ပြည်တွင်းကုန်သွယ်မှုသတင်း

  အစာစားပြီးတိုင်း သွားတိုက်ခြင်းသည် တစ်ကိုယ်ရည်သန့်ရှင်းမှုအတွက် နေ့စဉ်လုပ်ဆောင် ပေးသင့် သောအလေ့အထတစ်ခုဖြစ်ပါသည်။ သွားတိုက်ခြင်းနှင့်ပလုပ်ကျင်းခြင်းသည် အစာအကြွင်း အကျန်များကို ဖယ်ရှားပေးနိုင်သည့်အပြင် သွားနှင့်သွားဖုံးကင်ဆာဖြစ်ခြင်းကို လျော့ပါးစေနိုင် ပါသည်။ သို့သော် မိမိရွေးချယ် အသုံးပြုသည့် သွားတိုက်ဆေးအမျိုးအစားပေါ်မူတည်၍ သွားနာခြင်း၊ သွားဖုံးယောင်ခြင်းများကို သက်သာစေပါသည်။ သွားတိုက်ဆေးတွင် များသောအားဖြင့် ဖလိုရိုက် ပါဝင်ပြီး ၎င်းကသွားများကို သန့်ရှင်းစေရုံသာမက သွားအပေါ်ယံလွှာကိုသန်မာစေပါသည်။

     ယနေ့ခေတ်မြန်မာနိုင်ငံတွင် သွားတိုက်ဆေးမျိုးစုံအား ပြည်တွင်း၌ထုတ်လုပ်၍ သော်လည်းကောင်း၊ ပြည်ပမှကိုယ်စားလှယ်ယူပြီး တင်သွင်း၍သော်လည်းကောင်း ဖြန့်ဖြူးရောင်းချ လျက်ရှိပါသည်။ တောင်ငူမြို့နယ်၊ ကေတုမတီမြို့ရှိ Family ဆေးနှင့်အလှကုန်စတိုးတွင် သွားတိုက် ဆေးများရောင်းချလျက်ရှိရာ ထိုင်းနိုင်ငံထုတ် Close Up Triple Fresh (160 g) သွားတိုက်ဆေး ဘူးကြီးတစ်ဘူးလျှင် (၇၀၀၀) ကျပ်၊ ထိုင်းနိုင်ငံ ထုတ် Colgate Cibaca (160 g) သွားတိုက်ဆေး ဘူးကြီးတစ်ဘူးလျှင် (၇၀၀၀) ကျပ်၊ ပြည်တွင်းထုတ်လုပ်သည့် Signal (160 g) သွားတိုက်ဆေး ဘူးကြီးတစ်ဘူးလျှင် (၆၀၀၀) ကျပ်၊ ပြည်ပနိုင်ငံထုတ် Fresh Up Kids Gel (50g) (ကလေးသုံး) သွားတိုက်ဆေးတစ်ဘူးလျှင် (၇၀၀၀) ကျပ်ဖြင့် ရောင်းချလျက်ရှိပြီး ပုံမှန်ရောင်းဝယ်လျက်ရှိကြောင်း Family ဆေးနှင့်အလှကုန်စတိုးဆိုင်ပိုင်ရှင် ဒေါ်ဝင်းရွှေရီ၏ပြောကြားချက်အရ သိရှိရသည်။

DOCA(ပဲခူး)

    ပဲခူးတိုင်းဒေသကြီး၊ တောင်ငူမြို့နယ်အတွင်းရှိ ရပ်ကွက်အလိုက် ဈေးများထဲတွင် ဟင်းသီးဟင်းရွက်နှင့် သီးနှံမျိုးစုံရောင်းချလျက်ရှိရာ ယခုအခါ ပြည်ထောင်စုနယ်မြေ၊ နေပြည်တော်၊  လယ်ဝေးမြို့နယ်ဘက်မှ မှာယူရောင်းချသော  တရုတ်ဂျူးမြစ် (ခေါ်) ကုဆိုင်များ ရောင်းချလျက်ရှိနေပါသည်။ ဂျူးမြစ်ကို တရုတ်ဂျူးမြစ် နှင့်ရှမ်းဂျူးမြစ်ဟူ၍ လူသိများသော်လည်း ရှမ်းဂျူးမြစ်သည် အမြစ်ပါ စားသုံးနိုင်ပြီး တရုတ်ဂျူးမြစ်၏ အမြစ်မှာတော့ စားသုံး၍ မရပါ။ တရုတ်ဂျူးမြစ် (ခေါ်)ကုဆိုင်ပင်သည် ကြက်သွန်အမျိုးအနွယ်ထဲတွင် ပါဝင်ပြီး နေရာအနှံ့အပြားတွင် ပေါက်ရောက်သော နှစ်ရှည်ပင်အမျိုးအစားဖြစ်ပါသည်။ တစ်နှစ်ပတ်လုံး ၃ ကြိမ်မှ ၄ ကြိမ်အထိ ရိတ်နိုင်ပြီး ပါးလျတဲ့ အရွက်များပါရှိကာ မြက်ပင်များကဲ့သို့ အစုအဝေး ပေါက်ရောက်ကြပါသည်။ ရနံ့သင်းပြီး စားကောင်းသည့်အတွက် စားသုံးသူများ နှစ်သက်ကြသော ဟင်းခတ်အမွှေးအကြိုင် အပင် တစ်မျိုးဖြစ်၍  အကြော်အလှော်များနှင့်ပတ်သက်သော အစားအစာများတွင် ကုဆိုင်ကို ထည့်သွင်းအသုံးပြု ကြလေ့ရှိပါသည်။ အရသာအားဖြင့် အနည်းငယ်စပ်သော အနေအထားရှိပါသည်။

ကုဆိုင်ကို အသားဟင်းလျာ၊ ဟင်းချို၊ အဆာသွတ်မုန့်၊ ဖက်ထုပ်နဲ့ အကြော်အလှော် စသော အစားအစာများထဲတွင် အများဆုံး အသုံးပြုကြသည်။ ထို့ပြင် ကုဆိုင်ကို ကြက်ဥ (သို့မဟုတ်) ဘဲဥတို့ဖြင့် ကြော်စားခြင်း၊ ဆီသုတ်၍ မီးကင်စားခြင်း၊ တို့စရာအဖြစ် စားသုံးကြသေးသည်။

၂၀၂၅ ခုနှစ်၊ နိုဝင်ဘာလ တတိယပတ်တွင် တောင်ငူမြို့ဈေးများရှိ ကုဆိုင်ဈေးနှုန်းမှာ ကုဆိုင် လက္ကား (၁) ပိဿာလျှင် ၆၀၀၀ ကျပ် ၊ (၅၀) ကျပ်သားလျှင် ၃၀၀၀ ကျပ်ဖြင့် ရောင်းချပြီး ကုဆိုင်လက်လီ (၅၀) ကျပ်သားလျှင် ၃၅၀၀ ကျပ်၊ (၂၅) ကျပ်သားလျှင် ၂၀၀၀ ကျပ်ဖြင့် အရောင်းအဝယ်ဖြစ်လျက်ရှိသည်။ ကုဆိုင်ကို စားသောက်ဆိုင်များ၊ ထမင်းဆိုင်များတွင် အသုံးပြုသည့်အတွက် ရောင်းအားကောင်းကြောင်း ကုန်စိမ်း ရောင်းချသည့် ဈေးသည်ထံမှ သိရှိရ သည်။

DOCA(ပဲခူး)

  ခဝဲသီးကို  အချိုချက်၊ အသား၊ ငါးနှင့် ပုဇွန်တို့ဖြင့်ရောနှော၍ ချက်ပြုတ်စားတတ်ကြသည်။ ဟင်းချိုအဖြစ်လည်း ချက်၍စားကြသလို အသီးနုများကိုပြုတ်၍တို့စားကြသည်။ ချိုသောအရသာရှိ၍ အများစုကကြိုက်နှစ်သက်ကြသည်။ ဒေသမျိုးများတွင် အပုမျိုးနှင့်အရှည်မျိုးဟူ၍ (၂)မျိုးရှိသည်။ အပုမျိုးသည် (၆)လက်မခန့်ရှည်ပြီး အသီးပုံသဏ္ဍာန်မှာ အဖျားရှူး၍ အညှာပိုင်းကြီးသည်။ အရှည်မျိုး သည် (၁)ပေခန့်အထိရှည်၍ အရင်းအဖျားညီသည်။ ဆောင်းရာသီတွင် အပင်ငယ်ဖြင့်ပန်းပွင့်တတ်၍ သတိထား၍စိုက်ပျိုးရသည်။ ရောဂါပိုးမွှားဒဏ်ကိုခံ၍ ဒေသနှင့်ကိုက်ညီသောမျိုးများကို ထိန်းသိမ်း စိုက်ပျိုးသင့်သည်။

          မိုးရာသီ ဇွန်၊ ဇူလိုင်၊ သြဂုတ်လများတွင် အစိုက်များသည်။ စက်တင်ဘာလ၊ အောက်တို ဘာလတွင် ခူးဆွတ်ကြသည်။ မြေပြန့်ဒေသများတွင် ဆောင်းနှင့်နွေတွင် စိုက်ပျိုးနိုင်သော်လည်း ရေကိုဝအောင်ပေးရပါမည်။ ဆောင်းရာသီတွင် အောက်ခြေမှ ငါးပေအထိအသီးအပွင့်များကို ချွေပြီးမှ အပေါ်အဆစ်မှ အသီးများကိုခူးယူသင့်သည်။ မိုးဒဏ်ကိုခံနိုင်ရည်ရှိပြီး စင်တင်စနစ်၊ ဝါးတန်း ထိုးစနစ်ဖြင့်သာ အစိုက်များသည်။ တိုက်ရိုက်အစေ့ချစနစ်ကိုသာ စိုက်ကြသည်။ မျိုးစေ့ကို အညှောင့်ဖောက်၍ စိုက်ဘောင်ပေါ်တွင် (၁)ပေကြားလက်မဝက်ခန့် မြှုပ်၍စိုက်ပါ။ စိုက်ဘောင်ကို (၂)ပေအကျယ်၊ (၁)ပေအမြင့်ဆွဲ၍ တစ်ဘောင်နှင့်တစ်ဘောင် (၅)ပေခြားဆွဲပါ။ (၁)ဧကလျှင် အပင်(၈၀၀၀)ခန့်ရအောင် စိုက်ပျိုးရမည်။ စင်ပေါ်သို့မရောက်မီ ကြားဝါးတန်းများကို (၁)ပေခြား ကန့်လန့်ဖြတ် ချည်ပေးရမည်။ ခဝဲတစ်ဧကလျှင် သီးတောင့်(၂၀၀၀၀-၃၀၀၀၀)ခန့်အထိ ထွက်နိုင်သည်။

          ခဝဲသီးသည် ကိုယ်အလေးချိန်လျော့ချပေးနိုင်ရန်အတွက် အဓိကကျသည့် အဆီပါဝင်မှု ၊ ကယ်လိုရီပါဝင်မှုနှင့် ပြည့်ဝဆီ ကိုလက်စထရောပါဝင်မှုနည်းပါးပြီး အမျှင်ဓာတ်များပါဝင်ခြင်းကြောင့် ခန္ဓာကိုယ်တွင်း ကိုလက်စထရောစုပ်ယူမှုနည်းစေသည်။ ထို့ပြင်ရေဓာတ်ပါဝင်မှုပမာဏများသော ကြောင့် ကိုယ်အလေးချိန်ကျစေရန် ကူညီပေးနိုင်သဖြင့် ကိုယ်အလေးချိန်ကျလိုသူများ စားသုံးပေး သင့်ပါသည်။ ခဝဲသီးသည် ဆေးဘက်ဆိုင်ရာလေ့လာမှုများအရ အသားဝါခြင်းရောဂါ ဖြစ်ပွား နိုင်ချေကို လျော့နည်းစေပြီး ခဝဲသီးအစေ့များနှင့် အခွံများက အသားဝါရောဂါဖြစ်ပွားနိုင်ချေကို လျော့ကျစေနိုင်သည်ဟု သိရှိရသည်။  ခဝဲသီးတွင် သွေးများကိုသန့်စင်စေသည့် အစွမ်းရှိသဖြင့် အရက်ကြောင့်ဖြစ်သည့် အသည်းဝေဒနာကိုလည်း ကာကွယ်ပေးနိုင်သည်။ ထို့ပြင် ခဝဲသီးကို စားသုံးပေးခြင်းဖြင့် အသားအရေကိုကောင်းမွန်စေခြင်း၊ ဆီးချိုးသွေးချိုရောဂါဖြစ်ပွားမှု လျော့နည်းစေနိုင်ခြင်း၊ လိပ်ခေါင်းရောဂါကို သက်သာစေနိုင်ခြင်း၊ ရောင်ရမ်းမှုကို သက်သာ စေနိုင်ခြင်း၊ နှလုံးရောဂါ၊ ဆီးကြိတ်ကင်ဆာကိုလျော့နည်းစေနိုင်ခြင်း၊ သွေးတွင်းသကြားဓာတ် ကို လျော့ကျစေနိုင်ခြင်း စသည့်ကျန်းမာရေးအကျိုးကျေးဇူးများစွာကို ရရှိစေနိုင်သောကြောင့် စားသုံးပေး သင့်သော အသီးအနှံတစ်မျိုးဖြစ်ပါသည်။

DOCA(ပဲခူး)

            မန္တလေးဈေးကွက်အတွင်းသို့ ပြင်ဦးလွင်ဒေသထွက် ပန်းတိမ်ငို(ခေါ်) ပန်းတိမ်မနိုင်ပန်းများ ဇွန်လဆန်းမှ စတင်ဝင်ရောက်ခဲ့ပြီး သီတင်းကျွတ်ကာလတွင် လှိုင်လှိုင်ထွက်ပေါ်ခဲ့ပါသည်။ ပန်းတိမ်ငို (ခေါ်) ပန်းတိမ်မနိုင်ပန်းအရောင်မှာ သဘာဝစိမ်းဝါနုဖျော့ဖျော့အရောင်မှ ယခုအခါ ခရမ်း‌ရောင်၊ အနီရောင်၊ အဖြူရောင်များလည်း ဝင် ရောက်လျှက်ရှိပါသည်။ ပန်းတိမ်ငို ‌(ခေါ်) ပန်းတိမ်မနိုင်ပန်းသည် စူးရှသည့်ရနံ့မရှိဘဲ ပန်းတိုင်း ပန်းတိမ်ဆရာ ငိုလောက်အောင် လှတဲ့ ပန်းမျိုးဖြစ်ပါသည်။ စိုက်ပျိုးရာတွင်လည်း တစ်ခါစိုက်ထား လျှင် မိုးစတင်ရွာလာပါက မြေဆီကျွေး ဘောင်ခတ်မြေဖို့ပြီး ပြုစုရလွယ်ကူသော အပင်တစ်မျိုး ဖြစ်ပါသည်။ ပန်းတိမ်မနိုင်ပန်းကို ဘုရားပန်းလှူက (၁၀)ရက် (၁၅)ရက် ခန့်ထိ ကြာရှည်ခံပါသည်။  ဝါကျွတ်ကာလတွင် ပန်းတိမ်မနိုင်ပန်း‌(ခေါ်) ပန်းတိမ်ငိုပန်းများ ဈေးကွက်အနည်းငယ် ကျဆင်းလျှက်ရှိကြောင်းသိရှိရသည်။ ပန်းတိမ်မနိုင်ပန်း(၁၀)ပင် တစ် စည်းလျှင် (၂၀၀၀/၃၀၀၀) ကျပ်ဖြင့်ရောင်းချလျှက်ရှိကြောင်း ပန်းမျိုးစုံ အရောင်းဆိုင်များမှ သိရှိရသည်။

DOCA(မန္တလေး)     

          နေရာဒေသအလိုက်ပန်းအမည်အခေါ်အဝေါ်ကွဲပြာကြသည်။ ပြည်လုံးချမ်းသာပန်းကို Morning Flower ၊Lucky Flower ၊ ရှစ်နာရီပန်း ၊ကိုးနာရီပန်း၊မွန်းတည့်ပန်း၊အိမ်လုံးချမ်းသာ စသည်ဖြင့် မျိုးစုံခေါ်ဝေါ်ကြသည်။မွှေးသောပန်းများက ရနံ့ဖြင့် လူတွေ၏ စိတ်ကိုလန်းဆန်းသလို ပြည်လုံး ချမ်းသာ ရောင်စုံပန်းလှကလေးများကလဲ ရနံ့မကြွယ်ပင်မဲ့ သူတို့ရဲ့အလှနှင့် အိမ်တစ်အိမ်လုံ၏ ဂုဏ်ကိုတင့်တယ်စေသည်။ပြည်လုံးချမ်းသာပန်းပင်သည် အရိုးကျရှင်သန်ဖြစ်ထွန်သော ရွက်ကျ ပင်မျိုးဖြစ်သည်။ပြည်လုံချမ်းသာပန်းပင်သည် မိုးကျသည်နှင့် တပြိုင်နက် အညွှန့်အတက်များ ထွက်ပေါ်လာပြီးပန်းအလွန်ပွင့်သော အပင်မျိုးဖြစ်သည်။အဖြူရောင်၊အနီရောင်၊ အဝါ၊ခရမ်းရောင်၊ အဝါကြားရောင်စသည်ဖြင့် အရောင်မျိုးစုံရှသည်။ပြည်လုံးချမ်းသာပန်းလေးများသည် နံနက် နေထွက်ချိန်၌ပွင့်တက်ပြီးနေဝန်ချိန်၌ ညှိုးနွမ်းသွားတက်သည်။ နောက်နေ့နံနက် နောက်ထပ် ပန်းများပွင့်တက်သည် ပြည်လုံးချမ်းသာပန်းပွင့်များကို မိမိတို့ လိုအပ်သလို ဒီဇိုင်း ပုံဖေါ်ပြီး စိုက်ပျိုးမှုများလာခြင်းကြောင့် ရောင်းအားကောင်းလျက်ရှိပါသည်။ပန်းခြံများ အပန်းဖြေစခန်းများ ဘုရားကျောင်းကန်များ အိမ်ရှေ့အလှပန်းအိုးများအဖြစ် စိုက်ပျိုးကြသည်။နေရောင်ဆမ်းမှ သူ့ဘဝသူ့လှ ဖော်ပြနိုင်သည့် ပန်းကလေးများဖြစ်သည်။ စိတ်ထွေမွန်းကြပ်နေလျှင် ပန်းပင်လေ တွေရဲ့သဘာဝအလှတရားခံစားကြည့်လိုက်ပါ စိတ်ပျော်ရွှင်ကြည်နူးစေမှာ အမှန်ပင်ဖြစ်ပါသည်။ ပြည်လုံးချမ်းသာ ပန်းအိုးခြင်းတစ်ခြင်းလျှင် အရွယ်စားပေါ်မူတည်၍ (၂၀၀၀-၃၀၀၀)ကျပ် ဖြင့်ရောင်းချလျက်ရှိကြောင်းပန်းပျိုးပင်ဈေးကွက်မှ သိရှိရပါသည်။

DOCA(မန္တလေး)