ပြည်တွင်းကုန်သွယ်မှုသတင်း

             ပဲခူးတိုင်းဒေသကြီး၊ ရွှေတောင်မြို့နယ်၊ မီးလောင်အုပ်စု၊ အင်္ဂလှိုင်ဂန်ကျေးရွာရှိ တောင်သူဦးဇင်ကိုကို၏ ပန်းဂေါ်ဖီစိုက်ခင်းသို့ (၁၈.၁၁.၂၀၂၄)ရက်နေ့ နံနက်(၁၀:၀၀)နာရီအချိန်တွင် စားသုံးသူရေးရာဦးစီးဌာန၊ ရွှေတောင်မြို့နယ်တာဝန်ခံနှင့် ဝန်ထမ်းများအဖွဲ့သည် သွားရောက်ကွင်းဆင်းလေ့လာခဲ့ပါသည်။

              ပန်းဂေါ်ဖီစိုက်ပျိုးသောမျိုးမှာ ကျောက်စိမ်းမျိုးဖြစ်၍ တော်သလင်းလတွင် စတင်စိုက်ပျိုး၍ တန်ဆောင်မုန်းလတွင် ပန်းဂေါ်ဖီများကို ခူးဆွတ်ရောင်းချရပါသည်။ ပန်းဂေါ်ဖီများကို တစ်ခါခူးဆွတ်လျှင် အပွင့် (၃၀၀)ကျော် ခူးဆွတ်ရပြီး ၂ရက်ခြား တစ်ခါခူးဆွတ်ရပါသည်။ တစ်ယောက်စိုက် စိုက်ခင်းများမှ ပန်းဂေါ်ဖီများကို (၁၀)ကြိမ်သာ ခူးဆွတ်ရပါသည်။ ပေါ်ခါစတွင် ဈေးကောင်းရ၍ တစ်ပွင့်ကို (၁၀၀၀)ကျပ်နှုန်းဖြင့် ဖေါက်သည်ပေးရပြီး လှိုင်လှိုင်ပေါလာချိန်တွင် (၅၀၀)ကျပ်နှုန်းဖြင့်သာ ဖေါက်သည်ပေးရသည်။ ပွဲစားများမှ လာရောက်ကောက်ယူပြီး ရန်ကုန်မြို့၊ ပြည်မြို့များနှင့် မြို့တွင်းတွင် ပြန်လည် ရောင်းချရပါသည်။ ကုန်ကျစရိတ်စုစုပေါင်းမှာ ၅သိန်းခန့်ရှိပြီး အကျိုးအမြတ်မှာ ဈေးနှုန်းအတက်အကျပေါ်မူတည်၍ ပြောင်းလဲနိုင်ကြောင်း သိရှိခဲ့ရပါသည်။ ပန်းဂေါ်ဖီတစ်ယောက်စိုက်တွင် ခန့်မှန်းအကျိုးအမြတ်မှာ (၄)သိန်းခန့်ရှိမည်ဟု သိရှိရပါသည်။ ပန်းဂေါ်ဖီတစ်ဧကလျှင် အကျိုးအမြတ်မှာ (၁၆)သိန်းခန့် ရှိနိုင်သည်ဟုခန့်မှန်း သိရရှိရပါသည်။

DOCA(ပဲခူး)

        ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြို့နယ်တွင် မိုးနှမ်းစိုက်ဧက (၂၅ဧက) စိုက်ပျိုးနိုင်ခဲ့ပြီး၊ ပျှမ်းမျှအထွက်နှုန်းအနေဖြင့် တစ်ဧကလျှင် (၉တင်း)နှုန်းဖြင့် တင်းပေါင်း(၂၂၅တင်း)ထွက်ရှိခဲ့ပါသည်။ နှမ်းသီးနှံသည် ဆီထွက်သီးနှံများထဲတွင် ကုန်ကျစရိတ်သက်သာသည့်အတွက် တောင်သူများ အလွယ်တကူစိုက်ပျိုးနိုင်ကြောင်းသိရပါသည်။

        လေးမျက်နှာမြို့နယ်အတွင်းရှိ တောင်သူများသည် မိမိတို့ဒေသတောင်ယာများတွင် နှမ်းသီးနှံများအား နှမ်းဆီ၊ နှမ်းယိုနှင့် နှမ်းဖတ်ပြုလုပ်ရန် တစ်နိုင်တစ်ပိုင်ထည့်သွင်းစိုက်ပျိုးကြပါသည်။ အောက်တိုဘလာ ဒုတိယပတ်တွင် ဆောင်းနှမ်းကိုစတင်စိုက်ပျိုးခဲ့ပြီး၊ တစ်ဧကလျှင် နှမ်းမျိုး(၂)ပြည်ခန့်သာကြဲပက်ရပါသည်။ နှမ်းမျိုးကို ဝယ်စရာမလိုဘဲ မိမိတို့ဒေသထွက် ယခင်နှစ်က သိုလှောင်ထားသော နှမ်းမျိုးစေ့များကိုသာ ပြန်လည်စိုက်ပျိုးခြင်းဖြစ်ပြီး တစ်ဧကကုန်ကျစရိတ်အဖြစ် ၃သိန်းခွဲခန့်ကုန်ကျပါသည်။ စိုက်ပျိုးပြီး ရက်ပေါင်း ၈၅ရက်မှ ၉၀ရက် အကြာတွင် ရိတ်သိမ်းရကြောင်း၊ ဒေသတွင်း လက်ရှိဈေးနှုန်းအနေဖြင့် တစ်တင်းလျှင် ၁၂၀၀၀၀/-ကျပ်ထိဈေးရရှိကြောင်းသိရှိရပါသည်။

DOCA(ဧရာဝတီ)

               စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကန့်ဘလူမြို့နယ်တာဝန်ခံရုံးအနေဖြင့် ၂၀၂၄ ခုနှစ်၊ နိုဝင်ဘာလ ၁၉ ရက်နေ့ နံနက်(၀၉:၃၀)နာရီအချိန်တွင် ကန့်ဘလူမြို့နယ်တာဝန်ခံ ဦးမျိုးဝင်းသန်းသည် ကန့်ဘလူမြို့ပေါ်ရှိ ဘိလပ်မြေနှင့် အိမ်ဆောက်ပစ္စည်းရောင်းချသည့်ဆိုင်များသို့ အပတ်စဉ်ကွင်းဆင်းစစ်ဆေးခြင်း ဆောင်ရွက်လျက်ရှိကြောင်းသိရသည်။

            ထိုသို့ကွင်းဆင်းစစ်ဆေးရာတွင် ကန့်ဘလူမြို့ပေါ်ရှိ ဘိလပ်မြေရောင်းချသည့်ဆိုင်များ၏ ဘိလပ်မြေဝယ်ယူရရှိမှုအခြေအနေ၊ လက်ကျန်အခြေအနေနှင့် ဈေးနှုန်း၊ ဈေးကွက်အခြေအနေတို့အား ကွင်းဆင်းစိစစ်ခဲ့ရာ ဘိလပ်မြေနှင့်ဆောက်လုပ်ရေးလုပ်ငန်းသုံးပစ္စည်းများကို မန္တလေးမြို့မှဝယ်ယူရကြောင်း၊ ဈေးနှုန်းအနေဖြင့် “CROWN”အမှတ်တံဆိပ်ဘိလပ်မြေ‌ (50kg)တစ်အိတ်လျှင် ငွေကျပ်(၂၁၀၀၀)နှင့် “ကြံ့နှစ်ကောင်”အမှတ်တံဆိပ် ဘိလပ်မြေဈေးနှုန်းမှာ (50kg)တစ်အိတ်လျှင် ငွေကျပ်(၂၀၀၀၀)ဖြင့်ရောင်းချကြောင်း၊ ယခင်အပတ်ဈေးနှုန်းများနှင့်နှိုင်းယှဉ်ပါက ယခုပတ်အတွင်း ဘိလပ်မြေဈေးနှုန်းများ အနည်းငယ်မြင့်တက်လာကြောင်း လုပ်ငန်းရှင်များထံမှ သိရှိရပါသည်။

DOCA(စစ်ကိုင်း)

       စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးသည် စားသုံးသူကာကွယ်ရေးလုပ်ငန်းများကိုဆောင်ရွက်လျက်ရှိပြီး စားသုံးသူများ နေ့စဉ်ဝယ်ယူသုံးစွဲလျက်ရှိသည့် အခြေခံစားသောက်ကုန်များ၏ဈေးနှုန်း၊ ဈေးကွက်အခြေအနေများကိုလေ့လာ၍ နေ့စဉ်၊ အပတ်စဉ်၊ လစဉ် အထက်အဆင့်ဆင့်သို့ တင်ပြဆောင်ရွက်လျက်ရှိကြောင်းသိရသည်။

       စားသုံးသူများ နေ့စဉ်ဝယ်ယူအသုံးပြုလျက်ရှိသည့် အာလူးသီးများကို ရှမ်းပြည်နယ်၊ အောင်ပန်းမြို့မှ မုံရွာမြို့ရှိ လက္ကားကုန်သည်များမှတစ်ဆင့် မုံရွာခရိုင်အတွင်းရှိ လက်လီ အရောင်းဆိုင်များသို့ ဖြန့်ဖြူးရောင်းချပေးလျက်ရှိသည်။

        ၂၀၂၄ခုနှစ်၊ နိုဝင်ဘာလ တတိယပတ်အတွင်း မုံရွာမြို့၊ ကန်သာယာဈေးရှိ အာလူးသီးဈေးနှုန်းများမှာ  အာလူးသီး (၁) ပိဿာလျှင်  ၆၀၀၀ကျပ်၊ ၈၀၀၀ကျပ်တို့ဖြင့်ရောင်းချကြောင်း၊ နိုဝင်ဘာလ ဒုတိယပတ်ဈေးနှုန်းနှင့်နှိုင်းယှဉ်ကြည့်လျှင် ဈေးနှုန်းမြင့်တက်မှုမှရှိကြောင်းနှင့် ပုံမှန်အရောင်းအဝယ်ဖြစ်လျက်ရှိကြောင်းသိရပါသည်။

DOCA(စစ်ကိုင်း)

      ပြည်ခရိုင်၊ ပေါက်ခေါင်းမြို့၊ အမှတ်(၃)ရပ်ကွက်နေ ဦးအေးကျော် (အောင်ဆုရည်) မျှစ်လုပ်ငန်းမှ ယခုနှစ်တွင် သရက်ချဉ်လုပ်ငန်းများစမ်းသပ်လုပ်ကိုင်နေသည်ဟုသိရှိရပါသဖြင့် သရက်ချဉ်ပြုလုပ်ပုံအဆင့်ဆင့်အားသိရှိနိုင်ပါရန် ကွင်းဆင်းလေ့လာခဲ့ရာ သရက်ချဉ်ပြုလုပ်ရန်အတွက် ကုန်ကြမ်းအဖြစ် သရက်သီးကို ပေါက်ခေါင်းမြို့နှင့် ပတ်ဝန်းကျင်ကျေးရွာများမှ တစ်ပိဿာလျှင် ၃၀၀၀-၄၀၀၀ ကျပ်အထိဈေးပေး၍ ဝယ်ယူရကြောင်းသိရပါသည်။ ထို့နောက် ဝယ်ယူပြီးရရှိလာသော သရက်သီးများကို ရေစင်အောင်ဆေး၍ ခြစ်ဖြင့် အမျှင်အချောင်းလေးများရရှိအောင်ခြစ်ရပါသည်။ ထိုသို့ ခြစ်ပြီးသားအမျှင်ချောင်းလေးများကို ဆားရေစိမ်ပြီးနောက် ရေဆေး၍ ဆားဖြင့်နယ်၍ ပီနန်အိတ်တွင်ထည့်ကာ နှပ်ထားရပါသည်။ နှပ်ပြီးသားသရက်သီးခြစ်ပြီးသားများကို (၃)လခန့်အကြာတွင် အတုံးလေးများတုံး၍ ရောင်းချရသောအဆင့်သို့ရောက်ရှိပါသည်။ ရရှိလာသောသရက်ချဉ်အတုံးလေးများအား ပါကင်ပိတ်စက်ဝယ်ယူ၍ စနစ်တကျထုပ်ပိုးရန် ရည်ရွယ်ထားကြောင်းနှင့် ဈေးကွက်အနေဖြင့် ရန်ကုန်သို့တင်ပို့ရောင်းချရန် ရည်ရွယ်ထားကြောင်းသိရှိရပါသည်။

        သရက်ချဉ်လုပ်ငန်းအား စနစ်တကျထုပ်ပိုး၍ တင်ပို့ရောင်းချနိုင်မည်ဆိုပါက လုပ်ငန်းများတိုးတက်အောင်မြင်ပြီး အကျိုးအမြတ်များလည်းရရှိနိုင်မည်ဖြစ်ပါကြောင်းရေးသားတင်ပြလိုက်ရပါသည်။

DOCA(ပဲခူး)