ပြည်တွင်းကုန်သွယ်မှုသတင်း

           တောင်ကြာပန်းဟုဆိုရာဝယ် တောင်ပေါ်ဒေသတွင် နေကြာပန်း များနှင့်တူသော တောင်ကြာပန်းများလည်းရှိပါသည်။ အောက်အရပ်ဒေသ နုနွင်းဖူး၊နုနွင်းပန်း ပွင့်များနှင့်တူသော တောင်ကြာပန်းကို နုနွင်းခါးပွင့်၊တောက်တာပွင့် ဟူ၍လည်း ခေါ်ဆိုကြသည်။ အညာဒေသမှ မာလာဖူးဟုခေါ်ဆိုကြသည်။ အညာဒေသတောင်စောင်းများ၊လည်ကန်ဆင်းတွင်မိုးလေးမစို့မပို့ ရွာလိုက်တာနှင့်မာလာဖူးနုနုလေးများ ထွက်ပေါ်တက်ပြီး ၎င်းမာလာဖူးနုနုလေးများကို ပြုတ်၍ သုပ်စားကြသည်။ မာလာဖူးကို မီးကင်၍ ကြက်သွန်ဖြူ၊ငရုတ်သီးလေးနှင့် ထောင်းစားက ခံတွင်းမြိန်သည်ဟု ဆိုကြသည်။ သို့သော် တောင်ပေါ်ဒေသများဖြစ်သော မိုးကုတ်၊ ပြင်ဦးလွင်ဒေသများတွင် ယခုလိုမိုးရာသီတွင် တောင်ကြာပန်းများ ခူးယူရောင်းချသူများ ပေါများသလို တစ်နှစ်တစ်ခါသာပေါ်သော ပန်းမို့ အမြတ်တနိုး ဘုရားလှူကြ၍ ရောင်းပန်း ဝယ်ပန်းလှသည်ဟု သိရှိရပါသည်။ မာလာဖူးအရသာမှာ ရှတတနှင့် ရနံ့မှာ မဆိုသလောက် မွှေးပါသည်။ မာလာဖူးက ဝမ်းမီးကို တောက်စေ၏။ အသက်ရှုစဉ် နံစော်ခြင်းကို ပျောက်စေ၏။ ကျန်းမာရေးအတွက် ဟင်းလျာအဖြစ် စားသုံးကြသလို ဘုရားပန်းလှူရန်အတွက် လည်းကောင်း၊ အလှပန်းအိုးထိုးရန်အတွက်လည်းကောင်း ဝယ်ယူများကြောင်း သိရှိရသည်။ တောင်ကြာပန်း (၁၀)ပင်တစ်စည်းလျှင်(၂၀၀၀)ကျပ်ဖြင့် ရောင်းချကြောင်း ပြင်ဦးလွင်ဒေသရှိ တောင်ကြာပန်းခူးယူ ရောင်းချသူတစ်ဦးထံမှ သိရှိရသည်။

DOCA(မန္တလေး)

              ညမွှေးပန်း၏ အဓိပ္ပာယ်သည် “အရာရာမင်းအတွက်ဖြစ်စေရမယ်”ဟူ၍ဖြစ်သည်။ ညမွှေးပန်းသည် စိမ်းနုရောင်ပန်းခိုင်လေးများ တစ်ပင်လုံးအူနေအောင် ပွင့်သောပန်းဖြစ်သည်။ ညမွှေးပန်းဟု အမည်နှင့်လိုက်အောင် နေခင်းပိုင်းတွင် လုံးဝမမွှေးဘဲ နေလုံးကွယ်ပျောက် ညချမ်းအချိန် အခါရောက်မှ မွှေးသောပန်းဖြစ်သည်။ ညမွှေးပန်း၏ ရနံ့သည် တစ်တောလုံး တစ်တောင်လုံး အီနေအောင်မွှေးသောပန်းဖြစ်သည်။မွှေးလွန်းသော ညမွှေးပန်းရနံ့ကို လူတိုင်းမကြိုက်နှစ် သက်ပေမဲ့ လမ်းဘေးဝဲယာ၊ အိမ်ခြံဝင်း ဘေးများတွင် နှစ်သက်စွာစိုက်ပျိုးတတ်ကြသည်။ မိုးများသော၊ အေးသောဒေသများတွင် ခြံစည်ရိုးပန်းအဖြစ် မိုးကုတ်၊ ပြင်ဦးလွင်ဒေသများတွင် စိုက်ပျိုးကြသည်။ မြေပြန့်ဒေသတွင် အနည်းငယ်သာစိုက်ပျိုးကြသည်။ ညမွှေးပန်းပင်သည် အမြဲစိမ်းခြုံနွယ်ပင်မျိုးဖြစ်ပြီး ညမှာပွင့်သည့် ညမွှေးပန်းလေးတွေက အလွန်ပြင်းထန်ပြီး ချိုအီသောရနံ့ကို ထုတ်ပေးကာ ဝတ်မှုန်ကူးမယ့် ညပျော်ဖလံအင်းဆက်တွေကို ဆွဲဆောင်နိုင်သည်။ ညမွှေးပန်း၏ ရနံ့သည် ပန်းနာရင်ကြပ်ရောဂါသည်များအတွက် အသက်ရှူရန်ခက်ခဲသည် အထိဖြစ်ရ သည်ဟုဆိုကြသည်။ နှာခေါင်း၊ လည်ချောင်းယာယံခြင်း၊ ခေါင်းကိုက်ခြင်းတွေ ဖြစ်နိုင်လို့တချို့က ကြိုက်နှစ်သက်ခြင်းမရှိကြပါ။ မိုးကုန်ဆောင်းကူးရာသီတွင် ပွင့်တတ်ပါသည်။ မည်သို့ပင်ဆိုစေကာမူ ကြိုက်နှစ်သက်သူရှိသလို မကြိုက်နှစ်သက်သူလည်း ရှိတဲ့အတွက်ကြောင့် ရောင်းအားနည်းတယ်လို့ ဆိုပါတယ်။ ညမွှေးပန်းပျိုးပင်တစ်ပင်လျှင် (၂၀၀၀/၃၀၀၀/၅၀၀၀) ကျပ်ဖြင့်ရောင်းချလျက်ရှိကြောင်း ပန်းပျိုးပင်အရောင်းဆိုင်မှ သိရှိရသည်။

DOCA(မန္တလေး)

              တတိုင်းမွှေးဆိုတဲ့ အမည်နှင့်လိုက်ဖက်စွာ အမည်ကို တမ်းတရုံနှင့် မွှေးသည် ဆိုရလောက်အောင် ပန်း၏ရနံ့မှာ ဆွတ်ပျံ့ဖွယ်ဖြစ်သည်။ မေ၊ဇွန်၊ဇူလိုင်လများတွင် ပန်းပွင့်ကြပြီး အဖြူရောင်၊ရနံ့မွှေးကြိုင် တံတိုင်းမွှေးပန်းများကို ယခုလိုအချိန် မိုးကုတ်ဒေသတွင် စိုက်ပျိုးဖြစ် ထွန်းပြီး အိမ်တစ်အိမ်မှာ တတိုင်းမွှေးပန်းပင်တစ်ပင်ရှိလျှင် တစ်ရပ်ကွက်လုံး မွှေးပျံ့နေပါသည်။ အအေးပိုင်းဒေသတွင် ပိုမိုဖြစ်ထွန်းပါသည်။ တတိုင်းမွှေးပင်၏ အရွက်မှာ အစိမ်းရင့်ရောင် ဘဲဥပုံအ ရွက်များဖြစ်ပြီး ဖယောင်းလွှာဖြင့် ဖုံးအုပ်ထားသောကြောင့် ပြောင်ချောနေသည်။ ပန်းပွင့်များမှာ အပင်မျိုးစိတ်ပေါ် မူတည်၍ အဖြူရောင်၊ အဝါရောင်၊ အနီရောင်၊ ပန်းရောင်၊ ခရမ်းရောင်၊ ကြက်သွေး ရောင် ဟူ၍ အမျိုးမျိုးရှိသည်။ ပန်းများ၏ ရနံ့မှာ အလွန်မွှေးသောကြောင့် ရေမွှေးပြုလုပ်ရာတွင် လည်းကောင်း၊ရေချိုးဆပ်ပြာ၊ အလှကုန် ပစ္စည်းထုတ်လုပ်ရာတွင် လည်းကောင်း အသုံးပြုကြသည်။ စတင်စိုက်ပျိုးချိန်မှစ၍ (၇)နှစ်ခန့်ကြာမှသာ ပန်းပွင့်ပါသည်။ တတိုင်းမွှေးပန်း၏ ထူးခြားချက်မှာ ဝတ်မှုံမထုတ်လုပ်ဘဲ ပရိုတင်းဓာတ်ပါသော ဝတ်ရည်များသာ ထုတ်ကာ ပျားများသည် တတိုင်းမွှေး၏ အဓိက ဝတ်မှုန်ကူးသူဖြစ်သည်။ အပင်များသည် နှစ်(၁၀၀)သက်တမ်းအထိ ရှင်သန်နိုင်သည်။ စကားဝါ၊ စကားစိမ်းနွယ်ပင်ဖြစ်သည်။ တတိုင်းမွှေးပန်း ကလေးများသည် အဆင်းလှပခြင်း၊ ရနံ့သင်းပျံ့ခြင်းတို့ကြောင့် ပန်းချစ်သူများအနေဖြင့် မိမိတို့ အိမ်ခြံဝင်းထဲတွင် တစ်ပင်တစ်လေ စိုက်ပျိုးသင့်ပါသည်။ မြန်မာနိုင်ငံတွင် အပူပိုင်းနှင့် သမပိုင်း ဒေသရှိ တတိုင်းမွှေးကိုသာ စိုက်ပျိုးသင့်ပါသည်။အအေးပိုင်းဒေသများဖြစ်သော မိုးကုတ်၊ ပြင်ဦးလွင်ဒေသများတွင် မြင်တွေ့နိုင်သည်။ တတိုင်းမွှေးပန်းက စိုးရိမ်စိတ်များတာကို သက်သာ စေသည်။ အသက်ရှုလမ်းကြောင်းဆိုင်ရာ ကျန်းမာရေးကို ကောင်းစေသည်။ စိတ်ဖိစီးမှုကိုလည်း သက်သာစေသည်။

DOCA(မန္တလေး)

                အဝါရောင်သည် ပျော်ရွှင်ခြင်း၊ ရယ်မောခြင်း၊ မျှော်လင့်ချက်ရဲ့ နေရောင်ခြည်ကို နွေးထွေးခြင်းဆိုတဲ့ အဓိပ္ပာယ်ကို ဆောင်ပါသည်။ အကောင်းမြင်ခြင်းနှင့် စိတ်ပျော်ရွှင် တက်ကြွခြင်း ကို ပေးစွမ်းနိုင်ပါသည်။ အဝါရောင်သည် လင်းလွန်းသောကြောင့် စိတ်ကိုကြည်လင်လန်းဆန်း စေပါသည်။ ငုဝါပန်းများကလည်း အဝါရောင်ဆွဲလွဲအခိုင်လိုက်တွေ တစ်ပင်လုံးအူနေအောင် ပွင့်တတ်သည်။ သင်္ကြန်မိုးကလေးပြီးကတည်းက ပွင့်လန်းခဲ့သည့် စိန်ပန်းနီ၊ စိန်ပန်းပြာတွေ၊ ငုဝါပန်းတွေ၊ ငုစပ်ပန်းတွေက ကြွေကျမြေမှာ ကြဲပြန့်နေပြီး နောက်တစ်ပြန်ပွင့်တဲ့ စိန်ပန်းနီတွေကတော့ ပွင့်လျှက်ကျန်နေပါသည်။ ငုဝါပန်းက နွေရာသီရဲ့ ရာသီပန်းဖြစ်သည်။ ထင်သာမြင်သာအောင် ပွင့်သောကြောင့် လမ်းဘေးဝဲယာ၊ ကျောင်းကန်ဘုရား၊ ခြံဝန်း၊ပန်းခြံ စသည်ဖြင့် အရိပ်ရအလှပင် အဖြစ် စိုက်ပျိုးကြသည်။ ငုဝါပန်းများကို ဘုရားကျောင်းအိမ်တွင် ချိတ်ဆွဲထားက ပျော်ရွှင်ခြင်းနှင့် ကံကောင်းခြင်းတွေကို သယ်ဆောင်ပေးနိုင်သည်ဟု ဆိုသည်။ မြန်မာနိုင်ငံ၏ နှစ်သစ်ကို ကံကောင်းခြင်းများစွာနှင့် ကြိုဆိုကာ ပွင့်လန်းသောပန်းများဖြစ်သည်။ ငုဝါပန်းပွင့်များကို မြင်ရသူအဖို့ ရင်ဝယ်နွေးထွေးမှုကို ရစေပါသည်။ ငုဝါအသီး၊ အခေါက်၊အရွက်များကို တိုင်းရင်းဆေးဖော်စပ်ရာတွင် အသုံးပြုကြောင်း သိရှိရသည်။ ပိတောက်နှင့် ငုဝါပန်းသည် အဝါရောင် ပွင့်လန်းသော ပန်းများဖြစ်ပြီး အပြိုင်လှရပ်နိုင်လွန်းပြီး လူတို့နှစ်သက်မြတ်နိုးအပ်သော ပန်းကလေး များဖြစ်သည့်အတွက်စိုက်ပျိုးသင့်ပါသည်။ငုဝါပန်းပျိုးပင်တစ်ပင်လျှင် (၂၀၀၀/၃၀၀၀/၅၀၀၀) ကျပ်ဖြင့် ရောင်းချလျှက်ရှိကြောင်း ပန်းပျိုးပင်အရောင်း ဆိုင်မှ သိရှိရသည်။

DOCA(မန္တလေး)

  နွားထိုးကြီးမြို့နယ်သည် ဆည်ရေသောက်အသင့်တင့်ရှိပြီး မိုးကောင်းသောက် ဧရိယာ များတွင် မိုးစပါးများကိုလည်း ဒေသတွင်းဝမ်းစာဖူလုံစေရန် စိုက်ပျိုးထားကြောင်း သိရှိရသည်။ မိုးစပါးများကို ဇူလိုင်လ၊ဩဂုတ်လနှင့် စက်တင်ဘာလတို့တွင် စတင်စိုက်ပျိုးပြီး ဒီဇင်ဘာလနှင့် ဇန်နဝါရီလတို့တွင် စတင်ရိတ်သိမ်းကြောင်း သိရှိရသည်။ ၂၀၂၅/၂၀၂၆ခုနှစ်တွင် မြင်းခြံမြို့နယ်၌ မိုးစပါးစိုက်ပျိုးပြီးဧက (၁၁၈၅၉) စိုက်ပျိုးထားကြောင်း မြို့နယ်ကြေးတိုင်နှင့် မြေစာရင်းဦးစီးဌာန၏ စာရင်းများအရ သိရှိရသည်။ စီမံကိန်းလျာထားချက်နှင့် အညီရာနှုန်း ပြည့်မီအောင် စိုက်ပျိုးထား ကြောင်း၊ သက်လတ်စပါးမျိုးဖြစ်သော မနောသုခ စပါးမျိုးများကို စိုက်ပျိုးထားကြောင်း၊ မိုးစပါး များကို ၂၀၂၆ခုနှစ်၊ ဇန်နဝါရီလတွင်  စတင်ရိတ် သိမ်းမည်ဖြစ်ကြောင်း၊ ယခင်နှစ်မိုးစပါးအထွက် နှုန်းအနေဖြင့် (၇၀)တင်းခန့် ထွက်ရှိခဲ့ကြောင်း၊  ယခင်နှစ်မနောသုခစပါး တစ်တင်းခွဲ တစ်အိတ်လျှင် (၃၀၀၀၀) ကျပ်ခန့်ပေါက်ဈေးများဖြင့် ဒေသအတွင်း၌သာ အရောင်းအဝယ် ဖြစ်ခဲ့ကြောင်း၊ စိုက်နည်းစနစ်၊ သွင်းအားစုနှင့် ရာသီဥတုကောင်းမွန်ပါက ယခင်နှစ်ထက် အထွက်နှုန်းကောင်းနိုင်ကြောင်း မိုးစပါး စိုက်တောင်သူတစ်ဦး၏ ပြောပြချက်အရသိရှိရသည်။

DOCA(မန္တလေး)