HighLight News

         စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့်  စီးပွားရေးလုပ်ငန်းရှင်များအားတွေ့ဆုံပြီး ဌာနမှထုတ်ပြန်ထားသည့် ဥပဒေ၊ အမိန့်၊ ညွှန်ကြားချက်များ ရှင်းလင်းဆွေးနွေးခြင်းများ ဆောင်ရွက်လျက်ရှိရာ (၂၈.၉.၂၀၂၆)ရက်နေ့၊ နံနက်(၁၁:၀၀)နာရီအချိန်တွင် ရွှေဘိုခရိုင် စားသုံးသူရေးရာဦးစီးဌာနမှ ခရိုင်ဦးစီးမှူးသည် ရွှေဘိုမြို့၊ အမှတ်(၁၀)ရပ်ကွက်၊ စက်မှုဇုန်ရှိ မိုးမခကျော် ဆန်စက်လုပ်ငန်းရှင်အား တွေ့ဆုံဆွေးနွေးခဲ့ကြောင်း သိရသည်။

          ထိုသို့တွေ့ဆုံရာတွင် ဆန်တန်ချိန်(၂၅)တန်အထက်၊ စပါးတင်း(၂၅၀၀)အထက် သိုလှောင်ပါက myroတွင်မှတ်ပုံတင်ရန်နှင့် မှတ်ပုံတင်ပြီးသည့်ဆန်စပါးသိုလှောင်ရုံနှင့် စက်တွဲသိုလှောင်ရုံလုပ်ငန်းရှင်များအနေဖြင့် လစဉ်ကုန်ရ/ ကုန်ထုတ်/ ကုန်လက်ကျန်စာရင်းများအား လစဉ်လဆန်း(၁)ရက်နေ့မှ (၇)ရက်နေ့အတွင်း Updateပြုလုပ်ခြင်း လုပ်ငန်းစဉ်များ လိုက်ပါဆောင်ရွက်ကြရန် အသိပညာပေး ဆွေးနွေးခဲ့ပြီး  ဆန်ဈေးနှုန်းတည်ငြိမ်စေရေး၊ ဈေးနှုန်းမြှင့်တင်ရောင်းချမှုမရှိစေရေးအတွက် လက်ရှိအရောင်းအဝယ်ဖြစ်လျက်ရှိသည့် စပါး၊ ဆန်ဈေးနှုန်းနှင့် ဈေးကွက်အခြေအနေများ မေးမြန်းဆွေးနွေးခဲ့ကြကြောင်း သတင်းရရှိပါသည်။

DOCA(စစ်ကိုင်း)

          စစ်ကိုင်းတိုင်းဒေသကြီး၊ စားသုံးသူရေးရာကော်မတီအစည်းအဝေး (၃/၂၀၂၆) ကို (၂၉.၉.၂၀၂၆) ရက်နေ့ ညနေ (၁၅:၀၀)နာရီအချိန်တွင် မုံရွာမြို့၊ စစ်ကိုင်းတိုင်းဒေသကြီးဦးစီးမှူးရုံး၊ အစည်းအဝေးခန်းမ၌ ကျင်းပပြုလုပ်ခဲ့ရာ စစ်ကိုင်းတိုင်းဒေသကြီး၊ စားသုံးသူရေးရာကော်မတီဥက္ကဌ၊ စီမံကိန်း၊ စီးပွားရေးနှင့် ဘဏ္ဍာရေးဝန်ကြီး၊ တိုင်းဒေသကြီးစားသုံးသူရေးရာကော်မတီအတွင်းရေးမှူးနှင့် အဖွဲ့ဝင်များတက်ရောက်ခဲ့ကြောင်း သိရပါသည်။

         ပထမဦီးစွာ စစ်ကိုင်းတိုင်းဒေသကြီး၊ စားသုံးသူရေးရာကော်မတီဥက္ကဌ၊ စီမံကိန်း၊ စီးပွားရေးနှင့် ဘဏ္ဍာရေးဝန်ကြီး၊ ဦးအောင်ဇော်ဉီးက ဒီနေ့ကျင်းပတဲ့ စားသုံးသူရေးရာ ကော်မတီအစည်းအဝေးကတော့ ၂၀၂၆ -၂၀၂၇ ဘဏ္ဍာနှစ် ဒုတိယ(၃)လပတ်အတွက် ကျင်းပပြုလုပ်တာဖြစ်ကြောင်း၊ ၂၀၂၆-၂၀၂၇ ဘဏ္ဍာနှစ်၊ ဇွန်လမှ စက်တင်ဘာလအထိ စားသုံးသူကာကွယ်ရေးလုပ်ငန်း ဆောင်ရွက်နိုင်မှုအခြေအနေများနဲ့ ရှေ့ဆက်ဆောင်ရွက်မယ့်လုပ်ငန်းများ   ချပြရှင်းလင်းတဲ့လုပ်ငန်းညှိနှိုင်းအစည်းအဝေးဖြစ်ပါကြောင်း၊ စားသုံးသူကာကွယ်ရေးလုပ်ငန်းများဖြစ်သည့် စားသုံးသူများနှင့်လုပ်ငန်းရှင်များအား စားသုံးသူကာကွယ်ရေးဆိုင်ရာအသိပညာပေး ဟောပြောဆွေးနွေးခြင်း၊ ကုန်စည်/ဝန်ဆောင်မှုများနှင့် စပ်လျဉ်း၍ စားသုံးသူနစ်နာဆုံးရှုံးမှုများအပေါ် တိုင်ကြားလာမှုများကို ညှိနှိုင်းဖြေရှင်းပေးခြင်း လုပ်ငန်းများအား ဌာနအစီအစဉ်ဖြင့်ဖြစ်စေ၊ မိတ်ဖက်ဌာနဆိုင်ရာများ၊ အသင်းအဖွဲ့များနှင့်ပူးပေါင်း၍ဖြစ်စေ ဆောင်ရွက်လျက်ရှိကြောင်း၊ ဒါ့အပြင် စားသုံးသူပြည်သူများ အသုံးပြုလျက်ရှိသည့် ကုန်စည်များနှင့်စပ်လျဉ်း၍ ထုတ်ကုန်များ လုံခြုံစိတ်ချရမှုနှင့် ဘေးအန္တရာယ်ရှိ/မရှိ ဈေးကွက်စောင့်ကြည့် စစ်ဆေးခြင်း၊ ကုန်အညွှန်း အမှတ်အသားတွင် ဖော်ပြရမည့်အချက်များ ပြည့်စုံစွာပါဝင်မှုရှိ/မရှိ စောင့်ကြည့်စစ်ဆေးခြင်းများ၊ အွန်လိုင်းစနစ်ဖြင့် ရောင်းချခြင်းလုပ်ငန်းများနှင့်စပ်လျဉ်း၍ မြေပြင်ကွင်းဆင်းစစ်ဆေးခြင်းလုပ်ငန်းများအား ဆောင်ရွက်လျက်ရှိရာ  စစ်ကိုင်းတိုင်းဒေသကြီးအတွင်းမှာ စားသုံးသူကာကွယ်ရေးလုပ်ငန်းတွေကို အခြေခိုင်မာစွာနဲ့ထိရောက်အောင် ရလဒ်ကောင်းတွေ ဘယ်လိုဆောင်ရွက်ကြမလဲဆိုတာကို အနှစ်သာရရှိရှိ ဖော်ထုတ်ဆွေးနွေးပေးကြဖို့နဲ့ စားသုံးသူကာကွယ်ရေးလုပ်ငန်းတွေကို စိတ်ပါလက်ပါနဲ့ အချိန်ပေးပြီး မိမိတို့ရဲ့လုပ်ငန်းတာဝန်များကို ထမ်းဆောင်ပေးကြဖို့ တိုက်တွန်းပြောကြားခဲ့ကြောင်း သိရသည်။

     ဆက်လက်၍ စစ်ကိုင်းတိုင်းဒေသကြီး၊ စားသုံးသူရေးရာကော်မတီ အတွင်းရေးမှူး  ဦးမင်းမင်းက ယခင်အစည်းအဝေး(၂/၂၀၂၆) ဆုံးဖြတ်ချက်များအပေါ် ဆောင်ရွက်ပြီးစီးမှုများနှင့် ၂၀၂၆- ၂၀၂၇ ဘဏ္ဍာနှစ်၊ ဇွန်လမှ စက်တင်ဘာလအထိ စားသုံးသူကာကွယ်ရေးဆိုင်ရာလုပ်ငန်းများ ရှင်းလင်းတင်ပြခဲ့သည်။ ထို့နောက် စားသုံးသူရေးရာကော်မတီသို့တင်ပြသည့်အမှာစာများအား ဒုတိယတိုင်းဒေသကြီးဦးစီးမှူး ဒေါ်ဇင်မာဦးက ဖတ်ကြားရှင်းလင်းတင်ပြပြီး ကော်မတီအဖွဲ့ဝင်များက ဖြည့်စွက်ဆွေးနွေးမှုများအပေါ် လိုအပ်သည်များအား ကော်မတီဥက္ကဌက တာဝန်ရှိသူများနှင့် ပေါင်းစပ်ညှိနှိုင်းဆောင်ရွက်ပေးပြီး အခမ်းအနားကို အောင်မြင်စွာရုပ်သိမ်းခဲ့ကြောင်း သတင်းရရှိပါသည်။

DOCA(စစ်ကိုင်း)

         စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်တာဝန်ခံ ဦးစီးအရာရှိ ဦးဇော်နေလင်းနှင့် ဝန်ထမ်းများသည် (၆.၁၀.၂၀၂၆)ရက်နေ့၊ နံနက် (၀၉:၀၀)နာရီအချိန်တွင် ဆိပ်ဖြူမြို့ ၊ အထွေထွေအုပ်ချုပ်ရေးဦးစီးဌာန “ငွေသဲဖြူ” ခန်းမ၌ စားသုံးသူကာကွယ်ရေးအသိပညာပေးဟောပြောပွဲပြုလုပ်ရာ စာရေးဝန်ထမ်း(၄၀)ဦး တက်ရောက်ခဲ့ကြောင်း သိရသည်။

  အဆိုပါ ဟောပြောပွဲတွင် မြို့နယ်တာဝန်ခံက စီးပွားရေးနှင့်ကူးသန်းရောင်းဝယ်ရေးဝန်ကြီး ဌာန၏သမိုင်းကြောင်း၊ စားသုံးသူရေးရာဦးစီးဌာန၏သမိုင်းကြောင်း၊ ဌာန၏ဆောင်ပုဒ်၊ မျှော်မှန်းချက်နှင့် ရည်မှန်းချက်များ၊  ဌာနဖြစ်ပေါ်လာပုံအဆင့်ဆင့်၊ ဆောင်ရွက်နေသည့်လုပ်ငန်းများ၊ စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်၊ ပြစ်မှု/ ပြစ်ဒဏ်များအကြောင်း၊ စားသုံးသူကာကွယ်ရေးဥပဒေအခန်း(၁၈)ပါ ကုန်စည်များတွင် ဖော်ပြရမည့် ကုန်အညွှန်းအမှတ်အသားဆိုင်ရာအကြောင်းတို့ကို အသေးစိတ်ရှင်းလင်းအသိပညာပေးခဲ့ပြီး လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

DOCA(မကွေး)

         စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးဦးဆောင်၍ ခရိုင်ရုံးဝန်ထမ်း(၁)ဦးသည် မြေပြင်စစ်ဆေးရန် ရည်ညွှန်းပါစာဖြင့် အကြောင်းကြားချက်အရ “ပဲဆီနှင့် နှမ်းဆီဈေးကွက်တွင် အရောအနှောဆီများ လိမ်လည်ရောင်းချမှု မြင့်တက်လာ”ဟူသည့် သတင်းဖော်ပြချက်အပေါ်  ၂၀၂၆ခုနှစ်၊ စက်တင်ဘာလ ၂၅ရက်နေ့ နံနက် (၀၈း၀၀) နာရီအချိန်တွင် စစ်ကိုင်းမြို့ပေါ်ရှိ စားသုံးဆီအရောင်းဆိုင်(၆)ဆိုင်သို့ ကွင်းဆင်းစိစစ်ခဲ့ရာတွင် လက်ရှိဈေးကွက်အတွင်း ရောင်းချလျက်ရှိသည့် စားသုံးဆီဆိုင်များအနေဖြင့် ပဲဆီသန့်၊ နှမ်းဆီသန့်၊ နှမ်းဖြူဆီနှင့် ပဲပိစပ်ဆီများသာ အများဆုံးရောင်းချလျက်ရှိပြီး အရောအနှောဆီများ ရောင်းချမှုမရှိကြောင်း စိစစ်တွေ့ရှိရကြောင်း သိရှိရပါသည်။

         ဈေးကွက်အတွင်း  ရောင်းချနေသော တစ်ပိဿာဈေးနှုန်းများအနေဖြင့် ဒေသတွင်းဆီစက်များမှ ကြိတ်ခွဲထုတ်လုပ်သည့် ပဲဆီသန့် (၂၃၀၀ဝိ/-)၊ ရွှေတောင်ပဲဆီ(၂၂၀၀ဝိ/-)၊ နှမ်းဆီ(၂၀၀၀ဝိ/- မှ၂၁၀၀ဝိ/-)၊နှမ်းဖြူဆီ (၂၁၀၀ဝိ/-)နှင့် ပဲပိစပ်ဆီ(၂၁၀၀ဝိ/-)ဖြင့် ရောင်းချလျက်ရှိကြောင်း တွေ့ရှိရပါသည်။

DOCA(စစ်ကိုင်း)

      (၂၅.၉.၂၀၂၆) ရက်နေ့တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကလေးခရိုင်ဦးစီးမှူးရုံးမှ ဒေါ်သန်းသန်းဝင်း ( ခရိုင်ဦးစီးမှူး ) မှ ဦးဆောင်၍ ဝန်ထမ်း ( ၂ ) ဦးနှင့် စည်ပင်သာယာရေးကော်မတီတို့ ပူးပေါင်း၍ ကလေးမြို့ပေါ်ရှိ စားသုံးဆီရောင်းချသည့် ဆီဆိုင်များတွင် ပဲဆီနှင့် နှမ်းဆီများကို ဈေးကွက်အတွင်း  ရောနှော၍ လိမ်လည်ရောင်းချမှုများ ရှိ/ မရှိကို ကွင်းဆင်းစစ်ဆေးခဲ့ကြောင်း သိရပါသည်။

      ကွင်းဆင်းစစ်ဆေးရာတွင် ပြည်တွင်းဆီဈေးကွက်အတွင်း မြေပဲဆီနှင့် နှမ်းဆီစားသုံးမှု မြင့်တက်လာသည့်အပေါ် အခွင့်ကောင်းယူပြီး နာမည်ရရှိပြီးသော အမှတ်တံဆိပ်အချို့အနေဖြင့် ဆီအရောအနှောများပြုလုပ်ရောင်းချနေသည့်အပေါ်တွင် စားသုံးသူပြည်သူများအနေဖြင့် မြေပဲဆီနှင့် နှမ်းဆီစစ်စစ်ထက် ရှောနှောဆီများကြောင့် ဆီချေးနံ့နံခြင်း၊ အနံ့မမွှေးခြင်းများကြောင့် နစ်နာဆုံးရှုံးမှုများ ဖြစ်ပေါ်သည့်အတွက် ကလေးမြို့ပေါ်ရှိ၊ အောင်မြေမာန်ရပ်ကွက်၊ အောင်ဇေယျ ရပ်ကွက်နှင့် သဇင်ရပ်ကွက်အတွင်းရှိ စားသုံးဆီရောင်းဆိုင်များတွင် ရောနှောဆီများ ရောင်းချမှု ရှိ/ မရှိကို ကွင်းဆင်းစစ်ဆေးခဲ့ကြပြီး စားသုံးဆီများရောင်းချရာတွင် မိမိရောင်းချသည့် အမှတ်တံဆိပ်ပေါ်တွင် ကပ်နှိပ်ထားသော ကုန်အညွှန်းအမှတ်အသားများတွင် ပင်ရင်းပါဝင်ပစ္စည်းကို အခြေခံသော ကုန်စည်၏ အမျိုးအမည်ကို တိကျစွာ မြန်မာဘာသာဖြင့် ဖော်ပြထားရမည်ဖြစ်ပြီး အသားတင်ပမာဏနှင့် အရွယ်အစားတို့အား မြန်မာ့အလေးချိန်ယူနစ်ဖြစ်သော ပိဿာ၊ ကျပ်သား တို့ကို မြန်မာဘာသာဖြင့် ဖော်ပြပါရှိရသည့် စားသုံးဆီများကိုသာ ရောင်းချရန် ပညာပေးခဲ့ကြောင်း သိရှိရပါသည်။

DOCA(စစ်ကိုင်း)