ပြည်တွင်းကုန်သွယ်မှုသတင်း

            ၃၁.၇.၂၀၂၅ နေ့၊ နံနက်(၀၈:၀၀)နာရီအချိန်တွင် မြင်းခြံမြို့၊ အမှတ်(၇)ရပ်ကွက်ရှိ အေးမြသီတာဈေး၌ ပြည်သူများ၏သက်သာချောင်ချိရေးကိုရှေးရှု၍ အခြေခံစားသောက်ကုန်များကို ဈေးနှုန်းသက်သာစွာ ဝယ်ယူအသုံးပြုနိုင်ရန် ပြည်သူ့သက်သာဈေး အရောင်းဆိုင်များ ဖွင့်လှစ်ရောင်းချပေးခဲ့ကြောင်း သိရှိရသည်။

           အဆိုပါ ပြည်သူ့သက်သာဈေးအရောင်းဆိုင်များတွင် ရောင်းချပေးခဲ့သည့် စားသောက်ကုန်များနှင့် ဈေးနှုန်းများမှာ ဆန်(၁)ပြည်လျှင် (၃၆၀၀)ကျပ်၊ ဝက်သား တစ်ပိဿာလျှင်(၂၆၀၀၀)ကျပ်၊ အမဲသားတစ်ပိဿာလျှင်(၂၅၀၀၀)ကျပ်၊ ဆိတ်သား တစ်ပိဿာလျှင်(၂၈၀၀၀)ကျပ်၊ ကြက်သား တစ်ပိဿာလျှင်(၁၅၀၀၀)ကျပ်၊ ကြက်ဥတစ်လုံးလျှင်(၄၁၀) ကျပ်နှုန်းတို့ဖြင့် ရောင်းချပေးခဲ့ရာ စားသုံးသူပြည်သူများသည် ပျော်ရွှင်ကြည်နူးစွာ ဝယ်ယူအားပေးခဲ့ပါကြောင်း သိရှိရပါသည်။

DOCA(မန္တလေး)

             ကျောက်ဆည်ခရိုင်အတွင်းတွင် မိုးစပါးများကို ဇွန်လမှစတင်၍စိုက်ပျိုးလျှက်ရှိရာ ယခုအချိန် တွင်ပတ်ကြဲမိုးစပါးများအောင်မြင်ဖြစ်ထွန်းလျှက်ရှိပါသည်။မိုးစပါးစိုက်ပျိုးမှုအနေဖြင့် ခရိုင်အတွင်း (၅၉၉၇၁)ဧက စိုက်ပျိုးထားရှိပြီး မြစ်သားမြို့နယ်တွင် မိုးစပါးစိုက်ဧက (၂၄၉၃၁)ဧက စိုက်ပျိုးထား ကြောင်းသက်ဆိုင်ရာဌာန၏စာရင်းများအရသိရှိရပါသည်။မိုးစပါးစိုက်ပျိုးမှုတွင် ပျိုးထောင်စိုက်ပျိုးမှု နှင့်ပတ်ကြဲစိုက်ပျိုးမှုများကို စိုက်ပျိုးကြကြောင်း၊ယခုနှစ်တွင် တောင်သူအများစုမှာ မိုးကောင်းသော ကြောင့်ပတ်ကြဲစိုက်ပျိုးမှုကိုပိုမိုစိုက်ပျိုးလာကြကြောင်း၊ပတ်ကြဲစိုက်ပျိုးမှုတွင် မျိုး(၂)တင်းခန့်အသုံး ပြုရပြီးစိုက်ပျိုးစရိတ်အနေဖြင့်မျိုး၊သွင်းအားစု၊လုပ်သားခအပါအဝင် စုစုပေါင်း(၉၁၀၀၀၀/-)ကျပ်ခန့် ကုန်ကျကြောင်း ၊ ပျိုး‌ထောင်မိုးစပါးစိုက်ပျိုးမှုတွင် ပျိုးထောင်စရိတ် နှင့် မျိုး၊သွင်းအားစု၊လုပ်သားခ အပါအဝင် စုစုပေါင်း(၁၀၅၀၀၀၀/-)ကျပ်ခန့်ကုန်ကျကြောင်း၊ယခင်နှစ်အထွက်နှုန်းအနေဖြင့် တင်း (၈၀-၈၅)တင်းခန့်ထွက်ရှိကြောင်း၊ စပါးစျေးနှုန်းအနေဖြင့် ဧရာပဒေသာ တစ်တင်းလျှင်(၂၈၀၀၀/-) ကျပ်၊မနောသုခတစ်တင်းလျှင်(၂၁၀၀၀/-)ကျပ်စျေးနှုန်းဖြင့်ရောင်းဝယ်ခဲ့သောကြောင့်အကျိုးအမြတ် အနေဖြင့် စိုက်ပျိုးစရိတ်နှုတ်ပြီး(၁၃၀၀၀၀၀/-)ကျပ်ကျော်မြတ်ခဲ့ကြောင်း၊ စပါးစျေးနှုန်းအနေဖြင့် ဧရာပဒေသာ(အဟောင်း) တင်း(၁၀၀)လျှင်(၂၈၀၀၀၀၀/-)ကျပ် ၊ မနောသုခ တင်း(၁၀၀)လျှင် (၂၁၀၀၀၀၀/-)ကျပ်ဖြစ်ပြီး ဆန်စျေးနှုန်းအနေဖြင့် ဧရာပဒေသာဆန် (အဟောင်း)တစ်အိတ်လျှင် (၁၃၅၀၀၀/-)ကျပ်၊ မနောသု တစ်အိတ်လျှင်(၉၂၀၀၀/-)ကျပ်၊ နွေစပါးအသစ် မနောသုခ တင်း(၁၀၀) လျှင်(၁၇၀၀၀၀၀/-)ကျပ် ၊ မနောသုခဆန် တစ်အိတ်လျှင်(၇၅၀၀၀/-)ကျပ်ဖြင့် ရောင်းဝယ်လျှက်ရှိ ကြောင်း၊ စျေးကွက်အနေဖြင့် မိုးစပါးထွက်ပေါ်ချိန်တွင် တောင်သူများထံသို့ ပွဲစားများမှ တိုက်ရိုက် လာရောက်ဝယ်ယူကြကြောင်း၊ ဆန်စက်လုပ်ငန်းရှင်များမှလည်း ကြိတ်ခွဲရောင်းချရန်အတွက် လာရောက်ဝယ်ယူကြကြောင်း၊ မိုးရွာသွန်းမှုအားကောင်းသောကြောင့် မိုးစပါးများအောင်မြင် ဖြစ်ထွန်းလျှက်ရှိကြောင်း၊ စပါးအထွက်နှုန်းကောင်းမွန်ပါက အကျိုးအမြတ်ပိုမိုဖြစ်ထွန်းမည်ဖြစ် ကြောင်း၊ မိုးစပါးစိုက်ပျိုးသော တောင်သူတစ်ဦး၏ ပြောကြားချက်အရသိရှိရပါသည်။                 

DOCA (မန္တလေး)                                                                                         

      ဉာဏ်ပင်သည် အလေ့ကျပေါက်ပင် တစ်မျိုးဖြစ်သည်။ ယခုလို မိုးရာသီကာလတွင် ဉာဏ်ပင်များအရွက်နုများထွက်ပေါ်လျက်ရှိပါသည်။ဉာဏ်ပင်သည ်ပိတ်စွယ်ဟုခေါ်သော ဆီမီးတောက် ပင်များ နည်တူ ရွံ့ ၊နွံ၊ရေအိုင် လယ်ကွင်းပြင်များတွင်  ပေါများစွာပေါက်ရောက်သည်။ ဉာဏ်ရွက်နု ကလေးများကို ခူးယူ၍ ဈေးကွက်သို့ တင်ပို့ရောင်ချ လျက်ရှိသည်။ ငပိရည်နှင့် တို့စရာ အဖြစ် ၎င်း၊ အရွက်ပြုတ်ကို အသုတ် သုတ်၍သော်လည်ကောင်း စားသုံးကြသည်။ဉာဏ်ပွင့်နဲ့ဉာဏ်ရွက်သည် ဆေးဖက်ဝင်ပါသည်။အသက်ရှူ လမ်းကြောင်းကျန်းမာစေခြင်း၊အစာအိမ်အူလမ်းကြောင်းကျန်းမာ စေခြင်း၊ အရေပြားကျန်းမာစေခြင်း၊ အဖျား သက်သာစေခြင်းနှင့် ရာသီလာချိန်နာကျင်ကိုက်ခဲခြင်းကို သက်သာစေနိုင်ပါသည်။ဉာဏ်ရွက်ကို သုပ်စားလို့ ရသလို ဉာဏ်ပွင့်ကိုလည်း သုပ်စား တို့စားကြ သည်။ ဉာဏ်ပင်ဆိုသည်မှာ အရွက် စိမ်းစိမ်း၊ ရွက်ဆိုင်ထွက်တဲ့ အရွက်တွေနဲ့ အပွင့်ဝါဝါလေးတွေ ပွင့်တတ်သော အပင်တစ်မျိုးဖြစ်သည်။  အလေ့ကျပေါက်ပင် တစ်မျိုးဖြစ် ပြီး စပါးခင်းတွေထဲမှာ လည်း စပါးရိတ်ပြီးချိန်တွေမှာ အလေ့အတိုင်း ပေါက်တတ်ပါသည်။ ရှေးယခင် ကာလတွေကတည်းက ဉာဏ်ပင်၊ ဉာဏ်ပွင့်စတာတွေကို ပိုးသတ်ဖို့၊ အရေပြား ကျန်းမာစေဖို့၊ သွေးတွင်း သကြားဓာတ် ထိန်းနိုင်စေဖို့၊ အကိုက်အခဲသက်သာပြီး အရောင်ကျစေဖို့ အသုံးပြုကြပါသည်။ဉာဏ်ရွက်၊ ဉာဏ်ပွင့်တွေကို ချောင်းဆိုးတာ၊ လေပြွန်ရောင်တာနဲ့ ပန်းနာရင်ကြပ်တို့ကို သက်သာစေဖို့နဲ့ အသက်ရှူ လမ်းကြောင်း ကျန်းမာစေဖို့ အသုံးပြုကြသည်။အစားစားချင်စိတ် ဖြစ်စေပြီး အစာကြေ စေဖို့ထောက်ကူပေး သလို ဝမ်းပျက်ဝမ်းလျှောတာ၊ ဝမ်းကိုက်တာတွေကိုပါ သက်သာစေပါသည်။ အဖျားသက်သာစေဖို့နဲ့ ကူးစက်ရောဂါတွေကို ကာကွယ်ဖို့အတွက် ဉာဏ်ပွင့်ဉာဏ်ရွက်တွေကို စားလို့ရပါတယ်။ ဉာဏ်ပွင့်၊ ဉာဏ်ရွက်တွေကို ပုံမှန်စားပေးပါက အမြင်အာရုံ ကောင်းစေပါသည်။ ဉာဏ်ပွင့်နဲ့ ဉာဏ်ရွက်တို့က သင့်တင့်ရုံစားရင် ကျန်းမာရေးအကျိုးကျေးဇူးများပေမယ့် အများကြီး စားမယ်ဆိုရင်တော့သွေးတွင်း သကြားဓာတ်ကျတာ၊ လေချုပ်တာ၊ သွေးကျဲတာမျိုးတွေ ဖြစ်နိုင်ပါသည်။ ဉာဏ်ပွင့်နဲ့ ဉာဏ်ရွက်က ဆေးဖက်ဝင်တယ်ဆိုပေမယ့် ကိုယ်ဝန်ဆောင်မိခင်တွေ၊ နို့တိုက်မေမေတွေ၊ ဆီးချိုရှိသူတွေ၊ ခွဲစိတ်ခံမယ့်လူနာတွေအနေနဲ့ ဆရာဝန်နဲ့သေချာတိုင်ပင်ပြီးမှ စားသင့်ပါကြောင်း ကျန်းမာရေးဗဟုသုတမှ လေ့လာသိရှိရသည်။

DOCA (မန္တလေး)                                                                                

      မင်းဂွတ်သီးရဲ့အရောင်က အညိုဘက်သန်းတဲ့ အနီရောင်ရင့်ရင့်ဖြစ်သည်။ အခွံကိုနွှာပြီးမှာ အထဲက အဖြူရောင် အသားဆံတွေကိုစားသုံးရခြင်းဖြစ်ပါသည်။ မင်းဂွတ်သီးမှာရေ၊ စွမ်းအင်၊ ပရိုတင်း၊ ကာဗိုဟိုက်ဒရိတ် နဲ့အမျှင်ဓါတ် တွေကြွယ်ဝစွာပါဝင်တာကြောင့် ကျန်းမာရေးအတွက် အထောက် အကူပြုပါသည်။  မင်းဂွတ်သီး အနှစ်က ဓါတ်မတည့်မှု ကို သက်သာစေပြီးရောင်ရမ်းမှုကိုလည်း သက်သာစေနိုင်တဲ့ အာနိသင်ရှိပါသည်။ အရေပြားကို ကျန်းမာစေပါသည်။ ရောင်ရမ်းမှုကို တိုက်ဖျက် ပေးနိုင်သလို ဘက်တီးဂီးယားတွေ၊ မှိုပိုးတွေကိုလည်း သေစေနိုင်တဲ့အာနိသင်ရှိတဲ့အပြင် ဓါတ်တိုးဆန့်ကျင် ပစ္စည်း ကြွယ်ဝစွာ ပါဝင်တာကြောင့် အရေပြား ဓါတ်မတည့်မှုကြောင့်ဖြစ်တဲ့ရောင်ရမ်းမှုတွေကို လျော့ပါး သက်သာ စေနိုင်တဲ့ အာနိသင်ရှိပါသည်။ မင်းဂွတ်သီးက ဝမ်းဗိုက်ဆိုင်ရာရောဂါတွေကို သက်သာစေပါသည်။ မင်းဂွတ်သီးက ဝမ်းလျှောတာနဲ့ ဝမ်းကိုက်ဝေဒနာတွေကို သိသိသာသာ သက်သာစေနိုင်စွမ်းရှိပါသည်။ မင်းဂွတ်သီးကလေဖြတ်တာနဲ့ နှလုံးကြွက်သားသေဆုံးတာမျိုးတွေဖြစ်နိုင်ခြေကို လျော့ကျစေပါသည်။ မင်းဂွတ်သီးမှာ နှလုံးဆိုင်ရာရောဂါကို ကာကွယ်ပေးနိုင်သော အာနိသင်လည်း ရှိနေပါသည်။ နေ့စဉ် စားသုံးတဲ့အစားအသောက်တွေထဲမှာ မင်းဂွတ်သီးကို ထည့်သွင်းစားသုံးပေးမယ်ဆိုရင် ကိုယ်အလေးချိန်ကို ကျဆင်းစေမှာဖြစ်ပါသည်။ မန္တလေးဈေးကွက်အတွင်းသို့  ဇူလိုင်လ ဆန်းပိုင်းမှ  မင်းဂွတ်သီးများစတင် ဝင်ရောက်ခဲ့ပြီး ဈေးကွက်အတွင်း၌ မင်းဂွတ်သီးတစ်လုံးလျှင်(၄၀၀/၅၀၀)ကျပ်ဖြင့် ရောင်းချလျှက်ရှိကြောင်း သစ်သီးမျိုးစုံအရောင်းဆိုင်မှ သိရှိရသည်။

DOCA (မန္တလေး)                                                                                                                                                                                         

    ရန်ကုန်တိုင်းဒေသကြီး အလုံခရိုင်၊ စမ်းချောင်းမြို့နယ် ရှမ်းလမ်းဈေးအတွင်း အခြေခံ စားသောက်ကုန်များဖြစ်သော ဆန်အမျိုးအစားများအနက် ဧည့်မထ တစ်ပြည်လျှင် ကျပ် ၃၅၀၀ မှ ၃၈၀၀ ထိ၊ ဇီယာတစ်ပြည်လျှင် ကျပ် ၃၄၀၀ မှ ၃၅၀၀ ထိ၊ ပေါ်ဆန်းတစ်ပြည်လျှင် ကျပ် ၅၀၀၀ မှ ၆၀၀၀ ထိ လည်း ကောင်း၊ စားအုန်းဆီ တစ်ပိဿာလျှင် ကျပ် ၆၃၃၀ မှ ၆၅၃၀ မြေပဲဆီ တစ်ပိဿာလျှင် ကျပ် ၁၄၀၀၀ မှ ၁၆၀၀၀၊ ဟင်းသီးဟင်းရွက်ဈေးနှုန်းများမှာ ကန်စွန်းရွက်တစ်စီးလျှင် ကျပ် ၅၀၀ မှ ၇၀၀၊ ချည်ပေါင်ရွက် တစ်စီး ကျပ် ၃၀၀ မှ ၅၀၀၊ မုန့်ညှင်းတစ်စီး ကျပ် ၅၀၀ မှ ၇၀၀၊ ကိုက်လန်တစ်စီး ကျပ် ၆၀၀ မှ ၇၀၀၊ ဂေါ်ဖီတစ်ထုပ်လျှင် ကျပ် ၂၅၀၀ မှ ၃၅၀၀၊ ပန်းဂေါ်ဖီတစ်ပွင့်လျှင် ကျပ် ၂၅၀၀ မှ ၃၅၀၀၊ ခရမ်းချဉ်သီး တစ်ပိဿာ ကျပ် ၂၂၀၀ မှ ၃၅၀၀၊ ဗူးသီးတစ်လုံး ကျပ် ၂၅၀၀ မှ ၄၀၀၀၊ အာလူး(တရုတ်)တစ်ပိဿာ ကျပ် ၃၈၀၀ မှ ၄၂၀၀၊ ကြက်သွန်ဖြူတစ်ပိဿာ ကျပ် ၂၅၀၀၀ မှ ၃၀၀၀၀၊ ကြက်သွန်နီ တစ်ပိဿာ ကျပ် ၄၈၀၀ မှ ၅၂၀၀၊ ဂျင်း တစ်ပိဿာ ကျပ် ၃၀၀၀ မှ ၄၀၀၀၊ ကုလားပဲတစ်ပိဿာလျှင် ကျပ် ၆၀၀၀ မှ ၁၀၀၀၀၊ မွေးမြူရေးကြက် တစ်ပိဿာလျှင် ကျပ် ၃၀၀၀၀ မှ ၃၅၀၀၀၊ ဝက်သားတစ်ပိဿာလျှင် ကျပ် ၃၅၀၀၀၊ ဆိတ်သားတစ် ပိဿာလျှင် ကျပ် ၄၀၀၀၀၊ ငါးကြင်းတစ်ပိဿာ ကျပ် ၂၃၀၀၀ မှ ၂၅၀၀၀၊ ပုဇွန်ထုပ်သေး တစ်ပိဿာလျှင် ကျပ် ၃၅၀၀၀ ၊ငါးခူတစ်ပိဿာလျှင် ကျပ် ၂၃၀၀၀ မှ ၂၅၀၀၀၊ ငါးရံ့တစ်ပိဿာ  ကျပ် ၃၀၀၀၀ မှ ၃၂၀၀၀ တို့ဖြစ်ပြီး ကြက်ဥတစ်လုံးလျှင် ကျပ် ၃၆၅၊ ဘဲဥတစ်လုံး ကျပ် ၄၀၀ မှ ၆၀၀ တို့ဖြင့်အရောင်း အဝယ်ဖြစ်လျက်ရှိကြောင်း သိရှိရပါသည်။       

DOCA (ရန်ကုန်)