သတင်းနှင့် လှုပ်ရှားမှုများ

(၁.၇.၂၀၂၅)ရက်နေ့၊ နေ့လည်(၁၄:၃၀)အချိန်တွင် ရှမ်းပြည်နယ်(တောင်ပိုင်း)၊ ဓနုကိုယ်ပိုင် အုပ်ချုပ်ခွင့်ရဒေသ၊ စားသုံးသူရေးရာဦးစီးဌာန၊ ပင်းတယမြို့၊ ဒေသဦးစီးမှူးရုံးမှ စစ်ဆေးရေးမှူး နှင့်ဝန်ထမ်းများသည် ပင်းတယမြို့နယ်အတွင်းရှိ စားအုန်းဆီလက်လီအရောင်းဆိုင်သို့ ကွင်းဆင်း စစ်ဆေးခြင်းများ ဆောင်ရွက်ခဲ့ကြပါသည် ထိုသို့ ဆောင်ရွက်ခဲ့ရာတွင် ဌက်ပျောတောရပ်ကွက် နှင့် ဈေးတန်းရပ်ကွက် တို့တွင် အိမ်ထောင်စုတစ်စုလျှင် (၁)ပိဿာနှုန်းဖြင့် ရောင်းချပေးလျက်ရှိကြောင်း၊ မိမိရရှိသော ခွဲတမ်းများကို သတ်မှတ် ဈေးနှုန်းအပေါ် (၂%)အမြတ်တင်၍ ရပ်ကွက်နေ စားသုံးသူပြည်သူများလက်ဝယ်သို့ အမှန်တကယ် ရောက်ရှိ စားသုံးနိုင်ရန် ရောင်းချပေးလျက်ရှိကြောင်း၊ အလေးချိန်လည်း မှန်ကန်စွာ ချိန်တွယ်ပေးကြောင်း၊ ဆီထုတ်ယူသည့် စာအုပ်မရှိသည့် စစ်ဘေးရှောင် ပြည်သူများကိုလည်း ရောင်းချပေးနေကြောင်း ကွင်းဆင်း စစ်ဆေးချက်အရ သိရှိရပါသည်။ DOCA(ရှမ်း)

ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ် စည်ပင်သာယာမြို့မဈေးအတွင်း/ အပြင်ရှိ အိမ်သုံးလျှပ်စစ်ပစ္စည်းအမျိုးမျိုး ရောင်းချသောဆိုင်များသို့ စားသုံးသူများ အသုံးပြုလျက် ရှိသည့် ကုန်စည်နှင့် ဝန်ဆောင်မှုများ ဘေးအန္တရာယ်ကင်းရှင်းစေရေးအတွက် ကုန်စည်ပေါ်တွင် ကုန်အညွှန်းအမှတ်အသားများ ဖော်ပြထားခြင်းရှိ/မရှိ ဈေးကွက်စောင့်ကြည့် စစ်ဆေးခြင်းအား ဇူလိုင်လ(၃)ရက်နေ့၊ နံနက်(၁၀:၀၀)နာရီအချိန်တွင် စားသုံးသူရေးရာဦးစီးဌာနနှင့် မြို့နယ်စည် ပင်သာယာရေးအဖွဲ့တို့ ပူးပေါင်း၍ ကွင်းဆင်းစစ်ဆေးခဲ့ကြောင်း သိရသည်။ ထိုသို့ ကွင်းဆင်းစစ်ဆေးရာတွင် စည်ပင်သာယာမြို့မဈေး အတွင်း/အပြင်ရှိ အိမ်သုံးလျှပ်စစ်ပစ္စည်း အမျိုးမျိုးရောင်းချသော ဆိုင်များတွင် ကုန်စည်များ၌ ကုန်အညွှန်းအမှတ် အသားများအား မြန်မာဘာသာဖြင့်သော်လည်းကောင်း၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍ တွဲလျက်ဖြစ်စေ မဖြစ်မနေဖော်ပြရမည့်အချက်များ ပါဝင်မှုရှိ/မရှိ ဈေးကွက်စောင့်ကြည့် စစ်ဆေးခြင်း၊ ကုန်အညွှန်းအမှတ်အသား ပြည့်စုံမှုမရှိသည့် အိမ်သုံး လျှပ်စစ်ပစ္စည်းအမျိုးမျိုးတို့အား ရောင်းချခြင်းမပြုလုပ်ကြရန်၊ ထိုသို့ ပြုလုပ်ပါက စားသုံးသူကာကွယ်ရေးဥပဒေနှင့် အညီ အရေးယူဆောင်ရွက်သွားမည်ဖြစ်ကြောင်း အသိပညာပေးကွင်းဆင်း စစ်ဆေးဆောင်ရွက်ခဲ့ကြောင်း သိရှိရပါသည်။ DOCA(ရန်ကုန်)

ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်ရှိ အစားအသောက်ကိုင်တွယ် ရောင်းချနေသူများအား အသည်းရောင်အသားဝါရောဂါများ ရှိ/မရှိအား ပြည်သူ့ကျန်းမာရေးဦးစီး ဌာနက ဦးဆောင်၍ ဇူလိုင်လ(၂)ရက်နေ့၊ နံနက်(၀၉:၃၀)နာရီအချိန်မှစ၍ စစ်ဆေးမှုများ ဆောင်ရွက်နေခြင်းကို စားသုံးသူရေးရာဦးစီးဌာန၊ ခရမ်းမြို့နယ်တာဝန်ခံနှင့် ဝန်ထမ်းများက ကူညီဆောင်ရွက်ပေးခဲ့ကြောင်း သိရှိရပါသည်။ ရန်ကုန်တိုင်းဒေသကြီးတွင် အသည်းရောင်အသားဝါရောဂါ ကာကွယ်ထိန်းချုပ်ရေးလုပ် ငန်းများ ဆောင်ရွက်ရာ ပိုမိုအားကောင်းလာစေရန် မြို့နယ်များရှိ ပြည်သူလူထုများထဲမှ အစား အသောက်ကိုင်တွယ်ရောင်းချနေသူ အသိုင်းအဝိုင်းများတွင် အသည်းရောင်အသားဝါ ဘီနှင့်စီ ရောဂါ ဖြစ်ပွားမှုနှုန်းကို သိရှိရန် ရောဂါဖြစ်ပွားမှုကို စောလျင်စွာ ဖော်ထုတ်နိုင်ပြီး အချိန်မှီ ကုသမှုလက်လှမ်းမှီနိုင်ရန် ရည်ရွယ်ဆောင်ရွက်ခြင်းဖြစ်ပြီး ခရမ်းမြို့နယ်အတွင်းရှိ အစားအသောက်ကိုင်တွယ် ရောင်းချသူ လူဦးရေ(၃၀၀)အထိ စစ်ဆေးမှုများ ဆောင်ရွက်သွား မည်ဖြစ်ကြောင်း သိရှိရပါသည်။ DOCA(ရန်ကုန်)

ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ် စည်ပင်သာယာရေးအဖွဲ့ရုံးတွင် ဇူလိုင်လ(၃)ရက်နေ့၊ နံနက်(၀၉:၃၀)နာရီအချိန်တွင် အစားအသောက်ရောင်းချသော ထမင်းဆိုင် ပိုင်ရှင်များအား စားသုံးသူရေးရာဦးစီးဌာန၊ ခရမ်းမြို့နယ် တာဝန်ခံ ဒေါ်ကျော့ကေခိုင်က စားသုံး သူကာကွယ်ရေး အသိပညာပေး ဟောပြောခဲ့ကြောင်း သိရှိရပါသည်။ ထိုသို့ အသိပညာပေး ဟောပြောရာတွင် စားသုံးသူကာကွယ်ဥပဒေ ပြဌာန်းထားရှိမှု၊ ဥပဒေတွင် ပြဌာန်းထားသော စားသုံးသူများ၏ အခွင့်အရေးများ၊ စီးပွားရေးလုပ်ငန်းရှင်များ၏ တာဝန်များအား ရှင်းလင်းပြီး စားသောက်ဆိုင် လုပ်ငန်းလုပ်ကိုင်သော သူများသည် လုပ်ငန်းရှင် များဖြစ်သလို စားသုံးသူများလည်း ဖြစ်သည့်အတွက် စားသုံးသူအခွင့်အရေး ဦးစားပေးဆိုသည့် ဆောင်ပုဒ်နှင့်အညီ စားသုံးသူများ ဘေးအန္တရာယ်ကင်းရှင်း၍ လုံခြုံစိတ်ချရသော အစား အသောက်များ ရရှိစေရန်အတွက် မိမိတို့ဆိုင်များတွင် ရောင်းချသော အစားအသောက်များ သန့်ရှင်းမှုရှိစေရေး၊ လုပ်သားများ တစ်ကိုယ်ရည်သန့်ရှင်းပြီး ကျန်းမာရေးကောင်းမွန်သူများ ဖြစ် စေရန်နှင့် ဝန်ဆောင်မှုများ ပေးရာတွင်လည်း စားသုံးသူများ စိတ်ကျေနပ်မှု ရရှိစေရန် အလေး ထားဆောင်ရွက်ကြရန်နှင့် မိမိတို့၏ စားဖွယ်စုံများကို Online မှရောင်းချနေမှုများ ရှိခဲ့လျှင်လည်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာန၏ www.ecom.gov. mm တွင် အွန်လိုင်းမှတ်ပုံတင် ဆောင်ရွက်ထားကြရန်တို့အား အသိပေးခဲ့ပြီး လိုင်းမှတစ်ဆင့် ဈေးဝယ်လျှင်လည်း စားသုံးသူရေးရာဦးစီးဌာန၏ Call Center No.1535 သို့ မည်သည့်ဖုန်းဖြင့် မဆို ဆက်သွယ်တိုင်ကြားနိုင်ပြီး စားသုံးသူရေးရာဦးစီးဌာန၏ လုပ်ငန်းဆောင်ရွက်မှုများကိုလည်း လေ့လာလိုပါက www.doca.gov.mm သို့ ဝင်ရောက်လေ့လာဖတ်ရှု့နိုင်ပါကြောင်း အသိပညာ ပေးခဲ့ပြီး ဟောပြောပွဲသို့ လုပ်ငန်းရှင်(၃၀)ဦးခန့် ဝင်ရောက်ခဲ့ကြောင်း သိရှိရပါသည်။ DOCA(ရန်ကုန်)

ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်၌ လုပ်ငန်းညှိနှိုင်း အစည်း အဝေးကို အထွေထွေအုပ်ချုပ်ရေးဦးစီးဌာန အစည်းအဝေးအခန်းမတွင် ဇူလိုင်လ(၁) ရက်နေ့၊ နေ့လယ်(၁၃:၀၀)နာရီအချိန်တွင် ကျင်းပပြုလုပ်ခဲ့ကြောင်း သိရသည်။ အဆိုပါ အစည်းအဝေးတွင် သဘာဝဘေးအန္တရာယ်စီမံခန့်ခွဲမှု ဆိုင်ရာကိစ္စရပ်များနှင့် ပတ်သတ်၍ ကြိုတင်စီမံဆောင်ရွက်ထားရှိရန်ကိစ္စများ၊ ပြည်သူ့စစ်မှုထမ်းဆင့်ခေါ်ခြင်းအား ဥပဒေ ညွှန်ကြားချက်များအတိုင်း ဆောင်ရွက်၍ အဂတိကင်းရှင်းစေရေးကိစ္စများ ရွေးကောက်ပွဲ ဆိုင်ရာ လူဦးရေစာရင်းတိကျမှန်ကန်စွာ ပြုစုသွားရန်နှင့် သက်ဆိုင်ရာဌာနများနှင့် ပေါင်းစပ် ဆောင်ရွက်ရန်ကိစ္စများ၊ လုံခြုံရေးဆိုင်ရာကိစ္စရပ်များနှင့် ထူးခြားဖြစ်စဉ်များရှိပါက အချိန်နှင့် တပြေးညီတင်ပြရန် ကိစ္စရပ်များအား ရှင်းလင်းဆွေးနွေးပြောကြားခဲ့ပြီး အစည်းအဝေးသို့ တွံတေးခရိုင်စီမံအုပ်ချုပ်ရေးအဖွဲ့ ဥက္ကဌနှင့်အဖွဲ့ဝင်များ၊ မြို့နယ်စီမံအုပ်ချုပ်ရေးအဖွဲ့ဝင်များ၊ ရပ်/ကျေးအုပ်ချုပ်ရေးမှူး စာရေးများ၊ မြို့နယ်အဆင့်ဌာနဆိုင်ရာများတက်ရောက်ခဲ့ကြောင်း သိရှိရသည်။ ၎င်းအစည်းအဝေးတွင် တွံတေးခရိုင်စီမံအုပ်ချုပ်ရေးအဖွဲ့ဥက္ကဌ ဦးညွှန့်နွယ်မှ စစ်မှုထမ်းဆင့်ခေါ်ခြင်းဆိုင်ရာ ကိစ္စရပ်များ၊ လူဦးရေးစာရင်းများအား အချိန်နှင့် တပြေးညီ ပုံမှန် ပြုစုသွားရန် ကိစ္စရပ်များ၊ လယ်ယာမြေအသုံးပြုမှုနှင့် စိုက်ပျိုးရေးဆိုင်ရာ ကိစ္စရပ်များ၊ သဘာဝ ဘေးကာကွယ်ရေးနှင့် မြို့(၃)မိုင်ပတ်လည် သစ်ပင်စိုက်ပျိုးခြင်း/လေကာပင်များ ပျိုးထောင်ခြင်း ကိစ္စရပ်များအား လမ်းညွှန်မှာကြားပြီး မြို့နယ်စိုက်ကြပ်အဖွဲ့ဝင်များမှာ သက်ဆိုင်ရာများအား ရှင်းလင်းဆွေးနွေးခဲ့ပြီး အစည်းအဝေးပြီးမြောက်ခဲ့ကြောင်း သိရှိရပါသည်။ DOCA(ရန်ကုန်)