သတင်းနှင့် လှုပ်ရှားမှုများ

    မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့ ကြက်သွန်နီပွဲရုံများသို့ ဇွန်လအတွင်း နွေကြက်သွန်နီများ နေ့စဉ်ဝင်ရောက်လျက်ရှိပြီး တစ်ရက်လျှင် ကုန်ချိန်ပျမ်းမျှပိဿာ (၂)သောင်းမှ (၃)သောင်းခန့် ဝင်ရောက်ကြောင်း၊ ဒေသတွင်းကြက်သွန်နီ အများဆုံးစိုက်ပျိုးသော ဆိပ်ဖြူမြို့ပေါ်ရှိ ရွာသစ်၊ အနောက်ပိုင်းရပ်ကွက်များနှင့် ကိုးတောင့်အုပ်၊ လိပ်ခြံ၊ ရွာသစ်ကြီး၊ ကပိုင်၊ ကံတွင်း၊ ချင်တောင်၊ ဆင်နီတောင်၊ ဒေါသာ၊ တပေါင်း၊ ကူရှည်ရွာမ၊ အလယ်စုရွာများနှင့် ပခုက္ကူမြို့နယ်အတွင်းရှိ ကျေးရွာများနှင့် ပွင့်ဖြူ၊ စလင်းမြို့များမှ အများဆုံး ဝင်ရောက်မှုရှိပြီး တစ်လအတွင်း ကုန်ချိန်ပိဿာ (၈)သိန်းခန့် ဝင်ရောက်လျက်ရှိကြောင်း ဈေးကွက်မှ သိရှိရသည်။

   ကြက်သွန်နီ ဈေးနှုန်းဈေးကွက်အနေဖြင့် ဇွန်လ(ပထမပတ်)တွင် နွေကြက်သွန်နီ(ဂျွန်) တစ်ပိဿာလျှင် အမြင့်ဈေး(ထိပ်စရှယ်) ကျပ်(၁၈၀၀-၁၇၀၀-၁၅၀၀)ဈေးဖြင့် အရောင်းအဝယ်ဖြစ်ခဲ့ပြီး ဇွန်လ(ဒုတိယပတ်)တွင် ကြက်သွန်ဈေးအနည်းငယ်မြင့်တက်ပြီး အရောင်းအဝယ်ဖြစ်ခဲ့သည်။ ထိပ်စအမြင့်ဈေး ကျပ်(၁၉၀၀-၁၈၀၀-၁၆၀၀)ဖြင့် အရောင်းအဝယ်ဖြစ်ခဲ့ပြီး ဇွန်လ(တတိယပတ်)နှင့် (စတုတ္ထပတ်)တို့တွင်လည်း ဈေးငြိမ်ပြီး ကြက်သွန်နီတစ်ပိဿာလျှင် ကျပ်(၁၉၀၀-၁၆၀၀)ဈေးဖြင့် အရောင်းအဝယ်ဖြစ်ခဲ့ကြောင်း၊ ပြည်ပဝယ်လိုအား ဈေးကွက်နည်းခြင်းနှင့် လမ်းပမ်းဆက်သွယ်ရေး အခက်အခဲကြောင့် ရောင်းလိုအား ဝယ်လိုအားနည်း၍ ကြက်သွန်နီဈေးငြိမ်ပြီး အရောင်းအဝယ်ဖြစ်ကြောင်း ဒေသတွင်း စိုက်တောင်သူနှင့် ကုန်သည်များမှ ၂၀၂၄ ခုနှစ်၊ ဇူလိုင်လတွင် ကြက်သွန်နီဈေး မြင့်တက်လာနိုင်မည်ဟု ခန့်မှန်းကြောင်း၊ ယခင်မေလနှင့်ယခုဇွန်လ ကြက်သွန်နီဈေးနှုန်း နှိုင်းယှဉ်ပါက ဇွန်လတွင် ကြက်သွန်နီတစ်ပိဿာ ကျပ်(၁၀၀)ခန့် ဈေးကျဆင်းပြီး အရောင်းအဝယ်ဖြစ်‌ကြောင်း ဈေးကွက်မှ သိရပါသည်။ ယခုဇွန်လအတွင်း၌ ကြက်သွန်နီဈေးကျဆင်းချိန်တွင် မြို့ပေါ်ရှိဝယ်လက် ကုန်သည်များနှင့် အခြားမြို့နယ်များရှိ ကုန်သည်များမှလည်း ဝယ်ယူသိုလှောင်မှုများကြောင်း၊ ဒေသတွင်းစိုက်တောင်သူများမှလည်း ကြက်သွန်နီဈေးကောင်းရရှိရန်မျှော်လင့်ပြီး ရောင်းချမှုနည်း သောကြောင့် ကုန်စည်စီးဆင်းမှုနည်းကြောင်း သိရှိရပါသည်။

          ကုန်စည်စီးဆင်းမှုအနေဖြင့် ဇွန်လအတွင်း ဆိပ်ဖြူမြို့မှ ကြက်သွန်နီ ကုန်ချိန်ပိဿာ(၇)သိန်း ခန့်၊ တန်ချိန်အားဖြင့် တန်(၁၁၄၃)ခန့်  ကုန်စည်စီးဆင်းခဲ့ကြောင်း၊ ရန်ကုန်ဘုရင့်နောင်ပွဲရုံသို့ အများဆုံး တင်ပို့လျက်ရှိပြီး ပြည်ပနိုင်ငံများသို့ တင်ပို့မှုနည်းကြောင်း၊ ကြက်သွန်နီ ဈေးကွက်မှ သိရှိရပါသည်။

DOCA(မကွေး)

       ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ်မြို့နယ်တာဝန်ခံ ဒေါ်စန်းစန်းမော်သည် ၂၀၂၄ခုနှစ်၊ ဇွန်လ(၂၆)ရက်နေ့၊ နံနက်(၁၁:၀၀)နာရီအချိန်တွင် သုံးခွမြို့နယ်၊ အမှတ်(၃)ရပ်ကွက်ရှိ လောကမာရစိန်ကျောင်းသစ် (ဘုန်းတော်ကြီးသင်ပညာရေး) ကျောင်း၌ စားသုံးသူအသိပညာပေးဟောပြောခဲ့ကြောင်းသိရသည်။

     အဆိုပါဟောပြောပွဲတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ စားသုံးသူရေးရာဦးစီးဌာနနှင့် မြို့နယ်အား/ကာတို့ပူးပေါင်း၍ လူငယ်ရေးရာအသိပညာပေးဟောပြောပွဲကျင်းပခဲ့ရာ ပထမဦးစွာ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်တင်တင်ထွေးက အသိပညာပေးဟောပြောပွဲပြုလုပ်ရခြင်း၏ရည်ရွယ်ချက်ကို ရှင်းလင်းပြောကြားခြင်း၊ စာဖတ်ခြင်းကြောင့်ရရှိလာမည့် အသိပညာအကျိုးကျေးဇူးများအကြောင်း၊ လူငယ်နှင့်မူးယစ်ဆေးအန္တရာယ်များအကြောင်း သိကောင်းစရာများကိုဟောပြောဆွေးနွေးခဲ့ပါသည်။ ဆက်လက်၍ စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်စန်းစန်းမော်က ဌာန၏လုပ်ငန်းဆောင်ရွက်ခြင်းများ၊ မျှော်မှန်းချက်၊ ရည်မှန်းချက်များ၊ ဝန်ကြီးဌာနအကြောင်းနှင့် စားသုံးသူရေးရာဦးစီးဌာန၊ စားသုံးသူများကာကွယ်ပေးရသည့် ဥပဒေလိုအပ်သည့်အကြောင်း၊ စားသုံးသူကာကွယ်ရေးဥပဒေနှင့်စပ်လျဉ်း၍ စားသုံးသူအများပြည်သူတို့၏ စားသုံးသူအခွင့်အရေးများဆုံးရှုံးမှုမရှိစေရေးတို့အတွက် ၂၀၁၉ခုနှစ်၊ မတ်လ(၁၅)ရက်နေ့တွင်ပြဋ္ဌာန်းခဲ့ကြောင်း၊ ၎င်းစားသုံးသူကာကွယ် ရေးဥပဒေတွင် ဦးစီးဌာန၏လုပ်ပိုင်ခွင့်နှင့်တာဝန်များ၊ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ၏တာဝန်များ၊ ကုန်စည်(သို့)ဝန်ဆောင်မှုလုပ်ငန်းများ၏ အာမခံချက်နှင့်စပ်လျဉ်း၍ စားသုံးသူကတောင်းဆိုနိုင်သည့်အခွင့်အရေးများ၊ ထိခိုက်နစ်နာဆုံးရှုံးမှုများနှင့်စပ်လျဉ်း၍ တိုင်ကြားနိုင်သည့်နည်းလမ်းများ၊ ကုန်အညွှန်းအမှတ်အသားဆိုင်ရာ အချက်အလက်များမှ မြန်မာဘာသာဖြင့် မဖြစ်မနေရေးသားဖော်ပြရမည့်အချက်များအား ရှင်းလင်းပြောကြားခဲ့ပါသည်။ အဆိုပါဟောပြောပွဲတွင် ဆရာ၊ ဆရာမ(၁၀)ဦးနှင့် ကျောင်းသား/သူ (၁၅၆)ဦး၊ စုစုပေါင်း(၁၆၆)ဦးတက်ရောက်ခဲ့ကြောင်းသိရှိရပါသည်။

DOCA(ရန်ကုန်)

     စားသုံးသူရေးရာဦးစီးဌာန၊ ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်အတွင်းရှိ စားသုံးသူပြည်သူများကို သင့်တင့်မျှတသောဈေးနှုန်းဖြင့် အလွယ်တကူဝယ်ယူစားသုံးနိုင်ရေးအတွက် ကော့မှူးမြို့နယ်စည်ပင်သာယာမြို့မဈေးအတွင်း/ အပြင်နှင့် ရပ်ကွက်များတွင် ဖြန့်ဖြူးရောင်းချပေးလျက်ရှိသော ဆိုင်ပိုင်ရှင်လုပ်ငန်းရှင်များအား ၂၀၂၄ခုနှစ်၊ ဇွန်လ(၂၆)ရက်နေ့၊ နံနက်(၁၀း၀၀)နာရီအချိန်တွင် အထွေထွေ အုပ်ချုပ်ရေးဦးစီးဌာနဧည့်ခန်းမ၌ ဆန်ဖြန့်ဖြူးရောင်းချနေမှုအခြေအနေအား ခေါ်ယူတွေ့ဆုံဆွေးနွေးပြောကြားခဲ့ကြောင်းသိရသည်။

      ထိုသို့ဆွေးနွေးခဲ့ရာတွင် ကော့မှူးမြို့နယ်၊ ဒုတိယမြို့နယ်အုပ်ချုပ်ရေးမှူး ဦးစည်သူက မြို့နယ်အတွင်း ဖြန့်ဖြူးရောင်းချလျက်ရှိသော ဆန်ဆိုင်ပိုင်ရှင်လုပ်ငန်းရှင်များအနေဖြင့် မိမိတို့ဝယ်ယူထားသည့် ဈေးနှုန်းများအပေါ် သင့်တင့်သောအမြတ်ရာခိုင်နှုန်းသာယူပြီး ပြန်လည်ဖြန့်ဖြူးရောင်းချကြရန် ရန်ကုန်တိုင်းဒေသကြီးအတွင်းရှိ စားသုံးသူပြည်သူများ သင့်တင့်မျှတသောရည်ညွှန်းဈေးဖြင့် မြန်မာနိုင်ငံဆန်စပါးအသင်းချုပ်နှင့်ညီနောင်အသင်းများ၊ ကုန်စည်ဒိုင်များ၊ ဆန်စပါးကုမ္ပဏီများပူးပေါင်းပြီး ဆန်များရောင်းချသွားမည်ဖြစ်ကြောင်း ဆန်ဈေးနှုန်းများတည်ငြိမ်စေရေးအတွက် ဆန်ဈေးနှုန်းကြီးမြင့်မှုမရှိစေရေး၊ ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့်  သိုလှောင်ထားခြင်းမျိုးများမဖြစ်စေရေးတို့အတွက် ဈေးကွက်အတွင်း ကွင်းဆင်းစစ်ဆေးဆောင်ရွက်မှုများပြုလုပ်လျက်ရှိကြောင်း လုပ်ငန်းရှင်များအား အသိပေးဆွေးနွေးပြောကြားခဲ့ကြောင်းသိရသည်။

        အဆိုပါဆွေးနွေးပွဲသို့ အထွေထွေအုပ်ချုပ်ရေးဦးစီးဌာနမှ ဒုတိယမြို့နယ်အုပ်ချုပ်ရေးမှူး ဦးစည်သူနှင့် ဝန်ထမ်းများ၊ မြို့နယ်စည်ပင်သာယာရေးအဖွဲ့မှ အမှုဆောင်အရာရှိ ဦးတင်ထွန်းအောင်နှင့် ဒေါ်အေးသီတာ (ဒု-ဦးစီမှူး)၊ စားသုံးသူရေးရာဦးစီးဌာနမှ မြို့နယ်တာဝန်ခံ ဦးတင်မင်းနှင့် ဆန်ဆိုင်ပိုင်ရှင် လုပ်ငန်းရှင်(၁၂)ဦးတက်ရောက်ခဲ့ကြောင်းသိရှိရပါသည်။

DOCA(ရန်ကုန်)

    ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ်၌ စားသုံးဆီအမျိုးမျိုးရောင်းချခြင်းနှင့်စပ်လျဉ်း၍ ထုတ်ပြန်ထားသောညွှန်ကြားချက်များအား အသိပညာပေးဆွေးနွေးပွဲကို ဇွန်လ၂၇ရက်နေ့၊ နေ့လယ်(၁၁း၃၀)နာရီအချိန်တွင် စည်ပင်သာယာမြို့မဈေးတာဝန်ခံရုံးခန်းမ၌ ကျင်းပခဲ့ကြောင်းသိရသည်။

  ထိုသို့ဆွေးနွေးခဲ့ရာတွင် စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်နွယ်နွယ်အေးက စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး၏ညွှန်ကြားချက်အရ မြန်မာနိုင်ငံစားသုံးသူများကော်မရှင်၏ ထုတ်ပြန်ထားသောညွှန်ကြားချက်အမှတ် (၂/၂၀၁၉) နှင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ထုတ်ပြန်ထားသော ညွှန်ကြားချက်အမှတ်(၁/၂၀၂၁)တို့အား လိုက်နာဆောင်ရွက်ရမည့်အပြင် မြန်မာနိုင်ငံအစားအသောက်နှင့်ဆေးဝါးအာဏာပိုင်အဖွဲ့မှထုတ်ပြန်ထားသော ဟင်းသီးဟင်းရွက်ဆီများကို ရောနှောဆီ (Blended Oil) အဖြစ် ရောစပ်ရာတွင် အရည်အသွေးအာမခံချက်နှင့် အမှတ်တံဆိပ်ကပ်ခြင်းဆိုင်ရာ သတ်မှတ်သည့်အပိုဒ် (၂/၂၀၂၄) တို့အား လိုက်နာဆောင်ရွက်သွားရန်နှင့် လိုက်နာဆောင်ရွက်ခြင်းမရှိပါက သက်ဆိုင်ရာဌာနများနှင့်အရေးယူဆောင်ရွက်သွားမည်ဖြစ်ကြောင်း ထုတ်လုပ်ဖြန့်ဖြူးရောင်းချလျက်ရှိသော သက်ဆိုင်ရာလုပ်ငန်းရှင်များကိုလည်း ထပ်ဆင့်အသိပေးနိုင်ရေး မိမိတို့စားသုံးသူရေးရာဦးစီးဌာနအနေဖြင့် တစ်နိုင်ငံလုံးအတိုင်းအတာ မြေပြင်ကွင်းဆင်းစစ်ဆေးမည့် စီမံချက်များရေးဆွဲအကောင်အထည်ဖော်ဆောင်ရွက်လျက်ရှိကြောင်း စားသုံးဆီအမျိုးမျိုးရောင်းချခြင်းနှင့်ပတ်သက်၍ အသိပညာပေးဟောပြောဆွေးနွေးခဲ့ကြောင်းသိရသည်။

      အဆိုပါစားသုံးဆီအမျိုးမျိုးရောင်းချခြင်းနှင့်စပ်လျဉ်း၍ အသိပညာပေးဆွေးနွေးပွဲသို့ စားသုံးဆီအမျိုးမျိုးရောင်းချသော လက်လီဆိုင်၊ ကုန်စုံဆိုင်လုပ်ငန်းရှင် (၃၃)ဦးတက်ရောက်ခဲ့ပြီး တက်ရောက်လာ သူများက သိရှိလိုအပ်သည်များကိုမေးမြန်းရာ အပြန်အလှန်ဆွေးနွေးခဲ့ကြောင်းသိရှိရပါသည်။

DOCA(ရန်ကုန်)

   ၂၈-၆-၂၀၂၄ ရက်နေ့ မုဒုံမြို့ပေါ်ရပ်ကွက်များတွင် ဖြန့်ဖြူးရောင်းချနေသည့် ဆန်ဆိုင်များ သက်သာသောဈေးနှုန်းဖြင့် ရောင်းချနိုင်ရေးအတွက် ကွင်းဆင်းစစ်ဆေးခဲ့ကြောင်း သိရှိရပါသည်။

  ထိုသို့ ကွင်းဆင်းစစ်ဆေးရာတွင် မုဒုံမြို့နယ်ဆန်နှင့်ဆန်စက်အသင်းဥက္ကဋ္ဌ ဦးဇော်ဝင်း၊ မုဒုံမြို့နယ်အထူးစုံစမ်းစစ်ဆေးရေးဦးစီးဌာနမှ ဦးစီးအရာရှိ(စုံစမ်းရေး)ဦးခင်ဗိုလ်၊ မုဒုံမြို့နယ် အထွေထွေအုပ်ချုပ်ရေးဦးစီးဌာနမှ ဒုဦးစီးမှူး ဦးဝင်းလွင်၊ မြို့နယ်စားသုံးသူရေးရာဦးစီးဌာနမှ ဒုဦးစီးမှူး ဦးညီလွင်အေး၊ မုဒုံမြို့နယ်စည်ပင်သာယာရေးအဖွဲ့မှ ဒုဦးစီးမှူး ဦးဝင်းညွန့်၊ မုဒုံမြို့မရဲစခန်းမှ ဒုရဲအုပ် သူရထွန်းနှင့် တာဝန်ရှိများ ပူးပေါင်း၍ မုဒုံမြို့၊ မြို့မ(၄)ရပ်ကွက်ရှိ စိန်မေတ္တာ ဆန်ဆိုင်အပါအဝင် ဆန်ဆိုင်(၇)ဆိုင်အား စစ်ဆေးခဲ့ကြောင်း သိရှိရသည်။

   အဆိုပါဆိုင်များတွင် မြန်မာနိုင်ငံဆန်စပါးအသင်းချုပ်နှင့် ညီနောင်အသင်းများ၊ ကုန်စည်ဒိုင်များ၊ ဆန်စပါးကုမ္ပဏီများမှ ချမှတ်ထားသည့် စားသုံးသူပြည်သူများအတွက် သင့်တင့်မျှတသောရည်ညွှန်းစျေးနှုန်းဖြစ်သည့် ဧည့်မထဆန် (၁)ပြည်လျှင် ၃၀၀ဝိ/-နှုန်းဖြင့် ရောင်းချပေးရန် ဆိုင်ရှင်များအား ရှင်းလင်းပြောကြားခဲ့ကြောင်း သိရှိရသည်။

DOCA(မွန်)