သတင်းနှင့် လှုပ်ရှားမှုများ

ကော့မှူးမြို့နယ်၊ ဖေဖော်ဝါရီလ  (၂၅) ရက်

            ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ် လာဝတီကျေးရွာရှိ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ စိုက်ပျိုးရေးဦးစီးဌာနမှ နွေစပါးဧက (၁၀၀)စံပြကွက်တွင် နွေစပါးစိုက်ပျိုး ဖြစ်ထွန်း အောင်မြင်နေမှုအခြေအနေအား ဖေဖော်ဝါရီလ (၂၁)ရက်နေ့၊ နေ့လည်(၁၂:၀၀)နာရီအချိန်တွင် ကွင်းဆင်းကြည့် ရှု့စစ်ဆေးခဲ့ကြကြောင်း သိရသည်။

            ထိုသို့ကွင်းဆင်းစစ်ဆေးရာတွင် ကော့မှူးမြို့နယ်မှ နွေစပါးစိုက်ပျိုးမှုကြီးကြပ်ရေးကော်မတီမှ မြို့နယ် အထွေထွေအုပ်ချုပ်ရေးမှူးဦးစီးဌာနမှ ဒုတိအုပ်ချုပ်ရေးမှူး ဦးစည်သူ၊ မြို့နယ်မြေစာရင်းဦးစီးမှူး၊ မြို့နယ်စိုက်ပျိုး ရေးဦးစီးဌာန၊ မြို့နယ်စားသုံးသူရေးရာဦးစီးဌာနမှ တာဝန်ရှိသူတို့သည် ကော့မှူးမြို့နယ်၊ လာဝတီကျေးရွာရှိ နွေစပါးဧက(၁၀၀)စံပြကွက်တွင် တိုက်ရိုက်အစေ့ချကိရိယာ (Seeder)ဖြင့် နွေစပါးစိုက်ပျိုးဖြစ်ထွန်းအောင်မြင် နေမှုအခြေအနေနှင့် နွေစပါးစိုက်တောင်သူများအား ကော့မှူးမြို့နယ်အတွင်း နွေစပါးများကို လျာထားဧက ပြည့်မှီနိုင်ရေးနှင့် လျာထားချက်ကျော်လွန် စိုက်ပျိုးနိုင်ပါက ဒေသတွင်းဆန်ဖူလုံမှုကို တစ်ဖက်တစ်လမ်းမှ အထောက်အကူဖြစ်စေမည် ဖြစ်သောကြောင့် နွေစပါးစိုက် တောင်သူများအနေဖြင့် ကြိုးပမ်းလုပ်ဆောင်သွား ကြရန်လိုကြောင်း၊ လက်ရှိအချိန်စိုက်ပျိုးပြီးစီးတဲ့ နွေစပါးစိုက်ခင်းတွေကို သီးနှံအထွက်နှုန်းကောင်းမွန်စေရေးတို့ အတွက် စိုက်ပျိုးရေးအသိပညာပေးဆွေးနွေးပြောကြားခဲ့ပြီး စံပြဧက(၁၀၀)စိုက်ခင်းတွင် နွေစပါးစိုက်ပျိုး ဖြစ်ထွန်းနေမှုအခြေအနေအား ကွင်းဆင်းကြည့်ရှု့စစ်ဆေးခဲ့ကြောင်း သိရသည်။

DOCA(ရန်ကုန်)                                                                                                         

ကော့မှူးမြို့နယ်၊ ဖေဖော်ဝါရီလ  (၂၅) ရက်

            ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ် အထွေထွေအုပ်ချုပ်ရေးဦးစီးဌာန၏ အစည်းဝေးခန်းမ၌ ရပ်ကွက်ကျေးရွာများရှိ အုပ်ချုပ်ရေးမှူးများ၊ စာရေးများ၊ မြို့နယ်ဌာနဆိုင်ရာ တာဝန် ရှိသူများနှင့် ဖေဖော်ဝါရီလ (၁၈)ရက်နေ့၊ နံနက်(၀၉:၃၀)နာရီအချိန်တွင် လုပ်ငန်းညှိနှိုင်း အစည်းအဝေးကျင်းပ ပြုလုပ်ခဲ့ကြောင်း သိရသည်။

            အဆိုပါလုပ်ငန်းညှိနှိုင်းအစည်းအဝေးတွင် မြို့နယ်စီမံအုပ်ချုပ်ရေးအဖွဲ့ ဥက္ကဌဦးမျိုးမင်းက တိုင်းဒေသကြီး အဆင့် ဌာနဆိုင်ရာလုပ်ငန်းညှိနှိုင်းအစည်းအဝေး အမှတ်စဉ် (၂/၂၀၂၅)မှ နိုင်ငံတော် အကြီးအကဲ လမ်းညွှန်ချက် များဖြစ်သော နိုင်ငံတော်မှချမှတ်သည့် မူဝါဒများကိုဌာနဆိုင်ရာများက အကောင်အထည်ဖော် ဆောင်ရွက် ရမည်ဖြစ်၍ အလေးထားလိုက်နာဆောင်ရွက်ရန်နှင့် ၂၀၂၅ ခုနှစ်အတွင်း ကျင်းပပြုလုပ်မည့် အထွေထွေ ရွေးကောက်ပွဲအောင်မြင်စွာကျင်းပနိုင်ရေး၊ ဒေသသာယာဝပြောရေးနှင့် စားရေးရိက္ခာဖူလုံစေရေး၊ လယ်ယာ စိုက်ပျိုးရေး၊ စက်မှုဝန်ဆောင်မှု ကဏ္ဍများတိုးတက်မြင့်မားစေရေး၊ ဆေးရုံတိုင်းတွင် ဆရာဝန်ရှိစေရေးနှင့် ကျေးလက်ဒေသများရှိ တိုက်နယ်ဆေးရုံများတွင် ကျန်းမာရေးဝန်ထမ်းများ တာဝန်ထမ်းဆောင်နိုင်ရေး၊ ဒေသအတွင်း ကျားဖြန့်လုပ်ငန်းများမရှိစေရေး၊  ၂၀၂၁ ခုနှစ်မှစ၍ လမ်း၊ တံတား၊ တာတမံ၊ ဆည်မြောင်းများ ဆောင်ရွက်ချက်များကို နှစ်အလိုက် လုပ်ငန်းဆောင်ရွက်မှုမှတ်တမ်းဓာတ်ပုံများနှင့်အတူ ပြုစုတင်ပြရန်၊ ၂၀၂၅ခုနှစ် နွေရာသီသည် ပိုမိုပူပြင်းလာမည်ဖြစ်၍ မီးဘေးအန္တရာယ်မဖြစ်စေရေးဆောင်ရွက်ရန်၊ ပြည့်သူ့စစ်မှု ထမ်းဆင့်ခေါ်ရေး ဆောင်ရွက်ခြင်းဆိုင်ရာအချက်များ၊ သတ်မှတ်ဘဏ္ဍာနှစ်အတွင်းရှိ ပြီးစီးဆောင်ရွက်ရန်၊ ဌာန ဆိုင်ရာများအနေဖြင့် ထူးခြားဖြစ်စဉ်များရှိပါက အချိန်နှင့်တပြေးညီတင်ပြ ရန်၊ တရားမဝင်ကုန်သွယ်မှု တိုက်ဖျက်ရေးကိစ္စရပ်များ၊ ဒေသအတွင်းတောမီးရှို့ခြင်း၊ သစ်ရွက် ခြောက်များမီးရှို့ခြင်းများမပြုလုပ်ကြရန်၊ လုံခြုံမှု အဆင့်အတန်းရှိသော ရုံစာများ လုံခြုံရေးကျိုး ပေါက်မှုမရှိစေရေး၊ စစ်မှုထမ်းဥပဒေ၊ နည်းဥပဒေများ၊ ရပ်ကွက်၊ ကျေးရွာ အုပ်ချုပ်ရေးမှူးများအနေ ဖြင့် နားလည်သဘောပေါက်စေရေး ရှင်းလင်းဆွေးနွေးသွားရန် စသည်တို့အား ရှင်းလင်းပြောကြားခဲ့ပြီး လုပ်ငန်းညှိနှိုင်းအစည်းအဝေးသို့ တက်ရောက်လာသော ဌာနဆိုင်ရာ တာဝန်ရှိသူများ ရပ်/ကျေး အုပ်ချုပ်ရေးမှူးများက ၂၀၂၅ ခုနှစ်အတွင်း ကျင်းပပြုလုပ်မည် အထွေထွေရွေးကောက်ပွဲ အောင်မြင် စွာ ကျင်းပနိုင်ရေးအတွက် ပူးပေါင်းဆောင်ရွက်ကြမည့်လုပ်ငန်း အစီအစဉ်များအား ညှိနှိုင်းဆွေးနွေး ခဲ့ကြကြောင်း သိရသည်။ 

DOCA(ရန်ကုန်)                                                                                                         

သုံးခွမြို့နယ်၊ ဖေဖော်ဝါရီလ  (၂၄) ရက်

          ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ်အတွင် Oline Sale ရောင်းချ ခြင်းနှင့်ပတ်သတ်၍ မှတ်ပုံတင်လျှောက်ထားသည့် အမှတ်(၃၀) တပင်ရွှေထီးလမ်း (၂)ရပ်ကွက်ရှိ Warso collection ဖက်ရှင်အသုံးဆောင်ပစ္စည်းများ၊ အထည်အလိပ်၊ အဝတ်အထည်နှင့် ဆက်စပ် ပစ္စည်းများ၊ ဖန်စီပစ္စည်းများ၊ အလှကုန်ပစ္စည်းများ၊ လူသုံးကုန်ပစ္စည်းများ ရောင်းချသည့်ဆိုင်သို့ စားသုံးသူရေးရာ ဦးစီးဌာနမှ စစ်ဆေးရေးအရာရှိများနှင့် ဝန်ထမ်းများသည် ဖေဖော်ဝါရီလ (၂၀)ရက်နေ့ ၊ နေ့လည် (၀၂:၃၀)နာရီအချိန်တွင် မြေပြင်ကွင်းဆင်းစစ်ဆေးခဲ့ကြောင်း သိရသည်။

အဆိုပါ ကွင်းဆင်းစစ်ဆေးရာတွင် စစ်ဆေးရေးအရာရှိမှ Online စနစ်ဖြင့် ရောင်းချခြင်း လုပ်ငန်းများနှင့် ပတ်သတ်၍ အချက်အလက်နှင့် ကိုက်ညီမှုရှိ/မှရှိ စစ်ဆေးခြင်း၊ အလှကုန်ပစ္စည်းများ လူသုံးကုန်ပစ္စည်းများတွင် မြန်မာဘာသာဖြင့် ကုန်အညွှန်းအမှတ်အသား ပြည့်စုံစွာ ပါဝင်ခြင်းရှိ/မရှိ ဈေးကွက်စောင့်ကြည့် စစ်ဆေးခြင်းနှင့် Oline စနစ်ဖြင့် ရောင်းချခြင်းလုပ်ငန်းကို အရေးကြီးကုန်စည် နှင့် ဝန်ဆောင်မှုဥပဒေအဖြစ် သတ်မှတ်ထားကြောင်း အပြင်အခြားသိကောင်းစရာများအား အသိ ပညာပေး ကွင်းဆင်းစစ်ဆေးခဲ့ကြောင်း သိရသည်။

DOCA(ရန်ကုန်)                                                                                                         

ဒလမြို့နယ် ၊ ဖေဖော်ဝါရီလ  (၂၄) ရက်

          ရန်ကုန်တိုင်းဒေသကြီး၊ တွံတေးခရိုင်၊ ဒလမြို့နယ်၌ ဈေးကွက်အတွင်းဖြန့်ဖြူးရောင်းချ လျက်ရှိသော ဈေးနှုန်းအခြေအနေအား ဖေဖော်ဝါရီလ (၂၀)ရက်နေ့၊ နံနက်(၁၀:၃၀)နာရီအချိန်တွင် ဒလမြို့ပေါ်ရပ်ကွက်များရှိ ဆေးဆိုင်များသို့ တာဝန်ရှိသူများနှင့် ကွင်းဆင်းစစ်ဆေးခဲ့ကြောင်း သိရသည်။

          ထိုသို့ကွင်းဆင်းစစ်ဆေးခဲ့ရာတွင် စားသုံးသူရေးရာဦးစီးဌာန ရန်ကုန်တောင်ပိုင်းခရိုင်ဦးစီးမှူး ရုံး၏ ညွှန်ကြားမှုဖြင့် စားသုံးသူရေးရာဦးစီးဌာန တွံတေးမြို့နယ်တာဝန်ခံ ဦးသန်းနိုင်နှင့် မြို့နယ်စည် ပင်သာယာရေးအဖွဲ့မှ ဈေးတာဝန်ခံ ဦးချက်တို့ ပူးပေါင်းကာ မြို့ပေါ်ရပ်ကွက်များရှိ မောင်မောင်ဆေးဆိုင်၊ ကမာကဆစ်ရပ်ကွက်နှင့် စိန်ထွန်းဆေးဆိုင် ကမာကဆစ်ရပ်ကွက်တို့ရှိ ဆေးဆိုင်များတွင် ဖြန့်ဖြူးရောင်းချ လျက်ရှိသော အကိုက်အခဲပျောက်ဆေး၊ သွေးကျဆေး၊ သွေးကျဲဆေး၊ လေဆေး၊ လေဆေး (ကလေး)၊ အာရုံကြောဆေး၊ အားဆေးစသည့် လူသုံးများသော ဆေးဝါးများ၏ နိုဝင်ဘာ၊ ဒီဇင်ဘာ၊ ဇန်နဝါရီနှင့်ဖေဖော်ဝါရီလများတွင် ဈေးနှုန်းအတက်အကျ ပြောင်းလဲမှုအခြေအနေ၊ ဆေးဝါးထားသိုမှုနှင့် ဖြန့်ဖြူးရောင်းချမှုစနစ်များ၊ စံညွှန်းမညီဆေးဝါးများ၊ သက်တမ်းကုန်ဆေးဝါးများ၊ စပ်ဆေးများရောင်းချမှု ရှိ/မရှိ စစ်ဆေးခဲ့ပြီး စားသုံးသူရေးရာဦးစီးဌာန အနေဖြင့် ကုန်စည်(သို့မဟုတ်)ဝန်ဆောင်မှုနှင့်စပ်လျဉ်း၍ စားသုံးသူနစ်နာဆုံးရှုံးမှုများ၊ စားသုံးသူ များဘေးအန္တရာယ်ရှိသည်ဟု ယူဆရသော ကုန်စည်(သို့မဟုတ်) ဝန်ဆောင်မှုများနှင့် ပတ်သတ်၍ တိုင်ကြားလာမှုအပေါ် စုံစမ်းစစ်ဆေးမှုများ ပြုလုပ်၍ စားသုံးသူ ကာကွယ်ရေးဥပဒေနှင့်အညီ ဖြေရှင်းဆောင်ရွက်ပေးလျက်ရှိကြောင်း စားသုံးသူကာကွယ်ရေး အသိပညာပေးဆွေးနွေးပြောကြားကာ ဈေးကွက်အတွင်း ကွင်းဆင်းစစ်ဆေးခဲ့ကြောင်း သိရသည်။

DOCA(ရန်ကုန်)                                

ကွမ်းခြံကုန်းမြို့နယ်၊ ဖေဖော်ဝါရီလ  (၂၄) ရက်

ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ် စားသုံးသူရေးရာဦးစီးဌာန မြို့နယ်တာ ဝန်ခံရုံးမှ မြို့နယ်တာဝန်ခံနှင့် ဝန်ထမ်းများသည် မြို့နယ်စိုက်ပျိုးရေးဦးစီးဌာန ဦးစီးအရာရှိမှ တိုင်းစိုက်ပျိုးရေးဦးစီးဌာန၏ ညွှန်ကြားချက်အရ ကွမ်းခြံကုန်းမြို့နယ်ရှိ ဓာတ်မြေဩဇာအရောင်းဆိုင်များသို့ ကွင်းဆင်းစစ်ဆေးရာတွင် ပူးပေါင်းဆောင်ရွက်ပေးပါရန် ညှိနှိုင်း မှုအရ (၂၄.၂.၂၀၂၅)ရက်နေ့၊ နံနက်(၁၁:၀၀)နာရီအချိန်တွင် မြို့နယ်အတွင်းရောင်းချနေသော ဓာတ်မြေဩဇာ အရောင်းဆိုင်များသို့ ကွင်းဆင်းစစ်ဆေးခဲ့ကြပါသည်။

ဓာတ်မြေဩဇာအရောင်းဆိုင်များဖြစ်သော ဒေါ်ဇာဝင်းဓာတ်မြေဩဇာဆိုင်၊ စန်းသော်တာ (မျိုးစေ့၊ စိုက်ပျိုးရေးဆေးနှင့်ဓာတ်မြေဩဇာ)အရောင်းဆိုင် ၊ မဟာသစ်(KMA Family)ပိုးသတ်ဆေး နှင့်စိုက်ပျိုးရေး ပစ္စည်းအမျိုးမျိုးအရောင်းဆိုင် စသည့်ဆိုင်များသည် ကွမ်းခြံကုန်းမြို့နယ် ဈေးပိုင်း ရပ်ကွက်တွင် ရောင်းချနေသော ဆိုင်များဖြစ်ပြီး ၎င်းဆိုင်များသို့ မြို့နယ်စိုက်ပျိုးရေးဦးစီးဌာနမှ ဦးစီးအရာရှိ ဦးကြည်စိန်မှ ဓာတ်မြေဩဇာများကို သတ်မှတ်ရည်ညွှန်းဈေးဖြင့်သာ ရောင်းချသွားရန်နှင့်စံချိန်စံညွှန်း အရည်အသွေး ပြည့်မှီသောတံဆိပ်များကိုရွေးချယ်၍ ရောင်းချသွားကြရန် မြို့နယ်စားသုံးသူရေးရာဦးစီး ဌာနမှ မြို့နယ်တာဝန်ခံ ဒေါ်နွယ်နွယ်အေးက အလေးချိန်ပြည့်ဝမှန်ကန် မှုရှိစေရေး၊ သတ်မှတ်ဈေးနှုန်းထက် ကျော်လွန်၍ ရောင်းချမှုမရှိစေရေး၊ သတ်မှတ်စံချိန်စံနှုန်းနှင့် ကိုက်ညီမှုမရှိသော တရားမဝင်ဓာတ်မြေဩဇာ များ ရောင်းချမှုမရှိစေရေးတို့ကို ဓာတ်မြေဩဇာ အရောင်းဆိုင်ပိုင်ရှင်များနှင့် တွေ့ဆုံ ဆွေးနွေးခဲ့ကြပါသည်။

ဓာတ်မြေဩဇာအရောင်းဆိုင်များသို့ ကွင်းဆင်းစစ်ဆေးခဲ့ရာတွင် မြို့နယ်စိုက်ပျိုးရေးဦးစီး ဌာန၊ မြို့နယ်ထွေအုပ်၊ မြို့နယ်သမဝါယမဦးစီးဌာန၊ မြို့နယ်ကျေးလက်ဖွံ့ဖြိုးရေးဦးစီးဌာန၊ မြို့နယ် စားသုံးသူရေးဦးစီးဌာနတို့ ပူးပေါင်းဆောင်ရွက်ခဲ့ကြောင်း သိရသည်။

DOCA(ရန်ကုန်)