Main menu

သတင်းနှင့် လှုပ်ရှားမှုများ

Powered by Drupal

စားသုံးသူကာကွယ်ပေးရေး အသိပညာပေးဆွေးနွေးပွဲကျင်းပ

          စားသုံးသူရေးရာဦးစီးဌာန၏ မျှော်မှန်းချက်ဖြစ်သည့် စားသုံးသူများလုံခြုံစိတ်ချရမှုရှိစေရန် ရည်ရွယ်၍ ခရိုင်၊ မြို့နယ်အစားအသောက်နှင့် ဆေးဝါးကွပ်ကဲရေးကော်မတီအနေဖြင့် စစ်ကိုင်းခရိုင် အတွင်း အသိပညာပေးဟောပြောပွဲများပြုလုပ်ရန် စစ်ကိုင်းခရိုင်စီမံအုပ်ချုပ်ရေးအဖွဲ့၏ လမ်းညွှန်မှု အရ စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးရုံးတွင် စားသုံးသူ ကာကွယ်ပေးရေးအသိပညာပေးဆွေးနွေးပွဲကို  ၁၆.၂.၂၀၂၂ ရက်နေ့တွင် ကျင်းပပြုလုပ်ခဲ့ရာ စစ်ကိုင်း ခရိုင်မှ ဌာနဆိုင်ရာဝန်ထမ်းများ၊ ဆေးအရောင်ဆိုင်နှင့်စားသုံးဆီအရောင်းဆိုင်များမှ လုပ်ငန်းရှင်များ စုစုပေါင်း (၄၀)ဦးတက်ရောက်ခဲ့ပြီး ခရိုင်စားသုံးသူရေးရာဦးစီးဌာန၊ ခရိုင်ဦးစီးမှူးက စားသုံးသူ ရေးရာနှင့် ပတ်သက်၍ စားသုံးသူများ၏အခွင့်အရေးနှင့်တာဝန်များ၊ လုပ်ငန်းရှင်များ၏ တာဝန်များ၊ စားသုံးသူကာကွယ်ရေးဥပဒေပါတားမြစ်ချက်များ၊ ပြစ်မှုပြစ်ဒဏ်များ၊ ကုန်အညွှန်း အမှတ်သား ဖော်ပြခြင်းဆိုင်ရာ လိုက်နာရမည့်အချက်များ၊ ကုန်စည်နှင့်ဝန်ဆောင်မှုနှင့် ပတ်သက်၍ စားသုံးသူ နစ်နာမှုကြုံရပါက တိုင်ကြားနိုင်မည့် နည်းလမ်းများစသည်တို့ကို အကျယ်တဝင့် ရှင်းလင်းဆွေးနွေး ခဲ့ပြီး  စစ်ကိုင်းတိုင်းဒေသကြီး အစားအသောက်နှင့် ဆေးဝါးကွပ် ကဲရေးဦးစီးဌာန တိုင်းဒေသကြီး တာဝန်ခံမှ  ကျန်းမာရေးဝန်ကြီးဌာန၏ ဖွဲ့စည်းပုံနှင့် အမျိုးသားအစား အသောက် ဥပဒေအကြောင်း၊ အမျိုးသား ဆေးဝါးဥပဒေအကြောင်း၊ ပြည်သူ့ကျန်းမာရေးဆိုင်ရာဥပဒေ အကြောင်း၊ မြန်မာနိုင်ငံ အစား အသောက်နှင့် ဆေးဝါးအာဏာပိုင် အမိန့်ကြော်ငြာစာအမှတ် ၅၂၄/၂၀၂၁ ခုနှစ်၊နိုဝင်ဘာလ (၂၇)ရက် နေ့က အမှတ်တံဆိပ်ပါ ဘူးသွင်း သောက်ရေသန့်နှင့် အမှတ် တံဆိပ်ပါ၊ စားသုံးဆီတို့ကို ထိန်းချုပ်အစားအသောက်အဖြစ်သတ်မှတ်ခဲ့ပါကြောင်း သိကောင်းစရာများနှင့် ကျန်းမာရေးဦးစီး ဌာန၊ ဒု-ခရိုင်ဦးစီးမှူးမှအစားအသောက်နှင့် ဆေးဝါးများအကြောင်းစသည်တို့ကို ရှင်းလင်းဆွေးနွေး ခဲ့ပါသည်။ အဆိုပါ အသိပညာပေးဆွေးနွေးပွဲသို့ တက်ရောက်လာသူများမှ သိလိုသည့်မေးမြန်းမှုများကို တာဝန်ရှိသူများက ရှင်းလင်းကာ အပြန်အလှန်ဆွေးနွေးခဲ့ကြကြောင်း သိရှိရပါသည်။

DOCA(စစ်ကိုင်း)

လူသုံးကုန်ထုတ်လုပ်မှုနည်းပညာသင်တန်းတွင် စားသုံးသူရေးရာအသိပညာပေးဟောပြော

        ၂၀၂၂ ခုနှစ် ဖေဖော်ဝါရီလ ၂၃ ရက်နေ့တွင် စားသုံးသူရေးရာဦးစီးဌာန၊ မုံရွာခရိုင် ဦးစီးမှူးရုံး၊ ခရိုင်ဦးစီးမှူးဦးဆောင်သောအဖွဲ့သည် စစ်ကိုင်းတိုင်းဒေသကြီး အသေးစားစက်မှုလက်မှုလုပ်ငန်းဦးစီး ဌာနမှ ဖွင့်လှစ်ပို့ချပေးသော လူသုံးကုန်ထုတ်လုပ်မှုနည်းပညာ သင်တန်းတွင် စားသုံးသူကာကွယ်ရေး ဆိုင်ရာ အသိပညာပေး ဟောပြောခဲ့ပါသည်။

       ဟောပြောဆွေးနွေးပွဲတွင် စားသုံးသူရေးရာဦးစီးဌာန၊ မုံရွာခရိုင်ဦးစီးမှူးက စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များကို ဦးစွာပထမ မိတ်ဆက်ပြောကြားခဲ့ပါသည်။ ထို့နောက် ပြည်သူများအနေဖြင့်  မိမိတို့ဌာနကို အစားအသောက်နှင့် ဆေးဝါးကွပ်ကဲရေးဦးစီးဌာန (FDA)နှင့် ရောထွေးနေတတ်ကြသောကြောင့် စားသုံးသူရေးရာဦးစီးဌာန(DOCA) နှင့် အစားအသောက်နှင့် ဆေးဝါးကွပ်ကဲရေးဦးစီးဌာန (FDA) တို့၏ ရည်မှန်းချက်တာဝန်များ၊ ဌာနနှစ်ခုမှ တာဝန်ခံဆောင်ရွက်လျက်ရှိသည့် ဥပဒေများနှင့် ပြည်သူများသို့ ဝန်ဆောင်မှုပေးနေသည့် မတူညီသော လုပ်ငန်းဆောင်ရွက်ချက်များနှင့်ပတ်သက်၍ ကွဲကွဲပြားပြားရှင်းလင်းနားလည်စေရန် သင်တန်းသူ/သားများအား ရှင်းလင်းဆွေးနွေး ပြောကြားခဲ့ပါသည်။

         ဆက်လက်၍ မိမိတို့ဌာန၏ စားသုံးသူကာကွယ်ရေးဥပဒေကို ၂၀၁၉ ခုနှစ် မတ်လ ၁၅ ရက်နေ့တွင် ပြည်ထောင်စုလွှတ်တော်ဥပဒေအမှတ် ၉။ ဖြင့် အတည်ပြုပြဌာန်းခဲ့ပြီးဖြစ်ကြောင်း၊ တက်ရောက်လာကြသော သင်တန်းသား/သူများတွင် အချို့က သင်တန်းပြီးလျှင် ကိုယ်ပိုင် လုပ်ငန်းများ လုပ်ကိုင်ကြမည့်သူများဖြစ်သဖြင့် လုပ်ငန်းရှင်ဟုဆိုနိုင်သော်လည်း တစ်ဖက်က ကြည့်လျှင် စားသုံးသူများပင်ဖြစ်ကြောင်း၊ စားသုံးသူတိုင်းတွင် စားသုံးသူအခွင့်အရေးများ ရှိကြောင်း၊ သို့ဖြစ်ပါ၍ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များ၊ ကုန်အညွှန်း အမှတ်အသားဖော်ပြခြင်းနှင့်စပ်လျဉ်း၍ လိုက်နာရမည့်အချက်များ၊  မြန်မာနိုင်ငံ စားသုံးသူ ကာကွယ်ရေးကော်မရှင်၏ ၂၀၁၉ ခုနှစ်၊ ဒီဇင်ဘာလ ၃ ရက်တွင် ညွှန်ကြားချက်အမှတ် (၂/၂၀၁၉)ဖြင့် ထုတ်ပြန်ထားသောအချက်များ၊ စားသုံးသူအခွင့်အရေးနှင့်လိုက်နာရမည့်တာဝန်များ၊  အခွင့်အ‌ရေးများ နစ်နာဆုံးရှုံးခဲ့ပါက တိုင်းနှင့်ပြည်နယ်များရှိ စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ  (CICC)တွင် တိုင်ကြားနိုင်ကြောင်းနှင့် တိုင်ကြားနိုင်သည့် နည်းလမ်းများ၊ ဥပဒေပါတားမြစ်ချက်နှင့် ပြစ်မှုပြစ်ဒဏ်များ စသည်တို့ကို အသေးစိတ် ဆွေးနွေးပြောကြားခဲ့ပြီး သင်တန်းသူ/သားများကလည်း သိရှိလိုသည်များကို အပြန်အလှန်ဆွေးနွေး ပြောကြားခဲ့ကြောင်းသိရှိရပါသည်။

DOCA(စစ်ကိုင်း)

အလှကုန်ပစ္စည်းအရောင်းဆိုင်များသို့ ကွင်းဆင်းစစ်ဆေးခြင်း

          စားသုံးသူရေးရာဦးစီးဌာန၊  ရန်ကုန်တိုင်းဒေသကြီး၊ အရှေ့ပိုင်းခရိုင်ဦးစီးမှူးရုံးမှ ခရိုင်ဦးစီးမှူးနှင့် ဝန်ထမ်းများသည် အစားအသောက်နှင့် ဆေးဝါးကွပ်ကဲရေးဦးစီးဌာနခွဲ (ရန်ကုန်)နှင့် ပူးပေါင်း၍ (၁၆.၂.၂၀၂၂) ရက်နေ့ (၁၄:ဝဝ) နာရီအချိန်တွင် မြောက်ဥက္ကလာပမြို့နယ်အတွင်းရှိ အလှကုန်ပစ္စည်း အရောင်းဆိုင်များသို့ သွားရောက်၍ (FDA) မှတားမြစ်ထားသည့် အလှကုန်ပစ္စည်းများ ရောင်းချနေခြင်း ရှိ/မရှိ ကွင်းဆင်းစစ်ဆေးမှုများပြုလုပ်ခဲ့ပါသည်။

          အလှကုန်ပစ္စည်းအရောင်းဆိုင်များတွင် အစားအသောက်နှင့် ဆေးဝါးကွပ်ကဲရေးဦးစီးဌာနခွဲ (ရန်ကုန်) ဒေါ်ချိုချိုဝင်း (လက်ထောက်ညွှန်ကြားရေးမှူး) က (FDA) မှ အခါအားလျော်စွာ ထုတ်ပြန်ထားသော တားမြစ်ဓါတုပစ္စည်းများပါဝင်သည့် သုံးစွဲရန်မသင့်ဟု အမိန့်ကြော်ငြာစာ ထုတ်ပြန်၍ သတ်မှတ်ထားသော ဘေးအန္တရာယ်ရှိသည့် အလှကုန်များကို ဝယ်ယူခြင်း၊ သိုလှောင်ခြင်း၊ ဖြန့်ဖြူး ရောင်းချခြင်း (လုံးဝ) မပြုလုပ်ကြရန်နှင့် တားမြစ်ထားသည့် အလှကုန်များ လက်ဝယ်တွေ့ရှိပါက ပြည်သူ့ကျန်းမာရေးဆိုင်ရာ ဥပဒေပုဒ်မ(၃)၊ အပိုဒ် (၃)(ဃ)အရ အရေးယူခြင်းခံရမည်ဖြစ်ကြောင်း ပညာပေးပြောကြားခြင်းများဆောင်ရွက်ပါသည်။ ထို့နောက် စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူး ဦးဇော်မင်းလတ် က စားသုံးသူကာကွယ်ရေးဥပဒေ၊ အခန်း (၁၈) ပုဒ်မ (၄၁) တွင်ပါရှိသည့် ကုန်အညွှန်းအမှတ်အသားဖော်ပြခြင်းဆိုင်ရာ အချက်အလက်များကို တိကျစွာ လိုက်နာဆောင်ရွက်ရန်နှင့် သက်ဆိုင်သည့် ဌာနဆိုင်ရာ အဖွဲ့အစည်းများ၏ လမ်းညွှန်ချက်များကိုလည်း မဖြစ်မနေလုပ်ဆောင်သွားရမည်ဖြစ်ကြောင်း၊ အသိပညာ‌ပေး ဆွေးနွေးပြောကြားခဲ့ကြောင်း သိရှိရပါသည်။

DOCA(ရန်ကုန်)

“ရန်ကုန်တိုင်းဒေသကြီး စားသုံးသူရေးရာကော်မတီ (၁/၂၀၂၂) အစည်းအဝေး” ကျင်းပပြုလုပ်

         ရန်ကုန်တိုင်း‌ဒေသကြီး၊ စားသုံးသူရေးရာကော်မတီ၊ (၁/၂၀၂၂) အစည်းအဝေးကို ၂၂.၂.၂၀၂၂ ရက်နေ့၊ နံနက်(၁၀:၃၀)အချိန်တွင် ရန်ကုန်တိုင်းဒေသကြီး၊ အလုံမြို့နယ်ရှိ တိုင်းဒေသကြီး အစိုးရအဖွဲ့ရုံး၊ အစည်းအဝေး ခန်းမ(၃)၌ ကျင်းပပြုလုပ်ခဲ့ရာ စာသုံးသူရေးရာကော်မတီ(ဥက္ကဌ)၊ စီးပွားရေးရာဝန်ကြီး ဦးအောင်သန်းဦးနှင့် ကော်မတီဝင်များနှင့် တာဝန်ရှိသူများ တက်ရောက်ခဲ့ပါသည်။

         အဆိုပါအစည်းအဝေး၌ စားသုံးသူရေးရာကော်မတီဥက္ကဌ၊ စီးပွားရေးရာဝန်ကြီး ဦးအောင်သန်းဦးမှ အဖွင့်အမှာစကားပြောကြားခဲ့ရာတွင် ကော်မတီ၏ လုပ်ပိုင်ခွင့်နှင့်တာဝန်များအရ ဖြေရှင်းသွားရန်လိုအပ်ပါက စုံစမ်းစစ်ဆေးရေးအဖွဲ့ဖွဲ့စည်း၍ တင်ပြချက်များကို ဆုံးဖြတ်သွားရန်နှင့် တိုင်းဒေသကြီး ဦးစီးမှူးရုံးမှ ချမှတ်ထားသော အမိန့်များကို အတည်ပြုခြင်း၊ ပြင်ဆင်ခြင်း၊ ပယ်ဖျက်ခြင်း အမိန့်များချမှတ်သွားရန် လမ်းညွှန်မှာကြားခဲ့ပါသည်။ ဆက်လက်၍ စားသုံးသူရေးရာဦးစီးဌာန ရန်ကုန်တိုင်းဒေသကြီးဦးစီးမှူး (စားသုံးသူရေးရာကော်မတီ၊ အတွင်းရေးမှူး) ဦးရဲထွဋ်နိုင်က ယခင်အစည်းအဝေးဆုံးဖြတ်ချက်များအပေါ် ဆောင်ရွက်ပြီးစီးမှုများနှင့် လုပ်ငန်းဆောင်ရွက်မှုအခြေအနေများအား ရှင်းလင်းတင်ပြခဲ့ပြီး အစည်းအဝေးသို့ တင်ပြထားသော အမှာစာများအား ဖတ်ကြားတင်ပြအတည်ပြုရယူပြီးနောက် တက်ရောက်လာသော ကော်မတီဝင်များမှ အထွေထွေဆွေးနွေးခြင်းများပြုလုပ်ခဲ့ကြပါသည်။ ထို့နောက် ရန်ကုန်တိုင်းဒေသကြီး၊ စားသုံးသူရေးရာကော်မတီ၊ ဥက္ကဌ၊ စီးပွားရေးရာဝန်ကြီး ဦးအောင်သန်းဦး က နိဂုံးချုပ်အမှာစကား ပြောကြားကာ အစည်းအဝေးအား (၁၁:၃၀)အချိန်တွင် ရုပ်သိမ်းခဲ့ပါသည်။

DOCA(ရန်ကုန်)

အမျိုးသားစံချိန်စံညွှန်းကောင်စီမှ အတည်ပြုချမှတ်ပြီးသော မြန်မာစံချိန်စံညွှန်း (၄၃၉) ခု

   အမျိုးသားစံချိန်စံညွှန်းကောင်စီ၏ အတည်ပြုချက်ဖြင့် ချမှတ်ပြီးသော မြန်မာစံချိန်စံညွှန်း (၄၃၉)ခု၏ စာရင်းနှင့် ရောင်းချသည့် ဈေးနှုန်းတို့အား အောက်ပါ pdf file တွင် လေ့လာနိုင်ပါသည်-

ကရင်ပြည်နယ်၊ ကော့ကရိတ်မြို့ရှိ သောက်ရေသန့်နှင့် စားသောက်ကုန်ထုတ်လုပ်ငန်းများအား ကွင်းဆင်းစစ်ဆေး

            စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးနှင့် ဝန်ထမ်းများသည် ကော့ကရိတ်မြို့နယ် တာဝန်ခံ ဦးမောင်မောင်အေး ၊ ဒု-ကြီးကြပ်ရေးမှူး ဒေါ်သီတာဌေး တို့နှင့်အတူ ( ၂၀--၂၀၂၂) ရက်နေ့ ၁၃:၃၀ နာရီမှ ၁၅:၀၀ အချိန်တွင် ကော့ကရိတ်မြို့၊ အမှတ်(၃)ရပ်ကွက်၊ ဗိုလ်ချုပ်လမ်းရှိ ရွှေပျံလွှားမုန့်မျိုးစုံလုပ်ငန်း၊ ကော့ကရိတ်မြို့၊ အမှတ်(၃)ရပ်ကွက်၊ ဘုံကျောင်းလမ်း ရှိ မိုးကြယ်စင်သောက်ရေသန့်လုပ်ငန်း၊ ကော့ကရိတ်မြို့၊ အမှတ်(၇)ရပ်ကွက်၊ မေတ္တာလမ်းရှိ ဦးချိ (ဆိတ်ချီးခါး)လုပ်ငန်းတို့ကို ထုတ်ကုန်များလုံခြုံစိတ်ချရမှုရှိစေရေး ကွင်းဆင်းစစ်ဆေးခဲ့ကြောင်း သိရသည်။

              ထိုသို့စစ်ဆေးရာတွင် ပြည်နယ်ဦးစီးမှူး ဦးသန်းဦးက လုပ်ငန်းရှင်များအနေဖြင့် ၂၀၁၉ စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်းပြီး လိုက်နာ ဆောင်ရွက်ရမည့်အချက်များနှင့် စားသုံးသူကာကွယ်ရေး ကော်မရှင်မှထုတ်ပြန်ထားသော ၂/၂၀၁၉ ပါ ကုန်စည်အမျိုးအစား အလိုက် ဖော်ပြရမည့် ညွှန်ကြားချက်များကို ပြည့်စုံမှန်ကန်စွာ ဖော်ပြလိုက်နာဆောင်ရွက်ရန် ရှင်းလင်းဆွေးနွေးမှာကြားပြီး မြေပြင်လုပ်ငန်းဆောင်ရွက်မှု အခြေအနေများကို ကြည့်ရှု့စစ်ဆေးခဲ့ပါသည်။

              စားသုံးသူရေးရာဦးစီးဌာနသည် ဌာန၏မျှော်မှန်းချက်ဖြစ်သော “စားသုံးသူများလုံခြုံစိတ် ချရမှုရှိစေရန်” အတွက် ဈေးကွက်ရောက်ပြီးကုန်စည်နှင့် ဈေးကွက်မရောက်မီကုန်စည်များကို လစဉ် လျာထားချက်များချမှတ်၍ ထုတ်ကုန်လုံခြုံစိတ်ချရမှုရှိစေရေးဆိုင်ရာ လုပ်ငန်းများ ဆောင်ရွက် လျက်ရှိကြောင်းသိရပြီး လုပ်ငန်းရှင်များအနေဖြင့် ကုန်စည်များတွင် ကုန်အညွှန်း အမှတ်ဖော်ပြခြင်း နှင့်စပ်လျဉ်း၍ ပြည့်စုံမှန်ကန်မှု ရှိ/မရှိကို ဌာနသို့ ဝန်ဆောင်ခပေးရန် မလိုဘဲ စိစစ်လျှောက်ထားနိုင်ကြောင်း သတင်းရရှိပါသည်။

DOCA(ကရင်)

အထူးဈေးနှုန်းဖြင့်ရောင်းချသောစက်သုံးဆီအရောင်းဆိုင်များအား ဈေးကွက်စောင့်ကြည့်စစ်ဆေး

            စားသုံးသူရေးရာဦးစီးဌာန ၊ ကျောက်ဆည်ခရိုင်ဦးစီးမှူးရုံးမှ ခရိုင်ဦးစီးမှူးဦးဆောင်သောအဖွဲ့သည်(၁၁.၂.၂၀၂၂)ရက်နေ့တွင် ကျောက်ဆည်မြို့နယ်ရှိ Denko(ကျောက်ဆည်)၊ စဉ့်ကိုင်မြို့နယ်ရှိ Denko(စဉ့်ကိုင်) နှင့် (၁၄-၂-၂၀၂၂)ရက်နေ့တွင် စဉ့်ကိုင်မြိုနယ် ၊ ပလိပ်ကျေးရွာရှိ Denko(ပလိပ်)နှင့် တံတားဦးမြို့နယ်ရှိ Denko(တံတားဦး) စက်သုံးဆီအရောင်းဆိုင်များအား ဈေးကွက်စောင့်ကြည့် စစ်ဆေးခြင်းလုပ်ငန်းများဆောင်ရွက်ခဲ့ပါသည်။ ထိုသို့စစ်ဆေးရာတွင် ကျောက်ဆည်ခရိုင် စားသုံးသူရေးရာဦးစီးဌာန၊ ခရိုင်ဦးစီးမှူးက နိုင်ငံတော်မှစက်သုံးဆီဈေးနှုန်းမြှင့်တက်မှုမရှိစေရေးနှင့် ဈေးနှုန်း တည်ငြိမ်မှုရှိစေရေးအတွက် မြန်မာနိုင်ငံတော်ဗဟိုဘဏ်မှ ရည်ညွှန်းငွေလဲလှယ်နှုန်းဖြင့် ရောင်းချပေးသည့် နိုင်ငံခြားငွေရရှိသော စက်သုံးဆီကုမ္ပဏီများမှ စက်သုံးဆီများအား အထူးဈေးနှုန်းဖြင့် ရောင်းချလျက်ရှိကြောင်း ၊ ရောင်းချရာတွင် သုံးစွဲသူများအား နိုင်ငံတော်မှသတ်မှတ်ထားသည့် အထူးစျေးနှုန်းထက်ကျော်လွန်၍ မရောင်းချရန်နှင့် အချင်အတွယ်မှန်ကန်မှုရှိစေရေး အရည်အသွေးကောင်းမွန်သော စက်သုံးဆီများသာ ရောင်းချရန် အတွက် စျေးကွက်စောင့်ကြည့်စစ်ဆေးနိုင်ရန် တိုင်းဒေသကြီးအစိုးရအဖွဲ့မှ အဖွဲ့ဖွဲ့စည်း၍ တာဝန်ပေးထားသည့်အတွက် လာရောက်စစ်ဆေးရခြင်းဖြစ်ကြောင်း ပြောကြားခဲ့ပါသည်။ ထို့နောက် အထူးဈေးနှုန်းဖြင့်ရောင်းချနေသည့် စက်သုံးဆီများဖြစ်သော Diesel ၊ Premium Dieselများအား (၂၀)လီတာဝင်စံခွက်ဖြင့် ချင်တွယ်စစ်ဆေးပြီး မှန်ကန်မှုရှိ/မရှိ စစ်ဆေးခဲ့ပါသည်။

            အလားတူ (၁၅-၂-၂၀၂၂)ရက်နေ့တွင် ပြင်ဦးလွင်ခရိုင်၊စားသုံးသူရေးရာဦးစီးဌာန၊ ခရိုင်တာဝန်ခံမှ ဦးဆောင်ပြီး ပြင်ဦးလွင်မြို့နယ်ရှိ Black Gold စက်သုံးဆီအရောင်းဆိုင်အား နိုင်ငံတော်မှ သတ်မှတ်ထားသည့် အထူးစျေးနှုန်းထက်ကျော်လွန်၍ မရောင်းချရန်နှင့် အချင်အတွယ်မှန်ကန်မှုရှိစေရေး အရည်အသွေးကောင်းမွန်သော စက်သုံးဆီများသာ ရောင်းချရန်အတွက် စျေးကွက်စောင့်ကြည့်စစ်ဆေးခြင်းလုပ်ငန်းများဆောင်ရွက်ခဲ့ကြောင်း သိရှိရပါသည်။

DOCA(မန္တလေး)

မကွေးတိုင်းဒေသကြီး၊ ပခုက္ကူမြို့ရှိ ဈေးဆိုင်များအား ဈေးကွက်စောင့်ကြည့်စစ်ဆေး

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ စားသုံးသူပြည်သူများ ဘေးအန္တရာယ်ကင်းရှင်းစေရေး ရည်ရွယ်၍ ၂၀၂၂ခုနှစ် ဖေဖေါ်ဝါရီလ(၁၈)ရက်နေ့၊ နံနက်(၁၀:၀၀)အချိန်တွင် တိုင်းဦးစီးမှူး၏ လမ်းညွှန်ချက်ဖြင့် ခရိုင်ဦးစီးမှူး ဦးဝေဠုအောင်နှင့် ဝန်ထမ်းများအဖွဲ့သည် မြို့နယ်စည်ပင်သာယာရေးအဖွဲ့၊ အစားအသောက်နှင့် ဆေးဝါးကွပ်ကဲရေးဦးစီးဌာန(FDA) တို့နှင့်ပူးပေါင်း၍ ပခုက္ကူမြို့ပေါ်ရှိ "ကုန်စုံဆိုင်များ၊ အကင်နှင့်ပင်လယ်စာများ" ရောင်းချသည့် လက်လီ/လက်ကားအရောင်းဆိုင် (၄)ဆိုင်တို့တွင် ဈေးကွက်စောင့်ကြည့်စစ်ဆေးခဲ့ပါသည်။

        အဆိုပါဈေးကွက်စောင့်ကြည့်စစ်ဆေးရာတွင် ကုန်စုံဆိုင်များ၊ အကင်နှင့်ပင်လယ်စာများ ရောင်းချသောဆိုင်များတွင် အစားအသောက်နှင့်ဆေးဝါးကွပ်ကဲရေးဦးစီးဌာန(FDA)မှ တားမြစ်ထားသည့် အမှတ်တံဆိပ်ပါရှိသော အသားချောင်းများ ရောင်းချမှုမရှိသည်ကို စစ်ဆေးတွေ့ရှိရသော်လည်း အသားချောင်းအများစုမှာ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့် ဖော်ပြထားခြင်းမရှိသည်ကို တွေ့ရှိရသဖြင့် စားသုံးသူကာကွယ်ရေးဥပဒေ(၂၀၁၉)၊ အခန်း(၁၈)ပါ ကုန်အညွှန်း အမှတ်အသားဖော်ပြခြင်းနှင့် စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက် (၂/၂၀၁၉)နှင့်အညီ ပြည့်စုံစွာထည့်သွင်း ဖော်ပြထားမှုမရှိသည့်  ပင်လယ်စာအကင်များကို ရောင်းချ ဖြန့်ဖြူးခွင့်မရှိကြောင်း၊ ပင်လယ်စာအရန်သင့် အစားအစာများ ရောင်းချသူများအနေဖြင့် အရန်သင့်အစားအစာ အမျိုးအစားအုပ်စုတွင်ပါရှိသည့် မြန်မာဘာသာဖြင့် ဖော်ပြရမည့် ကုန်ပစ္စည်းအမျိုးအမည် ၊ အရေအတွက်(သို့) အသားတင်ပမဏ သုံးစွဲပုံနည်းလမ်း၊ ထားသိုသိမ်းဆည်းပုံအညွှန်း၊ ဓာတ်မတည့်ကြောင်းဖော်ပြချက်တို့ကို မြန်မာဘာသာဖြင့် မဖြစ်မနေ ထည့်သွင်းဖော်ပြရမည်ဖြစ်ပြီး ထုတ်လုပ်ရက်စွဲနှင့် သက်တမ်းကုန် ရက်စွဲများကိုလည်း ထည့်သွင်း ဖော်ပြရမည့်အပြင်  မိမိကုန်စည်နှင့်ပတ်သက်၍လည်း ဘေးအန္တရာယ်ကင်းရှင်းမှုကို အာမခံမှု ပေးရမည်ဖြစ်ကြောင်း အသေးစိတ်ရှင်းလင်းဆွေးနွေးခဲ့ပြီး  စားသောက်ကုန်ရောင်းချသူ ဆိုင်ပိုင်ရှင်များအနေဖြင့် အစားအသောက်နှင့်ဆေးဝါးကွပ်ကဲရေး ဦးစီးဌာန(FDA)၏ ထောက်ခံချက်မရှိဘဲ နယ်စပ်မှ တရားမဝင် ဝင်ရောက်လာသော အသားချောင်းများ ရောင်းချခြင်းမပြုရန် ၊ သက်တမ်းလွန်ကုန်စည်များ ရောင်းချခြင်းမပြုရန် စားသုံးသူကာကွယ်ရေးဥပဒေ(၂၀၁၉)၊ အခန်း(၁၈)ပါ ကုန်အညွှန်း အမှတ်အသား ဖော်ပြခြင်းနှင့် စပ်လျဉ်း၍ မြန်မာနိုင်ငံစားသုံးသူကာကွယ်ရေး ကော်မရှင်၏ ညွှန်ကြားချက် (၂/၂၀၁၉)နှင့်အညီ ပြည့်စုံစွာထည့်သွင်းဖော်ပြလာစေရေးနှင့် ပင်လယ်စာ အကင်များသည် အစားအသောက်အုပ်စု အရန်သင့်အစားအစာ အမျိုးအစား တွင်ပါဝင်ပြီး မြန်မာဘာသာဖြင့်ဖော်ပြရမည့် ကုန်ပစ္စည်းအမျိုးအမည် ၊ အရေအတွက် (သို့) အသားတင်ပမဏ သုံးစွဲပုံနည်းလမ်း၊ ထားသို သိမ်းဆည်းပုံအညွှန်း၊ ဓာတ်မတည့်ကြောင်း ဖော်ပြချက်တို့ကို မဖြစ်မနေ ထည့်သွင်းဖော်ပြရမည်ဖြစ်ပြီး ထုတ်လုပ်ရက်စွဲနှင့် သက်တမ်း ကုန်ရက်စွဲများကိုလည်း ထည့်သွင်း ဖော်ပြရမည်ဖြစ်ကြောင်း၊ မိမိကုန်စည်နှင့်ပတ်သက်၍လည်း ဘေးအန္တရာယ်ကင်းရှင်းမှုကို အာမခံမှုပေးရမည် ဖြစ်ကြောင်း၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များ၊ တားမြစ်ချက်များ၊ ပြစ်ဒဏ်များ၊ ကုန်စည်ကြောင့် စားသုံးသူများအနေဖြင့် ထိခိုက်နစ်နာမှုရှိပါက တာဝန်ယူဖြေရှင်းပေးရမည်ဖြစ်ပြီး အာမခံမှုနှင့်အညီ ဆောင်ရွက်ပေးမှုမရှိပါက စားသုံးသူမှတိုင်ကြားနိုင်သည့် အခွင့်အရေးရှိပြီး ဌာနနှင့် စားသုံးသူကာကွယ်ရေး ကော်မတီတို့၏ စီမံခန့်ခွဲရေးနည်းလမ်းအရ အရေးယူနိုင်သည့် အချက်များအား အသေးစိတ် ရှင်းလင်းဆွေးနွေးခဲ့ပြီး စားသုံးသူအသိပညာပေး လက်ကမ်းစာစောင်များလည်း ဖြန့်ဝေခဲ့ကြောင်း သတင်းရရှိပါသည်။

DOCA(မကွေး)

 ရေသန့်လုပ်ငန်းရှင်နှင့် ကုန်အညွှန်းအမှတ်အသား ပြည့်စုံစွာဖော်ပြလာရေး တွေ့ဆုံဆွေးနွေးခြင်း

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန မကွေးတိုင်း ဒေသကြီး သရက်ခရိုင်၊ ကံမမြို့နယ်တာဝန်ခံနှင့်အဖွဲ့သည် (၂၁.၂.၂၀၂၂) ရက်နေ့ နံနက်(၁၀:၀၀)နာရီ အချိန်တွင် ကံမမြို့၊ အမှတ်(၄) စံပြရပ်ကွက်ရှိ စိုပြေစတား သောက်ရေသန့်လုပ်ငန်းသို့သွားရောက်၍ စီးပွားရေး လုပ်ငန်းရှင်များအနေဖြင့် စားသုံးသူကာကွယ်ရေးဥပဒေ-၂၀၁၉ အခန်း(၁၈)ပါ ကုန်အညွှန်း အမှတ်အသားများ မြန်မာဘာသာဖြင့် ပြည့်စုံစွာဖော်ပြလာရေး အသိပေးဆွေးနွေးခြင်း ဆောင်ရွက်ခဲ့ပါသည်။

       ထိုသို့တွေ့ဆုံဆွေးနွေးခဲ့ရာတွင် စီးပွားရေးလုပ်ငန်းရှင်များအနေဖြင့် ကုန်အညွှန်းအမှတ် အသားများ ပြည့်စုံစွာဖော်ပြလာခြင်းဖြင့် ဈေးကွက်ပိုမိုရရှိလာမည်ဖြစ်ပြီး စားသုံးသူများမှလည်း ၎င်း တို့ဘေးကင်းလုံခြုံရေးအတွက် ကုန်အညွှန်းအမှတ်အသားကိုကြည့်၍ အလွယ်တကူရွေးချယ် ဝယ်ယူ လာနိုင်မည်ဖြစ်၍ နှစ်ဦးနှစ်ဖက်အကျိုးရှိနိုင်မည်ဖြစ်ပါကြောင်း ဆွေးနွေးပြောကြားခဲ့ပြီး စားသုံးသူ ကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များ မိမိထုတ်လုပ်သည့် ကုန်စည်အပေါ် အာမခံပေးရမည့်အချက်များ၊ ကုန်အညွှန်းအမှတ်အသားပြည့်စုံစွာဖော်ပြထားခြင်းမရှိသည့် ကုန်စည် များအား ဈေးကွက်အတွင်းရောင်းချခွင့် မရှိကြောင်းနှင့် အထူးသဖြင့် သောက်ရေသန့်မှာ ထိန်းချုပ် အစားအသောက်အဖြစ် အမိန့်ကြော်ငြာထုတ်ပြန်ထားရာ အစားအသောက်နှင့် ဆေးဝါးကွပ်ကဲရေး ဦးစီးဌာန၏ ခွင့်ပြုချက်ရရှိမှသာလျှင် ထုတ်လုပ်ခွင့်ရှိမည်ဖြစ်ပြီး FDA၏ ထောက်ခံချက်ရယူရာတွင် လည်း မိမိတို့ဌာန၏ စားသုံးသူကာကွယ်ရေးဥပဒေ-၂၀၁၉ပါ ကုန်အညွှန်းအမှတ်အသားဖော်ပြချက်ကို မြန်မာဘာသာဖြင့် ပြည့်စုံစွာဖော်ပြပေး ရမည်ဖြစ်ကြောင်း အသိပေးရှင်းလင်းဆွေးနွေးခဲ့ပါသည်။

       ရေသန့်စက်ရုံမှ (၂၀)လီတာဗူးများ၊ (၁)လီတာဗူးများ ထုတ်လုပ်ရာ ရေသန့်ထည့်သွင်းရန် အတွက် (၂၀)လီတာရေသန့်ဗူးခွံများအား ရန်ကုန်မြို့မှ မှာယူသုံးစွဲသော်လည်း (၁)လီတာရေသန့်ဗူးခွံ များကို ၎င်းကိုယ်ပိုင်စက်ရုံတွင် ထုတ်လုပ်ကြောင်း၊ တစ်ကြိမ်လျှင် ဗူးရေတစ်ထောင်ခန့် ထုတ်လုပ် နိုင်ပြီး မှာယူသူများရှိပါကလည်း ထုတ်လုပ်ရောင်းချပေးလျှက်ရှိရာ (၁)လီတာဗူးခွံမှာ တစ်လလျှင်ဗူးခွံ ၅ထောင်ခန့် ရောင်းချရကြောင်း၊ ကံမမြို့ပေါ် ရပ်ကွက်/ကျေးရွာများနှင့် သရက်မြို့များသို့ ဖြန့်ဖြူး ရောင်းချကြောင်း သိရှိရပါသည်။

       စိုပြေစတား သောက်ရေသန့်လုပ်ငန်း၏ ကုန်အမှတ်တံဆိပ်များအား မြန်မာနိုင်ငံ စားသုံးသူ ကာကွယ်ရေးကော်မရှင်မှ ထုတ်ပြန်ထားသည့် ညွှန်ကြားချက် (၂/၂၀၁၉)နှင့် ကိုက်ညီမှုရှိ/မရှိ စီစစ် ဆောင်ရွက်ပေးနိုင်ရန်အတွက် ကုန်အမှတ်တံဆိပ် နမူနာ(၃)ခုအားရယူခဲ့ပြီး မိမိတို့ဌာနမှ လိုအပ် သည်များ ကူညီဆောင်ရွက်ပေးသွားမည်ဖြစ်ကြောင်း အသိပေးရှင်းလင်းပြောကြားခဲ့ပါသည်။

DOCA(မကွေး)

မန္တလေးတိုင်းဒေသကြီး၌ ဆေးနှင့်ဆေးပစ္စည်းများဈေးနှုန်းတည်ငြိမ်လျက်ရှိ

        ကုန်စည်ကူးသန်းရေးတွင် Covid-19 ပြန့်ပွားမှု ထိန်းချုပ်ရေးလုပ်ငန်းကော်မတီ၏ လမ်းညွှန်ချက်အရ စားသုံးသူရေးရာဦးစီးဌာန၊ မန္တလေးတိုင်းဒေသကြီးအနေဖြင့် Covid-19 တတိယလှိုင်းဖြစ်ပွားစဉ်မှ ယခုချိန်ထိ Covid-19 ကာကွယ်ကုသဆေးဝါး(၃၄)မျိုး၏ ဈေးနှုန်းအခြေအနေများနှင့် ဈေးကွက်အခြေအနေများအား နေ့စဉ်ခရိုင်များမှ စာရင်းများကောက်ယူခြင်း ဆောင်ရွက်လျက်ရှိရာ ဆေးပစ္စည်း(၃၄)မျိုးမှာ ဈေးနှုန်းများ တည်ငြိမ်လျှက်ရှိပြီး ဆေးဆိုင်များအနေဖြင့် စားသုံးသူလိုအပ်ချက် ပြည့်မီအောင် ရောင်းချပေးပို့နိုင်ကြောင်း၊မန္တလေးတိုင်းဒေသကြီးအတွင်း ဆေးဆိုင်ဖွင့်လှစ်မှု(၉၀%)ရှိကြောင်း၊ ဝယ်ယူမှုအများဆုံး ဆေးများမှာ Paracetamol Table 500mg,Orazine, Cevit,Biogesic,Broncheshနှင့် Enoxa Parin In Jection ဆေးများဖြစ်ကြောင်း၊ ဆေးပစ္စည်းများအား ဖြစ်သင့်ဖြစ်ထိုက်သည့် ဈေးနှုန်းဖြင့် ရောင်းချစေရေးအတွက် နေ့စဉ် နံနက် ၁၀:၀၀နာရီမှ နေ့လည် ၁၂:၀၀ နာရီထိ ကွင်းဆင်းစစ်ဆေးမှုများ ဆောင်ရွက်လျက်ရှိကြောင်း တင်ပြအပ်ပါသည်။

DOCA(မန္တလေး)

Pages

Subscribe to RSS - သတင်းနှင့် လှုပ်ရှားမှုများ