HighLight News

        မကွေးတိုင်းဒေသကြီး၊ ချောက်ခရိုင်၊ ချောက်မြို့နယ်တွင် အရည်အသွေးပြည့်မီသော အင်တာနက်ဝန်ဆောင်မှုများ ရရှိစေခြင်းဖြင့် စားသုံးသူများ၏ နေ့စဉ် လူမှုဘဝကိစ္စရပ်များ အဆင်ပြေချောမွေ့စေရန် ရည်ရွယ်၍ မြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်မြတ်မြတ်မိုးသည် ချောက်မြို့ပေါ်ရှိ ဆက်သွယ်ရေးဝန်ဆောင်မှု (အင်တာနက်ဝန်ဆောင်မှု) ဆောင်ရွက်ပေးနေသည့် လုပ်ငန်းများအား (၁၅.၈.၂၀၂၆)ရက်နေ့၊ နေ့လယ် (၁၃:၀၀) နာရီအချိန်တွင် ကွင်းဆင်းစစ်ဆေးခဲ့ကြောင်း သိရသည်။

    ထိုသို့ ကွင်းဆင်းစစ်ဆေးရာတွင် ချောက်မြို့နယ်အတွင်းဖွင့်လှစ်ထားသည့် ဆက်သွယ်ရေးဝန်ဆောင်မှု (အင်တာနက်ဝန်ဆောင်မှု)ဆောင်ရွက်နေသည့် space link Fiber Internet sevice လုပ်ငန်းလုပ်ကိုင်နေသည့်ဆိုင်အား ကွင်းဆင်း၍ ဆက်သွယ်ရေးဝန်ဆောင်မှု (Package/ Plan) များနှင့် ဝန်ဆောင်ခနှုန်းထားများအား အများပြည်သူလွယ်ကူစွာ သိရှိနိုင်စေရေးဖော်ပြထားမှု ရှိ/ မရှိစစ်ဆေးခဲ့ပြီး ဝန်ဆောင်ခနှုန်းထားများ ပြောင်းလဲမှုရှိပါက သုံးစွဲသူများကို ကြိုတင်အသိပေးရန်၊ ဝန်ဆောင်ခနှုန်းထားများ မှားယွင်းစွာ ငွေကြေးဖြတ်တောက်မှုဖြစ်ပေါ်ခဲ့ပါက သုံးစွဲသူများအား သက်ဆိုင်ရာအော်ပရေတာများက ငွေပြန်အမ်းသည့် Refund Policy များ ချမှတ်ဆောင်ရွက်ရေး၊ အင်တာနက်လိုင်းများ ပြတ်တောက်ပါက သက်ဆိုင်ရာကုမ္ပဏီများအနေဖြင့် ပြည်သူများစိတ် ကျေနပ်မှုရရှိအောင် ဆောင်ရွက်ပေးရေးများကို ဆွေးနွေးပြောကြားခဲ့ကြောင်း သိရသည်။ ချောက်မြို့ပေါ်တွင် ဆက်သွယ်ရေးဝန်ဆောင်မှု (အင်တာနက်ဝန်ဆောင်မှု)ဆောင်ရွက်နေသည့် လုပ်ငန်း(၄)ခုရှိကြောင်း သိရှိရပါသည်။

DOCA(မကွေး)

          ၂၀၂၆ ခုနှစ်၊ သြဂုတ်လ ၁၇ ရက်နေ့၊ ၁၄း၃၀ နာရီအချိန်တွင် မြိတ်မြို့၊ ရွှေပြည်တန်ရပ်ကွက်ရှိ မြိတ်အဝေးကားဝင်း၊ ဂိတ်(၁)သို့ မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း၏ စီစဥ်မှုဖြင့် ရန်ကုန်မြို့ရှိ  Global Good Pure Group ကုမ္ပဏီမှ စားအုန်းဆီ(၆၅)ပေပါသည် ယာဉ်အမှတ် 2P-7306 လည်းကောင်း၊ Padauk Wah Myanmar ကုမ္ပဏီမှ စားအုန်းဆီ(၆၅)ပေပါသည် ယာဉ်အမှတ် 2F-8075 နှင့် Mahar Phone Let Yone ကုမ္ပဏီမှ စားအုန်းဆီ(၈၄)ပေပါသည် ယာဉ်အမှတ် 5R-6364 ဖြင့်လည်းကောင်း တင်ဆောင်၍ အသီးသီးရောက်ရှိလာရာ မြိတ်ခရိုင်၊ စားသုံးသူရေးရာဦးစီးဌာနမှ တာဝန်ရှိသူများသွားရောက်စစ်ဆေးခဲ့ပြီး ရောက်ရှိလာသော စားအုန်းဆီစုစုပေါင်း (၂၁၄)ပေပါအား ကုမ္ပဏီ၏ လက်ကားအ​ရောင်း ကိုယ်စားလှယ်မှတစ်ဆင့် မြိတ်မြို့ရှိ ဒေါ်တင်တင်မြတ်၏ Top Trading ကုန်စုံဆိုင်အပါအဝင် လက်လီဆိုင် ၄၄ ဆိုင်မှတစ်ဆင့် သတ်မှတ်ရည်ညွှန်းစျေးအတိုင်း စားသုံးသူများအား ရောင်းချပေးသွားမည်ဖြစ်ကြောင်း သိရှိရပါသည်။

DOCA(တနင်္သာရီ)

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှု၊ ခရိုင်တာဝန်ခံ၏ ကြီးကြပ်မှုတို့ဖြင့် သရက်ခရိုင်တာဝန်ခံရုံးမှ ဒေါ်နွဲ့ယဉ်ဝင်း(ဦးစီးမှူး)သည် (၁၂.၈.၂၀၂၆) ရက်နေ့၊ နေ့လယ် (၁၄:၀၀) နာရီအချိန်တွင် သရက်ခရိုင်ပြန်ဆက်ဦးစီးဌာန၊ လူထုဗဟိုပြုဌာန (Community Centre) ခန်းမ၌ စားသုံးသူကာကွယ်ရေးဥပဒေပါ စကားရပ်ဖြစ်သည့် စားသုံးသူကာကွယ်ရေး၊ စားသုံးသူ၊ စီးပွားရေးလုပ်ငန်းရှင်၊ ကုန်စည်၊ ဝန်ဆောင်မှုစသည့် စကားရပ်များ၏ အဓိပ္ပာယ်များအား အသေးစိတ်ရှင်းလင်းပြောကြားခြင်းနှင့် စားသုံးသူများနစ်နာဆုံးရှုံးမှု မဖြစ်စေရေးအတွက် စားသုံးသူကာကွယ်ရေးလုပ်ငန်းများ ဆောင်ရွက်နေမှုများကို အသေးစိတ်ရှင်းလင်း အသိပညာပေးခြင်း (Talk Show) ကျင်းပပြုလုပ်ဆောင်ရွက်ခဲ့ကြောင်း သိရသည်။

            အသိပညာပေးဆွေးနွေးဟောပြောရာတွင် ဌာန၏လုပ်ငန်းဆောင်ရွက်ချက်များ၊ ဦးစီးဌာန၏ ဆောင်ပုဒ်၊ မျှော်မှန်းချက်၊ ရည်ရွယ်ချက်များနှင့် စားသုံးသူကာကွယ်ရေးဥပဒေပါ စကားရပ်များအားလည်းကောင်း၊ စားသုံးသူကာကွယ်ရေးဥပဒေ၏ ရည်ရွယ်ချက်များအကြောင်း အသေးစိတ်ရှင်းလင်းပြောကြားခြင်း၊ စားသုံးသူများနစ်နာဆုံးရှုံးမှုများရှိခဲ့လျှင် တိုင်ကြားနိုင်သည့် တိုင်းဒေသကြီးဦးစီးမှူးရုံး၊ ခရိုင်ဦးစီးမှူးရုံးများတွင် ဖွင့်လှစ်ထားရှိသည့် စားသုံးသူသတင်းပြန်ကြားရေးနှင့် လက်ခံဆောင်ရွက်ရေးစင်တာသို့ ဆက်သွယ်တိုင်ကြားနိုင်ပါကြောင်း Consumer Call Center (၁၅၃၅) လိုင်းခွဲနံပါတ်(၁) နေပြည်တော်သို့လည်းကောင်း၊ လိုင်းခွဲနံပါတ်(၂) ရန်ကုန်မြို့သို့လည်းကောင်း၊ လိုင်းခွဲနံပါတ်(၃) မန္တလေးမြို့သို့လည်းကောင်း ဆက်သွယ်တိုင်ကြားနိုင်ပါကြောင်း အသိပညာပေးဟောပြောခဲ့ကြောင်း သိရှိရပါသည်။

DOCA(မကွေး)

       ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ဒေါ်မိုးမိုးကြည်(ဌာနခွဲစာရေး)နှင့် ဒေါ်သိင်္ဂီဇံ(အကြီးတန်းစာရေး)တို့သည် ၂၀၂၆ ခုနှစ်၊ အောက်တိုဘာလ (၁၃) ရက်နေ့၊ နံနက် (၁၀:၀၀) နာရီအချိန်ခန့်တွင် မင်္ဂလာတောင်ညွန့်မြို့နယ် Macro၊  တာမွေ City Mart နှင့် တာမွေ Orange တို့ရှိ တာဝန်ခံများနှင့်တွေ့ဆုံ၍ မင်္ဂလာတောင်ညွန့်မြို့နယ် Macro၊  တာမွေ City Mart နှင့် တာမွေ Orange Mart အတွင်း ရောင်းချလျှက်ရှိသော အေးခဲအစားအစာများတွင် ကုန်အညွှန်းအမှတ်အသားများ မြန်မာဘာသာဖြင့် ပြည့်စုံစွာရေးသားဖော်ပြထားခြင်း ရှိ/ မရှိကို ကွင်းဆင်းစစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။ ထိုသို့ကွင်းဆင်းစစ်ဆေးရာတွင်  မြန်မာနိုင်ငံစားသုံးသူကာကွယ်ရေးကော်မရှင်က ထုတ်ပြန်ထားသော ညွှန်ကြားချက် အမှတ် (၂/၂၀၁၉)အရ ကုန်စည်အမျိုးအစားအလိုက် မြန်မာဘာသာဖြင့်ဖော်ပြရမည့် အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ သုံးစွဲပုံနည်းလမ်းတို့ကို မြန်မာဘာသာဖြင့် ကိုက်ညီပြည့်စုံစွာဖော်ပြပါရှိကြောင်း၊ ထုတ်လုပ်သည့်ရက်စွဲ၊ သက်တမ်းကုန်ဆုံးသည့်ရက်စွဲတို့ ဖော်ပြထားကြောင်း စစ်ဆေးတွေ့ရှိရပြီး သက်တမ်းကုန်ဆုံးသည့်ကုန်စည်များ၊ ကုန်အညွှန်းအမှတ် အသားပြည့်စုံမှုမရှိသည့် ကုန်စည်များ ဈေးကွက်အတွင်းရောင်းချခြင်းမပြုရန်နှင့် စားသုံးသူပြည်သူများ ဘေးအန္တာရာယ်ကင်းဝေးစေရေးအတွက် ယခုလိုဈေးကွက်စောင့်ကြည့် စစ်ဆေးရခြင်းဖြစ်ကြောင်း အသိပေးပြောကြားခဲ့ကြောင်း သိရှိရပါသည်။

DOCA(ရန်ကုန်)

            စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့်  ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူးဦးဝေဠုအောင် ဦးဆောင်သော ဝန်ထမ်းများအဖွဲ့သည် (၇.၈.၂၀၂၆)ရက်နေ့၊ နေ့လယ်(၁၅:၀၀)နာရီအချိန်တွင် စက်မှုလုပ်ငန်းသုံးဆီ ခွဲတမ်းရရှိသော "ပိုပိုကောင်း"နှင့် “ခိုင်မွန်” ပဲကြော်ဖိုလုပ်ငန်းများသို့ မြေပြင်တွင် လုပ်ငန်းအမှန်တစ်ကယ် လည်ပတ်ခြင်း ရှိ/မရှိ ကွင်းဆင်းစစ်ဆေးခဲ့ကြောင်း သိရသည်။

          ထိုသို့စစ်ဆေးရာတွင် ပဲကြော်လုပ်ငန်းများမှာ အမှန်တစ်ကယ်လုပ်ငန်းလည်ပတ်နေကြောင်း စစ်ဆေးတွေ့ရှိရပါသည်။ ကုန်ကြမ်းပဲကြီးကို ပိဿာချိန်(၃၀)ဝင် တစ်အိတ်လျှင် ကျပ်(၂၀၀၀၀၀-၂၅၀၀၀၀)ဖြင့် မုံရွာ၊ အောင်ပန်းမြို့များမှ ဝယ်ယူကြောင်း၊ တစ်နေ့လျှင် အိတ်ရေ(၁၈ - ၂၀)အိတ်ခန့် ကြော်ရကြောင်း၊ တစ်လလျှင် ပျမ်းမျှ(၂၀-၂၅)ရက် ခန့် လုပ်ကိုင်ရကြောင်း၊ ပဲကြော်သော လုပ်သားဦးရေ (၉)ဦးရှိပြီး လုပ်သားခကို တစ်နေ့လျှင် အမျိုးသားတစ်ဦး ကျပ်(၁၅၀၀၀)၊ အမျိုးသမီးတစ်ဦး ကျပ် (၁၀၀၀၀)ပေးကြောင်း၊ ပဲညှစ်သော လုပ်သားဦးရေ  အများအပြားရှိပြီး ပဲညှစ်ခကို တစ်ပြည်လျှင် ကျပ်(၇၀၀)ပေးကြောင်း၊ လူတစ်ဦး လျှင် ပဲညှစ်ခ ကျပ်(၆၀၀၀-၈၀၀၀)ခန့်ရရှိကြောင်း၊ ဈေးနှုန်းအနေဖြင့် ပဲပူးကြော်၊ နှစ်ပြန်ကြော် တစ်ပိဿာလျှင် လက်လီ ကျပ်(၂၀၀၀၀)၊ လက်ကား ကျပ်(၁၈၀၀၀)ဖြင့် ရောင်းချကြောင်း၊ ပဲကြော်များကို ပခုက္ကူမြို့ပေါ်တွင် ရောင်းချရမှုနည်းပြီး ရန်ကုန်၊ တောင်ကြီး၊ မုံရွာ၊ ကလေး၊ ကလေးဝမြို့နယ်များသို့ ရေလမ်းဖြင့် အများဆုံးတင်ပို့ ရောင်းချကြောင်း သိရသည်။

          ဈေးနှုန်းချိုသာသော စားအုန်းဆီ ခွဲတမ်းရရှိမှုကြောင့် လက်ရှိအချိန်တွင် ပဲကြော်လုပ်ငန်း လုပ်ကိုင်ရသည်မှာ အဆင်ပြေကြောင်း၊ လုပ်ငန်းတွင်ကျယ်စွာ လုပ်ကိုင် ရသောကြောင့် စားအုန်းဆီ လုံလောက်မှုနည်းပါးသဖြင့် ဝါစေ့ဆီကို တွဲဖက်၍ သုံးစွဲနေကြောင်း၊ ဝါစေ့ဆီ တစ်ပိဿာလျှင် ကျပ်(၁၄၀၀၀)ဖြင့် ပခုက္ကူစက်မှုဇုန်မှ ဝယ်ယူကြောင်း၊ ဆီခွဲတမ်းရရှိမှုများလျှင် ပို၍ အဆင်ပြေကြောင်း၊ ဆီဈေးနှုန်းသင့်တင့်စွာ ဝယ်ယူရလျှင် စားသုံးသူများအပေါ် ပို၍ဈေးနှုန်းချိုသာစွာဖြင့် ရောင်းချပေးနိုင်ကြောင်း ပဲကြော်လုပ်ငန်းရှင်ထံမှ သိရှိရပါသည်။

DOCA(မကွေး)