သတင်းနှင့် လှုပ်ရှားမှုများ

    Coca-Cola Pinya Beverages Myanmar (CCPBM) ကုမ္ပဏီသည် မြန်မာနိုင်ငံတွင် ၂၀၁၃ခုနှစ်မှစတင်၍ အချိုရည်များကို ပြည်တွင်း၌စားသုံးသူကာကွယ်ရေးဥပဒေပါ ကုန်အညွှန်းအမှတ်အသားပြဋ္ဌာန်းချက်များနှင့်အညီ ထုတ်လုပ်ဖြန့်ဖြူးရောင်းချလျက်ရှိပါကြောင်း၊ ယခုအခါ ဈေးကွက်အတွင်း ယင်းကုမ္ပဏီမှထုတ်လုပ်သည့် အမှတ်တံဆိပ်အချိုရည်နှင့်ပုံစံတူ၍ ကုန်အညွှန်းအမှတ်အသားအား ထိုင်းဘာသာဖြင့်ဖော်ပြထားသည့်အပြင် မြန်မာနိုင်ငံအစားအသောက်နှင့်ဆေးဝါးကွပ်ကဲရေးဦးစီးဌာန (FDA) တွင် မှတ်ပုံတင်ထားခြင်းမရှိသော Sprite® အချိုရည်များရောင်းချနေသည့်အတွက် သက်ဆိုင်ရာဌာနများနှင့်ပူးပေါင်း၍ ဈေးကွက်စောင့်ကြည့်စစ်ဆေးရန်နှင့် ကုန်စည်အတုများကိုဈေးကွက်အတွင်းမှ ဖယ်ရှားရှင်းလင်းအရေးယူဆောင်ရွက်နိုင်ရေးအတွက် သက်ဆိုင်ရာ စားသုံးသူရေးရာကော်မတီဥက္ကဋ္ဌထံကြိုတင်တင်ပြ၍ ခွင့်ပြုချက်ရယူပြီးနောက် ၂၀၂၃ခုနှစ်၊ ဇူလိုင်လ (၂၄) ရက်နေ့၊ နံနက် (၁၀:၀၀) နာရီအချိန်တွင် လွိုင်ကော်မြို့ပေါ်ရှိ ကုန်ပစ္စည်းမျိုးစုံရောင်းချနေသောကုန်စုံဆိုင်များသို့ မြန်မာနိုင်ငံအစားအသောက်နှင့်ဆေးဝါးကွပ်ကဲရေးဦးစီးဌာန ( FDA ) တွင် မှတ်ပုံတင်ထားခြင်းမရှိဘဲ ထိုင်းဘာသာဖြင့်ဖော်ပြထားသော Sprite® အချိုရည်များ ဈေးကွက်အတွင်းရောင်းချခြင်းရှိ/မရှိကို သက်ဆိုင်ရာစားသုံးရေးရာကော်မတီအဖွဲ့ဝင်များဖြင့် ဈေးကွက်စောင့်ကြည့်စစ်ဆေးဆောင်ရွက်ခဲ့ပါသည်။

    လွိုင်ကော်မြို့ပေါ်ရှိ ကုန်ပစ္စည်းမျိုးစုံရောင်းချနေသောကုန်စုံဆိုင်များတွင် Coca-Cola Pinya Beverages Myanmar (CCPBM) ကုမ္ပဏီ၏ ကုန်အမှတ်တံဆိပ်နှင့်ပုံစံတူ ထိုင်းဘာသာဖြင့်ဖော်ပြထားသော Sprite® အချိုရည်များရောင်းချနေခြင်းမရှိကြောင်းနှင့် မြန်မာနိုင်ငံအစားအသောက်နှင့်ဆေးဝါးကွပ်ကဲရေးဦးစီးဌာနတွင် မှတ်ပုံတင်ထားသော Sprite® အချိုရည်များသာရောင်းချလျက်ရှိကြောင်းတို့ကိုစစ်ဆေးတွေ့ရှိရပြီး ကုန်ပစ္စည်းမျိုးစုံရောင်းချနေသည့်အရောင်းဆိုင်များအနေဖြင့် ကုန်အညွှန်းအမှတ်အသားသတ်မှတ်ချက်များနှင့်ကိုက်ညီမှုမရှိသည့်ကုန်စည်များနှင့် တရားမဝင်တင်သွင်းလာသည့်ကုန်စည်များကိုရောင်းချဖြန့်ဖြူးခြင်းမပြုကြရန်လိုအပ်ကြောင်း၊ ဈေးကွက်အတွင်းရောင်းချဖြန့်ဖြူးခြင်းများစစ်ဆေးတွေ့ရှိရပါက စားသုံးသူကာကွယ်ရေးဥပဒေပုဒ်မ ၇၃အရ နှစ်နှစ်ထက်မပိုသောထောင်ဒဏ်ဖြစ်စေ၊ ကျပ်သိန်းနှစ်ရာထက်မပိုသောငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ပြစ်မှုပြစ်ဒဏ်များခံရမည်ဖြစ်ကြောင်း ကုန်ပစ္စည်းမျိုးစုံရောင်းချသည့်ကုန်စုံဆိုင် (၁၀) ဆိုင်တို့အား အသိပညာပေးစစ်ဆေးဆောင်ရွက်ခဲ့ကြကြောင်းသိရှိရပါသည်။

DOCA(ကယား)

    ဧရာဝတီတိုင်းဒေသကြီး ၊ ပုသိမ်မြို့ စက်မှုစီမံကိန်းရုံးတွင် မြန်မာ့နိုင်ငံဆန်စပါးအသင်းချုပ် (MRF) မှ တိုင်းဒေသကြီးအတွင်း ဆန်စပါးစိုက်ပျိုးထုတ်လုပ်မှု ၊ စပါးဝယ်ယူကြိတ်ခွဲသိုလှောင် တင်ပို့ရောင်းချမှုအခြေအနေများ ဆန်စပါးဈေးကွက်နှင့် ဈေးနှုန်းတည်ငြိမ်ရေး လုပ်ငန်းစဉ်များနှင့် ပတ်သက်သည့် လုပ်ငန်းညှိနှိုင်းအစည်းအဝေးကို ၂၀၂၃ ခုနှစ်၊ ဇူလိုင်လအတွင်း ကျင်းပပြုလုပ်ခဲ့ရာ မြန်မာ့နိုင်ငံဆန်စပါးအသင်းချုပ် ဥက္ကဋ္ဌ ဦးရဲမင်းအောင်နှင့် တာဝန်ရှိသူများ၊ တိုင်းအတွင်းရှိ ဆန်စက်ပိုင်ရှင်များအသင်းဥက္ကဋ္ဌ ဦးစိုးဝင်း ၊ ဆန်ကုန်သည်များ အသင်းဥက္ကဋ္ဌ ဦးမောင်မောင်ဇော်နှင့် ဆန်စက်ပိုင်ရှင်များ ၊ ဆန်ကုန်သည်များနှင့် ဖိတ်ကြားထားသော တိုင်းအဆင့် ဌာနဆိုင်ရာများ  စုစုပေါင်း (၁၅၀) ခန့် တက်ရောက်ခဲ့ပါသည်။

   အစည်းအဝေးတွင် မြန်မာ့နိုင်ငံဆန်စပါးအသင်းချုပ် ဥက္ကဋ္ဌ ဦးရဲမင်းအောင်က အဖွင့်အမှာစကားပြောကြားပြီး အစည်းအဝေးကျင်းပရခြင်းနှင့် ပတ်သက်၍ ရှင်းလင်းတင်ပြခဲ့ကာ ဆန်စပါး စိုက်ပျိုးထုတ်လုပ်ခြင်းနှင့်ပတ်သက်သည့် ကိစ္စရပ်များကို စိုက်ပျိုးရေးဦးစီးဌာန ၊ ဒု-တိုင်းဦးစီးမှူး၊ ဦးကျော်ကျော်လှိုင်က ရှင်းလင်းတင်ပြခဲ့ပါသည်။

     ဆက်လက်၍ မြန်မာ့နိုင်ငံ ဆန်စပါးအသင်းချုပ်မှ တာဝန်ရှိသူများကလည်း အသင်းအဖွဲ့ များ ဖွဲ့စည်းအားကောင်းစေရေး၊ MSME ကိစ္စရပ်များ ဖွံ့ဖြိုးတိုးတက်ရေး ၊ ချေးငွေရရှိရေးတို့နှင့် ပက်သတ်၍ အသေးစိတ်ရှင်းလင်း၍ တက်ရောက်လာသည့် စက်ပိုင် ၊ ကုန်သည်များကလည်း သိလိုသည်များကို မေးမြန်းခြင်းနှင့် ရှေ့ဆက်ဆောင်ရွက်ရမည့် ကိစ္စရပ်များအား ဆွေးနွေးခဲ့ပြီး အခမ်းအနားကို နေ့လယ် ၁၂:၀၀ နာရီတွင် ရုပ်သိမ်းခဲ့ကြောင်း သိရပါသည်။

DOCA(ဧရာဝတီ)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် စားသုံးသူပြည်သူများအနေဖြင့် ဘေးအန္တရာယ်ကင်းရှင်းပြီး ထုတ်ကုန်လုံခြုံစိတ်ချရမှုရှိသည့် ကုန်စည်နှင့် ဝန်ဆောင်မှုများကို ရွေးချယ်ဝယ်ယူအသုံးပြုတတ်စေရေးအတွက် စားသုံးသူအသိပညာပေးဟောပြောပွဲများကို လစဉ်ဆောင်ရွက်လျက်ရှိကြောင်း သိရသည်။

       စားသုံးသူအသိပညာပေးဟောပြောပွဲများကို အခြေခံပညာကျောင်းများ၊ ဌာနဆိုင်ရာများ၊ တပ်ရင်းတပ်ဖွဲ့များ၊ ရပ်ကွက်များ ၊ ကျေးရွာများ၊ ဈေးများနှင့် စက်ရုံအလုပ်ရုံတို့တွင် ဆောင်ရွက် လျက်ရှိသည်။ ၂၀၂၃ ခုနှစ်၊ ဇူလိုင်လအတွင်း စားသုံးသူအသိပညာပေး ဟောပြောပွဲများကို (၇.၇.၂၀၂၃) ရက်နေ့တွင် ကန့်ဘလူခရိုင်၊ ကျွန်းလှမြို့၊ ပျဉ်းမမြိုင်ရပ်ကွက်ရှိ “ခေတ်ကြိုက်” သောက်ရေသန့်စက်ရုံလုပ်ငန်းရှင်နှင့် အလုပ်သမားများ (၁၁)ဦးကိုလည်းကောင်း၊ (၁၃.၇.၂၀၂၃)ရက်နေ့တွင် ကန့်ဘလူမြို့၊ အမှတ်(၅)ရပ်ကွက်ရှိ အခြေခံပညာအလယ်တန်းကျောင်းရှိ ကျောင်းအုပ်ဆရာကြီး၊ ဆရာ/ဆရာမနှင့် ကျောင်းသား/ကျောင်းသူ(၁၇၀)ဦးကိုလည်းကောင်း စုစုပေါင်း စားသုံးသူပြည်သူ(၁၈၁)ဦးတို့ကို စားသုံးသူအသိပညာပေးဟောပြောပွဲဆောင်ရွက်ခဲ့ရာ တာဝန်ရှိသူများမှ စားသုံးသူအခွင့်အရေး(၈)ချက်ကိုလည်းကောင်း၊ စားသုံးသူနစ်နာဆုံးရှုံးမှုနှင့်စပ်လျဉ်း၍ တိုင်ကြားနိုင်သည့် နည်းလမ်းများကိုလည်းကောင်း၊ စားသုံးသူရေးရာနှင့်သက်ဆိုင်သည့် အကြောင်းအရာများ ၊ အသိပညာဗဟုသုတများကို နေ့စဉ်ဖြန့်ဝေပေးလျက်ရှိသည့် ဌာန၏ Website ၊ Facebook Page နှင့် Consumer Call Center No.1535 စသည်တို့ကို ဝင်ရောက်ကြည့်ရှု့၊ ခေါ်ဆို၍လေ့လာနိုင်ကြောင်းနှင့်  လက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကန့်ဘလူမြို့နယ် ဦးစီးမှူးရုံးအနေဖြင့် “ထုတ်ကုန်လုံခြုံစိတ်ချရမှုအစ ကုန်အညွှန်းအမှတ်အသားက” ဆိုသည့်အတိုင်း ဈေးကွက်အတွင်း ရောင်းချလျက်ရှိသော ကုန်စည်များကို ထုတ်ကုန်လုံခြုံစိတ်ချရမှုရှိစေရေးအတွက် ကုန်အညွှန်းအမှတ်အသားများကို ညွှန်ကြားချက်နှင့်အညီ ဖော်ပြထားခြင်း ရှိ/မရှိ သက်ဆိုင်ရာဌာနများနှင့်ပူးပေါင်း၍ ဈေးကွက်စောင့်ကြည့်စစ်ဆေးခြင်းကို လစဉ်ဆောင်ရွက်လျက်ရှိပါသည်။

      ထိုသို့ ဈေးကွက်စောင့်ကြည့်စစ်ဆေးခြင်းကို (၇/၂၀၂၃)လအတွင်း စားသုံးသူရေးရာဦးစီးဌာနမှ ဦးဆောင်၍ (၆.၇.၂၀၂၃)ရက်နေ့တွင် ကန့်ဘလူမြို့နယ် ၊ ကျွန်းလှမြို့ ၊ သစ်ရာမြိုင်ရပ်ကွက်ရှိ ကုန်စုံဆိုင်(၁)ဆိုင်၊ ကန့်ဘလူမြို့“မြို့မဈေး”ရှိ ကုန်စုံဆိုင်(၂)ဆိုင်နှင့် ကန့်ဘလူမြို့ ၊ အမှတ်(၄) ရပ်ကွက်ရှိ ကုန်စုံဆိုင်(၁)ဆိုင်သို့လည်းကောင်း၊ (၁၂.၇.၂၀၂၃)ရက်နေ့တွင် ကန့်ဘလူမြို့၊ အမှတ် (၃)ရပ်ကွက်ရှိ ကုန်စုံဆိုင်(၂)ဆိုင်သို့လည်းကောင်း၊ (၁၃.၇.၂၀၂၃)ရက်နေ့တွင် ကျွန်းလှမြို့ “သစ်ရာမြိုင်”ဈေးရှိ ကုန်စုံဆိုင်(၁)ဆိုင်သို့လည်းကောင်း၊ (၁၄.၇.၂၀၂၃)ရက်နေ့တွင် ကန့်ဘလူမြို့၊ အမှတ်(၃)ရပ်ကွက်ရှိ ကုန်စုံဆိုင်(၁)ဆိုင်သို့လည်းကောင်း ဈေးကွက်စောင့်ကြည့်စစ်ဆေးခြင်း စုစုပေါင်း (၅)ကြိမ် ဆောင်ရွက်ခဲ့ပြီး  အသိပညာပေး လက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

     စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူး ဦးသန်းဦး၊ ခရိုင်ဦးစီးမှူး ဦးမျိုးဝင်းနိုင် (ဦးစီးအရာရှိ) နှင့် ဝန်ထမ်းများသည် မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ (၂၈-၇-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် ဘားအံမြို့နယ်၊ ဘားကပ်ကျေးရွာ၊ ဘားကပ်ဈေး၌ လက်လီ/လက်ကားဖြန့်ဖြူးရောင်းချနေသော ကုန်စုံဆိုင်များရှိ ကုန်ပစ္စည်းများကို ထုတ်ကုန်လုံခြုံစိတ်ချရမှုရှိစေရေး စစ်ဆေးခဲ့ကြောင်းသိရှိရသည်။

  ထိုသို့စစ်ဆေးဆောင်ရွက်ရာတွင် စားသုံးသူပြည်သူများဘေးအန္တရာယ်ကင်းရှင်း၍ လုံခြုံစိတ်ချရမှုရှိစေရန်အတွက် စားသုံးသူကာကွယ်ရေးဥပဒေ၂၀၁၉ အခန်း (၁၈) ပါ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ ပြဋ္ဌာန်းချက်များနှင့်ကိုက်ညီမှုရှိ/မရှိနှင့် သက်တမ်းလွန်ကုန်ပစ္စည်းများကို ဈေးကွက်အတွင်း ရောင်းချလျက်ရှိ/မရှိတို့ကိုစစ်ဆေးပြီးနောက် ကုန်အညွှန်အမှတ်အသားပြည့်စုံစွာဖော်ပြထားခြင်းမရှိသောကုန်စည်များကိုမရောင်းချရန်တို့ကိုသိရှိစေရန် ပြောကြားခဲ့ကြောင်းသိရှိရပါသည်။

DOCA(ကရင်)