တောင်သာမြို့နယ်အတွင်းရှိ သာစည်ကျေးရွာ၊ နတ်စောင့်ကျေးရွာ၊ မင်းတည်းကျေးရွာ၊ ထန်းပင်ကန်ကျေးရွာနှင့် ဆင်တဲဝကျေးရွာများ၌ ဖူးစားပြောင်း(ဆောင်း)သီးနှံများကို အောက်တိုဘာ လကုန်မှစတင်၍ စိုက်ပျိုးလျက်ရှိကြောင်း၊ စိုက်ပျိုးရာတွင် အများဆုံးစိုက်ပျိုးသောမျိုးမှာ သကြား ပြောင်း မျိုးကိုသာ အဓိကထားစိုက်ပျိုးကြပြီး ထောပတ်ပြောင်းမျိုးများကို တောင်သူများ အနေဖြင့် အနည်းငယ်သာစိုက်ပျိုးကြကြောင်း၊ (၁)ဧကမျိုးအနေဖြင့် ပြောင်းဖူးစေ့(၇) ပြည်စိုက်ပျိုး ရကြောင်း ၊ မျိုးစျေးနှုန်းအနေဖြင့် မျိုးစေ့(၁)ပြည်လျှင် (၁၀၀၀၀) ကျပ်ဖြင့်ဝယ်ယူစိုက်ပျိုးကြ ကြောင်း၊ ယခု ဇန်နဝါရီလမှစတင်၍ ထွက်ရှိနေပြီဖြစ်ကြောင်း၊ (၁)ဧက စိုက်ပျိုးမှု ကုန်ကျစရိတ် အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း(၈၅၀၀၀၀)ကျပ်ခန့် ကုန်ကျကြောင်း၊ (၁)ဧက အထွက်နှုန်း အနေဖြင့် ပြောင်းဖူးစုစုပေါင်း(၇၀၀၀)ဖူးခန့် ထွက်ရှိကြောင်း၊ ပြောင်းဖူးစျေးနှုန်း အနေဖြင့် တစ်ဖူးလျှင် လက်ကား(၃၀၀)ကျပ်၊ လက်လီတစ်ဖူးလျှင် (၅၀၀) ကျပ်ခန့် ရောင်းဝယ်လျက်ရှိပြီး၊ စားသုံးမှုများ သောကြောင့် အရောင်းသွက်ကြောင်း၊ ပွဲစားများမှစိုက်ခင်းထဲသို့ လာရောက်ဝယ်ယူကြသလို မြင်းခြံမြို့၊ မိတ္ထီလာမြို့နှင့် ရန်ကုန်မြို့များသို့ လည်းတင်ပို့ရောင်းချကြောင်း၊ အကျိုးအမြတ် အနေဖြင့် (၁၂၅၀၀၀၀) ကျပ်ခန့်ရရှိကြောင်း၊ မိသားစုစားဝတ်နေရေး ဖူလုံသည့်အပြင် အချိန်တိုအတွင်း တွက်ချေကိုက် သောကြောင့် ဖူးစားပြောင်းသည် အကျိုးအမြတ်များလည်း ရရှိ ကြောင်း၊ ပြောင်းရိုးနှင့် အဖူးရိုးများသည် တိရစ္ဆာန်အစာအဖြစ်လည်း အသုံးပြုသောကြောင့် စီးပွားဖြစ်ဝင်ငွေရကြောင်း ဖူးစားပြောင်းစိုက်တောင်သူတစ်ဦး၏ ပြောပြချက်အရသိရှိရသည်။
DOCA(မန္တလေး)