သတင်းနှင့် လှုပ်ရှားမှုများ

     မွန်ပြည်နယ်၊ စားသုံးသူရေးရာဦးစီးဌာန၊ မော်လမြိုင်ခရိုင်၊ ချောင်းဆုံမြို့နယ်တာဝန်ခံ ဒေါ်ထက်ထက်နွေဦးနှင့် ဝန်ထမ်းများသည် (၁၁.၁၁.၂၀၂၅) ရက်နေ့တွင် ချောင်းဆုံမြို့နယ်၊ မှုလွန် (ကော့မုပွန်မြောက်)ကျောင်းရှိ ကျောင်းမုန့်ဈေးတန်းအား ကွင်းဆင်းစစ်ဆေးခဲ့ပါသည်။

     ထိုသို့ စစ်ဆေးရာတွင် ကျောင်းမုန့်ဈေးတန်းအတွင်းရောင်းချနေသော လေဖောင်း မုန့်များ၊ ဖျော်ရည်ဗူးများစသည့် အသင့်စားမုန့်များ၌ ကုန်အညွှန်းအမှတ်အသားများ ပြည့်စုံမှု ရှိ/မရှိ စစ်ဆေးခဲ့ရာ အဆိုပါမုန့်များနှင့် ဖျော်ရည်ဗူးများတွင် ကုန်အညွှန်းအမှတ်အသား ပြည့်စုံစွာ ဖော်ပြပါရှိကြောင်း တွေ့ရှိရပြီး ကျောင်းသား/သူများ ဘေးအန္တရာယ်ကင်းရှင်းသော အစားအသောက်များ၊ မုန့်များ ရောင်းချရန်၊ သက်တမ်းလွန်နေသော မုန့်များမရောင်းချရန်နှင့် တားမြစ်ထားသော ဆိုးဆေးများ ပါဝင်သည့် အစားအသောက်များ မရောင်းချရန်တို့ကို မုန့်ဆိုင်ပိုင်ရှင်များအား အသိပညာပေး ပြောကြားခဲ့ကြောင်း သိရှိရပါသည်။

DOCA (မွန်)

    ၁၂.၁၁.၂၀၂၅ ရက်နေ့တွင် မုဒုံမြို့နယ်ရေနံနှင့် ရေနံထွက်ပစ္စည်းဆိုင်ရာလုပ်ငန်းများ ထိန်းသိမ်းကြီးကြပ်ရေးဆပ် ကော်မတီ မြို့နယ်ထွေ/အုပ်မှ ဒုတိယမြို့နယ်အုပ်ချုပ်ရေးမှူး ဦးအောင်ထွန်းထွန်းနိုင် ဦးဆောင်၍ မြို့နယ်ရဲတပ်ဖွဲ့၊ မီးသတ်ဦးစီးဌာန၊ အခွန်ဦးစီးဌာန၊ စားသုံးသူဦးဌာန၊ လျှပ်စစ်၊ လမ်းဦးစီးဌာန၊ မြို့နယ်စည်ပင်သာယာ ရေးအဖွဲ့နှင့် သက်ဆိုင်ရာရပ်ကွက်/ကျေးရွာအုပ်စု အုပ်ချုပ်ရေးမှူးများ ပါဝင်သော ပူးပေါင်းအဖွဲ့သည် ရာမာန်၊ RS၊ မင်းသူကြွယ်၊ KZM စက်သုံးဆီဆိုင်များအား စစ်ဆေးခဲ့ရာ စက်သုံးဆီ အရောင်းဆိုင်များအနေဖြင့် ပုံမှန်ရောင်းချလျက်ရှိကြောင်း စစ်ဆေးတွေ့ရှိရပြီး ပူးပေါင်း အဖွဲ့မှ ဆီလက်ကျန်အခြေအနေအား မြို့နယ်ကော်မတီ သို့ နေ့စဉ် သတင်း ပေးပို့ရန်၊ စက်သုံးဆီများအား ပေပါလိုက် ရောင်းချခြင်း မပြုရန်၊ စက်သုံးဆီဆိုင်များ ပုံမှန်ဖွင့်လှစ် ရောင်းချနိုင်ရေးဆောင်ရွက်ရန်နှင့် တရားမဝင်စက်သုံးဆီများ ရောင်းချခြင်း၊ သယ်ဆောင် ခြင်းများ မပြုလုပ်ရန် စက်သုံး ဆီဆိုင်လုပ်ငန်းရှင်များအား မှာကြားခဲ့ကြောင်း သိရှိနိုင်ပါရန် တင်ပြအပ်ပါသည်။

DOCA (မွန်)

    ၁၁.၁၁.၂၀၂၅ ရက်နေ့ နံနက်ပိုင်းတွင် မွန်ပြည်နယ်၊ ကျိုက်ထိုမြို့နယ်အတွင်းရှိ စက်သုံးဆီအရောင်းဆိုင်များသို့ ကျိုက်ထိုမြို့နယ်၊ စားသုံးသူရေးရာဦးစီးဌာန မြို့နယ်တာဝန်ခံ၊ ခရိုင်စီမံခန့်ခွဲရေးနှင့် အုပ်ချုပ်ရေးကော်မတီ မိတ်ဖက်ဌာနဆိုင်ရာတို့နှင့် ပူးပေါင်း၍ မြို့နယ်အတွင်းရှိ PT- power၊ DENKO၊ PUMA-စက်သုံးဆီအရောင်းဆိုင်များသို့  ကွင်းဆင်း စစ်ဆေးဆောင်ရွက်ခဲ့သည်။

     ထိုသို့ ကွင်းဆင်းစစ်ဆေးရာတွင် စက်သုံးဆီအရောင်းဆိုင်များ၏ ဆီအရည်အသွေး ပြည့်ဝမှန်ကန်မှု ရှိ/မရှိ၊ သတ်မှတ်ရည်ညွှန်းဈေးအတိုင်း ရောင်းချခြင်း ရှိ/မရှိ၊ အလေးချိန် လီတာ ပြည့်ဝမှန်ကန်မှု ရှိ/မရှိ၊ သတ်မှတ်ခွဲတမ်းအပေါ် အပြည့်ဝရောင်းချပေးမှု ရှိ/မရှိ စစ်ဆေးခဲ့ကြသည်။

    မြို့နယ်အတွင်းရှိ စက်သုံးဆီအရောင်းဆိုင်များဆီ ပြတ်လပ်မှုမရှိစေရေး အလေးထားဆောင်ရွက်ရန်၊ သတ်မှတ်စံချိန်စံညွှန်း၊ အရည်အသွေးအခြင်အတွယ်ပြည့်မှီ မှန်ကန်မှုရှိစေရေးဆောင်ရွက်ရန် မီးဘေးအန္တရာယ်ကင်းရှင်းမှုရှိစေရေးနှင့် သဘာဝပတ်ဝန်း ကျင်ထိခိုက်မှုမရှိစေရေးအတွက် ထိန်းသိမ်းဆောင်ရွက်ရန် မကျယ်တစ်ဝင့် ဆွေးနွေးခဲ့ကြ ပါကြောင်း ရေးသားတင်ပြလိုက်ရပါသည်။

DOCA (မွန်)

  စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့နယ် တာဝန်ခံ သည် (၁၁.၁၁.၂၀၂၅)ရက်နေ့ နံနက်(၁၁:၀၀)နာရီအချိန်တွင် မိတ်ဖက်ဌာနဆိုင်ရာများနှင့်အတူ ပူးပေါင်း၍ မင်းဘူးမြို့ပေါ်ရှိ "ဖြိုး" ကလေးအသုံးအဆောင်ဆိုင်အားသွားရောက်၍ ကလေး တစ်ကိုယ်ရည်သုံး ပစ္စည်း အမျိုးမျိုးအား ဈေးကွက် စောင့်ကြည့်စစ်ဆေးခြင်း ဆောင်ရွက်ခဲ့ ကြောင်း သိရသည်။

            ထိုသို့စစ်ဆေးရာတွင် ကလေးငယ်များဘေးအန္တရာယ်ကင်းရှင်းစေရန်အတွက် ဈေးကွက် အတွင်းရောင်းချသော ကလေးတစ်ကိုယ်ရည်သုံး ပစ္စည်းအမျိုးမျိုးတွင် ကုန်အညွှန်အမှတ်အသား ဖော်ပြချက်များဖြစ်သော ကုန်စည်၏ အမျိုးအမည်၊ အရွယ်အစား၊ အရေအတွက်နှင့် အသား တင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာရေးဆိုင်ရာ ဘေးထွက် ဆိုးကျိုး(သို့) ဓာတ်မတည့်ကြောင်းဖော်ပြချက်နှင့် ကြိုတင်သတိပေးချက်များ ပါဝင်မှုရှိ/မရှိတို့ကို ကွင်းဆင်းစစ်ဆေးခဲ့ရာ ဈေးကွက်အတွင်းတွင် KODOMO(baby cream)၊ KODOMO(baby powder) အစရှိသည့် ကလေးတစ်ကိုယ်ရည်သုံး ပစ္စည်းအမျိုးမျိုး တို့တွင် ကုန်အညွှန်း အမှတ်အသားများ ပြည့်စုံစွာဖော်ပြထားသည်ကို စစ်ဆေး တွေ့ရှိရကြောင်း သိရှိရပါသည်။

DOCA(မကွေး)

  မကွေးတိုင်းဒေသကြီး၊ မကွေးခရိုင်၊ တောင်တွင်းကြီးမြို့နယ် မီးသတ်ဦးစီးဌာနမှ မီးသတ်ဦးစီးမှူး ဦးစောမောင်နှင့် စားသုံးသူရေးရာဦးစီးဌာနမှ ဒု-ဦးစီးမှူး ဒေါ်ဌေးဌေးတို့က ဦးဆောင်၍ မီးသတ်တပ်ဖွဲ့ ဝင်များသည် “သင်း” ပဲကြော်၊ ပဲလှော်နှင့် အကြော်စုံလုပ်ငန်းပိုင်ရှင်နှင့် အလုပ်သမားများအား (၈.၁၁.၂၀၂၅)ရက်နေ့၊ နံနက်(၀၇:၃၀)အချိန်တွင် မီးဘေးကြိုတင်ကာကွယ်ရေး ဟောပြောခြင်းနှင့် ကွင်းဆင်းစစ်ဆေးခြင်းများ ဆောင်ရွက်ခဲ့ကြောင်း သိရသည်။

          အဆိုပါ ဟောပြောပွဲအခမ်းအနားတွင် တောင်တွင်းကြီးမြို့နယ် မီးသတ်ဦးစီးဌာနမှ မီးသတ်ဦးစီး မှူး ဦးစောမောင်က မီးဘေးလုံခြုံကာကွယ်ရေးအသိပညာပေး ဆွေးနွေးရခြင်း ရည်ရွယ်ချက်များ၊ မီးလောင်မှုအခြေခံသဘောတရားများ၊ မီးငြိမ်းသတ်ခြင်းစနစ်များ၊ မီးအတန်းအစားခွဲခြားခြင်းများ၊ လျှပ်စစ်မီးလောင်မှုဖြစ်စေသည့် အဓိကအကြောင်းအရင်းများ၊ လျှပ်စစ်ဝါယာရှော့(စ်) မဖြစ်အောင် ကာကွယ်ရမည့် နည်းလမ်းများ၊ မီးကို မပေါ့ဆကြရန်နှင့် မီးလောင်ပါက ပစ္စည်းဆုံးရှုံးမှုသာမက အသက် အိုးအိမ်များပါ ပျက်စီးဆုံးရှုံးတတ်ကြောင်းကို ရှင်းလင်းဟောပြောခဲ့သည်။

          ထို့နောက် မြို့နယ်မီးသတ်ဦးစီးမှူးနှင့် စားသုံးသူ‌ရေးရာဦးစီးဌာန ဒု-ဦးစီးမှူး ဒေါ်ဌေးဌေးတို့က “သင်း”ပဲကြော်၊ ပဲလှော်လုပ်ငန်းအတွင်းရှိ မီးဘေးလုံခြုံရေးအတွက် ဆောင်ရွက်ထားရှိသော မီးငြိမ်းသတ်ရေး ပစ္စည်းများ ပြည့်စုံကောင်းမွန်ခြင်းရှိ/မရှိ၊ မီးလောင်လွယ်စေသော လောင်စာများ ရှိ/ မရှိ၊ ပတ်ဝန်းကျင်သန့်ရှင်းသပ်ရပ်မှုရှိ/မရှိ တပ်ဆင်ထားရှိသော လျှပ်စစ်မီးလိုင်းများ ကြံ့ခိုင်ကောင်းမွန်ခြင်း ရှိ/မရှိ နှင့် စားသုံးသူကာကွယ်ရေး ဥပဒေ ပြဌာန်းချက်များနှင့်အညီ ကိုက်ညီမှုရှိ/မရှိတို့ကို လိုက်လံ စစ်ဆေးခဲ့ကြောင်း သိရှိရပါသည်။

DOCA(မကွေး)