ပြည်ပကုန်သွယ်မှုသတင်းများ

   Preah Sihanouk ပြည်နယ်ရှိ ရင်းနှီးမြှုပ်နှံမှုမြှင့်တင်ရေးဆိုင်ရာ အစိုးရ၏ လုပ်ငန်း အဖွဲ့သည် ရင်းနှီးမြှုပ်နှံသူများကို ပံ့ပိုးရန်နှင့် ရင်းနှီးမြှုပ်နှံမှုမြှင့်တင်ရေး အထူးအစီအစဉ်အရ စီမံကိန်းများ ချောမွေ့စွာ အကောင်အထည်ဖော်နိုင်စေရန် အဓိကစက်မှုလုပ်ငန်းစီမံကိန်း ငါးခုကို ကွင်းဆင်းစစ်ဆေးခဲ့ကြသည်။ စစ်ဆေးမှုများကို ဒီဇင်ဘာ ၂၆ ရက်တွင် ပြုလုပ်ခဲ့ပြီး Preah Sihanouk  ပြည်နယ် ရင်းနှီးမြှုပ်နှံမှုမြှင့်တင်ရေး လုပ်ငန်းအဖွဲ့၏ အကြီးအကဲ Hean Sahib ဦးဆောင်၍ ပြည်နယ်အုပ်ချုပ်ရေးမှူး Mang Sineth နှင့် ပြည်နယ်အုပ်ချုပ်ရေးမှ အရာရှိများ နှင့်အတူ Sihanoukville ပြည်နယ်၊ Kampong Som မြို့နှင့် Prey Nob ခရိုင်တို့တွင် တည်ရှိသော ရင်းနှီးမြှုပ်နှံမှုစီမံကိန်း ငါးခုသို့ သွားရောက်စစ်ဆေးမှုများ ပြုလုပ်ခဲ့ကြသည်။  ၎င်းတို့တွင် Empire Electrical Cable Co., Ltd မှ လုပ်ငန်းလည်ပတ် နေသော လျှပ်စစ်ဝါယာကြိုးနှင့် ကေဘယ်လ်စက်ရုံ၊ Cambodia Kuna New Energy Co., Ltd မှ လုပ်ငန်းလည်ပတ်သော အလူမီနီယမ် ပြုပြင်ထုတ်လုပ်ရေးစက်ရုံ၊ Bo Kang Industry (Cambodia) Co., Ltd မှ လုပ်ငန်းလည်ပတ်သော ပရိဘောဂထုတ်လုပ်ခြင်းနှင့် တပ်ဆင်ခြင်း စက်ရုံ၊ Haule Steel မှ လုပ်ငန်းလည်ပတ်သော သံမဏိပြုပြင်ထုတ်လုပ်ရေး စက်ရုံနှင့် Deep Oil Field Cambodia Co., Ltd မှ လည်ပတ်နေသော သံမဏိပိုက်ထုတ်လုပ်ရေးစက်ရုံတို့ ပါဝင်သည်။ စက်မှုလုပ်ငန်းစီမံကိန်း ငါးခုသည် စုစုပေါင်း ရင်းနှီးမြှုပ်နှံမှု ခန့်မှန်းခြေ အမေရိကန်ဒေါ်လာ ၁၃၈ သန်းရှိပြီး အလုပ်အကိုင် ၁,၀၇၀ ခန့် ဖန်တီးပေးနိုင်ရန် မျှော်လင့် ထားကြသည်။ စစ်ဆေးမှုများသည် စီမံကိန်းအကောင် အထည်ဖော်မှုကို စောင့်ကြည့်ရန်၊ လက်တွေ့တိုးတက်မှုများကို အကဲဖြတ်ရန်နှင့် ရင်းနှီးမြှုပ်နှံ သူများထံမှ ၎င်းတို့၏ စိုးရိမ်ပူပန်မှုများနှင့် စိန်ခေါ်မှုများအကြောင်းပိုမိုသိရှိရန် ရည်ရွယ်ကြောင်း Hean Sahib က ပြောကြားခဲ့သည်။ စစ်ဆေးမှုများသည် လက်တွေ့ကျသော ဖြေရှင်းနည်းများနှင့် အထောက်အကူပြု အစီအမံများကို ဖော်ထုတ်ရန်၊ ဒေသတွင်း အလုပ်သမား၊ ကျွမ်းကျင်မှုနှင့် နည်းပညာလွှဲပြောင်းမှုကို ပိုမိုအသုံးပြုလာစေရန်၊ ပြည်နယ်တစ်ဝှမ်းရှိ စက်ရုံများနှင့် လုပ်ငန်းများ တွင် ဒေသထွက်ပစ္စည်းများကို ပိုမိုအသုံးပြုမှုများကို အားပေးရန် ရည်ရွယ်ထား ကြောင်း ၎င်းက ထပ်လောင်းပြောကြားခဲ့သည်။

DOCA(ရန်ကုန်)

          ဖိလစ်ပိုင်နိုင်ငံသည် ဒီဇင်ဘာလ ၂၁ ရက်နေ့တွင် သကြားတင်သွင်းမှု ပိတ်ပင်ချက်အား လာမည့်နှစ် ဒီဇင်ဘာလအထိ ဆက်လက်ထားရှိမည်ဖြစ်ပြီး ထောက်ပံ့မှုအခြေအနေများ တိုးတက်ကောင်းမွန်လာချိန်တွင် ပြည်တွင်းထုတ်လုပ်သူများအတွက် အကာအကွယ်ပေးမှုကို တိုးချဲ့မည်ဖြစ်ကြောင်း ပြောကြားခဲ့သည်။ "လက်ရှိ သကြားထုတ်လုပ်မှုနှင့် ဝယ်လိုအားအပေါ်အခြေခံ၍ ကနဦးအကြံပြုထားသည်ထက် ပိုမိုကြာရှည်သော တင်သွင်းမှုရပ်ဆိုင်းခြင်းသည် လိုအပ်ကြောင်း စိုက်ပျိုးရေးဝန်ကြီး Francisco Tiu Laurel က ပြောကြားခဲ့သည်။

         ပြည်တွင်းသကြားစိမ်းထုတ်လုပ်မှု မြင့်တက်လာခြင်းကို ၎င်းက ကိုးကားဖော်ပြခဲ့ပြီး ယင်းမူဝါဒသည် ဈေးကွက်တည်ငြိမ်စေရန် ကူညီပေးနေစဉ် ပြည်တွင်းထုတ်လုပ်သော သကြားကိုဦးစားပေးရန် ရည်ရွယ်ကြောင်း အလေးပေးပြောကြားခဲ့သည်။ သကြားစည်းမျဉ်း ထိန်းသိမ်းရေး အဖွဲ့၏ မူဝါဒချမှတ်ရေးအဖွဲ့ဖြစ်သော သကြားဘုတ်အဖွဲ့၏ ဥက္ကဋ္ဌအနေဖြင့် Tiu Laurel က အေဂျင်စီသည် စံနှင့် ပရီမီယံအဆင့် သန့်စင်ထားသော သကြားစာရင်းများ၏ တိကျသောပုံရိပ်ကို ထိန်းသိမ်းရန်အတွက် ချက်လုပ်သည့်စက်ရုံလုပ်ငန်းများကို စောင့်ကြည့်ခြင်းကိုလည်း တိုးမြှင့် သွားမည်ဟု ပြောကြားခဲ့ကြောင်း သိရှိရပါသည်။

Source: Xinhua                                                                          

DOCA (ရန်ကုန်)

         ၂၀၂၅ ခုနှစ် နိုဝင်ဘာလတွင် ကုန်ဆုံးသော ဘဏ္ဍာရေးနှစ်အတွင်း နယူးဇီလန်၏ သစ်သီးတင်ပို့မှုသည် ၂၈ ရာခိုင်နှုန်း မြင့်တက်လာပြီး နယူးဇီလန်ဒေါ်လာ ၆.၁ ဘီလီယံ (နယူးဇီလန် ဒေါ်လာ ၃.၅၂ ဘီလီယံ) ရှိခဲ့ပြီး ရွှေရောင်ကီဝီသီးနှင့် ပန်းသီးများအပေါ် တရုတ်နိုင်ငံ၏ မြင့်မား သော ဝယ်လိုအားကြောင့် အားကောင်းလာကြောင်း Stats NZ မှ ဒီဇင်ဘာလ ၁၉ ရက်နေ့တွင် ဖော်ပြခဲ့သည်။ စာရင်းအင်းဌာန၏ အဆိုအရ ၂၀၂၅ ခုနှစ် အောက်တိုဘာလကုန်တွင် ပထမဆုံး အကြိမ် ဤတန်ဖိုးသို့ ရောက်ရှိပြီးနောက် နယူးဇီလန်၏ သစ်သီးဝလံတင်ပို့မှု နယူးဇီလန်ဒေါ်လာ ၆ ဘီလီယံသို့ ရောက်ရှိခဲ့ခြင်းမှာ ဒုတိယ အကြိမ်မြောက် ဖြစ်သည်။ ၂၀၂၅ ခုနှစ် နိုဝင်ဘာလကုန်တွင် ကုန်ဆုံးသော ဘဏ္ဍာရေးနှစ်တွင် ကီဝီသီးနှင့် ပန်းသီးများသည် စုစုပေါင်း သစ်သီးဝလံ တင်ပို့မှုတန်ဖိုး၏ ၉၀ ရာခိုင်နှုန်းကျော်ရှိကြောင်း Stats NZ နိုင်ငံတကာ စာရင်းအင်းဌာန၏ ပြောရေးဆိုခွင့်ရှိသူ Viki Ward က ပြောကြားခဲ့သည်။ တရုတ်နှင့် ဥရောပသမဂ္ဂတို့သည် နယူးဇီလန်၏ ရွှေရောင်ကီဝီသီးနှင့် အစိမ်းရောင်ကီဝီသီးများအတွက် ထိပ်တန်းတင်ပို့သော နိုင်ငံများဖြစ်ပြီး တရုတ်နိုင်ငံသည် နယူးဇီလန်၏ ပန်းသီးတင်ပို့မှု စုစုပေါင်းတန်ဖိုး၏ လေးပုံတစ်ပုံကိုရယူထားပြီး အကြီးဆုံးပန်းသီးဈေးကွက်အဖြစ် ဆက်လက်တည်ရှိနေကြောင်း သိရသည်။ နယူးဇီလန်ပန်းသီးတင်ပို့မှုသည် ယခင်နှစ်ကထက် ၂၉ ရာခိုင်နှုန်း သို့မဟုတ် နယူးဇီလန်ဒေါ်လာ ၂၈၀ သန်း မြင့်တက်ခဲ့ပြီး ပမာဏ ၁၃ ရာခိုင်နှုန်း မြင့်တက်ခဲ့ကာ ယူနစ်ဈေးနှုန်း ၁၄ ရာခိုင်နှုန်း မြင့်တက်ခဲ့ကြောင်း သိရသည်။ စာရင်းအင်းများအရ ချယ်ရီသီး တင်ပို့မှုသည် ထိုကာလအတွင်း နယူးဇီလန်ဒေါ်လာ ၁၂၅ သန်းရရှိခဲ့ပြီး ထောပတ်သီးတင်ပို့မှုမှာ နယူးဇီလန်ဒေါ်လာ ၁၀၇ သန်းရှိခဲ့ကြောင်း သိရှိရပါသည်။

Source: Xinhua                                                                          

DOCA (ရန်ကုန်)

          အင်ဒိုနီးရှားနိုင်ငံသည် ပြည်တွင်းဆန်ထုတ်လုပ်မှုများလုံလောက်မှုကြောင့် ၂၀၂၆ ခုနှစ်တွင် ဆန်တင်သွင်းမှုများကို စားသုံးခြင်းအတွက်သော်လည်းကောင်း၊ စက်ရုံသုံးအတွက် သော်လည်းကောင်း တင်သွင်းမှုများ ရပ်ဆိုင်းသွားမည်ဖြစ်ကြောင်း အစိုးရဌာနများမှ ထုတ်ပြန်သော ထုတ်ပြန်ချက်များအရ သိရပါသည်။ အဆိုပါဆုံးဖြတ်ချက်ကို အစားအသောက်လုံခြုံရေးဝန်ကြီးဌာန၊ ကုန်သွယ်ရေးဝန်ကြီးဌာန၊ ဗဟိုစာရင်းအင်း အေဂျင်စီ များမှ ထိပ်သီးခေါင်းဆောင်များ တက်ရောက် ခဲ့သော ဝန်ကြီးများအဆင့် ညှိနှိုင်းအစည်းအဝေး ကျင်းပပြုလုပ်မှုအပြီးတွင် ထွက်ပေါ်လာခြင်းဖြစ်‌ကြောင်း သိရပါသည်။ ကုန်သွယ်ရေးဝန်ကြီးဌာနမှ ဒုတိယဝန်ကြီးဆိုသူ Tatang Yuliono က အင်ဒိုနီးရှားနိုင်ငံရှိ အိမ်ထောင်စုများအတွက် စားသုံးရန်နှင့် စက်ရုံသုံးအတွက်လိုအပ်‌‌သော ဆန်များကို ပြည်တွင်းထုတ်လုပ်မှုများဖြင့် လုံလောက်လျက်ရှိကြောင်း ပြောကြားခဲ့ပါသည်။ အင်ဒိုနီးရှားနိုင်ငံ အစိုးရသည် စက်မှုလုပ်ငန်းဝန်ကြီးဌာနမှ တောင်းဆိုထားသော ၂၀၂၆ ခုနှစ်တွင် ဆန်တန်ချိန် ၃၈၁၀၀၀ တန်တင်သွင်းခွင့်အား ပယ်ဖျက်လိုက်ကြောင်းနှင့် ၎င်းသည် ပြည်တွင်း‌ ‌ထောက်ပို့မှု များက လုံလောက်ခြင်းကြောင့်ဖြစ်‌ကြောင်း သိရပါသည်။ အင်ဒိုနီးရှားနိုင်ငံသည် တင်သွင်းမှုပိတ်ပင်ခြင်းမူဝါဒကို နိုင်ငံတစ်ဝှမ်းကျင့်သုံးသွားမည်ဖြစ်ကြောင်း သိရပါသည်။ အစိုးရဌာနများမှ ထုတ်ပြန်သော ထုတ်ပြန်ချက်များအရ ၂၀၂၅ ခုနှစ်တွင် အင်ဒိုနီးရှားနိုင်ငံသည် ဆန်ထုတ်လုပ်မှုတန်ချိန် ၃၄.၇၇ သန်းတန်ခန့်ရောက်ရှိခဲ့ပြီး ယခင်နှစ်ထက် ၁၃.၅၄ ရာခိုင်နှုန်း မြင့်တက်ခဲ့ကြောင်းနှင့် ၎င်းသည်သမ္မတ Prabowo Subianto အစိုးရ၏ လယ်သမားများအပေါ် ‌‌ထောက်ပံ့ခြင်းမူဝါဒနှင့် ရာသီဥတုကောင်းမွန်မှုတို့ကြောင့်ဖြစ်ကြောင်း သိရပါသည်။ အင်ဒိုနီးရှားနိုင်ငံအစိုးရသည် ပြောင်းထုတ်လုပ်မှုကို တန်ချိန် ၄ သန်းတန်ခန့်ရောက်ရှိရန်‌မျှော်မှန်းခဲ့ပြီး ပြည်တွင်းစားသုံးခြင်းနှင့် စက်ရုံသုံးကဏ္ဍအတွက် လုံလောက်ရန်မျှော်မှန်း‌ကြောင်း သိရပါသည်။

Source: Vnexpress                                                                     

DOCA (ရန်ကုန်)

          အင်ဒိုနီးရှားနိုင်ငံ၏ ပြည်တွင်းဆန်ထုတ်လုပ်မှုသည် လုံလောက်မှုရှိသောကြောင့် ၂၀၂၆ ခုနှစ်တွင် စားသုံးသည့်ဆန်(သို့မဟုတ်)စက်မှုလုပ်ငန်းသုံးဆန်များကို နိုင်ငံအတွင်းသို့ တင်သွင်းတော့မည်မဟုတ်ကြောင်း အင်ဒိုနီးရှားနိုင်ငံအစိုးရ အရာရှိတစ်ဦး၏ ပြောကြားချက်အရသိရ သည်။ အဆိုပါဆုံးဖြတ်ချက်အား စားနပ်ရိက္ခာဖူလုံရေး ညှိနှိုင်းရေးဝန်ကြီးဌာန၊ ကုန်သွယ်ရေး ဝန်ကြီးဌာနနှင့် ဗဟိုစာရင်းအင်း အေဂျင်စီတို့မှ အကြီးတန်းခေါင်းဆောင်များ တက်ရောက်ခဲ့သည့် မကြာသေးမီက အင်ဒိုနီးရှားနိုင်ငံ၏မြို့တော် ဂျကာတာတွင် ကျင်းပသောဝန်ကြီးအဆင့် ညှိနှိုင်းအစည်းအဝေးအပြီးတွင် ကြေညာခဲ့ခြင်းဖြစ်သည်။ အင်ဒိုနီးရှား စားနပ်ရိက္ခာဖူလုံရေးဝန်ကြီးဌာနမှ ကုန်သွယ်ရေးနှင့်ဖြန့်ဖြူးရေးညှိနှိုင်းရေးမှူး ဒုတိယဝန်ကြီး Tatang Yuliono က ပြည်တွင်းဆန် ဝယ်လိုအားကို ပြည်တွင်းထုတ်လုပ်မှုဖြင့်သာ အပြည့်အဝဖြည့်ဆည်းပေးမည်ဟု ပြောကြားခဲ့သည်။ နိုင်ငံ၏ ပြည်တွင်းဆန်ထောက်ပံ့မှုသည် လုံလောက်မည်ဟု ယုံကြည်သောကြောင့် ၂၀၂၆ ခုနှစ်တွင် စက်မှုလုပ်ငန်းသုံး ဆန်တန်ချိန် ၃၈၁၀၀၀ နီးပါး တင်သွင်းရန် စက်မှုဝန်ကြီးဌာန၏ အဆိုပြုချက်ကို အစိုးရကပယ်ချခဲ့သည်။ အာချေးပြည်နယ်ရှိ ဆာဘန်ကဲ့သို့သော လွတ်လပ်သော ကုန်သွယ်ရေးဇုန်များအပါအဝင် တစ်နိုင်ငံလုံးအတိုင်အတာဖြင့် တင်သွင်းခြင်းမပြုရမူဝါဒကို ကျင့်သုံးသွားမည်ဖြစ်သည်။ ၂၀၂၅ ခုနှစ်၏ ခိုင်မာသော စိုက်ပျိုးရေးစွမ်းဆောင်ရည်ကြောင့် နိုင်ငံ၏ အမျိုးသားစားနပ်ရိက္ခာဖူလုံရေးတွင် အဓိက အောင်မြင်မှုတစ်ခုအဖြစ် ဆန်နှင့်ပြောင်း တင်သွင်းမှုကို ရပ်ဆိုင်းနိုင်ခဲ့သည်။ ၂၀၂၅ ခုနှစ်နှစ် လယ်ပိုင်းတွင် အင်ဒိုနီးရှားနိုင်ငံ၏  အရန်ဆန်သိုလှောင်မှုသည် တန်ချိန် ၄ သန်းခန့်အထိ စံချိန်တင်မြင့်မားခဲ့ပြီး စျေးကွက်တည်ငြိမ်စေရန် အထောက်အကူပြုနိုင်ခဲ့သည်။ တရားဝင်အချက် အလက်များအရ သမ္မတ ပရာဘိုဝို ဆူဘီယန်တို၏ လက်ထက် ရာသီဥတုကောင်းမွန်မှုနှင့် လယ်သမားများအတွက် ထောက်ပံ့မှုမူဝါဒများကြောင့် ၂၀၂၅ ခုနှစ်၏ ဆန်ထုတ်လုပ်မှု စုစု ပေါင်းသည် တန်ချိန် ၃၄.၇၇ သန်းသို့ရောက်ရှိကာ ၂၀၂၄ ခုနှစ် ကထက် ၁၃.၅၄ ရာခိုင်နှုန်း မြင့် တက်လာမည်ဟု ခန့်မှန်းထားကြသည်။ ပြောင်းထုတ်လုပ်မှုသည်လည်း တန်ချိန် ၄ သန်းခန့်အထိ ရောက်ရှိခဲ့ပြီး နိုင်ငံ၏ ကြက်ငှက်မွေးမြူရေးကဏ္ဍအတွက် လုံလောက်သော ထောက်ပံ့မှုပေးနိုင်မည်ဟု ခန့်မှန်းထားကြောင်း သိရှိရပါသည်။

DOCA(ရန်ကုန်)