သတင်းနှင့် လှုပ်ရှားမှုများ

      မအူပင်ခရိုင်၊ ညောင်တုန်းမြို့နယ် လူမှုဝန်ထမ်းဦးစီးဌာနတွင် အမျိုးသမီးသင်တန်းသူများကို စားသုံးသူရေးရာဦးစီးဌာနမှ စားသုံးသူကာကွယ်ရေးဥပဒေအကြောင်းကို ၂၆.၁၁.၂၀၂၅ ရက်နေ့ နံနက် (၁၀း၀၀)နာရီအချိန်မှ (၁၀း၄၅) နာရီအချိန်အထိ သင်တန်းပို့ချခဲ့ကြောင်း သိရသည်။

    သင်တန်းပို့ချရာတွင် မြို့နယ် စားသုံးသူရေးရာဦးစီးဌာနမှ ဒေါ်ချိုမီဇင် ဒုဦးစီးမှူးက စားသုံးသူကာကွယ်ရေးဥပဒေမှ စားသုံးသူကာကွ‌ယ်ရေး အသိပညာပေးခြင်းလုပ်ငန်း၏ သဘောသဘာဝ၊ စားသုံးသူကာကွယ်ရေး အသိပညာပေးရာတွင် ထည့်သွင်းတွက်ချက်သင့်သည့်အချက်များအကြောင်း၊ ထိခိုက်လွယ်သည် စားသုံးသူအကြောင်း၊ စားသုံးသူအသိပညာပေးခြင်း အစီအစဉ်၊ စားသုံးသူကာကွယ်ရေးဥပဒေ၊ နည်းဥပဒေများ၊ ညွှန်ကြားချက်များအကြောင်းကို သင်တန်းသူ( ၁၅)ဦးအားရှင်းလင်းဟောပြောခဲ့ပြီး တက်ရောက်သူသင်တန်းသူများ သိရှိလို၍ မေးမြန်းမှုများကို ပြန်လည်ဖြေကြား ရှင်းလင်းပေးခဲ့ပြီး စားသုံးသူကာကွယ်ရေး ဥပဒေ ပန်းဖလက်များ ဖြန့်ဝေပေးခဲ့ကြောင်း သိရှိရပါသည်။

DOCA(ဧရာဝတီ)

         ဧရာဝတီတိုင်းဒေသကြီးအစိုးရအဖွဲ့၊ စီးပွားရေးရာဝန်ကြီးသည် ၂၄.၁၁.၂၀၂၅ ရက်နေ့ နေ့လယ် ၁၂:၀၀ နာရီအချိန်တွင် ကျုံပျော်ခရိုင်၊ အထွေထွေအုပ်ချုပ်ရေးဦးစီးဌာန၏ အစည်းအဝေးခန်းမ(၁)တွင် ကျုံပျော်မြို့နယ်နှင့် ကျောင်းကုန်းမြို့နယ်၏ ဆန်စက်လုပ်ငန်းရှင်များ၊ ဆန်၊ စပါးကုန်သည်များနှင့် တွေ့ဆုံခဲ့ပါသည်။ တွေ့ဆုံပွဲတွင် ဝန်ကြီးမှ ဆန်၊ စပါးဖူလုံသော တိုင်းဒေသကြီးဖြစ်သော်လည်း အမှန်တကယ် စပါး၊ ဆန်လက်ကျန်မြေပြင်လက်ကျန် စာရင်းကောက်ယူရခြင်းမှာ ဆန်၊ စပါးစီးဝင်စီးထွက် အခြေအနေများ၊ စားသုံးရန်လိုအပ်ချက်နှင့် အမှန်တကယ်ပိုလျှံမှု အခြေအနေများတွက်ဆပြီး ပြည်ပပို့ကုန်လျာထားနိုင်ရန်အတွက်ဖြစ်ပါကြောင်းနှင့် အဓိကအားဖြင့် ပေါ်ဆန်းဆန်နှင့်ကောက်ညှင်းဆန်များပြည်ပတင်ပို့ရန် စီစဉ်ထားရှိမှုများရှင်းလင်းခြင်း၊  ဆန်၊ ဆန်ထွက်ပစ္စည်းများတိုင်းကျော်ပေးပို့သည့်ကားများတွင် ကုန်ပို့လွှာပါရှိရေးနှင့် စပါး၊ ဆန်သိုလှောင်ရောင်းဝယ်သူများမှ MyROမှတ်ပုံတင်ရန် ကျန်ရှိသူများရှိပါက မှတ်ပုံတင်ထားရှိရန်နှင့် လစဉ်ဆန်၊စပါးလက်ကျန် ဖြေဆိုရန်အခက်အခဲရှိပါက မြို့နယ်စားသုံးသူရေးရာဦးစီးဌာနဝန်ထမ်းများနှင့် ချိတ်ဆက်ဆောင်ရွက်ရန် ကိစ္စရပ်များပြောကြားခဲ့ကြောင်း သိရှိရပါသည်။

DOCA (ဧရာဝတီ)

     စားသုံးသူရေးရာဦးစီးဌာနသည် ဆေးနှင့်ဆေးပစ္စည်းများအား ဈေးနှုန်းအဆမတန် မြှင့်တင် ရောင်းချမှုမရှိစေရေးနှင့် ပစ္စည်းပြတ်လပ်မှုမရှိစေရေးတို့အတွက် အပတ်စဉ် ကွင်းဆင်းစိစစ်ကြပ်မတ် ဆောင်ရွက်လျက်ရှိရာ စားသုံးသူရေးရာဦးစီးဌာန၊ မကွေးတိုင်းဒေသကြီးဦးစီးမှူးရုံးမှဝန်ထမ်းများနှင့် မကွေးခရိုင်တာဝန်ခံရုံးမှ ဝန်ထမ်းသည် (၂၆.၁၁.၂၀၂၅)ရက်နေ့၊ နေ့လယ်(၁၃:၃၀)နာရီအချိန်တွင် မကွေးမြို့ပေါ်ရှိ ဆေးနှင့်ဆေးပစ္စည်း သိုလှောင်ရုံများနှင့် ဆေးအရောင်းဆိုင်များအား အစားအသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်စီမံခန့်ခွဲရေးနှင့်အုပ်ချုပ်ရေး ကော်မတီ၊ အထူးစုံစမ်းစစ်ဆေးရေးဦးစီးဌာနတို့နှင့် ပူးပေါင်း၍ ဆေးနှင့်ဆေးပစ္စည်းများအား ကွင်းဆင်းစစ်ဆေး ခဲ့ပါသည်။

     ထိုသို့စစ်ဆေးရာတွင် စားသုံးသူရေးရာဦးစီးဌာနမှ ဆေးပစ္စည်းများ ပြတ်လပ်မှုရှိ/မရှိနှင့် ဆေးနှင့် ဆေးပစ္စည်းများ စျေးနှုန်းမြှင့်တင်ရန်ရည်ရွယ်ချက်ဖြင့် ဆေးများစုပုံသိုလှောင်ထားခြင်း ရှိ/မရှိ တို့အား စစ်‌ဆေးကြပ်မတ်ခဲ့ပြီး စီးပွားရေးလုပ်ငန်းရှင်၏ ကျင့်ဝတ်တို့နှင့်အညီ ရောင်းချရန်  အသိပညာပေး ဆွေးနွေးခဲ့ကြောင်း သိရှိရပါသည်။

DOCA(မကွေး)

       မအူပင်ခရိုင်၊ စားသုံးသူရေးရာဦးစီးဌာန သည် စားသုံးသူကာကွယ်ရေးလုပ်ငန်းစဉ်များ ပြည်သူနှင့် လုပ်ငန်းရှင်များ သိရှိနားလည်စေရန်အတွက် အသိပညာပေးလုပ်ငန်းများကို ပြုလုပ်ဆောင်ရွက်လျက်ရှိကာ ၂၄-၁၁-၂၀၂၅ ရက်နေ့ နံနက် (၁၀:၀၀)နာရီအချိန်တွင် အိုင်ဝိုင်း ကျေးရွာ ဓမ္မာရုံတွင် ကျေးရွာရှိ ကုန်မျိုးစုံလုပ်ငန်းရှင်များအား အသိပညာပေး ဟောပြောခဲ့သည်။

     အဆိုပါတွေ့ဆုံဆွေးနွေးပွဲတွင် စားသုံးသူရေးရာဦးစီးဌာနမှ မအူပင်ဒု-ခရိုင်ဦးစီးမှူး ဦးအောင်ဇော်ဦးက စားသုံးသူ ကာကွယ်ရေးဥပဒေ ၂၀၁၉ပါ အဓိပ္ပါယ်နှင့်ဖော်ပြချက်များ၊ စီးပွားရေးလုပ်ငန်းရှင်ဆိုသည်မှာ ကုန်စည်ကိုထုတ်လုပ်ခြင်း၊ ဖြန့်ဖြူးခြင်း၊ သိုလှောင်ခြင်း၊ သယ်ယူပို့ဆောင်ခြင်း၊ ရောင်းချခြင်း၊ ပြုပြင်ထုတ်လုပ်ခြင်း၊ ပြည်ပသို့တင်ပို့ခြင်း၊ ပြည်တွင်းသို့ တင်သွင်းခြင်း၊ ပြန်လည်ရောင်းချခြင်းကိုဖြစ်စေ၊ ထောက်ပံ့ပေးခြင်းကိုဖြစ်စေ၊ ဝန်ဆောင်မှုပေးခြင်းကိုဖြစ်စေ၊ ကြော်ငြာ လုပ်ငန်းလုပ်ကိုင်ခြင်းကိုဖြစ်စေ၊ တစ်ဦးချင်းသော်လည်းကောင်း၊ အဖွဲ့အစည်းနှင့်သော်လည်းကောင်း ဆောင်ရွက်သူ ကိုဆိုလိုခြင်းဖြစ်‌ကြောင်းကိုရှင်းလင်းပြီး စားသုံးသူကာကွယ်ရေးဥပဒေ(၂၀၁၉)၊ အခန်း(၁၀)ပါ လုပ်ငန်းရှင်များ လိုက်နာရမည့်တာဝန်(၁၁)ချက်၊ အခန်း(၂၃)ပါ တားမြစ်ချက်(၄)ချက်၊ ကုန်အညွှန်းအမှတ်အသားများအကြောင်းနှင့် ကုန်စည်/ဝန်ဆောင်မှုနှင့် စပ်လျဉ်း၍ အာမခံချက်ပေးနိုင်သည့်အချက်အလက်များအကြောင်းနှင့် ပြစ်မှု၊ ပြစ်ဒဏ်များအကြောင်းတို့ကို အကျယ်တဝင့်ဟောပြောဆွေးနွေးခဲ့ကြောင်းနှင့် ကုန်မျိုးစုံလုပ်ငန်းရှင်(၂၀)ဦးတက်ရောက်ခဲ့ကြောင်း သတင်းရရှိပါသည်။

DOCA(ဧရာဝတီ)

      စားသုံးသူရေးရာဦးစီးဌာန၊ မအူပင်မြို့နယ်ဦးစီးမှူးရုံး ဦးစီးအရာရှိ ဦးအောင်ဇော်ဦးသည် (၂၅.၁၁.၂၀၂၅)ရက်နေ့ နံနက် (၁၀:၀၀) နာရီအချိန်တွင် မအူပင်မြို့၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ လူထုအခြေပြု ဗဟိုဌာန(Community Centre) ခန်းမ၌ ကုန်အညွှန်းအမှတ်အသား ဖော်ပြခြင်းဆိုင်ရာ အသိပညာပေး Talk Show အစီအစဉ်ကို ဆောင်ရွက်ခဲ့ပါသည်။

          အဆိုပါ အစီအစဉ်တွင်  စားသုံးသူ‌ရေးရာဦးစီးဌာနမှ ဦးအောင်ဇော်ဦး ဦးစီးအရာရှိက စားသုံးသူကာကွယ်ရေးဥပဒေကို ၂၀၁၆ခုနှစ်က စတင်ရေးဆွဲပြဌာန်းခဲ့ပြီး လုပ်ဆောင်နိုင်ရန် လိုအပ်ချက်များ ပြင်ဆင်ရေးဆွဲက ၂၀၁၉ ခုနှစ် မတ်လ(၁၅) ရက်နေ့တွင်  ထပ်မံပြင်ဆင်ပြဌာန်းအတည်ပြ ပေါ်ထွက်လာခဲ့ပြီး စားသုံးသူကာကွယ်ရေးဥပဒေ၏  မျှော်မှန်းချက်နှင့် ရည်မှန်းချက်များ၊ စားသုံးသူတို့ ရရှိသင့်သည့် အခွင့်အရေးများအကြောင်း ရှင်းလင်းဆွေးနွေးခဲ့ပြီး၊ ၂၀၁၉ခုနှစ် ဥပဒေတွင် ကုန်အညွှန်းအမှတ် အသားဖော်ပြခြင်းနှင့် စပ်လျဉ်း၍ ထည့်သွင်းရေးဆွဲပါဝင်ခဲ့ရာ စားသုံးသူကာကွယ်ရေးဥပဒေ အခန်း(၁၈) ပုဒ်မ ၄၁ ပါ ကုန်စည်အမျိုးအစားအလိုက် သိသာထင်ရှားစွာဖော်ပြရမည့် ကုန်စည်၏ တံဆိပ်အမှတ်အသား၊ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်လမ်းများအား ဖော်ပြရမည်ဖြစ်ပြီး၊ ကျန်းမာရေးဆိုင်ရာ ဘေးထွက်ဆိုးကျိုး (သိုမဟုတ်) ဓါတ်မတည့်ကြောင်းဖော်ပြချက်နှင့် ကြိုတင်သတိပေးချက်များ၊ ပါဝင်ရမည့် အသေးစိတ် အချက်အလက်များကို  မဖြစ်မနေ ဖော်ပြပါရှိရမည် ဖြစ်ကြောင်း အကျယ်တဝင့် ရှင်းလင်းဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)