ပြည်တွင်းကုန်သွယ်မှုသတင်း

     မန္တလေးတိုင်းဒေသကြီး၊ မြင်းခြံခရိုင်သည် မြန်မာနိုင်ငံအလယ်ပိုင်းတွင်တည်ရှိပြီး၊ စီးပွားရေးအချက်အချာကျသော ဒေသတစ်ခုဖြစ်ပါသည်။ မြင်းခြံခရိုင်၏ အဓိကစိုက်ပျိုးရေး ထွက်ကုန်များမှာ ပဲမျိုးစုံ၊ ပြောင်း၊ ဆီထွက်သီးနှံနှင့် ကြက်သွန်နီတို့ဖြစ်ပါသည်။ မြင်းခြံဈေးကွက်သို့ နေ့စဉ် သီးနှံမျိုးစုံဝင်ရောက်လျက်ရှိရာ ယခုစက်တင်ဘာလ ဒုတိယပတ်တွင် ရောင်းဝယ်လျက်ရှိသည့် တစ်ပိဿာဈေးနှုန်းများအနေဖြင့် ကုလားပဲ (929) (၄၉၅၀) ကျပ်၊ ကုလားပဲလုံးကြီး (V2) (၅၃၅၀)ကျပ်၊ ပဲတီစိမ်း (၃၅၂၀)ကျပ်၊ ပဲဇီးကွက် (၅၀၅၀)ကျပ်၊ ပဲပုတ်(ဗမာ)(၇၀၂၅) ကျပ်၊ မတ်ပဲ(၅၄၀၀)ကျပ်၊ မြေပဲ (လုံးဆန်)(၉၇၀၀)ကျပ်၊ အစေ့ထုတ်ပြောင်း(CP) (၁၆၀၀)ကျပ်နှင့် ကြက်သွန်နီ(ကြီး) (၁၈၀၀)ကျပ်မှ (၂၁၀၀)ကျပ်၊ ကြက်သွန်နီ(လတ်) (၁၅၀၀)ကျပ်မှ (၁၇၅၀)ကျပ်၊ ကြက်သွန်နီ(သေး) (၁၂၀၀)ကျပ်မှ (၁၄၀၀)ကျပ်ဖြင့် သီးနှံအမျိုးအစားအလိုက် တစ်ရက်လျှင်(၃၀) ပိဿာဝင်ဖြင့် အိတ်ရေ (၁၀၀)မှ (၁၅၀) အထိ ပွဲရုံများတွင် နေ့စဉ်အရောင်းအဝယ်ဖြစ်လျက်ရှိပါသည်။

        ယခင်ဩဂုတ်လ ဒုတိယပတ်တွင် အရောင်းအဝယ်ဖြစ်ခဲ့သည့် သီးနှံစုံတစ်ပိဿာဈေးနှုန်းများအနေဖြင့် ကုလားပဲ (929) (၄၆၅၀) ကျပ်၊ ကုလားပဲလုံးကြီး(V2) (၄၈၀၀ )ကျပ်၊ ပဲတီစိမ်း(၃၅၀၀)ကျပ်၊ ပဲဇီးကွက်(၃၈၅၀)ကျပ်၊ ပဲပုတ်(ဗမာ)(၅၄၀၀)ကျပ်၊ မတ်ပဲ(၄၉၅၀)ကျပ်၊ မြေပဲ(လုံးဆန်)(၉၁၀၀)ကျပ်၊ အစေ့ထုတ်ပြောင်း (CP) (၁၃၅၀)ကျပ်နှင့် ကြက်သွန်နီ(ကြီး) (၁၈၀၀)ကျပ်မှ (၂၀၀၀)ကျပ်၊ ကြက်သွန်နီ(လတ်) (၁၅၀၀)ကျပ်မှ (၁၇၀၀)ကျပ်၊ ကြက်သွန်နီ(သေး) (၁၂၀၀)ကျပ်မှ (၁၄၀၀)ကျပ်များဖြင့် အရောင်းအဝယ်ဖြစ်ခဲ့ပါသည်။

         ဩဂုတ်လ ဒုတိယပတ်နှင့် စက်တင်ဘာလ ဒုတိယပတ်တို့တွင် ရောင်းဝယ်မှုဖြစ်ခဲ့သော ဈေးနှုန်းများကိုနှိုင်းယှဉ်ပါက ယခုစက်တင်ဘာလ ဒုတိယပတ်တွင် သီးနှံတစ်ပိဿာလျှင် ကုလားပဲ (929) (၃၀၀) ကျပ်၊ ကုလားပဲလုံးကြီး(V2) (၅၅၀ )ကျပ်၊ ပဲဇီးကွက်(၁၂၀)ကျပ်၊ ပဲပုတ်(ဗမာ) (၁၆၂၅)ကျပ်၊ မတ်ပဲ(၄၅၀)ကျပ်၊ မြေပဲ(လုံးဆန်)(၆၀၀)ကျပ်၊ အစေ့ထုတ်ပြောင်း (CP) (၂၅၀)ကျပ် စသည်ဖြင့် အသီးသီးဈေးနှုန်းမြင့်တက်ခဲ့ပြီး ကြက်သွန်နီဈေးနှုန်းများမှာ အနည်းငယ်သာပြောင်းလဲမှုရှိကြောင်းနှင့် ဈေးကွက်အနေဖြင့် မြင်းခြံခရိုင်ဒေသတွင်း ဝယ်ယူစားသုံးမှုအပြင် မန္တလေးမြို့နှင့် ရန်ကုန်(ဘုရင့်နောင်) သို့လည်းတင်ပို့ရောင်းချလျက်ရှိကြောင်း သီးနှံကုန်သည်တစ်ဦး၏ ပြောကြားချက်အရသိရှိရပါသည်။

DOCA(မန္တလေး)

      စစ်ကိုင်းတိုင်းဒေသကြီး၊ ကန့်ဘလူခရိုင်သည် လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်ရာ ကန့်ဘလူမြို့နယ်အတွင်းရှိ ထန်းကုန်းကျေးရွာ၊ မိုးကောင်းကျေးရွာ၊ ညောင်ဇင်ကျေးရွာ၊ ကံရိုးကျေးရွာနှင့် အခြားသောကျေးရွာများတွင် ပဲတီစိမ်းသီးနှံကိုစိုက်ပျိုးကြကြောင်း၊ ယခုအခါ ပဲတီစိမ်းသီးနှံများ ဈေးကွက်အတွင်းသို့ ဝင်ရောက်လျက်ရှိပြီး စက်တင်ဘာလ ဒုတိယပတ်အတွင်း ပဲတီစိမ်းရိုးရိုးတစ်တင်းလျှင် (၆၀၀၀၀)ကျပ်၊ ပဲတီစိမ်း ထွက်တိုး အလုံးလှတစ်တင်းလျှင် (၆၇၀၀၀)ကျပ်ဖြင့်အရောင်းအဝယ်ဖြစ်လျက်ရှိကြောင်း၊ ပဲတီစိမ်းမှာ အလုံးလှပြီး အကွဲအနာကင်းလျှင် ဈေးနှုန်းပိုမိုရရှိကြောင်းနှင့် ဈေးကွက်အနေဖြင့် ကန့်ဘလူခရိုင်မှထွက်ရှိသော ပဲတီစိမ်းများကို မန္တလေးမြို့ရှိပွဲရုံများသို့ တင်ပို့ရောင်းချလျက်ရှိသည်။

          စက်တင်ဘာလ ဒုတိယပတ်အတွင်း ပဲတီစိမ်းဈေးနှုန်းများကို ယခုပထမပတ်ဈေးနှုန်းများနှင့်နှိုင်းယှဉ်ပါက ယခုဒုတိယပတ်အတွင်း ပဲတီစိမ်းရိုးရိုးတစ်တင်းလျှင် (၅၀၀၀)ကျပ်၊ ပဲတီစိမ်း ထွက်တိုး အလုံးလှတစ်တင်းလျှင် (၁၃၀၀၀)ကျပ်ကျဆင်း၍ အရောင်းအဝယ်ဖြစ်လျက်ရှိကြောင်း သီးနှံရောင်းဝယ်ရေးလုပ်ငန်းရှင်များထံမှသိရှိရပါသည်။

DOCA(စစ်ကိုင်း)

        မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်သည်နှင့်အညီ စစ်ကိုင်းတိုင်းဒေသကြီး၊ ကန့်ဘလူခရိုင်သည်လည်း လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်သည်။ ကန့်ဘလူမြို့နယ်အတွင်းရှိ ကျေးရွာများတွင် ဆီထွက်သီးနှံဖြစ်သည့် နှမ်းများကိုလည်းစိုက်ပျိုးကြကြောင်းသိရသည်။ ယခုအခါ နှမ်းများ ဈေးကွက်အတွင်းသို့ ဝင်ရောက်လျက်ရှိပြီး ကန့်ဘလူခရိုင်၌ ဖြစ်ပေါ်နေသောနှမ်းဈေးနှုန်းများမှာ စက်တင်ဘာလ ဒုတိယပတ်အတွင်း နှမ်းနက်(စမုံ)တစ်တင်းလျှင် ၁၆၀၀၀၀ကျပ်၊ နှမ်းဖြူ(ဂျပန်)တစ်တင်းလျှင် ၁၂၀၀၀၀ကျပ်ဖြင့်အရောင်းအဝယ်ဖြစ်လျက်ရှိကြောင်း၊ ဈေးကွက်အနေဖြင့် ကန့်ဘလူခရိုင်မှထွက်ရှိသောနှမ်းများကို မန္တလေးမြို့ရှိပွဲရုံများသို့ တင်ပို့ရောင်းချလျက်ရှိကြောင်းသိရသည်။

         ယခုလအတွင်း အရောင်းအဝယ်ဖြစ်လျက်ရှိသော နှမ်းဈေးနှုန်းများသည် ယခင်နှစ်ကာလတူထက် ဈေးကောင်းရရှိသောကြောင့် စိုက်ပျိုးသူများအနေဖြင့် ထိုက်သင့်သည့်အကျိုးအမြတ်များရရှိကာ အဆင်ပြေလျက်ရှိကြောင်းသိရှိရပါသည်။

DOCA(စစ်ကိုင်း)

    မကွေးတိုင်းဒေသကြီး ပခုက္ကူခရိုင်၌ အစေ့ထုတ်ပြောင်း(CP)သီးနှံကို အဓိကသီးနှံတစ်မျိုးအဖြစ် စိုက်ပျိုးလျက်ရှိသည်။ ပခုက္ကူ၊ ပေါက်၊ ရေစကြိုမြို့နယ်များတွင် အဓိကစိုက်ပျိုး၍ အစေ့ထုတ်ပြောင်း (CP)သီးနှံ အများဆုံး စိုက်ပျိုးထွက်ရှိသော မြို့နယ်များဖြစ်သည်။ ပခုက္ကူခရိုင်အတွင်း နှစ်စဉ် စိုက်ဧက (၂၀၀၀၀)ခန့် စိုက်ပျိုးကြောင်း သိရှိရသည်။

     အစေ့ထုတ်ပြောင်း(CP)ကို ပြည်တွင်းမွေးမြူရေးလုပ်ငန်းများမှ ကုန်ကြမ်းတိရိစ္ဆာန်အစားအစာ အဖြစ် အသုံးပြုပြီး အပင်များကိုလည်း ကျွဲ၊ နွားများအတွက် အစာအဖြစ်အသုံးဝင်သည့်အပြင် ပြည်ပ ထိုင်း၊ တရုတ်နိုင်ငံများသို့လည်း နှစ်စဉ်တင်ပို့နိုင်၍ ပြည်တွင်းဈေးကွက်ခိုင်မာပြီး အရောင်းအဝယ်ဖြစ် လျက်ရှိကြောင်း သိရှိရသည်။ ပခုက္ကူဈေးကွက်၌လည်း နေ့စဉ် အရောင်းအဝယ်ဖြစ်လျက်ရှိသည်။ စက်တင်ဘာလ(ဒုတိယ)ပတ်တွင် ပခုက္ကူဈေးကွက်၌ အစေ့ထုတ်ပြောင်း(CP) နေ့စဉ် တစ်ရက်လျှင် ပိဿာ(၃၀)ဝင်အိတ် (၃၀ - ၅၀)တစ်ပတ်အတွင်း အိတ်ရေ(၃၀၀)ခန့် အရောင်းအဝယ်ဖြစ်ကြောင်း သိရှိရသည်။ လက်ရှိ ပြည်တွင်းပို့ကုန်ပဲများမှ အစေ့ထုတ်ပြောင်း(CP)မှာ ပဲလက်ကျန်နည်းနေပြီ ဖြစ်သော်လည်း  ကိုင်းကျွန်းမြေများ၌ အောက်တိုဘာလကုန်တွင် စတင်စိုက်ပျိုးတော့မည်ဖြစ်ကြောင်း ယခုအချိန်တွင် ပြည်ပအဝယ်လိုက်၍ ဈေးနှုန်းမြင့်တက်လျက်ရှိကြောင်း သိရှိရသည်။

      ဈေးနှုန်းအနေဖြင့် သီးနှံပေါ်စ မတ်လတွင် ဒေသပေါက်ဈေးတစ်တင်းလျှင် ကျပ်(၁၆၀၀၀ - ၁၅၆၀၀) အရောင်းအဝယ်ဖြစ်ပြီး ပြည်ပနိုင်ငံများမှ အဝယ်လိုက်လာ၍ စက်တင်ဘာလ (ဒုတိယ) ပတ်တွင် တစ်တင်းလျှင် ကျပ်(၃၀၀၀၀)ထိ ဈေးမြင့်တက်ပြီး အရောင်းအဝယ်ဖြစ်လျက်ရှိသည်။ အစေ့ထုတ်ပြောင်း (CP)ကို ပြည်တွင်းသုံးစွဲမှု နည်းသော်လည်း ပြည်ပပို့ကုန်အဖြစ် အများဆုံးတင်ပို့ရ၍ ပြည်ပတရုတ်နိုင်ငံမှ တိရိစ္ဆာန်အစားအစာ ကုန်ကြမ်းအဖြစ် ဝယ်ယူမှုများ၍ ဈေးမြင့်တက်လျက်ရှိသည်။ အစေ့ထုတ်ပြောင်း (CP) တစ်ဧကကုန်ကျစရိတ်အနေဖြင့် ကျပ်(၇)သိန်းခန့် ကုန်ကျကြောင်း၊ အထွက်နှုန်းမှာ ပျမ်းမျှ တင်း (၇၀)ခန့် ထွက်ရှိ၍ တစ်တင်းလျှင် ပျမ်းမျှဈေး ကျပ်(၂၅၀၀၀)ဖြင့် ရောင်းချရပါက တစ်ဧကဝင်ငွေမှာ ကျပ်(၁၇၅၀၀၀၀)ခန့်ရရှိပြီး အကျိုးအမြတ်အနေဖြင့် ကျပ်(၁၀၅၀၀၀၀)ခန့် ရရှိကြောင်း၊ ယခင်နှစ်သီးနှံပေါ်ချိန်တွင် တစ်တင်းလျှင် ကျပ်(၂၀၀၀၀)အမြင့်ဈေးဖြင့် ရောင်းချရ၍ ယခုနှစ်တွင် ကျပ်(၃၀၀၀၀)ဈေးဖြင့် ရောင်းချရခြင်းကြောင့် ကျပ်(၁၀၀၀၀)ခန့် ဈေးတက်ပြီး အရောင်းအဝယ်ဖြစ် ၍ စိုက်တောင်သူများ အဆင်ပြေလျက်ရှိကြောင်း သိရှိရသည်။

    ပြည်ပပို့ကုန်ပဲတစ်မျိုးဖြစ်သည့် အစေ့ထုတ်ပြောင်း(CP)သည် ပြည်ပဝယ်လိုအားကောင်း၍ ပြည်တွင်းဈေးကွက်တွင် နှစ်စဉ်ဈေးကောင်းရရှိသဖြင့် ယခုနှစ်တွင် တိုးချဲ့စိုက်ပျိုးရန် မြေများပြုပြင်ဆောင်ရွက်လျက်ရှိကြောင်း သိရှိရသည်။

DOCA(မကွေး)

       ပဲခူးတိုင်းဒေသကြီး၊ သာယာဝတီခရိုင်၊ ကြို့ပင်ကောက်မြို့နယ်၊ ဘူတာရုံလမ်း၊ ရထားဘူတာရုံအနီးရှိ ဖရဲသီးရောင်းချသူ ဦးဝင်းထွဋ်အား ဖရဲသီးဈေးကွက်အခြေအနေကိုသိရှိနိုင်ရန်အတွက် စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်ရီရီရှိန်သည် (၉-၉-၂၀၂၄)ရက်နေ့တွင် ကွင်းဆင်းမေးမြန်းခဲ့ပါသည်။

        ယခုနှစ်ဖရဲသီးများကို မန္တလေးတိုင်း မလိုင်မြို့၊ ချောင်းဦးမြို့၊ တံတားဦးမြို့များနှင့် မကွေးတိုင်း အောင်လံမြို့၊ ကံမကျွန်းရွာများတွင် မှာယူရောင်းချလျက်ရှိကြောင်းနှင့် ဖရဲမျိုးအစုံ၊ အလုံးအကြီး/ အသေးမျိုးစုံမှာယူရောင်းချကြောင်းသိရှိရပါသည်။ ယခုမှာယူသောမျိုးမှာ (အိန္ဒိယ)မျိုးဟုခေါ်သော ဘာဟုဘာပေးမျိုး အမဲသီး (သို့မဟုတ်) ကျောက်စိမ်းသီးဟုလည်းခေါပြီး အလုံးသေးပြီး ကျွတ်ဆတ်၍ ချိုပါသည်။ အသားနီ၊ အသားဝါဟူ၍ အမျိုးအစား (၂) မျိုးရှိပါသည်။ ၎င်းဖရဲသီးကို စစ်ကိုင်းဘက်မှမှာယူပြီး ၁၀ဘီးကားတစ်စီးလျှင် အလုံးရေ(၂၆၅၀)ပါရှိရာ အသီးတန်ဖိုး ကျပ်(၅၀)သိန်း၊ ကားခ ကျပ်(၁၅)သိန်းဖြင့် ကြို့ပင်ကောက်မြို့သို့ အရောက်ပေးရကြောင်းသိရှိရပါသည်။

         ဈေးနှုန်းဈေးကွက်အနေဖြင့် တစ်လုံးလျှင် (၂၅၀၀/၃၀၀၀/၃၅၀၀) ကျပ်ဖြင့် အလုံးအကြီး/ အသေးပေါ်မူတည်၍ ကိုယ်တိုင်ဆိုင်များတွင် ရောင်းချသည့်အပြင် ဖောက်သည်အသီးဆိုင်များနှင့် အနီးနားမြို့များကိုလည်း တစ်ဆင့်ဖြန့်ပေးကြောင်း၊ ဖရဲသီးစိပ်ဗန်းရွက်သမားများကိုလည်းခွဲပေး၍ ရောင်းချပေးကြောင်း တစ်စိပ်လျှင် (၃၀၀)ကျပ်၊ နှစ်စိပ်လျှင် (၅၀၀)ကျပ်ဖြင့် ရောင်းချကြောင်းသိရပါသည်။

    ယခုအခါ ဖရဲသီးများသည် (၁၂)လရာသီစိုက်ပျိုးသည့်အတွက် အရောင်းပြတ်သည်ဟူ၍မရှိပါ။ တစ်ပတ်လျှင် အသီးများကုန်ပြီး ထပ်၍မှာရကြောင်း၊ အကျိုးအမြတ်အနေဖြင့် ကျပ်သိန်း(၆၅)ရင်းလျှင် ကျပ် (၁၀) သိန်း/ ကျပ် (၁၅) သိန်းခန့်ကျန်ရှိကြောင်း ဖရဲသီးရောင်းချသူထံမှသိရှိရပါသည်။

DOCA(ပဲခူး)