HighLight News

        ၂၀၂၆ ခုနှစ်၊ ဇူလိုင်လ ၁၆ ရက်နေ့၊နံနက်(၁၀:၀၀)နာရီအချိန်တွင် စားသုံးသူရေးရာဦးစီးဌာမှ ၀န်ထမ်းများကစားသုံးသူများ ဘေးအန္တရာယ်ကင်းရှင်း၍ အရည်အသွေးပြည့်မီသော အစားအသောက်များကို ဝယ်ယူစားသုံးနိုင်စေရန်ရည်ရွယ်၍ ဒေးဒရဲမြို့နယ်အတွင်းရှိ မုန့်မျိုးစုံအရောင်းဆိုင်များသို့ ကွင်းဆင်းစစ်ဆေးခဲ့ကြောင်း သိရသည်။
   အဆိုပါကွင်းဆင်းစစ်ဆေးမှုတွင် စားသုံးသူရေးရာဦးစီးဌာနမှတာဝန်ရှိသူများက မုန့်နှင့် စားသောက်ကုန်များတွင် မြန်မာဘာသာဖြင့် ကုန်အညွှန်းအမှတ်အသားများ ပြည့်စုံစွာဖော်ပြထားခြင်း ရှိ/ မရှိ၊ ထုတ်လုပ်သည့်ရက်စွဲ၊ ကုန်ဆုံးရက်စွဲများကို မှန်ကန်စွာဖော်ပြထားခြင်း ရှိ/ မရှိ၊ သက်တမ်းလွန် စားသောက်ကုန်များရောင်းချခြင်း ရှိ/ မရှိ၊ ထုတ်ပိုးမှုအခြေအနေ၊ သိုလှောင်ထားရှိပုံနှင့် အစားအသောက် ဘေးကင်းလုံခြုံရေးဆိုင်ရာ သတ်မှတ်ချက်များနှင့် ကိုက်ညီမှု ရှိ/ မရှိတို့ကို အသေးစိတ် စစ်ဆေးခဲ့သည်။ ထို့အပြင် စားသုံးသူကာကွယ်ရေးဥပဒေနှင့်အညီ လိုက်နာဆောင်ရွက်ရန်၊ ကုန်အညွှန်းအမှတ်အသားများကို ပြည့်စုံမှန်ကန်စွာဖော်ပြရန်နှင့် စားသုံးသူများ၏ကျန်းမာရေးကိုအလေးထား၍ သက်တမ်းလွန်ကုန်ပစ္စည်းများ ရောင်းချခြင်းမပြုရန် ဆိုင်ရှင်များအား အသိပညာပေး ဆွေးနွေးမှာကြားခဲ့ကြောင်း သိရှိရပါသည်။

DOCA(ဧရာဝတီ)

       ဖျာပုံခရိုင်၊ ဒေးဒရဲမြို့နယ်စားသုံးသူရေးရာဦးစီးဌာနမှ  မြို့နယ်တာ၀န်ခံနှင့်၀န်ထမ်းတို့သည် (၁၉-၇-၂၀၂၆)ရက်နေ့၊ နံနက်(၀၉:၀၀)နာရီအချိန်တွင်အ‌ထွေထွေအုပ်ချုပ်ရေးဦးစီးဌာနဦးဆောင်၍ ဒေးဒရဲမြို့ တံတားချဉ်းကပ်လမ်းတွင် စက်သုံးဆီရောင်းချလျက်ရှိသည့် "ရတနာကောင်းကင်" စက်သုံးဆီ အရောင်းဆိုင်သို့သွားရောက်၍ ကွင်းဆင်းစစ်ဆေးခြင်းလုပ်ငန်းအား ဆောင်ရွက်ခဲ့ကြောင်း သိရသည်။
        ထိုသို့စစ်ဆေးခြင်း ဆောင်ရွက်ရာတွင် စစ်ဆေးရေးအဖွဲ့ဝင်များသည် "ရတနာကောင်းကင်" စက်သုံးဆီအရောင်းဆိုင်၏ စက်သုံးဆီရောင်းချမှုအခြေအနေများ၊ စက်သုံးဆီဈေးနှုန်း၊ စက်သုံးဆီအရည်အသွေး၊ အချင်အတွယ်မှန်ကန်မှု ရှိ/ မရှိ၊ ဆီကားရောက်ရှိမှုအခြေအနေများနှင့် ဆီလက်ကျန် အခြေအနေများအား စစ်ဆေးမေးမြန်းခြင်း ဆောင်ရွက်ခဲ့ပြီး စက်သုံးဆီရောင်းချသည့် လုပ်ငန်းရှင်နှင့် တွေ့ဆုံကာ မြို့နယ်အတွင်းစက်သုံးဆီပြတ်လပ်မှုမရှိစေရေး၊ စက်သုံးဆီဈေးနှုန်း အဆမတန်မြှင့်တင် ရောင်းချမှုများမရှိစေရေးနှင့် ဖြစ်သင့်ဖြစ်ထိုက်သောဈေးနှုန်းဖြင့် ရောင်းချရေး ဆွေးနွေးမှာကြားခြင်းများ ဆောင်ရွက်ခဲ့ကြောင်း သိရှိရပါသည်။

DOCA(ဧရာဝတီ)

        (၁၇-၇-၂၀၂၆) ရက်နေ့ နံနက်(၉)နာရီအချိန်တွင် ဓနုဖြူမြို့နယ်ရှိ စားအုန်းဆီလက်လီအရောင်းဆိုင်ဖြစ်သော ချမ်းမြေ့ကုန်စုံဆိုင်၊ ဒေါ်အေးကုန်စုံဆိုင်၊ ဦးအောင်သန်းကုန်စုံဆိုင်၊ စိန်နှင်းဆီ ကုန်စုံဆိုင်တို့အား မြို့နယ်စားသုံးသူရေးရာဦးစီးဌာနမှ တာဝန်ရှိသူများက ကွင်းဆင်းစစ်ဆေးခဲ့ကြောင်း သိရသည်။

         ကွင်းဆင်းစစ်ဆေးရာတွင် စားအုန်းဆီများကို သတ်မှတ်ရည်ညွှန်းဈေးနှုန်းအတိုင်း ရောင်းချခြင်းရှိ/ မရှိ၊ နေ့စဉ်ရရှိသည့် စားအုန်းဆီခွဲတမ်းများကို ပြည်သူများထံ စနစ်တကျဖြန့်ဖြူးရောင်းချခြင်း ရှိ/ မရှိ၊ ရောင်းချမှုမှတ်တမ်းများနှင့် လက်ကျန်ပမာဏများကို စနစ်တကျထားရှိခြင်း ရှိ/ မရှိ စားဆီဖြန့်ခွဲရောင်းချရာတွင် မှန်(၆)မှန်ဖြင့် ဆောင်ရွက်ခြင်း ရှိ/ မရှိတို့ကို စိစစ်စစ်ဆေးခဲ့ကြောင်း သိရသည်။

       ထို့ပြင် ဆိုင်ရှင်များအား စားအုန်းဆီများကို သတ်မှတ်ရည်ညွှန်းဈေးနှုန်းဖြင့်သာရောင်းချရန်၊ ခွဲတမ်းရရှိသည့် စားအုန်းဆီများကို သိုလှောင်ထားခြင်း သို့မဟုတ် ဈေးနှုန်းမြှင့်တင်ရောင်းချခြင်း မပြုလုပ်ရန်၊ ရောင်းချမှုစာရင်းများကို စနစ်တကျမှတ်တမ်းတင်ထားရှိရန်နှင့် စားသုံးသူများအား မျှတစွာရောင်းချပေးရန် အသိပညာပေးဆွေးနွေးမှာကြားခဲ့ကြောင်း သိရသည်။

      အဆိုပါ ကွင်းဆင်းစစ်ဆေးမှုသည် စားအုန်းဆီဖြန့်ဖြူးရောင်းချမှုများ စနစ်တကျဆောင်ရွက်နိုင်ရေး၊ ပြည်သူများ သတ်မှတ်ရည်ညွှန်းဈေးနှုန်းဖြင့် လွယ်ကူစွာဝယ်ယူရရှိနိုင်ရေးနှင့် စားသုံးသူအကျိုးစီးပွားကို ကာကွယ်မြှင့်တင်နိုင်ရေးအတွက် ဆောင်ရွက်ခဲ့ကြောင်း သိရှိရပါသည်။

DOCA(ဧရာဝတီ)

        (၁၇-၇-၂၀၂၆) ရက်နေ့တွင် (ပန်းတနော်မြို့နယ်) စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများသည် အလယ်ပိုင်းရပ်ကွက် စန္ဒာဝင်းကုန်စုံဆိုင် သို့ ကွင်းဆင်း၍ ရောင်းချလျက်ရှိသော ကုန်ပစ္စည်းမျိုးစုံ၏ ကုန်အညွှန်းအမှတ်အသားများကို စစ်ဆေးခဲ့ကြောင်း သိရသည်။

        ကွင်းဆင်းစစ်ဆေးရာတွင် စားသုံးသူရေးရာဦးစီးဌာနမှ မြို့နယ်တာဝန်ခံ ဦးအောင်ကျော်သက်မှ စားသောက်ကုန်နှင့် လူသုံးကုန်ပစ္စည်းများ၌ မြန်မာဘာသာဖြင့် ကုန်အညွှန်းအမှတ်အသားများ ပြည့်စုံစွာဖော်ပြထားခြင်း ရှိ/ မရှိ၊ ထုတ်လုပ်သည့်နေ့စွဲ၊ သက်တမ်းကုန်ဆုံးရက်၊ ထုတ်လုပ်သူနှင့် တင်သွင်းဖြန့်ဖြူးသူ၏ အမည်နှင့် လိပ်စာ၊ အသုံးပြုပုံနှင့် သတိပြုရန်အချက်များကို ဥပဒေနှင့်အညီ ဖော်ပြထားခြင်း ရှိ/ မရှိတို့ကို စိစစ်စစ်ဆေးခဲ့ကြောင်း သိရသည်။

         ထို့ပြင် ဆိုင်ရှင်အား “စားသုံးသူကာကွယ်ရေးဥပဒေ” နှင့် သက်ဆိုင်ရာ “ကုန်အညွှန်းအမှတ်အသားဆိုင်ရာ သတ်မှတ်ချက်များ”ကို လိုက်နာဆောင်ရွက်ရန်၊ မြန်မာဘာသာဖြင့် ကုန်အညွှန်းအမှတ်အသားပြည့်စုံသော ကုန်ပစ္စည်းများကိုသာရောင်းချရန်၊ သက်တမ်းလွန်နှင့် အရည်အသွေးမပြည့်မီသော ကုန်ပစ္စည်းများကို မရောင်းချရန် အသိပညာပေး ဆွေးနွေးမှာကြားခဲ့ကြောင်း သိရသည်။

        အဆိုပါ ကွင်းဆင်းစစ်ဆေးမှုသည် စားသုံးသူများ ဘေးအန္တရာယ်ကင်းရှင်း၍ အရည်အသွေးပြည့်မီသော ကုန်ပစ္စည်းများကို ယုံကြည်စိတ်ချစွာ ဝယ်ယူစားသုံးနိုင်စေရေးနှင့် စားသုံးသူအခွင့်အရေးများကို ကာကွယ်မြှင့် တင်နိုင်ရေးအတွက် အသိပညာပေးပြောကြားခဲ့ကြောင်း သိရှိရပါသည်။

DOCA(ဧရာဝတီ)

        (၁၇-၇-၂၀၂၆)ရက်နေ့ နံနက် ၁၁နာရီအချိန်တွင် မအူပင်မြို့နယ် စားသုံးသူရေးရာဦးစီးဌာနမှ ဦးအောင်ဇော်ဦးစ စစ်ဆေးရေးအရာရှိနှင့် တာဝန်ရှိသူများသည် မြို့ပေါ်ရှိ အချိုရည်နှင့် အအေးမျိုးစုံ အရောင်းဆိုင်များသို့ ကွင်းဆင်း၍ စားသုံးသူကာကွယ်ရေးဆိုင်ရာ လိုက်နာဆောင်ရွက်မှုများကို အချိုရည်လက်ကားဆိုင်ကြီး ၃ဆိုင်အား စစ်ဆေးခဲ့ကြောင်း သိရသည်။

         ကွင်းဆင်းစစ်ဆေးရာတွင် ရောင်းချလျက်ရှိသော အချိုရည်နှင့် အအေးထုတ်ကုန်များ၏ သက်တမ်းကုန်ဆုံးရက် (Expiry Date)၊ ထုတ်လုပ်သည့်နေ့စွဲ၊ ကုန်အညွှန်းအမှတ်အသားများ၊ မြန်မာဘာသာဖြင့် ဖော်ပြရမည့်အချက်အလက်များ ပြည့်စုံစွာပါရှိခြင်း ရှိ/ မရှိ၊ ထုတ်ပိုးမှုအခြေအနေနှင့် သိုလှောင်ထားရှိမှုအခြေအနေများကို စိစစ်စစ်ဆေးခဲ့ကြောင်း သိရသည်။

       ထို့ပြင် ဆိုင်ရှင်များအား စားသုံးသူကာကွယ်ရေးဥပဒေနှင့်အညီ သက်တမ်းလွန်ကုန်ပစ္စည်းများ မရောင်းချရန်၊ ကုန်အညွှန်းအမှတ်အသား ပြည့်စုံသော ကုန်ပစ္စည်းများကိုသာရောင်းချရန်၊ ကုန်ပစ္စည်းများကို သန့်ရှင်း၍ အပူချိန်သင့်တင့်သောနေရာတွင် စနစ်တကျ သိုလှောင်ထားရှိရန်နှင့် စားသုံးသူများအား မှန်ကန်ပြည့်စုံသော ကုန်ပစ္စည်းအချက်အလက်များဖြင့် ရောင်းချရန် အသိပညာပေး ဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)