ပြည်တွင်းကုန်သွယ်မှုသတင်း

      ပြည်ကုန်စည်ဒိုင်၏ စက်တင်ဘာဒုတိယပတ်၏ ပဲမျိုးစုံအရောင်းအဝယ်ဖြစ်လျက်ရှိရာ  မတ်ပဲ၊ ပဲစင်းငုံ၊ ကုလားပဲဈေးကျလျက်ရှိပါသည်။

     စက်တင်ဘာဒုတိယအပတ်အတွင်း မတ်ပဲတစ်တင်းလျှင် ၁၂၈၀၀၀ကျပ်ဖြင့် ရန်ကုန်အဝယ် တစ်ရက်လျှင် အိတ် ၂၀၀/၂၅၀ခန့် တင်ပို့မှုရှိပါသည်။ ပဲစင်းငုံဈေးလည်းကျဆင်းနေပြီး တစ်တင်းကို ၁၅၉၀၀၀ ကျပ်ဖြင့် တစ်ရက်ကိုအိတ် ၂၀၀ခန့် ရန်ကုန်အဝယ်ရှိပါသည်။ စက်တင်ဘာလဒုတိယပတ် တွင် ကုလားပဲ(HL)တစ်တင်းကို ၉၇၀၀၀ကျပ်၊ မြကြေးမှုံတစ်တင်းကို ၉၉၀၀၀ကျပ်ဖြင့် ဈေးကျနေပြီး မြို့တွင်းနှင့် ရန်ကုန်အဝယ် တစ်ရက်ကိုအိတ် ၃၀၀ခန့်ရှိပါသည်။ ပဲကြီး (ရွှေကျွန်း) တစ်တင်းကို ၉၀၀၀၀ ကျပ်၊ ကုန်ပဲတစ်တင်းကို ၈၅၀၀၀ကျပ်ဖြင့် မြို့တွင်းပဲကြော်သမားများ တစ်ရက်ကို အိတ် ၃၀၀ခန့် အဝယ်ရှိပါသည်။

    စားတော်ပဲ(ကျွန်း)တစ်တင်းကို ၁၁၃၀၀၀ကျပ်ဖြင့် မြို့တွင်းအဝယ်တစ်ရက်ကိုအိတ် ၂၀/၂၅ ခန့် အဝယ်ရှိပါသည်။ ဘိုကိတ်ပဲတစ်တင်းကို ၁၀၀၀၀၀ကျပ်ဖြင့် မြို့တွင်းနှင့် ရန်ကုန်အဝယ် တစ်ရက်ကို အိတ် ၁၀၀/၁၅၀ခန့် အဝယ်ရှိပါသည်။

      ပြည်ကုန်စည်ဒိုင်၏ ပဲအရောင်းအဝယ်မှာ မတ်ပဲ၊ ပဲစင်းငုံ၊ ကုလားပဲ၊ ပဲကြီးသီးနှံမှာ အဝယ် သွက်လျက်ရှိပြီး ကျန်ပဲများမှာ ပုံမှန်သာအဝယ်ရှိပါသည်။

DOCA(ပဲခူး)

     ပြည်ဈေးကွက်အတွင်း ယခုနှစ်တွင် ပီနန်ငရုတ်သီးစိမ်းများ ဝင်ရောက်မှုနည်းပါးလျက်ရှိပြီး ပြည်မြို့အနောက်ဘက်ကမ်းရှိ ရွှေဘုံသာရွာ၊ ညောင်ပင်သာရွာဘက်မှသာ အဝင်ရှိသည့်အတွက် ဈေးကွက်အတွင်း ရှားပါးလျက်ရှိကြောင်း သိရပါသည်။ (၅)ရက်ခြားလျှင် တစ်ကြိမ်ခန့်သာ ဝင်ရောက်မှုရှိပြီး မြို့ပေါ်ဈေးများသို့ အပါအဝင် ပိဿာချိန် (၃)ပိဿာခန့်သာ အဝင်ရှိနေပါသည်။

     ယခုနှစ်တွင် ပီနန်ငရုတ်သီးစိမ်းမှာ ရန်ကုန်ဘက်မှပြန်လည်ဝင်ရောက်မှုရှိသော်လည်း ယခုနှစ်တွင် အဝင်မရှိသေးကြောင်း သိရပြီး ယခင်နှစ်ဈေးမှာ (၁၀)ကျပ်သားလျှင် ကျပ် ၂၂၀၀-၂၃၀၀ဖြင့် ရောင်းချမှုရှိခဲ့ကြောင်း သိရပါသည်။ ၂၀၂၄ခုနှစ် စက်တင်ဘာလ ဒုတိယပတ်တွင် (၁၀)ကျပ်သားလျှင် ကျပ် ၂၈၀၀-၃၀၀၀နှုန်းဖြင့် ရောင်းချသည့်အတွက် ယခင်နှစ်နှင့် နှိုင်းယှဉ်လျှင် ကျပ် ၈၀၀နှုန်း ဈေးမြင့် တက်လျက်ရှိကြောင်း သိရပါသည်။  

DOCA(ပဲခူး)

      ပဲခူးတိုင်းဒေသကြီး၊ ပြည်ခရိုင်အတွင်းရှိ မြို့မဈေးကြီးနှင့် မြို့နယ်အတွင်းရှိဈေးများတွင် ငါးသလောက်များ အရောင်းအဝယ်သွက်လျက်ရှိကြောင်း သိရှိရပါသည်။ ငါးမှာ ငါးသလောက်ဆိုသည့်အတိုင်း အခြားငါးများနှင့် အရသာမတူပဲ ချိုပြီးလေးပင်သောအရသာရှိပါသည်။ ငါးသလောက်မှာ စားသုံးသူတို့ သဘောကျသောအရွယ်အစားရှိသောကြောင့် အရောင်းသွက်ကြောင်း သိရပါသည်။ ငါးသလောက်ပေါင်းရန် သင့်တော်သောအရွယ်အစားငါးများကို ထမင်းဆိုင်များမှ အများဆုံး ဝယ်ယူကြောင်း သိရှိရပါသည်။ ရန်ကုန်မြို့မှ ငါးဝင်ရောက်မှုမှာ ပုံမှန်ဝင်ရောက်လျက်ရှိပြီး မြစ်မှရရှိသော ရေချိုငါးသလောက်မှာ ပို၍လူကြိုက်များပါသည်။ ငါးလောက်ငါးသည် ရေချို၊ ရေငန်နှစ်မျိုးစလုံးတွင် နေထိုင်နိုင်ပါသည်။ ငါးသလောက်ဈေးများအနေဖြင့် ယခင်နှစ်တွင် ငါးသလောက် အကောင်ကြီး တစ်ပိဿာလျှင် ၃၀၀၀၀ကျပ်နှုန်းဈေးဖြင့် အရောင်းအဝယ်ဖြစ်ခဲ့ပြီး ယခုနှစ်တွင် ငါးသလောက် အကောင်ကြီး တစ်ပိဿာလျှင် ၄၅၀၀၀ကျပ်မှ ၅၀၀၀၀ကျပ်အထိဈေးများ မြင့်တက်လာကြောင်း သိရှိရပါသည်။

DOCA(ပဲခူး)

    ပဲခူးတိုင်းဒေသကြီး၊ ပြည်ခရိုင်တွင် ယခင်လဖြစ်သော ဩဂုတ်လနောက်ဆုံးပတ်တွင် ဆန်ကွဲ (Extra) တစ်အိတ်လျှင် ၅၀၀၀၀ကျပ်ဖြင့် အရောင်းအဝယ်ဖြစ်ခဲ့ပြီး ယခုစက်တင်ဘာလ ဒုတိယပတ်တွင် တစ်အိတ်ကို ၆၃၀၀၀ကျပ်ဖြစ်၍ နှစ်ပတ်အတွင်း တစ်အိတ်လျှင် ၁၃၀၀၀ကျပ် ဈေးမြင့်တက်လာခဲ့ပါသည်။ ထိုအတူ ဆန်ကွဲ(2,3,4) တစ်အိတ်လျှင် ယခင်ဩဂုတ်လနောက်ဆုံးပတ်၌ ၅၂၀၀၀ ကျပ် ယခုစက်တင်ဘာလဒုတိယပတ်တွင် ၅၄၀၀၀ကျပ်ဖြင့် အရောင်းအဝယ်ဖြစ်၍ ယခင်လနှင့် နှိုင်းယှဉ်လျှင် ၂၀၀၀ကျပ် ဈေးပိုလာခဲ့ပါသည်။ ဆန်ကွဲ(1,2) တစ်အိတ်လျှင် ယခင်လက ၅၆၀၀၀ ကျပ်ဖြစ်ခဲ့ပြီး ယခုစက်တင်ဘာဒုတိယပတ်တွင် ၆၀၀၀၀ကျပ်ဖြင့် တစ်အိတ်လျှင် ၄၀၀၀ကျပ်ခန့် ဈေးမြင့်တက်လာခဲ့ပါသည်။ ဖွဲနုဈေးမှာလည်း တစ်ပေါင်လျှင် ယခင်လက ၂၇၀ကျပ်ရှိခဲ့ပြီး ယခုစက်တင်ဘာလ ဒုတိယပတ်တွင်  ၂၉၀ကျပ်ဖြင့် တစ်ပေါင်လျှင် ၃၀ကျပ်ခန့် ဈေးမြင့်တက်လာခဲ့ ပါသည်။ ထိုသို့ ယခင်လကထက် ဈေးနှုန်းများမြင့်တက်လာရခြင်းမှာ စက်သုံးဆီဈေးများ အနည်းငယ်မြင့်တက်လာခြင်း၊ မွေးမြူရေးသမားများကလည်း ဝယ်ယူစုဆောင်းထားသည့်အတွက် အရောင်းအဝယ်ကောင်းသောကြောင့် ဈေးများမြင့်တက်လာရခြင်း ဖြစ်ပါသည်။

DOCA(ပဲခူး)

      ပဲခူးတိုင်းဒေသကြီး (အနောက်ပိုင်း) ပြည်ခရိုင်၊ ပြည်မြို့ မြို့မစည်ပင်သာယာဈေးကြီးနှင့် အခြားဈေးများတွင် ရာသီချိန်မဟုတ်ဘဲ စက်တင်ဘာလပထမပတ်မှစတင်၍ မုန်လာဥဖြူများ ရောင်းချနေပြီး ပေါ်ဦးပေါ်ဖျားဖြစ်၍ အရောင်းအဝယ်ဖြစ်ပြီး ဈေးကောင်းလည်းရရှိကြောင်း သိရပါသည်။ မုန်လာဥဖြူကို တို့စရာအပြင် သုပ်စား၊ အချဉ်ထည့်၊ နေလှန်းအခြောက်ခံ၊ ကြိုက်နှစ်သက်ရာ အသားနှင့်ရော၍ ချက်ပြုတ်၍လည်းကောင်း၊ ကြော်၍လည်းကောင်း၊ ဟင်းချိုအဖြစ်လည်း သောက် သုံးကြပါသည်။ မုန်လာဥဖြူသည် အကြောတက်တတ်သူများအတွက် ဆေးဖက်ဝင်သော အစားအစာတစ်ခုလည်း ဖြစ်ပါသည်။ မုန်လာဥဖြူကို အောက်တိုဘာနှင့် နိုဝင်ဘာလတို့တွင် စိုက်ပျိုးကြသော် လည်း ရာသီချိန်မှ ပေါ်ထွက်ခြင်းမဟုတ်ဘဲ ရေလောင်းစိုက်ပျိုးထား သောကြောင့် ရာသီချိန်မဟုတ်ဘဲ ဈေးကွက်တွင် ဈေးကောင်းရရှိခြင်းဖြစ်ပါသည်။ မုန်လာဥဖြူ သက်ငယ်မျိုးကို စိုက်ပျိုးပါက စိုက်သက်တမ်း (၃၅) ရက်မှ (၄၀) ရက်သားဝန်းကျင်တွင် နှုတ်ယူနိုင်ပြီး မုန်လာဥဖြူသက်ကြီးမျိုးကို စိုက်ပျိုးပါက စိုက်သက်တမ်း (၅၅) ရက်သားတွင် နှုတ်ယူရောင်းချနိုင်ကြောင်း သိရှိရပါသည်။ မုန်လာဥဖြူကို ဆောင်းတွင်းတွင်သာ ရာသီသီးနှံအဖြစ် စိုက်ပျိုးကြ၍  ရာသီချိန်မဟုတ်သော်လည်း ဝယ်ယူစားသုံးကြသဖြင့် ဟင်းသီးဟင်းရွက်များထဲတွင် ရက်တိုသီးနှံ ဖြစ်သောကြောင့် ဝင်ငွေလည်းအရမြန်ပြီး စားဝတ်နေရေးအတွက် အထောက်အကူပြုသော သီးနှံတစ်မျိုးဖြစ်သည့်အတွက် ရာသီချိန်မဟုတ်သော်လည်း ရေလောင်း၍ စိုက်ပျိုးလာကြပါသည်။ မုန်လာဥဖြူသည် မြေဆီမြေနှစ်အသင့်အတင့်ရှိသောမြေနှင့် ရေသွင်းရေထုတ်ကောင်းမွန်သောမြေ၊ နေရောင်ခြည်ရရှိမည့်နေရာမျိုးနှင့် ထယ်ရေးညက်သောမြေအမျိုးအစားကို ကြိုက်နှစ်သက်သော အပင်အမျိုးအစား ဖြစ်ပါသည်။ မုန်လာဥဖြူကို မိုးအရမ်းများလျှင် စိုက်ပျိုး၍အဆင်မပြေပါ။ မုန်လာဥဖြူကို မှော်ဇာ၊ ပုတီးကုန်း၊ အင်းမ၊ သဲကုန်း၊ ဝက်ပုတ်၊ ဆင်မြီးဆွဲကျေးရွာများမှ အများဆုံး စိုက်ပျိုးကြသော်လည်း ယခုထွက်ရှိသော မုန်လာဥဖြူများမှာ ရွှေတောင်မြို့နယ်ဘက်မှထွက်ရှိသော သီးနှံဖြစ်ပြီး ၎င်းကို ပြည်မြို့ရှိ မြို့မဈေးကြီးနှင့် အခြားဈေးများတွင် ရောင်းချလျက်ရှိပြီး စားသုံးသူများ ကြိုက်နှစ်သက်သောကြောင့် ရာသီချိန်မဟုတ်ဘဲ ဈေးကောင်းပေး၍ ဝယ်ယူစားသုံးကြကြောင်း သိရှိရပါသည်။ ၂၀၂၄ခုနှစ် စက်တင်ဘာလဒုတိယအပတ်တွင် မုန်လာဥဖြူအကြီး (၅) လုံးတစ်တွဲလျှင် ကျပ် (၇၀၀)နှင့် မုန်လာဥဖြူအလတ် (၅)လုံးတစ်တွဲလျှင် ကျပ် (၅၀၀)အထိရှိ၍ ဈေးကောင်းရပြီး အရောင်းအဝယ်ဖြစ်လျက်ရှိကြောင်း သိရှိရပါသည်။ ဒေသအတွင်း စားသုံးပိုလျှံမှသာ ရန်ကုန် တညင်းကုန်းဈေးနှင့် သီရိမင်္ဂလာဈေးသို့ တင်ပို့ရောင်းချကြကြောင်း သိရှိရပါသည်။

DOCA(ပဲခူး)