့် ပြည့်စုံစွာဖော်ပြထားသည့် ကုန်ပစ္စည်းများကိုသာ ရွေးချယ်ဝယ်ယူ အသုံးပြုသင့်ကြောင်းနှင့် ကုန်အညွှန်းအမှတ်အသားနှင့်ပတ်သက်၍ သိသင့်သိထိုက်သည့် ဗဟုသုတများကို ပြောကြားခဲ့ပြီး စားသုံးသူအခွင့်အရေး နစ်နာဆုံးရှုံးမှုများရှိပါက DOCA Applicationeနှင့် www . doca. gov. mm တွင် ဝင်ရောက်တိုင်ကြားနိုင်ကြောင်း ဆွေးနွေးပြောကြားခဲ့ပြီး စားသုံးသူအသိပညာပေးလက်ကမ်းစာစောင်များ ဖြန့်ဝေခဲ့ပါသည်။

          ဟောပြောပွဲသို့ ဆရာ/ဆရာမ၊ကျောင်းသား/ကျောင်းသူ စုစုပေါင်း (၂၉၆)ဦး တက်ရောက်ခဲ့ပြီး နံနက် (၁၁:၀၀) နာရီတွင် ရုတ်သိမ်းခဲ့ပါသည်။

DOCA(မန္တလေး)

Pages

Subscribe to RSS - သတင်းနှင့် လှုပ်ရှားမှုများ