ပြည်တွင်းကုန်သွယ်မှုသတင်း

            ညောင်ဦးမြို့နယ်တွင် စက်တင်ဘာလ(၂၀)ရက်နေ့တွင် မိုးရွာသွန်းမှုများရှိခဲ့၍ ဆောင်းနှမ်းများ စတင်စိုက်ပျိုးလျက်ရှိကြောင်းသိရသည်။

          ဆောင်းနှမ်းကို စက်တင်ဘာလတွင်စိုက်ပျိုးပြီး ဒီဇင်ဘာလတွင် ရိတ်သိမ်းရကြောင်း၊ စိုက်ပျိုး သောမျိုးများမှာ နှမ်းလျှင်၊ နှမ်းဖြူ၊ ဂေါ်ရာနှင့်နှမ်းနက်မျိုးများ စိုက်ပျိုးကြကြောင်း၊ စိုက်ပျိုးရာတွင် ထွန်ကြောင်းဆွဲအစေ့ချစနစ်နှင့် ပက်ကြဲစနစ် နှစ်မျိုးလုံးကို စိုက်ပျိုးကြပြီး တစ်ဧကကုန်ကျမှုအနေဖြင့် မျိုး၊ သွင်းအားစု၊ လုပ်သားခအပါအဝင်(၄၀၀၀၀၀)ကျပ်ခန့်ကုန်ကျကြောင်း၊ ယခင်နှစ်တစ်ဧကပျမ်းမျှ အထွက်နှုန်းအနေဖြင့်(၇)တင်းခန့်ထွက်ရှိပါသည် ဈေးနှုန်းအနေဖြင့် နှမ်းနက်ပေါ်စအချိန်တွင် တစ်တင်း လျှင်(၂၄၀၀၀၀)ကျပ်ဖြင့် အရောင်းအဝယ်ဖြစ်ခဲ့ရာ တစ်ဧကတောင်သူအကျိုးအမြတ်အနေဖြင့် (၁၀) သိန်းကျော်ခန့် ရရှိကြောင်း၊ ယခုနှစ်တွင် ဈေးကွက်ဝယ်လိုအားကောင်းသော နှမ်းနက်မျိုးများ စိုက်ပျိုး လျက်ရှိကြောင်း၊ ဈေးကွက်အနေဖြင့် တောင်သူများမှ နှမ်းများသန့်စင်ပြီး မြို့ပေါ်ပွဲရုံများသို့ ကိုယ်တိုင် တိုက်ရိုက်ရောင်းချကြကြောင်း၊ ပွဲရုံများမှတစ်ဆင့် မန္တလေးသို့ တင်ပို့ရောင်းချကြကြောင်း သိရသည်။

DOCA (မန္တလေး)       

            ညောင်ဦးခရိုင်အနေဖြင့် မိုးပဲတီစိမ်းနှင့်မိုးကြိုပဲတီစိမ်းကို ၂၀၂၅-၂၀၂၆ ခုနှစ်၊ စိုက်ပျိုးရာသီ တွင် စိုက်ပျိုးရန်လျာထားမှုအနေဖြင့် (၁၇၀၁၂)ဧက လျာထားခဲ့ပြီး(၁၁၉၆၆)ဧက စိုက်ပျိုးနိုင်ခဲ့ကြောင်း၊ ယခင်နှစ် ပဲတီစိမ်းစိုက်ပျိုးမှုအနေဖြင့်(၃၄၇၃၈)ဧက လျာထားခဲ့ပြီး(၃၂၅၀၉) ဧက စိုက်ပျိုးနိုင်ခဲ့ကြောင်းနှင့် တစ်ဧပျမ်းမျှအထွက်နှုန်းအနေဖြင့်(၁၀)တင်းနှုန်းဖြင့် အထက်တင်း စုစုပေါင်း (၃၃၁၇၈၇) တင်းထွက် ရှိခဲ့ကြောင်း သက်ဆိုင်ရာဌာန၏စာရင်းများအရ သိရှိရပါသည်။

          မိုးပဲတီစိမ်းကို မေလတွင်စတင်စိုက်ပျိုးကြပြီး စိုက်ပျိုးသည့်မျိုးများအနေဖြင့် ကျောက်စိမ်း မျိုး၊ ရေဆင်း(၁၁)မျိုးများကိုသာ အများဆုံးစိုက်ပျိုးကြကြောင်း၊ ယခုနှစ်တွင် စိုက်ပျိုးရာသီတွင ်မိုးရွာသွန်းမှု ကောင်းသောကြောင့် အပင်များကောင်းမွန်စွာ အောင်မြင်ဖြစ်ထွန်းလျက်ရှိပြီး ပဲတီစိမ်းတစ်ဧက စိုက်ပျိုးမှုကုန်ကျစရိတ်အနေဖြင့်(၃၀၀၀၀၀)ကျပ်ဝန်းကျင် ကုန်ကျကြောင်းသိရ သည်။ ပဲတီစိမ်းဈေးနှုန်း အနေဖြင့် ပဲအရည်အသွေးပေါ်မူတည်၍ ပဲတီစိမ်းတစ်တင်းလျှင်(၉၀၀၀၀-၁၀၅၀၀၀)ကျပ် ‌ဈေးနှုန်းများ ဖြင့် အရောင်းအဝယ်ဖြစ်ပေါ်လျက်ရှိပြီး တင်ပို့မှုအနေဖြင့် မြို့ပေါ်ရှိပွဲရုံများမှတစ်ဆင့် ရန်ကုန်၊ မန္တလေးမြို့များသို့ တင်ပို့ရောင်းချကြကြောင်း ပွဲရုံပိုင်ရှင်များထံမှ သိရသည်။

     DOCA (မန္တလေး)                     

          မြင်းခြံမြို့နယ်သည် ဆည်ရေသောက် အသင့်အတင့်ရှိပြီး ပဲမျိုးစုံ၊ ဆီထွက်သီးနှံနှင့် ကြက်သွန်နီများကို စိုက်ပျိုးလျှက်ရှိရာ မိုးငရုတ်များကိုလည်းစိုက်ပျိုးထားရှိကြောင်း၊ မိုးငရုတ်ကို မေလနှင့် ဇွန်လတို့တွင် စတင်စိုက်ပျိုးပြီး၊ စက်တင်ဘာ၊ အောက်တိုဘာနှင့် နိုဝင်ဘာလတို့တွင် ရိတ်သိမ်း ထွက်ပေါ်လေ့ရှိကြောင်း၊ စိုက်ပျိုးချိန်မှ ရိတ်သိမ်းချိန်ကာအထိ (၄) လခန့်ကြာမြင့် ကြောင်းသိရှိရသည်။၂၀၂၅-၂၀၂၆ ခုနှစ်၊ မြင်းခြံမြို့နယ်တွင်  မိုးငရုတ်လျာထား (၂၇၆၅)ဧက အနက်မှ စိုက်ပျိုးပြီးဧက (၆၀၉) စိုက်ပျိုးထားရှိကြောင်း၊ မြို့နယ်ကြေးတိုင်နှင့် မြေစာရင်းဦး စီးဌာန၏စာရင်းများ အရသိရှိရသည်။ စိုက်ပျိုးရန်ကျန်ရှိသော ဧကများဆက်လက် စိုက်ပျိုးဖြစ် မည်ကြောင်း၊  မိုးငရုတ်များကို တောပုရွာ၊ သင်ပြွန်းရွာ၊ တူရွင်းဘို့ရွာ၊ ဒါးကျွန်းရွာ၊ ဂင့်ဂဲရွာနှင့် ဖက်ပင်အိုင်ကျေးရွာစသည်တို့တွင် အဓိကစိုက်ပျိုးကြကြောင်း သိရှိရသည်။ ယခင်နှစ်တစ်ဧက အထွက်နှုန်းအနေဖြင့် (၄၀၃) ပိဿာခန့်ထွက်ရှိကြောင်း၊ ၂၀၂၅ခုနှစ်၊ စက်တင်ဘာလစတုတ္ထပတ် တွင် ငရုတ်သီးစိမ်းအစိုတစ်ပိဿာလျှင် (၄၀၀၀) ကျပ်၊  ငရုတ်သီးခြောက် တစ်ပိဿာလျှင် (၁၀၅၀၀-၁၃၀၀၀)ကျပ်ခန့် ပေါက်ဈေးများရှိကြောင်း၊ ဈေးကွက်တင်ပို့မှုအနေဖြင့် ဒေသတွင်း ရှိပွဲရုံများနှင့် မန္တလေးမြို့သို့ တင်ပို့ရောင်းချကြောင်း သိရှိရသည်။

DOCA (မန္တလေး)

            ၂၀၂၅ ခုနှစ်၊ စက်တင်ဘာလ တတိယပတ်အတွင်း ပုသိမ်မြို့ရှိ အဓိကဈေးကြီးများဖြစ်သော မြို့မဈေး၊ ကုလားကုန်းဈေးနှင့် ရပ်ကွက်ဈေးငယ်များတွင် ရောင်းချနေသော ကြက်သားဈေးနှုန်းများမှာ တစ်ပိဿာလျှင် ကျပ် ၁၈,၀၀၀ မှ ၂၀,၀၀၀ အထိ ရှိကြောင်း သိရှိရပါသည်။

            ယခင် စက်တင်ဘာလ တတိယပတ်ကဈေးနှုန်းများနှင့် နှိုင်းယှဉ်ပါက ဈေးနှုန်းများ အတန်ငယ်မြင့်တက်လာခဲ့သော်လည်း ဝက်သားဈေးနှုန်းများထက် ပိုမိုတည်ငြိမ်နေကြောင်း တွေ့ရှိရပါသည်။ ကြက်သားဈေးနှုန်းများ မြင့်တက်နေရခြင်းမှာ မိုးရာသီကြောင့် ကြက်မွေးမြူရေးအတွက် အစာကုန်ကျစရိတ်များ မြင့်တက်မှု၊ ရောဂါကာကွယ်ရေးအတွက် ကျပ်ငွေကုန်ကျမှုများနှင့် လမ်းပန်းဆက်သွယ်ရေး အခက်အခဲတို့ကြောင့်ဖြစ်ကြောင်း ဒေသခံမွေးမြူရေးသမားများထံမှ သိရှိရပါသည်။

            ပုသိမ်မြို့အနေဖြင့် ကြက်သားထုတ်လုပ်မှုတွင် ဒေသခံမွေးမြူရေးကဏ္ဍမှ ထုတ်လုပ်သည့် ကြက်သားများနှင့် အနီးအနားရှိ မြို့နယ်များမှ တင်ပို့လာသော ကြက်သားများ ရောနှောရောင်းချနေရခြင်းကြောင့် ဈေးနှုန်းများ အနည်းငယ်ကွဲပြားမှုရှိနိုင်ကြောင်း သိရပါသည်။ ဈေးကွက်အတွင်း ကြက်သားဝယ်လိုအားမှာ ပုံမှန်ထက်ပိုမိုမြင့်မားနေပြီး ဒေသခံများ၏ နေ့စဉ်စားသုံးမှု၊ ပွဲလမ်းသဘင်များနှင့် အလှူအတန်းများအတွက် ဝယ်ယူသုံးစွဲမှုများ ရှိနေဆဲဖြစ်ကြောင်း သိရှိရပါသည်။ ကြက်သားသည် စားသုံးမှုအတွက် ဈေးနှုန်းချိုသာပြီး ကျန်းမာရေးနှင့် ညီညွတ်သည်ဟု ယူဆထားသည့် အလေ့အထများကြောင့် ဝယ်လိုအားမြင့်မားနေခြင်းဖြစ်ကြောင်း သိရှိရပါသည်။

DOCA (ဧရာဝတီ)

              ဧရာဝတီတိုင်းဒေသကြီး၊ ပုသိမ်မြို့နယ်အတွင်းရှိ ဈေးများ၌ ရောင်းချနေသော မာလကာသီးများကို ပုသိမ်မြို့နယ်အတွင်းရှိ ခြံများမှ ရယူရောင်းချခြင်းနှင့် အနီးဝန်းကျင်ဒေသများဖြစ်သော ကြံခင်းမြို့နယ်၊ ရေကြည်မြို့နယ်များမှ ဖြန့်ဖြူးရောင်းချကြောင်း သိရသည်။

            ၂၀၂၅ ခုနှစ်၊ စက်တင်ဘာလ (တတိယပတ်) ဈေးနှုန်းများအရ မာလကာသီး တစ်လုံးလျှင် အမြင့်ဈေး ကျပ် (၁၅၀၀)၊ အလတ်ဈေး ကျပ် (၁၀၀၀)၊ အနိမ့်ဈေး ကျပ် (၇၀၀) ခန့်ဖြင့် အသီး၏ အရည်အသွေး၊ အရွယ်အစားနှင့် လတ်ဆတ်မှုအပေါ်မူတည်၍ ရောင်းချလျက်ရှိကြောင်း ဈေးသည်များထံမှ သိရှိရပါသည်။ ပုသိမ်မြို့နယ်တွင် ဒေသတွင်းထွက်ကုန်ဖြစ်သော်လည်း သယ်ယူပို့ဆောင်ရေး ကုန်ကျစရိတ်နှင့် ဝယ်ယူမှုအရေအတွက်ပေါ်မူတည်၍ ဈေးနှုန်းများ ကွဲပြားမှုရှိနိုင်ကြောင်း သတိပြုရန် လိုအပ်ပါသည်။

DOCA (ဧရာဝတီ)