သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ ကျုံပျော်မြို့နယ်မှ မြို့နယ်တာဝန်ခံသည် စားသုံးသူရေးရာ ဦးစီးဌာနရုံး၌ (၂၂.၇.၂၀၂၅)ရက်နေ့တွင် ဆန်စက်လုပ်ငန်းရှင်များနှင့်တွေ့ဆုံ၍ MyRO မှတ်ပုံတင် ခြင်းဆိုင်ရာ အသိပညာပေးခြင်းများကို ဆောင်ရွက်ခဲ့ပါသည်။

     ထိုသို့ဆောင်ရွက်ရာတွင် ယခင်နှစ်ဇူလိုင်လတွင် မှတ်ပုံတင်ထားရှိပြီး ဆန်စက်လုပ်ငန်းရှင်များမှ သက်တမ်းတိုးဆောင်ရွက်ရန်၊ ဆန်စပါးနှင့်ပတ်သက်၍ မြို့နယ်အုပ်ချုပ်မှု အဖွဲ့အစည်း၊ အသင်းနှင့် စားသုံးသူရေးရာဦးစီးဌာနတို့မှ ညှိနှိုင်းဆွေးနွေးပူးပေါင်း ဆောင်ရွက်သွားနိုင်ပါရန် တင်ပြဆွေးနွေးမှုအပေါ် အသင်းမှ ပြန်လည်ဆွေးနွေးဆောင်ရွက်ခဲ့ကြောင်း သိရှိရပါသည်။

(DOCA ဧရာဝတီ)

  ပုသိမ်ခရိုင်၊ ကျောင်းကုန်းမြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများသည် (၂၅.၇.၂၀၂၅)ရက်နေ့တွင် တိုင်းဒေသကြီးအစားအသောက်နှင့် ဆေးဝါး ကြီးကြပ် ကွပ်ကဲရေးဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာန၊ ကျန်းမာရေး၊ စည်ပင်သာယာရေးအဖွဲ့၊ မြို့နယ်မွေး/ကုနှင့် မြို့နယ်ရဲတပ်ဖွဲ့မှ တာဝန်ရှိသူများနှင့်အတူ မြို့နယ်စည်ပင်ဈေးအတွင်း ရောင်းချနေသော ဈေးဆိုင်များ၏ ရောင်းချနေမှုများအား ကွင်းဆင်းစစ်ဆေးဆောင်ရွက်ခဲ့ပါသည်။

  ထိုသို့ဆောင်ရွက်ရာတွင် မြို့မဈေးအတွင်းရှိ ဈေးဆိုင်(၂၃)ဆိုင်မှ အစားအစာ အရေအတွက် (၃၁)မျိုးအား ဓာတုဆေးဝါးများပါဝင်မှုရှိ/မရှိ၊ တာရှည်ခံဆေးများ ပါဝင်မှုရှိ/မရှိ၊ တားမြစ်ဆိုးဆေး များပါဝင်မှုရှိ/မရှိတို့ကို ဈေးကွက်နမူနာ ကောက်ယူစစ်ဆေးခြင်းတို့အား စစ်ဆေးဆောင်ရွက်ခဲ့ကြောင်း သိရှိရပါသည်။

(DOCA ဧရာဝတီ)

           ရန်ကုန်တိုင်းဒေသကြီး၊ တွံတေးခရိုင်၊ တွံတေးမြို့နယ် ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ မြို့နယ်စားသုံးသူရေးရာဦးစီးဌာနနှင့် အခြေခံပညာဦးစီးဌာနတို့ ပူးပေါင်း၍ လူငယ်ရေးရာအသိပညာပေးနှင့် စားသုံးသူကာကွယ်ရေး အသိပညာပေး ဟောပြောပွဲကို တွံတေးမြို့နယ် ပျော်ဘွယ်လေးကျေးရွာ၊ အခြေခံပညာမူလတန်းကျောင်းတွင် ဇူလိုင်လ (၂၄)ရက်နေ့၊ နံနက် (၁၀:၀၀)နာရီအချိန်တွင် ကျင်းပပြုလုပ်ခဲ့ကြောင်း သိရသည်။

          အဆိုပါ ဟောပြောပွဲတွင် တွံတေးမြို့နယ်၊ ပျော်ဘွယ်လေးကျေးရွာ၊ အခြေခံမူလတန်းလွန်ကျောင်းမှ ကျောင်းအုပ်ဆရာမကြီး ဒေါ်မိမိမော်မှ အဖွင့်အမှာစကားပြောကြားခဲ့ပြီး မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဦးသက်ဦးက ကျောင်းသား/ ကျောင်းသူများအနေဖြင့် လူငယ်ဘဝသည် အရေးကြီးဆုံးဖြစ်ကြောင်း၊ လူငယ်ဘဝကတည်းက နိုင်ငံကိုချစ်မြတ်နိုးစိတ်၊ တိုင်းရင်းသား လူမျိုးအချင်းချင်း ချစ်ကြည်ရင်းနှီးစွာ နေထိုင်လိုစိတ်တို့ရှိ နေရမည်ဖြစ်ကြောင်း၊ အထူးသဖြင့် ပြည်ထောင်စုစိတ်ဓာတ်များ လွှမ်းခြုံထားရမှာဖြစ်ပြီး ပြည်ထောင်စု စိတ်ဓာတ်ရှိသည့် လူငယ်မောင်မယ်များသည် လူကြီးအရွယ်ရောက်သည့်အခါ နိုင်ငံတော်၏ အနာဂတ်ကို လှပအောင်ဆောင်ရွက်နိုင်လိမ့်မည်ဖြစ်ကြောင်း၊ လူငယ်ရေးရာ အသိပညာပေး ဟောပြောခဲ့ပြီး မြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံ ဦးသန်းနိုင်က ကျောင်းသား/ ကျောင်းသူများသည် စားသုံးသူပြည်သူများဖြစ်သည့်အတွက် စားသုံးသူ၏ အခွင့်အရေးနှင့် တာဝန်များ၊ စီးပွားရေးလုပ်ငန်းရှင်များ၏တာဝန်များ၊ စားသုံးသူပြည်သူများ ဘေးဥပါဒ်အန္တရာယ်ကင်းရှင်းစေရေးနှင့် ထုတ်ကုန်များ လုံခြုံစိတ်ချရမှုရှိစေရေးတို့အတွက် စီးပွားရေးလုပ်ငန်းရှင်များအနေဖြင့် ကုန်စည်အမျိုးအစားအလိုက် သတ်မှတ်ချက်များနှင့်အညီ ကုန်အညွှန်းအမှတ်အသား ဖော်ပြခြင်းဆိုင်ရာအချက်များ၊ ကုန်စည်(သို့မဟုတ်) ဝန်ဆောင်မှုများအား ဝယ်ယူသုံးစွဲခြင်းမပြုလုပ်မှီ သတိပြုရမည့် အချက်များအား စားသုံးသူကာကွယ်ရေး အသိပညာပေး ဟောပြောပေးခဲ့ကြောင်း သိရှိရပါသည်။

DOCA(ရန်ကုန်)

           စားသုံးသူရေးရာဦးစီးဌာန၊ ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ် တာဝန်ခံ ဒေါ်စန်းစန်းမော်သည် ဇူလိုင်လ(၂၄)ရက်နေ့၊ နေ့လယ်(၁၁:၃၀) နာရီအချိန်တွင် အွန်လိုင်းစနစ်ဖြင့် ရောင်းချသည့် လုပ်ငန်းရှင်များအား မြို့နယ်တာဝန်ခံရုံးတွင် ခေါ်ယူ၍ အသိပညာပေးဆွေးနွေးခဲ့ကြောင်း သိရသည်။

         အဆိုပါ အသိပညာပေး ဆွေးနွေးပွဲတွင် သုံးခွမြို့နယ်အတွင်း အွန်လိုင်းစနစ်ဖြင့် ရောင်းချနေသော လုပ်ငန်းရှင်များဖြစ်သည့် အမှတ်(၂)ရပ်ကွက် တပင်ရွှေထီးလမ်းရှိ ဒေါ်ခင်ဝါဆိုဦး (Warso Collection)၊ အမှတ်(၁)ရပ်ကွက် မာလာလမ်းရှိ ဒေါ်ဥမ္မာအေး (လင်းလက်သဘာဝထုတ် ကုန်ရောင်းဝယ်ရေး)၊ အမှတ်(၉)ရပ်ကွက်၊ အောင်ဇေယျလမ်းရှိ မစုသဲဖြူ (အဲလစ်တီရှပ်)တို့အား မြေပြင်စစ်ဆေးအတည်ပြုပြီး မှတ်ပုံတင်ရရှိထားသည့် လုပ်ငန်းရှင်များဖြစ်၍ အွန်လိုင်းစနစ်ဖြင့်ရောင်းချသည့် လုပ်ငန်းဆိုင်ရာ အမိန့်ကြော်ငြာစာအမှတ် (၅၁/၂၀၂၃) နှင့်စပ်လျဉ်း၍ အသိပညာပေးရှင်းလင်းခြင်း၊ စားသုံးသူရေးကာကွယ်ရေး ဥပဒေပါ စီးပွားရေးလုပ်ငန်းရှင်၏ တာဝန်များနှင့် ကုန်အညွှန်းအမှတ်အသား ဖော်ပြချက်များနှင့် စပ်လျဉ်း၍ ကုန်စည်များတွင် ကုန်အညွှန်းအမှတ် အသားများအား မြန်မာဘာသာဖြင့်သော်လည်းကောင်း၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍ တွဲလျက်ဖြစ်စေ ဖော်ပြရမည်ဖြစ်ကြောင်းနှင့် ကုန်အညွှန်းအမှတ် အသားပြည့်စုံမှုမရှိသည့် ကုန်စည်များအား ရောင်းချခြင်းမပြုလုပ်ကြရန်၊ ထိုသို့ ပြုလုပ်ပါက စားသုံးသူကာကွယ်ရေးဥပဒေနှင့်အညီ အရေးယူဆောင်ရွက်သွားမည်ဖြစ်ကြောင်း အသိပညာပေး ဆွေးနွေးခဲ့ကြောင်း သိရှိရပါသည်။

DOCA(ရန်ကုန်)

             မြန်မာအီလက်ထရောနစ် မဲပေးစက် (MEVM)ကိုင်တွယ်အသုံးပြုနည်း သင်တန်းအား ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ် မြို့သစ်ရပ်ကွက် အခြေခံပညာအထက်တန်းကျောင်း နှင်းဆီခန်းမ၌ ဇူလိုင်လ (၂၄)ရက်နေ့၊ နံနက်(၁၀:၀၀)နာရီအချိန်တွင် ဆက်လက်ကျင်းပပြုလုပ်ခဲ့ကြောင်း သိရှိရသည်။

            အဆိုပါ သင်တန်းဆက်လက် ကျင်းပပြုလုပ်ခဲ့ရာတွင် မြန်မာအီလက်ထရောနစ် မဲပေးစက် (MEVM)ကိုင်တွယ်အသုံးပြုနည်းသင်တန်းကို တွံတေးခရိုင်သို့ ခရိုင်အဆင့်သင်တန်း တက်ရောက်ခဲ့သော သင်တန်းဆရာ၊ ဆရာမများက မဲပေးစက်တည်ဆောက်ပုံနည်းလမ်းများ၊ မဲပေးစက်တပ်ဆင်ပုံ၊ စမ်းသပ်မဲပေးပုံ၊ ဖြန့်ခွဲပုံ၊ ရွေးကောက်ပွဲကျင်းပမည့်နေ့တွင် မဲရုံများ၌ မဲပေးစက်တပ်ဆင် ခင်းကျင်းပုံ၊ မဲရလဒ်ရေတွက်ပုံ၊ နည်းဥပဒေပါအတိုင်း မဲရလဒ်စာရင်းပြုစုပုံ၊ မဲပေးစက်အား ပြန်လည်ထုပ်ပိုးသိမ်းဆည်းပုံ၊ နည်းလမ်းတို့အား အကျယ်တဝင့် ရှင်းလင်းဆွေးနွေး အသိပညာပေး သင်ကြားပေးခဲ့ကြပြီး မြန်မာအီလက်ထရောနစ်မဲပေးစက် (MEVM) ကိုင်တွယ်အသုံးပြုနည်းသင် တန်းသို့ တက်ရောက်သော သင်တန်းသား/ သင်တန်းသူများက မရှင်းလင်းသောအချက်များနှင့် သိရှိလိုသည့် အချက်များကိုမေးမြန်းခဲ့ပြီး တာဝန်ရှိသူများက ပြန်လည်ဖြေရှင်း သင်ကြားပြသပေးခဲ့ကြောင်း သိရှိရပါသည်။

DOCA(ရန်ကုန်)