အာဆီယံစားသုံးသူကာကွယ်ရေးကော်မတီသည် အာဆီယံ ဒေသတွင်းရှိ Online စီးပွားရေးလုပ်ငန်းရှင်များနှင့် စားသုံးသူပြည်သူများ သိရှိလိုက်နာနိုင်ရန်အတွက် ASEAN Online Business Code of Conduct အား ရေးဆွဲထုတ်ပြန် ထားရှိပါသည်။ အဆိုပါ Online Business Code of Conduct ရှိ စီးပွားရေးလုပ်ငန်းရှင်များလိုက်နာရမည့် စည်းကမ်းချက် ၁၅ ချက် အား အောက်ပါ (.pdf) ဖိုင်တွင် ဝင်ရောက်ကြည့်ရှု့နိုင်ပါသည်-
Source: aseanconsumer.org
မြန်မာနိုင်ငံသည် အာဆီယံစားသုံးသူကာကွယ်ရေးကော်မတီ (ASEAN Committee on Consumer Protection-ACCP) အဖွဲ့ဝင်နိုင်ငံ တစ်နိုင်ငံဖြစ်ပြီး စားသုံးသူရေးရာဦးစီးဌာနသည် အာဆီယံစားသုံးသူကာကွယ်ရေးကော်မတီနှင့် အဓိက ဆက်သွယ်ဆောင်ရွက်ရသည့် (Focal) ဌာနဖြစ်ပါသည်။ အာဆီယံစားသုံးသူကာကွယ်ရေး ကော်မတီအစည်းအဝေးများကို တစ်နှစ်လျှင် ၂ ကြိမ် အဖွဲ့ဝင် နိုင်ငံများတွင် အလှည့်ကျ ကျင်းပပြုလုပ်လျက်ပါသည်။ ယခုအချိန်တွင် ကမ္ဘာတစ်ဝှမ်းတွင် COVID-19 ပျံ့နှံ့ ဖြစ်ပွားလျက်ရှိသောကြောင့် ယခုနှစ်အတွင်းကျင်းပရမည့် (၂၁) ကြိမ်မြောက် အာဆီယံစားသုံးသူကာကွယ်ရေးကော်မတီအစည်းအဝေးအား ၂၀၂၀ ပြည့်နှစ်၊ နိုဝင်ဘာလ ၁၆ ရက်နေ့မှ ၁၇ ရက်နေ့အထိ Video Conferencing စနစ်ဖြင့် ကျင်းပခဲ့ရာ စားသုံးသူရေးရာဦးစီးဌာနမှ တာဝန်ရှိသူများလည်း စားသုံးသူရေးရာဦးစီးဌာန၊ ရုံးအမှတ် (၅၂) နေပြည်တော်မှနေ၍ ပါဝင်တက်ရောက်ခဲ့ပါသည်။ အဆိုပါ အစည်းအဝေးသို့ အာဆီယံစားသုံးသူကာကွယ်ရေးကော်မတီ၏ အလှည့်ကျ ဥက္ကဌ ဖြစ်သူ လာအိုနိုင်ငံ၊ စက်မှုနှင့် ကူးသန်းရောင်းဝယ်ရေးဝန်ကြီးဌာန၊ ပြည်တွင်းကုန်သွယ်ရေးဦးစီးဌာနမှ ဒုတိယညွှန်ကြားရေးမှူးချုပ် ဖြစ်သူ Mr. Khouanchay Iemsouthi ၊ အဖွဲ့ဝင်နိုင်ငံများမှ ကိုယ်စားလှယ်များ၊ အာဆီယံအတွင်းရေးမှူးချုပ်ရုံးမှ တာဝန်ရှိသူများ၊ ဆွေးနွေးဖက်နိုင်ငံများနှင့် အဖွဲ့အစည်းများဖြစ်သည့် ဂျာမဏီ၊ ဩစတြေးလျနိုင်ငံစားသုံးသူဌာနများမှ ကိုယ်စားလှယ်များ၊ UNCTAD နှင့် GIZ မှ တာဝန်ရှိသူများနှင့် ကျွမ်းကျင်ပညာရှင်များပါဝင်တက်ရောက် ဆွေးနွေးခဲ့ကြပါသည်။
အဆိုပါအစည်းအဝေးတွင် အာဆီယံစားသုံးသူကာကွယ်ရေးမဟာဗျူဟာလုပ်ငန်းစီမံချက် (၂၀၁၆-၂၀၂၅) (ASEAN Strategic Action Plan for Consumer Protection 2016-2025) အား အကောင်အထည်ဖော် ဆောင်ရွက်မှုအခြေအနေများ၊ ACCP ၂၀၂၀ ပြည့်နှစ်အတွင်း ဦးစားပေး ဆောင်ရွက်ရမည့်ကိစ္စရပ်များအပေါ် ဆောင်ရွက်ပြီးစီးမှု၊ ၂၀၂၁ ခုနှစ်အတွင်းဆောင်ရွက်မည့် ဦးစားပေးကဏ္ဍများချမှတ်မှု၊ အဖွဲ့ဝင်နိုင်ငံများ၏ စားသုံးသူကာကွယ်ရေးဥပဒေဖွံ့ဖြိုး တိုးတက်မှုဆိုင်ရာကိစ္စရပ်များ၊ စားသုံးသူကာကွယ်ရေးဆိုင်ရာအသင်းအဖွဲ့များ ဖွဲ့စည်းမှု၊ အဖွဲ့ဝင်နိုင်ငံများတွင် စားသုံးသူအငြင်းပွားမှုများအား အွန်လိုင်းမှတစ်ဆင့် ဖြေရှင်းနိုင်ရေး ဆောင်နေမှုများနှင့်ပတ်သက်၍ ဆွေးနွေးခဲ့ကြပါသည်။
စားသုံးသူရေးရာဌာနခွဲ
စစ်ကိုင်းတိုင်းဒေသကြီး စားသုံးသူရေးရာဦးစီးဌာနအနေဖြင့် စီမံခန့်ခွဲမှုဆိုင်ရာကိစ္စရပ်များ၊ နည်းပညာပိုင်းဆိုင်ရာကိစ္စရပ်များနှင့် ဌာန၏ လုပ်ငန်းဆောင်ရွက်မှု အခြေအနေများနှင့်ပတ်သက်သည့် လုပ်ငန်းညှိနှိုင်းအစည်းအဝေးများကို Zoom Application အသုံးပြု၍ Virtual Meeting ဖြင့် အပတ်စဉ် ကျင်းပပြုလုပ်လျက်ရှိရာ တိုင်းဒေသကြီးဦးစီးမှူးရုံးမှ တာဝန်ရှိသူများ၊ ခရိုင်ဦးစီးမှူးရုံးများမှ တာဝန်ရှိသူများ တက်ရောက်ကြပြီး ဆောင်ရွက်ပြီးလုပ်ငန်းများ၊ ဆောင်ရွက်ဆဲလုပ်ငန်းများနှင့်အခက်အခဲများ၊ ဆက်လက်ဆောင်ရွက်မည့်လုပ်ငန်းများနှင့် လိုအပ်မည့် ပံ့ပိုးမှုတို့ကို ဆွေးနွေးကြပါသည်။ အဆိုပါ ဆွေးနွေးတင်ပြမှုများအပေါ် တိုင်းဒေသကြီးဦးစီးမှူးမှ လိုအပ်သည်များနှင့် ရှေ့ဆက်ဆောင်ရွက်ရမည့်လုပ်ငန်းစဉ်များကို လမ်းညွှန်မှုပြုလုပ်ပေးခဲ့ကြောင်းသတင်းရရှိပါသည်။
စစ်ကိုင်းတိုင်းဒေသကြီး
စားသုံးသူရေးရာဦးစီးဌာန
၁၀.၁၂.၂၀၂၀ ရက်နေ့တွင် စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်၊ ဇီးကုန်းမြို့၊ မြို့နယ်အထွေထွေအုပ်ချုပ်ရေးဦးစီးဌာန အစည်းအဝေးခန်းမတွင် ကန့်ဘလူမြို့နယ် ဆန်စပါးဒေသဆိုင်ရာကော်မတီ အဖွဲ့အမှုဆောင်ရွေးချယ်ခြင်း အခမ်းအနားကို ကျန်းမာရေးနှင့်အားကာစားဝန်ကြီးဌာနမှ ထုတ်ပြန်ထားသည့် ကျန်းမာရေးဆိုင်ရာ စံသတ်မှတ်ချက်များနှင့်အညီ ကျင်းပပြုလုပ်ခဲ့ပါသည်။ မြန်မာနိုင်ငံဆန်စပါးအသင်းချုပ်မှ မြို့နယ်အထိ ချိတ်ဆက် ဆောင်ရွက်နိုင်ရန်အတွက် မြို့နယ်အတွင်းရှိ ဆန်စက်လုပ်ငန်းရှင်များ၊ ဆန်စပါးကုန်သည်များ၊ တောင်သူများ စုပေါင်းပြီး ဆန်စပါးမြို့နယ်အမှုဆောင် ရွေးချယ်ခဲ့ပါသည်။
အခမ်းအနားကို မွန်းလွှဲ(၂)နာရီတွင်စတင်ခဲ့ပြီး စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး ဦးခင်မောင်လှိုင်မှ onlineဖြင့် တက်ရောက်၍ အဖွင့်အမှာစကား ပြောကြားခဲ့ပြီး စစ်ကိုင်းတိုင်းဒေသကြီး ဆန်စက်လုပ်ငန်းရှင်များအသင်း ဥက္ကဋ္ဌ ဦးကျော်သူသောင်းစိန်မှ အလုပ်အမှုဆောင်ဖွဲ့စည်းရခြင်း၏ ရည်ရွယ်ချက်နှင့်ပတ်သက်၍ ဆွေးနွေးပြောကြားခဲ့ပါသည်။ ထိုနောက် စားသုံးသူရေးရာဦးစီးဌာန၊ ကန့်ဘလူခရိုင်ဦးစီးမှူး ဦးဇော်မင်းသိန်းမှ မြန်မာနိုင်ငံ ဆန်စပါးအသင်းချုပ်အနေဖြင့် နိုင်ငံတော်အကြီးအကဲ၏ လမ်းညွှန်ချက်နှင့်အညီ အောက်ခြေအဆင့်တွင် လက်တွေ့ကျကျ ပူးပေါင်းဆောင်ရွက်နိုင်ရေးအတွက် တက်ရောက်လာသည့် စက်ပိုင်၊ ကုန်သည်၊ တောင်သူများမှ မိမိတို့ ကန့်ဘလူမြို့နယ် ဆန်စပါး ဒေသဆိုင်ရာကော်မတီ အလုပ်အမှုဆောင်(၁၀)ဦးအား ရွေးချယ်ခဲ့ပြီး ဆန်စပါး ထုတ်လုပ်ရောင်းဝယ်မှုတွင် အဓိကပါဝင်သည့် တောင်သူ၊ စက်ပိုင်၊ ကုန်သည်များ ညီညွတ်စွာပူးပေါင်းဆောင်ရွက်၍ လယ်ယာ ကဏ္ဍဖွံ့ဖြိုး တိုးတက်စေရန် ဆောင်ရွက်ရခြင်းဖြစ်ကြောင်း ရှင်းလင်းဆွေးနွေးပါသည်။ အခမ်းအနားသို့ စုစုပေါင်း(၂၄)ဦး တက်ရောက်ကြောင်း သိရပါသည်။
စစ်ကိုင်းတိုင်းဒေသကြီး
စားသုံးသူရေးရာဦးစီးဌာန
၃.၁၂.၂၀၂၀ ရက်နေ့တွင် စစ်ကိုင်းတိုင်းဒေသကြီး၊ ရွှေဘိုခရိုင်၊ ဝက်လက်မြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံရုံးတွင် တိုင်းဒေသကြီး(၁) လွှတ်တော် ကိုယ်စားလှယ် ဦးမောင်မောင်ဝင်း၊ ခရိုင်စားသုံးသူရေးရာဦးစီးဌာနမှ ခရိုင်ဦးစီးမှူး ဦးကျော်ငွေ၊ (ဒု-ခရိုင်ဦးစီးမှူး) ဒေါ်နှင်းနှင်းခိုင်၊ ဝက်လက်မြို့နယ် စားသုံးသူရေးရာဦးစီးဌာနတာဝန်ခံ ဦးမျိုးအောင်၊ မြို့နယ်စိုက်ပျိုးရေးဦးစီးဌာနမှ ဒု-ဦးစီးမှူး ဒေါ်ဖြူဖြူလွင်တို့နှင့် မြို့နယ်ဆန်စက်လုပ်ငန်းရှင်များအသင်း၊ ဥက္ကဌဦးကျော်သူသောင်းစိန်နှင့်ဆန်စက်လုပ်ငန်းရှင်များ၊ ဆန်စပါးကုန်သည်များ၊ စိုက်ပျိုးထုတ်လုပ်သူတောင်သူများပါဝင်သည့် ဆန်စပါးဒေသဆိုင်ရာကော်မတီ ဖွဲ့စည်းနိုင်ရေးအတွက် မြို့နယ်အလုပ်အမှုဆောင်အဖွဲ့ ဖွဲ့စည်းရေး ညှိနှိုင်းဆွေးနွေးခဲ့ပါသည်။
ဝက်လက်မြို့နယ်၊ တိုင်းဒေသကြီးလွှတ်တော်ကိုယ်စားလှယ်ဦးမောင်မောင်ဝင်းမှ အဖွဲ့ဖွဲ့စည်း ဆောင်ရွက်ရခြင်း အကြောင်းအရင်းများအား ရှင်းလင်းခဲ့ပြီး ခရိုင်ဦးစီးမှူး ဦးကျော်ငွေမှ အလုပ်အမှုဆောင် ဖွဲ့စည်းရမည့် စည်းမျဉ်းစည်းကမ်းနှင့်နည်းလမ်းများကို ရှင်းလင်းခဲ့ပါသည်။ ထို့နောက် မြို့နယ်ဆန်စက်လုပ်ငန်းရှင်အသင်းဥက္ကဌ ဦးကျော်သူသောင်းစိန်က အသင်းအဖွဲ့အစည်းများသည် ကဏ္ဍတစ်ရပ်ဖွံ့ဖြိုးတိုးတက်ရေးအတွက် အဓိကကျပြီး မြို့နယ်ဖွံ့ဖြိုး တိုးတက်မှုအတွက် အရေးကြီးပါကြောင်း ဆွေးနွေးခဲ့ပါသည်။
တက်ရောက်လာသူများထဲမှ ကဏ္ဍအလိုက်အစုအဖွဲ့ဖွဲ့ စည်းရေးညှိနှိုင်း ဆောင်ရွက်ရာ ဆန်စက်လုပ်ငန်းရှင်များအစုအဖွဲ့၊ ဆန်စပါးကုန်သည်များ အစုအဖွဲ့၊ တောင်သူများ အစုအဖွဲ့နှင့် အခြားအသင်းဝင်နှင့် ပညာရှင်များ ပါဝင်သော အစုအဖွဲ့၊ စုစုပေါင်း အစုအဖွဲ့(၄)ဖွဲ့၊ လူဦးရေ (၄၀)ဦးဖြင့် ဖွဲ့စည်းကြပြီး အဆိုပါအစုအဖွဲ့တစ်ခုချင်းဆီမှ ဆန်စက်လုပ်ငန်းရှင်များ (၃)ဦး၊ ဆန်စပါးကုန်သည်များအစုအဖွဲ့ (၃)ဦး၊ တောင်သူများအစုအဖွဲ့ (၃)ဦး၊ ဆန်စပါးပညာရှင် အစုအဖွဲ့ မှ (၁)ဦး ၊ စုစုပေါင်း (၁၀)ဦးဖြင့် ဝက်လက်မြို့နယ် အလုပ်အမှုဆောင်အဖွဲ့အား ဖွဲ့စည်းဆောင်ရွက်ခဲ့ကြောင်း သတင်းရရှိပါသည်။
စစ်ကိုင်းတိုင်းဒေသကြီး
စားသုံးသူရေးရာဦးစီးဌာန
၂.၁၂.၂၀၂၀ ရက်နေ့တွင် ဒု-ခရိုင်ဦးစီးမှူး ဒေါ်ခိုင်မို့မို့၊ ဆားလင်းကြီးမြို့နယ်တာဝန်ခံ ဒေါ်မိုးမိုးမြင့်နှင့် ယင်းမာပင်မြို့နယ်တာဝန်ခံ ဒေါ်သီတာခိုင်တို့သည် ယင်းမာပင်မြို့နယ်၊ ပြန်လှည့် ကျေးရွာအတွင်းရှိ ကုန်မျိုးစုံဆိုင်(၅)ဆိုင်တို့အား သက်ဆိုင်ရာမိတ်ဖက်ဌာနများဖြင့် ပူးပေါင်း၍ ထုတ်ကုန်လုံခြုံစိတ်ချရမှုရှိစေရေးအတွက် သက်တမ်းလွန်ကုန်ပစ္စည်းများ ၊ အစားအသောက်နှင့် ဆေးဝါးကွပ်ကဲရေးဦးစီးဌာနမှ စားသုံးရန်မသင့် ကြော်ငြာထားသော စားသောက်ကုန်ပစ္စည်းများ ရောင်းချခြင်း ရှိ/မရှိကွင်း ဆင်းစစ်ဆေးခဲ့ရာ ရောင်းချလျှက်ရှိသောကုန်စည်များတွင် ကုန်အညွှန်းအမှတ်အသားများပြည့်စုံမှုမရှိကြောင်း စိစစ်တွေ့ရှိရပါသည်။
ထို့နောက် လုပ်ငန်းရှင်များအား ဈေးကွက်အတွင်းရောင်းချနေသော ကုန်စည်များကို ကုန်ပစ္စည်းအမျိုးအစားအလိုက် ဖော်ပြပါရှိရမည့် ကုန်အညွှန်းအမှတ်အသား ပြည့်စုံစွာ ဖော်ပြခြင်း မရှိသော ကုန်ပစ္စည်းများကို ရောင်းချခြင်းမပြုရန်နှင့် COVID-19 ကာလအတွင်း ကျန်းမာရေးအထောက်အကူပြုပစ္စည်းများဖြစ်သော Hand gel ၊ Mask ၊ ဆေးဝါးများ ၊ စားသုံးကုန်ပစ္စည်းများကို ဈေးနှုန်းမြှင့်တင်ရောင်းချခြင်း၊ ဈေးနှုန်းမြှင့်တင်ဖြန့်ဖြူခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းများ မပြုလုပ်ရန်၊ မရောင်းချရန် ရှင်းလင်းဆွေးနွေးခဲ့ပါသည်။
အလားတူ ပ/သီးကုန်းကျေးရွာအတွင်းရှိ ကုန်မျိုးစုံဆိုင်များနှင့် ကုန်စုံဆိုင်များတွက်လည်း မိတ်ဖက်ဌာနများနှင့်အတူ ဈေးကွက်စောင့်ကြည့်ကွင်းဆင်းစစ်ဆေးဆောင်ရွက်ခြင်းနှင့် စစ်ဆေးခဲ့ကြောင်း သတင်းရရှိပါသည်။
စစ်ကိုင်းတိုင်းဒေသကြီး
စားသုံးသူရေးရာဦးစီးဌာန
၈.၁၂.၂၀၂၀ ရက်နေ့တွင် စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ တာဝန်ရှိသူများသည် စစ်ကိုင်းမြို့နယ်၊ စိန်ကုန်းတိုက်နယ်၊ သာစည်ရပ်ကွက်ရှိ New Wave Guitar ဂစ်တာလုပ်ငန်းရှင် ဦးမြင့်ထွန်းနှင့် တွေ့ဆုံ၍ စာသုံးသူအသိပညာပေးဆွေးနွေးခြင်းအား ဆောင်ရွက်ခဲ့ပါသည်။ ဆွေးနွေးပြောကြားရာတွင် ဌာနမှ တာဝန်ရှိသူတစ်ဦး စားသုံးသူကာကွယ်ရေးဥပဒေအား ၂၀၁၉ခုနှစ်၊ မတ်လ(၁၅)ရက်နေ့တွင် ထုတ်ပြန်ခဲ့ပါကြောင်း၊ စားသုံးသူများ၏ အခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏ တာဝန်များအကြောင်း၊ ကုန်အညွှန်းအမှတ်အသားတွင် ဖော်ပြပါရှိရမည့် အချက်အလက်များအကြောင်း၊ ပြစ်မှုပြစ်ဒဏ် များအကြောင်း၊ စားသုံးသူများအနေဖြင့် နစ်နာဆုံးရှုံးမှုရှိပါက CICC ရုံးများတွင် တိုင်ကြားနိုင်ပါကြောင်း၊ ကုန်ပစ္စည်းများ ထုတ်လုပ်တင်ပို့ရောင်းချရာတွင်လည်း ဘေးအန္တရာယ်ကင်းရှင်းပြီး လုံခြုံစိတ်ချရမှုရှိစေရေးအတွက် အထူးဂရုပြုဆောင်ရွက်စေလိုပါကြောင်း ဆွေးနွေးပြောကြားခဲ့ပါသည်။
ဆက်လက်၍ New Wave Guitar ဂစ်တာလုပ်ငန်းရှင် ဦးမြင့်ထွန်းက ဂစ်တာလုပ်ငန်းကို (၁၉၈၅)ခုနှစ်တွင် စတင်လုပ်ကိုင်ခဲ့ပါကြောင်း၊ ရင်းနှီးမတည်ငွေ သိန်း (၁၀ဝ၀)ရှိပြီး ထုတ်လုပ်မှုမှာ တစ်လလျှင် ဂီတာ (၁၅၀)လုံး ထွက်ရှိပါကြောင်း၊ ဂစ်တာဈေးနှုန်းများမှာ သုံးသောင်းမှ လေးသိန်းထိ ရောင်းချရပါကြောင်း၊ အသုံးပြုသည့် ကုန်ကြမ်းများမှာ သစ်သား၊ အထပ်သား၊ ကီး၊ ကြိုး၊ ဘားနှင့် ဆေးပစ္စည်းတို့ဖြစ်ပါကြောင်း၊ လျှပ်စစ်စွမ်းအားဖြင့် သုံးစွဲပြီး မော်တော်အင်အားမှာ 3 HP ပါဝါမီတာ ဖြစ်ပြီး လုပ်သားအင်အား (၁၅)ဦး သုံးစွဲရပါကြောင်း၊ လုပ်အားခအနေဖြင့် (ကျား) တစ်ဦးလျှင် ၁၀ဝ၀ဝိ/-နှုန်းဖြင့် (၅)ဦးပေးချေရပါကြောင်းနှင့် အခြားအလုပ်သမားများကို (၈၀ဝ၀ /- - ၉၀ဝ၀ /-) နှုန်းပေးချေရပါကြောင်း၊ ဂစ်တာလုပ်ငန်းကို ဖြန့်ဖြူးရောင်းချရာတွင် ကချင်၊ ရှမ်း၊ ကရင်၊ ရန်ကုန်၊ မန္တလေးဒေသများသို့ တင်ပို့ရောင်းချရပါကြောင်း၊ ပြည်တွင်းသာမက ပြည်ပနိုင်ငံများနှင့်လည်း ချိတ်ဆက်ထားပြီးဖြစ်ပါကြောင်း ပြန်လည်ဆွေးနွေးခဲ့သည်ဟု သတင်းရရှိခဲ့ပါသည်။
စစ်ကိုင်းတိုင်းဒေသကြီး
စားသုံးသူရေးရာဦးစီးဌာန
၅.၁၂.၂၀၂၀ ရက်နေ့တွင် စစ်ကိုင်းခရိုင်၊ စားသုံးသူရေးရာဦးစီးဌာနအနေဖြင့် ကျောက်စိမ်းအချောထည်လုပ်ငန်းရှင်များအသင်းခန်းမ၌ ကျင်းပပြုလုပ်သော ပြည်တွင်းကုန်သွယ်မှုလုပ်ငန်းများ၊ စားသုံးသူကာကွယ်ရေးလုပ်ငန်းများအကြောင်းနှင့် စီးပွားရေးလုပ်ငန်းရှင်များ လိုက်နာရမည့်အကြောင်းများနှင့်ပတ်သက်သည့် ဆွေးနွေးပွဲကို ကျင်းပပြုလုပ်ခဲ့ရာ စားသုံးသူရေးရာဦးစီးဌာန၊ ခရိုင်ဦးစီးမှူးရုံးရှိ ဝန်ထမ်းများ၊ ကျောက်စိမ်း အချောထည် လုပ်ငန်းရှင်များအသင်းမှ လုပ်ငန်းရှင်များ၊ စုစုပေါင်း (၇) ဦး တက်ရောက်ဆွေးနွေး ခဲ့ပါသည်။
အခမ်းအနားတွင် စားသုံးသူရေးရာဦးစီးဌာနမှ တာဝန်ရှိသူတစ်ဦးက မိမိတို့ဌာနအနေဖြင့် စားသုံးသူအကာအကွယ်ပေးရေးလုပ်ငန်းများအပြင် ပြည်တွင်းကုန်သွယ်မှုမြှင့်တင်ရေးလုပ်ငန်းများ၊ ပြည်ပပို့ကုန်မြှင့်တင်ရေးလုပ်ငန်းများလည်း ဆောင်ရွက်ရကြောင်း၊ စားသုံးသူအကာအကွယ်ပေးရေး အတွက် စီးပွားရေးလုပ်ငန်းရှင်များကို စားသုံးသူကာကွယ်ရေးဥပဒေနှင့်အညီ ထိန်းချုပ် ဆောင်ရွက်ရကြောင်းပြောကြားခဲ့ပါသည်။ ဆက်လက်၍ ကျောက်စိမ်းအချော ထည်လုပ်ငန်းရှင်များကို စားသုံးသူကာကွယ်ရေးဥပဒေ အခန်း(၁၀)ပါ စီးပွားရေးလုပ်ငန်းရှင်များ လိုက်နာရမည့်အချက်များ၊ အခန်း (၁၁) ပါ ကုန်စည်နှင့်စပ်လျဉ်း၍ အာမခံချက်ပေးသည့်အချက်များ၊ စားသုံးသူကာကွယ်ရေးဥပဒေ အခန်း (၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ လိုက်နာရမည့်အချက်များအား ရှင်းလင်းဆွေးနွေးခဲ့ကြောင်း သတင်းရရှိပါသည်။
စစ်ကိုင်းတိုင်းဒေသကြီး
စားသုံးသူရေးရာဦးစီးဌာန
စစ်ကိုင်းခရိုင် စိုက်ပျိုးရေးဦးစီးဌာန အစည်းအဝေးခန်းမတွင် ရာသီဥတုနှင့် လိုက်လျောညီထွေ ဖြစ်စေမည့် စိုက်ပျိုးရေးလုပ်ငန်းဆိုင်ရာ တန်ဖိုးကွင်းဆက်စီမံကိန်း (CFAVC) စီမံကိန်းတွင် ပါဝင်သည့် ဦးစီးဌာနများမှ (RPIU, TPIU) အဖွဲ့ဝင်များအားလုံးနှင့် (၇.၁၂.၂၀၂၀)ရက်နေ့မှ(၁၄.၁၂.၂၀၂၀)ရက်နေ့ထိ အလုပ်ရုံဆွေးနွေးပွဲ ကျင်းပပြုလုပ်မည်ဖြစ်ရာ (၇.၁၂.၂၀၂၀)ရက်နေ့နှင့် (၈.၁၂.၂၀၂၀)ရက်နေ့တို့တွင် စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးရုံးမှ ဝန်ထမ်း (၁)ဦးနှင့် စစ်ကိုင်းမြို့နယ် တာဝန်ခံတို့မှ တက်ရောက်ခဲ့ကြောင်း သတင်းရရှိပါသည်။
စစ်ကိုင်းတိုင်းဒေသကြီး
စားသုံးသူရေးရာဦးစီးဌာန
စစ်ကိုင်းတိုင်းဒေသကြီး၊ ကသာခရိုင်၊ ကသာမြို့ပေါ်တွင် ရောင်းချနေသော ကုန်စုံဆိုင်များ နှင့် အလှကုန်ဆိုင်များတွင် တားမြစ်ကုန်စည်များ ရောင်းချခြင်းရှိ/မရှိ၊ အရေးကြီးကုန်စည်များအား ဈေးနှုန်းမြှင့်တင်ရောင်းချမှု ရှိ/မရှိနှင့် သက်တမ်းလွန်ပစ္စည်းများ ရောင်းချခြင်း ရှိ/မရှိ စစ်ဆေးခြင်း ကို ၂၀၂၀ ပြည့်နှစ် ဒီဇင်ဘာလ (၈)ရက်နေ့တွင် ကသာခရိုင် စားသုံးသူရေးရာဦးစီးဌာနမှ ဝန်ထမ်းများ၊ မြို့နယ်အထွေထွေအုပ်ချုပ်ရေးဦးစီးဌာန၊ စည်ပင်သာယာရေးကော်မတီ၊ မြန်မာနိုင်ငံရဲတပ်ဖွဲ့၊ ခရိုင်ကျန်းမာရေးဦးစီးဌာန၊ ခရိုင်အစားအသောက်နှင့် ဆေးဝါးကွပ်ကဲရေးဦးစီးဌာနတို့ဖြင့် ပူးပေါင်း၍ ဈေးဆိုင် (၇)ဆိုင်အား စစ်ဆေးခဲ့ပါသည်။
ထိုသို့စစ်ဆေးရာတွင် ခရိုင်စားသုံးသူရေးရာဦးစီးဌာနမှ ဦးသန်းပိုနှင့် တာဝန်ရှိသူများသည် သက်တမ်းလွန် အစားအသောက်များ၊ တားမြစ်ကုန်ပစ္စည်းများ၊ ကုန်စည်များတွင် ကုန်အညွှန်းအမှတ်အသား(မြန်မာစာဖြင့်) ပြည့်စုံစွာ ဖော်ပြမှုရှိ/မရှိ၊ ကိုဗစ်-၁၉ရောဂါကာလ ကျန်းမာရေး အထောက်အကူပြုဆေးဝါးများနှင့် ကုန်စည်များ ဈေးနှုန်းမြှင့်တင်ရောင်းချခြင်းရှိ/မရှိ တို့ကို လိုက်လံစစ်ဆေးခဲ့ကြပြီး လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။
စားသုံးသူရေးရာဦးစီးဌာန
ကသာခရိုင်
