HighLight News

        MyRO တွင် မှတ်ပုံတင်ထားသော သိုလှောင်ရုံများ သက်တမ်းတစ်နှစ်ပြည့်မြောက်ပြီးပါက သက်တမ်းပြန်လည်တိုးနိုင်ရေးနှင့် www.myro.com.mmတွင် လစဉ်လဆန်း(၁)ရက်နေ့မှ(၁၀)ရက်နေ့ အတွင်း သိုလှောင်ရုံလုပ်ငန်းရှင်များအနေဖြင့် မိမိတို့သိုလှောင်ရုံများ၏ ကုန်ရ/ကုန်ထုတ်/ကုန် လက်ကျန်စာရင်းများကို ထည့်သွင်းပေးနိုင်ရေး ကျောက်ပန်းတောင်းမြို့နယ်တာဝန်ခံရုံးအနေဖြင့် ကြပ်မတ်ဆောင်ရွက်လျက်ရှိရာ ၂၀.၁.၂၀၂၆ ရက်နေ့၊ နံနက် ၁၀:၀၀ နာရီတွင် မြို့နယ်တာဝန်ခံရုံးတွင် မြို့နယ်တာဝန်ခံနှင့် My RO လုပ်ငန်းရှင်(၁၁)ဦးတို့ တွေ့ဆုံဆွေးနွေးခဲ့ပါသည်။

            ကျောက်ပန်းတောင်းမြို့နယ်တွင် လက်ရှိအချိန်ထိ (My RO)တွင် မှတ်ပုံတင်ထားသော ဆန်သိုလှောင်ရုံ အလုံးရေ(၁၇)လုံးရှိပြီး တစ်နှစ်ပြည့်မြောက်ပြီးသည့် ဆန်သိုလှောင်ရုံများအတွက် သက်တမ်း တိုးဆောင်ရွက်နိုင်ရေးလုပ်ငန်းစဉ်များအား သက်တမ်းတိုးလျှောက်ထားမှုလုပ်ငန်းစဉ် အဆင့်ဆင့်နှင့် လစဉ်လဆန်း(၁)ရက်နေ့မှ(၇)ရက်နေ့အတွင်း သိုလှောင်ရုံများ၏ ကုန်ရ/ ကုန်ထုတ်/ ကုန်လက်ကျန်အခြေအနေများအား ထည့်သွင်းပေးရန် ရှင်းလင်းဆွေးနွေး၍ မှတ်ပုံတင်သက်တမ်း တိုးခြင်းနှင့် ရထုတ်ကုန်စာရင်များရေးသွင်းခြင်းအား ကူညီဆောင်ရွက်ပေးလျက်ရှိရာ ယခုအခါတွင် လုပ်ငန်းရှင်များလည်း သိရှိနားလည်လာပြီး ရထုတ်ကျန်စာရင်းရေးသွင်းခြင်းလုပ်ငန်းရှင်ဦးရေး တိုးတက်လာပြီဖြစ်ကြောင်း ဆွေးနွေးပြောကြားခဲ့ကြောင်း သိရှိရပါသည်။

DOCA(မန္တလေး)

          စီးပွားရေးနှင့် ကူးသန်းရောင်းဝယ်‌ရေးဝန်ကြီးဌာန၊ စားသုံးသူရေးရာဦးစီးဌာန၊ ကျောက်ဆည်ခရိုင်ရုံးအနေဖြင့် ထုတ်ကုန်များလုံခြုံစိတ်ချရမှုရှိစေရေး၊ကုန်စည်များတွင် ကုန်အညွှန်းအမှတ်အသား များပြည့်စုံစွာထည့်သွင်းဖော်ပြထားခြင်းရှိ/ မရှိ၊ စားသုံးသူများနေ့စဉ် အသုံးပြုလျက်ရှိသည့် ကုန်စည်နှင့် ဝန်ဆောင်မှုများ ဘေးအန္တရာယ်ကင်းရှင်းပြီး လုံခြုံစိတ်ချရမှုရှိစေရေး၊ကုန်စည်များကိုသတ်မှတ် စံချိန်စံညွှန်းများ၊ ညွှန်ကြားချက်များနှင့် ကိုက်ညီမှုရှိ/ မရှိ စျေးကွက်စောင့်ကြည့်စစ်ဆေးခြင်းလုပ်ငန်းကို စဉ်ဆက်မပြတ် ဆောင်ရွက်လျက်ရှိပါသည်။ ကျောက်ဆည်ခရိုင်၊ စားသုံးသူရေးရာဦးစီးဌာနမှ စစ်ဆေးရေးအရာရှိများသည် ဇန်နဝါရီလ (၂၇)ရက်နေ့တွင် မြို့နယ်စည်ပင်သာယာရေးအဖွဲ့၊ ကျန်းမာရေးဦးစီးဌာနတို့နှင့် ပူးပေါင်း၍ ကျောက်ဆည်မြို့ရှိ မုန့်တီရောင်းချသည့် ဆိုင်များအား မုန့်တီများအား  အသင့်စားထုတ်ပိုးရောင်းချမှုရှိ/မရှိနှင့် စားသုံးသူများ ဘေးအန္တရာယ်ကင်းရှင်းမှုရှိ/ မရှိ ပူးပေါင်းအဖွဲ့ဖြင့် ကွင်းဆင်းစစ်ဆေးခဲ့ပါသည်။ ထိုသို့စစ်ဆေးရာတွင် ကျောက်ဆည်ခရိုင် ၊ စားသုံးသူရေးရာဦးစီးဌာနမှ ဦး‌ဇော်မော်ထွန်း (ဒု-ဦးစီးမှူး)က ရှင်းလင်းပြောကြားရာတွင် မုန့်တီများ ရောင်းချသည့်လုပ်ငန်းရှင်များအနေဖြင့် မိမိတို့ထုတ်လုပ်သည့်နေရာများ သန့်ရှင်းသပ်ရပ်မှုရှိစေရန်နှင့် ထုတ်လုပ်သည့်ကုန်စည်များသည် စားသုံးသည့်သူများအတွက် ဘေးအန္တရာယ်ကင်းရှင်းစေရန် အဓိကထားပြုလုပ်ရောင်းချသွားရန် နှင့် မြန်မာနိုင်ငံစားသုံးသူကာကွယ်ရေးကော်မရှင် ညွှန်ကြားချက်အမှတ် (၂/၂၀၁၉) နှင့်  စားသုံးသူကာကွယ်ရေး ဥပဒေ အခန်း ၁၈ ပါ စီးပွား‌‌ရေးလုပ်ငန်းရှင်များ လိုက်နာရမည့် ကုန်အညွှန်းအမှတ်အသားဖော်ပြခြင်းနှင့် ပတ်သက်၍ ပုဒ်မ(၄၁)ပါ အချက်အလက်များအား ရှင်းလင်းဆွေးနွေးခြင်းနှင့် ၄င်းအချက်အလက်များမှ ပုဒ်မ(ခ)ရှိ ကုန်စည်၏ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်းနှင့် ပုဒ်မ(ဆ)ရှိ ကျန်းမာရေးဆိုင်ရာ ဘေးထွက်ဆိုးကျိုး သို့မဟုတ် ဓါတ်မတည့်ကြောင်းဖော်ပြချက်နှင့် ကြိုတင်သတိပေးချက်တို့အား မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့) တစ်ခုထက် ပို၍ပြည့်စုံစွာဖော်ပြရမည်ဖြစ်ပြီး စီးပွားရေးလုပ်ငန်းရှင်များဘက်မှလည်း ကုန်စည်အမျိုးအစားအလိုက် သတ်မှတ်ထားသည့် ဥပဒေညွှန်ကြားချက်များအား လိုက်နာဆောင်ရွက်သွားကြရန် ပြောကြားခဲ့ကြောင်း သတင်းရရှိပါသည်။

DOCA(မန္တလေး)

         စိမ်းစားဥသည် ရာသီဥတုအမျိုးမျိုးကို ခံနိုင်ရည်ရှိပြီး မျှတသောအပူချိန်နှင့် မိုးရေချိန် အသင့်အတင့်လိုအပ်ပြီး ရေဝင်ရေထွက်ကောင်းသော သဲနှုန်းမြေတွင် ကောင်းစွာစိုက်ပျိုးနိုင်သော သီးနှံဖြစ်ပါသည်။ စိမ်းစားဥစိုက်ပျိုးရာတွင် မျိုးစေ့ကိုအနက် ၂-၃လက်မခန့်ချပြီး ကြွက်မြီးတန်း စိုက်ပျိုးရကြောင်း၊ စိမ်းစားဥကို နယုန်၊ ဝါဆိုလတွင် စတင်စိုက်ပျိုးပြီး တန်ဆောင်မုန်း လဆန်း လောက်တွင် စတင်တူးဖော်ရောင်းချနိုင်ကြောင်း၊ အပင်အပြုစုကောင်းပါက တပို့တွဲ၊ တပေါင်းလအထိ တူးဖော်ရောင်းချနိုင်ကြောင်း၊ စိမ်းစားဥကို ရွာငံဒေသများတွင် အများဆုံးစိုက်ပျိုးလျက်ရှိပါသည်။ စိမ်းစားဥ တစ်ဧကစိုက်လျှင် ပိဿာ (၃၀၀၀ မှ ၅၀၀၀)ခန့်အထိထွက်ရှိကြောင်း၊ ယခင်လတွင် စိမ်းစားဥ တစ်ပိဿာလျှင် (၅၀၀၀/-)ကျပ်နှုန်းဖြင့်ရောင်းချရပြီး ယခုလတွင် စိမ်းစားဥ တစ်ပိဿာလျှင် (၂၀၀၀/-)ကျပ်နှုန်းဖြင့် ရောင်းဝယ်လျက်ရှိကြောင်း၊ စိမ်းစားဥများ ဖြိုင်ဖြိုင် ဝင်ရောက်လျက်ရှိသောကြောင့် ယခင်လထက် ဈေးနှုန်းကျဆင်းလျက်ရှိကြောင်း၊ စိမ်းစားဥကို ဆောင်းရာသီစာ စားစရာတစ်မျိုးဖြစ်ပြီး စားလိုက်လျှင် ချိုချိုကြွပ်ကြွပ်လေးနှင့် ရင်ထဲအေးမြစေပါသည်။ စိမ်းစားဥကို သင့်တင့်အောင် စားသုံးခြင်းဖြင့် ဆီးချိုသွေးချိုရောဂါများကို ကာကွယ်ပေးရုံသာမက ခံတွင်းကိုလည်း ကောင်းမွန်စေပြီး ကျန်းမာရေးအကျိုးကျေးဇူးများရရှိသဖြင့် စားသုံးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

          မန္တလေးတိုင်းဒေသကြီး၊ပြင်ဦးလွင်မြို့၊မြို့တော်ခန်းမ၌ (၂၀-၁-၂၀၂၆)ရက်နေ့တွင် ခရိုင်/ မြို့နယ် စီမံခန့်ခွဲရေးနှင့် အုပ်ချုပ်ရေးကော်မတီမှကြီးမှူး၍ မြို့နယ်အတွင်းရှိ ခရိုင်/ မြို့နယ် ဌာနဆိုင်ရာများ၊ ရပ်ကွက်/ ကျေးရွာအုပ်ချုပ်ရေးမှူးများ၊ အိမ်ခြံမြေရောင်းဝယ်နေသော အသင်းအဖွဲ့များအားခေါ်ယူ၍ အသိပညာပေးဆွေးနွေးပွဲ အခမ်းအနားကျင်းပပြုလုပ်ခဲ့ပါသည်။ အဆိုပါအခမ်းအနား၌ ခရိုင်စီမံခန့်ခွဲရေးနှင့်အုပ်ချုပ်ရေးကော်မတီဥက္ကဌ ဦးရဲထူးမှ Social Mediaများပေါ်တွင် တရားမဝင် မြေယာရောင်းချမှုများအပေါ် ထိန်းသိမ်းကြပ်မတ်နိုင်ရေးအတွက် ခေါ်ယူဆွေးနွေးရခြင်းဖြစ်ကြောင်း၊ ထိုသို့ ပြုလုပ်ရာတွင် အများပြည်သူများ စိတ်ဝင်စားမှုမြင့်မားလာမှုအပေါ် အခွင့်ကောင်းယူပြီး စီးပွား‌ရေးသမားများမှ တရားဝင်ရောင်းချပိုင်ခွင့်မရှိသော မြေလွတ်၊ မြေရိုင်း၊ သစ်တောမြေအပါအဝင် ရွာနယ်နိမိတ်နှင့် ဆက်စပ်နေသော စိုက်ပျိုးမြေများကို စည်းကမ်းမဲ့စွာ အကွက်ရိုက်ပြီး Social Media များအပါအဝင် နည်းလမ်းမျိုးစုံဖြင့် လိမ်လည်ရောင်းချနေမှုများကြောင့် ဝယ်ယူမိသော ပြည်သူများမှ ထိခိုက်နစ်နာမှုများရှိလာပါကြောင်း၊ ဥပဒေနှင့်မညီသည့် မြေယာကျူးကျော်မှု၊ အကွက်ရိုက်မှုများကို ကိုင်တွယ်ဖြေရှင်းသည့်အခါ အများပြည်သူထိခိုက်မှုအနည်းဆုံးဖြစ်စေရန်၊ ထိရောက်သည့်ဟန့်တားမှုနှင့် ဥပဒေနှင့်အညီဖြစ်စေရန် အခက်အခဲများစွာရင်ဆိုင်ရပါကြောင်း၊ ပြည်သူတွေဘက်ကလည်း နိုင်ငံတော်မှပြဌာန်းထားသော ဥပဒေများကို လိုက်နာစောင့်ထိန်းရန်တာဝန်ရှိပါကြောင်း၊ တစ်ပါးသူ မထိခိုက်စေရေး ကိုယ်ချင်းစာတရားထားဖို့ လိုအပ်ပါကြောင်း၊ မိဘပြည်သူများအနေနှင့်လည်း ပူးပေါင်းပါဝင်ပြီး စုပေါင်းဝိုင်းဝန်း  ထိန်းသိမ်းပေးကြဖို့ လိုအပ်ပါကြောင်းပြောကြားခဲ့ပြီး ဆက်လက်၍ စားသုံးသူရေးရာဦးစီးဌာန၊ ပြင်ဦးလွင်ခရိုင်တာဝန်ခံ ဦးသက်လွင်ထူးက ဆွေးနွေးရာတွင် ယခု Social Media များဖြစ်သော Facebook ၊ Tik Tok ၊ You tube ၊ Telegram များ၌ မြေယာရောင်းဝယ်ခြင်းနှင့် ပတ်သက်၍ Online Sale မှတ်ပုံတင်ထားရှိရန်လိုအပ်ပါကြောင်း၊ Online ရောင်းချခြင်းလုပ်ငန်းကို အရေးကြီးဝန်ဆောင်မှုလုပ်ငန်းအဖြစ်(၂၁-၇-၂၀၂၃)ရက်နေ့၊ အမိန့်ကြော်ငြာ စာအမှတ်၊ ၅၀/၂၀၂၃ ဖြင့် ထုတ်ပြန်ပြီးဖြစ်ပါကြောင်း၊ ထုတ်ပြန်ပြီး (၆)လ ပြည့်သည့် နေ့ရက်မှ စတင်၍ မှတ်ပုံတင်လက်မှတ်မရှိဘဲ Online စနစ်ဖြင့် ရောင်းချခြင်းလုပ်ငန်းကို လုပ်ကိုင်ဆောင်ရွက် ကြောင်းတွေ့ရှိပါက အရေးကြီးကုန်စည်နှင့်ဝန်ဆောင်မှုဥပဒေ ပုဒ်မ ၅ အရ အရေးယူခံရမည်ဖြစ်ပြီး ပြစ်မှုထင်ရှားစီရင်ခြင်းခံရလျှင် အနည်းဆုံး ထောင်ဒဏ်(၆)လ မှ (၃)နှစ်အထိ ချမှတ်ခံရမည့်အပြင် ကျပ်(၅)သိန်း ထက်မပိုသော ငွေဒဏ်လည်းချမှတ်ခြင်းခံရမည်ဖြစ်ကြောင်း၊ စားသုံးသူကာကွယ်ရေး ဥပဒေ ကို ၂၀၁၉ ခုနှစ်၊ မတ်လ(၁၅)ရက်နေ့တွင် ပြည်ထောင်စုလွှတ်တော် ဥပဒေအမှတ်(၉)ဖြင့် ပြဌာန်းခဲ့ပြီးဖြစ်ပါကြောင်း၊ ဥပဒေတွင် စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင် များ၏တာဝန်များ၊ အခန်း(၂၃)ပါ တားမြစ်ချက်များ၊ မည်သူမဆို ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ မဟုတ်မမှန်သော သတင်းအချက်အလက်များပါဝင်သည့် ကြော်ငြာများကြောင့် စားသုံးသူနစ်နာဆုံးရှုံးမှုရှိ၍ တိုင်ကြားလာပါက စားသုံးသူကာကွယ်ရေးဥပဒေပါ ပြဌာန်းချက်များနှင့် အရေးယူဆောင်ရွက်ခံရမည်ဖြစ်ပါကြောင်း အသိပညာပေးဟောပြောဆွေးနွေးခဲ့ပြီး အဆိုပါဆွေးနွေးပွဲသို့   ခရိုင်/ မြို့နယ် ဌာနဆိုင်ရာများ၊ ရပ်ကွက်/ ကျေးရွာအုပ်ချုပ်ရေးမှူးများ၊ အိမ်ခြံမြေရောင်းဝယ်နေသော အသင်းအဖွဲ့များ  စုစုပေါင်း(၃၅၀)ဦး တက်ရောက်ခဲ့ကြောင်း သတင်းရရှိပါသည်။

DOCA(မန္တလေး)

           မန္တလေးတိုင်းဒေသကြီး၊ ကျောက်ဆည်ခရိုင်၊ စားသုံးသူရေးရာဦးစီးဌာနမှ စစ်ဆေးရေးအရာရှိများသည် ဇန်နဝါရီလ(၂၁)ရက်နေ့တွင် စဉ့်ကိုင်မြို့နယ်၊ ပလိပ်မြို့ရှိ မိဘဂုဏ်ရောင် ကုန်စုံဆိုင်နှင့်‌ ရွှေမိတ်ဆုံကုန်စုံဆိုင်များအား ထုတ်ကုန်များ လုံခြုံစိတ်ချရမှုရှိစေရန်နှင့် ကုန်အညွှန်းအမှတ်အသားတံဆိပ်များ ပြည့်စုံစွာပါဝင်မှုရှိစေရေးအတွက်စျေးကွက်စောင့်ကြည့် စစ်ဆေးခြင်းလုပ်ငန်းကိုမြို့နယ်စည်ပင်သာယာရေးအဖွဲ့နှင့် ပူးပေါင်းပြီး ဈေးကွက်စောင့်ကြည့် စစ်ဆေးခဲ့ပါသည်။ ထိုသို့စစ်ဆေးရာတွင် စတိုးဆိုင်နှင့် ကုန်စုံဆိုင်များအား မြန်မာနိုင်ငံ စားသုံးသူကာကွယ်ရေးကော်မရှင်ညွှန်ကြားချက်အမှတ်(၂/၂၀၁၉)နှင့်  စားသုံးသူကာကွယ်ရေး ဥပဒေ အခန်း ၁၈ ပါ စီးပွား‌‌ရေးလုပ်ငန်းရှင်များ လိုက်နာရမည့် ကုန်အညွှန်းအမှတ်အသားဖော်ပြခြင်းနှင့် ပတ်သက်၍ ပုဒ်မ(၄၁)ပါ အချက်အလက်များအား ရှင်းလင်းဆွေးနွေးခြင်းနှင့် ၄င်းအချက် အလက်များမှ ပုဒ်မ(ခ)ရှိ ကုန်စည်၏ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်းနှင့် ပုဒ်မ(ဆ)ရှိ ကျန်းမာရေးဆိုင်ရာ ဘေးထွက်ဆိုးကျိုး သို့မဟုတ် ဓါတ်မတည့်ကြောင်းဖော်ပြချက်နှင့် ကြိုတင်သတိပေးချက်တို့အား မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာ တစ်ခု(သို့)တစ်ခုထက် ပို၍ပြည့်စုံစွာ ဖော်ပြရမည်ဖြစ်ပြီး စီးပွားရေးလုပ်ငန်းရှင်များဘက်မှ လည်းကုန်စည်အမျိုးအစားအလိုက် သတ်မှတ်ထားသည့် ဥပဒေ ညွှန်ကြားချက်များအား လိုက်နာဆောင်ရွက်သွားကြရန် ပြောကြားခဲ့ကြောင်း သတင်းရရှိပါသည်။

DOCA(မန္တလေး)