သတင်းနှင့် လှုပ်ရှားမှုများ

   ကျောက်ဆည်ခရိုင်၊ စားသုံးသူရေးရာဦးစီးဌာနမှ ဦးဇော်မင်းလတ် (စစ်ဆေးရေးအရာရှိ)သည် အောက်တိုဘာလ (၁၆)ရက်နေ့၌ Online မှတစ်ဆင့် မှတ်ပုံတင်လျှောက်ထားသည့် စဉ့်ကိုင်မြို့ ၊ မြောက်မြေရပ်ရှိ Nature သစ်သီးခြောက်လုပ်ငန်းအား ကွင်းဆင်းစစ်ဆေးခဲ့ပါသည် ။ စစ်ဆေးရာတွင် Online မှတစ်ဆင့်လျှောက်ထားသည့် စာရွက်စာတမ်းများဖြစ်သော ပိုင်ရှင်၏ ဓာတ်ပုံ၊ဖုန်းနံပါတ်၊လိပ်စာ၊ရပ်ကွက်ထောက်ခံစာ၊ ပြစ်မှုကင်းရှင်းကြောင်း ရဲစခန်းထောက်ခံစာများအား မြေပြင်တွင် တိုက်ဆိုင်စစ်ဆေးခဲ့ပြီး လုပ်ငန်းရှင်အား စီးပွားရေးနှင့်ကူးသန်းရောင်းဝယ်ရေးဝန်ကြီး ဌာန၏ အမိန့်ကြော်ငြာ စာအမှတ်(၅၀/၂၀၂၃) ဖြင့် မည်သူမဆို Online စနစ်ဖြင့် ရောင်းချခြင်း လုပ်ငန်းကို မှတ်ပုံတင်လက်မှတ် လျှောက်ထားရမည်ဖြစ်ပြီး ၄င်းလက်မှတ်မရှိဘဲ ရောင်းချခြင်း လုပ်ငန်းကို ဆောင်ရွက်ကြောင်းတွေ့ရှိပါက အရေးကြီးကုန်စည်နှင့်ဝန်ဆောင်မှုဥပဒေအရ အရေးယူ ဆောင်ရွက်သွားမည်ဖြစ်ကြောင်း ထုတ်ပြန်ခဲ့ပြီးဖြစ်ကြောင်း စသည့် Online ဖြင့် မှတ်ပုံတင်သည့် အကြောင်းအရာများအား အသေးစိတ်ပြောကြားခဲ့ကြောင်း သတင်းရရှိပါသည်။

DOCA(မန္တလေး)

   ကျောက်ဆည်ခရိုင်၊စားသုံးသူရေးရာဦးစီးဌာနမှစစ်ဆေးရေးအရာရှိများသည် အောက်တိုဘာလ (၁၆)ရက်နေ့တွင် မြို့နယ်တိုင်းရင်းဆေးဦးစီးဌာန ၊ မြို့နယ်စည်ပင်သာယာရေးအဖွဲ့တို့နှင့် ပူးပေါင်း၍ တိုင်းရင်းဆေးအမျိုးမျိုးအား ဆေးနှင့်ဆေးပစ္စည်းအရောင်းဆိုင်များသို့ သွား‌ရောက်၍ စျေးကွက် စောင့်ကြည့်စစ်ဆေးခဲ့ပါသည် ။ စဉ့်ကိုင်မြို့ရှိ မင်းတံခွန် ဆေးဆိုင်သို့ ကွင်းဆင်း စစ်ဆေးရာတွင် ဘေးအန္တရာယ် ကင်းရှင်းစေရန်အတွက် စျေးကွက်အတွင်း ရောင်းချနေသော ကုန်စည်များအပေါ်တွင် မြန်မာနိုင်ငံတိုင်းရင်းဆေးဆေးဝါးမှတ်ပုံတင်အမှတ်မပါရှိသော ဆေးဝါးများ၊ သက်တမ်းလွန်ဆေးဝါးများ နှင့် တရားမဝင်ဆေးဝါးများ ရောင်းချမှုမရှိစေရေး ၊ တိုင်းရင်းဆေး အမျိုးမျိုးများအပေါ် စျေးနှုန်းမြှင့်တင်ရောင်းချမှုရှိ/ မရှိ ၊ သက်ဆိုင်ရာဌာနများမှ ထုတ်ပြန်ထားသော သုံးစွဲရန် မသင့်သော ဆေးဝါးများရောင်းချမှုရှိ/မရှိ ၊ သောက်ဆေးအမျိုးမျိုး၊ လိမ်းဆေး အမျိုးမျိုးတွင် မြန်မာနိုင်ငံ စားသုံးသူကာကွယ်ရေးကော်မရှင်မှ ထုတ်ပြန်ထားသော ညွှန်ကြားချက်အမှတ် (၂/၂၀၁၉)ပါ အချက်များဖြစ်သည့် ကုန်ပစ္စည်းအမျိုးအမည် ၊ အရွယ်အစား ၊ အရေအတွက်၊ အသားတင်ပမာဏ ၊ ထားသိုသိမ်းဆည်းမှုအညွှန်း ၊ ဘေးထွက်ဆိုးကျိုး ၊ ကြိုတင်သတိပေးချက် စသည့် ကုန်အညွှန်း အမှတ်အသားဖော်ပြခြင်းဆိုင်ရာ အချက်အလက်များအား မြန်မာဘာသာဖြင့် ပြည့်စုံမှန်ကန်စွာ ဖော်ပြရန်လိုအပ်ကြောင်း ၊ စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြခြင်းဆိုင်ရာအချက်အလက်များ ပါဝင်မှုမရှိသော ကုန်ပစ္စည်းများ ရောင်းချပါက စားသုံးသူကာကွယ်ရေးဥပ‌ဒေအရ အရေးယူခံရနိုင်ကြောင်း ရှင်းလင်းပြောကြားခဲ့ပါသည်။

 DOCA(မန္တလေး)                                

ကျောက်ဆည်ခရိုင်၊ စားသုံးသူရေးရာဦးစီးဌာနသည် စားသုံးသူများ ဘေးအန္တရာယ် ကင်းရှင်း စေရေး၊ ထုတ်ကုန်များလုံခြုံစိတ်ချရမှုရှိစေရေးအတွက် စားသုံးသူကာကွယ်ရေး အသိပညာပေး ဟောပြော ဆွေးနွေးပွဲများကျင်းပခြင်းနှင့် စျေးကွက်စောင့်ကြည့်စစ်ဆေးခြင်းလုပ်ငန်းတို့ကို စဉ်ဆက် မပြတ်ဆောင်ရွက်လျှက်ရှိရာ အောက်တိုဘာလ(၁၅)ရက်နေ့တွင် စဉ့်ကိုင်မြို့ရှိ လင်းရောင်သစ် (ကိုယ်ပိုင်အထက်တန်းကျောင်း)၌ စားသုံးသူကာကွယ်ရေးအသိပညာပေး ဟောပြောဆွေးနွေးပွဲ ကျင်းပြုလုပ်ခဲ့ပါသည်။ အဆိုပါ‌ဆွေးနွေးပွဲ၌ လင်းရောင်သစ်(ကိုယ်ပိုင်အထက်တန်းကျောင်း)မှ ကျောင်းအုပ်ဆရာမကြီးက အဖွင့်အမှာစကားပြောကြားပြီး ကျောက်ဆည်ခရိုင်စားသုံးသူရေးရာ ဦးစီးဌာနမှဦး‌ဇော်မင်းလတ်(ဒု-ခရိုင်ဦးစီးမှူး)ကစားသုံးသူကာကွယ်ရေးဥပဒေ၏ရည်ရွယ်ချက်များ၊ စားသုံးသူကာကွယ်ရေး ဥပဒေပါ အချက်များဖြစ်သည့် စားသုံးသူများ၏ အခွင့်အရေးနှင့်တာဝန်များ ၊ စီးပွားရေးလုပ်ငန်းရှင်များလိုက်နာရမည့် တာဝန်များ ၊ ကုန်စည်ဝန်ဆောင်မှုနှင့်စပ်လျဉ်း၍ အာမခံ ပေးထားမှုအပေါ် စားသုံးသူကတောင်းဆိုနိုင်သည့် ခွင့်အရေးများနှင့်စားသုံးသူများနစ်နာဆုံးရှုံးမှုများ ဖြစ်ပေါ်ပါက တိုင်းဒေသကြီး / ပြည်နယ်များရှိ Consumer Information & Complaint Center (CICC)များ နှင့် Consumer Call Center ဖြစ်သည့်(1535)သို့ ခေါ်ဆိုတိုင်ကြားနိုင်သည့်အပြင် စားသုံးသူရေးရာဦးစီးဌာန၏ Website ဖြစ်သော www.doca.gov. mm ထဲသို့ဝင်‌ရောက်ပြီး တိုင်ကြား နိုင်ပါကြောင်းဆွေးနွေးပြောကြားခဲ့ပြီး  စဉ့်ကိုင်မြို့နယ် တာဝန်ခံ ဦးစိုးလွင်က တက်ရောက်လာသည့် ဆရာ/ဆရာမများ နှင့် ကျောင်းသား / ကျောင်းသူများအား ခေတ်မီဖွံ့ဖြိုးတိုးတက်လာသည်နှင့်အမျှ လူတွေရဲ့နေထိုင်မှုပုံစံမှာ အမျိုးမျိုးပြောင်းလဲလာပြီး အလွယ်တကူစားသောက်လို့ရသည့် (အသင့်စား အစားအစာ)များကို စားသောက်လာကြကြောင်း ၊ ဒီလိုစားသောက်လာတဲ့အတွက် စီးပွားရေး လုပ်ငန်းရှင်တွေဟာ စားသုံးသူတွေရဲ့အလိုကိုလိုက်ပြီး အရောင်အသွေးလှပရန် နှင့် အနံ့အရသာ ပြည့်စုံရန်၊မျက်စိပသာဒရှိစေရန်အတွက် အသင့်စား အစားအစာတွေကို တရားမဝင်ဆေးဝါးတွေ၊ ခွင့်မပြုဓါတုဆေးဝါတွေအသုံးပြုပြီး ထုတ်လုပ်လာကြတဲ့အတွက် လူတွေဟာ အရွယ်မတိုင်ခင် ရောဂါဆန်းတွေဖြစ်ပွားခြင်း ၊နာတာရှည်‌ရောဂါတွေဖြစ်ခြင်း၊ သေကျေပျက်စီးခြင်းတွေဖြစ်ပေါ်သည့် အတွက် နိုင်ငံရဲ့ လူစွမ်းအားအရင်းအမြစ်တွေဆုံးရှုံးကာ နိုင်ငံတော်၏ ဘက်ဂျက်ထိခိုက်ပြီး နိုင်ငံဖွံ့ဖြိုးမှုအတွက် ထိခိုက်လာလျက်ရှိကြောင်း ဆွေးနွေးပြောကြားခဲ့ပြီး ပြည်သူ့ကျန်းမာရေးဦးစီး ဌာနမှ ဦးရဲမင်းက ဝမ်းပျက်ဝမ်းလျှောရောဂါနှင့်ပတ်သက်၍ မသန့်ရှင်းသောအစားအစာ ၊ မသန့်ရှင်းသောရေ၊ ယင်နားစာများစားသောက်လျှင်လည်း ဝမ်းပျက်ဝမ်းလျှောရောဂါဖြစ်တက် ကြောင်း၊ ဝမ်းပျက်ဝမ်းလျှောရောဂါကို ကာကွယ်ရန်အတွက် သန့်ရှင်းသောရေ ၊ သန့်ရှင်းသော အစားအစာနှင့်ယင်နားစာများစားသုံးခြင်း နှင့် အစာမစားမီ လက်ကိုသန့်ရှင်းစင်ကြယ်စွာဆေးကြော ရန်လိုကြောင်း၊ သွေးလွန်တုပ်ကွေးရောဂါနှင့်ပတ်သက်၍ ဖုံး၊သွန်၊လဲ၊စစ်ကို အသုံးပြုရမှာဖြစ်ကြောင်း ၊သွေးလွန်တုပ်ကွေးရောဂါသည် ခြင်မှတစ်ဆင့်ကူးစပ်သောရောဂါဖြစ်ကြောင်း၊ ရေကြည်ရေသန့်မှာ ပေါက်ဖွားသော ခြင်ဖြစ်ကြောင်း ၊ သွေးလွန်တုပ်ကွေးရောဂါ ကာကွယ်ရန်အတွက် ရေအိုးများကို ဖုံးအုပ်ထားရန် ၊ မလိုအပ်သောရေများကိုသွန်ရန်၊ ဘုရားပန်းအိုးတွေကိုတစ်ရက်တစ်ခါရေလဲပေးရန်၊ သွန်ရန်အခက် အခဲရှိတဲ့ရေတွေကို ရေစစ်ဖြင့်စစ်၍ ပိုးလောက်လန်းများကိုခပ်ပေးရမှာဖြစ်ကြောင်း ၊ သွေးလွန်တုပ်ကွေး၏ အဓိက ခြင်ပေါက်ရန်အတွက် ပိုးလောက်လန်းက အဓိကဖြစ်ကြောင်း ၊ ပိုးလောက်လန်းကိုကြိုတင်နှိမ်နင်းပါက ခြင်ပေါက်ဖွားမှုကိုကာကွယ်ပေးကြောင်း၊သွေးလွန်တုပ်ကွေး ရောဂါသည်အသက်အရွယ်မရွေးဖြစ်ပွားနိုင်သည့်အတွက် ကြိုတင်ကာကွယ်နိုင်မှသာ အသက်ဆုံးရှုံးမှု များမဖြစ်နိုင်ကြောင်းစသည့် သိကောင်းစရာများအကြောင်း ရှင်းလင်းပြောကြားခဲ့ပါသည် ။ အသိပညာပေးဟောပြော ဆွေးနွေးပွဲသို့ ဆရာ/ဆရာမများ နှင့် ကျောင်းသား / ကျောင်းသူများ၊ စုစုပေါင်း(၁၀၀)ဦး တက်ရောက်ခဲ့ကြပြီး တက်‌ရောက်လာသော ဆရာ/ဆရာမများ နှင့် ကျောင်းသား/ ကျောင်းသူများအား  စားသုံးသူအသိပညာပေး လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

DOCA(မန္တလေး)

  ကျောက်ဆည်မြို့၊မြို့တော်ခန်းမ၌ အောက်တိုဘာလ(၁၄)ရက်နေ့တွင် ပြည်ပပို့ကုန်သီးနှံ ထုတ်ကုန်များတွင်ပိုးသတ်ဆေးဓါတ်ကြွင်းကင်းစင်ရေးနှင့်ပန်းတိုင်အထွက်နှုန်းရရှိရေးနည်းပညာပေးဆွေးနွေးပွဲအခမ်းအနားအားကျင်းပခဲ့ပါသည်။ အဆိုပါအခမ်းအနားသို့ မန္တလေးတိုင်းဒေသကြီး ဝန်ကြီးချုပ် ဦးမျိုးအောင် နှင့် အစိုးရအဖွဲ့ဝင် ဝန်ကြီးများ ၊ တိုင်းဒေသကြီးအဆင့် ဌာနဆိုင်ရာ အကြီးအကဲများ ၊ ခရိုင်/မြို့နယ်များမှ တာဝန်ရှိသူများနှင့်တောင်သူဦးကြီးများ တက်ရောက်ခဲ့ပါ သည်။ အခမ်းအနားတွင် တိုင်းဒေသကြီးဝန်ကြီးချုပ်မှ စားသုံးသူများ၏ ကျန်းမာရေးကိုရည်ရွယ်ပြီး ယခုအခမ်းအနားအားကျင်းပရခြင်းဖြစ်ပြီး ပိုးသတ်ဆေးဓါတ်ကြွင်းကင်းစင်ရေးအတွက် တောင်သူ ဦးကြီးများမှလည်းပူးပေါင်းပါဝင်ဆောင်ရွက်ရန်လိုကြောင်း၊ သီးနှံများပိုးသတ်ဆေးဓါတ်ကြွင်းကင်စင် ပြီးနိုင်ငံတကာစျေးကွက်တွင် ယှဉ်ပြိုင်နိုင်ပြီး စားသုံးသူများအတွက် ဘေးအန္တရာယ်ကင်းရှင်မှာဖြစ် ကြောင်းပြောကြားခဲ့ပါသည်။ ထို့နောက် စိုက်ပျိုးရေးသီးနှံကာကွယ်ရေးဌာန ညွှန်ကြားရေးမှူး ဦးဇော်လင်းက ပြည်ပပို့ကုန်သီးနှံများအနေဖြင့် ပိုးသတ်ဆေးဓါတ်ကြွင်းကင်းစင်ပြီး ပန်းတိုင်အထွက် နှုန်းရရှိရန်အတွက် ဆွေးနွေးပွဲအား ဆက်လက်ပြုလုပ်သွားမှာဖြစ်ကြောင်းတင်ပြခဲ့ပြီး သက်ဆိုင်ရာ ဌာနများမှပန်းတိုင်အထွက်နှုန်းများရရှိရေး ဆောင်ရွက်ရမည့်အချက်များ နှင့် မျိုးကောင်းမျိုးသန့်များ အသုံးပြုရေးနည်းလမ်းများ နှင့် အင်းဆက်ဖျက်ပိုးများ၏ အန္တရာယ်များအကြောင်းအရာများအား အသေးစိတ်ပြောကြားခဲ့ကြောင်း သတင်းရရှိပါသည်။

DOCA(မန္တလေး)

         (၁၈.၁၁.၂၀၂၅)ရက်နေ့၊ နံနက်(၁၀:၀၀) နာရီအချိန်တွင်စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ဦးဇော်မင်းလတ်(ခရိုင်ဦးစီးမှူး)နှင့်ဝန်ထမ်းများ၊ အထွေထွေအုပ်ချုပ်ရေးဦးစီးဌာန၊ ဈေးစည်ပင်သာယာရေးကော်မတီတို့နှင့် အတူ ဒေါပုံမြို့နယ်၊ မြို့သစ်ဈေးရှိ စားအုန်းဆီလက်လီအရောင်းဆိုင်များသို့ ကွင်းဆင်းစစ်ဆေးခြင်းများ ဆောင်ရွက်ခဲ့ကြကြောင်း သိရှိရပါသည်။

          ထိုသို့ကွင်းဆင်းဆောင်ရွက်ခဲ့ရာတွင် ဒေါပုံမြို့နယ်၊ မြို့သစ်ဈေးရှိ စားအုန်းဆီအရောင်းဆိုင်တို့အား ဝင်ရောက်စစ်ဆေးခဲ့ရာ မိမိရရှိသောခွဲတမ်းများကို ရပ်ကွက်နေစားသုံးသူပြည်သူများ လက်ဝယ်သို့ အမှန်တကယ်ရောက်ရှိစားသုံးနိုင်ရန် ရောင်းချပေးပါကြောင်း၊ အလေးချိန်လည်း မှန်ကန်စွာချိန်တွယ်ပေးပါကြောင်း၊ လက်ကျန်များမထားရှိကြောင်းနှင့် စားအုန်းဆီလက်လီ/ လက်ကားရောင်းချလျက်ရှိသော လုပ်ငန်းရှင်များအနေဖြင့် စားသုံးသူများမြင်သာထင်သာရှိသောနေရာတွင် ဆိုင်းဘုတ်တင်ရောင်းချထားကြောင်း  ကွင်းဆင်းစစ်ဆေးချက်အရ သိရှိရပါသည်။

DOCA(ရန်ကုန်)