ပြည်တွင်းကုန်သွယ်မှုသတင်း

            သစ်သီးဝလံများတွင် မာလကာသီးမှာ ဈေးကွက်တွင် ရာသီမရွေး ဝယ်ယူစားသုံးနိုင်သော သီးနှံတစ်မျိုုးဖြစ်ပြီး လူကြီး/လူငယ် မရွေး ကြိုက်နှစ်သက်သော သစ်သီးတစ်မျိုးဖြစ်ပါသည်။ မိတ္ထီလာ ဈေးကွက်တွင် တွေ့ရသော မာလကာသီးမှာ ပုပ္ပါးနယ်မှ အများဆုံးဝင်ရောက်ပါသည်။ မိတ္ထီလာ ဈေးကွက်တွင် မာလကာသီးကို တစ်လုံးချင်းဝယ်ယူကြသကဲ့သို့ ပိဿာနှင့်လည်း ဝယ်ယူနိုင်ရာ တစ်လုံးလျှင် အလုံးအကြီး/အသေးပေါ်မှုတည်၍ (၅၀၀-၈၀၀) ရှိပြီး တစ်ပိဿာလျှင် လက်ကားဈေး (၂၀၀၀) ကျပ်၊ လက်လီးဈေး(၃၀၀၀) ကျပ်ဖြင့် ရောင်းချနေပြီး ဈေးကွက်သို့ ဝင်ရောက်မှုနှင့် ဝယ်လိုအားမျှကာဈေးငြိမ်နေပါသည်။ မာလကာသီးကို လက်လီ ရောင်းချ သူများအနေဖြင့် တစ်လုံးချင်း ရောင်းချသကဲ့သို့ ဓားဖြင့် စိတ်၍ ငရုတ်သီးမှုန့်၊ သကြား၊ ဆားတို့ဖြင့် ရောထားသော အမှုန့်နှင့်တွဲဆက် ရောင်းချကြရာ စားသုံးသူများ နှစ်သက်မှုရှိကြောင်းသိရသည်။

DOCA(မန္တလေး)

     ပဲမြစ်ပင်သည်နွယ်ပင်တစ်မျိုးဖြစ်ပြီး ပဲစောင်းလျာသီးအပင်၏ အမြစ်ဖြစ်သည်။ ပဲမြစ်ကို နေရာ ဒေသအနှံ့အပြားတွင် စိုက်ပျိုးကြသည်။ ကရင်ပြည်နယ်ဒေသထွက်ပဲမြစ်ကို ဘားအံမြို့အနီး တစ်ဝိုက်ကျေးရွာများနှင့် ကြာအင်းဆိပ်ကြီးမြို့နယ်များရှိ တောင်သူများကတစ်နိုင်တစ်ပိုင် စိုက်ပျိုး ကြသည်။

   ၂၀၂၅ ခုနှစ်၊ ဆောင်းကာလ ကရင်ပြည်နယ်ဒေသထွက် ပေါ်ဦးပေါ်ဖျားသာဘာဝ ပဲမြစ်များ၏ ဈေးနှုန်းမှာ ဘားအံမြို့ရေပေါ်စံပြဈေးတွင် ပဲမြစ်လက်ကား ဈေးနှုန်း(၁၀)ပိဿာလျှင် (၆၀၀၀၀)ကျပ် နှုန်းနှင့် လက်လီဈေးနှုန်းတစ်ပိဿာလျှင် (၈၀၀၀) ကျပ်နှုန်း တို့ ဖြင့် အရောင်အဝယ်ဖြစ်လျက်ရှိကြောင်း ပဲမြစ်အရောင်းဆိုင်များမှ သိရသည်။

DOCA(ကရင်)

            စစ်ကိုင်းတိုင်းဒေသကြီးအတွင်းရှိ ကျေးရွာများနှင့် မြို့ပေါ်ရပ်ကွက်များတွင် စိုက်ပျိုးရေးလုပ်ငန်းများကို လုပ်ကိုင်စားသောက်ကြရာမှ နှစ်ရှည်သီးနှံဖြစ်သည့် ဂွေးပင်၊ မာလကာသီးပင်၊ ဩဇာသီးပင်၊ သရက်သီးပင်၊ နဂါးမောက်သီးပင်၊ ပိန္နဲသီးပင်နှင့် မန်ကျည်းသီးပင်များကိုလည်း မိမိတို့ နေအိမ်ခြံစည်းရိုးများနှင့် တောင်ယာများထဲတွင် တစ်ပိုင်တစ်နိုင် စိုက်ပျိုးလျက် ရှိကြပါသည်။ စိုက်ပျိုးရရှိသော သီနှံများထဲမှ  ဩဇာသီး၊ ဂွေးသီးနှင့် မာလကာသီးမျာကို မုံရွာမြို့၊ ချင်းတွင်းရတနာဈေး၊ သံလမ်းဈေးနှင့် ဈေးဟောင်းတို့တွင်  လာရောက်ရောင်းချလျက်ရှိကြောင်း သိရှိရပါသည်။

          ၂၀၂၅ ခုနှစ်၊ အောက်တိုဘာလ စတုတ္ထပတ်တွင် ဩဇာသီးဈေးနှုန်းများမှာ အရွယ်အစားအလိုက် ဈေးအမျိုးမျိုးရှိပြီး အရွယ်ကြီးအလုံးလှ(၁)လုံးလျှင် (၉၀၀)ကျပ်၊ အရွယ်သေး အလုံးသေး (၁)လုံးလျှင်(၆၀၀)ကျပ်ဖြင့်လည်းကောင်း၊  ကီလိုမာလကာသီးဈေးနှုန်းများအနေဖြင့် အကြီးတစ်လုံးလျှင် (၆၀၀)ကျပ်၊ အသေးတစ်လုံးလျှင် (၄၀၀) ကျပ်ဖြစ်ပြီး အကြီးအသေး ပေါ်မူတည်ပြီး ရောင်းချလျက်ရှိကြောင်း သိရှိရပါသည်။

DOCA(စစ်ကိုင်း)

             စစ်ကိုင်းတိုင်းဒေသကြီး၊ မုံရွာမြို့နယ်ရှိ ကျေးရွာများတွင် ရာသီပေါ်ခြံထွက်သီးနှံများ နှစ်ရှည်သီးနှံပင်များနှင့် စားသောက်ကုန်များ အများအပြား စိုက်ပျိုးရောင်းဝယ်လျက်ရှိသည်။ စိုက်ပျိုးရရှိသော သင်္ဘောသီးများနှင့် ဂွေးချိုသီးများကို မုံရွာမြို့ပေါ်ရှိ မန်ကျဉ်းပင်ဈေးနှင့် သာစည်ဈေးတို့တွင် လာရောက်ရောင်းချကြကြောင်း သိရှိပါသည်။ သင်္ဘောသီးအစိမ်းမှာ သွေးကျဲစေသော ဓာတ်တစ်မျိုးပါရှိပြီး အမှည့်မှာ မျက်စိအမြင်အာရုံအား ကောင်းစေပါသည်။ သင်္ဘောသီသည် သင်္ဘောသီးဖျော်ရည်၊ သင်္ဘောသီးသုပ်နှင့် အိမ်ရှင်မများ အကြိုက်ဟင်းလျာများတွင် အများအပြားထည့်သွင်းအသုံးပြုကြသော အဖိုးတန်သစ်သီး တစ်မျိုးဖြစ်ပါသည်။

          အောက်တိုဘာလ စတုတ္ထပတ်တွင် မန်ကျဉ်းပင်ဈေးနှင့် သာစည်ဈေးတို့တွင် သင်္ဘောသီးအစိမ်းတစ်လုံးလျှင် (၈၀၀/၁၃၀၀) ကျပ်နှင့် အမှည့်တစ်လုံးလျှင် (၃၈၀၀/၄၅၀၀) ကျပ်၊  ဂွေးချိုသီး (၁၈)လုံးပါ တစ်ထုပ်လျှင် (၁၀၀၀)ကျပ်ဖြင့် ရောင်းလျက်ရှိကြောင်း သိရှိရပါ သည်။

DOCA(စစ်ကိုင်း)

          ၂၀၂၅-၂၀၂၆ ခုနှစ်၊ မိုးသီးနှံစိုက်ပျိုးရာသီတွင် ကယားပြည်နယ်၊ လွိုင်ကော်မြို့၌ မြေပဲ (၅၇၁၉) ဧက စိုက်ပျိုးခဲ့ပြီး စက်တင်ဘာလ(၃၀)ရက်နေ့အထိ (၁၉၄)ဧက ရိတ်သိမ်းပြီးစီးကြောင်း စိုက်ပျိုးရေးဦးစီးဌာန၏ (၃၀-၉-၂၀၂၅)ရက်နေ့အထိ စာရင်းအရ သိရှိရပါသည်။

          ကယားပြည်နယ်၌ ဒေသနှင့်ကိုက်ညီသော မြေပဲများကို အဓိကထားစိုက်ပျိုးကြပါသည်။ မြေပဲစိုက်ပျိုးသည့် တောင်သူများမှာ တစ်ဧကအထွက်နှုန်းတိုးတက်စေရန် မြေပြုပြင်ခြင်း၊ စိုက်ပျိုးခြင်း၊ အပင်ပြုစုခြင်း၊ ရိတ်သိမ်းခြင်း၊ သွင်းအားစုများ၊ နွားချေး၊ ကွန်ပေါင်း၊ ဓာတ်မြေဩဇာ၊ မြေတွင်းအောင်းပိုးသတ်ဆေး စုစုပေါင်းတစ်ဧကကုန်ကျစရိတ်မှာ(၇၅၀၀၀၀)ခန့် ကုန်ကျကြောင်း တောင်သူကြီးများထံမှ သိရှိရပါသည်။

          ယခု ၂၀၂၅ ခုနှစ်တွင် မြေပဲ တစ်ဧကအထွက်နှုန်းမှာ တင်း(၄၆.၄၅)တင်းခန့်ထွက်ရှိကြောင်း သိရှိရပါသည်။ ယခုမြေပဲ လက်ကားဈေးတစ်တင်းလျှင်(၄၀၀၀၀)ကျပ် ခန့်မှန်းပေါက်ဈေးအရောင်း အဝယ်ရှိပြီး မြေပဲတင်း(၄၆.၄၅)တင်းကို (၄၀၀၀၀)ကျပ်နှုန်းဖြင့် ရောင်းလျှင်(၁၈)သိန်းကျော်ခန့် ရရှိကာ တစ်ဧကစိုက်ပျိုးလျှင်( ၁၀)သိန်းကျော်ခန့် အမြတ်အစွန်းရရှိမည်ဖြစ်ကြောင်း သိရှိရပါသည်။

DOCA(ကယား)