HighLight News

            စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ပဲခူးတိုင်းဒေသကြီး ဦးစီးမှူးရုံးမှ စားသုံးသူရေးရာဌာနခွဲတာဝန်ခံ ဦးစိုးမိုး၊ ထုတ်ကုန်လုံခြုံစိတ်ချရမှု ဌာနခွဲတာဝန်ခံ ဦးကျော်ဆန်းဝင်း၊ ပဲခူးမြို့နယ်တာဝန်ခံ ဦးစိုးဝင်းနှင့်အဖွဲ့သည် (၁၉.၁၂.၂၀၂၄) ရက်နေ့၊ နံနက် (၀၉:၃၀) အချိန်တွင် ပဲခူးမြို့ပေါ်ရှိ စတိုးဆိုင်များ၊ ဈေးအတွင်းရှိ ကုန်စုံဆိုင်များ၊ မြို့ပေါ်ရှိ mart များသို့ သွားရောက်၍ အသားဟင်း၊ ငါးဟင်း စည်သွပ်ဗူးများပေါ်တွင် ကုန်အညွှန်းအမှတ်အသားကွဲလွဲမှုရှိ၊ မရှိ သွားရောက်စစ်ဆေးခဲ့ကြောင်း သိရှိရပါသည်။

           ထိုသို့ ကွင်းဆင်းစစ်ဆေးရာတွင် အသားဟင်း၊ ငါးဟင်းစည်သွပ်ဗူးများပေါ်တွင် ရိုက်နှိပ်ထားသော အညွှန်းဖော်ပြချက်များနှင့် စတစ်ကာကပ်၍ ဖော်ပြထားသည့် အညွှန်းဖော်ပြချက်များတူညီမှုရှိ၊ မရှိ ကွင်းဆင်းစစ်ဆေးခဲ့ပြီး ထုတ်ကုန်လုံခြုံစိတ်ချရမှု ဌာနခွဲတာဝန်ခံမှ လုပ်ငန်းရှင်များအား မိမိတို့ရောင်းချနေသော ကုန်ပစ္စည်းများတွင် ကုန်အညွှန်းပြည့်စုံမှန်ကန်စွာ ဖော်ပြထားရန်လိုအပ်ကြောင်း၊ စားသုံးသူကာကွယ်ရေး ဥပဒေပါ စီးပွားရေးလုပ်ငန်းရှင်များ၏ တာဝန်များကို ရှင်းလင်းဆွေးနွေးခဲ့ပြီး စီးပွားရေးလုပ်ငန်းရှင်များအနေဖြင့် သိရှိလိုသည်များရှိပါက Consumer Call Center 1535 သို့ ဆက်သွယ်မေးမြန်းနိုင်ကြောင်း  ပြောကြားခဲ့ပြီး စားသုံးသူကာကွယ်ရေး အသိပညာပေးလက်ကမ်းစာစောင်များ ဖြန့်ဝေခဲ့ကြောင်း သိရှိရပါသည်။

DOCA(ပဲခူး)

            ဧရာဝတီတိုင်းဒေသကြီး၊ မအူပင်ခရိုင်၊ ပန်းတနော်မြို့နယ် ပြန်ကြားရေးနှင့်ပြည်သူ့ ဆက်ဆံရေးဦးစီး ဌာန ၊ လူထု အခြေပြု ဗဟိုဌာနဖြစ်သော Community Centre ခန်းမတွင် ပြည်သူများ အသိပညာ ဗဟုသုတရရှိ စေရန် ရည်ရွယ်ပြီး မြို့နယ် ပြန်/ဆက်ဦးစီးဌာနနှင့် စားသုံးသူရေးရာဦးစီးဌာနတို့ ပူးပေါင်း ၍ အွန်လိုင်းမှတ်ပုံ တင်ခြင်းဆိုင်ရာ သိကောင်းစရာ အကြောင်းTalk Show ကို (၁၉-၁၂-၂၀၂၄)ရက်နေ့ နံနက် ၁၀ နာရီ တွင် ပြုလုပ်ခဲ့သည်။

          ရှေးဦးစွာ ပန်းတနော်မြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာန က အွန်လိုင်းမှတ်ပုံ တင်ခြင်းဆိုင်ရာ သိကောင်းစရာအကြောင်းကို ရှင်းလင်းဆွေးနွေးပေးပါရန်တင်ပြရာ စားသုံးသူရေးရာ ဦးစီးဌာန ပန်းတနော်မြို့နယ်တာဝန်ခံရုံးမှ ဦးအောင်ကျော်သက် မြို့နယ်တာဝန်ခံက  အရေးကြီးကုန်စည်နှင့် ဝန်ဆောင်မှု ဥပဒေနှင့် စပ်လျဉ်း၍ ဝန်ကြီးဌာနမှ သတ်မှတ်ထုတ်ပြန်ခဲ့ပြီး၊ အွန်လိုင်းစနစ်ဖြင့် ရောင်းချခြင်း(Online Sales)လုပ်ငန်းများ မှတ်ပုံတင်ခြင်းကို ၂၀၂၃ ခုနှစ် အောက်တိုဘာလ(၂)ရက်နေ့မှ စတင်၍ eComReg System (https://www.ecomreg.gov.mm)တွင် မှတ်ပုံတင်နိုင်ကြောင်းကို  ကျယ်ကျယ်ပြန့်ပြန့်လုပ်ဆောင်ခဲ့ပြီး အွန်လိုင်းစနစ်ဖြင့်ရောင်းချသူများ (Online Sales) မှတ်ပုံတင် နိုင်ရေး အသိပညာပေးခြင်းနှင့် eComReg System အကြောင်းများကို လည်းကောင်း၊ အွန်လိုင်း မှတ်ပုံတင်နိုင်ရန်အတွက် အွန်လိုင်းစနစ်ဖြင့်မှတ်ပုံတင်ခြင်းလုပ်ငန်းတွင် လိုအပ်သော မှတ်ပုံတင်ရာတွင် ပူးတွဲတင်ပြရ မည့်အချက်များ၊ မှတ်ပုံတင်မည့်သူများ သိရှိလိုက်နာရမည့် စည်းကမ်းချက်များ၊ အွန်လိုင်းစနစ်ဖြင့် ရောင်းချခြင်း(Online Sales)၊ လုပ်ငန်း မှတ်ပုံတင် (အသစ်)လျှောက်ထားရမည့် လုပ်ငန်းစဉ် အဆင့်ဆင့် များကို လုပ်ငန်းရှင်အား ရှင်းလင်းပြောပြခဲ့ပြီး လုပ်ငန်းရှင်တို့မှ မှတ်ပုံတင်လျှောက်ထားရာတွင် လုပ်ငန်းပိုင်ရှင်၏ နေရပ်လိပ်စာမှန်ကန်ကြောင်း ရပ်ကွက်ထောက်ခံချက်၊ လုပ်ငန်းတည်နေရာမှန်ကန်ပါကြောင်း ရပ်ကွက်ထောက်ခံချက်၊ လုပ်ငန်း ပိုင်ရှင်၏ အကျင့်စာရိတ္တကောင်းမွန်ကြောင်း ရဲစခန်းထောက်ခံချက်၊ လုပ်ငန််းပိုင်ရှင်၏ မှတ်ပုံတင် အရှေ့အနောက်ဓါတ်ပုံ၊ ပါတ်စပိုစ့်ဆိုဒ် ဓါတ်ပုံ၊ လုပ်ငန်း၏ Logo ပုံ တို့ဖြင့်အတူ မှတ်ပုံတင် Certificate ရယူပြီး စားသုံးသူရေးရာဦးစီးဌာနမှ မြေပြင်ကွင်းဆင်းစစ်ဆေးရာ မြေပြင်စစ်ဆေးခြင်းဆိုင်ရာ အချက်အလက်များကိုက်ညီပါက အွန်လိုင်းစနစ်ဖြင့် ကုန်စည်ရောင်းချခွင့်ကို ရောင်းချခွင့်ရရှိမည်ဖြစ်ကြောင်းကို ပြည်သူများသိရှိနိုင်ရန် ရှင်းလင်းဆွေးနွေးခဲ့ကြောင်း သိရှိရပါသည်။ 

DOCA(ဧရာဝတီ)

          ပုသိမ်ခရိုင်၊ ရေကြည်မြို့နယ်၊ ၁၈.၁၂.၂၀၂၄ ရက်နေ့၊ နံနက် (၁၀:၀၀) နာရီအချိန်တွင် မြို့နယ်အထွေထွေအုပ်ချုပ်ရေးဦးစီးဌာန ရေကြည်ခန်းမတွင် တိုင်းဒေသကြီးအသေးစားနှင့် အလတ်စား စက်မှုလက်မှုလုပ်ငန်းဌာနမှ ဒုတိယညွှန်ကြားရေးမှူးနှင့် အဖွဲ့သည် ရေကြည်မြို့နယ်အတွင်းရှိ ကြိမ်၊ ဝါး လက်မှုလုပ်ငန်းရှင်များနှင့်တွေ့ဆုံ၍ SMEsလုပ်ငန်းများ ဖွံ့ဖြိုးတိုးတတ်စေရေးနှင့် ကုန်ကြမ်းပြတ်လပ်မှုမရှိစေရေးနှင့် မိမိမြို့နယ်မှထွက်ရှိသော ကြိမ်၊ ဝါး အချောထည်များအား ပြည်တွင်းမှာသာမက ပြည်ပနိုင်ငံများနှင့် ချိတ်ဆက်ပြီး တင်ပို့နိုင်ရေးအတွက် လုပ်ငန်းရှင်များစုပေါင်း၍ ကုမ္ပဏီတည်ထောင်ပြီး ချိတ်ဆက်ဆောင်ရွက်ကြရန်၊ ခရီးသွားဧည့်သည်များဝင်ရောက်ကြည့်ရှုနိုင်ရန် ကားလမ်းမကြီးများဘေးတွင် အရောင်းပြခန်းများ ဖွင့်လှစ်ပြသရောင်းချခြင်းများ ဆောင်ရွက်ရန်နှင့် အဆင့်မြင့်နည်းပညာများတိုးတက်စေရေးအတွက် ဖွင့်လှစ်သင်ကြားပေးသော သင်တန်းများကို တက်ရောက်သင်ကြားနိုင်ရေး ချိတ်ဆက်ဆောင်ရွက်ပေးမည်ဖြစ်ကြောင်း သိရှိရပါသည်။

DOCA(ဧရာဝတီ)

          စားသုံးသူရေးရာဦးစီးဌာန၊ ဟင်္သာတမြို့နယ်ဦးစီးမှူးသည် (၁၉.၁၂.၂၀၂၄)ရက်နေ့ နေ့လယ် (၁၃:၃၀)အချိန်တွင် အထွေထွေအုပ်ချုပ်ရေးဦးစီးဌာန၊ ပြည်သူ့ကျန်းမာရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်အတူ ဟင်္သာတခရိုင်အတွင်းရှိသောက်ရေသန့်စက်ရုံများသို့ ကွင်းဆင်းစစ်ဆေး ခြင်းများဆောင်ရွက်ခဲ့ပါသည်။

         ထိုသို့ကွင်းဆင်းခဲ့ရာတွင်ပူး‌ပေါင်းအဖွဲ့သည် ပုဂ္ဂလိကရေသန့်စက်ရုံများအနေဖြင့် သက်ဆိုင်ရာဝန်ကြီးဌာနများ၏ ထောက်ခံချက်များရှိ/ မရှိစစ်ဆေးခြင်း၊ စက်ရုံပတ်ဝန်းကျင်အခြေအနေ၊ ကုန်ကြမ်း၊ ကုန်ချောထားရှိမှုအခြေအနေ၊ ရေသန့်များထုတ်လုပ်ရာတွင် အရည်အသွေးပြည့်ဝအောင် ထုတ်လုပ်သွားရန်မှာကြားခဲ့ပြီး၊ စားသုံးသူရေးရာဦးစီးဌာန၊ မြို့နယ်ဦးစီးမှူးက စားသုံးသူမိဘပြည်သူများ ဘေးအန္တရာယ်ကင်းရှင်းစွာ အသုံးပြုနိုင်စေရန်၊  ထုတ်ကုန်များလုံခြုံစိတ်ချရမှုရှိစေရန်၊  သောက်ရေသန့်ဘူး ပေါ်တွင် ကုန်စည်၏ အမျိုးအမည်၊ အသားတင်ပမာဏ၊ ထားသိုသိမ်းဆည်းမှုအညွှန်းများအား မြန်မာဘာသာဖြင့်ဖော်ပြရန်နှင့်  ကုန်စည်များပေါ်တွင် ကုန်စည်အမျိုးအစားကိုလိုက်၍ ကုန်အညွှန်းအမှတ်အသားများ ပြည့်စုံမှန်ကန်စွာဖော်ပြခြင်းရှိ/ မရှိ တို့ကိုစစ်ဆေးခဲ့ပြီး၊ စက်ရုံအတွင်း/ အပြင်၌ သန့်ရှင်းရေးနှင့် ရေစီးရေလာကောင်းမွန်စေရန်၊ သတ်မှတ်အရည်အသွေးပြည့်မီသော ကုန်စည်များကိုသာရောင်းချ ရန်၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များအကြောင်း၊ တားမြစ်ချက်များ အကြောင်းနှင့် ပြစ်မှုပြစ်ဒဏ်များအကြောင်း စသည်တို့ကို အသိပညာပေးဆွေးနွေးခဲ့ပြီး၊ ဈေးကွက်စောင့်ကြည့်စစ်ဆေးခြင်း များဆောင်ရွက်ခဲ့ကြကြောင်းသိရှိရပါသည်။

DOCA(ဧရာဝတီ)

           စားသုံးသူရေးရာဦးစီးဌာန၊ကြံခင်းမြို့နယ်တာဝန်ခံသည်(၁၇.၁၂.၂၀၂၄)ရက်နေ့ နံနက်(၀၉:၀၀) နာရီအချိန်တွင် မြို့နယ်တရားမဝင်ကုန်သွယ်မှု တိုက်ဖျက်ရေးအဖွဲ့ဝင်များနှင့်ပူးပေါင်း၍ ကြံခင်းမြို့ ရွာသစ်ရပ်ကွက်ရှိ ဆန်စက်များနှင့် ဆန်သိုလှောင်ရုံများအား တရားမဝင်သိုလှောင်ထားခြင်းရှိ/ မရှိနှင့်  ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြောင်းသိရသည်။

           ထိုသို့ကွင်းဆင်းရာတွင် ဆန်စက်များရှိ သိုလှောင်ရုံများအား မြို့နယ်တရားမဝင်ကုန်သွယ်မှု တိုက်ဖျက်ရေးအဖွဲ့မှ စစ်ဆေးခဲ့ရာ သိုလှောင်ရုံအတွင်း စပါး/ ဆန်တည်ရှိမှုအခြေအနေအရ ရာသီချိန်တွင် ပုံမှန်ဝယ်ယူ ကြိတ်ခွဲထုတ်လုပ်လျက်ရှိကြောင်းတွေ့ရှိရပါသည်။ စားသုံးသူရေးရာဦးစီးဌာန၊ ကြံခင်းမြို့နယ်တာဝန်ခံ ဦးကျော်နိုင်ဝင်းက မြန်မာနိုင်ငံဆန်စပါးအသင်းချုပ် MRFမှလအလိုက် ထုတ်ပြန်ပေးသော သင့်တင့်မျှတသော ဈေးကွက်ဈေးနှုန်းဖြင့် ဆန်များဖြန့်ဖြူးရောင်းချနိုင်ရေးကို ကြော်ငြာချက်ပါ ဆန်ဈေးနှုန်းများအလိုက် ရောင်းချနိုင်စေရေး၊ သတ်မှတ်ရည်ညွှန်းဈေးထက်ကျော်လွန် ရောင်းချခြင်းမဖြစ်စေရေး၊ ဈေးကွက်အတွင်း ကုန်စည်များပြတ်လပ်မှုမရှိစေရေးတို့ကို စစ်ဆေးခဲ့ပြီး၊ မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ကြော်ငြာထားသော ညွှန်းကြားချက်အမှတ် (၂/၂၀၁၉) နှင့်အညီ မြန်မာဘာသာဖြင့် ပြည်စုံစွာဖော်ပြထားသော ကုန်စည်များကိုသာ ရောင်းချရန်နှင့် စီးပွားရေးလုပ်ငန်းရှင်များအနေဖြင့် ထုတ်ပြန်ထားသောညွှန်ကြားချက်များအတိုင်းလိုက်နာဆောင်ရွက်ရန်၊ ကုန်စည်နှင့်စပ်လျဉ်း၍ အာမခံချက်ပေးရာတွင် စားသုံးသူများစိတ်ကျေနပ်မှုရှိစေရေးနှင့် သတ်မှတ်အရည်အသွေးပြည့်မီသော ကုန်စည်များကိုသာရောင်းချရန်၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များအကြောင်း၊ တားမြစ်ချက်များ အကြောင်းနှင့် ပြစ်မှုပြစ်ဒဏ်များအကြောင်း စသည့်တို့ကို အသိပညာပေးဆွေးနွေးခဲ့ပြီး ကွင်းဆင်းစစ်ဆေးခဲ့ကြကြောင်း သိရှိရပါသည်။

DOCA(ဧရာဝတီ)