သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှု၊ ခရိုင်ဦးစီးမှူး၏ ကြီးကြပ်မှူဖြင့် စားသုံးသူပြည်သူများ ဘေးအန္တရာယ်ကင်းရှင်းပြီး လုံခြုံစိတ်ချရမှုရှိ သော‌ဆေးနှင့်ဆေးဝါးများကို ဝယ်ယူသုံးစွဲနိုင်ရန် ရည်ရွယ်၍ (၁၉.၈.၂၀၂၅)ရက်နေ့၊ နံနက်(၁၀:၀၀) အချိန်တွင် အစားအသောက်နှင့်ဆေးဝါးကွက်ကဲရေးဦးစီးဌာနမှ ဦးဆောင်၍ ပခုက္ကူခရိုင်ဦးစီးမှူးရုံးမှ ထုတ်ကုန်လုံခြုံစိတ်ချရမှုဌာနခွဲတာဝန်ခံနှင့်ဝန်ထမ်းတို့သည်ပခုက္ကူမြို့၊ အမှတ်(၁၁)နှင့် (၆)ရပ်ကွက် ရှိ ဆေးဆိုင်များသို့သွားရောက်၍ ဈေးကွက်စောင့်ကြည့်စစ်ဆေးခဲ့ကြောင်း သိရသည်။

    ထိုသို့ဈေးကွက်စောင့်ကြည့်စစ်ဆေးရာတွင် ဈေးကွက်အတွင်းရောင်းချနေသော ဆေးဆိုင် များတွင် ဆေးဝါးအတုများ၊ စံမညီဆေးဝါးများ၊ သက်တမ်းလွန်ဆေးဝါးများအား ဈေးကွက်အတွင်း ရောင်းချခြင်းရှိ/မရှိ၊ တရားဝင်တင်သွင်းထားသောဆေးဝါးများရှိ/မရှိ၊ ဆေးဝါးများတွင် ကုန်အညွှန်း အမှတ်အသားနှင့် စပ်လျဉ်း၍မြန်မာဘာသာဖြင့်ဖော်ပြထားခြင်း ရှိ/မရှိစစ်ဆေးခဲ့ရာ ကိုက်ညီမှုရှိကြောင်း စစ်ဆေးတွေ့ရှိရပြီး မြန်မာနိုင်ငံစားသုံးသူကာကွယ်ရေးကော်မရှင်မှထုတ်ပြန်ထားသည့် ညွှန်ကြားချက် အမှတ်(၂/၂၀၁၉)နှင့်အညီ ပြည့်စုံစွာဖော်ထားရှိသော ကုန်စည်များကိုသာရောင်းချရန် အသိပညာပေး ဆွေးနွေးခဲ့ကြောင်း သိရသည်။

DOCA(မကွေး)

       စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှု၊ ခရိုင် ဦးစီးမှူး၏ ကြီးကြပ်မှုဖြင့်  ပခုက္ကူခရိုင်ဦးစီးမှူးရုံးမှ ဝန်ထမ်းများသည် (၁၅.၈.၂၀၂၅)ရက်နေ့၊ နံနက် (၁၀:၀၀)နာရီအချိန်တွင် ပခုက္ကူမြို့ရှိ ဒေသထွက်ကုန် လုပ်ငန်းများ ဖွံ့ဖြိုးတိုးတက်ရန် ရည်ရွယ်၍ ပခုက္ကူမြို့၊ အမှတ်(၃)ရပ်ကွက်ရှိ “သန်းကျော်” နှင့် “ကြည်ဖြူ” အမှတ်တံဆိပ် မြေပဲဆားလှော် လုပ်ငန်းများသို့ သွားရောက်၍ လုပ်ငန်းဆောင်ရွက်ပုံအဆင့်ဆင့်နှင့် ဈေးနှုန်း၊ ဈေးကွက်များကွင်းဆင်း မေးမြန်းခဲ့ကြောင်း သိရသည်။

          လုပ်ငန်းရှင်များမှ မြေပဲဆားလှော် လုပ်ငန်းလုပ်ကိုင်ရာတွင် ကုန်ကြမ်းဖြစ်သော မြေပဲကို ပခုက္ကူမြို့ပေါ်ရှိ ပဲပွဲရုံများမှ တစ်ပိဿာလျှင် ကျပ်(၉၅၀၀)ဖြင့် ဝယ်ယူရကြောင်း၊ ပဲလေး(ကျွန်းပဲ)ကို သာ သုံးစွဲကြောင်း၊ မြေပဲကိုသန့်စင်ပြီးရေနွေးဖျောပြီးလျှင် ဂျင်း၊ ကြက်သွန်ဖြူ၊ ဆားဖြင့် သမ အောင် ရောမွှေ၍ ခဏအခြောက်ခံကြောင်း၊ ထို့နောက်နယ်ပြီးသောမြေပဲများကို ဒယ်အိုးထဲထည့်၍ စက်ဖြင့် လှော်ကြောင်း၊ ပဲအမျိုးအစားအပေါ်မူတည်၍ (၂၅)ပိဿာဝင် တစ်အိတ်လှော်လျှင် (၂၇-၂၉)ပိဿာ ကုန်ချောထွက်ရှိကြောင်း၊ လုပ်သားဦးရေ(၁၂)ဦးရှိပြီး တစ်နေ့လျှင် အမျိုးသားတစ်ဦး ကျပ်(၁၅၀၀၀)၊ အမျိုးသမီးတစ်ဦး ကျပ်(၁၀၀၀၀)ပေးကြောင်း၊ တစ်ရက်လျှင် (၁၈-၂၀)အိတ်ခန့် လှော်ရပြီး တစ်လ ပျမ်းမျှ(၂၀)ရက်ခန့်လုပ်ကိုင်ရကြောင်း၊  အိမ်နီးနားပတ်ဝန်းကျင်ရှိပြည်သူများအား အလုပ်အကိုင်အခွင့် အလမ်းများပေးနိုင်ကြောင်း၊ ဈေးနှုန်းအနေဖြင့် မြေပဲဆားလှော်တစ်ပိဿာလျှင် ကျပ်(၉၅၀၀-၁၁၀၀၀) ဖြင့် လက်လီ/လက်ကားရောင်းချကြောင်း၊ မြို့တွင်း၌ ရောင်းချမှုနည်းပြီး ရန်ကုန်မြို့သို အဓိကထား တင်ပို့ကြောင်း၊ (၂၃-၂၅)ပိဿာဝင် အိတ်အသီးသီးဖြင့်တင်ပို့ကြောင်း၊ အကျိုးအမြတ်အနေဖြင့် တစ်အိတ်လျှင် ကျပ်(၁၀၀၀၀-၁၂၀၀၀)ခန့်ရရှိကြောင်း၊လက်ရှိအချိန်မှာ နားရက်မရှိတွင်ကျယ်စွာ တင်ပို့ နေရကြောင်း လုပ်ငန်းရှင်၏ပြောပြချက်အရ သိရှိရပါသည်။

DOCA(မကွေး)

    မကွေးတိုင်းဒေသကြီး၊ သရက်ခရိုင်၊ ကံမမြို့၊ မြို့နယ်တာဝန်ခံနှင့် ဝန်ထမ်းများသည် (၁၈.၈. ၂၀၂၅)ရက်နေ့၊ နံနက်(၁၀း၃၀)နာရီအချိန်တွင် မြို့နယ်ကျန်းမာရေးဦးစီးဌာန အစည်းအဝေးခန်းမ၌ အစားအသောက်နှင့် ဆေးဝါးကွပ်ကဲရေးဦးစီးဌာန(FDA) ဦးဆောင်သော ဆေးဆိုင်ပိုင်ရှင်များအား အသိပညာပေးဟောပြောပွဲတွင် ပူးပေါင်းပါဝင်ဆောင်ရွက်ခဲ့ကြောင်း သိရသည်။

     အဆိုပါ ဟောပြောပွဲတွင် အစားအသောက်နှင့် ဆေးဝါးကွပ်ကဲရေးဦးစီးဌာန(FDA) တာဝန်ခံမှ ဆေးဝါးရောင်းချသူများ လိုင်စင်လျှောက်ထားခြင်းအကြောင်းအရာများ၊ တားမြစ်ချက်များ၊ ဥပဒေများ အကြောင်းအားလည်းကောင်း၊ ကံမမြို့နယ် တာဝန်ခံ ဒေါ်နွဲ့ယဥ်ဝင်းမှ အွန်လိုင်းစနစ်ဖြင့်ရောင်းချခြင်း လုပ်ငန်းဆောင်ရွက်ရာတွင် Certificate ရရှိထားသည့် လုပ်ငန်းရှင်များ၏ တာဝန်(၁၅)ချက် အကြောင်း အရာများ၊ ၎င်းလုပ်ငန်းရှင်၏ တာဝန်များဖောက်ဖျက်ကြူးလွန်ခဲ့လျှင် အရေးယူဆောင်ရွက်ရမည့် ပြစ်မှု ပြစ်ဒဏ်များ၊ Online Sale နှင့်ပတ်သက်ပြီး အငြင်းပွားမှုတိုင်ကြားမှုများ များပြားလာသည့်အတွက် စနစ်ပိုမိုလုံခြုံမှုရှိစေရန်နှင့် လုပ်ငန်းများလွယ်ကူလျင်မြန်စွာဆောင်ရွက်နိုင်ရန်အတွက် Two Factor Authentication (2FA) စနစ်ကို ထည့်သွင်းဆောင်ရွက်လျက်ရှိသည့်အကြောင်းများ၊ စီးပွားရေးလုပ်ငန်းရှင်၏ တာဝန်များနှင့် ကုန်အညွှန်းအမှတ်အသားနှင့် စပ်လျဉ်းသည့် အကြောင်းအရာများအားလည်းကောင်း အသေးစိတ်ရှင်းလင်းပြောကြားပြီး တက်ရောက်လာသည့် စီးပွား‌ရေးလုပ်ငန်းရှင်နှင့် ကျန်းမာရေး ဝန်ထမ်း စုစုပေါင်း(၂၅)ဦးအား လက်ကမ်း စာစောင်များ ဝေငှခဲ့ကြောင်း သိရသည်။

DOCA(မကွေး)

        စားသုံးသူရေးရာဦးစီးဌာန၊ မကွေးတိုင်းဒေသကြီး၊ သရက်ခရိုင်တာဝန်ခံရုံးမှ ကံမမြို့နယ် တာဝန်ခံနှင့်ဝန်ထမ်းသည် (၁၈.၈.၂၀၂၅)ရက်နေ့၊ နေ့လယ်(၁၅း၀၀)နာရီအချိန်တွင် ကံမမြို့၊ ရှမ်းကွင်း ကျေးရွာ၌ "ခြူး" အမှတ်တံဆိပ်ဖြင့် ထုတ်လုပ်ရောင်းချနေသော အကြော်စုံ လုပ်ငန်းအလုပ်ရုံသို့ သွားရောက်၍ စီးပွားရေးလုပ်ငန်းရှင်များ လိုက်နာရမည် တာဝန်များအကြောင်း အသိပညာပေးဆွေးနွေး ခဲ့ကြောင်း သိရသည်။

      ထုတ်လုပ်နေသည့် အာလူးကြော်နှင့် တို့ဟူးကြော်တို့တွင် စားသုံးသူကာကွယ်ရေးဥပဒေ (၂၀၁၉) အခန်း(၁၈) ပုဒ်မ(၄၁)အရ ဖော်ပြပါရှိရမည့်အချက်များနှင့် ပြည့်စုံမှုရှိကြောင်း စစ်ဆေးတွေ့ရှိရပြီး လုပ်ငန်းရှင်အား စီးပွားရေးလုပ်ငန်းရှင်၏ တာဝန်များ၊ တားမြစ်ချက်များ၊ ပြစ်မှုပြစ်ဒဏ်များအကြောင်းအား အသေးစိတ် ရှင်းလင်းအသိပညာပေး ဆွေးနွေးခဲ့ကြောင်း သိရသည်။

DOCA(မကွေး)

           ၂၀၂၅ ခုနှစ်၊ ဩဂုတ်လ ၁၄ ရက်နေ့၊ နံနက် (၉း၀၀) အချိန်တွင် ရေကြည်မြို့နယ်၊ ဆီဆုံကုန်းကျေးရွာရှိ တောင်သူဦးကျော်ကျော်ဦး၏ ကွင်းအမှတ်-၈၉၄-က၊ ဦးပိုင်အမှတ်၃၅/၄ စိုက်ဧက ၅.၀၀ ဧကတွင် ၂၀၂၅-၂၀၂၆ ခုနှစ်၊ မိုးစပါးရာသီ အောင်နိုင်တိုးစပါး (Rstocs) မျိုးသန့်မျိုးစေ့ ထုတ်စိုက်ပျိုးခြင်းအခမ်းအနားအား ကျင်းပပြုုလုပ်ခဲ့ပါသည်။

          အဆိုပါအခမ်းအနားသို့ စီမံအုပ်ချုပ်ရေးအဖွဲ့ဥက္ကဋ္ဌနှင့် အဖွဲ့ဝင်များ၊ မြို့နယ်စိုက်တိုးမြှင့် အဖွဲ့ဝင်များ တက်ရောက်ခဲ့ပြီး အောင်နိုင်တိုးစပါးမျိုးပင်များအား ကောက်စိုက်သမများဖြင့် စိုက်ပျိုး နေမှုများအားကြည်ရှု့အားပေးခဲ့ကြောင်း သိရှိရပါသည်။

  (DOCA)ဧရာဝတီ