ပြည်တွင်းကုန်သွယ်မှုသတင်း

               ပြည်ခရိုင်၊ ပြည်မြို့ရှိ မြို့မစည်ပင်သာယာဈေးတွင် စားသုံးသူပြည်သူများအား သက်သာသောဈေးနှုန်းများဖြင့် ထုတ်လုပ်သူလုပ်ငန်းရှင်များမှ နေ့စဉ်တိုက်ရိုက်ရောင်းချပေးလျက်ရှိပါသည်။ ထိုသို့ရောင်းချရာ အများပြည်သူများ နေ့စဉ်စားသုံးနေသောဆန်နှင့် အသားငါးများကို အဓိကထားရောင်းချပေးလျက်ရှိပါသည်။ ထိုသို့ရောင်းချပေးလျက်ရှိသော ဈေးနှုန်းများမှာ ဆန်(၁)ပြည်လျှင် ၃၀၀၀ကျပ် နှုန်းရောင်းချပေးလျက်ရှိသလို သားငါးဈေးနှုန်းများမှာလည်း ကြက်သား(၁)ပိဿာလျှင် ၁၂၀၀၀ကျပ်၊ ငါး(၁)ပိဿာလျှင် ၁၂၀၀၀ကျပ်၊ ဝက်သား(၁)ပိဿာလျှင် ၁၂၀၀၀ကျပ်၊ ဆိတ်သား (၁)ပိဿာလျှင် ၁၅၀၀၀ကျပ်ဈေးဖြင့် ရောင်းချပေးလျက်ရှိကြောင်း သိရှိရပါသည်။

             ထိုသို့ သက်သာသောဈေးနှုန်းများဖြင့် ထုတ်လုပ်သူလုပ်ငန်းရှင်များက တိုက်ရိုက်ရောင်းချပေးသဖြင့် စားသုံးသူပြည်သူများအနေဖြင့် သက်သာစွာဝယ်ယူစားသောက်၍ အဆင်ပြေလျက်ရှိကြောင်းသိရှိရပါသည်။

DOCA(ပဲခူး)

           မန်ကျည်းသီးစိမ်းများကို ပြည်မြို့နယ်အတွင်းရှိ ကျေးရွာများဖြစ်သော မှော်ဇာ၊ တောင်လုံးညိုနှင့် တောင်ခွေးရဲကျေးရွာများတွင် မန်ကျည်းပင်များစွာရှိသည့်အတွက် မန်ကျည်းသီးစိမ်းများ အထွက်ကောင်းသော ရွာများဖြစ်ကြသည်။ ယခုအချိန်သည် မန်ကျည်းသီးစိမ်းရှားပါးသောအချိန်ဖြစ်သောကြောင့် ဈေးလည်းကောင်းဆဲဖြစ်ပါသည်။ ပေါ်ခါစအချိန်တွင် ရောင်းချသောဈေးနှုန်းမှာ တစ်ဆယ်ကျပ်သားလျှင် (၁၈၀၀)ကျပ်ဖြင့် အရောင်းအဝယ်ဖြစ်ခဲ့ပြီး ယခုရှားပါးချိန်တွင် တစ်ဆယ်ကျပ်သားလျှင် (၂၀၀၀)ကျပ်ဖြင့် ရောင်းချကြောင်းသိရသည်။

               မန်ကျည်းသီးစိမ်းမှာ ပေါ်ဦးပေါ်ဖျားတွင် ဈေးကောင်းရသောကြောင့် ခူးယူရောင်းချကြသဖြင့် မန်ကျည်းသီးမှည့်များ အထွက်နည်းရခြင်းဖြစ်ကြောင်းသိရသည်။ မန်ကျည်းသီးအမှည့်ဈေး အစေ့လွတ်တစ်ပိဿာလျှင် (၆၀၀၀)ကျပ်ဖြင့် အရောင်းအဝယ်ဖြစ်နေပြီး လာမည့်နှစ်မန်ကျည်းသီးမှည့်တစ်ပိဿာလျှင် (၈၀၀၀)ကျပ်လောက် ဈေးမျှော်ကြောင်း လှောင်လက်သမားများထံမှ သိရသည်။ မန်ကျည်းမှည့်ဈေးပိုလာရခြင်းမှာ မန်ကျည်းသီးစိမ်းများကို ဈေးကောင်းရတဲ့အချိန် ခူးယူရောင်းချခြင်းကြောင့် မန်ကျည်းသီးမှည့်အထွက်နည်းပြီး ဝယ်လက်များသဖြင့် ဈေးပိုလာရခြင်း ဖြစ်ပါသည်။

DOCA(ပဲခူး)

            တောင်ငူမြို့၌ ယခင်စက်တင်ဘာလတွင် ဂေါ်ဖီတစ်ပိဿာလျှင် ၂၅၀၀ ကျပ်ရှိရာမှ ယခုအောက်တိုဘာလ တတိယအပတ်တွင် တစ်ပိဿာလျှင် ၅၀၀၀ ကျပ်ရှိသဖြင့် ဈေးနှုန်းနှစ်ဆမြင့်တက်ပါသည်။ နံနံပင်စျေးနှုန်းမှာ ယခင်စက်တင်ဘာလ နောက်ဆုံးအပတ်က တစ်ပိဿာလျှင် ၂၀၀၀၀ ကျပ်ရှိရာမှ ယခုအောက်တိုဘာလ တတိယအပတ်တွင် တစ်ပိဿာလျှင် ၃၀၀၀၀ ကျပ်ရှိသဖြင့် ဈေးနှုန်း ၁၀၀၀၀ ကျပ် မြင့်တက်ပါသည်။

        ခရမ်းသီး(အညို)မှာ ယခင်စက်တင်ဘာလ နောက်ဆုံးအပတ်တွင် တစ်ပိဿာလျှင် ၂၅၀၀ ကျပ်မှ ၃၀၀၀ ကျပ်အထိရှိရာမှ ယခုအောက်တိုဘာလ တတိယအပတ်တွင် တစ်ပိဿာလျှင် ၄၀၀၀ ကျပ်မှ ၅၀၀၀ ကျပ်အထိရှိသဖြင့် တစ်ပိဿာလျှင် ၁၅၀၀ ကျပ်မှ ၂၀၀၀ ကျပ်အထိ ဈေးနှုန်းမြင့်တက်ပါသည်။ ခရမ်းသီး(အဖြူအဝိုင်း)မှာ ယခင်စက်တင်ဘာလ နောက်ဆုံးအပတ်က တစ်ပိဿာလျှင် ၃၀၀၀ ကျပ်မှ ၃၅၀၀ ကျပ်အထိရှိရာမှ ယခုအောက်တိုဘာလ တတိယအပတ်တွင် တစ်ပိဿာလျှင် ၅၅၀၀ ကျပ်မှ ၆၀၀၀ ကျပ်အထိရှိသဖြင့် တစ်ပိဿာလျှင် ဈေးနှုန်း ၂၅၀၀ ကျပ် မြင့်တက်ပါသည်။

          မုံလာဥနီမှာ ယခင်စက်တင်ဘာလ နောက်ဆုံးအပတ်တွင် တစ်ပိဿာလျှင် ၂၅၀၀ ကျပ်မှ ၄၅၀၀ ကျပ်အထိရှိရမှ ယခုအောက်တိုဘာလ တတိယအပတ်တွင် တစ်ပိဿာလျှင် ၅၀၀၀ ကျပ်မှ ၆၀၀၀ ကျပ်အထိရှိသဖြင့် ဈေးနှုန်း ၁၅၀၀ ကျပ်မှ ၂၅၀၀ ကျပ်အထိ မြင့်တက်ကြောင်း၊ မုံလာဥဖြူမှာ ယခင်စက်တင်ဘာလ နောက်ဆုံးအပတ်တွင် တစ်ပိဿာလျှင် ၂၀၀၀ ကျပ်မှ ၃၀၀၀ ကျပ် အထိရှိရာမှ ယခုအောက်တိုဘာလ တတိယအပတ်တွင် တစ်ပိဿာလျှင် ၄၀၀၀ ကျပ်မှ ၅၀၀၀ ကျပ်အထိရှိသဖြင့် တစ်ပိဿာ လျှင် ၂၀၀၀ ကျပ်ဈေးတက်ကြောင်း ဟင်းသီးဟင်းရွက်အရောင်းဆိုင်များမှ သိရှိရပါသည်။

DOCA(ပဲခူး)

            တောင်ငူမြို့ ညောင်ပင်ဈေးသည် ရာသီအလိုက်ပေါ်သည့် ဟင်းသီးဟင်းရွက်၊ အသားငါးပေါင်းစုံရောင်းချလျက်ရှိသည့် ကုန်စိမ်းဈေးကြီးဖြစ်ပါသည်။ ယခုအခါတွင် ပိန်းဥများပေါ်နေပြီ ဖြစ်၍ ရောင်းချနေပြီဖြစ်ပါသည်။

             ပိန်းဥမှာ နူးညံ့ပြီး ဟင်းချက်စား၍လည်းကောင်း၊ အဆာပြေပြုတ်စား၍လည်းကောင်း၊ သီးစုံကုလားပဲဟင်းချက်စား၍လည်းကောင်း စားသုံးကြပါသည်။ ဟင်းချက်စားသည့်အရွယ် ဥကြီးနှင့် ပြုတ်စားသည့်အရွယ် ဥသေးဟူ၍ နှစ်မျိုးရှိသော်လည်း ဈေးနှုန်းမှာတူညီနေပါသည်။

              ပေါ်ခါစက တစ်ပိဿာလျှင် ၃၅၀၀ ကျပ်မှ ၄၀၀၀ ကျပ်အထိ ရှိသော်လည်း ယခု အောက်တိုဘာလ တတိယအပတ်တွင် တစ်ပိဿာလျှင် ၂၅၀၀ ကျပ်မှ ၃၀၀၀ ကျပ်အထိ ဈေးနှုန်းကျဆင်းကြောင်းနှင့် ရောင်းအားကောင်းကြောင်း ပိန်းဥရောင်းချသူများထံမှ သိရှိရပါသည်။

DOCA(ပဲခူး)

             တောင်ငူခရိုင်၊ ဖြူးမြို့တွင် စပါးအသစ်များပေါ်နေပြီဖြစ်ရာ ဖြူးမြို့ပေါ်ရှိ ဆန်စက်များသို့အရောက် ဆင်းသုခစပါးတင်း ၁၀၀ လျှင် ၁၉၅၀၀၀၀ ကျပ်နှင့် နှံကောက်စပါး တင်း ၁၀၀ လျှင် ၁၈၅၀၀၀၀ ကျပ်ဖြင့် အရောင်းအဝယ်ဖြစ်လျက်ရှိပါသည်။

              ဆန်သား ၈၀၊ ၈၅ မှတ်ပါ နှံကောက်ဆန် တစ်အိတ်လျှင် ၇၅၀၀၀ ကျပ်၊ ဆင်းသုခဆန် တစ်အိတ်လျှင် ၈၀၀၀၀ ကျပ်၊ ဆန်သား ၉၀ မှတ်နှင့် အထက် ကာလာပေါလစ်တင်ထားသည့် ဆင်းသုခဆန် တစ်အိတ်တလျှင် ၉၀၀၀၀ ကျပ်ဖြင့် အရောင်းအဝယ်ဖြစ်လျက်ရှိပါသည်။

              ဆန်ကွဲကြီး တစ်အိတ်လျှင် ၆၀၀၀၀ ကျပ်၊ ဆန်ကွဲသေး တစ်အိတ်လျှင် ၅၀၀၀၀ ကျပ်၊ ဖွဲနုတစ်အိတ်လျှင် ၁၇၅၀၀ ကျပ်မှ ၁၈၀၀၀ ကျပ်အထိရှိကြောင်း ဖြူးမြို့ ကမ္ဘာကြည်ဆန်စက်မှသိရှိရပါသည်။

DOCA(ပဲခူး)