ပြည်တွင်းကုန်သွယ်မှုသတင်း

              မအူပင်မြို့သည် ရေခံ၊ မြေခံ၊ ကောင်းသဖြင့် လယ်ယာ၊ ကိုင်း၊ မွေးမြူရေး လုပ်ငန်းများဖြင့် စိုက်ပျိုးထွက်ရှိမှုများကို ပြည်ပတင်ပို့သည့်အထိ လုပ်ကိုင်ဆောင်ရွက် လျက်ရှိ သည်။ မအူပင်အနေဖြင့် ဟင်းသီးဟင်းရွက်စိုက်ဧက ၁၄၃၆၅ ဧက စိုက်ပျိုးကြောင်းသိရသည်။ စိုက်ပျိုးမျု အနေဖြင့် ပြောင်းဖူး၊ မုန်လာ၊ ဗူးသီး၊ ဗုံလုံသီး၊ သခွား၊ ငရုတ်၊ ကိုင်းခရမ်းချဉ်သီး၊ ခရမ်းကျွတ်သီး၊ ခရမ်းသီး၊ ကြက်ဟင်းခါးသီး၊ ပန်းမျိုးစုံ၊ အုန်းသီး၊ ကွမ်းသီး၊ ငှက်ပျော၊ သင်္ဘောသီး၊ မာလကာသီး စသည်ဖြင့် စိုက်ပျိုးကြောင်း သိရသည်။

             မအူပင် အရှေ့ဘက်ကမ်း အရှေ့ပိုင်းရွာတွင် ပန်းဂေါ်ဖီ စိုက်ပျိုးသူ ဦးသောင်းထွန်မှ စိုက်ပျိုးထွက်ရှိ မှုအခြေအနေကို ရှင်းလင်းပြရာ ပန်းဂေါ်ဖီမျိုးကို Royal -900 တံဆိတ်မျိုးကို စိုက်ပျိုးပြီး မျိုး၁ထုတ်ကို ၄၈၀၀၀ကျပ်ဖြင့် ဝယ်ယူစိုက်ပျိုးကြောင်း သိရသည်။ စိုက်ဧက အနေဖြင့် ၁ဧက တစ်ဝက်၏ ဆယ်လန် ၆ခွက် စိုက်ပျိုးထားပြီး မျိုးထုတ်၁ထုတ် အစေ့ ၂၈၀၀ပါ ၃ထုတ်စိုက်ပျိုးသည်။ အပင်ရေ ၈၄၀၀ ပင်စိုက်ပျိုးထားသော်လည်း ၇၅၀၀ ပင်သာ ထွက်ရှိသည်။ ၂၀၂၄ခုနှစ် ၉လပိုင်းတွင် စတင်စိုက်ပျိုးပြီး  ၁လခွဲအကြာတွင် စတင်ထွက်ရှိသည်။ ၂၀၂၅ခုနှစ် ၁လပိုင်း မှာ ပိုမိုထွက်ရှိလာပြီး ၁နေ့ခူးလျှင် ၁၀၀ပွင့်ခန့်ရရှိသည်။ ၁လအတွင်း ဂေါ်ဖီပွင့်များ အပြီးသတ်ခူးကြောင်း သိရသည်။ စိုက်ပျိုးမှုကုန်ကျစရိတ်အနေဖြင့် ၆၀၀၀၀၀ကျပ် ကုန်ကျကြောင်း စိုက်ပျိုးသူထံမှ သိရသည်။

            ဈေးနှုန်း အနေဖြင့် ဂေါ်ဖီ ၁ပွင့် ၁၅၀၀ ကျပ် ဖြင့်ရောင်းချပြီး ရန်ကုန်တင်ပါက ၈၀၀-၁၀၀၀ကျပ် သာဈေးရသည်။ အကျိုးအမြတ်အနေဖြင့် ငွေကျပ် ၆၉၀၀၀၀၀ ခန့် အကျိူးအမြတ် ရရှိသည်။ ပန်းဂေါ်ဖီသည် အကျိုးအမြတ်များ ရရှိသောကြောင့် စီးပွားဖြစ် စိုက်ပျိုးသင့်သော ဟင်းသီးဟင်းရွက်ပင်ဖြစ်ကြောင်း စိုက်ပျိုးသူဦးသောင်းထွန်းမှ ရှင်းလင်းပြောပြခဲ့ကြောင်းသိရှိရပါသည်။

DOCA(ဧရာဝတီ)

            မအူပင်မြို့နယ်တွင် စပါး၊ ပဲ၊ပြောင်းတို့ကို စိုက်ပျိုးသည့်အပြင် ဟင်းသီးဟင်းရွက်များကိုလည်း စီးပွားဖြစ်စိုက်ပျိုးနေကြောင်းသိရသည်။ မအူပင်အနေဖြင့် ဟင်းသီးဟင်းရွက်စိုက်ဧက ၁၄၃၆၅ ဧက စိုက်ပျိုးကြပြီး မအူပင်မြို့ အရှေ့ဘက်ကမ်းကျေးရွာတွင် ကြံဝါနှင့် ကြံညို စိုက်ပျိုးနေကြောင်း သိရသည်။ ကြံဝါကို ဆောင်း၊ နွေတွင် ထွက်ရှိပြီး၊ ကြံညိုသည် မိုးတွင်းကာလမှ ထွက်ရှိကြောင်း စိုက်ပျိုးသူ ဦးထွန်းရင်ထံမှ သိရသည်။

            စိုက်ညို ဆယ်လန် ၆ကွက် ၁ဧကဝက်နှင့် ကြံဝါ ဆယ်လံ ၆ခွက် ၁ဧက ဝက် စိုက်ပျိုးထားသည်။ ကြံမျိုးကို ၁ပင် ၅၀-၁၀၀ကကျပ်ဖြင့် ဝယ်ယူစိုက်ပျိုးပြီး၊ ၁ဧကဝက်တွင် အပင်ရေ ၅၀၀ စိုက်ပျိုးထားပြီး အပင်ထပ်တိုးပွားလာမှုကြောင့် ကြံဝါ ၁၅၀၀ပင်နှင့် ကြံညို ၁၅၀၀ပင် စိုက်ပျိုး ထားသည်။ ကြံဝါကို ၂၀၂၄ခုနှစ် ၇လပိုင်းက စိုက်ပျိုးထားပြီး  အပင်သက်တမ်း ၇လအကြာထွက်ရှိ နေပြီးဖြစ်ကြောင်းနှင့် ကြံညိုကို ၂၀၂၄ခုနှစ် ၁၀လပိုင်း မြစ်ရေ မိုးနှောင်းချိန် စတင်စိုက်ပျိုးပြီး ၂၀၂၅ခုနှစ် ၅လပိုင်မှ ထွက်ရှိမည်ဖြစ်ကြောင်းသိရသည်။ စိုက်ပျိုးမှု ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ ကုန်ကျစရိတ် ကြံညို ၄သိန်း ကုန်ကျပြီး ၊ ကြံဝါ ၄သိန်း ကုန်ကျကြောင်း သိရသည်။

            ကြံဝါ တစ်ချောင်းကို လက်ရှိ ပေါက်ဈေး ၅၀၀ကျပ် ဖြင့်ရောင်းချပြီး၊ ကြံညို တစ်ချောင်းကို ယခင်နှစ်က ၁ချောင်း ၇၀၀ကျပ် ဖြင့် ရောင်းချခဲ့သဘည်။ ကုန်ဈေးနှုန်း ပြောင်းလဲမှုပေါ်မူတည်ပြီး ဈေးရရှိကြောင်း စိုကင်ပျိုးသူထံမှ သိရသည်။ အကျိုးအမြတ်အနေဖြင့် ကြံဝါ ၇၅၀၀၀၀ကျပ် ရရှိ၍  ၃၅၀၀၀၀ကျပ် အကျိုးအမြတ်ရရှိသည်။ ကြံညိုအနေဖြင့် ထွက်ရှိလာသည့်အခါ ဈေးနှုန်း ပြောင်းလဲမှုပေါ်မူတည်၍ ရောင်းချမည်ဖြစ်ကြောင်း၊ တင်ပို့ရောင်းချမှုူအနေဖြင့် မအူပင်၊ ဖျာပုံ သို့တင်ပို့ရောင်းချပြီး အခင်းပြတ် လာရောက်ဝယ်ယူကြောင်း သိရှိရပါသည်။

DOCA(ဧရာဝတီ)

စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့တွင် မြန်မာ့ရိုးရာ ရက်ကန်းလုပ်ငန်း များကို တစ်နိုင်တစ်ပိုင် လုပ်ကိုင်ကြကြောင်း၊ ရက်ကန်းစင်မှ ထွက်ရှိလာသော အထည်များကို ကန့်ဘလူမြို့ပေါ်ရှိဒိုင်များသို့ ရောင်းချကြောင်း၊ ၎င်းတို့မှတဆင့် မန္တလေးမြို့နှင့် အခြားဒေသများသို့ ရောင်းချကြောင်း သိရသည်။

          မြန်မာ့ရိုးရာရက်ကန်းလုပ်ငန်းသည် ရှေးယခင်ကတည်းက လက်ဆင့်ကမ်း ထိန်းသိမ်းလာခဲ့ ကြသည့် လက်မှုအတတ်ပညာဖြစ်ပြီး ရက်ကန်းထည်များမှာ ဒီဇိုင်ဆန်းသစ်လှပသောကြောင့် မြန်မာ အမျိုးသမီးများ ကြိုက်နှစ်သက်စွာ ဝတ်ဆင်သုံးစွဲလျက်ရှိကြောင်း၊ ကန့်ဘလူမြို့တွင်ရောင်းချလျက် ရှိသည့် ရက်ကန်းထည်ဈေးနှုန်းများမှာ မြစ်ကြီးနားထွက်ကချင်လုံချည်တစ်စုံစာလျှင် ၁၀၀၀၀၀ကျပ် မှ ၃၀၀၀၀၀ကျပ်၊ ကန့်ဘလူဒေသထွက်ကချင်လုံချည်တစ်စုံစာလျှင် ၁၀၀၀၀၀ကျပ်မှ ၁၈၀၀၀၀ကျပ် ၊ ကချင်လုံချည်တစ်ထည်လျှင် ၅၅၀၀၀ကျပ်၊ အမျိုးသမီးချည်လက်ကိုင်အိတ်တစ်လုံးလျှင် ၁၀၀၀၀- ၁၅၀၀၀ကျပ်ဖြင့် ရောင်းချလျက်ရှိပြီး ချည်အမျိုးအစားနှင့် ရက်လုပ်ရသည့် အလွှားအရေအတွက် ပေါ်မူတည်၍ ဈေးနှုန်းများကွာခြားမှုရှိကြောင်း မြန်မာ့ရိုးရာရက်ကန်းထည် ရောင်းချသည့်လုပ်ငန်း ရှင်ထံမှ သိရသည်။

DOCA(စစ်ကိုင်း)

         မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်သည် နှင့်အညီ စစ်ကိုင်းတိုင်းဒေသကြီး ၊ ကန့်ဘလူခရိုင်သည်လည်း လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်ကြောင်း ၊ ပဲစဉ်းငုံသီးနှံသည် ကန့်ဘလူခရိုင်၏ အဓိက စိုက်ပျိုးသီးနှံတစ်ခုဖြစ်ကြောင်း၊ ပဲစဉ်းငုံသီးနှံကို ဇူလိုင်လတွင်စတင်စိုက်ပျိုးပြီး ဇန်နဝါရီလတွင် ရိတ်သိမ်းရကြောင်း၊ မြေအနေအထား နှင့်အပင်ပြုစုခြင်းအပေါ်မူတည်၍ အထွက်နှုန်းများကွာခြား မှုရှိကြောင်း သိရသည်။

ပဲစဉ်းငုံသီးနှံမျိုးအနေဖြင့် အစေ့အနီရောင်မျိုးနှင့် အစေ့အဖြူရောင်မျိုးဟူ၍(၂)မျိုးရှိပြီး ဈေးနှုန်းအနေဖြင့် ဖေဖေါ်ဝါရီလ ပထမပတ်အတွင်း ပဲစဉ်းငုံနီ(၁)တင်းလျှင် ၈၃၅၀၀ကျပ်နှင့် ပဲစဉ်းငုံ ဖြူ(၁)တင်းလျှင် ၇၅၀၀၀ကျပ်ရှိခဲ့ရာ ဖေဖေါ်ဝါရီလ ဒုတိယပတ်တွင် ပဲစဉ်းငုံနီ(၁)တင်းလျှင် ၈၅၀၀၀ ကျပ်နှင့် ပဲစဉ်းငုံဖြူ(၁)တင်းလျှင် ၇၈၀၀၀ကျပ်ဖြင့် အရောင်းအဝယ်ဖြစ်နေသောကြောင့် ယခုပတ် အတွင်း ပဲစဉ်းငုံနီ(၁)တင်းလျှင် ၁၅၀၀ကျပ်၊ ပဲစဉ်းငုံဖြူ(၁)တင်းလျှင် ၅၀၀ကျပ်ဈေးနှုန်း မြင့်တက် လာကြောင်း ၊ ဒေသထွက်ပဲစဉ်းငုံများကို ဒေသတွင်းပွဲရုံများမှတဆင့် ရွှေဘိုမြို့၊ မန္တလေးမြို့တို့ရှိ ပွဲရုံများ၊ ကုန်စည်ဒိုင်များသို့ တင်ပို့ရောင်းချကြောင်း၊ သီးနှံရောင်းဝယ်ရေး လုပ်ငန်းရှင်များထံမှ သိရသည်။

DOCA(စစ်ကိုင်း)

         စစ်ကိုင်းတိုင်းဒေသကြီး၊ ကန့်ဘလူခရိုင်၌ ဆီထွက်သီးနှံဖြစ်သည့် နေကြာသီးနှံများလည်း စိုက်ပျိုးကြကြောင်း၊ မိုးစိုက်နေကြာနှင့် ဆောင်းစိုက်နေကြာဟူ၍(၂)မျိုးရှိကြောင်း ဆောင်းနေကြာ ကို ရာသီဥတုပေါ်မူတည်၍ အောက်တိုဘာလတွင် စတင်စိုက်ပျိုးကြပြီး ဖေဖော်ဝါရီလတွင် ရိတ်သိမ်းရကြောင်း၊ ဈေးကွက်အနေဖြင့် နေကြာသီးနှံများကို ကန့်ဘလူမြို့နှင့်ဇီးကုန်းမြို့တို့ရှိ ပွဲရုံများမှ ရွှေဘိုမြို့၊ မန္တလေးမြို့များရှိပွဲရုံများနှင့် ကုန်စည်ဒိုင်များသို့ တင်ပို့ရောင်းချကြောင်း သိရသည်။

နေကြာသီးနှံစိုက်ပျိုးရာတွင် မျိုးအနေဖြင့် ဆင်းရွှေကြာ-၂ မျိုးကို အများဆုံးစိုက်ပျိုးကြပြီး၊ မြေအနေအထားနှင့် အပင်ပြုစုခြင်းအပေါ်မူတည်၍ အထွက်နှုန်းများကွာခြားမှုရှိကြောင်း၊ ဈေးနှုန်း အနေဖြင့် ဖေဖေါ်ဝါရီလပထမပတ်အတွင်း နေကြာတစ်တင်းလျှင် (၅၅၀၀၀)ကျပ်ဖြင့်အရောင်းအ ဝယ်ဖြစ်ခဲ့ပြီး ယခုလဒုတိယပတ်အတွင်း နေကြာတစ်တင်းလျှင် (၅၇၀၀၀)ကျပ်ဖြင့် ရောင်းဝယ် လျက်ရှိသောကြောင့် ဆီနေကြာတစ်တင်းလျှင်(၂၀၀၀)ကျပ် ဈေးနှုန်းမြင့်တက်လာကြောင်း ဒေသ တွင်းပွဲရုံလုပ်ငန်းရှင်များထံမှ သိရသည်။

DOCA(စစ်ကိုင်း)