သတင်းနှင့် လှုပ်ရှားမှုများ

   မန္တလေးတိုင်းဒေသကြီး၊ ညောင်ဦးခရိုင်၊ ကျောက်ပန်းတောင်းမြို့ရှိ လေးရွာအခြေခံပညာ အထက်တန်းကျောင်း၌ (၃.၁၂.၂၀၂၅)ရက်နေ့၊ နံနက် ၀၉:၀၀နာရီ အချိန်တွင် မြို့နယ်စားသုံး သူရေးရာဦးစီးဌာန၊ မြို့နယ်တာဝန်ခံမှ တိုင်းရင်းဆေးအဖွဲ့၊ မိခင်နှင့်ကလေးစောင့် ရှောက်ရေး အဖွဲ့များနှင့်ပူးပေါင်း၍ ဆရာ/ဆရာမများ၊ ကျောင်းသား/ ကျောင်းသူများအားအသိပညာ ပေးဟော ပြောပွဲကျင်းပပြုလုပ်ခဲ့ပါသည်။

အဆိုပါ ဟောပြောဆွေးနွေးပွဲတွင် စားသုံးသူရေးရာဦးစီးဌာန မြို့နယ်တာဝန်ခံ ဒေါ်မြန္တာထွန်း (ဒု-ဦးစီးမှူး)က စားသုံးသူကာကွယ်ရေးဥပဒေပါ စားသုံးသူ၏အခွင့်အရေးနှင့်တာဝန်များအကြောင်းနှင့် ကျောင်းသား/ကျောင်းသူများအနေဖြင့် ကုန်စည်နှင့်ဝန်ဆောင်မှုများ ဝယ်ယူသုံးစွဲရာတွင် ကုန်အညွှန်း အမှတ်သားများ ပြည့်စုံစွာဖော်ပြပါရှိသော ကုန်ပစ္စည်းများကိုသာဝယ်ယူသုံးစွဲကြရန် နှင့်ရွေးချယ်မှုများ ပြုလုပ်တတ်စေရန် ကုန်စည်နမူနာများတွင်ပါရှိသော ကုန်အညွှန်းအမှတ်အသားများအား ပြသရှင်း လင်းခြင်း၊ ကုန်စည်နှင့်ဝန်ဆောင်မှုများ ဝယ်ယူသုံးစွဲခြင်းကြောင့် နစ်နာဆုံးရှုံးမှုများ ဖြစ်ပေါ်လာပါက အရေးဆိုတိုင်ကြားနိုင်ပါကြောင်းနှင့် ဆက်သွယ်တိုင်ကြားနိုင်သည့် နေရာများ၊ နည်းလမ်းများကိုလည်းကောင်း၊ စားသုံးသူရေးရာဦးစီးဌာန၏ Website တွင်လည်း စားသုံးသူကာကွယ်ရေးဥပဒေနှင့်ဌာန၏ ဆောင်ရွက်ချက်များကို ဝင်ရောက်ကြည့်ရှုလေ့လာနိုင်သလို နစ်နာဆုံးရှုံးမှုများကိုလည်း ဝင်ရောက် တိုင်ကြားနိုင်ပါကြောင်း စသည်ဖြင့်အကျယ်တဝင့် ရှင်းလင်းဟောပြောဆွေးနွေးခဲ့ပါသည်။ ဆက်လက်၍ ကျောင်းသား/ကျောင်းသူများမှ ဟောပြောဆွေးနွေးမှုနှင့်ပတ်သက်၍ သိရှိလိုသည့် အကြောင်းအရာများ အား မေးမြန်းဆွေးနွေးရာ မြို့နယ်တာဝန်ခံမှ ပြန်လည်ရှင်းလင်းဆွေးနွေးခဲ့ပြီးနောက် မြို့နယ်တိုင်းရင်း ဆေးနှင့် မြို့နယ်မိခင်နှင့်ကလေးစောင့်ရှောက်ရေးအဖွဲ့တို့မှ တာဝန်ရှိသူများက သက်ဆိုင်ရာဌာန အလိုက် အသိပညာများဟောပြောဆွေးနွေးခဲ့ပါသည်။  အဆိုပါဟောပြောပွဲသို့ ဌာနဆိုင်ရာ(၁၀)ဦး၊ ဆရာ/ ဆရာမ(၅၀) ဦး၊ ကျောင်းသား/ ကျောင်းသူ (၃၂၆)ဦး၊ စုစုပေါင်း (၃၈၆)ဦးတက်ရောက်ခဲ့ကြောင်း သိရသည်။

DOCA(မန္တလေး)

      (၃.၁၂.၂၀၂၅) ရက်နေ့ နေ့လယ် (၁၃:၀၀) နာရီအချိန်တွင် စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ စစ်ဆေးရေးအရာရှိများသည် ရွှေပြည်သာမြို့နယ်ရှိ နဝရတ်ဈေးတွင် ရောင်းချလျက်ရှိသော ထိုင်းနိုင်ငံထုတ်စားသောက်ကုန်နှင့် လူသုံးကုန်ပစ္စည်းများအား ဈေးကွက်စောင့်ကြည့် ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

      ထိုသို့ကွင်းဆင်းစစ်ဆေးရာတွင် နဝရတ်ဈေးတွင် ရောင်းချနေသော စားသောက်ကုန်နှင့် လူသုံးကုန်ပစ္စည်းများနှင့်ပတ်သက်၍ ယခင်ဈေးနှုန်း၊ ယခုဈေးနှုန်းများ ကောက်ယူခဲ့ပြီး ဈေးနှုန်းမြင့်တက်မှုရှိ/ မရှိ၊ ကုန်ပစ္စည်းကန့်သတ်ရောင်းချခြင်းရှိ/ မရှိ၊ ပစ္စည်းပြတ်လပ်မှုရှိ/ မရှိနှင့် သက် ဆိုင်ရာဌာနများ၏ ထောက်ခံချက်များ ပြည့်စုံစွာဖော်ပြထားခြင်းရှိ/ မရှိ ဈေးကွက်စောင့်ကြည့် ကွင်းဆင်းစစ်ဆေးခဲ့ကြောင်း သိရှိရပါသည်။

DOCA (ရန်ကုန်)

    မြိတ်ခရိုင်စားသုံးသူရေးရာဦးစီးဌာနမှ ဝန်ထမ်းများသည် ၂၀၂၅ခုနှစ်၊ ဒီဇင်ဘာလ(၅)ရက်နေ့၊ နံနက်(၉း၃၀) နာရီအချိန်တွင် မြိတ်မြို့၊ ကန်ဖျားရပ်၊ အမှတ်(၅)အခြေခံပညာအလယ်တန်းကျောင်းတွင် ကျောင်းသား၊ ကျောင်းသူ၊ ဆရာ၊ ဆရာမတို့အား စားသုံးသူကာကွယ်ရေးဆိုင်ရာ အသိပညာပေး ခြင်းများ ဆောင်ရွက်ခဲ့ကြောင်း သိရှိရပါသည်။

          အသိပညာပေးဟောပြောရာတွင် စားသုံးသူရေးရာဦးစီးဌာနမှ မိမိဌာန၏ မျှော်မှန်းချက်နှင့် ရည်မှန်းချက်များပြောကြားပြီး  စားသုံးသူများအတွက် စားသုံးသူ၏အခွင့်အရေးနှင့် တာဝန်များရှိ ကြောင်း၊ ထုတ်ပိုးထားသောအစားအစာဝယ်ယူပါက ကုန်အညွှန်းအမှတ်အသားများကြည့်ရှု့စစ်ဆေးရန်၊ စားသုံးရန်ခွင့်ပြုချက်(ထောက်ခံချက်)ရရှိထားသော စားသောက်ကုန်များသာဝယ်ယူရန် နှင့် နစ်နာမှုရှိပါကတိုင်ကြားနိုင်ကြောင်း၊ တိုင်ကြားရာတွင် နစ်နာသူကိုယ်တိုင်ဖြစ်စေ၊ မိမိနှင့်ဆက်စပ်နေသူဖြစ်စေတိုင်ကြားနိုင်ကြောင်း၊ တိုင်ကြားနိုင်မည့်နည်းလမ်းများနှင့် အချက်အလက်များအား ရှင်း လင်းပြောကြားခဲ့ပြီး အဆိုပါ ဟောပြောပွဲသို့ ကျောင်းသား၊ ကျောင်းသူ၊ ဆရာ၊ ဆရာမ စုစုပေါင်း (၁၅၀)ဦးတက်ရောက်ခဲ့ကြောင်း သိရှိရပါသည်။

DOCA (တနင်္သာရီ)

     ပဲခူးတိုင်းဒေသကြီး၊ သာယာဝတီခရိုင်၊ အုတ်ဖိုမြို့နယ် စားသုံးသူရေးရာဦးစီးဌာန မြို့နယ် တာဝန်ခံရုံးမှ မြို့နယ်တာဝန်ခံနှင့်ဝန်ထမ်းများသည် ၂.၁၂.၂၀၂၅ ရက်နေ့ နံနက် (၉:၃၀) နာရီအချိန် တွင်မြို့နယ်စည်ပင်သာယာရေးအဖွဲ့၊မြို့နယ်ကျန်းမာရေးအဖွဲ့တို့ပါဝင်သော ပူးပေါင်းအဖွဲ့ဝင်များနှင့် အတူ အုတ်ဖိုမြို့နယ်အတွင်း ဆေးဝါးရောင်းချလျက်ရှိသော ဆေးဆိုင်များသို့ ဆေးဝါးများ ဈေးနှုန်း မြင့်တက်မှု့အခြေအနေများ ပြတ်လပ်မှုဖြစ်ပေါ်လျက်ရှိသော ဆေးဝါးအမည်စာရင်းများ တင်သွင်း ရောင်းချသော ကုမ္ပဏီအမည်များအား ကွင်းဆင်းစစ်ဆေးမှုဆောင်ရွက်ခဲ့ကြပါသည်။

          မြို့မ(၁)လမ်းရှိ ငွေမိုးဆေးဆိုင်၏ ဖြေကြားချက်အရ Decolgen,Bioggsis ကဲ့သို့ဖျားနာ ပျောက်ဆေးများ လေဆေးအမျိုးအစားအချို့နှင့် Betex,neuromac ကဲ့သို့ အကြောတက်ပျောက် ဆေးများ ဈေးနှုန်းအနည်းငယ်မြင့်တက်ပြီး ဆေးဝါးပြတ်လပ်မှုရှိပါကြောင်း သိရှိရပါသည်။

DOCA(ပဲခူး)

        တောင်ငူခရိုင်၊ အုတ်တွင်းမြို့နယ်တာဝန်ခံ ဒေါ်အေးအေးခိုင်၊ဒု-ဦးစီးမှူးနှင့် ဦးအောင်ဝင်း၊ ဌာနခွဲစာရေး တို့သည် (၁-၁၂-၂၀၂၅) ရက်နေ့တွင် အုတ်တွင်းမြို့နယ်ရှိ အောင်မင်္ဂလာရေသန့်စက်သို့ ရေသန့်ထုတ်လုပ်ပုံ၊ ပါကင်ဘူးသွပ်မှုအဆင့်ဆင့်နှင့် ဈေးကွက်အတွင်းသို့ ရောင်းချမှုအခြေအနေ တို့အား ကွင်းဆင်းလေ့လာခဲ့ပါသည်။

          အောင်မင်္ဂလာတံဆိပ်ပါ သောက်ရေသန့်ထုတ်လုပ်ရာတွင် ပေ ၅၃၀ နှင့် ပေ ၅၈၀ နက်သော ရေတွင်း (၂) တွင်းရှိပြီး ထိုတွင်းရေများကို RO & UV Systemဟုခေါ်သော၊ (Reverse Osmosis) ရေထဲရှိ အမှုန်ဓာတ်၊ ဓာတုဖော်မြူလာများ၊ ဆားဓာတ်များနှင့်ဘက်တီရီးယားအချို့ကို စစ်ထုတ်ပေးခြင်း၊ UV (Ultraviolet) အလင်းရောင်ကိုအသုံးပြုပြီး ဗိုင်းရပ်စ်၊ ဘက်တီးရီးယား များကိုသန့်စင်၍ ကျန်းမာရေးနှင့်ညီညွတ်စေရန် အကောင်းဆုံးရေအရင်းအမြစ်မှ ခေတ်မီစက် ကြီးများဖြင့် ထုတ်လုပ်ထားပြီး၊ ဗူးခွံကုန်ကြမ်းများကို နေပြည်တော်မှ မှာယူ၍ ကိုယ်တိုင် တံဆိပ်ရိုက်ရောင်းချခြင်းဖြစ်သည်။ ယခုလက်ရှိအနေဖြင့် လုပ်သား (၆) ဦးဖြင့်သာ လုပ်ကိုင် လျက်ရှိ သည်။

          အောင်မင်္ဂလာအမှတ်တံဆိပ်ပါသောက်ရေသန့်1 Litre ၁ ဘူးလျှင် ၂၂၅ ကျပ်၊ 600 ml ၁ဘူးလျှင် ၁၉၅ ကျပ်၊ 20Litre (ဘူးခွံပါ) ၁ ဘူးလျှင် ၁၃၀၀၀ ကျပ်ဖြင့် အုတ်တွင်းမြို့နယ်အတွင်း၌ ဖြန့်ဖြူးရောင်းချပြီး သုံးဘီး၊ အခြားအငှားယာဉ်သမားများကလည်း ရေသန့်စက်မှတဆင့် အုတ်တွင်းမြို့နယ်ရှိ ရပ်ကွက်/ကျေးရွာများသို့ ရောင်းချလျက်ရှိကြောင်း ရေသန့်စက်ပိုင်ရှင်၏ ပြောပြချက်အရသိရှိရသည်။

DOCA(ပဲခူး)