ပြည်ပကုန်သွယ်မှုသတင်းများ

    ကမ္ဘောဒီးယားနိုင်ငံသည် ၂၀၂၅ ခုနှစ် ပထမ ၈ လတွင် ကမ္ဘာ့နိုင်ငံပေါင်း ၈၄ နိုင်ငံသို့ လယ်ယာထွက်ကုန် တန်ချိန် ၁၀.၄ သန်းခန့် တင်ပို့ခဲ့ပြီး ၂၀၂၄ ခုနှစ် အလားတူကာလနှင့် နှိုင်းယှဉ်ပါက ၃၅.၆၄ ရာခိုင်နှုန်း တိုးလာပြီး ဝင်ငွေ ကန်ဒေါ်လာ ၃.၆၂၁  ဘီလီယံ ရရှိခဲ့ကြောင်း ကမ္ဘောဒီးယားနိုင်ငံ၊ စိုက်ပျိုးရေး၊ သစ်တောနှင့် ရေလုပ်ငန်း ဝန်ကြီးဌာန (MAFF) ၏ စိုက်ပျိုးရေး အထွေထွေ ဦးစီးဌာနမှ ၁၀-၉-၂၀၂၅ ရက်နေ့က ထုတ်ပြန်သည့် ၂၀၂၅ ခုနှစ် ပထမ (၈) လတာ ကာလအတွင်း သီးနှံတင်ပို့မှု အခြေအနေအစီရင်ခံစာတွင် ဖော်ပြထားသည်။ National Phytosanitary Database တွင် မှတ်တမ်းတင်ထားသော စုစုပေါင်း တင်ပို့မှုမှာ ဆန်မဟုတ်သော သီးနှံတန်ချိန် ၅ သန်းနှင့် စပါးတန်ချိန် ၅.၃ သန်း (စပါးတန်ချိန် ၄.၈၅ သန်းနှင့် ဆန်တန်ချိန် ၄၉၃,၀၀၀ ခန့်) တင်ပို့နိုင်ခဲ့ပြီး ၂၀၂၄ ခုနှစ်ကာလတူထက် ဆန်တန်ချိန် ၈၄ ရာခိုင်နှုန်းအထိ ပိုမိုတင်ပို့နိုင်ခဲ့သည်။ MAFF စိုက်ပျိုးရေးဦးစီးဌာန လက်ထောက်ညွှန်ကြားရေးမှူးချုပ် Mak Seoun က ၂၀၂၅ ခုနှစ် ပထမ (၈) လအတွင်း ကမ္ဘောဒီးယားနိုင်ငံသည် ဆန်အပြင် အဓိကလယ်ယာထွက်ကုန်များစွာ တင်ပို့ခဲ့ကြောင်း အစီရင်ခံစာတွင် အလေးပေးဖော်ပြခဲ့သည်။

   ပီလောပီနံစိမ်း တန်ချိန် ၁.၉၅ သန်း၊ ပီလောပီနံခြောက် တန်ချိန် ၁.၃၆ သန်း၊ သီဟိုဠ်စေ့ တန်ချိန် ၆၁၈,၀၀၀ နီးပါး၊ သရက်သီးအချို တန်ချိန် ၁၈၄၀၀၀ ကျော်၊ ငှက်ပျောသီး အချို တန်ချိန် ၂၁၁,၀၀၀ နီးပါး၊ ပြောင်းဖူး တန်ချိန် ၁၄,၀၂ဝ ကျော်နှင့် အခြားသီးနှံထွက်ကုန် ၉၁ မျိုး စုစုပေါင်း တန်ချိန် ၅၅၃,၀၀၀ ကျော်တင်ပို့ခဲ့ပြီး စုစုပေါင်းဝင်ငွေက ဒေါ်လာ ၃.၆၂ ဘီလီယံ နီးပါးရရှိခဲ့ကြောင်း Mak Seoun က ပြောကြားခဲ့သည်။  စုစုပေါင်းပို့ကုန် ၃၅.၆၄ ရာခိုင်နှုန်း မြင့်တက်ခဲ့သော်လည်း အချို့သော ကုန်ပစ္စည်းများမှာ စံချိန်တင် ကျဆင်းခဲ့ကြောင်း Mak Seoun က  ဆက်လက်ပြောကြားခဲ့သည်။

DOCA(ရန်ကုန်)

  ကမ္ဘောဒီးယားနိုင်ငံသည် ၂၀၂၅ ခုနှစ် ပထမ (၈)လတွင် ကန်ဒေါ်လာ ၂၀.၁၈ ဘီလီယံ တန်ဖိုးရှိကုန်ပစ္စည်းများ တင်ပို့ခဲ့ပြီး ၂၀၂၄ ခုနှစ် အလားတူကာလ ကန်ဒေါ်လာ ၁၇.၅၈ ဘီလီယံမှ ၁၄.၈ ရာခိုင်နှုန်း တိုးလာသည်ဟု ၁၀-၉-၂၀၂၅ ရက်နေ့တွင် ထုတ်ပြန်ခဲ့သော တရားဝင် အစီရင်ခံစာတွင် ဖော်ပြထားသည်။ အဓိကတင်ပို့သည့် ကုန်စည်များတွင် အဝတ်အထည်၊ ဖိနပ်၊ ခရီးသွားကုန်စည်၊ စက်ဘီး၊ ကားတာယာ၊ ဆန်၊ ရော်ဘာ၊ ပီလောပီနံ၊ သီဟိုဠ်စေ့၊ ငှက်ပျောသီးနှင့် သရက်သီးစသည်တို့ပါဝင်ကြောင်း အကောက်ခွန်နှင့် ကုန်စည် စီးဆင်းမှုဦးစီးဌာနမှ ပြုစုထားသော အစီရင်ခံစာအရ သိရသည်။ နိုင်ငံတော်သည် ယခုနှစ် ဇန်နဝါရီမှ သြဂုတ်လအတွင်း စုစုပေါင်းသွင်းကုန် ဒေါ်လာ ၂၁.၉၆ ဘီလီယံကို မှတ်တမ်းတင်ခဲ့ပြီး ယမန်နှစ် အလားတူကာလထက် ကန်ဒေါ်လာ ၁၈.၉ ဘီလီယံမှ ၁၆.၂ ရာခိုင်နှုန်း တိုးလာသည်ဟု အစီရင်ခံစာတွင် ဖော်ပြထားသည်။ အဓိက တင်သွင်းသည့် ကုန်ပစ္စည်းများမှာ ရေနံနှင့် သဘာဝဓာတ်ငွေ့၊ အထည်ချုပ်၊ ဖိနပ်နှင့် ခရီးသွား ကုန်စည်အတွက် ကုန်ကြမ်းများ၊ မော်တော်ယာဉ်များ၊ စက်ယန္တရားများ၊ လျှပ်စစ်စ္စည်း အသုံးအဆောင်များ၊ ဆေးဝါးပစ္စည်းများနှင့် လူသုံးကုန်ပစ္စည်းများ စသည်တို့ ပါဝင်သည်။ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၏ နိုင်ငံခြားရေး ၀န်ကြီးနှင့် ပြောရေးဆိုခွင့်ရှိသူ Penn Sovicheat က ဒေသတွင်း ဘက်စုံစီးပွားရေး ပူးပေါင်းဆောင်ရွက်မှု သဘောတူညီချက်နှင့် ကမ္ဘောဒီးယား-တရုတ် လွတ်လပ်သော ကုန်သွယ်မှုသဘောတူညီချက်သည် နိုင်ငံတော်၏ ကုန်သွယ်မှု တိုးတက်မှုကို မြှင့်တင်ပေးကြောင်း ပြောကြားခဲ့သည်။ 

DOCA(ရန်ကုန်)

        ဥရောပကော်မရှင်သည် စက်တင်လာလ ၃ ရက်နေ့တွင် ဥရောပသမဂ္ဂ၏ ကမ္ဘာလုံး ဆိုင်ရာ ကုန်သွယ်မှုကွန်ရက်ကို ချဲ့ထွင်ရန်ရည်ရွယ်ပြီး အတည်ပြုချက်ရရှိရန် အဓိက ကုန်သွယ်မှုသဘောတူညီချက်နှစ်ခုကို အဆိုပြုခဲ့ကြောင်း သိရသည်။ EU-Mercosur Partnership Agreement (EMPA) နှင့် EU-Mexico Modernized Global Agreement (MGA) တို့သည် ကုန်သွယ်မှုဆက်ဆံရေးကို ကွဲပြားစေရန်၊ အခွန်အခများ လျှော့ချရန်နှင့် ဥရောပစီးပွားရေး လုပ်ငန်းများအတွက် အခွင့်အလမ်းသစ်များ ဖန်တီးရန် ရည်ရွယ်ထားကြောင်း ကော်မရှင်က ထုတ်ပြန်ခဲ့သည်။ ကော်မရှင်၏ခန့်မှန်းချက်အရ EMPA သည် ဥရောပတစ်ဝှမ်းရှိ အလုပ်အကိုင်ပေါင်း ၄၄၀,၀၀၀ ကျော်ကို ပံ့ပိုးပေးသည့် ယူရို ၄၉ ဘီလီယံ (အမေရိကန်ဒေါ်လာ ၅၇ ဘီလီယံခန့်) အထိ Mercosur သို့ အီးယူနှစ်စဉ်တင်ပို့မှုကို တိုးမြှင့်နိုင်သည်။ အဆိုပါသဘော တူညီချက်တွင် ကားများ၊ စက်ယန္တရားများ၊ ဆေးဝါးများ၊ ဝိုင်၊ ချောကလက်နှင့် သံလွင်ဆီ အပါအဝင် အဓိကစက်မှုလုပ်ငန်းနှင့် စိုက်ပျိုးရေးထွက်ကုန်များအပေါ် အခွန်လျှော့ချမည်ဖြစ်သည်။ အဆိုပါ သဘောတူညီချက်များသည် အသက်မဝင်မီ ဥရောပပါလီမန်နှင့် EU အဖွဲ့ဝင်နိုင်ငံများ၏ အတည်ပြုချက် လိုအပ်သည်။ EU ကုန်သွယ်ရေး ကော်မရှင်နာ Maros Sefcovic က ကော်မရှင်သည် ယခုနှစ်ကုန်တွင် အတည်ပြုချက်လုပ်ငန်းစဉ်ကို အပြီးသတ်ရန် မျှော်လင့်ထားကြောင်း သတင်းစာရှင်းလင်းပွဲတွင် ပြောကြားခဲ့သည်။ Sefcovic က အဆိုပါသဘောတူညီချက်များသည် EU ကုမ္ပဏီများ၏ ယှဉ်ပြိုင်နိုင်စွမ်းကို မြှင့်တင်ပေးပြီး လက်တင်အမေရိကတွင် ပထမဆုံးသော အားသာချက်ကို ပေးဆောင်မည့် မဟာဗျူဟာမြောက် အုတ်မြစ်အဖြစ် ဖော်ပြခဲ့သည်။ Mercosur သဘောတူညီချက်သည် စိုက်ပျိုးရေး ရေရှည်တည်တံ့မှုကို ခြိမ်းခြောက်ပြီး EU ၏ အစိမ်းရောင်နှင့် အစားအစာ ဘေးကင်းရေးစံနှုန်းများကို ပျက်ပြားစေသည်ဟု ဥရောပလယ်သမားများထံမှ ပြင်းပြင်းထန်ထန် ဝေဖန်မှုများ ထွက်ပေါ်လာခဲ့သည်။ Farm Europe ဥက္ကဌ Yves Madre က သဘောတူညီချက်သည် အထူးသဖြင့် ၎င်း၏ စိုက်ပျိုးရေးကဏ္ဍတွင် မပြောင်းလဲဘဲ ဆက်လက်တည်ရှိနေသည်ဟု ဥရောပတောင်သူလယ်သမားသမဂ္ဂ COPA-COGECA က လယ်သမားများ၊ ကျေးလက်ဒေသခံများနှင့် စားသုံးသူများအတွက် စီးပွားရေးအရနှင့် နိုင်ငံရေးအရ ထိခိုက်စေသည်ဟု ပြောကြားခဲ့သည်။ လယ်သမားများသည် စာချုပ်ကို ဆန့်ကျင်ရန် မကြာသေးမီနှစ်များအတွင်း ဥရောပမြို့အများအပြားတွင် ဆန္ဒပြပွဲများ ပြုလုပ်ခဲ့ကြသည်။ စိုက်ပျိုးရေးနှင့် စားနပ်ရိက္ခာဆိုင်ရာ ဥရောပကော်မရှင်နာ Christophe Hansen က အဆိုပါ သဘောတူညီချက်သည် သွင်းကုန်များကို ကန့်သတ်ခြင်းနှင့် အရေးကြီးထုတ်ကုန်များအတွက် ခွဲတမ်းများကို နှစ်ပေါင်းများစွာ ဆိုင်းငံ့ထားခြင်းဖြင့် EU လယ်သမားများ၏ အကျိုးစီးပွားကို ကာကွယ်နိုင်မည်ဖြစ်ကြောင်း ပြောကြားခဲ့သည်ဟု သိရှိရပါသည်။

Source : Xinhua

DOCA(ရန်ကုန်) 

  ကမ္ဘောဒီးယားနိုင်ငံသည် ၂၀၂၆ ခုနှစ်အတွင်း နိုင်ငံ၏ စိုက်ပျိုးရေးလုပ်ငန်းများမှ သစ်သီးဝလံနှင့် ဟင်းသီးဟင်းရွက်များ တရုတ်ဈေးကွက်သို့ တင်ပို့ရောင်းချမှုမြှင့်တင်ရန် ဟီနန် အခြေစိုက် ကုမ္ပဏီနှစ်ခုနှင့် နားလည်မှုစာချွန်လွှာ (MoU) လက်မှတ်ရေးထိုးခဲ့သည်။ လက်မှတ် ရေးထိုးပွဲ အခမ်းအနားသို့ ကူးသန်းရောင်းဝယ်ရေးဝန်ကြီး Cham Nimul နှင့် Henan ပြည်နယ် ပြည်သူ့အစိုးရ ဒုတိယအုပ်ချုပ်ရေးမှူး Zheng Haiyang တို့ က ၉-၉-၂၀၂၅ ရက်နေ့တွင် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၌ ကျင်းပပြုလုပ်ခဲ့သည်။ အဆိုပါ အစည်းအဝေးသည် ကမ္ဘောဒီးယားနှင့်ဟီနန်ပြည်နယ်ကြား စီးပွားရေးနှင့်ကုန်သွယ်မှု ပူးပေါင်း ဆောင်ရွက်မှု အားကောင်းရန်နှင့်တိုးချဲ့ရန်ရည်ရွယ်ပြီး စိုက်ပျိုးရေးကဏ္ဍကို အထူးအလေးထား သည့် အစည်းအဝေးဖြစ်သည်။ ဝန်ကြီး Nimul မှ Zheng အား နွေးထွေးစွာ ကြိုဆိုခဲ့ပြီး ၎င်း၏ ဂါရဝပြု နှုတ်ဆက်မှုနှင့် ကုန်သွယ်ရေးနှင့် စီးပွားရေး နယ်ပယ်များတွင် ကမ္ဘောဒီးယား-တရုတ် ပူးပေါင်းဆောင်ရွက်မှုအတွက် အကျိုးဖြစ်ထွန်းသော ဆွေးနွေးမှုများ အတွက် ကျေးဇူးတင်ရှိ ကြောင်း ပြောကြားခဲ့ပြီး  ကမ္ဘောဒီးယား လယ်ယာထွက်ကုန်များ တရုတ်နိုင်ငံသို့ တင်ပို့မှု တိုးမြှင့်ရေး၏ အရေးကြီးပုံကို ရှင်းလင်းပြောကြားခဲ့သည်။  ဝန်ကြီး Nimul က ကမ္ဘောဒီးယား တွင် တရုတ်နိုင်ငံ၏ ရင်းနှီးမြှုပ်နှံမှုများနှင့် စီးပွားရေးလုပ်ငန်းများ တိုးချဲ့လုပ်ကိုင်ရန် တရုတ်ရင်းနှီးမြှုပ်နှံသူများကို အားပေးထောက်ခံကြောင်း၊  ခေတ်မီစိုက်ပျိုးရေး၊ စားသောက်ကုန် ထုတ်လုပ်ရေးလုပ်ငန်း၊ မော်တော်ယာဉ်ထုတ်လုပ်ခြင်း၊ လျှပ်စစ်ပစ္စည်းများနှင့် ဒစ်ဂျစ်တယ် နည်းပညာများအပါအဝင် တရုတ်နိုင်ငံ၏ ထုတ်လုပ်မှုကွင်းဆက်များတွင် ပေါင်းစည်းရန် အလားအလာမြင့်မားသည့် ကဏ္ဍများကို အလေးပေးပြောကြားခဲ့သည်။ ဒေသတွင်း ဘက်စုံစီးပွားရေး ပူးပေါင်းဆောင်ရွက်မှု (RCEP) နှင့် အာဆီယံ-တရုတ် လွတ်လပ်သော ကုန်သွယ်မှု သဘောတူညီချက်၏ အကျိုးကျေးဇူးများကို တိုးမြှင့်ပြီး ပူးပေါင်းဆောင်ရွက်မှုကို မြှင့်တင်ရန်နှင့် နားလည်မှု စာချွန်လွှာများ ထပ်မံရရှိရန် နှစ်နိုင်ငံစလုံး၏ ပုဂ္ဂလိကကဏ္ဍများကို ဝန်ကြီးက ဆက်လက်တိုက်တွန်းခဲ့သည်။ အခမ်းအနားအတွင်း ဝန်ကြီး Nimul သည် တရုတ်ဈေးကွက်တွင် ကမ္ဘောဒီးယား သစ်သီးဝလံနှင့်ဟင်းသီးဟင်းရွက်များ မြှင့်တင်ရန် ရည်ရွယ်သည့် Zhengzhou Chen's Sun Fruit and Vegetable Co., Ltd. နှင့် Nongde Agricultural Development Co., Ltd. တို့အကြား  နားလည်မှုစာချွန်လွှာ လက်မှတ်ရေးထိုးခြင်းကို ဂုဏ်ပြုစကားပြောကြားခဲ့သည်။

DOCA(ရန်ကုန်)

         ဘီလာရုစ်နိုင်ငံ၏ ရွှေနှင့် နိုင်ငံခြားငွေ အရန်ငွေများသည် ယခုနှစ် စက်တင်ဘာ ၁ ရက် အထိ အမေရိကန်ဒေါ်လာ ၁၂.၄၁ ဘီလီယံအထိ စံချိန်တင်ခဲ့ကြောင်း ဘီလာရုစ်နိုင်ငံ ဗဟို ဘဏ်၏ စက်တင်ဘာ ၃ ရက်နေ့ထုတ်ပြန်ချက်အရ သိရပါသည်။

          ဇူလိုင်လတွင် ဒေါ်လာ သန်း ၄၀၀ တိုးလာပြီးနောက် သြဂုတ်လတွင် ရွှေနှင့် နိုင်ငံခြားငွေ အရန်ငွေသည် ဒေါ်လာ ၄၇၁.၄ သန်း တိုးလာသည်။

         အရန်နိုင်ငံခြားငွေပမာဏသည် စက်တင်ဘာ ၁ ရက်နေ့အထိ ဒေါ်လာ ၅.၀၇ ဘီလီယံရှိပြီး တစ်လလျှင် ဒေါ်လာ ၂၅၁.၈ သန်း မြင့်တက်ခဲ့သည်။ ငွေကြေးရွှေပမာဏမှာ ဒေါ်လာ ၅.၉၄ ဘီလီယံရှိမည်ဟု ခန့်မှန်းထားပြီး ဒေါ်လာ ၂၂၅.၁ ​​သန်း တိုးလာခဲ့ကြောင်း သိရသည်။

           Belarusian အာဏာပိုင်များသည် နိုင်ငံ၏ နိုင်ငံတကာ ပိုင်ဆိုင်မှုသည် ၂၀၂၅ နှစ်ကုန်တွင် ဒေါ်လာ ၇.၁ ဘီလီယံထက် မနည်းရှိမည်ဟု ခန့်မှန်းထားကြောင်း သိရှိရပါသည်။

Source : Xinhua

DOCA(ရန်ကုန်)