ပြည်ပကုန်သွယ်မှုသတင်းများ

            ၂၀၂၅ ခုနှစ်ဇန်နဝါရီလမှ အောက်တိုဘာလအလယ်ထိတွင် ဗီယက်နမ်၏ တင်ပို့မှုတန်ဖိုးမှာ အမေရိကန်ဒေါ်လာ ၃၆၈ ဘီလီယံရောက်ရှိခဲ့ပြီး ၂၀၂၄ ခုနှစ်တူညီသည့်ကာလနှင့်နှိုင်းယှဉ်ပါက ၁၆ ရာခိုင်နှုန်းမြင့်တက်ခဲ့ကာ ၂၀၂၄ ခုနှစ် တစ်နှစ်လုံး စာတင်ပို့မှုတန်ဖိုးဖြစ်သည့် အမေရိကန်ဒေါ်လာ ၄၀၅ ဘီလီယံနှင့် နီးကပ်နေပြီဖြစ်ကြောင်း ဗီယက်နမ်အကောက်ခွန်ဦးစီးဌာန၏ အဆိုအရ သိရပါသည်။ အဓိကဈေးကွက်များတွင် ကုန်သွယ်ရေးအတားအဆီးများနှင့် အကောက်ခွန် စီမံချက်များက ကမ္ဘာ့ကုန်သွယ်ရေးအပေါ် ဆက်လက်သက်ရောက်နေသော်လည်း ထိုကာလ တင်ပို့မှုတန်ဖိုးမှာ အမေရိကန်ဒေါ်လာ ၅၂ ဘီလီယံမြင့်တက်ခဲ့ကြောင်း သိရပါသည်။ ကုမ္ပဏီများသည်လည်း အမေရိကန်အကောက်ခွန်မမြင့်တက်မီ ထုတ်လုပ်မှုများကို အရှိန်မြှင့်တင်ခဲ့ကြပြီး သတ္တုတူးဖော်ရေးနှင့် စွမ်းအင်ကဏ္ဍမှ အထွက်နှုန်းမြင့်တက်ခဲ့ကာ တင်ပို့မှုစွမ်းရည်တွင် သိသာစွာ ပူးပေါင်းပါဝင်ခဲ့ကြောင်း သိရပါသည်။ သို့သော် အောက်တိုဘာလ ပထမလဝက်တင်ပို့မှုမှာ နှေးကွေးခဲ့ပြီး အမေရိကန်ဒေါ်လာ ၉.၃၄ ဘီလီယံဖြင့် စက်တင်ဘာလ ပထမလဝက်နှင့်နှိုင်းယှဉ် ပါက ၁၇.၄ ရာခိုင်နှုန်းကျဆင်းခဲ့ကြောင်း သိရပါသည်။ ထိုနှေးကွေးမှုသည် မြင့်မားသော အမေရိကန်အကောက်ခွန်များက သွင်းကုန်ဝယ်လိုအားထက်သန်မှုကို လျှော့ကျစေရန် ခန့်မှန်းရကြောင်း သိရပါသည်။ သို့သော် ကိုယ်ကျိုးစီးပွားကာကွယ်ရေးမူဝါဒများ၊ ပထဝီနိုင်ငံရေး တင်းမာမှုများနှင့် ကမ္ဘာလုံးဆိုင်ရာစီးပွားရေးမသေချာမရေရာမှုများ မြင့်တက်လာခြင်းရှိနေသော်လည်း တင်ပို့မှုမှာ ဂဏန်း ၂ လုံးကြီးထွားမည့်လမ်းကြောင်းပေါ်တွင် တည်ရှိနေကြောင်း သိရပါသည်။ HSBC  ကဗီယက်နမ်၏ ၂၀၂၅ ခုနှစ် GDP ကြီးထွားနှုန်းအား ယခင်က ၆.၆ ရာခိုင်နှုန်းခန့်မှန်းရာမှ ယခုအခါ ၇.၉ ရာခိုင်နှုန်းသို့ တိုးမြှင့်ခန့်မှန်းခဲ့ကြောင်း သိရပါသည်။ အီလတ်ထရောနစ်ကုန် ထုတ်လုပ်ခြင်းနှင့် တင်ပို့ခြင်းသည် ကြီးထွားမှု၏ အဓိကမောင်းနှင်အား အဖြစ် ဆက်လက်တည်ရှိနေကြောင်း သိရပါသည်။ ယခုနှစ်၏ တတိယ ၃ လပတ်ကာလတွင် အမေရိကန်သို့ ဗီယက်နမ်၏ တင်ပို့မှုမှာ ၂၀၂၄ ခုနှစ်တူညီသည့်ကာလနှင့်နှိုင်းယှဉ်ပါက ၃၀ ရာခိုင်နှုန်းကြီးထွားခဲ့သော်လည်း အခြားအာဆီယံနိုင်ငံများမှ တင်ပို့မှုမှာလျှော့ကျခဲ့ကြောင်း သိရပါသည်။ အမေရိကန်ပြင်ပအခြား ဈေးကွက်များနှင့် ကုန်သွယ်ရေးပိုငွေရရှိမှု ကြီးထွားခဲ့ခြင်းကြောင့် ယခုနှစ်၏ တတိယ ၃ လပတ် ကာလပိုငွေရရှိမှုမှာ ပထမနှစ်ဝက်ထက် ၂ ဆကြီးထွားခဲ့ကြောင်း သိရှိရပါသည်။

Vietnam Plus                                                                            

DOCA (ရန်ကုန်)

        ဆော်ဒီအာရေဗျနှင့် ပါကစ္စတန်တို့သည် နှစ်နိုင်ငံ၏ ဘုံစီးပွားရေးအကျိုးစီးပွားများအပေါ် အခြေခံသည့် စီးပွားရေးပူးပေါင်းဆောင်ရွက်မှု မူဘောင်တစ်ခုကို စတင်ရန် သဘောတူညီခဲ့ကြကြောင်း ဆော်ဒီသတင်းအေဂျင်စီ (SPA) က အောက်တိုဘာလ ၂၈ ရက်နေ့တွင် ဖော်ပြခဲ့ကြောင်း သိရပါသည်။

         အဆိုပါ ပူးပေါင်းဆောင်ရွက်မှု မူဘောင်ကို ဆော်ဒီအိမ်ရှေ့မင်းသား Mohammed bin Salman bin Abdulaziz Al Saud နှင့် ပါကစ္စတန်ဝန်ကြီးချုပ် Shehbaz Sharif တို့ အောက်တိုဘာလ ၂၇ ရက်နေ့တွင် Riyadh ၌ တွေ့ဆုံမှုအတွင်း သဘောတူခဲ့ခြင်းဖြစ်ကြောင်း သိရပါသည်။

         SPA မှ ထုတ်ပြန်သော ပူးတွဲကြေညာချက်တွင် နှစ်နိုင်ငံအကြား ကုန်သွယ်ရေးနှင့် ရင်းနှီးမြှုပ်နှံမှု ဆက်ဆံရေးကို ပိုမိုခိုင်မာစေကာ ဘုံအကျိုးစီးပွားများကို အတူတကွဆောင်ရွက်ရန် နှစ်ဖက်စလုံး၏ ဆန္ဒကို အတည်ပြုကြောင်း ဖော်ပြထားပါသည်။

          မူဘောင်၏ တစ်စိတ်တစ်ပိုင်းအနေဖြင့် စီးပွားရေး၊ ကုန်သွယ်ရေး၊ ရင်းနှီးမြှုပ်နှံမှုနှင့် ဖွံ့ဖြိုးတိုးတက်ရေး ကဏ္ဍများတွင် မဟာဗျူဟာမြောက်၊ အကျိုးသက်ရောက်မှု မြင့်မားသော စီမံကိန်းများစွာကို ဆွေးနွေးသွားမည်ဖြစ်ပြီး၊ ဦးစားပေးကဏ္ဍများနေဖြင့် စွမ်းအင်၊ စက်မှုလုပ်ငန်း၊ သတ္တုတူးဖော်ရေး၊ သတင်းအချက်အလက်နည်းပညာ၊ ခရီးသွားလာရေး၊ စိုက်ပျိုးရေးနှင့် စားနပ် ရိက္ခာဖူလုံရေးတို့ဖြစ်ကြောင်း သိရပါသည်။

        နှစ်ဖက်စလုံးသည် လက်ရှိတွင် လျှပ်စစ်ဓာတ်အား ချိတ်ဆက်ရေးစီမံကိန်းနှင့် စွမ်းအင်ပူးပေါင်းဆောင်ရွက်ရေးဆိုင်ရာ သဘောတူညီချက်များအပါအဝင် ပူးတွဲစီးပွားရေးဆိုင်ရာ အစီအစဉ်များစွာကို လေ့လာဆန်းစစ်နေကြကြောင်း သိရှိရပါသည်။

Source : Xinhua                                                                                 

DOCA (ရန်ကုန်)

          ဆီးရီးယား ကြားဖြတ်ခေါင်းဆောင် Ahmed al-Sharaa က ဆီးရီးယားနိုင်ငံသည် ၆လအတွင်း အမေရိကန်ဒေါ်လာ ၂၈ ဘီလီယံ ရင်းနှီးမြှုပ်နှံမှု ရရှိခဲ့ကြောင်း အောက်တိုဘာလ ၂၉ ရက်နေ့တွင် Riyadh မြို့၌ ပြောကြားခဲ့ကြောင်း သိရသည်။

         ဆီးရီးယားနိုင်ငံ၏ ရင်းနှီးမြှုပ်နှံမှု ဥပဒေများကို ပြင်ဆင်ခဲ့ပြီးနောက် ပထမဆုံး ၆လ အတွင်းတွင် အမေရိကန်ဒေါ်လာ ၂၈ ဘီလီယံတန်ဖိုးရှိ ရင်းနှီးမြှုပ်နှံမှုများကို ဆွဲဆောင်နိုင်ခဲ့ကြောင်း  ဆော်ဒီအိမ်ရှေ့မင်းသားနှင့်အတူ လက်ရှိကျင်းပနေသော Future Investment Initiative ညီလာခံတွင် al-Sharaa က ပြောကြားခဲ့ကြောင်း သိရသည်။

        al-Sharaa က ဆီရီးယားနိုင်ငံသည် ဆော်ဒီအာရေဗျ၊ ကာတာ၊ အာရပ်စော်ဘွားများ ပြည်ထောင်စုနှင့် တူရကီတို့နှင့် မိတ်ဖက်များ ထူထောင်ထားပြီး ဘာရိန်းနှင့် ဂျော်ဒန်တို့နှင့်အတူ ရင်းနှီးမြှုပ်နှံမှု စီမံကိန်းများလည်းရှိကြောင်း ပြောကြားခဲ့ပါသည်။ အမေရိကန်ကုမ္ပဏီများသည်လည်း ဒေသတွင်းမိတ်ဖက်များနှင့်အတူ ရင်းနှီးမြှုပ်နှံထားကြောင်း ၎င်းက ထပ်လောင်းပြောကြားခဲ့ကြောင်း သိရသည်။

         ဆီးရီးယားနိုင်ငံကို ရင်းနှီးမြှုပ်နှံမှုတွေကနေတစ်ဆင့် ပြန်လည်တည်ဆောက်လိုကြောင်း al-Sharaa က ပြောကြားခဲ့ပြီး ကမ္ဘာက ၎င်းကို “ကုန်သွယ်ရေးစင်္ကြံ” အဖြစ် အကျိုးခံစားနိုင်ကြောင်း ထပ်လောင်းပြောကြားခဲ့‌ကြောင်း သိရှိရပါသည်။

Source : Xinhua                                                                                 

DOCA (ရန်ကုန်)

            ဗီယက်နမ်အဝတ်အထည်နှင့် အထည်အလိပ်လုပ်ငန်းသည် ဆက်လက်ကြီးထွားနေပြီး ကုမ္ပဏီများသည် ထုတ်လုပ်မှုအရှိန်မြှင့်တင်ရန်၊ ၎င်းတို့၏ထုတ်ကုန်များကိုတန်ဖိုးမြှင့်ရန်၊ စမတ်စက်ရုံများတွင် ရင်းနှီးမြှုပ်နှံရန်နှင့် ကမ္ဘာလုံးဆိုင်ရာဈေးကွက်တွင် ယှဉ်ပြိုင်နိုင်စွမ်းနှင့် စွမ်းရည် မြှင့်တင်ရန်အတွက် အာရုံစိုက်မှုမြင့်တက်လာကြောင်း သိရပါသည်။ ၂၀၂၅ ခုနှစ်၏ ပထမ ၉ လ တွင် ကဏ္ဍသည် အမေရိကန်ဒေါ်လာ ၃၄.၈ ဘီလီယံတန်ဖိုးတင်ပို့ခဲ့ပြီး ၂၀၂၄ ခုနှစ်တူညီသည့် ကာလနှင့်နှိုင်းယှဉ်ပါက ၇.၇ ရာခိုင်နှုန်းမြင့်တက်ခဲ့ကြောင်း သိရပါသည်။ ထိုစွမ်းဆောင်ရည်သည် တစ်နှစ်လုံးတာကာလရည်မှန်းချက် အမေရိကန်ဒေါ်လာ ၄၈ ဘီလီယံပြည့်မီနိုင်မည့်လမ်းကြောင်းပေါ်တွင် တည်ရှိနေကြောင်း သိရပါသည်။ များစွာ‌သောလုပ်ငန်းများသည် နိုဝင်ဘာလအတွက် မှာယူမှုများရရှိထားပြီး ယခုနှစ်၏နောက်ဆုံးလများအတွက် ညှိနှိုင်းဆွေးနွေးမှုများရှိနေကြောင်းလည်း သိရပါသည်။ Hoa Tho အဝတ်အထည်ကော်ပိုရေးရှင်း၏ CEO ဖြစ်သူ Nguyen Ngoc Binh က ဈေးကွက်သည် ထုတ်လုပ်မှုတည်ငြိမ်ရန်နှင့် တင်ပို့မှုကြီးထွားရန် စီမံချက်များလိုအပ်နေကြောင်း ပြောကြားခဲ့ပါသည်။ ကုမ္ပဏီသည် ၂၀၂၅ ခုနှစ်၏ ပထမ ၉ လတွင် ဝင်ငွေအမေရိကန် ဒေါ်လာ သန်း ၁၆၀ နီးပါးရရှိခဲ့ပြီး နှစ်ကုန်ရည်မှန်းချက်၏ ၉၁ ရာခိုင်နှုန်းပြည့်မီပြီဖြစ်ကြောင်း သိရပါသည်။ နှစ်ကုန်ရည်မှန်းချက်ပြည့်မီရန်အတွက် ကုမ္ပဏီသည် စက်ကိရိယာများနှင့် လုပ်သားထု စွမ်းရည်ကိုမွမ်းမံမြှင့်တင်ရန်၊ ထုတ်လုပ်မှုအရည်အသွေးတိုးတက်စေရန်၊ ဈေးကွက်ဝယ်လိုအားနှင့် ထုတ်လုပ်မှုချိန်ညှိရန်နှင့် အနာဂတ်အတွက်စမတ်စက်ရုံမော်ဒယ်များ ပြင်ဆင်ရန် စီစဉ်နေကြောင်း သိရပါသည်။ Binh ကကမ္ဘာလုံးဆိုင်ရာရောင်းလိုအားနှင့် ဝယ်လိုအားမတည်ငြိမ်မှုက ဖိအားများဖြစ်ပေါ်စေကြောင်းပြောကြားခဲ့ပါသည်။ ဥပမာအနေဖြင့် အမေရိကန်ဈေးကွက်သည် စားသုံးကုန်ဈေးနှုန်းများ မြင့်တက်လာမှုကြောင့် စားသုံးမှုနည်းပါးရန် မျှော်မှန်းရပြီး ဥရောပသမဂ္ဂနှင့် ဂျပန်ဈေးကွက်များမှာ အစိမ်းရောင်အသိအမှတ်ပြုထုတ်ကုန်များအတွက် လိုအပ်ချက် မြင့်တက်လာကြောင်း သိရပါသည်။  ဗီယက်နမ်တွင် ၂၀၂၆ ခုနှစ်၌ အနိမ့်ဆုံးလုပ်အားခများ မြင့်တက်လာခြင်းက လုပ်သားထုကုန်ကျစရိတ်များအပေါ် သက်ရောက်မှုရှိစေပြီး လုပ်ငန်းများအား လုပ်သားထုလေ့ကျင့်ခြင်း၊ လူမှုဖူလုံမှုမြှင့်တင်ပေးခြင်းနှင့် အလိုအလျောက်စနစ်များအသုံး ပြုခြင်းတို့တွင် ရင်းနှီးမြှုပ်နှံရန် လှုံ့ဆော်မှုဖြစ်စေခဲ့ကြောင်း သိရှိရပါသည်။

Vietnam Plus                                                                            

DOCA (ရန်ကုန်)

          ၂၀၂၅ ခုနှစ်၏ ပထမ ၉ လတွင် ဗီယက်နမ်သည် အမေရိကန်ဒေါ်လာ ၃.၄ ဘီလီယံတန်ဖိုး ရှိသောပုဇွန်များကို တင်ပို့ခဲ့ပြီး ၃ နှစ်အတွင်းအမြင့်မားဆုံးအဆင့်ထိရောက်ရှိခဲ့ကာ ၂၀၂၄ ခုနှစ် တူညီသည့်ကာလနှင့်နှိုင်းယှဉ်ပါက ၂၂ ရာခိုင်နှုန်းမြင့်တက်ခဲ့ကြောင်း သိရပါသည်။ ဗီယက်နမ် ပင်လယ်စာတင်ပို့သူများနှင့် ထုတ်လုပ်သူများအသင်း (VASEP) ၏အဆိုအရ တရုတ်၊ အမေရိကန်၊ ဥရောပသမဂ္ဂနှင့် CPTPP အုပ်စုတို့ထံမှ ဝယ်လိုအားနာလံထူလာခြင်းနှင့် ဗီယက်နမ်စီးပွားရေး လုပ်ငန်းများက ထုတ်ကုန်ကဏ္ဍများနှင့် ဈေးကွက်များကို လိုက်လျောညီထွေပြောင်းလဲနိုင်မှုတို့ကြောင့် ကြီးထွားမှုအားကောင်းခဲ့ကြောင်း သိရပါသည်။ တရုတ်နှင့် ဟောင်ကောင်သို့ တင်ပို့မှုမှ ဝင်ငွေအမေရိကန်ဒေါ်လာ ၉၆၆ သန်းရရှိခဲ့ပြီး ၆၅ ရာခိုင်နှုန်းမြင့်တက်ခဲ့ကြောင်း သိရပါသည်။ ပို့ကုန်လုပ်ငန်းရှင်များသည် အမေရိကန်၏ ကိုယ်ကျိုးစီးပွားကာကွယ်ရေးအကောက်ခွန် အလားအလာများကို စိုးရိမ်မှုများရှိနေခြင်းကြောင့် အမေရိကန်သို့တင်ပို့မှုမှာ ဝင်ငွေအမေရိကန်ဒေါ်လာ ၅၈၇ သန်းတန်ဖိုးရှိခဲ့ပြီး ၄ ရာခိုင်နှုန်းသာမြင့်တက်ခဲ့ကြောင်း သိရပါသည်။ များစွာသော စီးပွားရေးလုပ်ငန်းများသည် ဈေးကွက်ကွဲပြားရန်နှင့် စွန့်စားရမှုလျှော့ချရန်အတွက် ဥရောပသမဂ္ဂနှင့် အာရှဈေးကွက်များသို့ ကူးပြောင်းရန် အာရုံစိုက်ထားကြောင်း သိရပါသည်။ CPTPP သို့တင်ပို့မှုမှာ အမေရိကန်ဒေါ်လာ ၉၄၁ သန်းနီးပါးရှိပြီး ဂျပန်ကအမေရိကန်ဒေါ်လာ ၄၂၆ သန်းဖြင့် အုပ်စုကို ဦးဆောင်နေကြောင်း သိရပါသည်။ အာရှတွင် တောင်ကိုရီးယားနှင့် တရုတ်တိုင်ပေသို့တင်ပို့မှုမှာ ၁၃ ရာခိုင်နှုန်းနှင့် ၃၆ ရာခိုင်နှုန်း အသီးသီးဖြင့် ဂဏန်း ၂ လုံးကြီးထွားခဲ့ကြောင်း သိရပါသည်။ VASEP ကအမေရိကန်ဈေးကွက်တွင် အခက်အခဲများကြောင့် ပုဇွန်တင်ပို့မှုမှာ စတုတ္ထ ၃ လပတ် ကာလတွင် အနည်းငယ်လျှော့ပါးသွားနိုင်ကြောင်း ခန့်မှန်းခဲ့ပါသည်။ သို့သော်အင်ဒိုနီးရှား၏ပို့ကုန် ထိန်းချုပ်မှုတင်းကျပ်မှုနှင့် အီကွေဒေါ၏ တရုတ်အပေါ်အာရုံစိုက်မှုတို့ကြောင့် ရောင်းချမှုဖိအား လျှော့ကျနိုင်ပြီး ဗီယက်နမ်ပုဇွန်များအတွက် ဥရောပသမဂ္ဂ၊ ဂျပန်နှင့် တောင်ကိုရီးယားတို့တွင် သင့်လျော်ကောင်းမွန် သောအခြေအနေကို ဖန်တီးပေးကြောင်း သိရပါသည်။ အသင်းက ဥရောပသမဂ္ဂသို့တင်ပို့မှုမှာ နှစ်သစ်ကူးပွဲတော်များကြောင့် အပေါင်းလက္ခဏာဆောင်နိုင်ကြောင်း ခန့်မှန်းခဲ့ကြောင်း သိရှိရပါသည်။

Vietnam Plus                                                                            

DOCA (ရန်ကုန်)