ပြည်တွင်းကုန်သွယ်မှုသတင်း

        ကျွန်းလှမြို့၊ သစ်ရာမြိုင်ဈေးသည်  ဈေးရောင်းသူ ဈေးဝယ်သူများနှင့် စည်ကားသိုက်မြိုက်လျက်ရှိပြီး ကုန်မျိုးစုံရောင်းချသည့် ဆိုင်များတွင် ဆီတို့ဟူးကို ပုံးအကြီး အသေး နှင့် (၅၀၀)ကျပ်ဖိုး (၁၀၀၀)ကျပ်ဖိုးတို့မှအစ ရောင်းချပေးလျက်ရှိကြောင်းသိရသည်။ ဆီတို့ဟူးကို အထက်ပိုင်းဆို မိုးညှင်းမြို့နှင့် အောက်ပိုင်း တောင်ကြီးမြို့တို့မှ ဝယ်ယူရောင်ချလျက်ရှိကြောင်း သိရသည်။

             ၂၀၂၅ ခုနှစ်၊ ဩဂုတ်လ တတိယပတ်၌ ကျွန်းလှမြို့တွင် ရောင်းချလျက်ရှိသော ဆီတို့ဟူးဈေးနှုန်းမှာ ဆီတို့ဟူး(၁၃)ပိဿာ ပုံးကြီး တစ်ပုံးလျှင်(၁၉၅၀၀၀)ကျပ်၊ ဆီတို့ဟူး(၃၀)ကျပ်သားပါ ပုံးသေ တစ်ပုံးလျှင်(၄၀၀၀)ကျပ် နှင့် (၁၀)ကျပ်သားလျှင်(၁၃၀၀)ကျပ် ဈေးနှုန်းတို့ဖြင့် ရောင်းချလျက်ရှိကြောင်း ယခင်အပတ်ထက် ဆီတို့ဟူး တစ်ပိဿာလျှင်(၄၀၀၀)ကျပ် ဈေးနှုန်းကျဆင်းခဲ့ပြီး အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(စစ်ကိုင်း)

          စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့တွင် ငှက်ပျောပင်များကို တစ်နိင်တစ်ပိုင်အနေဖြင့် စိုက်ပျိုးလျက်ရှိပါသည်။ ငှက်ပျောပင်စိုက်ပျိုးရာတွင် မိမိတို့ပိုင်ဆိုင်သည့် ယာမြေကွက်များ (သို့မဟုတ်) အိမ်ခြံဝင်းအတွင်းရှိမြေကွက်လပ် ပတ်ချာလည်များတွင် စိုက်ပျိုးကြပြီး ငှက်ပျောစိုက်ပျိုးသည့် အမျိုးအစားများမှာ ဖီးကြမ်း(စိမ်း)၊ ဖီးကြမ်း(ငှက်ပြာ)၊ ကသည်းငှက်ပျော(ခေါ်)ရခိုင်ငှက်ပျော၊ ဝက်မလွတ်ငှက်ပျောနှင့် ဝက်မလွတ်(ဘရာဇီး)ငှက်ပျောတို့ကို အများဆုံးစိုက်ပျိုးလျက်ရှိပါသည်။

          ၂၀၂၅ ခုနှစ်၊ ဩဂုတ်လ တတိယပတ်အတွင်း ဖြစ်ပေါ်နေ‌သော ငှက်ပျောသီးဈေးနှုန်းအနေဖြင့် ဖီးကြမ်းငှက်ပျောသီး အကြီးတစ်ဖီးလျှင်(၃၅၀၀)ကျပ်၊ အသေးတစ်ဖီး (၃၀၀၀)ကျပ်၊ ဝက်မလွတ် (ဘရာဇီး)ငှက်ပျော အကြီးတဖီးလျှင်(၃၅၀၀)ကျပ်၊ အသေးတစ်ဖီး (၃၀၀၀)ကျပ်၊ ကသည်းငှက်ပျော (ခေါ်)ရခိုင် ငှက်ပျောသီး  အကြီးတစ်ဖီးလျှင်(၂၅၀၀)ကျပ်၊ အသေးတစ်ဖီး (၂၀၀၀) ကျပ် ဝက်မလွတ် ငှက်ပျောရိုးရိုး အကြီးတစ်ဖီးလျှင်(၂၅၀၀)ကျပ် နှင့် အသေး တစ်ဖီး(၂၀၀၀)ကျပ် ဈေးနှုန်းအသီးသီးတို့ဖြင့် ရောင်းချလျက်ရှိသောကြောင့် ယခင်အပတ်နှင့် နှိုင်းယှဥ်လျှင် ဖီးကြမ်းငှက်ပျောသီးဈေးနှုန်း အနည်းငယ်မြင့်တက်လာပြီး အရောင်းအဝယ်ဖြစ်လျက်ရှိကြောင်း ငှက်ပျောသီးရောင်းချသူထံမှ သိရှိရပါသည်။

DOCA(စစ်ကိုင်း)

          ကျွန်းလှမြို့နယ် သံဘိုကျေးရွာ၊ ရှမ်းစုကျေးရွာတို့မှ ထွက်ရှိသည့် ဒေသထွက် ခရမ်းချဉ်သီးများ ဈေးကွက်အတွင်းသို့ ဝင်ရောက်မှုနည်းပါးလာသည့်အတွက် မန္တလေးမြို့နှင့် ရှမ်းပြည်နယ် အောင်ပန်းမြို့တို့မှ မှာယူရောင်းချလျက်ရှိကြောင်း သိရသည်။

          ၂၀၂၅ ခုနှစ်၊  ဩဂုတ်လ တတိယပတ်တွင် ပိတောက်မြိုင်ဈေး၌ ဖြစ်ပေါ်နေသော ခရမ်းချဉ်သီးဈေးနှုန်းအနေဖြင့် ခရမ်းချဉ်သီး အလုံးကြီး တစ်ပိဿာလျှင်(၅၀၀၀)ကျပ်၊ (၅၀)သားလျှင်(၂၅၀၀)ကျပ်နှင့် (၂၅)ကျပ်သားလျှင် (၁၃၀၀)ကျပ်၊ ခရမ်းချဉ်သီးအလုံးသေး တစ်ပိဿာလျှင်(၄၀၀၀)ကျပ်၊ (၅၀)သားလျှင်(၂၀၀၀)ကျပ် နှင့် (၂၅) ကျပ်သားလျှင်(၁၀၀၀)ကျပ်ဈေးနှုန်းတို့ဖြင့် ယခင်အပတ်ထက် ခရမ်းချဉ်သီးဈေး  တစ်ပိဿာလျှင် (၃၀၀၀) ကျပ် ဈေးနှုန်း ပြန်လည်ကျဆင်းလာပြီး အရောင်းအဝယ် ဖြစ်လျက်ရှိကြောင်း သိရှိရပါသည်။

DOCA(စစ်ကိုင်း)

          ကျွန်းလှမြို့နယ်တွင် မိသားစုစားဝတ်နေရေးအတွက် ပန်းမျိုးစုံရောင်းချခြင်းလုပ်ငန်း လုပ်ကိုင်ကြရာတွင် နှင်းဆီပန်းအရောင်မျိုးစုံ၊ နှင်းပန်း၊ ဂန္ဓမာပန်း၊ ကံကော်ပန်း၊ အောင်သပြေပန်း၊ အာစီယံသပြေပန်း၊ သစ္စာပန်း၊ စံပါယ်ပန်း၊ ဇွန်ပန်း ဂမုန်းပန်း စသည်တို့ကိုလည်း ရောင်းချကြပါသည်။ ကံကော်ပန်းသည် ဘူရားပန်းကပ်လှူရန်အတွက်သာ အသုံးပြုကြသည်မဟုတ်ပဲ ယတြာချေရာတွင်လည်းကောင်း  အမျိုးသမီးထုများ ဦးခေါင်းတွင် အလှပန်ဆင်ရန်အတွက်လည်းကောင်း အသုံးပြုကြပြီး ကံကော်ပန်း၏ ရနံ့သည်မွှေးကြိုင်နေသော အဆင်းအနံ့ရှိသည့်အတွက် လူတိုင်းကကြိုက်နှစ်သက်ကြပြီး ရောင်းကောင်းသည့် ပန်းတစ်မျိုးလည်းဖြစ်ပါသည်။ ကံကော်ပန်းများကို မိမိတို့ဒေသတွင်းထွက်ရှိသည်များကိုသာ ဝယ်ယူရောင်းချကြောင်း သိရှိရပါသည်။

        ၂၀၂၅ခုနှစ်၊  ဩဂုတ်လ တတိယပတ်တွင် ကံကော်ပန်းဈေးနှုန်းအနေဖြင့် ကံကော်ပန်း(၅)ခက်ပါ တစ်စီး လျှင်(၂၀၀၀)ကျပ်၊ (၁၀)စီးတစ်ထုံးလျှင်(၁၈၀၀၀)ကျပ် ဈေးနှုန်းဖြင့်လည်းကောင်း ကံကော်ပန်း အပွင့် (၅/၇)ပွင့်ပါ တစ်ကုံးလျှင်(၃၅၀)ကျပ် ငွေကျပ်(၁၀၀၀)ဖိုး(၃)ကုံး ဈေးနှုန်းတို့ဖြင့်  အရောင်းအဝယ် ဖြစ်လျက်ရှိပါကြောင်း သိရှိရပါသည်။

DOCA(စစ်ကိုင်း)

      မအူပင်မြို့နယ်၊ မအူပင်၊ ဖျာပုံကားလမ်းဘေး၊ ကျုံစုတ်ကျေးရွာ ကုန်းလမ်းနှင့် ရေလမ်းဆုံရာတွင် ၂-၂၅ခုနှစ် မိုးစပါးထွက် လှေထိုးစပါးများ ဈေးကွက်ရနေပြီး ရောင်းဝယ်မှု အောင်မြင်ဖြစ်ထွန်းလျက်ရှိကြောင်း သိရသည်။

   လှေထိုးစပါးဆိုသည်မှာ မအူပင်၊ ကျိုတ်လတ်အစပ်ကျေးရွာများတွင် မိုးရွာပြီးဆိုသည်နှင့် ရေတဖွေးဖွေး မြင်ရပြီး ရေပြင်ကျယ်ဖြစ်လာသည့် ကျေးရွာအုပ်စုများရှိ လယ်များတွင် ကဆုန်လ မိုးမရွာခင် စပါးများ၊ စိုက်ပျိုးပြီး မိုးရွာလာသောအခါ စပါးပင်များ သန်မာကြီးထွားလာပြီး ရေဖွေးဖွေးပေါ်မှာ စိမ်းစိုနေသော စပါးခင်းကြီးများ ဖြစ်ပါသည်။

     ၎င်းလှေထိုးစပါးများသည် နှစ် တစ်နှစ်၏ ဩဂုတ်လလယ်မှစ၍ စပါးစတင်ထွက်ရှိပြီး စပေါ်ကာစ အချိန်တွင် ကျုံစုတ် ကျေးရွာထိပ်တွင် နေ့စဉ်လှေထိုးစပါး တင်း ၃၀၀၀ တင်းခန့် အရောင်းအဝယ်ဖြစ်နေပြီး ဩဂုတ်လကုန် လောက်တွင် စပါးလှိုင်လှိုင်ပေါ်ပြီး တစ်နေ့လျှင် တင်း ၅၀၀၀ ခန့် အရောင်းအဝယ် ဖြစ်လျက်ရှိသည်ကို ကျုံစုတ်ကျေးရွာထိပ်မှ စပါးပွဲစား ဒေါ်သူဇာခင်၏ ပြောပြချက်အရသိရသည်။

    လှေထိုးစပါးအဖြစ်စိုက်ပျိုးသော စပါးများမှာ ဧည့်မထစပါးအုပ်စု ဆာဖိုးသာ၊ 219 , GE-11, စပါးများဖြစ်ကြောင်းနှင့် စပါးစိုက်ပျိုးသောကျေးရွာအုပ်စုများမှာ ကျိုတ်လတ်မြို့နယ်မှ ကျီးချောင်း၊ သပြေကုန်း၊ ကွမ်းခြံကုန်း၊ တမာချိုင့်၊ လက်ပံချောင်း၊ သာယာဝဲ၊ ဖောင်ရိုးဆိပ်၊ လှည်းဆိပ်ဒေသများဖြစ်ပြီး မအူပင်မြို့နယ်မှ မင်းဘော၊ ကျုံစုတ်၊ တာဝှေအရှေ့၊ တာဝှေ့အနောက်၊ ကျီးချောင်း၊ အချော၊ ပိန်းချောင်း၊ ကနူး၊ ကညင်ဝ ဒေသများဖြစ်ကြောင်း  စပါးစိုက်တောင်သူ ဦးကြည်ညွှန့်၏ ပြောပြချက်အရ သိရှိရပါသည်။

    စပါးရောင်းဝယ်မှုနှင့် ပတ်သက်၍ စပါးတင်း ၁၀၀ လျှင် ဆယ်သိန်း ၊ ဆယ်တစ်သိန်းအကြားတွင် အရောင်းအဝယ်ဖြစ်နေပြီး ကျိုတ်လတ်မြို့နယ် ဝေမာဆန်စက်သိူ့ ပေးပို့ အရောင်းအဝယ်ပြုလုပ်ကြောင်း စပါးပွဲစား ဒေါ်သူဇာခင်မှ ထပ်မံရှင်းပြပါသည်။

   မအူပင်မြို့ ရှိ ဆန်စက်များသို့လည်း အနည်းငယ်အရောင်းအဝယ်ဖြစ် ပေးပို့လျက်ရှိကြောင်း သိရှိရပြီး လှေထိုးစပါးများကို အခြောက်ခံစက် များသို့ ပေးပို့၍ အခြောက်ခံလျှင် ငွေကျပ် ၁သိန်းပေးရပြီး အလျော့စပါးအနေဖြင့် တင်း(၂၀)ခန့် ရှိကြောင်းလည်း လေ့လာသိရှိရပါသည်။

    မအူပင်မြို့နယ် ကျုံစုတ်ကျေးရွာထိပ် မအူပင်၊ ဖျာပုံ ကားလမ်းဘေးတွင် လှေထိုးစပါးများ ရောင်းဝယ်မှု ဈေးကွက် ရရှိမှုကို မအူပင်ခရိုင်၊ စားသုံးသူရေးရာဦးစီးဌာနမှ ဒုခရိုင်ဦးစီးမှူး ဦးအောင်ဇော်ဦးနှင့် ဝန်ထမ်းများသည် (၂၂-၈-၂၀၂၅) နေ့တွင်င် ကွင်းဆင်း၍ ဈေးကွက်ရရှိမှု စပါးထွက်ရှိမှုအခြေအနေများနှင့် စပါးအရည်အသွေးဈေးကောင်းမွန်မှုတို့ရှိစေရန် အသိပညာပေး  ဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)