ပြည်တွင်းကုန်သွယ်မှုသတင်း

      မကွေးတိုင်းဒေသကြီး၊ မကွေးခရိုင်၊ မကွေးမြို့နယ်ရှိ မကြီးကန်ကျေးရွာ၊ ဆားတိုင်ကန်၊ နွားကူး၊ စမ်းကန်ကျေးရွာများသည် စိုက်ပျိုးရေးအဓိကထားလုပ်ကိုင်ပြီး ပဲ၊ နှမ်း၊ ပဲစဉ်းငုံ၊ ပဲတီစိမ်း သီးနှံများကို ရာသီအလိုက် စိုက်ပျိုးလျက်ရှိကြောင်း သိရသည်။

   မကြီးကန်ရွာနေ ပဲစိုက်တောင်သူတစ်ဦး၏ ပြောကြားချက်အရ မိုးမြေပဲများ စိုက်ပျိုးရာတွင် စွန်တာနီ(လုံးဆံနီ)နှင့် ဗီယက်နမ်ရေဆင်း(လုံးဆံဖြူ)မျိုးများကိုသာ အဓိကထားစိုက်ပျိုးကြကြောင်း၊ ထွန်ကြောင်းဆွဲအစေ့ချစနစ်ဖြင့် စိုက်ပျိုးထားကြောင်း၊ ၂၀၂၅ခုနှစ်၊ မေလဆန်းတွင် စတင်စိုက်ပျိုး ပြီး ဇူလိုင်လ(တတိယပတ်)တွင် တူးဖော်ရိတ်သိမ်းကြောင်း၊ (၁)ဧကလျှင် မျိုးပဲဆံ(၂)တင်းခန့် ကုန် ကျကြောင်း၊ မျိုးအနေဖြင့် ယခင်နှစ်က မိမိယာခင်းမှထွက်ရှိသော မြေပဲများကို မျိုးအဖြစ်ဖယ်ချန်၍ စိုက်ပျိုးခြင်းဖြစ်ကြောင်း၊ ကုန်ကျစရိတ်အနေဖြင့် စက်မောင်းခ၊ လုပ်အားခ၊ ဆေးဖြန်းခ၊ ရိတ်သိမ်း ခူးဆွတ်ခနှင့် အခြားစရိတ်များအပါအဝင် စုစုပေါင်း ကျပ်(၁၁)သိန်းကျော်ခန့် ကုန်ကျကြောင်း၊ အထွက်နှုန်းအနေဖြင့် (၁)ဧကလျှင် မြေပဲတောင့် တင်း(၁၀၀)အထိ ထွက်ရှိပြီး ၂၀၂၅ခုနှစ်၊ ဇူလိုင်လ (စတုတ္ထပတ်)တွင် မြေပဲတောင့်တစ်တင်းလျှင် ကျပ်(၂၂၀၀၀)ဖြင့် ရောင်းချ၍ အကျိုးအမြတ်အနေ ဖြင့် (၁)ဧကလျှင် ကျပ်(၁၁)သိန်းခန့်ရရှိကြောင်း စျေးကွက်အနေဖြင့် ယာခင်းထဲသို့ ပွဲစားကိုယ်တိုင် တိုက်ရိုက်လာရောက်ဝယ်ယူကြောင်း သိရှိရသည်။

DOCA(မကွေး)

     မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့၊ ဇေယျာသီရိဈေး၌ သံပုရာသီးနှင့် ရှောက်သီးများကို မြို့ပေါ်ရပ်ကွက်များနှင့် မြို့ပတ်ဝန်းကျင်ရှိကျေးရွာများမှ တနိုင်တပိုင်စိုက်ပျိုး ရောင်းချကြသည့်အပြင် သရက်၊ တောင်တွင်းကြီး၊ မင်းဘူး၊ မကွေးမြို့တို့မှလည်း မှာယူရောင်းချ ကြကြောင်း သိရသည်။

          ၂၀၂၅ခုနှစ်၊ ဇူလိုင်လ(စတုတ္ထပတ်)တွင် သံပုရာသီး(၁)လုံးလျှင် (အလုံး အကြီး၊ အသေး)ပေါ် မူတည်၍ ကျပ်(၅၀-၁၀၀)၊ ရှောက်သီး(၁)လုံးလျှင် ကျပ်(၁၅၀)ဖြင့် အရောင်းအဝယ်ဖြစ်လျက်ရှိပြီး ယခင်ဇွန်လ(ပထမပတ်)တွင် သံပုရာသီး(၁)လုံးလျှင် ကျပ်(၂၀၀)၊ ရှောက်သီး(၁)လုံးလျှင် ကျပ် (၃၀၀)ဖြင့် အရောင်းအဝယ်ဖြစ်ခဲ့၍ ဈေးနှုန်းနှိုင်းယှဉ်ပါက ယခုတစ်ပတ်တွင် သံပုရာသီး ကျပ်(၅၀- ၁၀၀)၊ ရှောက်သီး ကျပ်(၁၅၀)ဈေးနှုန်းကျဆင်းလာကြောင်း သိရသည်။ ယခုအချိန်တွင် မင်းလှ မြို့ပေါ် ရပ်ကွက်များနှင့် မြို့ပတ်ဝန်းကျင်ရှိ ကျေးရွာများတွင် သံပုရာသီး၊ ရှောက်သီးများ လှိုင်လှိုင် ထွက်ရှိချိန်ဖြစ်၍ ဈေးနှုန်းမှာ ကျဆင်းရခြင်းဖြစ်ကြောင်း သိရှိရသည်။

DOCA(မကွေး)

  မကွေးတိုင်ဒေသကြီး၊ မကွေးခရိုင်၊ မကွေးမြို့ပေါ်ရှိ ဈေးများတွင် ရာသီမရွေးစိုက်ပျိုးနိုင်သော သီးနှံတစ်မျိုးဖြစ်သည့် ရုံးပတီသီးများ နေ့စဉ်ဝင်ရောက် အရောင်းအဝယ်ဖြစ်လျက်ရှိကြောင်း သိရသည်။

          ၂၀၂၅ခုနှစ်၊ ဇူလိုင်လ(စတုတ္ထပတ်)တွင် အရောင်းအဝယ်ဖြစ်နေသောဈေးမှာ ရုံးပတီသီး လက်ကားဈေး တစ်ပိဿာလျှင် ကျပ်(၂၃၀၀)၊ လက်လီဈေး ကျပ်(၂၈၀၀)ဖြင့် အရောင်းအဝယ် ဖြစ် လျက်ရှိပြီး ယခင်(ပထမပတ်)တွင် လက်ကားဈေး ကျပ်(၂၅၀၀)၊ လက်လီဈေး ကျပ်(၃၀၀၀)ဖြင့် အရောင်းအဝယ်ဖြစ်ခဲ့၍ ဈေးနှုန်းနှိုင်းယှဉ်ပါက ယခုတစ်ပတ်တွင် ကျပ်(၂၀၀)ဈေးနှုူန်းကျဆင်း လာကြောင်း သိရသည်။ ယခုအချိန်တွင် မကွေး၊ တောင်တွင်း၊ မင်းဘူးမြို့နှင့် နီးစပ်ရာကျေးရွာတို့မှ ရုံးပတီသီးအထွက်နှုန်းများလာသောကြောင့် ဈေးနှုန်းကျဆင်းခြင်းဖြစ်ကြောင်း သိရသည်။

DOCA(မကွေး)

      ကျွန်းလှမြို့နယ်အတွင်းရှိ ကျေးရွာများမှ စိုက်ပျိုးကြသော ရွှေဖရုံသီးများကို မန္တလေးမြို့တို့မှ မှာယူ ရောင်းချရကြောင်း သိရှိရပါ သည်။

      ၂၀၂၅ ခုနှစ်၊ ဇူလိုင်လ နောက်ဆုံးအပတ်တွင် ရွှေဖရုံသီး ဈေးနှုန်းအနေဖြင့် ရွှေဖရုံသီး တစ်ပိဿာလျှင်(၃၀၀၀)ကျပ်၊ (၅၀) ကျပ်သားလျှင် (၁၅၀၀)ကျပ် နှင့် တစ်စိတ်လျှင်(၅၀၀)ကျပ် ဈေးနှုန်းတို့ဖြင့် လည်းကောင်း၊ ဘူးသီး ဈေးနှုန်း အနေဖြင့် ဘူးသီး အလုံး(အကြီး) တစ်လုံးလျှင် (၃၀၀၀) ကျပ်၊ ဘူးသီး(အသေး)တစ်လုံးလျှင်(၂၀၀၀)ကျပ် နှင့် ဘူးသီး တစ်စိတ်လျှင်(၅၀၀)ကျပ် ဈေးနှုန်းဖြင့် ရောင်းချလျက်ရှိကြောင်း သိရပါသည်။

DOCA(စစ်ကိုင်း)

    ကျွန်းလှမြို့တွင်  ကုန်မျိုးစုံရောင်းဝယ်ရေးဆိုင်များ နှင့် မြို့တွင်းရပ်ကွက်ဈေးများတွင် မလိုင်လုံး၊ မလိုင်ချောင်းနှင့် ကုလားပဲချောင်းများကို မန္တလေးမြို့တို့မှ မှာယူ ရောင်းချလျက်ရှိကြောင်း သိရှိရပါသည်။

    ၂၀၂၅ ခုနှစ်၊ ဇူလိုင်လ နောက်ဆုံးပတ်တွင် ရောင်းချနေသော မလိုင်လုံး ဈေးနှုန်းအနေဖြင့် တစ်ပိဿာလျှင်(၁၃၀၀၀)ကျပ်၊ (၅၀)ကျပ်သားလျှင်(၆၅၀၀)ကျပ် ဈေးနှုန်း တို့ဖြင့် လည်းကောင်း၊ ကုလားပဲချောင်း တစ်ပိဿာလျှင် (၁၀၀၀၀) ကျပ်၊ (၅၀)ကျပ်သားလျှင်(၅၀၀၀)ကျပ် နှင့် (၂၅)ကျပ်သား လျှင်(၂၅၀၀) ကျပ် ဈေးနှုန်းတို့ဖြင့် အရောင်းအဝယ်ဖြစ်လျက်ရှိကြောင်း ကုန်မျိုးစုံရောင်းချနေသည့် လုပ်ငန်းရှင်များထံမှ သိရသည်။

DOCA(စစ်ကိုင်း)