ပြည်တွင်းကုန်သွယ်မှုသတင်း

             မကွေးတိုင်းဒေသကြီး၊ အထက်မင်းလှမြို့၊ ပန်းတော်ပြင်ကျေးရွာအုပ်စု၊ ပန်းတောပြင်ကျေးရွာ တွင် သီးနှံမျိုးစုံစိုက်ပျိုးကြပြီး ပြောင်းသီးနှံများကို စိုက်ဧက ၁၀ ဧကခန့် စိုက်ပျိုးထားရှိကြောင်း သိရသည်။

           ပြောင်းသီးနှံကို ၂၀၂၄ခုနှစ်၊ ဒီဇင်ဘာလလယ်တွင် စတင်စိုက်ပျိုး၍ စိုက်ပျိုးပြီး ၃ လအကြာ တွင် ခူးဆွတ်ရကြောင်း၊ မျိုးအနေဖြင့် ထိုင်ဝမ်ပြောင်းစီးမျိုးကို အဓိကစိုက်ပျိုးကြပြီး တစ်ဧကလျှင် မျိုးထုပ် ၃ ထုပ် ခန့်ကုန်ကျကြောင်း၊ စိုက်ပျိုးရာတွင် ထွန်ကြောင်းဆွဲအစေ့ချစနစ်ဖြင့် မြေအောက်ရေ အသုံးပြုကာ စိုက်ပျိုးကြပြီး စိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ ရေသွင်းခ၊ မြေပြုပြင်ခ နှင့် လုပ်သားခအပါအဝင် တစ်ဧကလျှင် ငွေကျပ် ၄၅၀၀၀၀ ခန့် ကုန်ကျကြောင်း၊ ယခင်နှစ်က အထွက်နှုန်းအနေဖြင့် တစ်ဧကလျှင် ပြောင်းဖူးအရေအတွက် ၄၀၀၀ ခန့်ထွက်ရှိရာ စိုက်ပျိုးမြေ အနေအထားနှင့် သီးနှံဖြစ်ထွန်း အောင်မြင်မှုအပေါ်မူတည်၍ သီးနှံအထွက်နှုန်းများ ကွဲပြားမှုရှိကြောင်း၊ ဈေးနှုန်းအနေဖြင့် ပြောင်းဖူးတစ်ဖူးလျှင် အကြီး၊ အသေးအလိုက် လက်ကားဈေး ငွေကျပ် ၂၅၀-၃၀၀ နှုန်းဖြင့် ရောင်းချရပြီး အကျိုးအမြတ်အနေဖြင့် တစ်ဧကလျှင် ငွေကျပ် ၅၅၀၀၀၀ - ၇၅၀၀၀၀ သိန်းခန့်ရရှိခဲ့ကြောင်း၊ ဈေးကွက်အနေဖြင့် အထက်မင်းလှမြို့၊ ဇေယျာသီရိဈေးနှင့် သရက်-မင်းလှ ကားလမ်းဘေးရှိ ကုန်စိမ်းဒိုင်များသို့ တင်ပို့ရောင်းချကြောင်း ပြောင်းစိုက်တောင်သူတစ်ဦးထံမှ သိရှိရပါသည်။

DOCA(မကွေး)

          မေမြို့ပန်းသည် မြန်မာနိုင်ငံ၏ ရာသီဥတုနှင့် လိုက်ဖက်ညီသောပန်းဖြစ်ပြီး၊ မေလတွင် ပွင့်လေ့ရှိသောကြောင့် “မေမြို့ပန်း”ဟု အမည်တွင်ခဲ့သည်။ မေမြို့ပန်းသည် အဖြူရောင်၊ အဝါရောင် ၊ ပန်းရောင် စသည့်ဖြင့် အရောင်စုံလင်စွာဖြင့် လှပသောပန်းတစ်မျိုးဖြစ်ပြီး လူကြိုက်များသည်။ မေမြို့ပန်းသည် မြန်မာ့ဓလေ့ထုံးတမ်းများတွင် အထူးသဖြင့် ဘာသာရေးနှင့် ပွဲလမ်းသဘင်များတွင် အသုံးပြုလေ့ရှိသည်။ ပန်းပွင့်များကို ဘုရားပန်းအဖြစ် ပူဇော်ခြင်း၊ အိမ်တွင်း အလှဆင်ခြင်းများ ပြုလုပ်လေ့ရှိသည်။

ယခုအခါ ကန့်ဘလူခရိုင်အတွင်း မေမြို့ပန်းများ လှိုင်လှိုင်ထွက်ရှိနေကြောင်း၊ စိုက်ပျိုးမှုအနေ ဖြင့် ကန့်ဘလူမြို့ပေါ်ရပ်ကွက်များနှင့် မြို့အနီးရှိကျေးရွာများတွင် စိုက်ပျိုးကြပြီး ကန့်ဘလူမြို့မဈေး သို့လာရောက်ရောင်းချကြောင်း၊ ဖေဖေါ်ဝါရီလ ပထမပတ်အတွင်း မေမြို့ပန်း(၃)ပင်ပါတစ်စည်းလျှင် (၅၀၀-၇၀၀)ကျပ်၊ (၁၀)စည်းပါတစ်ထုံးလျှင် (၆၅၀၀)ကျပ်ဖြင့်ရောင်းချကြောင်း လူကြိုက်များသော ပန်းဖြစ်သည့်အတွက် အရောင်းအဝယ်သွက်လျက်ရှိကြောင်း ပန်းရောင်းချသူများထံမှ သိရသည်။

DOCA(စစ်ကိုင်း)

          မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်သည် ကြက်သွန်နီသီးနှံကို အဓိကသီးနှံ အဖြစ် နှစ်စဉ်စိုက်ပျိုးလျက်ရှိပြီး မြို့ပေါ်ရှိ ကြက်သွန်နီကုန်စည်ဒိုင်ဈေးကွက်တွင် နေ့စဉ်အ‌ရောင်းအဝယ် ဖြစ်လျက်ရှိပါသည်။ ၂၀၂၅ခုနှစ်၊ ဖေဖော်ဝါရီလ(ပထမပတ်)တွင်  မိုးကြက်သွန်နီ(အသစ်)များ ဈေး အနည်းငယ်မြင့်တက်အရောင်းအဝယ်ဖြစ်လျက်ရှိပြီး ကုန်ဝင်ရောက်မှုနည်းသွားကြောင်း၊ စိုက်ပျိုးမှုများ သော ရွာသစ်ရပ်ကွက် ကိုးတောင့်၊ ရေလယ်ကျွန်း၊ အောက်ဆိပ်၊ ချင်တောင် ကျေးရွာများမှ အများဆုံး ဝင်ရောက်ပြီး တစ်ရက်လျှင် ကြက်သွန်နီ ပျမ်းမျှကုန်ချိန်ပိဿာ (၃)သောင်းမှ (၄)သောင်းထိ ဝင်ရောက်ပြီး တစ်ပတ်အတွင်း ပိဿာချိန်(၂)သိန်းခန့် ဈေးကွက်သို့ ဝင်ရောက်အရောင်းအဝယ်ဖြစ်နေ ကြောင်း သိရသည်။

၂၀၂၅ခုနှစ်၊ ဖေဖော်ဝါရီလ(ပထမပတ်)တွင် ကြက်သွန်နီဈေးနှုန်းမှာ သီးနှံအရည်အသွေးလိုက်၍ တောဈေး(ဂျွန်) တစ်ပိဿာလျှင် အမြင့်ဈေး ကျပ်(၁၈၀၀-၂၂၀၀-၂၃၅၀)ဈေးအသီးသီးဖြင့် အရောင်း အဝယ်ဖြစ်ကြောင်း၊ ယခင်ဇန်နဝါရီလ(စတုတ္ထပတ်)နှင့်ဈေးနှုန်းနှိုင်းယှဉ်ပါက မိုးကြက်သွန်နီ(အသစ်) တစ်ပိဿာလျှင် ကျပ်(၁၀၀)ခန့်ဈေးမြင့်၍ အရောင်းအဝယ်ဖြစ်ပြီး ဆိပ်ဖြူမြို့ ပတ္တမြားဈေးအတွင်း အရောင်းအဝယ်ဖြစ်သော ကြက်သွန်နီတစ်ပိဿာလက်လီဈေးနှုန်းမှာ အရည်အသွေး၊ အရွယ်အစား လိုက်၍ တစ်ပိဿာလျှင် ကျပ်(၁၅၀၀-၂၀၀၀-၃၅၀၀)ဈေးဖြင့် အရောင်းအဝယ်ဖြစ်နေကြောင်း၊ ဈေးကွက် အနေဖြင့် ဆိပ်ဖြူဒေသထွက် ကြက်သွန်နီများကို ရန်ကုန်ဘုရင့်နောင်ပွဲရုံသို့ ကုန်ချိန် အများဆုံးတင်ပို့ပြီး ပြည်ပပို့ကုန်အဖြစ် မြဝတီ၊ မော်လမြိုင်မြို့များမှတစ်ဆင့် ထိုင်း၊ ဗီယက်နမ်နိုင်ငံများသို့ တင်ပို့ လျက်ရှိ ကြောင်း၊ ၂၀၂၅ခုနှစ်၊ ဖေဖော်ဝါရီလ(ပထမပတ်)တွင် မိုးကြက်သွန်နီ ကုန်ချိန်ပိဿာ (၂)သိန်း၊ တန်ချိန် (၃၂၇)တန်ခန့် ကုန်စည်စီးဆင်းခဲ့ကြောင်း ဈေးကွက်မှသိရှိရပါသည်။

DOCA(မကွေး)

          မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့မစည်ပင်သာယာဈေးနှင့် အမှတ်(၂)ဈေးတို့၌ ၂၀၂၅ခုနှစ်၊ ဖေဖော်ဝါရီလ(ပထမပတ်)တွင် အာလူးသီးအသစ်များ အများအပြားဝင်ရောက်အရောင်း အဝယ်ဖြစ်လျက်ရှိရာ ကမ္မ၊ မြစ်ခြေ၊ ပေါက်မြို့နယ်ထွက် အာလူးသီးများသာမက ရှမ်းပြည်နယ်ထွက် အာလူးသီးများလည်း ဝင်ရောက်အရောင်းအဝယ်ဖြစ်လျက်ရှိပါသည်။ ဇန်နဝါရီလ(ပထမပတ်)တွင် ရှမ်းပြည်နယ်မှ ထွက်ရှိသောအာလူးသီးများမှာ အလုံးအရွယ်အစားကိုလိုက်၍ လက်ကားဈေးမှာ အလုံး ကြီးတစ်ပိဿာလျှင် ကျပ်(၆၅၀၀)၊ အလုံးအလတ်တစ်ပိဿာလျှင် ကျပ်(၅၅၀၀)၊ အလုံးသေးတစ်ပိဿာ လျှင် ကျပ်(၅၀၀၀)ဈေးတို့ဖြင့်ရောင်းဝယ်ခဲ့ကြောင်း၊ လက်လီရောင်းချနေသောဈေးမှာ အလုံးကြီး တစ်ပိဿာလျှင် ကျပ်(၈၀၀၀)၊ အလုံးအလတ်တစ်ပိဿာလျှင် ကျပ်(၇၅၀၀)၊ အလုံးသေးတစ်ပိဿာလျှင် ကျပ်(၆၅၀၀)တို့ဖြင့် အရောင်းအဝယ်ဖြစ်ခဲ့ကြောင်း သိရသည်။

          ၂၀၂၅ခုနှစ်၊ ဖေဖေါ်ဝါရီလ(ပထမပတ်)တွင် အာလူးတစ်ပိဿာလျှင် အရည်အသွေးနှင့် အရွယ် အစားအလိုက် ကျပ်(၄၅၀၀-၃၅၀၀)ဈေးအသီးသီးဖြင့် အရောင်းအဝယ်ဖြစ်လျက်ရှိပြီး ယခင်ဇန်နဝါရီလ (ပထမပတ်)နှင့်ဈေးနှုန်းနှိုင်းယှဉ်ပါက အားလူးတစ်ပိဿာလျှင် ကျပ်(၂၀၀၀)ခန့် ဈေးနှုန်းကျဆင်းပြီး အရောင်းအဝယ်ဖြစ်နေကြောင်း၊ နေ့စဉ်ကုန်ချိန်ပိဿာ(၃၅၀၀)ကျော် ဝင်ရောက်လျက်ရှိကြောင်း ဈေး ကွက်မှ သိရှိရပါသည်။   

DOCA(မကွေး)

          မြင်းခြံမြို့သည် မြန်မာနိုင်ငံအလယ်ပိုင်းတွင်တည်ရှိကာ အချက်အချာကျသောမြို့တစ်မြို့ ဖြစ်ပြီး အရောင်းအဝယ်လုပ်ငန်း၊ စိုက်ပျိုးရေးလုပ်ငန်းဖြင့်ဖွံဖြိုးတိုးတက်သောမြို့တစ်မြို့ဖြစ်ပါသည်။ ရာသီအလိုက် သီးနှံမျိုးစုံ စိုက်ပျိုးလျက်ရှိရာ ငရုတ်စိုက်ပျိုးမှုမှာလည်း စိုက်ဧက(၁၄၇၄) ဧကရှိကြောင်း စိုက်ပျိုးရေးဦးစီးဌာနစာရင်းအရသိရှိရသည်။ ငရုတ်သီးမှာ မြန်မာ့ဟင်းလျာ များချက်ပြုတ် စားသောက်ရာတွင် ထမင်းမြိန်စေရန်နှင့် အရောင်းအဆင်းရရှိရန်အတွက် မပါမဖြစ် စားကုန်တစ်မျိုးဖြစ်၍ စားသုံးမှုများပါသည်။ မြင်းခြံမြို့ အေးမြသီတာဈေး၊ မြို့မစည်ပင်သာယာ ဈေးတို့တွင် ၂၀၂၅ ခုနှစ် ဖေဖော်ဝါရီလ ပထမအပတ်တွင် ဖြစ်ပေါ်နေသော ငရုတ်သီးခြောက် ဈေးနှုန်းများမှာ ငရုတ်သီးခြောက် ( အရှည်) တစ်ပိဿာလျှင် ( ၁၅၀၀၀) ကျပ်၊ ကျွန်းပု (ခေါ်) ငရုတ်ပွသေး တစ်ပိဿာလျှင် (၁၅၀၀၀)ကျပ်နှင့် ငရုတ်ပွသေး (အလတ်စား)တစ်ပိဿာလျှင် (၁၂၀၀၀)ကျပ်၊ ငရုတ်သီးကြမ်းမှုန့်တစ်ပိဿာလျှင် (၂၀၀၀၀)ကျပ်ဖြင့် ရောင်းချလျှက်ရှိကြောင်း၊ ဈေးကွက်အတွင်းရောင်းချနေသော ငရုတ်သီးခြောက်များမှာ ဒေသတွင်း ထွက်ရှိမှုများနှင့် ကျောက်ဆည်မြို့၊ မန္တလေးမြို့တို့မှလည်း ဝယ်ယူရောင်းချမှုရှိကြောင်းသိရသည်။

DOCA(မန္တလေး)