ပြည်တွင်းကုန်သွယ်မှုသတင်း

   နတ်တလင်းခရိုင်၊ နတ်တလင်းမြို့နယ် မြို့မဈေးကြီးနှင့် ညနေဈေးတို့တွင်ဒေသထွက် ဟင်းသီးဟင်းရွက် သစ်သီးဝလံများနှင့် နတ်တလင်းဒေသထွက် ရှောက်ချိုသီးများ ကိုရောင်းချလျက် ရှိပါသည်။

   ရှောက်ချိုသီးကို နတ်တလင်းမြို့နယ် အနောက်စုကျေးရွာ၊ ကုန်းကြီးကျေးရွာ၊ ရှားဖြူကုန်းကျေးရွာ၊ ကြွက်နွယ်တောကျေးရွာ စသည့်ကျေးရွာများက ရှောက်ချိုသီးများကို ဈေးကွက် အတွင်း‌ လာရောက်ရောင်းချခြင်းဖြစ်ပြီး ယခုနိုဝင်ဘာလ တတိယပတ်၌ ရှောက်ချိူသီး တစ်လုံးလျှင် အရွယ်အစားကို လိုက်၍ (၂၀၀-၁၅၀)ကျပ်ဖြင့်ရောင်းချကြောင်း ရှောင်ချိူပင်တစ်ပင်လျှင် ရေမြေ အနေအထားပေါ် မှုတည်၍ တစ်နှစ်အလုံးရေ ၃၀၀ နှင့် ၁၀၀၀  ကြားထွက်ရှိပါကြောင်း ဈေးကွက် အနေဖြင့် ကျောင်းဈေးများ အချဉ်ပေါင်းသည်များက ဝယ်ယူပါကြောင်း ကြို့ပင်ကောက်မြို့၊ သုံးဆယ်မြို့များ သို့လည်းတင်ပို့ရောင်းချရသဖြင့် ဈေးကွက်အတွင်း အရောင်းအဝယ်ဖြစ်ပါကြောင်း ရှောက်ချိုသီး ရောင်းဝယ်သူ တစ်ဦးထံမှ သိရသည်။

DOCA(ပဲခူး)

    ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်အတွင်းရှိ ကျေးရွာများတွင် ခရမ်းကစော့ပင်များ စိုက်ပျိုးထားကြောင်းသိရသည်။ ပြည်မြို့အတွင်းရှိ ဈေးများတွင် ခရမ်းကစော့သီးများ အရောင်း သွက်နေကြောင်းသိရသည်။ ခရမ်းကစော့သီးတွင် ဗီတာမင် A , C  သံဓါတ်စသည်တို့ အကျိုးပြု ဓါတ်ပေါင်းများ ပါဝင်ပြီး အစာစားချင်စိတ်ကိုဖြစ်စေခြင်း၊ အစာချေဖျက်ခြင်းကိုကူညီပေးခြင်း၊ အစာအိမ်အနာကို ပျောက်ကင်းစေခြင်း၊ လည်ချောင်းနာခြင်းကို သက်သာစေခြင်း၊ အသားဝါခြင်းကို ကာကွယ်ပေးခြင်း၊ ကျောက်ကပ်လုပ်ဆောင်ချက်များကို လှုံ့ဆော်ပေးခြင်းစသည့် အစွမ်းသတ္တိများ ရှိကြောင်း သိရသည်။

          ခရမ်းကစော့သီးများကို မီးကင်ပြီးစားလို့ရသလို ပြုတ်ပြီး တို့စရာအဖြစ်စားသုံးကြပါသည်။ ခရမ်းချည်သီးဖြင့်လည်း ချက်ပြုတ်၍စားလို့ရကြောင်းသိရသည်။ ပြည်ဈေးကွက်တွင် ရောင်းချ နေသော ခရမ်းကစော့သီးဈေးနှုန်းများမှာ (၁၀)ကျပ်သားလျှင် (၅၀၀)ကျပ်၊ (၂၅)ကျပ်သားလျှင် (၁၀၀၀)ကျပ်တို့ဖြင့် ရောင်းချနေကြောင်းသိရသည်။

DOCA(ပဲခူး)   

      ရွှေတောင်မြို့ မီးလောင်အုပ်စု အင်္ဂလိုင်ဂန်ကျေးရွာရှိ တောင်သူဦးမျိုးဝင်း၏ ပန်းဂေါ်ဖီစိုက်ခင်းသို့ (၁၃.၁၁.၂၀၂၅) ရက်နေ့ နံနက် (၁၀:၃၀) နာရီတွင် သွားရောက်ကွင်းဆင်း လေ့လာခဲ့ပါသည်။ ကျောက်စိမ်းမျိုးဖြစ်သော ပန်းဂေါ်ဖီမျိုးများကို တော်သလင်းလတွင် စတင် စိုက်ပျိုးပြီး တန်ဆောင်မုန်းလတွင် ပန်းဂေါ်ဖီများကို ခူးဆွတ်ရောင်းချရပါသည်။ စိုက်ဧကမှာ တစ်ယောက်စိုက်ရှိပြီး အပင်ရေ ၄၅၀၀ ခန့်ရှိပါသည်။ ပန်းဂေါ်ဖီများကို တစ်ခါခူးဆွတ်လျှင် အပွင့် ၃၀၀ ကျော် ခူးဆွတ်ရပြီး ၂ ရက်ခြား တစ်ခါ ခူးဆွတ်ရပါသည်။ တစ်ယောက်စိုက် စိုက်ခင်းမှ ပန်းဂေါ်ဖီများကို ၁၀ ကြိမ်သာ ခူးဆွတ်ရပါသည်။ ပေါ်ခါစတွင် ဈေးကောင်းရ၍ တစ်ပွင့်ကို တစ်ထောင်ကျပ်နှုန်းဖြင့် ဖော်သည်ပေးရပြီး လှိုင်လှိုင်ပေါ်ချိန် တွင် တစ်ပွင့်ကို ၅၀၀ ကျပ်နှုန်းဖြင့် ရောင်းချနေပါသည်။ ပွဲစားများမှ လာရောက်ကောက်ယူပြီး တခြား မြို့များနှင့် မြို့တွင်းတွင် ပြန်လည်ရောင်းချရပါသည်။ ကုန်ကျစရိတ်မှာ ၅သိန်းခန့်ရှိပြီး အကျိုးအမြတ်မှာ ဈေးနှုန်းအတက် အကျပေါ်မူတည်၍ ပြောင်းလဲနိုင်ကြောင်း သိရှိရပါသည်။

DOCA(ပဲခူး)   

          ရွှေဘိုခရိုင်၊ရွှေဘိုမြို့ အောင်ဇေယျဈေးအတွင်းတွင် သစ်သီးမျိုးစုံရောင်းချသော ဆိုင်ပေါင်း (၈)ဆိုင်ခန့်ရှိပြီး နေ့စဉ်ပိတ်ရက်မရှိ နံနက် (၀၆:၀၀)နာရီအချိန်မှ နေ့လယ် (၁၄:၀၀)နာရီအထိ ရောင်းချလျက်ရှိပြီး ရာသီအလိုက် ကဗ္ဗလာသီး၊ နဂါးမောက်သီး၊ သင်္ဘောသီး၊ ထောပတ်သီး၊ ပျားလိမ္မော်၊ ပန်းသီး စသည့် သီးနှံများကို မန္တလေးမြို့ရှိ ပွဲရုံများမှ တစ်ဆင့်ယူ၍ ရောင်းချကြောင်း သိရပါသည်။

          ရွှေဘိုမြို့ အောင်ဇေယျဈေးအတွင်းတွင် ရောင်းချလျက်ရှိသော ထောပတ်သီးများမှာ တောင်ကြီးမြို့မှ လာသောထောပတ်သီး၊ ပြင်ဦးလွင်မြို့အနီးရှိ ကျေးရွာများမှ လာသောထောပတ်သီးများဖြစ်ပြီး မန္တလေးမြို့ ပွဲရုံများမှလည်း တစ်ဆင့် မှာယူရကြောင်း၊ ထောပတ်သီး တစ်အိတ်လျင် အကြီး/ အသေး ပေါ် မူတည်၍ အလုံး (၈၀)မှ (၁၀၀)ထိ ပါပြီး၊ တစ်အိတ်လျင် (၁၂၀၀၀၀)ကျပ်ဖြင့် ဝယ်ယူရကြောင်း၊ ထောပတ်သီးများကို အလုံးအကြီး အသေးခွဲ၍  လက်လီတစ်လုံးလျင် အကြီး ၁၅၀၀ ကျပ်၊ အလတ် ၁၀၀၀ကျပ်၊ အသေး  ၈၀၀ကျပ်၊ထောပတ်သီး မျိုးကွဲ (Hass)သီး 1Kg လျှင်  (၅၀၀၀)ကျပ်မှ (၇၀၀၀)ကျပ်ထိ ရောင်းချရပြီး ထောပတ်သီးများကို အအေးဆိုင်များ၊ တစ်ဆင့်လှည့်လည်ရောင်းချသော ဈေးသယ်များ ၊ စားသုံးသူများမှ ဝယ်ယူကြ၍ အရောင်းအဝယ်‌ဖြစ်လျက်ရှိကြောင်း သစ်သီးစုံလက္ကား ရောင်းချသည့် ဈေးသည်တစ်ဦးထံမှ သိရှိရပါသည်။

DOCA(စစ်ကိုင်း)

          မြန်မာနိုင်ငံစက်သုံးဆီ တင်သွင်း/သိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ တိုင်းဒေသကြီး၊ ပြည်နယ်အလိုက် မြို့ကြီးများ၏ စက်သုံးဆီ ရည်ညွှန်းလက်ကားဈေးနှုန်းများအား နေ့စဉ်ထုတ်ပြန်ပေးလျက်ရှိပါသည်။

          ‌ရွှေဘိုမြို့တွင် စက်သုံးဆီဆိုင် (၂၂)ဆိုင် ပုံမှန် ဖွင့်လှစ်ရောင်းချလျက်ရှိပြီး ၂၀၂၅ခုနှစ် နိုဝင်ဘာလ တတိယပတ်တွင် စက်သုံးဆီဈေးနှုန်းများမှာ ဓါတ်ဆီ(92) တစ်လီတာလျှင် (၂၇၄၅)ကျပ်၊ ဓါတ်ဆီ(95)တစ်လီတာလျှင် (၂၈၂၀)ကျပ်၊ ဒီဇယ်(ရိုးရိုး) တစ်လီတာလျှင် (၂၇၀၀)ကျပ်၊ ဒီဇယ်(ပရီမီယမ်)တစ်လီတာလျှင် (၃၂၄၀)ကျပ်ဖြင့် ရောင်းချလျက်ရှိကြောင်း သိရသည်။

       ယခု ၂၀၂၅ခုနှစ် နိုဝင်ဘာလ နောက်ဆုံးပတ်တွင် စက်သုံးဆီဈေးနှုန်းများမှာ ဓါတ်ဆီ(92) တစ်လီတာလျှင် (၂၆၃၅)ကျပ်၊ ဓါတ်ဆီ(95)တစ်လီတာလျှင် (၂၇၁၅)ကျပ်၊ ဒီဇယ်(ရိုးရိုး) တစ်လီတာလျှင် (၂၆၆၀)ကျပ်၊ ဒီဇယ်(ပရီမီယမ်)တစ်လီတာလျှင် (၃၁၇၅)ကျပ် ဖြင့် ရောင်းချနေသောကြောင့် ယခင်အပတ်နှင့် နှိုင်းယှဉ်ပါက ဓါတ်ဆီ(92) တစ်လီတာလျှင် (၁၁၀)ကျပ်၊ ဓါတ်ဆီ(95)တစ်လီတာလျှင် (၁၀၅)ကျပ်၊  ဒီဇယ် (ရိုးရိုး)တစ်လီတာလျှင် (၄၀)ကျပ် နှင့် ဒီဇယ်(ပရီမီယမ်) တစ်လီတာလျှင် (၆၅)ကျပ်  ဈေးနှုန်းကျဆင်းလျက်ရှိကြောင်း စက်သုံးဆီအရောင်းဆိုင်များမှ သတင်းရရှိသည်။

DOCA(စစ်ကိုင်း)