သတင်းနှင့် လှုပ်ရှားမှုများ

      စားသုံးသူပြည်သူများ စားသုံးဆီဝယ်ယူစားသုံးရာတွင် ဘေးအန္တရာယ် ကင်းရှင်းသော စားသုံးဆီများကို သင့်တင့်သောဈေးနှုန်းဖြင့်  ဝယ်ယူစားသုံးနိုင်စေရန်နှင့် ပြည်တွင်းလိုအပ်ချက်များကိုဖြည့်ဆည်းပေးနိုင်ရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီက ဆောင်ရွက်ပေးလျက်ရှိ ကြောင်းသိရပါသည်။

      ပြည်တွင်းလိုအပ်ချက်ကိုဖြည့်ဆည်းပေးနိုင်ရေးစားအုန်းဆီကို ပြည်ပမှဝယ်ယူတင်သွင်း ရာတွင် စားအုန်းဆီတင်ပို့သည့်နိုင်ငံများ၏ စျေးနှုန်းအတက်အကျပေါ်မူတည်၍ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများဖြစ်ပေါ်စေရေးကို ထိန်းကျောင်းဆောင်ရွက်လျက်ရှိသည်။

   ပြည်ပမှစားအုန်းဆီထုတ်လုပ်တင်ပို့သည့်နိုင်ငံများတွင် ဈေးကွက်နှင့် ဈေးနှုန်းဖြစ်ပေါ် မှုများအရ ၂၀၂၅ခုနှစ်၊အောက်တိုဘာလ ၂၀ ရက်နေ့မှ ၂၃ ရက်နေ့အထိ ရန်ကုန်အထိုင်ဈေး အခြေခံလက်ကားရည်ညွှန်းဈေးနှုန်းမှာစားအုန်းဆီတစ်ပိဿာလျှင် ငွေကျပ်၆,၅၈၅ ဖြစ် ကြောင်း စားသုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေး ကော်မတီက အသိပေးထုတ်ပြန်ကြေညာထားကြောင်း သိရှိရပါ​သည်။    

     ပြည်တွင်းဈေးကွက်အတွင်း အဆိုပါထုတ်ပြန်ကြေညာထားသည့် စျေးနှုန်းထက်   ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းအပါအဝင် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည်ကြောင်း သိရှိရသည်။

    စားအုန်းဆီ အခြေခံလက်ကားရည်ညွှန်းဈေးနှုန်းကို အပတ်စဉ်တနင်္လာနေ့တိုင်းထုတ် ပြန်ကြေညာလျက်ရှိပြီး စားသုံးသူပြည်သူများအနေဖြင့် စားသုံးသူရေးရာဦးစီးဌာန၏ Website: www.doca.gov.mm၊  Facebook Page  နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တို့တွင် ဝင်ရောက် ကြည့်ရှုလေ့လာနိုင်ကြောင်း သိရှိရပါသည်။

    ဧရာဝတီတိုင်းဒေသကြီး၊ မအူပင်မြို့၊ လေလဲကျေးရာ ရေကျော်အခြေခံပညာ အလယ်တန်း ကျောင်းဝင်းအတွင်း ရောင်းချနေသော ကျောင်းမုန့်ဈေးတန်းအား အစားအသောက် လုံခြုံစိတ်ချ စေရေး အတွက် ၁၉-၉-၂၀၂၅ နေ့လည် ၁၂နာရီအချိန်တွင် ဌာနဆိုင်ရာတာဝန်ရှိသူများက ကြည့်ရှုစစ်ဆေးခဲ့ကြောင်းသိရသည်။

    ထို့နောက် စားသုံးသူရေးရာဦးစီးဌာန၊ အစားအသောက်နှင့်ဆေးဝါးကြီးကြပ်ကွပ်ကဲရေး ကော်မတီအဖွဲ့ဝင်များ၊ ကျန်းမာရေးဦးစီးဌာန ကျောင်းကျန်းမာရေးကော်မတီဝင်များ ပူးပေါင်း ၍  ကျောင်းမုန့်ဈေးတန်းရှိ အစားအသောက်များကို ယင်မနားအောင် ဖုံးအုပ်ထားခြင်းရှိ/မရှိနှင့် သန့်ရှင်းသပ်ရပ်ခြင်းရှိ/မရှိတို့ကို ကြည့်ရှုစစ်ဆေးပြီး ဈေးရောင်းချနေသူများအား အစားအသောက် ဘေးအန္တရာယ်ကင်းရေး၊ ကျန်းမာရေးထိခိုက်စေသည့် ဆိုးဆေးနှင့်တာရှည်ခံဓာတုဆေးများ၊ အန္တရာယ် ကင်းသော အစားအစာရရှိရေးအတွက် အဓိကဆောင်ရွက်ရမည့် အချက်(၅) ချက်ပါဝင် သည့် လက်ကမ်း စာစောင်များကိုဖြန့်ဝေပေးခဲ့သည်။

DOCA(ဧရာဝတီ)

    ကချင်ပြည်နယ်၊ မြစ်ကြီးနားခရိုင်အတွင်း ဆက်သွယ်ရေးဝန်ဆောင်မှုပေးသည့်လုပ်ငန်းများ အနေဖြင့် လိုအပ်သောသတင်းအချက်အလက် ပြည့်စုံမှန်ကန်စွာနှင့် ရှင်းလင်းစွာ ကြိုတင်အသိပေး ဆောင်ရွက်ခြင်းဖြင့် စားသုံးသူအခွင့်အရေး ပြည့်ဝစွာရရှိစေရန်ရည်ရွယ်၍ ၂၃.၉.၂၀၂၅ ရက်နေ့တွင် စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ ‌‌ဦးဇေယျာအောင်(ခရိုင်ဦးစီးမှူး)ဦးဆောင်၍ အထွေထွေအုပ်ချုပ်ရေးဦးစီးဌာန၊မြန်မာ့ဆက်သွယ်ရေးလုပ်ငန်း၊စည်ပင်သာယာရေးအဖွဲ့များပူးပေါင်းကာ မြစ်ကြီးနားမြို့၊ဧရာရပ်ကွက်နှင့်မင်းရပ်ရပ်ကွက်ရှိဆက်သွယ်ရေးဝန်ဆောင်မှုလုပ်ငန်း(၂)ခုသို့ကွင်းဆင်း စစ်ဆေးပြီး လုပ်ငန်းရှင်များအား အသိပညာပေးဆောင်ရွက်ခဲ့ပါသည်။

    ထိုသို့ ကွင်းဆင်းစစ်ဆေးဆောင်ရွက်ခဲ့ရာတွင် ဆက်သွယ်ရေးဝန်ဆောင်မှု(အင်တာနက် ဝန်ဆောင်မှုနှင့်မိုဘိုင်းအော်ပရေတာ)လုပ်ငန်းများအနေဖြင့် လက်ကမ်းစာဆောင်များတွင် ဝန်ဆောင်ခ နှုန်းထားများ၊ ဆက်သွယ်ရမည့်ဖုန်းအမှတ်များဖော်ပြထားပြီး ဆက်သွယ်ရေးညွှန်ကြားမှုဦးစီးဌာန၏  လိုင်စင်ခွင့်ပြုချက်များဖြင့် လုပ်ငန်းဆောင်ရွက်လျက်ရှိကြောင်း စစ်ဆေးတွေ့ရှိရပါသည်။

    ဆက်သွယ်ရေးဝန်ဆောင်မှု (အင်တာနက်ဝန်ဆောင်မှနှင့်မိုဘိုင်းအော်ပရေတာ)ပေးသည့် လုပ်ငန်းရှင်များအားစားသုံးသူကာကွယ်ရေးဥပ‌ဒေပါ စီးပွား‌ရေးလုပ်ငန်းရှင်၏ အဓိပ္ပာယ်နှင့်တာဝန်များ၊ ဝန်ဆောင်မှုနှင့်စပ်လျဉ်း၍ အာမခံချက်ပေးရမည့်အချက်များ၊ ဝန်ဆောင်မှုလုပ်ငန်းများနှင့်စပ်လျဉ်း၍ စားသုံးသူကတောင်းဆိုနိုင်သည့်အခွင့်အရေးများ၊ ကုန်စည် သို့မဟုတ် ဝန်ဆောင်မှုအပေါ်တာဝန်ရှိမှု အခြေအနေများ၊ စားသုံးသူကာကွယ်ရေးဥပဒေပါ ပြစ်မှုနှင့်ပြစ်ဒဏ်များအား အသိပညာပေး ဆွေးနွေးခဲ့ပြီး ဆက်သွယ်ရေးညွှန်ကြားမှုဦးစီးဌာနနှင့် ဆက်စပ်ဌာနများ၏ အမိန့်နှင့်ညွှန်ကြားချက်များ အားလည်းလိုက်နာဆောင်ရွက်သွားရန် အသိပညာပေးဆွေးနွေးခဲ့ပါသည်။  

DOCA(ကချင်)

   မအူပင် ခရိုင်၊ ဓနုဖြူမြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံရုံးမှ ဦးခိုင်လွမ်းမိုးနှင့် ဝန်ထမ်းတို့သည်  (၁၈-၉-၂၀၂၅) ရက်နေ့၊ နံနက် (၁၀:၀၀) နာရီအချိန်တွင် မြို့နယ်အထွေထွေ အုပ်ချုပ်ရေးဦးစီးဌာန ၌ ဆန်/စပါး သိုလှောင်ရုံပိုင်ရှင်များနှင့် တွေ့ဆုံဆွေးနွေးခဲ့ကြပါသည်။

       ဓနုဖြူမြို့နယ် ဆန်စက်အသင်းဝင်များကို ဦးခိုင်လွမ်းမိုးက ရှင်းလင်းဆွေးနွေးရာ ဥပဒေအရ သိုလှောင်ရုံများတွင် ဆန့်ဝင်အင်အားထက်ပိုသိုလှောင်ပါက အရေးယူမည်ဟူသော ကောလဟာလ ထွက်ပေါ်နေသည်မှာ မဟုတ်မှန်ကြောင်း၊ စပါးတင်း ၂၅၀၀ နှင့် အထက်၊ ဆန်အိတ် ၅၀၀ နှင့် အထက် ဆံ့ဝင်သည့် သိုလှောင်ရုံများသာ တရားဝင်မှတ်ပုံတင် ရမည်ဖြစ်ကြောင်း၊ မှတ်ပုံတင်ထားပြီးသော သိုရုံများတွင် တစ်လတစ်ခါ ရ/ထုတ်/လက်ကျန် စာရင်းများ တင်ပေးကြရန်နှင့် လိုင်စင်ရပြီး သိုလှောင်ရုံများ အနေဖြင့် သက်တမ်းတိုးစနစ်ဖြင့် ဆက်လက်မှတ်ပုံတင်ထားရှိနိုင်ကြောင်း တွေ့ဆုံ ဆွေးနွေးခဲ့မှု လုပ်ငန်းရှင်(၁၆)ဦး တက်ရောက်ခဲ့ကြောင်း သတင်းရရှိပါသည်။

DOCA(ဧရာဝတီ)

ဒေသတွင်း ဆီကြိတ်ခွဲ ထုတ်လုပ်သည့် လုပ်ငန်းစုစုပေါင်း ၉ စက်သာရှိ၍ ပြည်တွင်း ဆီစက်များ လည်ပတ်ခွင့်၍ ဒေသတွင်း စားသုံးမှု ဖူလုံစေရေး  ပြည်တွင်းစားသုံးမှုကို ပြည်မီစွာ ဆောင်ရွက်နိုင်ရေး ကုန်ကြမ်းရရှိမှု လွယ်ကူစွာဖြင့် ဒေသတွင် ဆီစက်လုပ်ငန်းများ ပုံမှန်လည်ပတ် ဆောင်ရွက်ရန် လိုအပ်ကြောင်း ဆီစက်လုပ်ငန်းရှင်များမှ မျော်လင့်လျက်ရှိကြောင်း သိရသည်။

        မအူပင်ခရိုင်အနေဖြင့် ဆီစက်လုပ်ငန်းဖွံဖြိုးတိုးတက်ရေးကို လိုလာပါကြောင်း၊ ဆီစက် လုပ်ငန်းများဖွံ့ဖြိုးတိုးတက်ရန် ကုန်ကြမ်းရရှိမှု လွယ်ကူမှ အောင်မြင်မည်ဖြစ်ကြောင်းနှင့်၊ ဒေသ တွင်း ဆီထွက်သီးနှံ စိုက်ပျိုးထွက်ရှိမှု ကောင်မွန်ရေးနှင့် တောင်သူအကျိုးအမြတ် ရရှိရေး သည်လည်း အဓိကလုပ်ငန်း တစ်ခုဖြစ်ကြောင်း၊ ဒေသဆီထွက်သီးနှံ အထွက်နှုန်းကောင်းမွန်ပါက ဒေသတွင် ဆီကြိတ်ခွဲသော လုပ်ငန်းများလည်း ပိုမိုကြိတ်ခွဲရပြီး လုပ်ငန်းဖွံ့ဖြိုးမည်ဖြစ်ကြာင်း၊ အခြား ဒေသမှ ကုန်ကြမ်းများဖြင့်သာ ကြိတ်ခွဲနေရပြီး ဒေသတွင်းဖူလုံမှု နည်းပါးကြောင်း၊ ဆီစက် လုပ်ငန်းတွင် တစ်ရက်လျှင် ကုန်ကြမ်းမြေပဲ ပိဿာ ၄၀ ခန့် အသုံး ပြုပြီး ကုန်ချောမြေပဲဆီ ၁၆ ပိဿာခန့် ထွက်ရှိ ကြောင်း၊ တစ်ဆုံလျှင် တစ်နာရီကျော်ကြာ ကြိတ်ခွဲရကြောင်း၊ လုပ်ငန်း လိုင်စင်နှင့် မှတ်ပုံတင်များလည်း စနစ်တကျပြုလုပ်ရကြောင်း သိရသည်။ ပြည်တွင်းမှထွက်ရှိသည့် ဆီထွက်သီးနှံများကို ပိုမိုသုံးစွဲလာခြင်းဖြင့် ဈေးနှုန်း သက်သာခြင်း၊     ကျန်းမာရေးနှင့်ညီညွတ်ခြင်း များ  ရရှိစေမည် ဖြစ်ကြောင်း လုပ်ငန်းရှင်များက မျှော်လင့်ကြသည်။ 

DOCA(ဧရာဝတီ)