ပြည်တွင်းကုန်သွယ်မှုသတင်း

           မြင်းခြံခရိုင် မြင်းခြံမြို့တွင် MSME လုပ်ငန်းများမှ တချို့ဖြစ်သော ပဲကြော်လုပ်ငန်း၊ မုန့်ကြွပ်ကြော်လုပ်ငန်းများ၊ အာလူးကြော်လုပ်ငန်းများသည် ဒေသခံများအတွက် အလုပ်အကိုင်များ ရရှိ၍ မိသားစုစားဝတ်နေရေးတဖက်တလမ်းမှ အထောက်အပံ့ရရှိလျက်ရှိပါသည်။ ပဲကြော်လုပ်ငန်း များ လုပ်ကိုင်ရာတွင် ပဲများကိုရေစိမ်ပြီး အခွံချွတ်ရသည့်အတွက် လုပ်သားအနည်းဆုံး(၁၀) ဦးမှ(၃၀)ဦး ခန့်ဖြင့် ပုံမှန်လုပ်ကိုင်နေရပြီး အော်ဒါအမှာများလျှင်ဖြစ်စေ၊ ဈေးကွက်ဝယ်လိုအား ကောင်းလျှင်ဖြစ်စေ လုပ်သားအင်အားများ ပိုမိုအသုံးပြုရကြောင်းနှင့်လုပ်ငန်းခွင်သုံးပဲများသည် ဒေသတွင်းစိုက်ပျိုးထွက်ရှိသော ပဲများကိုသာ အသုံးပြုမှုများကြောင်း သိရသည်။ အဆိုပါလုပ်ငန်း တွင် များသောအားဖြင့် အမျိုးသမီးအများစုနှင့် ကျောင်းပိတ်ရာသီတွင် ကလေးသူငယ်များလည်း မုန့်ဖိုးရရှိရန် မိသားစုဝင်များနှင့်အတူ ကူညီလုပ်ကိုင်ကြသည့်အတွက် နေ့တွက်ကိုက်၍ အလုပ် အကိုင် အဆင်ပြေကြောင်းသိရသည်။ လုပ်အားခများမှာ မိမိလုပ်ကိုင်နိုင်မှုအလိုက် ရရှိသော အရေ အတွက်ဖြင့် တန်ဖိုးသတ်မှတ်ပေးချေးကြရာ လုပ်ငန်းခွင်များကို ရာသီချိန်ခါအလိုက် နံနက် (၀၅:၀၀) နာရီ မှ (၀၆:၀၀)နာရီ ဝန်းကျင် အချိန်ခန့်မှစ၍ လုပ်ငန်းခွင်များဝင်ရောက်နိုင်ကြောင်း၊ ပဲအခွံချွတ်ခ နှုန်းထားများအနေဖြင့်  ပဲတစ်ပြည်(ထောပတ်/ပဲနီ)အခွံနွှာခ (၄၀၀) ကျပ်၊ ပဲကြီးတစ်ပြည် ( ၅၀၀) ကျပ် ရရှိပြီး တစ်ရက်ကို လူတစ်ဦးလျှင် ကျွမ်းကျင်မှုနှင့် အခွံချွတ်ရလွယ်သည့် ပဲအမျိုးအစား အလိုက် (၁၂)ပြည် မှ (၁၅)ပြည် ထိ ရရှိနိုင်ကြောင်း ၊ အခွံချွတ်ရာတွင် ပဲကိုစကောထဲထည့်ပြီး ဘယ်တစ်ဖက် ညာတစ်ဖက်ညှစ်ချရကြောင်း၊ တစ်နေ့လျှင် (၆၀၀၀)ကျပ်မှ (၇၀၀၀) ကျပ်ဝန်းကျင် ထိရရှိပါကြောင်း၊ ကလေး/လူကြီး / လူလတ် အရွယ်မရွေး လုပ်ကိုင်လို့ရပါသောကြောင့် မိသားစု စားဝတ်နေရေး အဆင်ပြေပါကြောင်း ပဲကြော်လုပ်ငန်းခွင်ရှိ ပဲအခွံချွတ်သူများထံမှသိရသည်။

DOCA(မန္တလေး)

          မန္တလေးတိုင်းဒေသကြီး၊တံတားဦးမြို့နယ်အတွင်းရှိ ကျေးလက်နေတောင်သူများသည် စပါး၊ပဲ၊ ပြောင်း၊နှမ်းစသည့် သီးနှံများစိုက်ပျိုးသည့်အပြင် ဟင်းသီးဟင်းရွက် နှင့် သစ်သီးဝလံများကိုလည်း နှစ်စဉ်ရာသီအလိုက်စိုက်ပျိုးကြပါသည် ။ ၄င်းသီးနှံများအနက်မှ  ဆေးဘက်ဝင်  ဟင်းချက်စားသုံး၍  ရသောရုံးပတီသီးနှံများကို ယခင်က မိသားစုစားသုံးရန်နှင့်အပိုဝင်‌ငွေရရှိ‌ရေးအတွက် တစ်နိုင်တစ်ပိုင် စိုက်ပျိုးရာမှ ယခုအခါ စီးပွားဖြစ်စိုက်ပျိုးလာကြပါသည်။ ရုံးပတီသီးသည် ရာသီမရွေးစိုက်ပျိုးနိုင်ပြီး ဝင်ငွေရလွယ်သော သီးနှံတစ်မျိုးဖြစ်သည့်အတွက် တောင်သူများတွက်ခြေကိုက်၍ စိုက်ပျိုးသင့်သော သီနှံတစ်မျိုးဖြစ်ပါသည်။စိုက်ပျိုးသောမျိုးများမှာ ပင်ပုမျိုး၊ပင်လတ်မျိုးနှင့်ပင်မြင့်မျိုးများကို အများဆုံး စိုက်ပျိုးကြပါသည်။(၁)ဧကလျှင် မျိုးစေ့ 10Kg စိုက်ပျိုးရပါသည်။ (၁)ဧက ကုန်ကျစရိတ်အနေဖြင့် (၃၅၀၀၀၀/-)ကျပ်ဝန်းကျင်ခန့်ကုန်ကျကြောင်း၊စိုက်ပျိုး၍ ပန်းပွင့်ပြီး တစ်ပတ်အကြာတွင် ခူးဆွတ်ရ ပါသည်။ထိုသို့ခူးဆွတ်မှသာ စားကောင်းသော အနေတော်ရုံးပတီသီးများရရှိမည်ဖြစ်ပါသည်။ ခူးဆွတ်မှု အနေဖြင့်(၃)ရက်တစ်ကြိမ်ခူးဆွတ်ရကြောင်း၊ စျေးနှုန်းအနေဖြင့် (၁)ပိဿာလျှင်(၂၀၀၀-၂၅၀၀)ကျပ် စျေးနှုန်းများရရှိပြီး (၁)ဧကအထွက်နှုန်းအနေဖြင့် ပိဿာ(၁၂၀၀)ခန့်ထွက်ရှိကြောင်း၊အကျိုးအမြတ် အနေဖြင့် စျေးနှုန်းအပေါ်မူတည်ပြီး အကျိုးအမြတ်ရရှိကြောင်း၊ရုံးပတီသီးစားသုံးခြင်းဖြင့် ဆီးချို ရောဂါအတွက် သင့်တော်သော အစားအစာဖြစ်ပြီး နှလုံးရောဂါနှင့်ကင်ဆာရောဂါများကိုလည်း လျော့နည်းသက်သာပျောက်ကင်း‌စေပါသည်။ ဒူးနှင့်ပတ်သက်သောရောဂါများ နှင့် ရိုးတွင်းချဉ်ဆီကို အားကောင်းစေကြောင်းသိရှိရပါသည်။ စားသုံးသူတွေအတွက် ဆေးဘက်လည်းဝင် မိသားစု အပိုဝင်ငွေတိုးစေသည့်အတွက် ဟင်းစားရုံးပတီပင်များအား တိုးချဲ့စိုက်ပျိုးသင့်သောသီးနှံတစ်မျိုး ဖြစ်ပါကြောင်း ရေးသားတင်ပြအပ်ပါသည်။

DOCA(မန္တလေး)

မန္တလေးတိုင်းဒေသကြီး၊ ကျောက်ဆည်ခရိုင်သည် သီးနှံမျိုးစုံအောင်မြင်ဖြစ်ထွန်းလျှက်ရှိပြီး ဆီထွက်သီးနှံတစ်မျိုးဖြစ်သည့် နှမ်းသီးနှံကိုလည်း တစ်နှစ်ပတ်လုံးစိုက်ပျိုးလာကြပါသည်။ ၂၀၂၄- ၂၀၂၅ဘဏ္ဍာနှစ်တွင် ဆောင်းနှမ်းစိုက်ဧက ခရိုင်အတွင်း(၁၁၈၆၇)ဧကစိုက်ပျိုးထားရှိပြီး ဖေဖော်ဝါရီလ ပထမအပတ်မှစတင်၍ ရိတ်သိမ်းလျှက်ရှိပါသည်။စဉ့်ကိုင်မြို့နယ်တွင်(၁၀၈၈)ဧက စိုက်ပျိုးထားရှိ ကြောင်း ၊ ရိတ်ဧကအနေဖြင့်(၁၀၀၅)ဧကရိတ်သိမ်းပြီး အထွက်တင်းအနေဖြင့် (၉-၁၀)တင်းထွက်ရှိ ကြောင်း၊ ခရိုင်ကြေးတိုင်နှင့်မြေစာရင်းဦးစီးဌာန၏ စာရင်းများအရသိရှိရသည်။ ဆောင်းနှမ်းစိုက်ပျိုးမှု (၁)ဧက ကုန်ကျစရိတ်အနေဖြင့် မျိုး၊သွင်းအားစု၊လုပ်သားခအပါအဝင် စုစုပေါင်း(၃၅၀၀၀၀/-)ကျပ် ခန့်ကုန်ကျခဲ့ကြောင်း၊ယခင်နှစ်အကျိုးအမြတ်အနေဖြင့် နှမ်းဖြူတစ်တင်းလျှင်(၁၃၃၀၀၀/-)ကျပ်၊ နှမ်းညိုတစ်တင်းလျှင်(၁၀၃၀၀၀/-)ကျပ်၊ နှမ်းနက်တစ်တင်းလျှင်(၈၀၀၀၀/-)ကျပ်၊နှမ်းဆီတစ်ပိဿာ လျှင်(၁၃၀၀၀/-)ကျပ်ဖြင့်ရောင်းချရသောကြောင့် စိုက်ပျိုးစရိတ်နှုတ်ပြီးပါက(၈၀၀၀၀၀/-)ကျပ်ကျော် မြတ်ကြောင်း၊ယခုလက်ရှိ နှမ်းစျေးနှုန်းအနေဖြင့်နှမ်းဖြူတစ်တင်းလျှင်(၁၃၅၀၀/-)ကျပ် ၊ နှမ်းညို တစ်တင်းလျှင်(၉၉၀၀၀/-)ကျပ် ၊ နှမ်းနက်တစ်တင်းလျှင်(၁၀၀၀၀၀/-)ကျပ် ၊ နှမ်းဆီတစ်ပိဿာလျှင် (၁၆၀၀၀/-)ကျပ်ဖြင့်ရောင်းဝယ်လျှက်ရှိပြီး တောင်သူများမှ မြို့ပေါ်ပွဲရုံများသို့ တိုက်ရိုက်ရောင်းချကြ ကြောင်း၊ပွဲရုံများမှတဆင့် ရန်ကုန်၊မန္တလေးမြို့များသို့ တင်ပို့ရောင်းချလျှက်ရှိပါသည် ။ နှမ်းစျေးနှုန်း များကောင်းမွန်သောကြောင့် တောင်သူများ အကျိုးအမြတ်ဖြစ်ထွန်းကြောင်း ၊ စဉ့်ကိုင်မြို့နယ် ၊ ရွာတော်ရွာမှ နှမ်းစိုက်တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

မန္တလေးတိုင်းဒေသကြီး ၊ ကျောက်ဆည်ခရိုင်သည် ဆည်ရေသောက်ဒေသဖြစ်သောကြောင့် သီးနှံမျိုးစုံ စိုက်ပျိုးဖြစ်ထွန်းလျှက်ရှိရာ ၄င်းသီးနှံများအနက် ပဲတီစိမ်းသီးနှံကို ၂၀၂၄- ၂၀၂၅ဘဏ္ဍာနှစ် တွင်ကျောက်ဆည်မြို့နယ်တွင်(၂၄၈၀)ဧက ၊ မြစ်သားမြို့နယ်တွင်(၁၂၉၀)ဧက ၊ စုစုပေါင်း(၃၇၇၀)ဧက စိုက်ပျိုးပြီးစီးပြီဖြစ်ကြောင်း၊ ခရိုင်ကြေးတိုင်နှင့်မြေစာရင်းဦးစီးဌာန၏ စာရင်းများအရသိရှိရသည်။ ပဲတီစိမ်းကို မျိုးအနေဖြင့် ကျောက်စိမ်းမျိုး နှင့် ရေဆင်း-၁၁ မျိုးများကိုသာ အများဆုံးစိုက်ပျိုးကြ ကြောင်း၊ (၁)ဧက ကုန်ကျစရိတ်အနေဖြင့်(၃၀၀၀၀၀/-)ကျပ်ဝန်းကျင်ခန့်ကုန်ကျကြောင်း ၊ ပဲတီစိမ်း (ဆောင်း)ကို အောက်တိုဘာလ နှင့် နိုဝင်ဘာလများတွင် စိုက်ပျိုးကြပြီး ၊ ယခုအချိန်တွင်အပင်များ အောင်မြင်ဖြစ်ထွန်းလျှက်ရှိကြောင်း၊ယခင်နှစ်စျေးနှုန်းအနေဖြင့် ပဲတီစိမ်းတစ်တင်းလျှင်(၅၅၀၀၀/-) ကျပ် ၊ အထွက်နှုန်းအနေဖြင့်(၁၁-၁၂)တင်းခန့်ထွက်ရှိကြောင်း ၊ (၁)ဧကအကျိုးအမြတ်အနေဖြင့် (၃၀၀၀၀၀/-)ကျပ်ကျော်မြတ်ခဲ့ကြောင်း၊ယခုအချိန်တွင် ပဲတီစိမ်းများ ထွက်ပေါ်ခြင်းမရှိသေးသော်လည်း စျေးနှုန်းအနေဖြင့် ပဲတီစိမ်းတစ်တင်းလျှင်(၇၅၀၀၀/-)ကျပ် စျေးနှုန်းများဖြင့် အရောင်းအဝယ်ဖြစ်နေ ကြောင်း၊ ပဲတီစိမ်းကို တောင်သူများမှပွဲရုံများသို့ သွားရောက်ရောင်းချကြကြောင်း၊ ပွဲရုံများမှတဆင့် ရန်ကုန်၊ မန္တလေးမြို့များသို့ တင်ပို့ရောင်းချကြကြောင်း ၊ ပဲတီစိမ်းများ လှိုင်လှိုင်ထွက်ပေါ်ချိန်တွင် အထွက်နှုန်းနှင့်စျေးနှုန်းများ ကောင်းမွန်ပါက အကျိုးအမြတ် ပိုမိုရရှိနိုင်မည်ဖြစ်ကြောင်း ၊ ပဲတီစိမ်း စိုက်ပျိုးသော တောင်သူတစ်ဦး၏ ပြောကြားချက်အရသိရှိရပါသည်။

DOCA(မန္တလေး)

မန္တလေးတိုင်းဒေသကြီး၊ ကျောက်ဆည်ခရိုင်သည် ရေစီးရေလာကောင်းမွန်သော ဆည်ရေ သောက်ဒေသတစ်ခုဖြစ်ပြီး စိုက်ပျိုးသော သီးနှံများအောင်မြင်ဖြစ်ထွန်းလျှက်ရှိပါသည်။စပါး၊ပဲမျိုးစုံ သီးနှံများအပြင်စားဖိုဆောင်သီးနှံတစ်မျိုးဖြစ်သောကြက်သွန်နီသီးနှံကိုလည်းစိုက်ပျိုးလျှက်ရှိပါသည်။ ခရိုင်အတွင်း ကြက်သွန်နီ(ဆောင်း) စိုက်ဧက(၂၈၀၂၀)ဧက စိုက်ပျိုးထားရှိပြီး ကျောက်ဆည်မြို့နယ် တွင်(၈၉၇၅)ဧက၊စဉ့်ကိုင်မြို့နယ်တွင်(၃၅၁၅)ဧက၊မြစ်သားမြို့နယ်တွင်(၁၅၅၃၀)ဧက စိုက်ပျိုးထားရှိ ကြောင်း ခရိုင်ကြေးတိုင်နှင့်မြေစာရင်းဦးစီးဌာန၏ စာရင်းများအရသိရှိရသည်။ဇန်နဝါရီလနောက်ဆုံး ပတ်နှင့်ဖေဖော်ဝါရီလ ပထမပတ်အတွင်း (ဆောင်း)ကြက်သွန်နီများ စျေးကွက်အတွင်း ဝင်ရောက် လျှက်ရှိကြောင်းသိရှိရပါသည်။ (ဆောင်း)ကြက်သွန်နီ စိုက်ပျိုးထုတ်လုပ်မှု ကုန်ကျစရိတ်အနေဖြင့် မျိုး ၊ သွင်းအားစု ၊ လုပ်သားခအပါအဝင် စုစုပေါင်း(၃၂)သိန်းကျပ်ခန့် ကုန်ကျကြောင်း၊မျိုးအနေဖြင့် မြစ်သားရွှေဖလားမျိုးမှန် နှင့်‌ရွှေဖလားထိပ်မောက်မျိုးများကို အများဆုံးစိုက်ပျိုးကြပါသည်။ စိုက်ပျိုးမှု တွင်မျိုးစေ့ကိုပျိုးထောင်၍ ပျိုးသက်ရင့်ချိန်တွင် ဘောင်စိုက်စနစ်ဖြင့်စိုက်ပျိုးကြပါသည် ။ မြို့နယ် အတွင်းအများဆုံးစိုက်ပျိုးသောရွာများမှာ ကသဲကုန်း၊သိုတန်၊ငါးမြွေကုန်း၊ ပင်းချား နှင့် လက်ဝဲရွာများ မှအများဆုံးစိုက်ပျိုးကြပါသည် ။ ကြက်သွန်နီ(၁)ဧက အထွက်နှုန်းအနေဖြင့် (၂၄၀၀-၂၅၀၀)ပိဿာ အထိထွက်ရှိကြောင်း ၊ မြေဆီ ၊ မြေသြဇာကျွေးသည့်အပေါ်မူတည်၍ အလုံးများသန်၍အထွက်ပို ကြောင်း၊ကြက်သွန်နီ တောဝယ်လက်များအနေဖြင့် ကြီး၊လတ်၊သေးအရော တစ်ပိဿာလျှင်(၂၆၀၀/) ကျပ်ဖြင့်ဝယ်ယူကြောင်း ၊ မန်‌သေ‌၊ မန်ခြောက်ပါက (၁)ပိဿာလျင်(၂၇၀၀/-)ကျပ်ဖြင့် ဝယ်ယူလျှက်ရှိ ကြောင်း ၊ ယခုလက်ရှိစျေးကွက် အတွင်း ကြက်သွန်နီ ပေါက်စျေးနှုန်းအနေဖြင့် လက်လီ (အကြီး) တစ်ပိဿာလျှင်(၃၈၀၀/-)ကျပ်၊ (အလတ်)တစ်ပိဿာလျှင်(၃၅၀၀/-)ကျပ်၊ (အသေး)တစ်ပိဿာလျှင် (၂၈၀၀/-)ကျပ် ၊ လက်ကား (အကြီး) တစ်ပိဿာလျှင်(၃၃၀၀/-)ကျပ်  (အလတ်) တစ်ပိဿာလျှင် (၃၂၀၀/-)ကျပ်၊(အသေး)တစ်ပိဿာလျှင်(၂၅၀၀/-)ကျပ်ဖြင့်ရောင်းဝယ်လျှက်ရှိကြောင်း၊ရောင်းဝယ်မှု စျေးကွက်အနေဖြင့် ပွဲစားများမှအခင်းထဲသို့ တိုက်ရိုက်ဝယ်ယူသူများရှိသလို အချို့တောင်သူများမှာ မန္တလေးပွဲရုံများသို့လည်း သွားရောက်‌ရောင်းချကြကြောင်း ၊ ပွဲရုံများမှတဆင့် အဆင့်ခွဲသန့်စင်ပြီး ရန်ကုန်မြို့သို့တင်ပို့ ရောင်းချလျှက်ရှိကြောင်းသိရှိရပြီး ကြက်သွန်နီ(၁)ဧက အကျိုးအမြတ်အနေဖြင့် စိုက်ပျိုးထုတ်လုပ်မှုစရိတ်နှုတ်ပြီး (၃၀)သိန်းခန့်  အမြတ်ရရှိပါကြောင်း ၊ ကြက်သွန်နီသီးနှံကို နှစ်စဉ် စိုက်ပျိုးသော ကသဲကုန်းကျေးရွာမှ တောင်သူတစ်ဦး၏ ပြောကြားချက်အရသိရှိရပါသည်။

DOCA(မန္တလေး)