၉.၃.၂၀၂၆ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်၊ မော်လမြိုင်ခရိုင်၊ ချောင်းဆုံမြို့နယ်တာဝန်ခံ ဒုတိယဦးစီးမှူး ဒေါ်ထက်ထက်နွေဦးသည် မြို့နယ်ပြည်သူ့ ကျန်းမာရေးဦးစီးဌာန၏ ဦးဆောင်မှုဖြင့် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ် ရဲတပ်ဖွဲ့၊ မြို့နယ်စည်ပင်သာယာရေးအဖွဲ့တို့နှင့် ပူးပေါင်း၍ ချောင်းဆုံမြို့နယ်၊ အမှတ် (၂) မြို့မဈေးရှိ ကုန်စုံဆိုင်များတွင် ရောင်းချနေသော ကလေးအသုံးဆောင်ပစ္စည်းအမျိုးမျိုးအား ကုန်အညွှန်း အမှတ်အသား ပြည့်စုံမှု ရှိ/မရှိ ကွင်းဆင်းစစ်ဆေး ဆောင်ရွက်ခဲ့ကြောင်း သိရှိရပါသည်။ 

    ထိုသို့ ကွင်းဆင်းစစ်ဆေးရာတွင် ချောင်းဆုံမြို့နယ်၊ အမှတ်(၂)မြို့မဈေးရှိ ကုန်စုံ ဆိုင်များတွင် ရောင်းချလျက်ရှိသော ကလေးအသုံးအဆောင်ပစ္စည်းများတွင် မြန်မာနိုင်ငံ စားသုံးသူကာကွယ်ရေးကော်မရှင်က ထုတ်ပြန်ထားသည့် ညွှန်ကြားချက်အမှတ် (၂/၂၀၁၉) အရ ကုန်စည်ပေါ်တွင် မြန်မာဘာသာဖြင့် ဖော်ပြရမည့် အမျိုးအမည်၊ အရွယ်အစား၊ အရေအတွက် အသားတင်ပမာဏ၊ သုံးစွဲပုံနည်းလမ်း၊ ထားသိုသိမ်းဆည်းမှုအညွှန်းနှင့် ဓာတ်မတည့်ကြောင်း ဖော်ပြချက်တို့ ပြည့်စုံစွာဖော်ပြပါရှိကြောင်း စစ်ဆေးတွေ့ရှိရပြီး ဆိုင်ပိုင်ရှင်အား ကုန်အညွှန်းအမှတ်အသားပြည့်စုံမှုမရှိသည့် ကုန်စည်များအား ရောင်းချခြင်း မပြုရန် အသိပညာပေး ပြောကြားခဲ့ကြောင်း သိရှိရပါသည်။

DOCA (မွန်)

          မွန်ပြည်နယ်၊ မော်လမြိုင်မြို့၊ ပြည်နယ်ခန်းမ၌ စီးပွားရေးနှင့် ကူးသန်းရောင်း ဝယ်ရေးဝန်ကြီးဌာန၊ စားသုံးသူရေးရာဦးစီးဌာနမှ ကြီးမှူးကျင်းပသော ကမ္ဘာ့စားသုံးသူ အခွင့်အရေးများနေ့ အခမ်းအနားကို ၂၀၂၆ ခုနှစ်၊ မတ်လ ၁၁ ရက်နေ့၊ နံနက် (၀၉:၀၀) နာရီအချိန်တွင် ကျင်းပခဲ့သည်။

          အခမ်းအနားတွင်ပြည်နယ်ဝန်ကြီးချုပ် ဦးအောင်ကြည်သိန်းက အဖွင့်အမှာစကား ပြောကြားရာတွင် ကမ္ဘာ့စားသုံးသူအခွင့်အရေးများနှင့် ပတ်သက်၍ နှစ်စဉ် ကျင်းပမြဲ ဖြစ်သည့် မတ်လ ၁၅ ရက်နေ့ကို ဂုဏ်ပြုသောအားဖြင့် ယနေ့ အခမ်းအနားကို  မွန်ပြည်နယ် မော်လမြိုင်မြို့ ပြည်နယ်ခန်းမတွင် ကျင်းပကြောင်း၊ ယခုနှစ် ၂၀၂၆ ခုနှစ်တွင် ကမ္ဘာ့စားသုံးသူအခွင့်အရေးများနေ့ဆောင်ပုဒ် “ထုတ်ကုန်ဘေးကင်းလုံခြုံမှ ယုံကြည်စိတ်ချ စားသုံးသူဘဝ” ( Safe Product , Confident Consumers) ဆောင်ပုဒ်နှင့်အညီ စားသုံးသူပြည်သူများ နေ့စဉ်အသုံးပြု လျက်ရှိသောကုန်စည်တွင် ဘေးကင်းလုံခြုံမှု ရှိရန်အတွက် လုံခြုံစိတ်ချရမှုရှိသော ကုန်စည်များကို အသုံးပြုနိုင်မှသာလျှင် စားသုံးသူများ၏ ဘဝအန္တရာယ်ကင်းရှင်းပြီး သာယာလှပသော ဘဝကို ပိုင်ဆိုင်နိုင်မှာဖြစ်ပါကြေင်းနှင့် နေ့စဉ်ဝယ်ယူအသုံးပြုနေရသော ဈေးကွက် အတွင်း ဖြန့်ဖြူးရောင်းချနေတဲ့ ကုန်စည်များဘေးကင်းလုံခြုံမှုရှိစေရေး၊ အစိုးရ၊ ပြည်သူလူထုနှင့် စီးပွားရေးလုပ်ငန်းရှင်များ တက်ရောက်လာသူများအားလုံး ညီညီ ညွတ်ညွတ်ပူးပေါင်းဆောင်ရွက်ကြရန် လိုအပ်ကြောင်း ပြောကြားခဲ့သည်။

          ဆက်လက်၍ အခမ်းအနားတွင် မွန်ရိုးရာအကအလှများဖြင့် ကပြဖျော်ဖြေခြင်း၊        ၂၀၂၅-၂၀၂၆ ဘဏ္ဍာနှစ် စားသုံးသူကာကွယ်ရေးဆိုင်ရာလုပ်ငန်းဆောင်ရွက်မှု Video Clip များပြသခြင်း၊ စားသုံးသူရေးရာဦးစီးဌာန၊ ဝန်ထမ်းများမှ “ဦးစားပေးမူ စားသုံးသူ” သီချင်းဖြင့် သီဆိုဖျော်ဖြေခြင်းနှင့် စားသုံးသူရေးရာဦးစီးဌာန၊ ပြည်နယ်ဦးစီးမှူး ဦးတင်အောင်ကျော် က စားသုံးသူကာကွယ်ရေးဥပဒေအကြောင်း သိကောင်းစရာများ ခေါင်းစဉ်ဖြင့် ရှင်းလင်းဆွေးနွေးကြောင်း၊ တက်ရောက်လာသူများအား နေ့လည် စာဖြင့် ဧည့်ခံကျွေးမွေးခဲ့ကြောင်းသိရှိရပါသည်

           အဆိုပါ အခမ်းအနားသို့ မွန်ပြည်နယ်အစိုးရအဖွဲ့ မွန်ပြည်နယ်ဝန်ကြီးချုပ် ဦးအောင်ကြည်သိန်းနှင့် မွန်ပြည်နယ်အစိုးရ အဖွဲ့ဝင်ဝန်ကြီးများ၊ ပြည်နယ်/ ခရိုင်/မြို့နယ်အဆင့်ဌာနဆိုင်ရာ ဝန်ထမ်းများ၊ မွန်ပြည်နယ်စားသုံးသူရေးရာဦးစီးဌာန ဝန်ထမ်းများနှင့် စီးပွားရေးလုပ်ငန်းရှင်များနှင့် ဖိတ်ကြားထားသော ဧည့်သည်တော်များ စုစုပေါင်း လူဦးရေ(၃၅၀)ဦးခန့် တက်ရောက်ခဲ့ပြီး အခမ်းအနားကို နေ့လည် (၁၁) နာရီ အချိန်တွင် ရုပ်သိမ်းခဲ့ကြောင်း သိရှိရပါသည်။

DOCA (မွန်)

          စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ မုံရွာခရိုင်ဦးစီးမှူးရုံးမှ ဝန်ထမ်းများနှင့် ခရိုင်တာဝန်ခံရုံးမှ ဝန်ထမ်း(၁)ဦးသည် (၂.၃.၂၀၂၆)ရက်နေ့၊ နံနက်(၁၁:၀၀) အချိန်တွင် ဆန်စပါး လုပ်ငန်းကြီးကြပ်ရေးအဖွဲ့တွင်ပါဝင်သော စီမံခန့်ခွဲရေးနှင့် အုပ်ချုပ်ရေး ကော်မတီ၊ အထူးစုံစမ်း စစ်ဆေးရေးဦးစီးဌာနတို့နှင့် ပူးပေါင်း၍ မုံရွာမြို့ပေါ်ရှိ ဆန်လက်လီ/ လက်ကား အ‌ရောင်းဆိုင်များ နှင့် ဆန်သိုလှောင်ရုံများအား ဆန်ဈေးကွက် ဈေးနှုန်းတည်ငြိမ်မှန်ကန်စေရေးအတွက် ကွင်းဆင်း စစ်ဆေးကြပ်မတ်ခဲ့ကြောင်း သိရသည်။

          ထိုသို့ ကွင်းဆင်းစစ်ဆေးဆောင်ရွက်ခဲ့ရာတွင် ဆန်လက်လီ/လက်ကားဆိုင်များနှင့် ဆန်သို လှောင်ရုံပိုင်ရှင်များထံမှ ဆန်ဝယ်ယူမှုနှင့် သယ်ယူပို့ဆောင်မှုအခြေအနေများ၊ ပြန်လည်ရောင်းချနေ မှု အခြေအနေ၊ ဆန်ဈေးနှုန်းများနှင့် ဆန်လက်ကျန်များအား တွေ့ဆုံမေးမြန်းခဲ့ပြီး ဆန်များအား ဈေးနှုန်းမြင့်တင်ရောင်းချမှု မရှိစေရေး၊ My Ro တွင် မှတ်ပုံတင်ရန် ကျန်ရှိသည့် ဆန်ဆိုင်များအား မှတ်ပုံတင်ထားရှိနိုင်ရေး၊ မှတ်ပုံတင်ထားသည့်ဆန်ဆိုင်၊ ဆန်သိုလှောင်ရုံ များအနေဖြင့်လည်း လစဉ် သတ်မှတ်ရက်အတွင်း ကုန်ရ/ ကုန်ထုတ်/လက်ကျန် စာရင်းများ ဖြည့်သွင်းနိုင်ရေးတို့ကို ပြောကြား ခဲ့ကြောင်း သိရှိရပါသည်။

DOCA(စစ်ကိုင်း)

   ဖျာပုံခရိုင်၊ ဒေးဒရဲမြို့နယ် စားသုံးသူရေးရာဦးစီးဌာနနှင့် မြို့နယ်စည်ပင်သာယာရေးဦးစီးဌာန တို့ပူးပေါင်း၍ ၂၀၂၆ခုနှစ်၊ ဖေဖော်ဝါရီလ(၂၃)ရက်နေ့၊ နံနက်(၁၀:၀၀) နာရီအချိန်တွင် ဒေးဒရဲမြို့ မြို့မဈေးရှိ စားသုံးဆီ (ဘူးသွင်း)ဆီအမျိုးမျိုး ရောင်းချသည့် ဆိုင်များအား ကွင်းဆင်းစစ်ဆေးခြင်းကို ဆောင်ရွက်ခဲ့ပါသည်။

          ကွင်းဆင်းစစ်ဆေးရာတွင် စားသုံးသူရေးရာဦးစီးဌာနမှ မြို့နယ်တာဝန်ခံ ဦးသိန်းမောင်က ဈေးကွက်အတွင်းရောင်းချနေသော ဇမ္ဗူအေးမြေပဲဆီ၊ Meizan နေကြာဆီ၊ Lotus ဟင်းသီးဟင်းရွက်ဆီ၊ အမေထွားပဲဆီ၊ Duck ဟင်းသီးဟင်းရွက်ဆီ အစရှိသော ဘူးသွင်းဆီဘူးများတွင် FDA ထောက်ခံချက်၊ ထားသိုသိမ်းဆည်းပုံ၊ ပါဝင်ပစ္စည်းဖော်ပြထားရှိမှု၊ မြန်မာဘာသာဖြင့်ဖော်ပြထားရှိမှု၊ သက်တမ်းလွန်ကုန်ဆုံးရက်၊ ဓာတ်မတည့်ကြောင်းဖော်ပြချက်နှင့် ကုန်အညွှန်းအမှတ်အသား ပြည့်စုံစွာဖော်ပြထားရှိမှုတို့ကို ကွင်းဆင်းစစ်ဆေးခဲ့ရာ ညွှန်ကြားချက်နှင့်အညီဖော်ပြထားပြီးကိုက်ညီမှုရှိကြောင်း တွေ့ရှိရသဖြင့် ရောင်းချသည့်လုပ်ငန်းရှင်များအနေဖြင့် ကုန်အညွှန်းအမှတ်အသား ပြည့်စုံစွာပါဝင်သော စားသုံးဆီ(ဘူးသွင်း)ဆီများကိုသာရောင်းချကြရန် အသိပညာပေး ဆွေးနွေးကွင်းဆင်းစစ်ဆေးခဲ့ကြောင်း သတင်းရရှိပါသည်။

DOCA(ဧရာဝတီ)

         ဧရာဝတီတိုင်းဒေသကြီး၊ ဖျာပုံခရိုင်၊ ဒေးဒရဲမြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းတို့သည် ၂၀၂၆ ခုနှစ်၊ ဖေဖော်ဝါရီလ(၂၄) ရက်နေ့၊ နေ့လယ် (၁၃:၀၀) နာရီအချိန်တွင် ဒေးဒရဲမြို့၊  မြို့မဈေးအတွင်း ကုန်မျိုးစုံဆိုင်များရှိ အသင့်စားမုန့်များတွင် ကုန်အညွှန်းအမှတ်အသားများပြည့်စုံမှုရှိ/ မရှိအား စည်ပင်သာယာရေးအဖွဲ့နှင့် ပူးပေါင်းစစ်ဆေးခဲ့ကြပါသည်။

          ထိုသို့ကွင်းဆင်းစစ်ဆေးခဲ့ရာတွင် မြို့မဈေးရှိ ကုန်စုံဆိုင်ကြီးများနှင့် မုန့်မျိုးစုံအရောင်းဆိုင်များတွင် ရောင်းချနေသော ရွှေကျီးဘီစကစ်၊ ရွှေကျီးမရွေး၊ ရွှေနဒီ ပဲပေါင်မုန့်၊ ရွှေနဒီ ပူးတင်းပေါင်မုန့်၊ Gold နို့ခရင်မ် ပေါင်မုန့်တို့တွင် ကုန်အညွှန်းအမှတ်အသားများ ပြည့်စုံစွာပါရှိပြီး FDA ထောက်ခံချက်များကိုလည်း တွေ့ရှိရပါသည်။ ထို့နောက် မြို့နယ်တာဝန်ခံမှ ကုန်အညွှန်းအမှတ်အသား မပြည့်စုံသော ကုန်စည်များအား ရောင်းချခြင်းမပြုရန် အကြံပြုဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)