ပြည်တွင်းကုန်သွယ်မှုသတင်း

     သံပုရာသီးကိုနွေသီးနှင့် မိုးသီးဟူ၍ (၂)မျိုးရှိပြီးနွေရာသီတွင် သီးသောအသီးမှာအထွက်နည်း၍ တန်ဖိုးလည်းကြီးပါသည်။ယခုအချိန်ဖြစ်သောမိုးရာသီကာလတွင် သံပုရာသီများလှိုင်လှိုင်ထွက်ပေါ်လာချိန်ဖြစ်၍ တစ်ပင်လျှင်အလုံးရေ(၅၀၀)ခန့်အသီးနှုန်းအားကောင်းလာပါသည်။ထို့ကြောင့် သံပုရာသီးကို နွေသီးနှင့် မိုးသီးဈေးနှုန်းနှိုင်းယှဉ်လျှင် ဈေးကွာခြားချက်များရှိ၍ တစ်နိုင်တစ်ပိုင်စိုက်ပျိုးသူများအနေဖြင့်လည်း အပိုဝင်ငွေများ ရရှိလာမည်ဖြစ်ပါသည်။

    သံပုရာသီးဈေးမှာလည်း ကျဆင်းလာခဲ့၍ ရောင်းချသောဈေးနှုန်းများမှာ အကြီးတစ်လုံးလျှင် (၁၀၀) ကျပ်နှင့် အသေးတစ်လုံးလျှင် (၅၀) ကျပ်ဖြင့်ဈေးကွက်များတွင် ရောင်းချလျက်ရှိပါသည်။ကန်ကြီးထောင့်မြို့၊မြို့မဈေးသစ်ဈေးကွက်တွင် ရောင်းချနေသောသံပုရာသီးများမှာလည်း ကန်ကြီးထောင့်ဒေသအတွင်း ထွက်ရှိသောသံပုရာသီးများဖြစ်ပြီး ရန်ကုန်မြို့သို့လည်း တင်ပို့ရောင်းချလျက်ရှိကြောင်း သိရပါသည်။

(Doca ဧရာဝတီ)

     ယခုအချိန်သည် ဧရာဝတီတိုင်းဒေသကြီး ၊ ပုသိမ်မြို့နယ်တွင် ဒေသထွက် သီးနှံ နှင့် ကုန်စိမ်း များဖြစ်ထွန်းသည့် ရာသီဖြစ်သည့်အလျောက် ဇူလိုင်လအတွင်း၌တစ်ရက်လျှက် ဒေသထွက် ခဝဲသီးတောင့် (၄၀၀၀၀) မှ (၄၅၀၀၀) အထိ ဝယ်ယူမှုအားကောင်းလာကြောင်း ကုန်စိမ်းရောင်းဝယ်ရေး ပွဲရုံပိုင်ရှင်များထံမှသိရှိရပါတယ်။ ပုသိမ်မြို့ဒေသထွက် ခဝဲသီးများသည် အရည်အသွေးကောင်းပြီး သန့်ရှင်းလတ်ဆက်သည့်အတွက် ဒေသအတွင်း သာမက ရန်ကုန်ဈေးကွက်များအထိ အဝယ် လိုက်နေခြင်းဖြစ်ပြီး ခဝဲသီးတောင့်  (၁၀၀) လျှင် ငွေကျပ်(၂၅၀၀၀) အထိ  ပေါက်ဈေးရှိနေကြောင်း သိရှိရပါ တယ်။

DOCA (ဧရာဝတီ)

   ဧရာဝတီတိုင်းဒေသကြီး၊ မအူပင်ခရိုင်၊ စားသုံးသူရေးရာဦးစီးဌာန၊ ခရိုင်အတွင်း စပါး/ဆန် သိုလှောင်ထားရှိသူများ ကို စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ အမိန့် ၈၂/၂၀၂၄ စီးပွားရေးလုပ်ငန်းဆောင်ရွက်ရန်အလို့ငှာ ဆန်တန်ချိန် ၂၅ နှင့်အထက် သိုလှောင်ရုံ သို့မဟုတ်. စပါးတင်း ၂၅၀၀ နှင့်အထက် သိုလှောင်ရုံတစ်မျိုးမျိုးကို ပိုင်ဆိုင်သူသည် www.myro.com.mm တွင်. သတ်မှတ်ထားသည်နှင့်အညီ မှတ်ပုံတင်လျောက်ထားရန် ထုတ်ပြန်ခဲ့ပြီး သိုလှောင်ထားရှိသူလုပ်ငန်းရှင်များမှာ myro တွင်မှတ်ပုံတင်ထားရှိပြီး မအူပင်မြို့နယ်အနေဖြင့် ၃၆လုံး သိုလှောင်ရုံ မှတ်ပုံတင်ထားရှိပြီး ဖြစ်ပါသည်။

  မအူပင်ခရိုင်၊ မအူပင်မြို့နယ်မှ  တောင်သူ၊ စက်ပိုင်၊ ကုန်သည်တို့ သိုလှောင်ထားရှိရာလုပ်ငန်းများတွင် စပါး ဆန် လက်ကျန်စာရင်းများကို  လစဉ် လဆန်း ၇ရက်နေ့တွင် myro၌ ကုန်ရ၊ ကုန်ထုတ်၊ လက်ကျန် စပါး/ဆန် ဖြည့်သွင်းရေး အခြေအနေများ ဖြည့်သွင်းဆောင်ရွက်နိုင်ရေးကို ကြပ်မတ်ဆောင်ရွက်လျက်ရှိပြီး စာရင်းကောက်ယူခြင်းများ ဆောင်ရွက်လျက်ရှိပါသည်။ လိုအပ်ပါက ဒေသန္တရာအဖွဲ့အစည်းများဖြင့် မြေပြင်ကွင်ဆင်းအမှန်တကယ် သိုလှောင်မှုအခြေအနေများကို ကွင်ဆင်းခြင်းများ လုပ်ဆောင်လျက်ရှိသည်။ မအူပင်မြို့နယ် ဆန်/စပါး လက်ကျန်အခြေအနေများမှာ စပါးအနေဖြင့် တောင်သူ ၁၅၄၈၉၅၄။ စက်ပိုင် စပါးတင်း ၁၈၈၅၀၀၊ ကုနသည် စပါးတင်း ၂၀၇၃၀၀ စုစုပေါင်း စပါးတင်း ၁၉၄၄၇၄၅ နှင့်၊ ဆန်လက်ကျန် တောင်သူ အိတ် ၈၀၀၊ ကုန်သည် ဆန်အိတ် ၄၄၀၀၊ စုစုပေါင်း ၅၂၀၀အိတ်ရှိကြောင်း မြို့နယ်ကွင်းဆင်းစစ်ဆေးခြင်းစာရင်းများအရ သိရသည်။

DOCA(ဧရာဝတီ)

     ဧရာဝတီတိုင်းဒေသကြီး ပုသိမ်မြို့အတွင်းရှိ ဈေးကြီးများနှင့် ကုန်စည်ဒိုင်များတွင် ပုစွန်ခြောက်များ ပုံမှန်ရောင်းချလျက်ရှိပြီး ဒေသတွင်းထွက်နှင့် ရခိုင်ဘက်မှ တင်ပို့လာသော ပုစွန်ခြောက်များ ရောင်းချလျက်ရှိကြောင်း သိရသည်။ ပုသိမ်မြို့သည် ပုစွန်ခြောက်ထုတ်လုပ်ရာ ဒေသအဖြစ် ထင်ရှားပြီး ဒေသတွင်းထွက် ပုစွန်ခြောက်များမှာ အရည်အသွေးကောင်းမွန်သည်ဟု နာမည်ကြီးသည်။ ပုစွန်ခြောက်သည် ရာသီမရွေး ပုံမှန်အရောင်းအဝယ်ဖြစ်သော ကုန်ခြောက် ပစ္စည်းတစ်မျိုးလည်းဖြစ်သည်။

    ၂၀၂၅ ခုနှစ် စက်တင်ဘာလကုန်ပိုင်းအတွင်း ပုသိမ်မြို့ဈေးကွက်တွင် ပုစွန်ခြောက် အကောင်ကြီးစား တစ်ပိဿာလျှင် ကျပ် ၁၅၅,၀၀၀ မှ ၁၆၀,၀၀၀ အထိ၊ အလတ်စား တစ်ပိဿာလျှင် ကျပ် ၁၂၅,၀၀၀ မှ ၁၃၀,၀၀၀ အထိ၊ အသေးစား တစ်ပိဿာလျှင် ကျပ် ၁၁၀,၀၀၀ မှ ၁၂၀,၀၀၀ အထိ ရောင်းချလျက်ရှိကြောင်း သိရသည်။ ပုစွန်ခြောက်အသေးအမှုန့် ဈေးနှုန်းမှာ တစ်ပိဿာလျှင် ကျပ် ၉၅,၀၀၀ မှ ၁၀၀,၀၀၀ အထိ ရောင်းချလျက်ရှိပြီး ဟင်းခတ် အမွှေးအကြိုင်အဖြစ် နေ့စဉ်အသုံးပြုမှုများကြောင့် ဝယ်လိုအားကောင်းမွန်လျက်ရှိကြောင်း သိရသည်။

     ပုသိမ်မြို့ ကုန်စည်ဒိုင်တစ်ခုမှ ကုန်သည်တစ်ဦးက "ပုသိမ်ထွက် ပုစွန်ခြောက်တွေဟာ အရည်အသွေးကောင်းတဲ့အတွက် ပြည်တွင်းဈေးကွက်မှာရော နိုင်ငံတကာတင်ပို့မှုမှာပါ ဝယ်လိုအား မြင့်မားပါတယ်။ ယခုလအတွင်း ပုစွန်ခြောက်ဈေးနှုန်းများ တည်ငြိမ်မှုရှိပြီး ပုံမှန်အရောင်းအဝယ် ဖြစ်နေပါတယ်" ဟု ပြောကြားသည်။ ပုသိမ်မြို့မှ ပုစွန်ခြောက်များကို ရန်ကုန်၊ မန္တလေးစသော မြို့ကြီးများသို့လည်းကောင်း၊ နိုင်ငံတကာဈေးကွက်များသို့လည်းကောင်း တင်ပို့ရောင်းချလျက် ရှိကြောင်း သိရသည်။

DOCA (ဧရာဝတီ)

     ဧရာဝတီတိုင်းဒေသကြီး ပုသိမ်မြို့နယ်အတွင်း ဩဂုတ်လ စတုတ္ထပတ်ကာလအတွင်း ကြက်သွန်ဖြူဈေးနှုန်းများ အနည်းငယ်မြင့်တက်လာကြောင်း ဒေသခံကုန်သည်များထံမှ သိရသည်။၂၀၂၅ ခုနှစ် ဩဂုတ်လ စတုတ္ထပတ်အတွင်း ပုသိမ်မြို့နယ်ဈေးကွက်တွင် ကြက်သွန်ဖြူ ရှမ်းဥအလုံးကြီး တစ်ပိဿာလျှင် ကျပ် ၁၃,၅၀၀ မှ ၁၄,၅၀၀ အထိ၊ ဗမာဖြူ တစ်ပိဿာလျှင် ကျပ် ၆,၅၀၀ မှ ၈,၅၀၀ အထိ ရောင်းချလျက်ရှိရာ ယခင်ပတ်များနှင့်နှိုင်းယှဉ်ပါက ပိဿာလျှင် ကျပ် ၅၀၀ မှ ၁,၀၀၀ အထိ ဈေးနှုန်းမြင့်တက်လာကြောင်း သိရသည်။

          ကြက်သွန်ဖြူဗမာဖြူကို ၁၀ ကျပ်သားလျှင် ကျပ် ၈၅၀ မှ ၉၀၀ အထိ ရောင်းချလျက်ရှိပြီး ယခင်ပတ်ထက် ကျပ် ၅၀ မှ ၁၀၀ အထိ မြင့်တက်လာကြောင်း ဈေးသည်များက ဆိုသည်။ စားသောက်ဆိုင်များ၊ ထမင်းဆိုင်များနှင့် အိမ်ရှင်မများသည် အစားအသောက်ချက်ပြုတ်ရာတွင် အနံ့အရသာထွက်ရှိရန် ကြက်သွန်ဖြူကို အများဆုံးအသုံးပြုသည့်အတွက် နေ့စဉ်အရောင်း အဝယ်များ ရှိနေကြောင်း သိရသည်။

          ပုသိမ်မြို့နယ် ဟင်းသီးဟင်းရွက်ကုန်စည်ရောင်းဝယ်ရေးလုပ်ငန်းရှင်တစ်ဦးက "ယခုလ အတွင်း ကြက်သွန်ဖြူဈေးနှုန်းများ အနည်းငယ်မြင့်တက်လာတာကို တွေ့ရပါတယ်။ ဒေသ တွင်းထွက် ကြက်သွန်ဖြူထုတ်လုပ်မှု အနည်းငယ်လျော့နည်းလာပြီး ဝယ်လိုအားမြင့်မားနေ တာကြောင့် ဈေးနှုန်းမြင့်တက်ရခြင်းဖြစ်နိုင်ပါတယ်" ဟု ရှင်းပြသည်။ ပုသိမ်မြို့နယ်အတွင်းရှိ ဈေးများတွင် ကြက်သွန်ဖြူအရောင်းအဝယ်သည် ပုံမှန်ဖြစ်လျက်ရှိပြီး နေ့စဉ်စားသုံးကုန်ပစ္စည်း ဖြစ်သည့် အတွက် ဝယ်လိုအားလည်း မပြတ်ရှိနေကြောင်း သိရသည်။

DOCA (ဧရာဝတီ)