ပြည်တွင်းကုန်သွယ်မှုသတင်း

  ညောင်ဦးမြို့နယ်ရှိ တောင်သူလယ်သမားများ၏ စိုက်ပျိုးရေးလုပ်ငန်းများတွင် လိုအပ်လျက် ရှိသော သွင်းအားစုများအား စိုက်ပျိုးရာသီအချိန်မီရရှိစေရေး၊ အရည်အသွေးပြည့်မီစွာဖြင့် ဈေးနှုန်း သက်သာစွာ ဝယ်ယူအသုံးပြုနိုင်ရေးတွက် အထွေထွေအုပ်ချုပ်ရေးဦးစီးဌာန၊ မြို့နယ်စိုက်ပျိုးရေး ဦးစီးဌာန၊ မြို့နယ်စားသုံးသူရေးရာဦးစီးဌာန၊ မြန်မာ့လယ်ယာဖွံ့ဖြိုးရေးဘဏ်၊ မြို့နယ်ကျေးလက် ဒေသဖွံ့ဖြိုးတိုးတက်ရေးဦးစီးဌာန၊ မြို့နယ်သမဝါယမဦးစီးဌာနတို့ဖြင့် မြို့နယ်အဆင့် ယူရီးယား ဓာတ်မြေဩဇာ ဝယ်ယူဖြန့်ဖြူးရောင်းချရေးလုပ်ငန်းကြီးကြပ်မှုကော်မတီကို ဖွဲ့စည်းပြီး ညောင်ဦးမြို့ နယ်အတွင်းရှိ ကန်တော်ကျေးရွာ၊ လက်ပန်ခြေပေါ်ကျေးရွာ၊ မြေနဲလေးကျေးရွားများရှိ တောင်သူ များအား ယူရီးယားဓာတ်မြေဩဇာအိတ်(၁၅၀)အိတ်အား (၉.၉.၂၀၂၅)ရက်နေ့တွင် ဖြန့်ဖြူးရောင်းချ ပေးခဲ့ကြောင်း သိရသည်။

DOCA(မန္တလေး)

    ဘူးပင်သည် စိုက်ပျိုးရန်လွယ်ကူသော အပင်ဖြစ်၍ မျိုးကို သီးသန့်ရွေးချယ်ခြင်းမျိုးမရှိဘဲ အပင်တွင် အသီးသီးသည့်အပေါ် မိမိကြိုက်နှစ်သက်သော အသီးကို မျိုးအဖြစ်ထား၍ မျိုးစေ့ ရယူပါသည်။ ပျိုးထောင်စိုက်ပျိုးခြင်းနှင့် တိုက်ရိုက်မျိုးစေ့ချစိုက်ပျိုးခြင်းဟူ၍ စိုက်ပျိုးနည်း (၂) မျိုးရှိပါသည်။ ပျိုးထောင်စိုက်ပျိုးရာတွင် မြေဆွေးထည့်ထားသော ပလပ်စတစ်အိတ်တွင် ဘူးစေ့(၂) စေ့ခန့်ထည့်၍ စိုက်ပြီး (၁၀) ရက်ခန့်အကြာ ပျိုးပင်ပေါက်လာပါသည်။ အပင်အရွယ် (၃) ရွက် မှ (၄) ရွက်ထွက်လျှင် မိမိစိုက်ပျိုးလိုသည့် နေရာသို့ ရွေ့ပြောင်းစိုက်ပျိုးနိုင်ပါသည်။ ဘောင်ဖြင့် စိုက်ပျိုးရာတွင် မြေဆွေးများမြေဩဇာများ အချိုးညီမျှစွာပြုပြင်ထားသော မြေကို စိုက်ဘောင်အဖြစ် အလျား(၅) ပေ၊ အနံ(၃) ပေ၊ အမြင့် (၁) ပေခန့် ဘောင်ပြုလုပ်ပြီး (၃) လက်မခန့် အနက်ရှိ (၁) ခြားကျင်းငယ်များတူး၍ ဘူးစေ့ (၃) စေ့ မှ (၅) စေ့ခန့် အထိ စိုက်ရပါသည်။ ဘူးများပေါက်လာသည့်အပေါ် ၁ ကျင်းလျှင် အနည်းဆုံး (၂) ပင်ခန့်သာ ချန်ထားပြီး ကျန်အပင်များကို ဖယ်ရှားပစ်ရပါသည်။ ယခုအပတ်တွင် ဘူးသီးဈေးနှုန်းမှာ အလုံးကြီး (၁) လုံးလျှင် (၂၀၀၀) ကျပ်နှင့် အလုံးလတ် (၁) လုံးလျှင် (၁၅၀၀) ကျပ် ဖြင့် အရောင်းအဝယ်ဖြစ်လျက်ရှိကြောင်း သိရှိရပါသည်။

(DOCA) ဧရာဝတီ

      ဖျံပင်မှ တူးဖော်ရရှိသည့် ဖျံဥ အရိုင်းများကို အင်းအိုင်ချောင်းမြောင်းများတွင်လည်းကောင်း၊ ရေကန်တွင်လည်းကောင်း၊ ရွံများ၊ အမွေးအမျှင်များ ကင်းစင်အောင်ရေဖြင့် စင်ကြယ်စွာ ဆေးကြော ရပါသည်။ ဖျံဥအရိုင်းများကို အဝယ်ဒိုင်၊ အလုပ်ရုံများကို အစိမ်းလိုက်ရောင်းချပါသည်။ ရေဆေးပြီးဥ များကို အာလူးအခွံခွာသကဲ့သို့ အခွံခွာရပါသည်။ အခွံခွာပြီး ဖျံဥအရိုင်းများကို  အသင့်ပြုလုပ်ထားသော ခုံပေါ်တွင် လုံးဝန်းသော ဥအဆင့်မှ ပါးလွှာသော အချပ်ကလေးများဖြစ်အောင် ပြုလုပ်ရပါသည်။ ရရှိလာသော ဖျံဥချပ်များကို မီးသွေးဖိုတွင် ကန့်(Sulpha) အနည်းငယ်ဖြူးလျက် အပူချိန် (၃၀° C) ဖြင့်  (၂၄) နာရီခန့်ကြာ အခြောက်ခံအပူပေးခြင်းဖြင့် ဖျံဥခြောက် ကုန်ချောအဆင့်သို့ ရရှိပါသည်။ ဖျံဥ အစို (၉) ပိဿာလျှင် အခြောက် (၁) ပိဿာခန့်ရရှိပြီး၊ ကျွမ်းကျင်လုပ်သားဖြင့် ပြုလုပ်ပါက အစို (၈) ပိဿာလျှင် အခြောက် (၁) ပိဿာခန့် ရရှိပါသည်။ ဖျံဥခြောက်ကို အမှုန့်ပြုလုပ်၍ နိုင်ငံအတွင်း အသားတုပြုလုပ်၍ စားသောက်ုကုန်ဟင်းလျာ အမျိုးမျိုး ချက်ပြုတ်စားသောက်ကြောင်း သိရပါသည်။

(DOCA) ဧရာဝတီ

               မန္တလေးတိုင်းဒေသကြီး ၊ ကျောက်ဆည်ခရိုင်တွင် ဆီထွက်သီးနှံမျိုးစုံ စိုက်ပျိုးလျက်ရှိရာ ၄င်းသီးနှံများအနက် ဆီထွက်သီးနှံတစ်မျိုးဖြစ်သော နေကြာသီးနှံကိုလည်း တောင်သူများမှ သီးထပ်သီးညှပ် စိုက်ပျိုးသည့်အပြင် သီးသန့်ဧကအလိုက် စိုက်ပျိုးလျက်ရှိပါသည်။ ၂၀၂၅-၂၀၂၆ ဘဏ္ဍာနှစ်၊ ကျောက်ဆည်ခရိုင်အတွင်း (၆၇၂၈)ဧက စိုက်ပျိုးခဲ့ကြောင်း ၊ ကျောက်ဆည်မြို့နယ် တွင်(၃၁၆၇)ဧက စိုက်ပျိုးနိုင်ခဲ့ပြီး(၁၄၉၂)ဧက ရိတ်သိမ်းပြီးစီးပြီဖြစ်ကြောင်း ၊ သက်ဆိုင်ရာဌာန၏ စာရင်းများအရသိရှိရပါသည်။ နေကြာ(မိုး) စိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ အပါအဝင်(၄၀၀၀၀၀/-)ကျပ်ခန့် ကုန်ကျကြောင်း ၊ ယခုအချိန်တွင် နေကြာများ ဖြိုင်ဖြိုင်ရိတ်သိမ်းနေပြီဖြစ်ကြောင်း ၊ နေကြာစျေးနှုန်းအနေဖြင့် တစ်တင်းလျှင်(၅၈၀၀၀/-)ကျပ် ဈေးနှုန်းများဖြင့် အရောင်းအဝယ်ဖြစ်နေကြောင်း ၊ တောင်သူများမှ ကျောက်ဆည်မြို့ပေါ်ရှိပွဲရုံများသို့ လာရောက်ရောင်းချကြကြောင်း ၊ ပွဲရုံများမှတဆင့် ရန်ကုန်၊မန္တလေးမြို့များသို့ တင်ပို့ရောင်းချကြကြောင်း၊ အထွက်နှုန်းအနေဖြင့် (၂၀-၂၅)တင်းခန့်ထွက်ရှိကြောင်း၊ အကျိုးအမြတ်အနေဖြင့် (၇၆၀၀၀၀/-)ကျပ် မြတ်ခဲ့ကြောင်း ၊ နေကြာ စိုက်ပျိုးသော တောင်သူတစ်ဦး၏ ပြောကြားချက်အရသိရှိရပါသည်။

DOCA(မန္တလေး)

            မန္တလေးတိုင်းဒေသကြီး၊ ကျောက်ဆည်ခရိုင်သည် ဆည်ရေသောက်ဒေသဖြစ်သောကြောင့် သီးနှံမျိုးစုံစိုက်ပျိုး ဖြစ်ထွန်းလျက်ရှိရာ ၎င်းသီးနှံများအနက် ပဲစဉ်းငုံ(မိုးဦး)ကို ၂၀၂၅-၂၀၂၆ ဘဏ္ဍာနှစ်တွင် ကျောက်ဆည်မြို့နယ်တွင် (၉၄၀)ဧက၊စဉ့်ကိုင်မြို့နယ်တွင်(၄၅၈)ဧက၊မြစ်သား မြို့နယ်တွင်(၃၀၂)ဧက ၊ စုစုပေါင်း(၁၇၀၀)ဧက စိုက်ပျိုးထားကြောင်း သက်ဆိုင်ရာဌာန၏ စာရင်းများအရသိရှိရပါသည်။ ပဲစဉ်းငုံကို သီးသန့်စိုက်ပျိုးမှုများရှိသလို သီးထပ်သီးညှပ်အဖြစ်လည်း စိုက်ပျိူးကြကြောင်း ၊ အများဆုံးစိုက်ပျိုးသောမျိုးများမှာ ကြေးနီရောင်တဘက်လှဲမျိုး၊ ရွှေဝါရောင် လုံးသေးဒင်္ဂါးမျိုးများကို အများဆုံးစိုက်ပျိုးကြကြောင်း၊ မေလနှင့်ဇွန်လများတွင် စတင်စိုက်ပျိုးခဲ့ပြီး ဖေဖော်ဝါရီလနှင့်မတ်လ များတွင် စတင်ထွက်ပေါ်မည်ဖြစ်ကြောင်း ၊ ယခုအချိန်တွင် မိုးရွာသွန်းမှု ကောင်းသောကြောင့် ပဲစဉ်းငုံအပင်များ အသီးအပွင့်ဝေဝေဆာဆာဖြင့် အောင်မြင်ဖြစ်ထွန်းလျက်ရှိ ကြောင်း ၊ တစ်ဧကကုန်ကျစရိတ် အနေဖြင့် မျိုး၊ သွင်းအားစု၊ လုပ်သားခ အပါအဝင် စုစုပေါင်း (၃၀၀၀၀၀/-)ကျပ် ဝန်းကျင်ခန့် ကုန်ကျကြောင်း ၊ ယခင်နှစ် အထွက်နှုန်းအနေဖြင့် (၁၀-၁၁)တင်းခန့် ထွက်ရှိခဲ့ကြောင်း၊စျေးနှုန်းအနေဖြင့် တစ်တင်းလျှင် (၁၀၈၀၀၀/-)ကျပ် စျေးနှုန်းရှိခဲ့ပြီး အကျိုးအမြတ် အနေဖြင့်(၇၈၀၀၀၀/-)ကျပ်ခန့်မြတ်ခဲ့ကြောင်း ၊ ယခုအချိန်တွင် ပဲစဉ်းငုံများ ထွက်ပေါ်ခြင်းမရှိသေး သော်လည်း စျေးနှုန်းအနေဖြင့် တစ်တင်းလျှင် (၇၃၀၀၀/-)ကျပ် ဈေးနှုန်းများဖြင့် အရောင်းအဝယ် ဖြစ်နေကြောင်းပွဲရုံများမှသိရှိရပါသည်။ ပဲစဉ်းငုံကို ပဲဟင်း ၊ ပဲကြော် ၊ ပဲစဉ်းငုံ အသီးကို အစိမ်းပြုတ်၍ စားသုံးကြပါသည် ။ ပဲစဉ်းငုံ စားသုံးခြင်းဖြင့်ပန်းနာရင်ကြပ်ရောဂါများကိုလည်း ပျောက်ကင်း စေသည့်အပြင်သွေးအားနည်းရောဂါ၊သွေးတိုးကိုကျစေပြီးကိုယ်ခံအားစနစ်ကိုကောင်းမွန်စေကြောင်း ၊ ပဲစင်းငုံထဲတွင် ပိုတက်စီယမ်သတ္တုဓာတ် အဓိကအများဆုံးပါရှိပြီး ၎င်းဓာတ်က ခန္ဓာကိုယ်ထဲ ရောက်သွားသောအခါ ဓာတ်ပြုပြီးနောက် သွေးဖိအားကို လျှော့ချပေးပါသည် ။ ထို့ကြောင့် သွေးတိုးရောဂါရှိသူများအနေဖြင့် ပဲစင်းငုံကို နေ့စဉ် စားပေးသင့်သည် ။ ပရိုတင်းဓာတ် အပြည့်အဝပါရှိသည့် ပဲစင်းငုံကို စားပေးခြင်းဖြင့် ဆဲလ်များ၊ တစ်သျှူးများ၊ ကြွက်သားများ နှင့် အရိုးများကို ကောင်းစွာတည်ဆောက်စေကာ ခန္ဓာကိုယ်ကြီးထွားဖွံ့ဖြိုးစေကြောင်း ကျန်းမာရေး စာစောင်များမှ လေ့လာသိရှိရပါသည် ။ ပဲစဉ်းငုံ စားသုံးခြင်းဖြင့် ကျန်းမာရေး အကျိုးကျေးဇူးများ ရရှိသဖြင့် စားသုံးသင့်ပါကြောင်းရေးသား တင်ပြအပ်ပါသည်။

DOCA(မန္တလေး)