သတင်းနှင့် လှုပ်ရှားမှုများ

      စားသုံးသူရေးရာဦးစီးဌာန၊ နေပြည်တော်ဦးစီးမှူးရုံးမှ ဦးတင်စိုးနိုင်(စစ်ဆေးရေးအရာရှိ)နှင့် အဖွဲ့သည် အွန်လိုင်းစနစ်ဖြင့် ရောင်းချခြင်းလုပ်ငန်းများ မှတ်ပုံတင်လက်မှတ် စိစစ်ထုတ်ပေးခြင်း၊ မြေပြင်လုပ်ငန်းနှင့် မှတ်ပုံတင်ထားရှိမှု ကိုက်ညီမှု ရှိ/ မရှိ၊ လုပ်ငန်းလိပ်စာမှန်ကန်မှု ရှိ/ မရှိ တို့ကိုစိစစ်ခြင်းနှင့် မြေပြင်ကွင်းဆင်းစစ်ဆေးရမည့်အချက်(၁၈)ချက်နှင့် ကိုက်ညီမှု ရှိ/ မရှိ စိစစ်ခြင်းတို့ကို (၁၉-၅-၂၀၂၆) ရက်နေ့၊ နေ့လယ်(၁၃:၀၀)နာရီအချိန်တွင် ဥတ္တရသီရိမြို့နယ်၊ ဇဝနသိဒ္ဓိရပ်ကွက်၊ စစ်ကိုင်း(၃)လမ်း၊  အိမ်အမှတ်(၅၂၈၆)ရှိ “Pointed By Joy” အထည်အလိပ်၊ အဝတ်အထည် နှင့်ဆက်စပ်ပစ္စည်းများ၊ ဖက်ရှင်အသုံးအဆောင်ပစ္စည်းများ၊ လူသုံးကုန်ပစ္စည်းများ ရောင်း‌ချခြင်း လုပ်ငန်းသို့ သွားရောက်စစ်ဆေး ခဲ့ကြောင်း သိရှိရပါသည်။

      အဆိုပါကွင်းဆင်းစစ်ဆေးရာတွင် စစ်ဆေးရေးအရာရှိက လုပ်ငန်းရှင်များကိုလိုအပ်သည်များ မေးမြန်းခြင်း၊ စီးပွားရေးလုပ်ငန်းရှင်များ လိုက်နာရမည့်တာဝန်ဝတ္တရားများနှင့် စားသုံးသူကာကွယ်ရေး ဥပဒေပါ အခန်း(၁၇)ရှိ ကုန်စည်(သို့မဟုတ်)ဝန်ဆောင်မှုအပေါ် တာဝန်ရှိမှုနှင့် ပတ်သက်၍လည်းကောင်း တရားမဝင်ကုန်ပစ္စည်းများ  ရောင်းချမှုမရှိစေရေး  အသိပညာပေးဟောပြောခဲ့ကြောင်း သိရှိရပါသည်။

DOCA(ပြည်ထောင်စုနယ်မြေ)

     မန္တလေးတိုင်းဒေသကြီး၊ ချမ်းအေးသာစံမြို့နယ်၊ ၃၄လမ်းနှင့် ၇၈ လမ်းထောင့်ရှိ  မန္တလေး တိုင်းဒေသကြီး ကုန်သည်များနှင့်စက်မှုလက်မှုလုပ်ငန်းရှင်များအသင်း(MRCCI)အစည်းအဝေးခန်းမ ၌  ၂၀၂၆ ခုနှစ်မေလ ၁၇ ရက်နေ့တွင် ကျင်းပသော ကုန်သွယ်မှုဆိုင်ရာ အသိပညာပေးသင်တန်း (၁/၂၀၂၆) ဖွင့်ပွဲအခမ်းအနားသို့  စီးပွား ရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စု ဝန်ကြီးဦးထွန်းအုံတက်ရောက်ဖွင့်လှစ်ခဲ့ကြောင်း သိရှိရပါသည်။အဆိုပါသင်တန်းဖွင့်ပွဲသို့ မန္တလေး တိုင်းဒေသကြီး၊စီမံကိန်း၊စီးပွားရေးနှင့် ဘဏ္ဍာရေးဝန်ကြီးဦးသိန်းဌေး၊ စားသုံးသူရေးရာဦးစီးဌာန၊ ဒုတိယညွှန်ကြားရေးမှူးချုပ် ဦးဟန်ဝင်းကျော်နှင့် ဌာဆိုင်ရာများ၊မန္တလေးတိုင်း ဒေသကြီး ကုန်သည် များနှင့်စက်မှုလက်မှုလုပ်ငန်းရှင်များအသင်းအမှုဆောင်များနှင့်အသင်းဝင်များတက်ရောက်ခဲ့ကြပြီး၊ သင်တန်းကာလမှာ ၁၈.၅.၂၀၂၆ ရက်နေ့မှ ၂၀.၅.၂၀၂၆ ရက်နေ့အထိ နေ့စဉ် နံနက်(၀၉:၀၀)နာရီမှ ညနေ(၁၆:၃၀)နာရီအချိန်ထိ သင်ကြားပို့ချကြောင်းသိရှိရပါသည်။အဆိုပါသင်တန်းဖွင့်ပွဲအခမ်းအနား တွင် ပြည်ထောင်စုဝန်ကြီး၊ ဦးထွန်းအုံမှ အမှာစကားပြောကြားရာ  ယခုသင်တန်းမှ ပို့ချပေးသည့် ပို့ကုန်သွင်းကုန်ပညာရပ်များကို လက်တွေ့ဆောင်ရွက်ရာတွင် ပြန်လည်အသုံးချဆောင်ရွက်နိုင်မှာ ဖြစ်ပါကြောင်း၊ ပို့ကုန်တိုးမြှင့်တင်ပို့နိုင်ရေးအတွက်  နိုင်ငံတကာမှ မည်သည့် ထုတ်ကုန်ပစ္စည်းများ ကြိုက်နှစ်သက်သည်ကို  စဉ်ဆက်မပြတ်လေ့လာဆောင်ရွက်သွားရမှာဖြစ်ကြောင်း ပြောကြားခဲ့ပြီး၊ သင်တန်းတက်ရောက်သူ(၈၅)ဦးဖြစ်ကြောင်း သိရှိရပါသည်။   

DOCA(မန္တလေး)                                                                                                                          

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဦးထွန်းအုံသည် မန္တလေးတိုင်းဒေသကြီးအတွင်း တာဝန်ထမ်းဆောင်လျက်ရှိသည့် စားသုံးသူရေးရာဦးစီးဌာန၊ ကုန်သွယ်ရေးဦးစီးဌာန၊ မူပိုင်ခွင့်ဦးစီးဌာန၊  မြန်မာကုန်သွယ်မှုမြှင့်တင်ရေးအဖွဲ့နှင့် စစ်ကိုင်းခရိုင်၊ စားသုံးသူရေးရာဦးစီးဌာနတို့တွင် တာဝန်ထမ်းဆောင်လျက်ရှိသော အရာထမ်း အမှုထမ်းများအား ၁၆.၅.၂၀၂၆ ရက်နေ့နေ့လည် ၁၁:၀၀ နာရီ အချိန်တွင် စားသုံးသူရေးရာဦးစီးဌာန၊ တိုင်းဒေသကြီး ဦးစီးမှူးရုံးအစည်းအဝေးခန်းမ၌ တွေ့ဆုံ၍  အမှာစကားပြောကြားရာ နိုင်ငံတော်မှ ချမှတ်ထားသော ဥပဒေ၊နည်းဥပဒေ၊ လုပ်ငန်းထုံးလုပ်နည်း၊ညွှန်ကြားချက်နှင့် စည်းမျဉ်းစည်းကမ်းများကို တိတိကျကျ လိုက်နာဆောင်ရွက်ကြရန်၊လူပုဂ္ဂိုလ်လုံခြုံရေး၊ စာရွက်စာတမ်းလုံခြုံ ရေး၊အဆောက်အဦလုံခြုံရေး နှင့် သတင်းလုံခြုံရေးအလေးထားဆောင်ရွက်ကြရန်၊ “ည” ၃လုံး ရှောင် ရန်နှင့်နိုင်ငံ့ဝန်ထမ်း ဥပဒေ အခန်း ၄ ပါ တာဝန်နှင့်အခွင့်အရေးများတွင် ဝန်ထမ်းများလိုက်နာရမည့်တာဝန်(၁၂)ချက် အတိုင်း လိုက်နာဆောင်ရွက်ကြရန်၊လူ့စွမ်းအား အရင်းအမြစ် မြှင့်တင်ရေးလုပ်ငန်းများ ဆောင်ရွက်ကြရန်၊ ပို့ကုန်မြှင့်တင်ရေး လုပ်ငန်းများတွင် ပို့ကုန်နှစ်ဆမြှင့် တင်ရေး လုပ်ငန်းစဉ်များအလိုက် ပူးပေါင်း၍ အကောင်အထည် ဖော်ဆောင်ရွက်သွားကြရန်နှင့် ဌာန အသီးသီး၏ တင်ပြချက်များအပေါ်  လုပ်ငန်း လိုအပ်ချက်များ ဆွေးနွေးမှာကြားခဲ့ကြောင်း သိရှိရပါသည်။ ပြည်ထောင်စုဝန်ကြီး၊ ဦးထွန်းအုံသည် အစည်းအဝေးတက်ရောက်လာသည့် အရာထမ်းအမှုထမ်းများအား တစ်ဦးလျှင်  စားဆီတစ်ပိဿာနှုန်းဖြင့် ဌာနအလိုက်ဝန်ထမ်း(၁၆၈)ဦးသို့ ထောက်ပံ့ပေးအပ်ခဲ့ကြောင်း သတင်းရရှိပါသည်။  

DOCA(မန္တလေး)                                

                မြို့နယ်အတွင်းရှိ MSME လုပ်ငန်းရှင်များကို မိမိတို့၏ကုန်စည်များတွင် ကုန်အညွှန်းအမှတ် အသားများ ပြည့်စုံစွာပါရှိရေးနှင့် MSME စက်မှုလုပ်ငန်းသုံးစားအုန်းဆီများ လုပ်ငန်းခွင်များတွင် အမှန် တကယ်အသုံးပြုစေရေးအတွက် စားသုံးသူရေးရာဦးစီးဌာန၊ ကျောက်ပန်းတောင်းမြို့နယ်တာဝန်ခံ ရုံးတွင် မြို့နယ်တာဝန်ခံနှင့် မြို့နယ်အတွင်းရှိ MSME လုပ်ငန်းရှင်များတွေ့ဆုံဆွေးနွေးပွဲအခမ်းအနားအား ၂၀၂၆ ခုနစ်၊ မေလ(၁၁)ရက်နေ့၊ နံနက်(၁၀:၀၀)နာရီအချိန်တွင် ကျင်းပခဲ့ပါသည်။

          အဆိုပါတွေ့ဆုံဆွေးနွေးမှုတွင် စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်မြသန္တာထွန်း(ဒု-ဦးစီးမှူး)က MSME လုပ်ငန်းများအတွက်အသုံးပြုရန် စက်မှုလုပ်ငန်းသုံးစားအုန်းဆီများကို နိုင်ငံတော်မှ ရောင်းချထုတ်ပေးခဲ့ပါကြောင်း၊ ယခုလည်းဆက်လက်ထုတ်ပေးသွားမည်ဖြစ်ပြီး၊ MSME လုပ်ငန်းများ တွင်  အမှန်တကယ်အသုံးပြုရမည်ဖြစ်ပါကြောင်း၊ စားအုန်းဆီသည် အရေးကြီးကုန်စည် အမျိုးအစား တွင် ပါဝင်သဖြင့် သတ်မှတ်လုပ်ငန်းများမှလွဲ၍ အခြားနည်းဖြင့် ပြန်လည်သယ်ယူရောင်းချခွင့် မရှိ ပါကြောင်း၊ လုပ်ငန်းရှင်များ၏ လုပ်ငန်းခွင်လစဉ် လိုအပ်ချက်စားအုန်းဆီများကိုလည်း ကွင်းဆင်း စိစစ်၍ လုပ်ငန်းပမာဏအလိုက် ခွင့်ပြုပေးလျက် ရှိပါကြောင်း၊ စားသုံးသူရေးရာဦးစီးဌာနအနေဖြင့် MSME ဖွံ့ဖြိုးတိုးတက်ရေး၊ ကုန်စည်နှင့်ဝန်ဆောင်မှုများနှင့် ပတ်သက်၍ စားသုံးသူများ ထိခိုက်နစ်နာမှု မဖြစ်ပေါ်စေရေး ကာကွယ်ပေးခြင်း၊ စီးပွားရေးလုပ်ငန်းရှင်များအား ဥပဒေနှင့်အညီ ဆောင်ရွက်နိုင် စေရေးနှင့် ဖွံ့ဖြိုးတိုးတက်စေရေးကူညီပေးခြင်း၊ MSME လုပ်ငန်းများ ကြီးထွားလာစေရန်၊ လုပ်ငန်း အမျိုးအစားအလိုက် သက်ဆိုင်ရာဌာနအဖွဲ့အစည်းများနှင့် ချိတ်ဆက်၍ ထောက်ခံချက်များ၊ နည်းပညာ များ၊ အရင်းအနှီးချေးငွေရရှိရေး၊ ပြပွဲပြိုင်ပွဲတွင်ပါဝင်ပြသနိုင်ရေး စသည့်လိုအပ်သည့် ပံ့ပိုးကူညီမှုများ ဆောင်ရွက်ပေးခြင်း၊ MSME လုပ်ငန်းများမှ ထွက်ရှိလာသည့် ကုန်စည်များတွင် စားသုံးသူကာကွယ်ရေးဥပဒေပါ ကုန်အညွှန်အမှတ်အသားများ ပြည့်စုံမှန်ကန်စွာ ဖော်ပြစေရေးတို့ကို ဆောင်ရွက်လျက်ရှိ ပါကြောင်း ဆွေးနွေးပြောကြားခဲ့သည်။

          ဆွေးနွေးပွဲသို့ တက်ရောက်လာသည့် MSME လုပ်ငန်းရှင်များမှ သိရှိလိုသည်များဆွေးနွေး မေးမြန်းရာ မြို့နယ်တာဝန်ခံက ပြန်လည်ဖြေကြားဆွေးနွေးခဲ့ပြီး၊ လုပ်ငန်းရှင်(၆၅) ဦးတက်ရောက် ခဲ့ကြောင်းနှင့်စားသုံးသူရေးရာဦးစီးဌာန၊ မြို့နယ်တာဝန်ခံနှင့် MSME လုပ်ငန်းရှင်များ တွေ့ဆုံဆွေး နွေးပွဲအခမ်းအနားကို နံနက် ၁၀:၄၅  နာရီတွင် အောင်မြင်စွာရုပ်သိမ်းခဲ့ကြောင်း သိရှိရသည်။

DOCA(မန္တလေး)

               ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ ညောင်လေးပင်မြို့နယ်တာဝန်ခံရုံးအနေဖြင့်   ကုန်ဈေးနှုန်းတည်ငြိမ်ရေးလုပ်ငန်းများ၊ စားသုံးသူကာကွယ်ရေးလုပ်ငန်းများကို အားတက်ကြိုးပမ်း ဆောင်ရွက်လျက်ရှိရာ ၄.၅.၂၀၂၆ ရက်နေ့တွင် ညောင်လေးပင်မြို့နယ်တာဝန်ခံရုံးမှ မြို့နယ်တာဝန်ခံ ဦးကျော်သက်မိုးနှင့် အငယ်စာရေးဒေါ်စန္ဒာဦး၊ အငယ်တန်းစာရေး ဒေါ်ရွှန်းလဲ့ခင်အောင်၊ နေ့စား ဝန်ထမ်း ဦးခန့်နောင်ဦးတို့သည် ညောင်လေးပင်မြို့၊ မြို့မ (၁) ရပ်ကွက်တွင် စားသုံးသူ ပြည်သူများအား စားသုံးသူကာကွယ်ရေး အသိပညာပေး ဟောပြောခဲ့ကြောင်း သတင်းရရှိပါသည်။

            ညောင်လေးပင်မြို့နယ်တာဝန်ခံ ဦးကျော်သက်မိုးနှင့် အဖွဲ့သည် ညောင်လေးပင်မြို့၊ မြို့မ (၁) ရပ်ကွက်တွင် စားသုံးသူပြည်သူများအား စားသုံးသူကာကွယ်ရေး ဥပဒေပါအချက်အလက် များအကြောင်း၊ စားသုံးသူ အခွင့်အရေး (၈)ချက်၊ စားသုံးသူပြည်သူများ၏ အခွင့်အရေးနှင့် တာဝန် များ၊ စီးပွားရေးလုပ်ငန်းရှင်များ၏ တာဝန်များ၊ ကုန်အညွှန်းအမှတ်အသား ဖော်ပြချက်နှင့် စပ်လျဉ်း၍ သိကောင်းစရာများကို ဟောပြောခဲ့ပါသည်။ အဆိုပါ ဟောပြောပွဲသို့ စားသုံးသူပြည်သူ (၃၀)ဦး တက်ရောက် နားထောင်ခဲ့ကြောင်း သတင်းရရှိပါသည်။

DOCA(ပဲခူး)