သတင်းနှင့် လှုပ်ရှားမှုများ

            စားသုံးသူရေးရာဦးစီးဌာန စစ်ကိုင်းခရိုင် ခရိုင်ဦးစီးမှူး ဒေါ်သန်းသန်းတင် ဦးဆောင်၍  စစ်ကိုင်းပညာရေးဒီဂရီကောလိပ်၌ ဆရာ/ဆရာမများနှင့် ကျောင်းသား/ကျောင်းသူများ စုစုပေါင်း (၃၃၀) ဦးအား စားသုံးသူကာကွယ်ရေးဉပဒေအကြောင်း သိကောင်းစရာများ အသိပညာပေး ဟောပြောပွဲကို ဩဂုတ်လ ၈ ရက်နေ့က ကျင်းပပြုလုပ်ခဲ့ပါသည်။

          ဟောပြောပွဲတွင် စစ်ကိုင်းပညာရေးဒီဂရီကောလိပ်ကျောင်းအုပ်ဆရာမကြီးဒေါ်မေမြတ်ခိုင်က အဖွင့်အမှာ စကားပြောကြားခဲ့ပြီး၊ စားသုံးသူရေးရာဦးစီးဌာန၊ စစ်ကိုင်းခရိုင် ဒု-ခရိုင်ဦးစီးမှူး ဒေါ်ခင်မြတ်မူက ဌာနအကြောင်း မိတ်ဆက်ပြောကြားကာ ဆက်လက်၍ စားသုံးသူရေးရာဦးစီးဌာန၊ စစ်ကိုင်းခရိုင် ခရိုင်ဦးစီးမှူး ဒေါ်သန်းသန်းတင်က စားသုံးသူကာကွယ်ရေး ဥပဒေအကြောင်း သိကောင်းစရာများ အသိပညာပေး ဟောပြောရာတွင် စားသုံးသူကာကွယ်ရေးဉပဒေကို ၂၀၁၉ ခုနှစ်၊ မတ်လ ၁၅ ရက်နေ့ က ပြည်ထောင်စုလွှတ်တော်ဥပဒေအမှတ် ၉ ဖြင့် ပြဌာန်းခဲ့ပြီး အခန်း ၂၅ ခန်း၊ ပုဒ်မ ၈၄ခု ပါဝင် ပါကြောင်း၊ စားသုံးသူကာကွယ်ရေးဥပဒေ အခန်း(၁)ပါ အမည်နှင့် အဓိပ္ပါယ် ဖော်ပြချက်များ၊ အခန်း(၂)ပါ စားသုံးသူကာကွယ်ရေးဉပဒေ ပြဌာန်းရခြင်း၏ ရည်ရွယ်ချက်များ၊ အခန်း(၉)ပါ စားသုံးသူ၏ အခွင့်အရေးနှင့် တာဝန်များ၊ အခန်း(၁၀)ပါ စီးပွားရေးလုပ်ငန်းရှင်များ၏ တာဝန်များ၊ အခန်း(၁၈)ပါ ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ ကုန်စည်အမျိုး အစားအလိုက် သတ်မှတ်ချက်များနှင့်အညီ သိသာထင်ရှားစွာ ဖော်ပြရမည့်အချက်များ၊ အခန်း (၂၀)ပါ စီမံခန့်ခွဲရေးနည်းလမ်းအရ အရေးယူခြင်း၊ အခန်း(၂၃)ပါ တားမြစ်ချက်နှင့် ပြစ်မှုပြစ်ဒဏ်များ အကြောင်း သိကောင်းစရာများကိုအကျယ်တဝင့် Power Point Slide များဖြင့် ရှင်းလင်း ဆွေးနွေးပြီး ဤကျောင်း၌ပညာသင်ကြားနေသော ဆရာ/ဆရာမများ အနေဖြင့် ဘွဲ့ရရှိပြီး လုပ်ငန်းခွင်သို့ ဝင်ရောက်ပါက မိမိတို့၏တပည့်များကို စားသုံးသူကာကွယ်ရေး ဥပဒေ၊ နည်းဥပဒေများကို တစ်ဆင့်ပြန်လည်ဖြန့်ဝေ ပေးစေလိုကြောင်း၊ စားသုံးသူကာကွယ်ရေးဆိုင်ရာ လုပ်ငန်းများ အောင်မြင်ရန် တစ်ဦးတစ်ယောက်တည်း/ ဌာနတစ်ခုတည်းဆောင်ရွက်၍ မရပါကြောင်း၊ သက်ဆိုင်ရာအစိုးရဌာနများ၊ အစိုးရအဖွဲ့အစည်းများ၊ စားသုံးသူပြည်သူများ၊ စီးပွားရေးလုပ်ငန်းရှင် များအားလုံး ပူးပေါင်းဆောင်ရွက်မှသာ အောင်မြင်မည်ဖြစ်ကြောင်း၊ သို့ပါ၍ လူမျိုးမရွေး၊ ဘာသာမရွေး၊ ကျား/မ မရွေး စားသုံးသူပြည်သူများအားလုံး စားသုံးသူကာကွယ်ရေးဥပဒေဆိုသည့် ထီးရိပ်အောက်မှာ ခိုလှုံကြဖို့ တိုက်တွန်းပြောကြားခဲ့ကြောင်း သတင်းရရှိပါသည်။

DOCA(စစ်ကိုင်း

             စားသုံးသူရေးရာဦးစီးဌာန၊ တောင်ငူခရိုင်၊ ရေတာရှည်မြို့နယ်တာဝန်ခံ ဦးဇော်ဇော်ထွေး သည် ဩဂုတ်လ ၈ ရက်နေ့ နံနက်ပိုင်းက ရေတာရှည်မြို့ရှိ ကုန်စုံဆိုင်ကြီးများသို့ သွားရောက်၍ သွားတိုက်ဆေးအမျိုးမျိုး၌ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်နှင့်အညီ မြန်မာဘာသာဖြင့် ကုန်အညွှန်းအမှတ်အသားများ ပြည့်စုံစွာဖော်ပြထားခြင်း ရှိ/မရှိကို စောင့်ကြည့် စစ်ဆေးခဲ့ပါသည်။

             ကုန်စည်များတွင် မြန်မာဘာသာဖြင့် ဖော်ပြရမည့် ကုန်အညွှန်းအမှတ်အသားများကို မြန်မာနိုင်ငံစားသုံးသူကာကွယ်ရေးကော်မရှင်က ညွှန်ကြားထားပြီးဖြစ်ရာ ပဲခူးတိုင်းဒေသကြီးဦးစီးမှူး ရုံးက ယခုနှစ်အတွင်း ဈေးကွက်စောင့်ကြည့်စစ်ဆေးရာတွင် ဦးစားပေးဆောင်ရွက်ရန် ညွှန်ကြား ထားသည့် ကုန်စည် ၁၀ မျိုးပေါ် အခြေခံ၍ တောင်ငူခရိုင်မှ ယခုလအတွင်း သွားတိုက်ဆေးအမျိုးမျိုး ကို ဈေးကွက်စောင့်ကြည့်စစ်ဆေးသွားမည် ဖြစ်ပါသည်။

              ရေတာရှည်မြို့ရှိ ကုန်စုံဆိုင်ကြီးများတွင် ရောင်းချလျှက်ရှိသော သွားတိုက်ဆေးများတွင် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်နှင့်အညီ မြန်မာဘာသာဖြင့် ကုန် အညွှန်းအမှတ်အသားများ ဖော်ပြထားသည်ကို စစ်ဆေးတွေ့ရှိရကြောင်း သိရှိရပါသည်။

DOCA(ပဲခူး)

      မွန်ပြည်နယ်၊ စားသုံးသူရေးရာဦးစီးဌာနမှ မော်လမြိုင်ခရိုင်ဦးစီးမှူး ဒေါ်ဝါဝါမြိုင်နှင့် ဝန်ထမ်းများသည် ၂၀၂၂ ခုနှစ်၊ ဩဂုတ်လ ၉ ရက်နေ့ နေ့လယ် (၁:၀၀) နာရီအချိန်တွင် အ.ထ.က (၆) မော်လမြိုင်ကျောင်းတွင် ကျောင်းသား/ကျောင်းသူများအား စားသုံးသူကာကွယ်ရေးဆိုင်ရာ အသိပညာပေးဟောပြောခဲ့ပါသည်။

        အဆိုပါဟောပြောပွဲတွင် မော်လမြိုင်ခရိုင်ဦးစီးမှူးမှ စားသုံးသူအခွင့်အရေး (၈) ချက် နှင့် တာဝန်များအကြောင်း၊ စားသုံးသူများအနေဖြင့် အသင့်စားမုန့်ပဲသရေစာများဝယ်ယူစားသောက်ရာ တွင်  ကုန်အညွှန်းအမှတ်အသား ဖော်ပြပါရှိမှုအား အဓိကထားဖတ်ရှုသင့်ကြောင်း၊ စားသုံးသူများ နစ်နာဆုံးရှုံးမှုများဖြစ်ပေါ်ပါက စားသုံးသူရေးရာဦးစီးဌာနသည် စားသုံးသူပြည်သူများ နစ်နာမှုမရှိစေရန် ဆောင်ရွက်ပေးလျှက်ရှိနေသည့် အကြောင်းအရာများအားလည်းကောင်း ဟောပြောခဲ့ပြီး ကျောင်းအုပ်ဆရာမကြီးမှ ယခုလိုဟောပြောပေးခြင်းဖြင့် ကျောင်းသား/ကျောင်းသူများအနေဖြင့် စားသုံးသူအခွင့်အရေးများကို နာလည်းသဘောပေါက်ပြီး နစ်နာဆုံးရှုံးမှုများမဖြစ်ပေါ်စေခြင်း အကျိုးကျေးဇူးများ ရရှိပါကြောင်းကို ပြောကြားခဲ့ပါသည်။ ထို့နောက် မော်လမြိုင်ခရိုင်ဦးစီးမှူးက ကျောင်းအုပ်ဆရာမကြီးအား လက်ကမ်းစာစောင်းများပေးအပ်ခဲ့ပြီး ဟောပြောပွဲသို့ ကျောင်းသား/သူ (၂၃၀)ဦး တက်ရောက်ခဲ့ပါသည်။

       ထို့နောက် မော်လမြိုင်ခရိုင်ဦးစီးမှူးနှင့် ဝန်ထမ်းများသည် ဆရာ/ဆရာမများနှင့် ပူးပေါင်း၍ ကျောင်းဝန်းအတွင်းရှိ ကျောင်းမုန့်ဈေးတန်းတွင် ရောင်းချနေသာအစားအသောက်များ ဘေးအန္တရာယ်ကင်းရှင်းစေရေးနှင့် ထုတ်ကုန်များ လုံခြုံစိတ်ချရမှုရှိစေရေးတို့ကို စစ်ဆေးခြင်းများ ဆောင်ရွက်ခဲ့ ကြောင်း သတင်းရရှိပါသည်။

DOCA(မွန်)

            ၈.၈.၂၀၂၂ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်၊ ကျိုက်မရောမြို့နယ် တာဝန်ခံသည် ကျိုက်မရောမြို့နယ်၊ ရေတွင်းကုန်ကျေးရွာရှိ အခြေခံပညာအထက်တန်းခွဲ ကျောင်းကျန်းမာရေးကော်မတီနှင့် ပူးပေါင်း၍ ကျောင်းမုန့်ဈေးတန်းအား ဈေးကွက်စောင့်ကြည့် စစ်ဆေးခြင်း ဆောင်ရွက်ခဲ့ပါသည်။

          ထိုသို့ဆောင်ရွက်ရာတွင် ကျောင်းမုန့်ဈေးတန်းတွင် ရောင်းချနေသော စားသောက်ကုန်များမှာ သန့်ရှင်းမှုရှိ/မရှိ၊ ကုန်အညွှန်းအမှတ်အသား ပြည့်စုံစွာဖော်ပြထားခြင်း ရှိ/မရှိ၊ သက်တမ်းကျော်လွန်ခြင်း ရှိ/မရှိ၊ စားသုံးရန် သင့်/မသင့်၊ ထုတ်ကုန်လုံခြုံစိတ်ချရမှု ရှိ/မရှိ ဈေးကွက်စောင့်ကြည့် စစ်ဆေးခြင်း ဆောင်ရွက်ခဲ့ပြီး ကုန်အညွှန်းအမှတ်အသားဖော်ပြခြင်းနှင့်ပတ်သက်သည့် လက်ကမ်းစာစောင်များအား ဖြန့်ဝေပေးခဲ့ကြောင်း သတင်းရရှိပါသည်။

DOCA(မွန်)

               ၈.၈.၂၀၂၂ ရက်နေ့တွင် စားသုံးသူရေးရာဦးစီးဌာန၊ ဘီးလင်းမြို့နယ်တာဝန်ခံနှင့် ဝန်ထမ်းများသည် ဘီးလင်းမြို့နယ် ရေဖြူကန်ကျေးရွာရှိ အခြေခံပညာမူလတန်းကျောင်း၌ စားသုံးသူကာကွယ်ရေး အသိပညာပေးဟောပြောပွဲ ဆောင်ရွက်ခဲ့ပါသည်။

       အဆိုပါဟောပြောပွဲတွင် ဘီးလင်းမြို့နယ်တာဝန်ခံက စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်၊ လုပ်ငန်းဆောင်ရွက်မှုအခြေအနေများအားလည်းကောင်း၊ ဒု-ဦးစီးမှူး ဦးစည်သူက စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့်တာဝန်များ၊ ကုန်းအညွှန်းအမှတ်အသား ဖော်ပြခြင်းနှင့် စပ်လျဉ်း၍လည်းကောင်း၊ စားသုံးသူထိခိုက်နစ်နာမှုအတွက် တိုင်ကြားခြင်းနှင့် စပ်လျဉ်း၍လည်းကောင်း အသိပညာပေးဟောပြောဆွေးနွေးခဲ့ပြီး စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များ ဖြန့်ဝေပေးခဲ့ပါသည်။

                အဆိုပါဟောပြောပွဲသို့ ကျောင်းအုပ်ဆရာမကြီး၊ ဆရာ/ဆရာမများ၊ ကျောင်းသား/ကျောင်းသူ စုစုပေါင်း (၁၂၅) ဦး တက်ရောက်ခဲ့ကြောင်း သိရှိရပါသည်။

DOCA(မွန်)