ပြည်တွင်းကုန်သွယ်မှုသတင်း

    ဧရာဝတီတိုင်းဒေသကြီး မအူပင်ခရိုင်အတွင်းရှိ တလုပ်လပ်အနောက်ရွာတွင် ကွမ်းကို မိမိတို့အိမ်ခြံဝင်း အတွင်း တစ်နိုင်တစ်ပိုင်အနေဖြင့်လည်းကောင်း၊ အပိုဝင်ငွေရရှိရန်အတွက်လည်းကောင်း စိုက်ပျိုး လျက်ရှိပြီး ကွမ်းကို ဆောင်းစိုက်နှင့် မိုးစိုက်ဟူ၍ စိုက်ပျိုးကြသည်။ ကွမ်း ခြံတစ်ခြံစိုက်ပျိုးပါက သက်တမ်း ၄နှစ်ထိ စိုက်ပျိုးနိုင်သည်။

    ကွမ်းစိုက်ပျိုးရန်အတွက် ကွမ်းမျိုး(ကွမ်းအညွန့်)များကို တစ်ညွန့်လျှင် လက်ကားဈေး ငွေကျပ် ၃၀၀ ဖြင့် ဝယ်ယူကာ ကွမ်းခြံတစ်ခြံတွင်   ကွမ်းအညွန့် ၁၀၀၀၀ ခန့် စိုက်ပျိုးရကြောင်း၊ ကွမ်းကို ၂၀၂၄ခုနှစ် ဝါခေါင်လတွင် စတင်စိုက်ပျိုး၍ တပေါင်းလတွင် ကွမ်းရွက်များ စတင်ခူးဆွတ်ရပြီး ကွမ်းညွန့် မျိုးကောင်းမျိုးသန့်အပေါ်မူတည်၍ အနည်ဆုံး နှစ်နှစ်မှ ငါးနှစ်ခန့်အထိ ခူးဆွတ်ရကြောင်း၊ စိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် ၁ဧကလျှင် ငွေကျပ် ၅၀ သိန်းခန့် ကုန်ကျကြောင်း၊ အထွက်နှုန်းအနေဖြင့် ကွမ်းရွက်ကို ၁၀ ရက်ခြားတစ်ကြိမ် ခူးဆွတ်ရပြီး တစ်ကြိမ်ခူးဆွတ်လျှင် ၁၀ ပိဿာခန့် ထွက်ရှိရာ တစ်လလျှင် ပိဿာချိန် ၆၀ ထွက်ရှိကြောင်း၊ ဈေးနှုန်းဈေးကွက်အနေဖြင့် လက်ကားဈေး တစ်ပိဿာလျှင် ငွေကျပ် ၄၀၀၀ ဖြင့်ရောင်းချရပြီး အကျိးအမြတ် အနေဖြင့် ငွေကျပ် ၅၀၀၀၀၀/-ကျန်ရှိပြီး ကွမ်းကို မအူပင်မြို့ရှိ ကွမ်းအဝယ်ဒိုင်များသို့ တင်ပို့ရောင်းချကြကြောင်း၊ ကွမ်းဒိုင်များမှတစ်ဆင့် ရန်ကုန်မြို့သို့ အများဆုံးတင်ပို့ရောင်းချကြောင်း သိရသည်။

DOCA (ဧရာဝတီ)

     ဧရာဝတီတိုင်းဒေသကြီး၊ မအူပင်ခရိုင်တွင် ငှက်ပျောစိုက်ပျိုးသူများရှိ၍။ မအူပင်ချောင်းကလေးကျေးရွာမှ ထွက်ရှိသော ငှက်ပျောသီးများကို မအူပင် မင်္ဂလာဈေးအတွင်း ရာသီမရွေူ တင်ပို့ ရောင်းချနေကြောင်း သိရသည်။ မအူပင်ခရိုင်တွင် ငှက်ပျောစိုက်ဧက ၃၇၅၀ ဧက စိုက်ပျိုးပြီး နှစ်စဉ် စိုက်ပျိုး၍ မြို့နယ်တွင်းနှင့် ရန်ကုန်သို့ ငှက်ပျော ထွက်ရှိချိန် တင်ပို့ရောင်းချကြောင်း သိရသည်။ ဖီကြမ်း ငှက်ပျောစိမ်းကို အဓိကစိုက်ပျိုးသည်။

    ငှက်ပျောဖီကြမ်းမျိုးကို  ၁ဧက စိုက်ပျိုးပြီး အပင်ရေ ၁၀၀၀ စိုက်ပျိုးခဲ့ကြောင်း သိရသည်။  ။  ငှက်ပျော်စိုက်ပျိုးမှု ကုန်ကျစရိတ် ၁ဧက တွင် ငွေကျပ် ၅၀၀၀၀၀၀ ကုန်ကျကြောင်း၊  ငှက်ပျော စတင်စိုက်ပျိုးလာသည်မှာ ၅နှစ်ရှိပြီဖြစ်သည်။   ငှက်ပျောကို ၄လ တစ်ကြိမ် အခိုင် ၅၀ခန့် ခုတ်ရ၍၊ တစ်နှစ်တွင် အခိုင် ၁၅၀ခန့် ထွက်ရှိပြီး ဈေးကွက်တင်ပို့ကြောင်း စိုက်ပျိုးသူထံမှ သိရသည်။ ငှက်ပျောဖီး ထွက်ရှိမှု အနေဖြင့် စိုက်ပျိုးဧကပေါ်တွင် အခိုင် ၇၀၀-၈၀၀ ခန့် ထွက်ရှိသည်၊ ဖီးကြမ်း တစ်ခိုင်လျှင် ၆ဖီးမှ ၁၂ဖီး အထိ ထွက်ရှိကြောင်း သိရသည်။

   ၂၀၂၅ခုနှစ် ဇူလိုင်လ ငှက်ပျော ဈေးနှုန်းအနေဖြင့် ငှက်ပျော တစ်ဖီးကို ငွေကျပ် ၂၅၀၀ဖြင့် လက်ကား ဖြန့်ဖြူးရောင်းချရပြီး ငှက်ပျောဖီး တစ်ခိုင်ကို ငွေကျပ် ပျမ်းမျှ ၃၀၀၀၀ နှုန်းရရှိသည်။ မိုးတွင်းကာလ ရောက်ရှိပါက အပင်ဟောင်းနှင့် ငှက်ပျောပင်အကြမ်းများကို ရှင်းလင်းပြီး ငှက်ပျောပင် တစ်ပင်စီသာ ချန်ထား၍ အပင်ပြန်လည်ပျိုးရသည်၊   စိုက်ပျိုးမှု  အကျိုးအမြတ်အနေဖြင့်  တစ်နှစ်အတွင်း ငွေကျပ် ၅၄၀၀၀၀၀ ခန့် အကျိုးအမြတ်ကျန်ရှိကြောင်း စိုက်ပျိုးသူထံမှ သိရသည်။

DOCA (ဧရာဝတီ)

    ဧရာဝတီတိုင်း ပုသိမ်မြို့နယ်အတွင်း  ယခုနှစ်ဖရဲသီးစိုက်ပျိုးမှုအောင်မြင်ပြီး ဈေးကောင်းရရှိနေခြင်း ကြောင့်တောင်သူများဝမ်းသာပျော်ရွှင်လျက်ရှိကြောင်းသိရပါသည်။ ပြီးခဲ့သောနှစ်များက ဖရဲသီးဈေးနှုန်းများ မတည်ငြိမ်မှုများကြောင့် အခက်အခဲများ ကြုံတွေ့ခဲ့ရသော်လည်း ယခုနှစ်တွင်ဈေးနှုန်းမြင့်တက်လာခြင်းက တောင်သူများအတွက် မျှော်လင့်ချက်များ ပြန်လည်အသက်ဝင်စေခဲ့သည်။ လက်ရှိဈေးကွက်၌ ပုသိမ်တွင်ဖရဲသီး တစ်လုံးလျှင်၁၅၀၀ကျပ်မှ ၃၀၀၀ကျပ်အထိ ပေါက်ဈေးရှိနေပြီးအရွယ်အစားနှင့်အမျိုးအစားအလိုက်ကွာခြားမှုရှိကြောင်းကို ဒေသခံများက ပြောကြားပါသည်။ အထူးသဖြင့်ရန်ကုန်မြို့ကြီးများသို့ တင်ပို့ရောင်းချမှုများပြားပြီး ဝယ်လိုအားမြင့်တက်နေခြင်းက ဈေးကောင်းရခြင်း၏အဓိကအကြောင်းအရင်းဖြစ်ပါသည်။

    ဧရာဝတီတိုင်းဒေသကြီးသည်  မြေဆီမြေဩဇာကောင်းမွန်ပြီး ဖရဲသီးစိုက်ပျိုးရန် သင့်တော်သောရာသီဥတု ရှိသောကြောင့်ဖရဲသီးကို အဓိကသီးနှံအဖြစ် စိုက်ပျိုးကြသည်။ ဖရဲသီးဈေးကောင်းရရှိမှုကြောင့် တောင်သူများ အနေဖြင့်လာမည့်နှစ်များတွင် ဖရဲသီးစိုက်ပျိုးဧကတိုးချဲ့ရန် စဉ်းစားနေကြကြောင်း သိရှိရပါသည်။ အရည်အသွေးမြင့် ဖရဲသီးများထုတ်လုပ်နိုင်ရန်အတွက် စိုက်ပျိုးနည်းပညာများ ပိုမိုလေ့လာသင်ယူရန်စိတ်ဝင်စားမှုများလည်း ရှိနေပါသည်။  သို့သော်ဈေးကွက်တည်ငြိမ်ရေးနှင့် ရေရှည်ဖွံ့ဖြိုးတိုးတက်ရေးအတွက် အစိုးရနှင့်ပုဂ္ဂလိက ပူးပေါင်းဆောင်ရွက်မှုများလိုအပ်နေသေးကြောင်း တောင်သူများက ထောက်ပြပါသည်။ ယခုနှစ်ဧရာဝတီတိုင်း ဖရဲသီးဈေးကောင်းရရှိမှုသည်ဒေသခံတောင်သူများ၏ စီးပွားရေးကိုများစွာအထောက်အကူပြုခဲ့ပြီး နောင်နှစ်များအတွက်လည်း ကောင်းမွန်သောနမိတ်တစ်ခုဖြစ်ကြောင်း သတင်းရရှိပါသည်။

( DOCA ဧရာဝတီ)

   ဧရာ၀တီတိုင်းဒေသကြီး၊ ပုသိမ်ခရိုင်၊ ပုသိမ်မြို့ဈေးအတွင်းရောင်းချလျက်ရှိသော ကြက်သွန်နီလက်လီဈေးနှုန်းများမှာ ဇွန်လတတိယအပတ်မှ ဇွန်လနောက်ဆုံးအပတ်အထိ ကြက်သွန်နီအကြီးတစ်ပိဿာလျှင် ၂၀၀၀/ကျပ်၊အသေးတစ်ပိဿာလျှင် ၁၅၀၀/ကျပ်ဈေးနှုန်းဖြင့် လက်လီးရောင်းချခဲ့ပါသည်။ လက်ကားဈေးနှုန်းအနေဖြင့်အချိန်(၁၀)ပိဿာမှစတင်၍အိတ်လုံး ဈေးကြက်သွန်နီအကြီးတစ်ပိဿာလျှင်၁၈၀၀/ကျပ်၊ ကြက်သွန်နီအလတ် တစ်ပိဿာလက်ကား ဈေးနှုန်းမှာ ၁၆၀၀/ကျပ်၊ ကြက်သွန်နီအသေး လက်ကားဈေးနှုန်းတစ်ပိဿာလျှင် ၁၃၀၀/ကျပ် ဈေးနှုန်းဖြင့် ဈေးငြိမ်နေပြီး ဇူလိုင်လဆန်းတွင် ကြက်သွန်နီဈေးနှုန်းများ ကျဆင်းသွားပြီး ကြက်သွန်နီ (အကြီး)၁၆၀၀/ကျပ်ဈေးသို့ ကျဆင်းခဲ့ပြီးဇူလိုင်လတတိယအပတ်တွင် ကြက်သွန်နီဈေးနှုန်းများ ၁၈၀၀/၂၀၀၀ကျပ်ဈေးနှုန်းသို့ မြင့်တက်သွားကြောင်းဈေးကွက်အတွင်းမှ သိရှိရပါသည်။

    အာလူးဈေးကွက်ရောင်းချမှုအနေဖြင့် အာလူးတစ်ပိဿာလျှင် ဇွန်လတတိယအပတ်တွင် ၅၀၀၀/ကျပ်ဈေးရှိခဲ့သော်လည်း ယခုဇူလိုင်လတတိယအပတ်တွင်လည်း အာလူးဈေးနှုန်းများမှာ ၅၀၀၀/ကျပ်ဈေးဖြင့်ရောင်းချနေသဖြင့် ဈေးငြိမ်နေကြောင်း သိရှိရပါသည်။

( DOCA ဧရာဝတီ)

    အသီးအနှံတို့၏ ဘုရင်ဟု တင်စားခေါ်ဝေါ်ကြသည့်ဒူးရင်းသီးသည်    မြန်မာ့ဈေးကွက်တွင်ရာသီပေါ်သီးနှံအဖြစ်ပေါ်ပေါက်လာပြီးနောက်ပိုင်းတွင် ရောင်းအားကောင်းမွန်လျက်ရှိသည်။   မွန်ပြည်နယ်မှ အဓိကထွက်ရှိသော ဒူးရင်းသီးများသည် ယခုနှစ်တွင် အထွက်နှုန်းကောင်းမွန်ပြီး ဝယ်လိုအားမြင့်မားမှုကြောင့် ဈေးနှုန်းများမြင့်တက်နေသည်ဟု သိရှိရသည်။  လက်ရှိဈေးကွက်တွင် ဒူးရင်းသီးတစ်လုံးလျှင်အရွယ်အစားအလိုက် ၁၅၀၀၀၀ကျပ်မှ ၄၀၀၀၀၀ကျပ်အထိပေါက်ဈေးရှိနေသည်။ အထူးသဖြင့် မွန်ဒူးရင်းသီးနှင့် ကရင်ဒူးရင်းသီးများသည်ဈေးကွက်တွင် လူကြိုက်များပြီးရောင်းအားအကောင်းဆုံးဖြစ်သည်။

    ဒူးရင်းသီးရာသီသည်  ဇွန်လမှ ဩဂုတ်လအထိ အထွက်များလေ့ရှိပြီး ယခုနှစ်တွင် မိုးအစောပိုင်းရွာသွန်းမှုကြောင့် ဒူးရင်းသီးအထွက်နှုန်းမှာ ပုံမှန်အတိုင်းရှိသည်ဟု ဒူးရင်းစိုက်တောင်သူများကပြောသည်။     သို့သော် မြန်မာနိုင်ငံသားများသာမက ပြည်ပမှဝယ်ယူသူများ      အထူးသဖြင့် တရုတ်နိုင်ငံမှဝယ်လိုအားမြင့်တက်လာခြင်း ကြောင့်ဈေးနှုန်းများမှာယခင်နှစ်များထက် ပိုမိုမြင့်တက်လာခြင်းဖြစ်ကြောင်း    ဒူးရင်းကုန်သည်များက သုံးသပ် ပြောကြားပါသည်။    အနံပြင်းသော်လည်း အရသာထူးကဲမှုကြောင့် လူကြိုက်များပြီး   ဒူးရင်းသီးစိုက်ပျိုးသူများအတွက်လည်း စီးပွားရေးကောင်းသောသီးနှံတစ်မျိုးဖြစ်နေရခြင်းဖြစ်ပါသည်။

( DOCA ဧရာဝတီ)