သတင်းနှင့် လှုပ်ရှားမှုများ

    ၂၀၂၄ ခုနှစ်၊ ဇွန်လ ၂၈ ရက်နေ့၊ နံနက်(၀၈း၃၀)အချိန်တွင် တနင်္သာရီတိုင်းဒေသကြီးဦးစီး မှူးရုံးမှ စစ်ဆေးရေးအရာရှိနှင့် ဝန်ထမ်းများသည် တနင်္သာရီတိုင်းဒေသကြီး၊ ထားဝယ်မြို့၊ ကမ်းနား ပျံကျစျေးအတွင်းရှိ အသား၊ ငါး၊ ပုစွန်အရောင်းဆိုင်များအား သက်ဆိုင်ရာဌာနများဖြစ်သည့် ပြည်သူ့ကျန်းမာရေးဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ ငါးလုပ်ငန်းဦးစီး ဌာန၊ စည်ပင်သာယာရေးအဖွဲ့တို့နှင့် အတူ စျေးကွက်စောင့်ကြည့် စစ်ဆေးခြင်းဆောင်ရွက်ခဲ့ပါသည်။

    ထိုသို့ဆောင်ရွက်ရာတွင် စျေးအတွင်းရောင်းချနေသော ငါး၊ ပုစွန်များတွင် စာသုံးသူပြည်သူများ အန္တရာယ်ဖြစ်စေနိုင်သည့် ဖော်မလင်ဆေးရည်များ စိမ်ခြင်း/ထိုးနှံရောင်းချခြင်း ရှိ/မရှိ အစားအသောက်နှင့်ဆေးဝါးကွပ်ကဲရေးဦးစီးဌာနမှ Mobile lab မော်တော်ယာဥ်ဖြင့် စစ်ဆေးခြင်းနှင့် သန့်ရှင်းလတ်ဆတ်စွာဖြင့် ရောင်းချနေမှု ရှိ/မရှိ စစ်ဆေးဆောင်ရွက်ခဲ့ပါသည်။

DOCA(တနင်္သာရီ)     

    ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများသည် (၂၁.၆.၂၀၂၄) နေ့၊ နံနက် (၁၀:၀၀) နာရီအချိန်တွင် ဓနုဖြူမြို့ စည်ပင်သာယာမြို့မဈေးအတွင်းရှိ စားသုံးဆီများ ရောင်းချနေသော ကုန်စုံဆိုင်များသို့ ကွင်းဆင်း သွားရောက်၍ စားသုံးသူကာကွယ်ရေးဥပဒေပါ အခန်း(၁၈)အရ ဖော်ပြပါ ကုန်အညွှန်း အမှတ်အသားများပြည့်စုံစွာ ဖော်ပြထားခြင်းရှိ/မရှိနှင့် အမှတ်တံဆိပ်ပါ ဆီဘူးများတွင် သက်ဆိုင်ရာဌာန၏ ထောက်ခံချက် ပါဝင်မှု ရှိ/မရှိအား ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ပါသည်၊၊

    အဆိုပါ စျေးကွက်စောင့်ကြည့်စစ်ဆေးခြင်းများ ဆောင်ရွက်ရာတွင် ဓနုဖြူမြို့နယ် တာဝန်ခံရုံးမှ ဦးခိုင်လွမ်းမိုးနှင့် ဝန်ထမ်းများ၊ ပူးပေါင်းစစ်ဆေးရေးအဖွဲ့တို့သည် ကုန်အညွှန်း အမှတ်အသား ဖော်ပြခြင်းနှင့် စပ်လျဉ်း၍ ပြည့်စုံမှန်ကန်စွာ ဖော်ပြထားသော ကုန်စည်များကိုသာ ဦးစားပေးရောင်းချကြရန် ၊ စားသုံးသူပြည်သူများ နစ်နာဆုံးရှုံးမှု ဖြစ်စေမည့် ကုန်စည်များ ၊ သက်တမ်းလွန် ကုန်စည်များ၊ FDA ဌာန၏ ထောက်ခံချက်မရှိသော ကုန်စည်များကို ရောင်းချခြင်းများ ရှောင်ကြဉ်ကြရန် လုပ်ငန်းရှင်များသို့ အသိပေးပြောကြားခဲ့သည်။ ဆက်လက် ၍ ဓနုဖြူဈေးကွက်အတွင်း ရောင်းချနေသော စားသုံးဆီများသည် စားသုံးသူပြည်သူများက နေ့စဉ်ချက်ပြုတ်စားသောက်ရာတွင် မပါမဖြစ်ထည့်သွင်းအသုံးပြုရသည့်ကုန်စည်ဖြစ်သောကြောင့် သတ်မှတ်စံချိန်စံညွှန်းများနှင့် ကိုက်ညီမှုမရှိသည့်ဆီများ ဈေးကွက်အတွင်းရောင်းချနေပါက စားသုံးသူများအား ဘေးအန္တရာယ်ဖြစ်ပွားစေခြင်းဖြစ်ပေါ်နိုင်သည့်အတွက် အစားအသောက်နှင့် ဆေးဝါးကွပ်ကဲရေးဦးစီးဌာန၏ ထောက်ခံချက်ပါဝင်သော ဆီသွပ်ဘူးများကိုသာ ရောင်းချရန် စားသုံးသူရေးရာဦးစီးဌာန၏ ကုန်အညွန်းအမှတ်အသားဖော်ပြပါဝင်သော ကုန်စည်များကို ရောင်းချရန်၊ တားမြစ်ကုန်စည်များ၊ ထုတ်ပြန်ချက်နှင့် မကိုက်ညီသောဆီဘူးများ ဈေးကွက်အတွင်း စစ်ဆေးတွေ့ရှိပါက ထိရောက်စွာ အရေးယူသွားမည်ဖြစ်ကြောင်း၊ ဓနုဖြူဈေးကွက်အတွင်း သတ်မှတ်စံချိန်စံညွှန်းနှင့်အညီ ထုတ်လုပ်သော FDA ဌာန၏ ထောက်ခံပါသော စားဆီကုန်စည်များကိုသာ ရောင်းချနေကြောင်း စစ်ဆေးတွေ့ရှိရပါသည်။

DOCA(ဧရာဝတီ)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံသူရေးရာဦးစီးဌာနအနေဖြင့် စားသုံးသူပြည်သူများအတွက် ကုန်စည် သို့မဟုတ် ဝန်ဆောင်မှုများကို အသုံးပြုရာတွင် ဘေးအန္တရာယ်ကင်းရှင်းစေရေး၊ ထုတ်ကုန်လုံခြုံစိတ်ချရမှုရှိစေရေးအတွက် အစဉ်ဆောင်ရွက်လျက်ရှိပါသည်။ စားသုံးသူများအတွက် လုံခြုံစိတ်ချရမှုမရှိသောကုန်စည်များ၊ စားသုံးသူကာကွယ်ရေးဥပဒေ(၂၀၁၉)၊ အခန်း(၁၈)၊ ပုဒ်မ(၄၁)ပါ ကုန်အညွှန်းအမှတ်အသားများပြည့်စုံမှုမရှိသော ကုန်စည်များထုတ်လုပ်ဖြန့်ဖြူးခြင်း၊ ဈေးကွက်အတွင်း တင်သွင်းရောင်းချခြင်းမရှိစေရန်ရည်ရွယ်၍ ကန့်ဘလူခရိုင်ဦးစီးမှူးရုံးမှ ကျွန်းလှမြို့နယ်တာဝန်ခံတို့ ဦးဆောင်၍ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်ကျန်းမာရေးဦးစီးဌာန၊ မြန်မာနိုင်ငံရဲတပ်ဖွဲ့၊ မြို့နယ်စည်ပင်သာယာရေးအဖွဲ့တို့ပူးပေါင်း၍ (၁၉-၆-၂၀၂၄)ရက်နေ့၊ နံနက်(၁၀း၀၀)နာရီအချိန်တွင် ကျွန်းလှမြို့ပေါ်ရှိ တိုင်းရင်းဆေးအရောင်းဆိုင်များသို့ သွားရောက်ကွင်းဆင်းကာ ဈေးကွက်စောင့်ကြည့် စစ်ဆေးခြင်း‌ဆောင်ရွက်ခဲ့ပါသည်။

     ထိုသို့ဈေးကွက်စောင့်ကြည့်စစ်ဆေးရာတွင် ကျွန်းလှမြို့ပေါ်ရှိ တိုင်းရင်းဆေးအရောင်းဆိုင်များအား ကုန်အညွန်းအမှတ်အသားပြည့်စုံမှုမရှိသော ကုန်ပစ္စည်းများရောင်းချနေခြင်းရှိ/မရှိစစ်ဆေးခဲ့ကြပြီး စီးပွားရေးလုပ်ငန်းရှင်များအား လိုက်နာဆောင်ရွက်ရမည့်တာဝန်များအကြောင်း၊ စားသုံးသူကာကွယ်ရေးကော်မရှင်ကထုတ်ပြန်ထားသော (၂/၂၀၁၉)ပါ ကုန်အညွှန်းအမှတ်အသားဖော်ပြချက်များဆိုင်ရာ အသေး စိတ်စိစစ်ချက်များအတိုင်း ပြည့်စုံသည့်ကုန်ပစ္စည်းများကိုသာရောင်းချကြရန်၊ ကုန်အညွှန်းအမှတ်အသားပြည့်စုံမှုမရှိ‌သောကုန်ပစ္စည်းမျာကို တင်သွင်းရောင်းချခြင်းမပြုကြရန်ပြောကြားခဲ့ပြီး (၂/၂၀၁၉)ပါ ကုန်အညွှန်းအမှတ်အသားဖော်ပြချက်များဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

     (၁၁-၆-၂၀၂၄) ရက်နေ့၊ နံနက် (၀၉း၀၀)နာရီအချိန်တွင် စစ်ကိုင်းတိုင်းဒေသကြီးအစိုးရအဖွဲ့၏လမ်းညွှန်မှုနှင့်အတူ တိုင်းဒေသကြီးစိုက်ပျိုးရေးဦးစီးမှူးရုံးအနေဖြင့် စိုက်ပျိုးရာသီစိုက်ဧကပြည့်မီစွာစိုက်ပျိုးရေးအတွက် မျိုးစေ့၊ သွင်းအားစုများပေးအပ်ပွဲနှင့် စားသုံးသူကာကွယ်ရေးဆိုင်ရာ အသိပညာပေးပြခန်းကို ပူးပေါင်းပါဝင်ပြသခြင်းများဆောင်ရွက်ခဲ့ကြောင်း သတင်းရရှိပါသည်။

        ယင်းသို့ဆောင်ရွက်ရာတွင် စစ်ကိုင်းတိုင်း‌ဒေသကြီးအစိုးရအဖွဲ့၏ လမ်းညွှန်မှုနှင့်အတူ တိုင်းအဆင့် ဌာနဆိုင်ရာများဖြစ်ကြသော စိုက်ပျိုးရေးဦးစီးဌာန၊ မွေးမြူရေးနှင့်ကုသရေးဦးစီးဌာန၊ ပျားမွေးမြူရေးဦးစီးဌာန၊ ငါးမွေးမူရေးဦးစီးဌာန၊ စားသုံးသူရေးရာဦးစီးဌာနတို့ပူးပေါင်း၍ မိမိတို့ဌာနနှင့်သက်ဆိုင်သည့် ပြည်သူအကျိုးပြုစိုက်ပျိုးသည်မှ စားသုံးသည်ထိ ဘေးအန္တရာယ်ကင်းရှင်းစွာသုံးစွဲနိုင်ရေး၊ လယ်ယာထွက်ကုန်စိုက်ပျိုးသီးနှံများ ထုတ်လုပ်တင်ပို့ရောင်းချရာတွင် စီးပွာရေးလုပ်ငန်းရှင်များလိုက်နာဆောင်ရွက်ရမည့် စည်းကမ်း၊ ယနေ့ခေတ် အွန်လိုင်းစနစ်ဖြင့် ကြော်ငြာရောင်းချသူများမှတ်ပုံတင်ခြင်း၊ လိပ်စာ ဖုန်းပြည့်စုံစွာဖော်ပြပါရှိရန်၊ ဝယ်ယူသူများသိသင့်သည့်အချက်အလက်များ၊ အားကာတွန်းသရုပ်ဖော်ပြသခြင်း၊ ပညာပေးလက်ကမ်းစာစောင်ဖြန့်ဝေခြင်း၊ ကုန်အညွှန်းအမှတ်သားများပြည့်စုံစွာဖော်ပြရန်နှင့် အီလက်ထ‌‌ရောနစ်အငွေ့ရှူစက်နှင့်ပတ်သက်၍ အသိပညာပေးကာတွန်းဆောင်ပုဒ်များပြသခြင်းများကို ကျယ်ကျယ်ပြန့်ပြန့်ဆောင်ရွက်ခဲ့ကြောင်း သတင်းရရှိပါသည်။

DOCA(စစ်ကိုင်း)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူးရုံးအနေဖြင့် စားသုံးသူကာကွယ်ရေးအသိပညာပေးဟောပြောပွဲများ၊ စီးပွားရေးလုပ်ငန်းရှင်များနှင့်တွေ့ဆုံပြီး ဥပဒေ၊ အမိန့်နှင့်ညွှန်ကြားချက်များအား ရှင်းလင်းဆွေးနွေးခြင်းများဆောင်ရွက်လျက်ရာ စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူး၏ လမ်းညွှန်ချက်ဖြင့်  ၂၀၂၄ခုနှစ်၊ ဇွန်လ (၂၆)ရက်နေ့နှင့် (၂၇)ရက်နေ့၊ နံနက် (၁၀:၀၀) နာရီအချိန်တွင် ခရိုင်ကုန်ဈေးနှုန်းတည်ငြိမ်ရေးအဖွဲ့၊ အထွေထွေအုပ်ချုပ်ရေးဦးစီးဌာန၊ ခရိုင်စိုက်ပျိုးရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ မိတ္ထီလာမြို့ပေါ်ရှိ ဆန်ပွဲရုံ (၄)နှင့် ဆန်ဆိုင် (၁၁) ဆိုင်တို့သို့သွားရောက်၍ ဆန်လက်ကျန်အခြေအနေ၊ ဆန်သိုလှောင်ထားရှိမှုအခြေအနေ၊ ဆန်ဈေးနှုန်းဈေးကွက်၊ ဈေးနှုန်းမကြီးမြှင့်စေရေးအတွက် ကွင်းဆင်းစစ်ဆေးဆောင်ရွက်ခဲ့ပါသည်။

         ထိုသို့ကွင်းဆင်းစစ်ဆေးဆောင်ရွက်ရာ ဆန်ဂိုဒေါင်၊ ဆန်ဆိုင်ကြီးများအားတွင် ရွှေဘိုပေါ်ဆန်း၊ မဂျမ်းတော၊ မနောသုခ၊ ဧရာပဒေသာ၊ ဧည့်မထ၊ ရွှေသွယ်ရင်၊ ရက် ၉၀၊ ထိုင်းနှမ်ကောက်ဆန်အမျိုးအစားများရောင်းချနေကြောင်းသိရှိရပြီး၊ ဆန်ရောင်းချသူလုပ်ငန်းရှင်များကို မြို့နယ်တာဝန်ခံက အလေးချိန်မှန်ကန်စွာရောင်းချရန်၊ ဒေသတွင်းဖြစ်သင့် ဖြစ်ထိုက်သောဈေးနှုန်းဖြင့်သာရောင်းချရန်နှင့် ဈေးနှုန်းမြှင့်တင်ရောင်းချခြင်းမပြုရန်၊ ဈေးနှုန်းမြှင့်တက်လိုသောရည်ရွယ်ချက်ဖြင့် သိုလှောင်ခြင်းမပြုရန် ပြောကြားခဲ့ကြောင်းသိရှိရပါသည်။ 

DOCA(မန္တလေး)