သတင်းနှင့် လှုပ်ရှားမှုများ

       စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ခရိုင်ဦးစီးမှူး ဦးလှစိုးပါ (၃) ဦးတို့သည် (၂၅.၁၁.၂၀၂၅)ရက်နေ့ ညနေ (၁၆:၀၀) နာရီအချိန်တွင် အမှတ်‌(၂၇)၊ ဦးထွန်းညိုလမ်း၊ စက်မှုဇုန် (၁)၊ လှိုင်သာယာမြို့နယ်ရှိ ရွှေမြတ်အမှတ်တံဆိပ် အဆင့်မြင့်စားအုန်းဆီဘူးသွင်း ထုတ်လုပ်သည့်စက်ရုံသို့ သွားရောက်၍ လုပ်ငန်းရှင်အား အသိပညာပေးဆွေးနွေးခြင်းလုပ်ငန်းများ ဆောင်ရွက်ခဲ့ပါသည်။

        အဆိုပါ လုပ်ငန်းရှင်အား အသိပညာပေးရာတွင် ခရိုင်ဦးစီးမှူး ဦးလှစိုးမှ စားသုံးသူကာကွယ်ရေးဥပဒေ (၂၀၁၉) ပါ စားသုံးသူရေးရာဦးစီးဌာန၏ လုပ်ပိုင်ခွင့်နှင့်တာဝန်များအကြောင်း၊ စားသုံးသူရေးရာဦးစီးဌာနသည် စားသုံးသူပြည်သူများအတွက် အသိပညာပေးခြင်း၊ ဈေးကွက်စောင့်ကြည့်စစ်ဆေးခြင်း၊ လုပ်ငန်းရှင်များအား အသိပညာပေးတွေ့ဆုံဆွေးနွေးခြင်း၊ ထုတ်ကုန်လုံခြုံစိတ်ချရမှုရှိစေရန် စက်ရုံ၊ အလုပ်ရုံများအား ကွင်းဆင်းစစ်ဆေးခြင်းလုပ်ငန်းများ ဆောင်ရွက်လျက်ရှိကြောင်း၊ စီးပွားရေးလုပ်ငန်းရှင်၏တာဝန်များ၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံ စားသုံးသူကာကွယ်ရေးကော်မရှင်၏ ညွှန်ကြားချက် အမှတ် (၂/၂၀၁၉) ပါ အကြောင်းများ၊ စားသုံးသူ များသာမက စီးပွားရေးလုပ်ငန်းရှင်များအနေဖြင့် ဌာနမှဆောင်ရွက်နေသောလုပ်ငန်းများကို သိရှိလိုပါက ရုံးဖွင့်ရက် ရုံးချိန်အတွင်း Consumer Call Center No. 1535 သို့ ဆက်သွယ်မေးမြန်းနိုင်သည့် အကြောင်းများကို ရှင်းလင်းဆွေးနွေးခဲ့ကြောင်း သိရှိရပါသည်။

DOCA (ရန်ကုန်)

        စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ စစ်ဆေးရေးမှူးများသည် (၂၆.၁၁.၂၀၂၅) ရက်နေ့ နံနက် (၁၁:၅၀) နာရီအချိန်တွင် အင်းစိန်မြို့နယ် လှိုင်မြစ်လမ်းပေါ်ရှိ One Stop Mart သို့ ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

      ထိုသို့ဆောင်ရွက်ခဲ့ရာတွင် One Stop Mart သို့ ရောက်ရှိခဲ့ရာ တာဝန်ရှိသူမှ မိမိတို့ရောင်းချလျက်ရှိသော စားသောက်ကုန်ပစ္စည်းများ၊ အသင့်သောက်အချိုရည်များ၊ အရန်သင့် အစားအစာများ အဟာရဖြည့်စွက်စာများ၊ လူသုံးကုန်ပစ္စည်းများ၊ သွားတိုက်ဆေးများ၊ ဆပ်ပြာအမျိုးမျိုးတို့ တွင် ကုန်အညွှန်းအမှတ်အသားတွင် ဖော်ပြရမည့်အချက်များအား မြန်မာလိုရေးသား ဖော်ပြထားပြီး အလေးချိန်တို့သည် ဂရမ်ဟုဖော်ပြထားကြောင်း၊ ဈေးနှုန်းလည်း ယခင်အပတ်ထက် မြင့်တက်နေခြင်းမရှိဘဲ ပစ္စည်းများလည်း ပြတ်လပ်မှုမရှိပါကြောင်း၊ သက်ဆိုင်ရာဌာန ထောက်ခံချက်များလည်းပါဝင်ပါကြောင်း စစ်ဆေးတွေ့ရှိရပြီး မိမိတို့ဌာနမှလည်း ကုန်အညွှန်းအမှတ်အသားပြည့်စုံပြီး သတ်မှတ်ချက်နှင့်ကိုက်ညီသောပစ္စည်းများကိုသာ ရောင်းချရမည်ဖြစ်ကြောင်း  အသိပေးပြောကြားခဲ့ကြောင်း သိရှိရပါသည်။

DOCA (ရန်ကုန်)

     စားသုံးသူရေးရာဦးစီးဌာန၊ မအူပင်မြို့နယ်ဦးစီးမှူးရုံးမှ တာဝန်ရှိသူများသည် မြို့နယ်စက်မှု ကြီးကြပ်နှင့် စစ်ဆေးရေးဦးစီးဌာနမှ တာဝန်ရှိသူများနှင့်အတူ ၁၉-၁၁-၂၀၂၅ ရက် နေ့ နံနက် ပိုင်းက မအူပင် မြို့နယ် စပါးခွံလောင်စာသုံး Gasifier အသုံးပြုလည်ပတ်သည့် ဆန်စက်များ ကြိတ်ခွဲလည်ပတ် ထုတ်လုပ်နိုင်မှုများ တွက်ချက်နိုင်ရေးကို သွားရောက်လေ့လာ ကြည့်ရှုစစ်ဆေးသည်။

      မအူပင်မြို့နယ်အတွင်း Gasifier သုံးဆန်စက် (၄)စက်မှ  ဆန်စက်တာဝန်ခံများနှင့် ဦးအောင်ဇော်ဦးနှင့် တွေ့ဆုံ၍ လျှပ်စစ်ဓာတ်အား လိုအပ်ချက်၊ ဓာတ်အားရရှိသုံးစွဲနေမှု၊ စပါးခွံ ကုန်ကြမ်းများ ရရှိသုံးစွဲမှု၊ စပါးခွံလောင်စာသုံး Gasifier မှ လျှပ်စစ်ထုတ်လုပ်နိုင်မှု၊ ပတ်ဝန်းကျင် ထိခိုက်မှု မရှိအောင် ဆောင်ရွက်နေမှု၊ စပါးခွံလောင်စာသုံး Gasifier အသုံးပြုခြင်းကြောင့် ကုန်ထုတ်လုပ်မှု စရိတ်များလျှော့ချနိုင်မှုနှင့် ပြည်တွင်း၌သုံးစွဲနေသည့် စပါးခွံလောင်စာသုံး Gasifier များ၏ စစ်ဆေးတွေ့ရှိမှု အခြေအနေတို့ကို ရှင်းလင်းဆွေးနွေးခဲ့ကြပြီး စပါးခွံလောင်စာသုံး Gasifier ၏ လုပ်ငန်းဆောင်ရွက်ပုံ အဆင့်ဆင့်နှင့် စပါးခွံ ထွက်ရှိမှု အခြေအနေများ၊ စပါးကြိတ်ခွဲနေမှုလုပ်ငန်းစဉ်အဆင့်ဆင့်ကို လှည့်လည်ကြည့်ရှုစစ်ဆေးပြီး Gasifier အသုံးပြုမှုအတွက် တွက်ချက်နိုင်ရေးအတွက် လေ့လာကွင်းဆင်းခဲ့ကြောင်း သတင်းရရှိသည်။

DOCA(ဧရာဝတီ)

      ဧရာဝတီတိုင်းဒေသကြီး၊ မအူပင်ခရိုင်၊ ပန်းတနော်မြို့နယ်၊ ချောင်းကလေးကျေးရွာရှိ စံပြ နေကြာ(၁၅)ဧက စိုက်ပျိုးမည့်နေရာသို့ စိုက်ပျိုးရေးဦးစီးဌာနနှင့် သက်ဆိုင်ရာဌာနမှ တာဝန်ရှိသူများ ပူးပေါင်း၍ (၁၉-၁၁-၂၀၂၅ )ရက်နေ့၊ နံနက်(၁၀:၀၀)နာရီအချိန်တွင် မြေပြင်ကွင်းဆင်းစစ်ဆေးခဲ့ကြောင်း သိရသည်။

       ထိုသို့ ကွင်းဆင်းစစ်ဆေးခဲ့ရာတွင် မြို့နယ်စိုက်ပျိုးရေးဦးစီးဌာနမှ ဝန်ထမ်းများ၊ စိုက်ပျိုးရေးပညာရှင်များ စားသုံးသူရေးရာဦးစီးဌာနမှ ဦးအောင်ကျော်သက်နှင့်  ဝန်ထမ်းများ၊ ပန်းတနော် မြို့နယ်စိုက်ပျိုးမှု ကြီးကြပ်ရေးအဖွဲ့ဝင်များ၊  ရပ်ကွက်/ ကျေးရွာအုပ်စု အုပ်ချုပ်ရေးမှူးများနှင့်အတူ ဆောင်းသီးနှံများဖြစ်သည့် ၂၀၂၅-၂၀၂၆ခုနှစ် နေကြာဆီထွက်သီးနှံများ၊ နွေစပါး၊ ပဲမျိုးစုံနှင့်  အချိန်မီ နည်းလမ်းတကျ စိုက်ပျိုးရေးနှင့် လျာထားချက်ကျော်လွန်အောင် စိုက်ပျိုးနိုင်ရေး ကိစ္စရပ်များအား ချောင်းကလေးကျေးရွာ စံပြနေကြာ(၁၅)ဧက စိုက်ပျိုးသည့် နေရာသို့ မြေပြင်ကွင်းဆင်းကြည့်ရှု့စစ်ဆေးခဲ့ပြီး ပန်းတနော်မြို့နယ်အတွင်းရှိ ဆီထွက်သီးနှံ(နေကြာ)နှင့်  ဆောင်းသီးနှံများစိုက်ပျိုးမှု အခြေအနေ များအား ကွင်းဆင်းကြည့်ရှုစစ်ဆေးခဲ့ပြီး  သီးနှံစိုက်ပျိုးသည့် တောင်သူများနှင့် တွေ့ဆုံ၍ ဆီထွက်သီးနှံ(နေကြာ) စိုက်ပျိုးထုတ်လုပ်မှု တိုးတက်မြင့်မားရေးအတွက် လိုအပ်သည်များ ပေါင်းစပ်ညှိနှိုင်း ဆောင်ရွက်ပေးခဲ့ကြောင်း သိရသည်။

DOCA (ဧရာဝတီ)

      ဧရာဝတီတိုင်းဒေသကြီး၊ မအူပင်ခရိုင် မအူပင်မြို့နယ် စားသုံးသူရေးရာဦးစီးဌာနမှ  မအူပင်မြို့နယ်၊ တလုပ်လပ်အနောက် ရှိ ဦးတင်မြင့်အောင် (၉၁၂) ဆန်စက်အား ထုတ်ကုန်လုံခြုံစိတ်ချရမှုအတွက်ကွင်း ဆင်းလေ့လာ စီစစ်ခြင်းကို (၁၉.၁၁.၂၀၂၅) ရက်နေ့တွင် ပြုလုပ်ဆောင်ရွက်ခဲ့ကြောင်း သိရသည်။

     ထိုသို့ကွင်းဆင်းစစ်ဆေးဆောင်ရွက်ရာတွင် (၉၁၂) ဆန်စက်ပိုင်ရှင်နှင့်တွေ့ဆုံ၍ ဆန်စက်ကြိတ်ခွဲ ထုတ်လုပ်မှုအဆင့်ဆင့်အကြောင်းနှင့် ထွက်ရှိလာသောဆန်များကို ရန်ကုန်ဈေးကွက်သို့တင်ပို့ခြင်း၊ ဆန်/ စပါးဈေးနှုန်းဈေးကွက်အခြေအနေများ၊ ဆန်စက်မှထွက်ရှိလာသောဆန်များကို ရန်ကုန်ဘုရင့်နောင် ဈေးကွက်မှသည် အရည်အသွေးမြင့်ကုန်စည်အဖြစ် တိုးတက်ထုတ်လုပ်၍ ပြည်ပပို့ကုန်အထိ တိုးမြှင့်ဆောင် ရွက်နိုင်ရန် နည်းလမ်းကောင်းများကိုဆွေးနွေးပြီး ဆန်စက်တွင် စပါးတင်းရေ(၂၅၀၀၀)၊ ဆန် (၁၅၀၀) အိတ်သိုလှောင်ထားရှိကြောင်း၊ တစ်နေ့လျှင် စပါးကြိတ်ခွဲမှု တင်း (၁၀၀၀)နီးပါး ကြိတ်ခွဲကြောင်း၊ စပါးဆန် သိုလှောင် ထားရှိကြောင်းနှင့်လုပ်ငန်းရှင်တို့၏ကုန်စည်အပေါ် အာမခံချက်ပေးနိုင်ခြင်းနှင့် စပ်လျဉ်၍ ဆွေးနွေးခြင်း၊ လုပ်ငန်းရှင်လိုက်နာရမည့်တာဝန်၊ တားမြစ်ချက်များ၊ ပြစ်မှုနှင့် ပြစ်ဒဏ်များအကြောင်းများကို အပြန်အလှန်ရှင်းလင်းဆွေးနွေးခဲ့ကြကြောင်း သတင်းရရှိပါသည်။

DOCA (ဧရာဝတီ)