ပြည်တွင်းကုန်သွယ်မှုသတင်း

   နွားထိုးကြီးမြို့နယ်တွင် ပဲမျိုးစုံ၊ ထန်း၊ ကြက်သွန်နီးများစိုက်ပျိုးထုတ်လုပ်လျက်ရှိရာ မိုးနှမ်းသီးနှံ ကိုလည်း စိုက်ပျိုးထားရှိကြောင်းသိရှိရသည်။ မိုးနှမ်းသီးနှံကို မေလ-ဇွန်လတို့တွင် စတင်စိုက်ပျိုးပြီး၊ အောက်တိုဘာလ အတွင်းရိတ်သိမ်းပေါ်မည်ဖြစ်ကြောင်း၊ကြောင်း၊ စိုက်ပျိုးချိန်မှ ရိတ်သိမ်း ချိန်အထိ (၄)လခန့် ကြာ မြင့်ကြောင်းသိရှိရသည်။

   ၂၀၂၅-၂၀၂၆ ခုနှစ်တွင် နွားထိုးကြီးမြို့နယ်၌ မိုးနှမ်းစီမံကိန်းသီးနှံ(၁၆၈၀၂၂)ဧက လျာထား ချက်အပေါ် အမှန်စိုက်ပျိုးထားမှု (၁၇၄၅၀၂) ဧကစိုက်ပျိုးထားရှိပြီး၊ လျာထားချက်ဧကထက် (၆၄၈၀)ဧက ကျော်ပိုမိုစိုက်ပျိုးထားရှိကြောင်း မြို့နယ်ကြေးတိုင်နှင့် မြေစာရင်းဦးစီးဌာန၏ စာရင်းများ အရသိရှိရသည်။ နှမ်းစိုက်ပျိုးရန်အတွက် မြေယာပြုပြင်ရာတွင် ထွန်ရေးညက်ရန် လိုအ်ကြောင်း၊ တောင်သူများလက်ရှိစိုက်ပျိုးနေသော နှမ်းမျိုးအများစုမှာ ဆင်းရတနာ မျိုးဖြစ်ပြီး နှမ်းပင်များ အကိုင်းဖြာသော မျိုးဖြစ်၍ နှမ်းစိုက်ရန် (၁၅) လက်မ အတန်းအကွာအဝေးဖြင့် စိုက်ပျိုး ထားကြောင်း၊ မျိုးစေ့များ အပင်ပေါက်ကောင်းစေရန် ကြောင်းဆွဲရာတွင် မြေမနက်ရန်လိုကြောင်း၊ တစ်ဧကလျှင် မျိုးစေ့(၄)ပြည် စိုက်ပျိုးကြောင်း၊ ထွန်ကြောင်းဆွဲပြီး ကြဲပတ်စနစ်ဖြင့် မျိုးစေ့များ မြေကြီးထဲတွင်ကြောင်းတိမ်တိမ်ဆွဲ၍ မြေကြီးနှင့်ခပ်ပါးပါးဖုံးအုပ်ပြီး စိုက်ပျိုးပါကအထွက် တိုးခြင်းကို ဆွဲ၍ အထောက်အကူပြုကြောင်း သိရှိရသည်။ ယခင်နှစ် မိုးနှမ်းတစ်ဧကလျှင် (၅.၆) တင်းခန့်ထွက်ရှိကြောင်း၊ ယခုနှစ်တွင် ယခင်နှစ်ထက် အထွက်နှုန်း ပိုမိုနိုင်မည်ဟု ခန့်မှန်းကြောင်း နှမ်းစိုက်တောင်သူတစ်ဦး၏ ပြောပြချက်အရ သိရှိရသည်။ နှမ်းတစ်တင်း ဆီကြိတ်ပါကနှမ်းဆီ (၆) ပိဿာထွက်ရှိကြောင်း၊    ယခု ၂၀၂၅ ခုနှစ် စက်တင်ဘာလ တတိယပတ်တွင်နွားထိုးကြီးမြို့ နယ်၌ဆောင်းနှမ်းညို တစ်တင်းလျှင် (၈၈၀၀၀) ကျပ်ခန့်ပေါက်ဈေးများရှိကြောင်း၊ ပွဲရုံများတွင် နေ့စဉ်အိတ် (၁၅၀-၂၀၀) ခန့်အရောင်း အဝယ်ဖြစ် လျက်ရှိကြောင်း၊ တင်ပို့မှုအနေဖြင့် မန္တလေးမြို့သို့ တင်ပို့ရောင်းချကြောင်း သိရှိရသည်။

DOCA( မန္တလေး)

     စစ်ကိုင်းတိုင်းဒေသကြီး၊ ကန့်ဘလူမြို့ “မြို့မဈေး”၌ ရာသီပေါ်သီးနှံများ၊ အခြားဒေသမှ ဝင်ရောက်သည့် လူသုံးကုန်နှင့် စားသောက်ကုန်ပစ္စည်းများ ရောင်းချပေးလျက်ရှိရာ၊ ယခုအခါတွင် ရာသီစာ သခွပ်ပွင့်ခြောက်နှင့် ကြောင်လျှာပွင့်ခြောက်များကို မြို့ပေါ်ရပ်ကွက်များ၊ ကန့်ဘလူမြို့နယ် တောက္ကရှပ်ကျေးရွာနှင့် နတ်အင်းကျေးရွာတို့မှ ဝင်ရောက်လျက်ရှိကြောင်း သိရှိရသည်။

       ၂၀၂၅ ခုနှစ်၊ စက်တင်ဘာလ တတိယပတ်အတွင်း ရောင်းချနေသော ကြောင်လျှာပွင့်ခြောက် ဈေးနှုန်းများမှာ (၁၀)ကျပ်သားလျှင် (၁၀၀၀)ကျပ်၊ (၅၀)ကျပ်သားလျှင်(၅၀၀၀)ကျပ်၊ (၁)ပိဿာလျှင် (၉၅၀၀)ကျပ်ဖြင့်ရောင်းချကြောင်း၊  ကြောင်လျှာပွင့်ခြောက်များ အရောင်းသွက်လျက်ရှိကြောင်း၊ စက်တင်ဘာလ တတိယပတ်အတွင်း သခွတ်ပွင့်ခြောက်(၁)ပုံလျှင် (၁၀၀၀)ကျပ်နှင့် (၂)ပုံလျှင် (၁၈၀၀)ကျပ် ဈေးနှုန်းတို့ဖြင့်ရောင်းချကြောင်း ဈေးသည်များထံမှ သိရှိရပါသည်။

DOCA(စစ်ကိုင်း)       

    မြန်မာနိုင်ငံတွင် မန်ကျည်းပင်များ ပေါများလာသည်နှင့်အမျှ မန်ကျည်းသီး၊ မန်ကျည်းဖူး၊ မန်ကျည်းရွက်နုတွေကို လူတော်တော်များများ နှစ်သက်စွာစားသုံးကြကြောင်း၊ မြန်မာ့ရိုးရာ ဆေးနည်းမှာ မန်ကျည်းတစ်ပင်လုံးက ပစ်စရာမရှိအောင် အသုံးဝင်ကြောင်း၊ အိမ်ရှင်မများ ဟင်းချက် ရာတွင် ပုံစံမျိုးစုံဖြင့် အသုံးပြုကြကြောင်း၊ မန်ကျည်းသီးသည် အရသာထိမိရုံသာမက ကျန်းမာရေး ကောင်းကျိုးများလည်း များစွာရှိကြောင်း၊ မန်ကျည်းသီး စားသုံးခြင်းဖြင့် နှလုံးကျန်းမာရေးကို အထောက်အကူပြုနိုင်ခြင်း၊ သွေးဖိအားကို မျှတစေခြင်း၊ အသည်းအဆီဖုံးခြင်းကို ကာကွယ်ပေးခြင်း စသည့်ကျန်းမာရေးကောင်းကျိုးများစွာ ရရှိကြောင်း၊ မန်ကျည်းသီးမှည့် သီးသန့်ပဲဖြစ်ဖြစ်၊ ဟင်းအနှစ် အဖြစ်လည်း ချက်စားကြသလို မန်ကျည်းသီးစိမ်းကို ထောင်းပြီးငပိနှင့် ချက်စားခြင်းအပြင် ပုဇွန်ဆိတ်၊ ပုဇွန်ဆီ၊ ငါးပိကောင်များဖြင့်လည်း ချက်စားလေ့ ရှိကြောင်း၊ မန်ကျည်းသီး ဈေးနှုန်း အနေဖြင့် မန်ကျည်းသီးမှည့် တစ်ပိဿာလျှင် (၁၂၀၀၀/-)ကျပ်၊ မန်ကျည်းသီးစိမ်း တစ်ဗူးလျှင် (၁၀၀၀/-)ကျပ်၊ မန်ကျည်းရွက် တစ်ဆယ်သားလျှင် (၁၅၀၀/-) ကျပ်ဖြင့် ရောင်းဝယ်လျက်ရှိကြောင်း သိရှိရပါသည်။

DOCA(မန္တလေး)

    ကျောက်ဆည်ခရိုင်၊ ကျောက်ဆည်မြို့နယ်၊ တံစိုးကျေးရွာတွင် လယ်ယာစိုက်ပျိုးရေး လုပ်ငန်းများ အပြင် မွေးမြူရေးထွက်ကုန်ပစ္စည်းတစ်မျိုးဖြစ်သည့် နွားနို့၊ နွားနို့ခဲတို့ကိုလည်း တစ်ပိုင်တစ်နိုင် ထုတ်လုပ် ရောင်းချပြီး၊ နွားနို့အရည်တိုင်း ၁ လီတာဆန့် ရေသန့်ဗူးများနှင့်ထည့်၍ ဈေးကွက်သို့ တင်ပို့ရောင်းချမှုအပြင် နွားနို့ခဲကိုလည်း ပြုလုပ်ရောင်းချကြကြောင်း၊ နွားနို့အား ၁ လီတာဆန့် ရေသန့်ဗူးများနှင့်ထည့်၍ဈေးကွက်သို့ တင်ပို့ရောင်းချမှုအပြင် နွားနို့ခဲများ ပြုလုပ်ရောင်းချကြကြောင်း၊ နွားနို့ခဲပြုလုပ်ရာ၌ ရိုးရာဓလေ့အတိုင်း ပြုလုပ်ပြီး ဓါတုဗေဒနည်း ဖြင့်ပြုလုပ်ခြင်း မဟုတ်သည့်အတွက် ကျန်းမာရေးနှင့် ညီညွတ်မှုရှိကြောင်း၊ နွားနို့ခဲပြုလုပ်ပုံမှာ ဒေသတွင်း အလေ့ကျ ပေါက်ရောက်သည့် မရိုးစေးပင်ကို အဓိကထား အသုံးပြုရာ ဦးစွာနွားနို့ကျို ချက်မည့် အိုးကိုမရိုးစေးဖြင့် သုတ်လိမ်းပြီး နွားနို့ကိုမရိုးစေးရွက်ဖြင့် ရောကာအိုးအတွင်း ထည့်ကျို ချက်ကာ မရိုးစေးပင်အရိုးဖြင့် ပြစ်လာ သည်အထိ အဆက်မပြတ်မွှေပေးရကြောင်း၊ ၎င်းနောက် နွားနို့ရည်ပြစ်ခဲလာသည့်အခါ ခွက်ဖြင့်ထည့်၍ အအေးခံပြီးပါက နွားနို့ခဲရရှိကြောင်း၊ နွားနို့အရည် ၁လီတာအား ကြိုချက်ပြီး နွားနို့ခဲများပြုလုပ်ရာ (၁၀)ကျပ်သားခန့် ရရှိကြောင်း၊ဒေသတွင်း တစ်ပိုင်တစ်နိုင် အနေဖြင့် ထုတ်လုပ်သော နွားနို့ရည်၊ နွားနို့ခဲကို အေးမြကြည်လင်ဈေး၊ မြို့မဈေး များသို့ သွားရောက်ရောင်းချကြရာ နွားနို့ ၁ လီတာတစ်ဗူးလျှင်၂၀၀၀/- ကျပ်၊ နွားနို့ ၁၀ ကျပ်သားလျှင် (၂၀၀၀/-)ကျပ်၊နွားနို့ခဲ (၂၅)ကျပ်သား လျှင်(၃၀၀၀)ကျပ်တို့ဖြင့် ရောင်းချရကြောင်းသိရ သည်။

DOCA(မန္တလေး)

   မန္တလေးတိုင်းဒေသကြီး ၊ ကျောက်ဆည်ခရိုင်သည် ဆည်ရေသောက်ဒေသတစ်ခုဖြစ်သော ကြောင့်သီးနှံမျိုးစုံစိုက်ပျိုးဖြစ်ထွန်းလျက်ရှိရာ ၄င်းသီးနှံများအနက် စျေးကွက်ဝယ်လိုအားရှိပြီး ကျွဲစာ၊ နွားစာပါဖူလုံသော ပဲယင်းသီးနှံကိုလည်းစိုက်ပျိုးလျက်ရှိပါသည်။ ပဲယင်းသည် ပူနွေတဲ့ရာသီဥတုကို ကြိုက်နှစ်သက်သည်။ ပဲယင်းစိုက်ပျိုးချိန်သည် သြဂုတ်လနှင့်စက်တင်ဘာလတွင်စိုက်ပျိုးသည်။ စိုက်ပျိုးမှုအနေဖြင့်(၁)ဧကလျင်(၆-၈)ပြည်အထိ စိုက်ပျိုးပြီး ကြဲပတ်စနစ်ဖြင့် စိုက်ပျိုးပါက (၁၀-၁၂) ပြည်အထိစိုက်ပျိုးကြောင်း ၊ အချို့တောင်သူများသည် ကျွဲစာ ၊ နွားစာအတွက် မြေလွတ် ၊ မြေရိုင်း၊ လယ်ကန်သင်းများပေါ်တွင် ကြဲပတ်၍စိုက်ပျိုးကြောင်း၊ပဲယင်းကိုစိုက်ပျိုးပြီး(၃-၄)လအကြာတွင် ခူးဆွတ်ရိတ်သိမ်းကြောင်း၊ယခုအခါစျေးကွက်ထဲ၌ ပဲယင်း(၁)ပြည်လျင်(၅၅၀၀/-)ကျပ်စျေးနှုန်းများ ဖြင့်အရောင်းအဝယ်ဖြစ်လျက်ရှိကြောင်း ပဲမျိုးစုံရောင်းချသည့် စျေးသည်များထံမှသိရှိရပါသည်။

DOCA(မန္တလေး)