စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် စိုက်ပျိုးရေးလုပ်ငန်းများဖြစ်သည့် စပါး၊ပဲမျိုးစုံနှင့် ဆီထွက်သီးနှံတို့ကို အဓိကစိုက်ပျိုးသည့်အပြင် ရာသီစာသီးနှံများနှင့် စားဖိုဆောင်သီးနှံများကိုလည်း စိုက်ပျိုးကြသည်။
ယခုအခါ ကန့်ဘလူမြို့ပေါ်၊ နတ်ပေးကျေးရွာနှင့် အခြားသောကျေးရွာများတွင် ကြက်သွန်မြိတ်၊မြင်းခွာရွက်နှင့် စပါးလင်ပင်များကို စိုက်ပျိုးကြကြောင်း၊ ကြက်သွန်မြိတ်၊ မြင်းခွာရွက်နှင့် စပါးလင်ပင်များကို ကန့်ဘလူမြို့မဈေးတွင် ရောင်းချကြောင်း၊ ၂၀၂၅ခုနှစ်၊ နိုဝင်ဘာလ တတိယပတ်အတွင်း ကြက်သွန်မြိတ်(၁)စည်းလျှင် (၅၀၀)ကျပ်၊ (၃)စည်းလျှင်(၁၃၀၀)ကျပ်၊ မြင်းခွာရွက် (၁)ပုံလျှင် (၅၀၀)ကျပ်၊ မြင်းခွာရွက်(၂)ပုံလျှင်(၈၀၀)ကျပ်၊ မြင်းခွာရွက်(၄)ပုံလျှင် (၁၅၀၀)ကျပ်၊ စပါးလင်(၁)ပင်လျှင် (၂၀၀)ကျပ်၊ (၃)ပင်လျှင် (၅၀၀)ကျပ်ဖြင့် ရောင်းချလျက်ရှိကြောင်း၊ ကြက်သွန်မြိတ်နှင့်မြင်းခွာရွက်ကို အိမ်ရှင်မများ ဟင်းချက်ရာတွင်လည်းကောင်း၊ စားသောက်ဆိုင်များတွင်လည်းကောင်း အသုံးပြုကြကြောင်း၊ စပါးလင်ကို ဟင်းခတ်အမွှေးအကြိုင်ဖြစ်လည်းကောင်း၊စားသောက်ဆိုင်များ၌ ငါးကင်၊ ငါးပေါင်းများ ပြုလုပ်ရာတွင်လည်းကောင်း၊ မုန့်ဟင်းခါးချက်ရာတွင်လည်းစပါးလင်ကိုထည့်သွင်း အသုံးပြုကြသဖြင့် အရောင်းအဝယ်သွက်လျက်ရှိကြောင်း မြို့မဈေးရှိ ကုန်စိမ်းရောင်းချသူတစ်ဦးထံမှ သိရှိရပါသည်။
DOCA(စစ်ကိုင်း)