ပြည်ပကုန်သွယ်မှုသတင်းများ

          ကမ္ဘောဒီးယားနိုင်ငံဝန်ကြီးချုပ်ဆိုသူ Hun Manet က စက်တင်ဘာလ ၁၇ ရက်နေ့တွင် ၂၀၂၆ ခုနှစ်၌ အဝတ်အထည်၊ ဖိနပ်နှင့် ခရီးသွားပစ္စည်းလုပ်ငန်းများတွင် လစဥ်လုပ်အားခကို အနည်းဆုံး အမေရိကန်ဒေါ်လာ ၂၁၀ ခန့် တိုးမြှင့်သတ်မှတ်လိုက်ကြောင်း ပြောကြားခဲ့ပါသည်။ အဆိုပါ လစဥ်လုပ်အားခ တိုးမြှင့်ခြင်းကို ၂၀၂၆ ခုနှစ်၊ ဇန်နဝါရီလ၊ ၁ရက်နေ့တွင် စတင်အကျိုးသက်ရောက် မည် ဖြစ်ကြောင်း သိရပါသည်။ အလုပ်သမားများသည် လစဥ်အနည်းဆုံးလုပ်ခတိုးမြှင့်ခြင်းများ အပြင် အလုပ်သမားအကျိုးခံစားခွင့်များဖြစ်သည့် လစဥ်ရက်မှန်ကြေး ၁၀ ဒေါ်လာ၊ အိမ်ငှားရမ်းခ နှင့် သွားလာရေးအတွက် ၇ ဒေါ်လာ အပြင်၊ လုပ်သက်ခအတွက် ဒေါ်လာမှ ၁၁ဒေါ်လာ စသဖြင့် အပိုထပ်ဆောင်းခံစားခွင့်များကို ရရှိမည်ဖြစ်ကြောင်း သိရပါသည်။ အဝတ်အထည်၊ ဖိနပ်နှင့် ခရီးသွားပစ္စည်းများ ကဏ္ဍသည် ကမ္ဘောဒီးယားနိုင်ငံ၏ အကြီးမားဆုံး နိုင်ငံခြားငွေများရှာဖွေနိုင် သည့် ကဏ္ဍများဖြစ်ပြီး အဆိုပါကဏ္ဍများတွင် စက်ရုံပေါင်း ၁၅၀၀ နှင့် အလုပ်သမားအင်အား ၉၀၀၀၀၀ ဦးခန့်ဝင်ရောက်လုပ်ကိုင်နေသည့် ရုံးခွဲများ ပါဝင်ကြောင်း ကမ္ဘောဒီးယားနိုင်ငံ အလုပ်သမား နှင့် အသက်မွေးဝမ်းကျောင်းလေ့ကျင့်ရေးဝန်ကြီးဌာနမှ ထုတ်ပြန်သော အချက် အလက်များအရ သိရပါသည်။ အရှေ့တောင်အာရှသည် ၂၀၂၅ ခုနှစ် ဇန်နဝါရီလမှ ဇွန်လအတွင်း တွင် အမေရိကန်ဒေါ်လာ ၇.၆၂ ဘီလီယံတန်ကြေးရှိသော အဆိုပါထုတ်ကုန်များကို တင်ပို့ခဲ့ပြီး ယခင်နှစ်တူညီသော ကာလတွင်တင်ပို့ခဲ့သော အမေရိကန်ဒေါ်လာ ၆.၂၄ ဘီလီယံနှင့် နှိုင်းယှဥ်လျှင် ၂၂ ရာခိုင်နှုန်းခန့် တိုးတက်လာကြောင်း အကောက်ခွန်နှင့် ယစ်မျိုးခွန်ဦးစီးဌာနမှ ထုတ်ပြန်သော အချက်အလက်များအရ သိရှိရပါသည်။

Source: Xinhua

DOCA (ရန်ကုန်)

          ဖိလစ်ပိုင်နိုင်ငံ၏  ပြည်တွင်းမော်တော်ကားထုတ်လုပ်မှုသည် ရာသီဥတု မသာယာမှုများကြားတွင် သြဂုတ်လတွင် ၈ လဆက်တိုက်ကျဆင်းလျက်ရှိကြောင်း သိရပါသည်။ ဖိလစ်ပိုင်နိုင်ငံ မော်တော်ကားထုတ်လုပ်သည့်ကုန်သည်များ (CAMPI) နှင့် ထရပ်ကားထုတ်လုပ်သူများ အဖွဲ့အစည်း (TMA) တို့၏ အချက်အလက်များအရ ၎င်းတို့၏ ရောင်းချမှုသည် ယခင်နှစ်တွင် ရောင်းချခဲ့သော ၃၉၁၅၅ စီးနှင့် နှိုင်းယှဥ်လျှင် ယခုနှစ်တွင် ၃၆၁၇၄ စီးခန့်သာရောင်းချနိုင်ခဲ့ပြီး ၇.၆ ရာခိုင်နှုန်းခန့် ကျဆင်းလျက်ရှိကြောင်း သိရပါသည်။ ခရီးသည်တင်မော်တော်ကား ရောင်းချမှု သည် ၂၀၂၄ ခုနှစ်တွင် ၉၅၂၉ စီး‌ရောင်းချခဲ့ရာမှ ယခုနှစ် သြဂုတ်လတွင်၇၅၉၁ စီးသာ ရောင်းချနိုင် ခဲ့ကြောင်း သိရပါသည်။ လုပ်ငန်းသုံးကားရောင်းချမှုသည်လည်း ယခင်နှစ်တွင် ၂၉၆၂၆ စီးခန့် ရောင်းချနိုင်ခဲ့သော်လည်း ယခုနှစ်တွင် ၂၈၅၈၃ စီးသာရောင်းချနိုင်ခဲ့ပြီး ၃.၅ ရာခိုင်နှုန်းခန့် ကျဆင်း လာပါသည်။ သို့သော် လျှပ်စစ်ကားရောင်းချမှုသည် သြဂုတ်လတွင် ၂၂၄၄ စီးခန့်ရောင်းချနိုင်ခဲ့ကြောင်း သိရပါသည်။ Rizal Commercial Banking ကော်ပိုရေးရှင်းမှ စီးပွားရေးလုပ်ငန်းရှင် အကြီးအကဲဆိုသူ Michael Ricafort က မော်တော်ကားများ ရောင်းချမှုလျော့နည်းလာခြင်းသည် တိုင်ဖုန်းမုန်တိုင်းနှင့် ရေကြီးမှုများကြောင့်ဖြစ်ကြောင်း ပြောကြားခဲ့ပါသည်။ ဇန်နဝါရီလမှ သြဂုတ်လအတွင်းတွင် CAMPI နှင့် TMA ၏ မော်တော်ကား စုစုပေါင်းရောင်းချမှုသည် ယခင်နှစ်ကာလနှင့် နှိုင်းယှဥ်လျှင် ၃၀၄၇၆၅ စီးမှ ၃၀၅၃၈၁ စီး အထိ ၀.၂ ရာခိုင်နှုန်းခန့် မြင့်တက်လာကြောင်း သိရပါသည်။ ၎င်းတို့၏ ခရီးသည်တင်ကားရောင်းချမှုသည် ယခင်နှစ်ကာလတွင် ၈၀၃၂၇ စီးရောင်းချဲ့ရာမှ ယခုနှစ်တွင် ၆၁၃၅၈ စီးရောင်းချ နိုင်ခဲ့ကာ ၂၃.၆ ရာခိုင်နှုန်းကျဆင်းခဲ့ ကြောင်းနှင့် လုပ်ငန်းသုံးမော်တော်ယာဥ်ရောင်းချမှုသည် ယခုနှစ်တွင် ၂၄၄၀၂၃ စီးခန့်သာ‌ရောင်းချ နိုင်ခဲ့ပြီး ၈.၇ ရာခိုင်နှုန်းခန့် ကျဆင်းခဲ့ကြောင်း သိရပါသည်။ CAMPI နှင့် TMA တို့၏ လျှပ်စစ်ကား ရောင်းချမှုသည် ယခုနှစ်တွင် ၁၈၄၃၉ စီးခန့် ရောင်းချနိုင်ခဲ့ကြောင်း သိရပါသည်။ Toyota Motor  Philippines ကော်ပိုရေးရှင်းသည် ယခုကာလတွင် ၎င်း၏ ရှယ်ယာ ၄၇.၉၃ ရာခိုင်နှုန်း ပိုင်ဆိုင်မှုနှင့်အတူ စျေးကွက်တွင် ဦးဆောင်ရပ်တည်လျက်ရှိကြောင်း သိရပါသည်။ ၎င်းနောက်တွင် Mitsubishi Motors Philippines က ၁၈.၉၆ ရာခိုင်နှုန်း၊ Nissan Philippines က ၄.၉၆ ရာခိုင်နှုန်း၊ Ford Motor Philippines က ၄.၈၉ ရာခိုင်နှုန်းနှင့် Suzuki Philippines က ၄.၇၅ ရာခိုင်နှုန်း စသဖြင့် အသီးသီးရှယ်ယာများကို ကိုင်ဆောင်လျက်ရှိကြောင်း သိရှိရပါသည်။

Source: Philstar

DOCA (ရန်ကုန်)

            တောင်ကိုရီးယားနိုင်ငံ ဘဏ္ဍာရေးကုမ္ပဏီများ၏ ပြည်ပအိမ်ခြံမြေ ရင်းနှီးမြှုပ်နှံမှုများသည် ၂၀၂၅ ခုနှစ် ပထမသုံးလပတ်တွင် ကျဆင်းသွားကြောင်း ဘဏ္ဍာ‌ရေး ကြီးကြပ်အဖွဲ့၏ စက်တင်ဘာ လ ၂၃ ရက်နေ့ထုတ်ပြန်သော အချက်အလက်များအရသိရှိရပါသည်။

          ပြည်တွင်း ဘဏ္ဍာရေးကုမ္ပဏီများဖြစ်သည့် ဘဏ်များအာမခံကုမ္ပဏီများနှင့် ပွဲစားလုပ်ငန်း များ အပါအဝင် ပြည်ပ အိမ်ခြံမြေရင်းနှီးမြှုပ်နှံမှုသည် မတ်လအကုန်တွင် ဝမ် ၅၅.၅ ထရီလီယံ ( အမေရိကန်ဒေါ်လာ ၃၉.၈ ဘီလီယံ) သို့ရောက်ရှိခဲ့ရာ ယခင်သုံးလနှင့်နှိုင်းယှဉ်လျှင် ဝမ် ၀.၅ ထရီလီ ယံ (အမေရိကန်‌‌ဒေါ်လာ ၃၅၈.၆ မီလီယံ) လျော့ကျခဲ့ပါသည်။

            စုစုပေါင်းရင်းနှီးမြှုပ်နှံမှုတွင် အာမခံကုမ္ပဏီများက ၅၄.၆ ရာခိုင်နှုန်းဖြင့် အများဆုံးပိုင်ဆိုင် ခဲ့ပြီး၊ ဘဏ်များက  ၂၁.၉ ရာခိုင်နှုန်း၊ ငွေချေးလုပ်ငန်းများမှ ၁၃.၆ ရာခိုင်နှုန်းရှိကြောင်းသိရပါ သည်။

          ရင်းနှီးမြှုပ်နှံမှုအများဆုံးဖြစ်သည့် ၆၂.၁ ရာခိုင်နှုန်း ဖြင့် မြောက်အမေရိကတွင် ဖြစ်ပြီး၊ ဥရောပတွင် ၁၈.၅ ရာခိုင်နှုန်း၊ အာရှတွင် ၆.၇ ရာခိုင်နှုန်းရှိခဲ့ပါသည်။ စုစုပေါင်းရင်းနှီးမြှုပ်နှံမှု၏ ၆၆.၈ ရာခိုင်နှုန်းသည် ၂၀၃၀ ပြည့်နှစ်တွင် သက်တမ်းစေ့မည်ဖြစ်ပြီး ၁၀.၄ ရာခိုင်နှုန်းသည် ယခု နှစ်တွင် သက်တမ်းစေ့မည်ဖြစ်ကြောင်းသိရှိရပါသည်။

DOCA (ရန်ကုန်) 

           တောင်ကိုရီးယားနိုင်ငံ၏ စီးပွား‌‌ရေးလုပ်ငန်းအရေအတွက်သည် လျှပ်စစ်ကဏ္ဍ၊ သဘာဝ ဓာတ်ငွေ့ကဏ္ဍနှင့် လက်လီ၊လက်ကားရောင်းဝယ်မှုကဏ္ဍများတိုးချဲ့လာမှုကြောင့် ပြီးခဲ့သည့် နှစ်တွင် မြင့်တက်လာခဲ့ကြောင်း စက်တင်ဘာလ ၂၃ ရက်နေ့ထုတ်ပြန်သော စာရင်းအင်းရုံး၏ အချက် အလက်များအရသိရှိရပါသည်။

    လုပ်ငန်းများ၏ စုစုပေါင်း အရေအတွက်မှာ ၂၀၂၄ ခုနှစ် ကုန်ဆုံးချိန်တွင် ၆၃၅၃၆၇၃ ရှိပြီး တစ်နှစ်တာကာလအတွင်း ၁.၇ ရာခိုင်နှုန်းမြင့်တက်ခဲ့ကြောင်း သိရှိရပါသည်။

         ကုန်ထုတ်လုပ်ငန်းနှင့် အိမ်ခြံမြေ လုပ်ငန်းအရေအတွက်သည် ပြီးခဲ့သည့်နှစ်တွင် တစ်လုံးထဲ သော ဂဏန်းဖြင့် ကျဆင်းခဲ့သော်လည်း လျှပ်စစ်နှင့် သဘာဝဓာတ်‌ငွေ့ ကုမ္ပဏီများအတွက် ၃၃.၇ ရာခိုင်နှုန်း တိုးတက်ခဲ့ပါသည်။ လက်ကားရောင်းချသူများနှင့် လက်လီရောင်းချသူများသည် ၂.၃ ရာခိုင်နှုန်းတိုးတက်ခဲ့ပါသည်။

      လက်လီလက်ကားရောင်းချမှု လုပ်ငန်းများသည် ၁၆၁၂၈၂၅ ခုဖြင့် အများဆုံးဖြစ်ပြီး တည်းခိုခန်းနှင့်  စားသောက်ဆိုင်ကဏ္ဍက ၈၅၈၃၇၃ ခုဖြင့် ဒုတိယ၊ သယ်ယူပို့ဆောင်‌ရေး ကဏ္ဍက ၆၇၃၃၂၄ ခုဖြင့် တတိယနေရာတွင် ရပ်တည်လျှက်ရှိပါသည်။

      နိုင်ငံတွင်းစီးပွားရေးလုပ်ငန်းများတွင် အလုပ်သမားဦးရေသည် ၂၀၂၄ ခုနှစ်ကုန်တွင် ယခင်နှစ် ကထက် ၁.၁ ရာခိုင်နှုန်း တိုးလာကာ ၂၅၇၃၁၁၀၅ ဦးရှိခဲ့သည်။ အလုပ်သမားဦးရေသည် ကုန်ထုတ် လုပ်ငန်းတွင် ၄၁၄၆၁၁၉ ဦး၊ လက်လီလက်ကားရောင်းချမှုလုပ်ငန်းတွင် ၃၅၉၉၆၈၀ ဦးနှင့် ကျန်မာ‌ ရေးနှင့် လူမှုဖူလုံရေးကဏ္ဍတွင် ၂၇၆၄၀၀၀ ဦးတို့ရှိကြောင်းသိရပါသည်။

DOCA (ရန်ကုန်) 

            ကမ္ဘောဒီးယားနိုင်ငံ၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန (MoC) မှ အကြီးတန်းအရာရှိတစ်ဦးက အိန္ဒိယနိုင်ငံအား ကမ္ဘောဒီးယားဈေးကွက်တွင် အလားအလာ ကောင်းများကို စူးစမ်းလေ့လာရန် နှစ်နိုင်ငံစလုံး၏ အကျိုးစီးပွားအတွက် နှစ်နိုင်ငံဦးစားပေး ကုန်သွယ်မှုသဘောတူညီချက်တစ်ရပ်ကို ရောက်ရှိရန် စေ့စပ်ညှိနှိုင်းရေးအဖွဲ့ကို ဖွဲ့စည်းခြင်းဖြင့် အိန္ဒိယကို တိုက်တွန်းခဲ့သည်။ အိန္ဒိယနိုင်ငံ မွမ်ဘိုင်းမြို့ရှိ အိန္ဒိယကုန်သည်ကြီးများအသင်းမှ စီစဉ်ကျင်းပသည့် Global Business Summit တွင် ကမ္ဘော့ဒီးယားနိုင်ငံ၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန (MoC) ၏ ပြောရေးဆိုခွင့်ရှိသူ Penn Sovicheat က ၁၉-၉-၂၀၂၅ ရက်နေ့တွင် ပြုလုပ်ခဲ့ကြောင်း MOC ၏ ထုတ်ပြန်ချက်တွင် ဖော်ပြထားသည်။ MOC ၏ ထုန်ပြန်ချက်အရ အဆိုပါပွဲသည် အရေးကြီးသော အစည်းအဝေးများနှင့် ဆွေးနွေးမှုများ ဆက်တိုက်ပါဝင်ခဲ့သည်။ ၎င်းတို့တွင် ဒေသတွင်းနှင့် အိန္ဒိယဥပဒေများ၊ စီးပွားရေးနှင့် ရင်းနှီးမြှုပ်နှံမှုဆိုင်ရာ စည်းမျဉ်းများ၊ ကမ္ဘာလုံးဆိုင်ရာ စျေးကွက်စိန်ခေါ်မှုများ၏ အခြေအနေတွင် ကုန်သွယ်မှု ပံ့ပိုးကူညီမှုနှင့် သီးခြားပူးပေါင်းဆောင်ရွက်မှုမူဘောင်များ လိုအပ်သည့် နယ်စပ် ဖြတ်ကျော် စီးပွားရေးဆိုင်ရာ လိုက်နာမှု၊ စီးပွားရေးတွင် နည်းပညာနှင့် ဉာဏ်ရည်တု (AI)ဆိုင်ရာ အခန်းကဏ္ဍတို့ပါဝင်ပါသည်။ အစည်းအဝေးတွင် ပါ၀င်နေသော စီးပွားရေးကိုယ်စားလှယ်များ အား ၎င်းတို့၏ အလားအလာရှိသော စီးပွားရေးလုပ်ဖော်ကိုင်ဖက်များနှင့် ချိတ်ဆက်ရှာဖွေရန် လည်း ခွင့်ပြုပေးခဲ့သည်။

DOCA (ရန်ကုန်)