သတင်းနှင့် လှုပ်ရှားမှုများ

အိတ်ဖွင့်တင်ဒါခေါ်ယူခြင်း

စစ်ကိုင်းတိုင်းဒေသကြီးအစိုးရအဖွဲ့

စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး

အိတ်ဖွင့်တင်ဒါခေါ်ယူခြင်း

၁။ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၏ ၂၀၂၀-၂၀၂၁ ဘဏ္ဍာနှစ် ပြည်ထောင်စုငွေလုံးငွေရင်းရန်ပုံငွေဖြင့် စစ်ကိုင်းတိုင်းဒေသကြီးအစိုးရအဖွဲ့မှ ကြီးကြပ် ဆောင်ရွက်မည့် စစ်ကိုင်းတိုင်းဒေသကြီး၊

တမူးခရိုင်ဦးစီးမှူးရုံး (၅၀’× ၃၅’× ၂၄) RC ( ၂ )ထပ် (အတွင်း ရေ၊ မီး၊ မိလ္လာ)၊ (Apron & Drain အပါ) ဆောက်လုပ်ခြင်းအတွက် အိတ်ဖွင့်တင်ဒါများ တင်သွင်းရန် ဖိတ်ခေါ်အပ်ပါသည်။

( က ) တင်ဒါလျှောက်လွှာပုံစံရောင်းချမည့်နေရာ - စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီးဦးစီးမှူးရုံး၊ စီးပွားရေးတက္ကသိုလ်၊ အနောက်ဖက်လမ်းနှင့် ရသုံးမှန်းခြေလမ်းထောင့်၊ မုံရွာမြို့

( ခ ) တင်ဒါလျှောက်လွှာပုံစံရောင်းချမည့် နေ့ရက်/အချိန် - (၃.၁၁.၂၀၂၀ မှ ၃.၁၂.၂၀၂၀)

(ရုံးချိန်အတွင်း )

( ဂ ) တင်ဒါလျှောက်လွှာတင်သွင်းရမည့်နေ့ရာ - စစ်ကိုင်းတိုင်းဒေသကြီးအစိုးရအဖွဲ့၊ စီမံကိန်းနှင့်ဘဏ္ဍာရေးဝန်ကြီးဌာန၊ ဝန်ကြီးရုံး၊ မုံရွာမြို့

( ဃ ) နောက်ဆုံးတင်ဒါပေးသွင်ရမည့် ရက်စွဲ/အချိန် - (၃.၁၂.၂၀၂၀) (၁၃:၀၀)နာရီ

( င ) တင်ဒါဖွင့်မည့်နေရာ - စစ်ကိုင်းတိုင်းဒေသကြီးအစိုးရအဖွဲ့၊ စီမံကိန်းနှင့်ဘဏ္ဍာရေးဝန်ကြီးဌာန၊ ဝန်ကြီးရုံး၊ မုံရွာမြို့

၂။ တင်ဒါပုံစံနှင့် တင်ဒါစည်းကမ်းများ အသေးစိတ်သိရှိလိုပါက စစ်ကိုင်းတိုင်းဒေသကြီးဦးစီးမှူးရုံး၊ စားသုံးသူရေးရာဦးစီးဌာန၊ စီးပွားရေးတက္ကသိုလ်အနောက်ဖက်လမ်း၊ မုံရွာမြို့၊ ဖုန်း ၀၇၁ - ၂၁၀၂၀ ၊ ၀၇၁ - ၂၃၅၉၅ သို့ ရုံးချိန်အတွင်း

ဆက်သွယ်စုံစမ်းဝယ်ယူနိုင်ပါသည်။

တင်ဒါခေါ်ယူ လက်ခံရေးနှင့်စိစစ်ရွေးချယ်ရေးအဖွဲ့

စစ်ကိုင်းတိုင်းဒေသကြီး

sagaing Tender.pdf

လယ်ယာထုတ် ကုန်စီမံခန့်ခွဲရေးအဖွဲ့ ဥက္ကဋ္ဌ၊ စီးပွားရေးနှင့်ကူးသန်း ရောင်းဝယ်ရေးဝန်ကြီးဌာန၊ ဒုတိယဝန်ကြီး ဦးအောင်ထူး လယ်ယာထုတ်ကုန်စီမံခန့်ခွဲ့ရေးအဖွဲ့၏ ညှိနှိုင်းအစည်းအဝေးသို့ တက်ရောက်အမှာစကားပြောကြား

သတင်းနှင့် လှုပ်ရှားမှုများ

နေပြည်တော်၊ နိုဝင်ဘာ ၅

၂၀၂၀ ပြည့်နှစ်၊ နိုဝင်ဘာလ ၅ ရက်နေ့၊ (၁၄:၀၀) နာရီအချိန်တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ အစည်းအဝေးခန်းမ၌ Zoom Application ဖြင့် ကျင်းပပြုလုပ်သည့် လယ်ယာထုတ်ကုန်စီမံခန့်ခွဲရေးအဖွဲ့ညှိနှိုင်းအစည်းအဝေးသို့ လယ်ယာထုတ်ကုန်စီမံခန့်ခွဲရေးအဖွဲ့ ဥက္ကဌ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး ဦးအောင်ထူး တက်ရောက်အမှာစကားပြောကြားခဲ့သည်။

ဒုတိယဝန်ကြီးက အဖွင့်အမှာစကားပြောကြားရာတွင် ၂၀၂၀ ပြည့်နှစ် ထွက် မိုးစပါးများကို တင်ဒါစနစ်ဖြင့်ဝယ်ယူရေး ဆောင်ရွက်ရာတွင် စနစ်တကျဆောင်ရွက်နိုင်ရန်အတွက် ကျင်းပခြင်းဖြစ်ကြောင်း၊ တောင်သူလယ်သမားအခွင့်အရေးကာကွယ်ရေးနှင့် အကျိုးစီးပွားမြှင့်တင်ရေးဥပဒေအရ လယ်ယာထုတ်ကုန်စီမံခန့်ခွဲရေးအဖွဲ့မှ ၂၀၂၀ ပြည့်နှစ်ထွက် မိုးစပါးများကို ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ ပဲခူးတိုင်းဒေသကြီးနှင့် ရခိုင်ပြည်နယ်တို့တွင် သတ်မှတ်အခြေခံ ရည်ညွှန်းဈေးနှုန်းဖြစ်သည့် စပါးတင်း (၁၀၀)လျှင် ကျပ် (၅၂၀,၀၀၀)နှုန်းအောက် မကျသော ဈေးနှုန်းဖြင့် ဝယ်ယူရေး ဆောင်ရွက်နိုင်ရန်အတွက် နိုင်ငံတော်မှ လှည့်ပတ်ရန်ပုံငွေ (၂၀) ဘီလီယံကို ထုတ်ယူ၍ စပါးဝယ်ယူရေးလုပ်ငန်းကို ဆောင်ရွက်သွားမည်ဖြစ်ပါကြောင်း၊ စပါးဝယ်ယူရေး ဆောင်ရွက်ရာတွင် နိုင်ငံတော်ဘဏ္ဍာငွေများ ဆုံးရှုံးမှုမရှိစေရေး စနစ်တကျဆောင်ရွက်သွားရန်လိုအပ်မည်ဖြစ်ကြောင်း၊ တိုင်းဒေသကြီး/ ပြည်နယ် စပါး၊ ဆန် ဝယ်ယူရေးကြီးကြပ်မှုလုပ်ငန်းအဖွဲ့များအနေဖြင့် မိမိတိုင်းဒေသကြီး/ ပြည်နယ်အတွင်း စပါးဝယ်ယူရေးအတွက် တင်ဒါ ဆောင်ရွက်မှုအခြေအနေများအားလည်းကောင်း၊ ဆန်များ ပြန်လည်အပ်နှံရာတွင် လက်ခံနိုင်ရေး အတွက် သိုလှောင်ရုံများ ငှားရမ်းသုံးစွဲနိုင်မည့်အခြေအနေနှင့် စပ်လျဉ်း၍ ဆောင်ရွက်သင့်သည့် အခြေအနေများအား ဆွေးနွေးပေးကြရန်နှင့် တင်ဒါစနစ်ဖြင့် စပါးဝယ်ယူရေးဆောင်ရွက်ရာတွင် ဖြစ်ပေါ်လာနိုင်မည့်အခက်အခဲများအပေါ် အစည်းအဝေးတက်ရောက်လာကြသော လယ်ယာထုတ်ကုန်စီမံခန့်ခွဲရေးအဖွဲ့ဝင်များ၊ စပါး၊ ဆန်ဝယ်ယူရေးကြီးကြပ်မှုလုပ်ငန်း အဖွဲ့များ၊ အသင်းအဖွဲ့များအနေဖြင့် ဝိုင်းဝန်းအကြံပြု ဆွေးနွေးပေးကြစေလိုကြောင်းပြောကြားခဲ့သည်။

ထို့နောက် အစည်းအဝေးသို့ တက်ရောက်လာကြသော တိုင်းဒေသကြီးနှင့် ပြည်နယ်များမှ စီမံကိန်းနှင့် ဘဏ္ဍာရေးဝန်ကြီးများ၊ စပါး၊ ဆန်ဝယ်ယူကြီးကြပ်မှုလုပ်ငန်းအဖွဲ့များ၊ ဌာနဆိုင်ရာ အသီးသီးမှ တာဝန်ရှိသူများနှင့် မြန်မာ့ကုန်ပစ္စည်းစစ်ဆေးရေးနှင့် စမ်းသပ်မှုလုပ်ငန်းများလီမိတက်၊ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်၊ မြန်မာနိုင်ငံဆန်စပါးအသင်း ချုပ်၊ မြန်မာနိုင်ငံဆန်စက်လုပ်ငန်းရှင်များအသင်း၊ မြန်မာနိုင်ငံဆန် စပါးကုန်သည်များအသင်းတို့မှ တာဝန်ရှိသူများက လုပ်ငန်းကဏ္ဍအလိုက်တင်ပြကြရာ တင်ပြချက်များအပေါ် ဒုတိယဝန်ကြီးမှ ပြည်လည်ဖြည့်စွက်ဆွေးနွေးကာ အစည်းအဝေးကို ရုပ်သိမ်းလိုက်ကြောင်းသတင်းရရှိသည်။

မူဝါဒ၊ DOCA

ရခိုင်ပြည်နယ်ရှိ သက်ဆိုင်ရာမြို့နယ်များသို့ အရေးပေါ်ရိက္ခာ စားအုန်းဆီများ ပြောင်းရွှေ့ပို့ဆောင်ရေး ပူးပေါင်းဆောင်ရွက်ခြင်း

သတင်းနှင့် လှုပ်ရှားမှုများ

COVID-19 ကူးစက်ရောဂါဖြစ်ပွားနေစဉ်ကာလအတွင်း ရခိုင်ပြည်နယ် အတွင်းရှိ ပြည်သူများအား အခြေခံ ရိက္ခာများမပြတ်လပ်စေရေး အမျိုးသားအဆင့်ဗဟိုကော်မတီ၏ အစီအစဉ်ဖြင့် ရန်ကုန်ဆိပ်ကမ်းမှတဆင့် MV .ဇမ္ဗူအောင် သင်္ဘောဖြင့် ပေးပို့သော စားအုန်းဆီတန်ချိန် (၃၀၀) သည် ၂၇.၁၀.၂၀၂၀ ရက်နေ့တွင် စစ်တွေမြို့၊ ရွှေမင်းဂံဆိပ်ကမ်းသို့ ရောက်ရှိလာရာ စားသုံးသူရေးရာဦးစီးဌာန၊ ရခိုင်ပြည်နယ် ဦးစီးမှူးနှင့်အဖွဲ့ သွားရောက်ကြီးကြပ်ဆောင်ရွက်ခဲ့ပြီး သက်ဆိုင်ရာမြို့နယ်များသို့ သယ်ပို့နိုင်ရေးနှင့် သိုလှောင်နိုင်ရေးတို့အား ရခိုင်ပြည်နယ် အစိုးရအဖွဲ့၏ လမ်းညွှန်မှုဖြင့် ဆက်လက်ဆောင်ရွက်မှုများ ပြုလုပ်သွားမည် ဖြစ်ကြောင်းသိရှိရပါသည်။

ရခိုင်ပြည်နယ်

စားသုံးသူရေးရာဦးစီးဌာန

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး၊ ဒေါက်တာသန်းမြင့် မြန်မာနိုင်ငံစားသုံးသူကာကွယ်ရေးကော်မရှင် (၁/၂၀၂၀) လုပ်ငန်းညှိနှိုင်း အစည်းအဝေးသို့ တက်ရောက်အမှာစကားပြောကြား

သတင်းနှင့် လှုပ်ရှားမှုများ

နေပြည်တော်၊ အောက်တိုဘာ ၂၇

“မြန်မာနိုင်ငံစားသုံးသူကာကွယ်ရေးကော်မရှင်” (၁/၂၀၂၀) လုပ်ငန်းညှိနှိုင်းအစည်းအဝေး ကို ၂၇-၁၀-၂၀၂၀ရက် နေ့နံနက် (၁၀:၀၀) နာရီအချိန်တွင် နေပြည်တော်ရှိ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ ရုံးအမှတ်(၃)၊ အစည်းအဝေးခန်းမ၊ စားသုံးသူရေးရာဦးစီးဌာန၊ ရုံးအမှတ် (၅၂)၊ အစည်း အဝေးခန်းမတို့၌ Video Conferencing စနစ်သုံး Zoom Application ဖြင့် ကျင်းပပြုလုပ်ရာ မြန်မာနိုင်ငံစားသုံးသူကာကွယ်ရေးကော်မရှင်အဖွဲ့ဝင်များ၊ သက်ဆိုင်ရာဌာနများမှ တာဝန်ရှိသူများ၊ တိုင်းဒေသကြီး/ ပြည်နယ် စားသုံးသူ ရေးရာကော်မတီအတွင်းရေးမှူးများ တက်ရောက်ခဲ့ကြပြီး မြန်မာနိုင်ငံ စားသုံးသူကာကွယ်ရေးကော်မရှင်ဥက္ကဋ္ဌ စီးပွားရေးနှင့် ကူးသန်း ရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသန်းမြင့်က အဖွင့်အမှာစကား ပြောကြားပါသည်။

ပြည်ထောင်စုဝန်ကြီးက အမှာစကားပြောကြားရာတွင် မိမိတို့ဝန်ကြီးဌာန အနေနဲ့ ကဏ္ဍကြီး (၆) ရပ်ကို အကောင်အထည်ဖော်လျှက်ရှိရာ စားသုံးသူ အကာအကွယ်ပေးရေး ကဏ္ဍပါဝင်ပါကြောင်း၊စားသုံးသူအခွင့်အရေးနှင့် အကျိုးစီးပွားများကို ကာကွယ်စောင့်ရှောက်နိုင်ရေး အတွက် ၂၀၁၉ ခုနှစ်၊ မတ်လ ၁၅ ရက်နေ့တွင် စားသုံးသူကာကွယ်ရေးဥပဒေကို ပြည်ထောင်စုလွှတ်တော် ဥပဒေအမှတ် ၉ ဖြင့် ပြဌာန်းခဲ့ပြီး ဥပဒေအရ မြန်မာနိုင်ငံစားသုံးသူကာကွယ်ရေးကော်မရှင်ကို အဖွဲ့ဝင် (၂၁) ဦး ဖြင့် ပြည်ထောင်စုအစိုးရ အဖွဲ့က ၃၀-၉-၂၀၁၉ ရက်စွဲပါ အမိန့်ကြော်ငြာစာအမှတ် (၅၉/ ၂၀၁၉) ဖြင့် ဖွဲ့စည်းခဲ့ပြီး ဖြစ်ပါကြောင်း။

ကော်မရှင်ဖွဲ့စည်းပြီးနောက် ၁/၂၀၁၉ လုပ်ငန်းညှိနှိုင်းအစည်းအဝေးကို ၂၀၁၉ ခုနှစ် နိုဝင်ဘာလ ၁၅ ရက်နေ့က ကျင်းပခဲ့ပြီး ဆုံးဖြတ်ချက် (၉) ချက် ချမှတ်ခဲ့မှုအပေါ် ဆောင်ရွက်နိုင်ခဲ့ ပြီးဖြစ်ပါကြောင်း၊ Covid 19 ကမ္ဘာ့ကပ်ရောဂါ ရင်ဆိုင်ခဲ့ရသည့် ကာလများအတွင်း အခြေခံ စားသောက်ကုန် နှင့် ကျန်းမာရေးဆိုင်ရာ ဆေးနှင့် ဆေးပစ္စည်း ဈေးနှုန်းများ အဆမ တန်မြင့် တင်ရောင်းချခြင်းများမှကာကွယ်နိုင်ရန်အတွက် အမိန့်စာများ ထုတ်ပြန် ကြေညာခြင်း၊ ဈေးကွက် အတွင်း ကွင်းဆင်းစိစစ်ခြင်းများကို ကော်မရှင်၏လမ်းညွှန်မှုနှင့်အညီ စားသုံးသူရေးရာ ဦးစီးဌာနက သက်ဆိုင်ရာဌာနများနှင့် ပူးပေါင်းဆောင်ရွက်ခဲ့ကြပါကြောင်း။

စားသုံးသူကာကွယ်ရေးဥပဒေအရ တိုင်းဒေသကြီး/ပြည်နယ် စားသုံးသူရေးရာကော်မတီ နှင့် ပြည်ထောင်စုနယ်မြေ စားသုံးသူရေးရာကော်မတီ အသီးသီးကို ဖွဲ့စည်းပြီး စားသုံးသူ ကာကွယ်ရေး လုပ်ငန်းစဉ်များကို ဆောင်ရွက်နိုင်ခဲ့ပြီးဖြစ်သော်လည်း ခရိုင်/ မြို့နယ် အဆင့် အထိ ကျယ်ပြန့် ထိရောက်စွာ ဆောင်ရွက်နိုင်ရေး လိုအပ်ပါကြောင်း၊ ကိုယ်ပိုင်အုပ်ချုပ်ခွင့်ရတိုင်း သို့မဟုတ် ကိုယ်ပိုင်အုပ်ချုပ်ခွင့်ရဒေသ စားသုံး သူရေးရာကော်မတီနှင့် ခရိုင်စားသုံးသူ ရေးရာ ကော်မတီများဖွဲ့စည်းရန် သင့်/မသင့်၊ စားသုံးသူ ကာကွယ်ရေး ဥပဒေပါ လုပ်ငန်းတာဝန်များကို အကောင်အထည်ဖော် ဆောင်ရွက်နိုင်ရေးနှင့် စားသုံးသူကာကွယ် ရေးအတွက် ချမှတ်သင့်သော မူဝါဒများ ဆောင်ရွက်သင့်သော လုပ်ငန်းစဉ်များကိုလည်း ရင်းနှီးပွင့်လင်းစွာအကြံပြုဆွေးနွေး ပေးစေလိုပါကြောင်းဆွေးနွေး ပြောကြား ခဲ့ပါသည်။

မြန်မာနိုင်ငံစားသုံးသူကာကွယ်ရေးကော်မရှင် ဒုတိယဥက္ကဋ္ဌ၊ စီးပွားရေးနှင့်ကူးသန်း ရောင်းဝယ်ရေးဝန်ကြီးဌာန၊ ဒုတိယဝန်ကြီး၊ ဦးအောင်ထူးမှ စားသုံးသူကာကွယ်ရေးကော်မရှင် အနေဖြင့် မူဝါဒများကို ချမှတ်ဆောင်ရွက်လျက်ရှိရာ စားသုံးသူရေးရာဦးစီးဌာနမှ ပြုစုတင်ပြလာသည့် အမျိုးသားစားသုံးသူကာကွယ်ရေးအစီအစဉ် (NCPP) ကို စနစ်တကျ အကောင်အထည်ဖော်သွားရန် လိုအပ်မည်ဖြစ်ပါကြောင်း၊ NCPP တွင် ထည့်သွင်းပြဌာန်းထားသည့် နှစ်အလိုက် ဆောင်ရွက်ရမည့် Action Plan များကိုလည်း ကော်မရှင်အဖွဲ့ဝင်များမှ ဦးဆောင်၍ စနစ်တကျ ကြပ်မတ်အကောင် အထည်ဖော်သွားဖို့ လိုကြောင်း၊ စားသုံးသူကာကွယ်ရေး လုပ်ငန်း စဉ်များ ပိုမိုထိရောက်စေရေးအတွက် ကဏ္ဍအလိုက် သက်ဆိုင်ရာဌာနများနှင့် သီးခြား Working Group များ ဖွဲ့စည်းဆောင်ရွက်သွားရန်နှင့် SOP များ ရေးဆွဲအကောင်အထည်ဖော်သွားရန် လိုအပ် ပါကြောင်း၊ ထို့အပြင် စားသုံးသူရေးရာကော်မတီများကိုလည်း တိုင်းဒေသကြီး/ ပြည်နယ်များတွင် သာမက ကိုယ်ပိုင်အုပ်ချုပ်ခွင့်ရဒေသများ၊ ခရိုင်များကိုလည်း တိုးချဲ့ဖွဲ့စည်းသွားရန် လိုအပ်မည် ဖြစ်ပါကြောင်း ဆွေးနွေးပြောကြားပါသည်။

ဆက်လက်၍ စားသုံးသူရေးရာဦးစီးဌာန၊ ညွှန်ကြားရေးမှူးချုပ်က ဦးစီးဌာန၏ လုပ်ငန်း ဆောင်ရွက်ချက်များကို ရှင်းလင်းပြောကြားခြင်းနှင့် ဒုတိယညွှန်ကြားရေးမှူးချုပ်က အမှာစာများအား ရှင်းလင်းဖတ်ကြားခြင်းတို့ကိုဆောင်ရွက်ခဲ့ရာကော်မရှင်အဖွဲ့ဝင်များက သက်ဆိုင်ရာကဏ္ဍအလိုက် ရှင်းလင်းဆွေးနွေးအကြံပြုခဲ့ကြပါသည်။

ယင်းနောက်ပြည်ထောင်စုဝန်ကြီးက ကော်မရှင်အဖွဲ့ဝင်များ၊ ဆက်စပ်ဌာနများ၊ စားသုံးသူ ကာကွယ်ရေးဆိုင်ရာအသင်းအဖွဲ့များ၊ ပြည်ထောင်စုနယ်မြေ၊ နေပြည်တော်အပါအဝင် တိုင်းဒေသ ကြီး/ ပြည်နယ် စားသုံးသူရေးရာကော်မတီများနဲ့ စားသုံးသူပြည်သူများ ပူးပေါင်းပါဝင်ခြင်းဖြင့် စားသုံးသူအခွင့်အရေးနဲ့ အကျိုးစီးပွားများကို ထိထိရောက်ရောက် ကာကွယ်စောင့်ရှောက်ပေးနိုင် မှာဖြစ်တဲ့အတွက်အဖွဲ့ဝင်အားလုံး တက်ညီလက်ညီပူးပေါင်းပါဝင်ဆောင်ရွက်ပေးကြရန် တိုက်တွန်း ပြောကြားခဲ့ကြောင်း သတင်းရရှိပါသည်။

စားသုံးသူရေးရာဦးစီးဌာန

စားသုံးသူကာကွယ်ရေးဆိုင်ရာအသိပညာပေးဆွေးနွေးပွဲ ကျင်းပပြုလုပ်ခြင်း

သတင်းနှင့် လှုပ်ရှားမှုများ

တနင်္သာရီတိုင်းဒေသကြီး၊ ကော့သောင်းခရိုင် စားသုံးသူရေးရာဦးစီးဌာနှင့် ပြန်ကြားရေးနှင့် ပြည်သူ့ဆက်ဆံရေးဦးစီးဌာန တို့ပူးပေါင်းကာ စားသုံးသူကာကွယ်ရေးဆိုင်ရာအသိပညာပေး ဆွေးနွေးပွဲအစီအစဉ်ကို ၂၀၂၀ ပြည့်နှစ် အောက်တိုဘာလ ၁၀ ရက်နေ့၊ နေ့လည်(၁:၀၀) အချိန်၊ ကော့သောင်းခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာန လူထုအခြေပြုဗဟိုဌာနခန်းမတွင် ဆွေးနွေးခဲ့ကြပါသည်။

ဆွေးနွေးရာတွင် ကော့သောင်းခရိုင်စားသုံးသူရေးရာဦးစီးဌာန ခရိုင်ဦးစီးမှုး ဒေါ်မြသီတာက စားသုံးသူကာကွယ်ရေးဥပဒေပါအခန်းကဏ္ဍများ၊ စားသုံးသူကာကွယ်ရေးဆိုင်ရာ အဓိပ္ပါယ်ဖွင့်ဆို ချက်များ၊ စီးပွားရေးလုပ်ငန်းရှင်ဆိုင်ရာအဓိပ္ပါယ်ဖွင့်ဆိုချက်များ၊ စားသုံးသူအခွင့်အရေး (၈)ချက် ပါအကြောင်းအရာများ၊ စားသုံးသူနှင့် စီးပွားရေးလုပ်ငန်းရှင်များ၏တာ၀န်များ၊ စားသုံးသူများ တောင်းဆိုနိုင်သည့် အခွင့်အရေးများ၊ စားသုံးသူနစ်နာမှုများအတွက် တိုင်ကြားနိုင်သည့်နေရာများ၊ ပြစ်မှုပြစ်ဒဏ်များ၊ ကုန်အညွန်းအမှတ်အသားဖော်ပြခြင်းဆိုင်ရာသိသင့်သိထိုက်သည်များ၊ကိုဗစ်-၁၉ ထိန်းချူပ်မှုကာလအတွင်း စားသုံးသူများအား အကာကွယ်ပေးမှုအစီအစဉ်များနှင့် လုပ်ငန်း ဆောင်ရွက်နေမှုအခြေအနေများကို အသိပညာပေးဆွေးနွေးခဲ့ကြောင်း သတင်းရရှိပါသည်။

တနင်္သာရီတိုင်းဒေသကြီး

စားသုံးသူရေးရာဦးစီးဌာန

ပိုးမွှားကင်းရှင်းကြောင်းသက်သေခံလက်မှတ်(Phytosanitary Certificate-PC)များအား ပြင်ဆင်ခြင်း၊ အတုပြုလုပ်ခြင်းကိစ္စများအတွက် အရေးယူဆောင်ရွက်မည့်ကိစ္စ

သတင်းနှင့် လှုပ်ရှားမှုများ

ပိုးမွှားကင်းရှင်းကြောင်းသက်သေခံလက်မှတ်(Phytosanitary Certificate-PC)များအား ပြင်ဆင်ခြင်း၊ အတုပြုလုပ်ခြင်းကိစ္စများအတွက် အရေးယူဆောင်ရွက်မည့်ကိစ္စ

စိုက်ပျိုးရေးဦးစီးဌာနသည် မြန်မာနိုင်ငံမှ ပြည်ပနိုင်ငံများသို့ တင်ပို့လျက်ရှိသော အပင်နှင့်အပင်ထွက်ပစ္စည်းများအတွက် ပိုးမွှားကင်းရှင်းကြောင်း သက်သေခံလက်မှတ် (Phytosanitary Certificate-PC) များကို တင်သွင်းသည့်နိုင်ငံ၏ လိုအပ်ချက်နှင့်အညီ ပိုးမွှားရောဂါစစ်ဆေးခြင်းများဆောင်ရွက်၍ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီး ဌာန၊ စိုက်ပျိုးရေးဦးစီးဌာန၊ သီးနှံကာကွယ်ရေးဌာနခွဲမှ စိစစ်ထုတ်ပေးလျက်ရှိကြောင်း၊ စိုက်ပျိုးရေးဦးစီးဌာန၊ သီးနှံကာကွယ်ရေးဌာနခွဲမှ ထုတ်ပေးသည့် Phytosanitary Certificate တွင် ပါဝင်သော အကြောင်းအရာပါ အချက်အလက်များသည် တင်ပို့လိုသည့် ကုမ္ပဏီများမှ လျှောက်ထားချက်များအား အပြည်ပြည်ဆိုင်ရာ အပင်ရောဂါကာကွယ်ရေးကွန်ဗန်းရှင်း (International Plant Protection Convention-IPPC) မှ ချမှတ်ထားသော International Standards for Phytosnaitary Measures(ISPM) 12 နှင့်အညီ စစ်ဆေး၍ မှန်ကန်တိကျစွာ ထည့်သွင်း ဖော်ပြထားခြင်းဖြစ်ပါကြောင်း၊ စိုက်ပျိုးရေးဦးစီးဌာနနှင့် သီးနှံကာကွယ်ရေးဌာနခွဲ တို့၏ Website များဖြစ်သော http://www.doa.gov.mm နှင့် http://www.ppdmyanmar.org/ တွင်လည်း အပင်နှင့် အပင်ထွက်ပစ္စည်းများ တင်သွင်းခြင်း/တင်ပို့ခြင်းဆိုင်ရာ Standard Operating Procedure (SOP)များကို ဖော်ပြထားရှိပြီးဖြစ်ရာ တင်ပို့လိုသော ကုမ္ပဏီများအနေဖြင့် SOP အတိုင်း လိုက်နာပြီး Phytosanitary Certificate ထုတ်ယူရန် လျှောက်လွှာကို သင်္ဘောမတင်မီ လာရောက်ထုတ်ယူရမည်ဖြစ်ပါသည်။

စိုက်ပျိုးရေးဦးစီးဌာနအနေဖြင့် မတ်လအတွင်းတွင် Phytosanitary Certificate စုစုပေါင်း(၁၁၁၅)စောင် ထုတ်ပေးခဲ့ပြီး အိန္ဒိယနိုင်ငံရှိ သက်ဆိုင်ရာ National Plant Protection Organization အဖွဲ့အစည်းမှ မြန်မာနိုင်ငံမှ ထုတ်ပေးထားသော Phytosanitary Certificate နှင့် ပတ်သက်၍ စုံစမ်းမေးမြန်းလာခဲ့မှုအပေါ်တွင် စစ်ဆေးတွေ့ရှိချက်များအရ မြန်မာနိုင်ငံမှ ထုတ်ပေးထားသောမူရင်း Phytosanitary Certificate ကို မတ်ပဲများတင်ပို့မှုလုပ်ငန်းစဉ် အဆင့်တစ်ရပ်ရပ်ကို ပြောင်းလဲပြင်ဆင်ထားခြင်းဖြစ်၍ နိုင်ငံတော်အစိုးရမှ ထုတ်ပေးထားသော တရားဝင်စာရွက်စာတမ်းများကို အတုပြုလုပ်ခြင်းဖြစ်သည့်အပြင် နောက်နောင်တွင် အလားတူကိစ္စမျိုး ထပ်မံဖြစ်ပေါ်လာပါက ကုန်သွယ်မှုတွင် အဆင်မပြေမှု များဖြစ်ပေါ်ခြင်း၊ မြန်မာနိုင်ငံ၏ နိုင်ငံတကာမတ်ပဲဈေးကွက်ရှိ ပုံရိပ်ကောင်းကို ကျဆင်းစေနိုင်ခြင်း၊ ကုန်ပစ္စည်းတင်ပို့သူ/ဝယ်ယူသူ နှစ်ဦးနှစ်ဖက်အတွက် အချိန်နှင့် ငွေကြေးနစ်နာဆုံးရှုံးမှုများ ဖြစ်ပေါ်စေနိုင်ခြင်း၊ နှစ်ပေါင်းများစွာ ဆက်သွယ်ဆောင်ရွက်ခဲ့သော ကြားခံကိုယ်စားလှယ်အဖွဲ့အစည်းများ၏ သိက္ခာပုံရိပ်ကျဆင်းစေခြင်းများကို ထပ်မံဖြစ်ပေါ် စေမည်ဖြစ်ပါသည်။

သို့ပါ၍ စိုက်ပျိုးရေးဦးစီးဌာန၊ သီးနှံကာကွယ်ရေးဌာနခွဲမှ ထုတ်ပေးသည့် Phytosanitary Certificate သက်သေခံလက်မှတ်တွင် ဖော်ပြထားသည့် အချက်အလက်များအား ပြင်ဆင်ပြောင်းလဲခြင်း၊ အတုပြုလုပ်ခြင်းများတွေ့ရှိပါက လိုအပ်သလို စစ်ဆေး၍ ပတ်သက်ဆက်စပ်သော ကုမ္ပဏီများအား Phytosanitary Certificate ထုတ်ပေးခြင်းကို ရပ်ဆိုင်းခြင်း၊ နာမည်ပျက်စာရင်းတွင် ထည့်သွင်းကြေညာခြင်း၊ တရားဥပဒေအရ ထိရောက်စွာအရေးယူခြင်းများ ဆောင်ရွက်မည်ဖြစ်ပါကြောင်း စိုက်ပျိုးရေးဦးစီးဌာနမှ သိရှိရပါသည်။

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန

ကြော်ငြာများနှင့် ပတ်သက်၍ စားသုံးသူများ သိရှိစေရန် အသိပေးတင်ပြခြင်း

သတင်းနှင့် လှုပ်ရှားမှုများ

ကြော်ငြာများနှင့် ပတ်သက်၍ စားသုံးသူများ သိရှိစေရန် အသိပေးတင်ပြခြင်း

စားသုံးသူရေးရာဦးစီးဌာနအနေဖြင့် ကုန်စည်၊ ဝန်ဆောင်မှု များနှင့်စပ်လျဉ်း၍ စားသုံးသူ ပြည်သူများ နစ်နာဆုံးရှုံးမှုများ မရှိစေရေး အသိပညာပေးခြင်းနှင့် နစ်နာဆုံးရှုံးမှုများ ဖြစ်ပေါ်လာပါက ညှိနှိုင်းဖြေရှင်းခြင်းများ ဆောင်ရွက်ပေးလျက်ရှိပါသည်။ စားသုံးသူကာကွယ်ရေးဉပဒေ (၂၀၁၉)၊ အခန်း (၂၃)၊ ပုဒ်မ ၆၃ တွင် စီးပွားရေးလုပ်ငန်းရှင်များကို ဆောင်ရွက်ခွင့်မပြုထားသည့် တားမြစ်ထားသော ကြော်ငြာအမျိုးအစားများမှာ အောက်ပါအတိုင်း ဖြစ်ပါသည်-

(က) ကုန်စည်၏ အရည်အသွေး၊ အရေအတွက်၊ ပါဝင်သောပစ္စည်း၊ အသုံးပြုပုံ၊ ဈေးနှုန်း၊ ဝန်ဆောင်မှုနှုန်းထားနှင့် ကုန်စည် သို့မဟုတ် ဝန်ဆောင်မှုကို ပေးအပ်နိုင်သည့် အချိန်တို့ နှင့်စပ်လျဉ်း၍ လိမ်လည်လှည့်ဖြားခြင်း ပြုထားသော ကြော်ငြာများ၊

(ခ) ကုန်စည် သို့မဟုတ် ဝန်ဆောင်မှု၏ အာမခံပေးထားမှုနှင့်စပ်လျဉ်း၍ လိမ်လည် လှည့်ဖြားခြင်း ပြုထားသော ကြော်ငြာများ၊

(ဂ) ကုန်စည် သို့မဟုတ် ဝန်ဆောင်မှုနှင့် စပ်လျဉ်း၍ မဟုတ်မမှန်သော သတင်း အချက်အလက် များ ပါဝင်သည့် ကြော်ငြာများ၊

(ဃ) ကုန်စည် သို့မဟုတ် ဝန်ဆောင်မှုကို အသုံးပြုခြင်းဖြင့် အန္တရာယ်ရှိမှုကို အသိပေးခြင်း မရှိသော ကြော်ငြာများ၊

(င) သက်ဆိုင်သူ၏ ခွင့်ပြုချက် မရရှိဘဲ တစ်စုံတစ်ဦး သို့မဟုတ် အဖြစ်အပျက်တစ်ခု အပေါ် အသုံးပြုထားသော ကြော်ငြာများ၊

(စ) တည်ဆဲဉပဒေများ၊ လူမှုကျင့်ဝတ်များနှင့် ကိုက်ညီမှု မရှိသည့် ကြော်ငြာများ။

သို့ဖြစ်ပါ၍ စားသုံးသူပြည်သူများ အနေဖြင့် စီးပွားရေးလုပ်ငန်းရှင်များက စားသုံးသူ ကာကွယ်ရေး ဉပဒေပါ ကြော်ငြာလုပ်ငန်းများအပေါ် တားမြစ်ချက်များကို ဖောက်ဖျက်၍ ကြော်ငြာ ခြင်းပြုလုပ်ကြောင်း တွေ့ရှိပါက ခိုင်လုံသော အထောက်အထား၊ အချက်အလက်များဖြင့် စားသုံးသူ ရေးရာဦးစီးဌာနသို့ သတင်းပေးပို့နိုင်ပါကြောင်း အသိပေး တင်ပြအပ်ပါသည်။

၂၀၂၀ ပြည့်နှစ်ထွက် မိုးစပါးများကို အခြေခံရည်ညွှန်းဈေးနှုန်းဖြင့် ဝယ်ယူရန် တင်ဒါအဆိုပြုလွှာဖိတ်ခေါ်ခြင်း

သတင်းနှင့် လှုပ်ရှားမှုများ

သုံးစွဲရန်မဖြစ်သော တိုင်းရင်းဆေးဝါးဖြစ်သည့် ကိုဗစ်နိုင်ဆေးလျက်ဆား (KOVITNAI MEDICAL SALT) အား ဈေးကွက်အတွင်း ရောင်းချနေမှု ရှိ မရှိ ကွင်းဆင်းစစ်ဆေးခြင်း

သတင်းနှင့် လှုပ်ရှားမှုများ

၈.၁၀.၂၀၂၀ ရက်နေ့မှ ၉.၁၀.၂၀၂၀ ရက်နေ့ထိ ကချင်ပြည်နယ်၊ ပြည်နယ်ဦးစီးမှူးရုံးမှ စစ်ဆေးရေးမှူးများသည် တိုင်းရင်းဆေးဦးစီးဌာန၊ စည်ပင်သာယာရေးအဖွဲ့များနှင့်ပူးပေါင်း၍ တိုင်းရင်းဆေးဦးစီးဌာနမှ သုံးစွဲရန်မသင့်တားမြစ်ထားသော Oline တွင် ရောင်းချနေသည့် ကိုဗစ်နိုင် လျှက်ဆား COVITNAI MEDICINE SALT အား ရောင်းချနေမှု ရှိ/မရှိ မြစ်ကြီးနားမြို့၊ မြို့မရပ်ကွက်၊ ဧရာရပ်ကွက်နှင့် ဒူကထောင်ရပ်ကွက်ရှိ ဆေးဆိုင်များတွင်လည်းကောင်း၊ ဗန်းမော်မြို့နယ်၊ မင်းကုန်းရပ်ကွက်၊ အလယ်ရပ်ရပ်ကွက်၊ မြို့မရပ်ကွက်၊ ညောင်ပင်ရပ်ကွက်၊ နားခါတောင်ရပ်ကွက်၊ နားခါမြောက်ရပ်ကွက်ရှိ ဆေးဆိုင်များတွင်လည်းကောင်း ကွင်းဆင်းစစ်ဆေးခြင်းများ ဆောင်ရွက်ခဲ့ပါသည်။

စားသုံးသူရေးရာဦးစီးဌာန

ကချင်ပြည်နယ်

စားသုံးသူကာကွယ်ပေးရေးဆိုင်ရာ Talk Show အစီအစဉ်ကျင်းပပြုလုပ်

သတင်းနှင့် လှုပ်ရှားမှုများ

ပဲခူးတိုင်းဒေသကြီး၊ စားသုံးသူရေးရာဦးစီးဌာနမှ ခရိုင်ဦးစီးမှူး ဦးစိုးမိုးနှင့် ဝန်ထမ်းများသည် ၆.၁၀.၂၀၂၀ရက်နေ့ နံနက် ၁၀:၀၀နာရီအချိန်တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန ပြည်သူ့စာကြည့်တိုက်ခန်းမတွင် ကျင်းပပြုလုပ်သော Talk Show အစီအစဉ်တွင် စားသုံးသူ ကာကွယ် ပေးရေးဆိုင်ရာနှင့်ပတ်သက်သည့် စားသုံးသူအခွင့်အရေးနှင့်လိုက်နာရမည့် တာဝန်ဝတ္တရားများအား ရှင်းလင်းပြောကြားခဲ့ပြီး ၊ စားသုံးသူကာကွယ်ရေးဉပဒေ (၂၀၁၉ ) ၊ အခန်း(၁၈)ကုန်အညွှန်းအမှတ် အသားဖော်ပြခြင်းနှင့် စပ်လျဉ်း၍ စီးပွားရေးလုပ်ငန်းရှင်များလိုက်နာရမည့်တာဝန်များနှင့် Covid-19 ကာလတွင် စျေးကွက်အတွင်းရှိ ကုန်စည်စျေးနှုန်းများနှင့် ပတ်သက်၍ စစ်ဆေးဆောင်ရွက်ခြင်းများ အပြင် စားသုံးသူများအနေဖြင့် ကုန်စည်များအပေါ် မိမိတို့၏အခွင့်အရေးများဆုံးရှံးနစ်နာမှုများရှိပါက ပဲခူးတိုင်းဒေသကြီးစားသုံးသူရေးရာဦးစီးဌာနသို့ လာရောက်တိုင်ကြားနိုင်ကြောင်း ရှင်းလင်းဆွေးနွေး ပြောကြားခဲ့ပါသည်။

ပဲခူးတိုင်းဒေသကြီး

စားသုံးသူရေးရာဦးစီးဌာန

Languages

Main menu

သတင်းနှင့် လှုပ်ရှားမှုများ

အိတ်ဖွင့်တင်ဒါခေါ်ယူခြင်း

စားသုံးသူကာကွယ်ရေးဆိုင်ရာအသိပညာပေးဆွေးနွေးပွဲ ကျင်းပပြုလုပ်ခြင်း

ကြော်ငြာများနှင့် ပတ်သက်၍ စားသုံးသူများ သိရှိစေရန် အသိပေးတင်ပြခြင်း

၂၀၂၀ ပြည့်နှစ်ထွက် မိုးစပါးများကို အခြေခံရည်ညွှန်းဈေးနှုန်းဖြင့် ဝယ်ယူရန် တင်ဒါအဆိုပြုလွှာဖိတ်ခေါ်ခြင်း

စားသုံးသူကာကွယ်ပေးရေးဆိုင်ရာ Talk Show အစီအစဉ်ကျင်းပပြုလုပ်

Pages

You are here

သတင်းနှင့် လှုပ်ရှားမှုများ

Pages